ಕೊಂಕ್ಣಿ ಕಾರ್ಯಿಂ

[ಕವಿತಾ] ಮೋರ್ನ್ ಆನಿ ಕವಿ [ವಲ್ಲಿ ಕ್ವಾಡ್ರಸ್]

ಮೋರ್ನ್ ಆನಿ ಕವಿ

ಪೋರ್ ಏಕ್ ಮಂತ್ರಿ ಮೆಲೊ
ಮಂತ್ರಿ ಆಮ್ಚೊ ಅಂತರ್ಲೊ
ಗಾಂವ್ ಜಿಲ್ಲೊ ರಾಜ್ ದೇಸ್ ರಡ್ಲೊ
ಪತ್ರಾಂ ಟಿವಿಂಚೆರ್ ದರ್ಯೊ ವ್ಹಾಳ್ಳೊ
ದೋನ್ ಹಫ್ತ್ಯಾಂಚೊ ಶೋಕ್ ಜಾಲೊ

ಥೊಡೆಚ್ಚ್ ದಿಸಾಂನಿ ಮಂತ್ರಿಚೊ ಪೆಟೊ ಮೆಲೊ
ಬಾದೂರ್ ಪೆಟೊ ಸಾಂಡುನ್ ಗೆಲೊ
ಸರ್ಕಾರಾನ್ ಬೆಂಡಾ ವಾಜ್ಪಾಕ್ ಉಲೊ ದಿಲೊ
ಸೊಜೆರಾಂನಿ ಮೊಳ್ಬಾಚೆರ್ ಗುಳೊ ಸೊಡ್ಲೊ
ಪೆಟ್ಯಾಕ್ ಸಂಭ್ರಮಾನ್ ಮಾತಿಯೆಕ್ ಪುರ್ಲೊ

ಉಪ್ರಾಂತ್ ಏಕ್ ಪಾದ್ರಿ ಮೆಲೊ
ಸರ್ಗಾರಾಜಾಂತ್ ಲೆಗುನ್ ಘಾಂಟಿ ವಾಜ್ಲ್ಯೊ
ಫಿರ್ಗಜ್ ವಾರಾಡೊ ದಿಯೆಸಿಜೆಚೊ ಲೋಕ್ ರಡ್ಲೊ
ಆಮ್ಚೊ ಪಾದ್ರಿ ದೆವಾಧೀನ್ ಜಾಲೊ
ಮೊರ್ನಾಕ್ ಮೊಳ್ಬಾವಯ್ಲ್ಯಾ ನೆಕೆತ್ರಾಂಚೊ ವೊರ್ ದೆಂವ್ಲೊ

ಮಾಗಿರ್ ಏಕ್ ಪುಜಾರಿ ಮೆಲೊ
ಫಾತೊರ್ ದೊಂಗೊರ್ ದುಕಾಂ ಗಳಯ್ಲಾಗ್ಲೊ
ಗಂದಾ ರುಕಾಂತ್ ತಾಕಾ ಹುಲ್ಪಾಯ್ಲೊ
ಗಂಗಾ ನ್ಹಂಯ್ತ್ ವಿಸರ್ಜನ್ ಕೆಲೊ
ದೀವ್ಳ್ ಗಾಂವ್ ಪುಜಾರಿಚ್ಯಾಚ್ ನಾಂವಾರ್ ಕೆಲೊ

ಆಯ್ಲೆವಾರ್‌ಚ್ ಏಕ್ ಉಧ್ಯಮಿ ಮೆಲೊ
ಮಂತ್ರಿ ಪಾದ್ರಿ ಪುಜಾರಿ ಸರ್ವ್ ಜಮ್ಲೊ
ಸರ್ತೆರ್ ರಡುಂಕ್ ಲೊಕಾಕ್‌ಯೀ ಹಾಡ್ಲೊ
ಮೀಡಿಯಾನ್ ಲೊಕಾಂಚೊ ಪುರ್ಶಾಂವ್ ಕಾಡ್ಲೊ
ದೇಸ್ ವಿದೇಶಿ ಲೆಗುನ್ ಮೊರ್ನಾಕ್ ಪಾವ್ಲೊ

ಆತಾಂ ಕಾಲ್ ಎಕ್ಲೊ ಹಾಂಗಾ ಮೆಲಾ
ಪೇಟ್ ಕರುಂಕ್ ಗತ್ ನಾ ದೆಕುನ್ ಇಗರ್ಜೆಂತ್ ಘಾಂಟ್‌ಯೀ ವಾಜ್ಲಿನಾ
ಪುರಸ್ಕಾರ್ ಹಾಸ್ತಾತ್ ಬೂಕ್ ನಾಚ್ತಾತ್
ಕೊಣಾಕ್‌ಯೀ ಖಬರ್ ನಾ ಕೊಣಾಕ್‌ಚ್ ಫಿಕಿರ್ ನಾ
ಕವಿ ಜಾಲ್ಲ್ಯಾ ಕರ್ಮಾಕ್ ಏಕ್ ಚಿಮ್ಟಿ ಸುಖ್ ನಾ
ಕವಿಚ್ಯಾ ಮೊರ್ನಾಕ್ ಏಕ್ ಥೆಂಭೊ ದೂಕ್ ನಾ

- ವಲ್ಲಿ ಕ್ವಾಡ್ರಸ್ [ಎಪ್ರಿಲ್ 2018]

