[ಕವಿತಾ] ಘುಸ್ಪಲ್ಲೆಂ ಮನ್ (- ಮಾಯ್ರನ್ ಜೇಸನ್ ಬಾರೆಟ್ಟೊ)

ಘುಸ್ಪಲ್ಲೆಂ ಮನ್

ಫುಟನ್ ಲ್ಹಾರಾಂ ಮಿಟಾಚಿಂ
ದರಿಯಾ ಪಳೆವಂಕ್ ದಿಸ್ತಾ ಘಾಮೆಲಾ
ಶಿಂವ್ರಾಯ್ಲ್ಲೆಂ ಉದಕ್ ಆಸುನ್ ಪರಿಯಾನ್
ದರಿಯಾ ಆಶೆವ್ನ್ ಉದ್ಕಾಕ್ ತಾನೆಲಾ
ಭಾಂಗಾರ್-ಶ್ರಿಂಗಾರ್ ನ್ಹೆಸುನ್ ಪಾಸುನ್
ಮನಿಸ್ ಸಗ್ಳಚ್ ಥರ್ಥರ್ಲಾ

ನಿಳ್ಯಾ ಮಳ್ಬಾರ್ ಚಕ್ಚಕ್ತಾತ್
ಕಿರ್ಣಾ ಬಿಟ್ಬಿಟ್ಯಾ ಸುರಿಯಾಚಿಂ
ಅಂತ್ರಾಳ್ ಲಕ್ಲಕ್ ಭಗುನ್ ಲೆಗಿತ್
ಭುಕೆಲಾ ಗಿರಾಸಂಕ್ ಕಿರ್ಣಾ ಉಜ್ವಾಡಾಚಿಂ
ಉಠಿಯೆಂತ್ ಹಾತ್ಯೆರಾಂ ಎಕ್ಠಾವ್ನ್ ಸಯ್ತ್
ಮನಾಂತ್ ಚಿತ್ನಾಂ ಭಿರಾಂತಿಚಿಂ

ಝಾಡಾಂಪೆಡಾಂ ಲಕ್ತಾತ್
ಜಳ್ಜಳಿತ್ ಬಳಿಶ್ಟ್ ವಾರ್ಯಾಚೆರ್
ಆಂಗ್ ಹಾಲನಾಂ ಮ್ಹಣ್ ಫುತ್ಫುತ್ತಾತ್
ಸುಕ್ಣಿಂ ಬಸುನ್ ಖಾನ್ಡ್ಯಾಂಚೆರ್
ಚುಲಿಚೆರ್ ಪೆಜೆಚೊ ನಿಸ್ ವತ್ತಾ
ಪುಣ್ ಜೆವ್ಣಾಚೊ ದುಬಾವ್ ಮನಾಚೆರ್

ಮಿರ್ಗ್ ಲಾಗ್ತಾನಾಂ ಕುಪಾಂ ಆಪ್ಟತಾತ್
ಸಡುನ್ ಘಸ್ಘಶಿತ್ ವ್ಹಾಳ್ ಉದ್ಕಾಚೆ
ಬೆಬೊ ಶಿಣ್ ಕರುನ್ ಬಡ್ಬಡ್ಟಾ
ಆಜುನ್ ಯೆನಾಂತ್ ಮ್ಹಣ್ ದಿಸ್ ಪಾವ್ಸಾಚೆ
ಸಂತಸಾಚ್ಯಾ ಪಾವ್ಲಾಂ ಕಣ್-ಕಣಿಂ
ಮನ್ ನಿಯಾಳ್ಟಾ ಕಶ್ಟ್ ಜಿವಿತಾಚೆ

ದುರ್ದವ್ಯಾ ಮನಿಸ್ ಸಗ್ಳಚ್ ಸಾನ್ಡ್ಲಾ
ಮನಾಕ್ ರೆವಡನ್ ವಾಯ್ಟಾಚ್ಯೊ ಸಾಂಕ್ಳಿಯೊ
ದೆವಾ ಆಸ್ಣ್ಯಾಚೊ ದಿವೊ ಪಾಲಯ್ಲಾ
ಕಾನಾಂತ್ ರಿಗವ್ನ್ ಖಬ್ರೊಕಾಣಿಯೊ
ಮನ್ಶಾಚೆಂ ಮನ್ ಘುಸ್ಪಲಾ
ಪಳೆವ್ನ್ ಘಡ್ಟಲಿಯೊ ಘಡ್ಣಿಯೊ

