[ಕವಿತಾ] ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ (- ಎಡ್ವಿನ್ ಫೆರ್ನಾಂಡಿಸ್)

ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ

ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ
ತಿಚ್ಯಾ ಹಾತಾಂತ್ ಬೊಡಿ
ಚಲ್ತಾ ಧರುನ್ ವಣ್ಟಿಯೊ
ಯಾದಿ ತಿಚ್ಯೊ ಘುಸ್ಪಲ್ಯಾತ್
ಎಕ್ಲಿಚ್ ರಾವ್ತಾ ಘರಾಂತ್
ತೆಲ್ ಘಾಲುನ್ ಪೆಟಯ್ತ್ ಪಣ್ಟಿಯೊ

ಆಯಿ ತುಂವೆಂ ವೆಂಗೆಂತ್ ಖೆಳಯ್ಲೆಂ
ಉಬ್ ದೀವ್ನ್ ವಾಡಯ್ಲೆಂ ಶಿಕಯ್ಲೆಂ ಮೊಗಾನ್
ಭರಯ್ಲೆಂ ಕರುನ್ ಶಿತಾಚ್ಯೊ ಉಂಡಿಯೊ
ಶಾಳೆಂತ್ ಕೊಲೆಜಿಂತ್ ವೆತಾಲಿಂ ತೆನ್ನಾಂ
ತ್ರಾಸಾಂನಿ ಕರುನ್ ದಿತಾಲಿ ಮ್ಹಾಕಾ
ಗಡ್-ಗಡ್ ಲಾಡ್ವಾಂಚಿಯೊ ಗುಳಿಯೊ

ಸುಖಾಂತ್ ದುಖಾಂತ್ ಸದಾಂಚ್ ಮ್ಹಜ್ಯಾ
ಸಾಂಗಾತಾನ್ ರಾವ್ಲಿ ಆಯಿ ಮ್ಹಜಿ
ಆಯ್ಜ್ ಉಗ್ಡಾಸ್ ಯೆತಾತ್ ತ್ಯೊ ಸುರ್ಬುಸ್ ಯಾದಿ
ಲಗ್ನ್ ಕರುಂಕ್ ಮ್ಹಾಕಾ ತುಂವೆಂ
ಆಶಿಲ್ಲೆಂ ತಿತ್ಲೆಂಯ್ ವಿಕ್ಲೆಂ
ಆನಿ ಘರ್ ಆಮ್ಚೆಂ ಕೆಲೆಂ ಖಾಲಿ

ಆಯಿ ಹ್ಯಾ ವೆಳಾರ್ ತುಕಾ ಗರಜ್ ಮ್ಹಜಿ
ಪುಣ್ ಮ್ಹಾಕಾ ಪಡ್ಲ್ಯಾ ಘೊವಾಚಿ ಚಾವಿ
ಚಿಂತುನ್ ಕಪ್ಲಾಕ್ ಪಡ್ಟಾತ್ ಮಿರಿಯೊ
ಕಸ್ಲೆಂ ಕಾಯ್ ನಶಿಬ್ ಮ್ಹಜೆಂ
ಕೊಣಾಕಚ್ ಆಧಾರ್ ತಿಕಾ ನಾಂ
ದೆವಾ ತುಂಚ್ ಪೆಟಯ್ ತಿಚ್ಯೊ, ಉಜ್ವಾಡಾಚಿಯೊ ಪಣ್ಟಿಯೊ

ದೆವಾ ! ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ

 ******

*ಆಯಿ = ಆವಯ್

- ಎಡ್ವಿನ್ ಫೆರ್ನಾಂಡಿಸ್. [ಜುಲಾಯ್, 2020]

[kovita] Ayi mhoji zanntti zalea (- Edvin Fernandes)

Ayi Mhoji Zanntti Zalea

Ayi mhoji zanntti zalea
Tichea hatant boddi
Cholta dhorun vonnttio
Yadi tichio ghuspoleat
Eklich ravta ghorant
Tel ghalun pettoit ponnttio

Ayi tunvem vengent khelloilem
Ub diun vaddoilem xikoilem mogan
Bhoroilem korun xitachio unnddio
Xallent kolejint vetalim ten’nam
Trasamni korun ditali mhaka
Godd-godd laddvanchio gullio

Sukhant dukhant sodanch mhojea
Sangatan ravli ayi mhoji
Aiz ugddas yetat tio surbus yadi
Logn korunk mhaka tunvem
Axil’lem titlem-i viklem
Ani ghor amchem kelem khali

Ayi hea vellar tuka goroz mhoji
Punn mhaka poddlea ghovachi chavi
Chintun koplak poddttat mireo
Koslem kai noxib mhojem
Konnachoch adhar tika nam
Deva tunch pettoi tichio, uzvaddachio ponnttio

Deva! Ayi mhoji zanntti zalea

******

- Edvin Fernandis. [Jul, 2020]

[कविता] आयी म्हजी जाणटी जाल्या (- एडवीन फेर्नांडीस)

संसारांत जियेंवची हर जीविलागीं जेदनां ’आवय’ येता, तेदनां ती तिचेसवें दयाळाय, निस्वार्थी मोग, तशेंच उत्रांनी वर्णुंक जायनासलो साक्रिफीस हाडून येता. पूण तिच्या मोगाच्या दऱ्याच्या एकेका थेंब्याक समजुंक सक‌ल्लीं कोण‌यी आसुंक साध्य आसा? हें प्रश्न ह्या कवितेंत उभें केल्लें दिसून येताना कविएच्यो वळी सोभीत काणी सांगून‌च वेतात.

- सं

[कविता] आयी म्हजी जाणटी जाल्या (- एडवीन फेर्नांडीस)

आयी म्हजी जाणटी जाल्या

आयी म्हजी जाणटी जाल्या
तिच्या हातांत बडी
चल्ता धरून वणटियो
यादी तिचियो घुस्पल्यात
एकलीच रावता घरांत
तेल घालून पेटयत पणटियो

आयी तुंवें वेंगेंत खेळयलें
ऊब दीवन वाडयलें शिकयलें मगान
भरयलें करून शिताचियो उणडियो
शाळेंत कलेजिंत वेतालीं तेन्नां
त्रासांनी करून दिताली म्हाका
गड-गड लाडवांचियो गुळियो

सुखांत दुखांत सदांच म्हज्या
सांगातान रावली आयी म्हजी
आयज उगडास येतात तियो सुरबूस यादी
लग्न करुंक म्हाका तुंवें
आशिल्लें तितलेंय विकलें
आनी घर आंचें केलें खाली

आयी ह्या वेळार तुका गरज म्हजी
पूण म्हाका पडल्या घवाची चावी
चिंतून कपलाक पडटात मीऱ्यो
कसलें काय नशीब म्हजें
कणाचच आधार तिका नां
देवा तुंच पेटय तिचियो, उज्वाडाचियो पणटियो

देवा ! आयी म्हजी जाणटी जाल्या

******

-  एडवीन फेर्नांडीस. [जुलाय, २०२०]

ದಾಯ್ಜ್.ಕೊಮ್