[ಕವಿತಾ] ಆಬಾಚಿ ಸತ್ರಿ (- ಎಲಿಜಾ ಫೆರ್ನಾಂಡಿಸ್ ಪಾಂಗ್ಳಾ)

ಆಬಾಚಿ ಸತ್ರಿ

ಮ್ಹಜೊ ಆಬ್ ಸರ್ವಾಂಕ್ ಮೊಗಾಚೊ
ಜಿವಾಚಿ ಗಾಂಟ್ ಹಾಂವ್ ತಾಚೊ
ಪುಡ್ವೆಂ-ಜಿಬ್ಬೊ-ಮುಂಡಾಸ್ ಹಾತಾಂತ್ ಸತ್ರಿ
ವಿಸ್ರನಾಸ್ತಾಂ ಘೆವ್ನ್ ಬಗ್ಲೆಕ್ ಕರಿ ಸವಾರಿ

ಭಗ್ತಾ ಖುಶಾಲಾಯ್ ತಾಚೆ ಸಂಗಿ
ಸವಾರಿ ಕರುಂಕ್ ಗಾಂವಾ ಭಂವಾರಿಂ
ಸಗ್ಳೆ ಬಾಗಯ್ತಾತ್ ಮಾನ್ ಆಬಾಕ್
ಉಸ್ವೊನ್ ಧರುನ್ ಮರ್ಜೆನ್ ಚಲ್ತಾನಾ

ಭೆಟ್ ತಾಚಿ ಸಭಾರ್ ಘರಾಂಕ್
ಪಿಡೆ ಶಿಡೆಂತ್ ಆಸ್‍ಲ್ಲ್ಯಾಂಕ್ ಆಧಾರ್
ಕುಮೊಕ್ ಕರುಂಕ್ ಕರಿನಾ ಘಳಾಯ್
ಗತ್-ಆಧಾರ್ ನಾತ್ಲೆಲ್ಯಾಂಕ್ ತೊಚ್ ಜಾಯ್

ಪಾವ್ಸಾ-ವೊತಾಂತ್ ಹಾಂವ್ ತಾಚೊ ಆಧಾರ್
ಪುರಾಸಣೆಂತ್ ಬಸ್ತಾ ಘೆವ್ನ್ ಉಸ್ಕ್ಯಾರ್
ಅಸಲೆಂ ಭಾಗ್ ಮೆಳಾತ್ ತರೀ ಕೊಣಾಕ್
ದೆಕುನ್ ಸದಾಂ ಆಭಾರಿ ಹಾಂವ್ ಆಬಾಕ್

ಕಾಜಾರ್-ಸೊಭಾಣಾಂ ಫೆಸ್ತಾಂ-ಪರ್ಬೆಂಕ್
ಗಾಂವ್ಚೊ ಲೋಕ್ ಸೊದುನ್ ಯೆತಾ ಆಬಾಕ್
ಮ್ಹಜಿಯ್ ನಾಂ ಕೊಣಾಕ್ ಆಜ್ ಗರಜ್
ಕಿತ್ಯಾಕ್... ಆಬ್ ನಾಂ ಆತಾಂ ಘರಾಂತ್

ರಡ್ತಾಂ ಹಾಂವ್ ಖಂತಿನ್ ಆಬಾಚ್ಯಾ
ನಾಕಾ ಜಾಲಾಂ ಹಾಂವ್‍ಯ್ ಆಜ್ ಘರಾಂತ್ ತಾಚ್ಯಾ
ಪಿಂದ್ಕರ್ ವಸ್ತುರ್ ಬಾಗ್ವೊಲ್ಲೊ ದಾಂಡೊ
ಕೊಣಾಕ್ ನಾಕಾ ಪೊಡ್ಲಾಂ ಕೊನ್ಶ್ಯಾಕ್ ಘರಾಚ್ಯಾ.

 ******

- ಎಲಿಜಾ ಫೆರ್ನಾಂಡಿಸ್ ಪಾಂಗ್ಳಾ. [ಜ್ಯೂನ್, 2020]

[kovita] Abachi Sotri (-  Eliza Fernandes, Panglla)

Abachi Sotri


mhozo ab sorvank mogacho
jivachi gantt hamv tacho
puddvem-jibbo-munddas hatant sotri
visronastam gheun boglek kori sovari

bhogta khuxalai tache songi
sovari korunk gamva bhomvarim
soglle bagoitat man abak
usvon dhorun morjen choltana

bhett tachi sobhar ghorank
pidde xiddent as‍l'leank adhar
kumok korunk korina ghollai
got-adhar natleleank toch zai

pausa-votant hamv tacho adhar
purosannent bosta gheun uskear
osolem bhag mellat tori konnak
dekun sodam abhari hamv abak

kazar-sobhannam festam-porbenk
gamvcho lok sodun yeta abak
mhojiy nam konnak az goroz
kiteak... Ab nam atam ghorant

roddtam hamv khontin abachea
naka zalam hamv‍y az ghorant tacha
pindkor vostur bagvol'lo danddo
konnak naka poddlam konxeak ghorachea.

******

-  Eliza Fernandes Panglla. [Jun, 2020]

[कविता] आबाची सत्री (-  एलिजा फेर्नांडीस पांगळा)

ही कविता सोंपी उत्रांची म्हण दिसुंक पुरो पूण ह्या कवितेंत एक अपुर्भायेची काणी आसा जी वेळाकाळाच्यो गडी उत्रोन बदलून येंवच्या मनशा चिंत्पाचेर सोभीत आर्सो धर्ता. ही कविता परत परत वाचून गेल्लेपरीं ह्या कवितेंतल्यो काणियो सयत बदलून येतात आनी नवीं नवीं रुपणीं मनांत उदेवन येतात.

- सं

[कविता] आबाची सत्री (-  एलिजा फेर्नांडीस पांगळा)

आबाची सत्री

म्हजो आब सर्वांक मोगाचो
जिवाची गांट हांव ताचो
पुडवें-जिब्बो-मुंडास हातांत सत्री
विस्रनासतां घेवन बगलेक करी सवारी

भग्ता खुशालाय ताचे संगी
सवारी करुंक गांवा भंवारीं
सगळे बागयतात मान आबाक
उस्वोन धरून मर्जेन चल्ताना

भेट ताची सभार घरांक
पिडे शिडेंत आस‍ल्ल्यांक आधार
कुमोक करुंक करिना घळाय
गत-आधार नातलेल्यांक तोच जाय

पावसा-वोतांत हांव ताचो आधार
पुरसाणेंत बसता घेवन उसक्यार
असलें भाग मेळात तरी कोणाक
देकून सदां आभारी हांव आबाक

काजार-सोभाणां फेसतां-परबेंक
गांवचो लोक सोदून येता आबाक
म्हजीय नां कोणाक आज गरज
कित्याक... आब नां आतां घरांत

रडतां हांव खंतीन आबाच्या
नाका जालां हांव‍य आज घरांत ताचा
पिंदकर वसतूर बाग्वोल्लो दांडो
कोणाक नाका पोडलां कोनश्याक घराच्या.

******

-   एलिजा फेर्नांडीस पांगळा. [ज्यून, २०२०]

ದಾಯ್ಜ್.ಕೊಮ್