 ******

- ಮಾಯ್ರನ್ ಜೇಸನ್ ಬಾರೆಟ್ಟೊ. [ಜುಲಾಯ್, 2020]

[kovita] Ghuspol'lem Mon (- Myron Jeson Barreto)

Ghuspol’lem Mon

Futton lharam mittachim
Doria polleunk dista ghamela
Xinvrail’lem udok asun porian
Doria axeun udkak tanela
Bhangar-xringar nhesun pasun
Monis soglloch thorthorla

Nillea mollbar chokchoktat
Kirnna bittbittea suriachim
Ontrall loklok bhogun legit
Bhukela girasonk kirnna uzvaddachim
Utthient hatyeram ektthaun soit
Monant chitnam bhirantichim

Zhaddam-peddam loktat
Zollzollit bollixtt vareacher
Ang halonam mhonn futfut’tat
Suknnim bosun khanddeancher
Chulicher pezecho nis vot’ta
Punn jevnnacho dubav monacher

Mirg lagtanam kupam apttotat
Soddun ghosghoxit vhall udkache
Bebo xinn korun boddboddtta
Azun yenant mhonn dis pausache
Sontosachea paulam konn-konnim
Mon niyalltta koxtt jivitache

Durdovya monis soglloch sanddla
Monak revoddon vaittacheo sankllio
Deva asnneacho divo paloila
Kanant rigoun khobro-kannio
Mon’xachem mon ghuspola
Polleun ghoddttolio ghoddnnio

******

- Myron Jeson Barreto. [Jul, 2020]

[कविता] घुस्पल्लें मन (- मायरन जेसन बारेट्टो)

मनीस एक विचित्र जीव ह्या संसारांतलो. विचित्र कित्याक म्हळ्यार, मनीस फटिंक वेगिंच पात्येता पूण सताक हजार सवालां विचार्ता. सर्वांक सत जाय पूण सताची वळोक सरवांक आसा? हें प्रश्न खरेंच अधुरें प्रश्न. देकून कानाक आयकल्ल्याक सत म्हणून लेकून आयच्या समाजेंत आमी जियेवन आसांव. आनी असल्या फटिंक वांटून समाजेक दोडून, मोडून पिड्ड्यार करून राज्वटकी चलयतले भुद्वंत्कायेन जियेवन आसात.

- सं

[कविता] घुस्पल्लें मन (- मायरन जेसन बारेट्टो)

घुस्पल्लें मन

फुटन ल्हारां मिटाचीं
दरिया पळेवंक दिसता घामेला
शिंवरायल्लें उदक आसून परियान
दरिया आशेवन उदकाक तानेला
भांगार-श्रिंगार न्हेसून पासून
मनीस सगळच थर्थरला

निळ्या मळबार चकचक्तात
किर्णा बिटबिट्या सुरियाचीं
अंत्राळ लकलक भगून लेगीत
भुकेला गिरासंक किर्णा उज्वाडाचीं
उठियेंत हात्येरां एकठावन सयत
मनांत चित्नां भिरांतिचीं

झाडांपेडां लक्तात
जळजळीत बळिश्ट वाऱ्याचेर
आंग हालनां म्हण फुत्फुत्तात
सुकणीं बसून खानड्यांचेर
चुलिचेर पेजेचो नीस वत्ता
पूण जेवणाचो दुबाव मनाचेर

मीर्ग लाग्तानां कुपां आपटतात
सडून घसघशीत व्हाळ उदकाचे
बेबो शीण करून बडबडटा
आजून येनांत म्हण दीस पावसाचे
संतसाच्या पावलां कण-कणीं
मन नियाळटा कश्ट जिविताचे

दुर्दव्या मनीस सगळच सानड्ला
मनाक रेवडन वायटाच्यो सांकळियो
देवा आसण्याचो दिवो पालयला
कानांत रिगवन खबरोकाणियो
मनशाचें मन घुस्पला
पळेवन घडटलियो घडणियो

******

- मायरन जेसन बारेट्टो. [जुलाय, २०२०]

ದಾಯ್ಜ್.ಕೊಮ್