कविता

’आमी जितलें मुकार चल्तांव तितलेंच पाटीं उर्तांव’ - खंडीत हें उतर आयच्या काळाक सरी जाल्लें. देकून विदेशी गाडियांनी सयत पेटे/सुणीं भंवतात अनी मनीस बिडार नासतां रसत्यार निदता. हांगासर मनशाक जाय फकत निबां; धर्माचीं, जातिचीं, कातिचीं, कुळियेचीं जसें लिपिचीं - फकत एकामेकाचीं मासां खावंक आनी समाजेक च्युरान च्यूर करुंक. आनी ह्या परिगतेंत मंत्रिच्या पेट्याक सयत दभाज्याचें, बेंडा वाजपाचें मोर्न मेळता आनी तेंच एका कविच्या मोर्नाक एक थेंबो दूक सयत आसाना. वैचारीक चिंत्पाची सुकिदाड आसचा मनशांक कवी जांव साहिती जांव कितें पडोन गेलां?. पूण एक वाचपी जावन तूं कसल्या चिंत्पाचो म्हळ्ळें सवाल केलें तर ताची जवाब म्हाका न्हय तुकाच दी.

- सं

[कविता] मोर्न आनी कवी [वल्ली क्वाड्रस]

मोर्न आनी कवी

पोर एक मंत्री मेलो
मंत्री आमचो अंतरलो
गांव जिल्लो राज देस रडलो
पत्रां टिविंचेर दऱ्यो व्हाळ्ळो
दोन हफ्त्यांचो शोक जालो

थोडेच्च दिसांनी मंत्रिचो पेटो मेलो
बादूर पेटो सांडून गेलो
सर्कारान बेंडा वाजपाक उलो दिलो
सोजेरांनी मोळबाचेर गुळो सोडलो
पेट्याक संभ्रमान मातियेक पुरलो

उपरांत एक पाद्री मेलो
सर्गाराजांत लेगून घांटी वाजल्यो
फिर्गज वाराडो दियेसिजेचो लोक रडलो
आमचो पाद्री देवाधीन जालो
मोर्नाक मोळबावयल्या नेकेत्रांचो वोर देंवलो

मागीर एक पुजारी मेलो
फातोर दोंगोर दुकां गळयलागलो
गंदा रुकांत ताका हुल्पायलो
गंगा न्हंयत विसर्जन केलो
दीवळ गांव पुजारिच्याच नांवार केलो

आयलेवार‌च एक उध्यमी मेलो
मंत्री पाद्री पुजारी सर्व जम्लो
सर्तेर रडुंक लोकाक‌यी हाडलो
मीडियान लोकांचो पुर्शांव काडलो
देस विदेशी लेगून मोर्नाक पावलो

आतां काल एकलो हांगा मेला
पेट करुंक गत ना देकून इगर्जेंत घांट‌यी वाजलिना
पुरसकार हासतात बूक नाचतात
कोणाक‌यी खबर ना कोणाक‌च फिकीर ना
कवी जाल्ल्या कर्माक एक चिमटी सूख ना
कविच्या मोर्नाक एक थेंभो दूक ना

- वल्ली क्वाड्रस [एपरील २०१८]

वल्ली क्वाड्रस: मूळ काण्येगार तर‌यी, कविताशेतांत अध्ययन, विशलेषणाचो वावर. ’च्यार मुखां’ (२००२), ’कट‌पुतळी’ (२००४), ’दर्भारांतली पिंर‍गोण’ (२००६), ’बजार’ (२०१७) पर्गट‌ल्ले स्वताचे कविताजमे. ’कवितापाठ’ (२००५), ’दर‍याक उदाक’ (२००६), ’काळोक नात‌ल्लो गांव’ (२००७), ’मुगदनात‌ल्लीं गितां’ (२०१७) एदोळ पर्गट‌ल्ले कविता अध्ययनाचे बूक. कोंकणेशिवाय कानडी, इंगलीश, हिंदी भासांनी सयत कविता बरयल्यांत.

Kovita

’ami jitlem mukar choltamv titlench pattim urtamv’ - khonddit hem utor aichea kallak sori zal'lem. Dekun videxi gaddiamni soit pette/sunnim bhomvtat oni monis biddar nastam rostear nidta. Hangasor monxak zai fokot nibam; dhormachim, zatichim, katichim, kulliechim zosem lipichim - fokot ekamekachim masam khaunko ani somajek chyuran chyur korunk. Ani hea porigotent montrichea petteak soit dobhajeachem, bendda vazopachem morn mellota ani tench eka kovichea mornak ek thembo duk soit asana. Voicharik chintpachi sukidadd ascha monxank kovi zamv sahiti zamv kitem poddon gelam?. Punn ek vachpi zaun tum kosolea chintpacho mholl'llem soval kelem tor tachi zovab mhaka nhoi tukach di.

- Som.

[Kovita] Morn ani kovi [Vol'li Kvaddros]

Morn ani kovi

por ek montri melo
montri amcho ontorlo
gamv jil'lo raz des roddlo
potram ttivincher doreo vhall'llo
don hofteancho xok zalo

thoddechch disamni montricho petto melo
badur petto sanddun gelo
sorkaran bendda vajpak ulo dilo
sojeramni mollbacher gullo soddlo
petteak sombhroman matiek purlo

uprant ek padri melo
sorgarazant legun ghantti vajleo
firgoz varaddo diesijecho lok roddlo
amcho padri devadhin zalo
mornak mollbauylea neketrancho vor demvlo

magir ek puzari melo
fator dongor dukam golloilaglo
gonda rukant taka hulpailo
gonga nhoint visorzon kelo
diull gamv puzaricheach namvar kelo

ailevar‌ch ek udhyomi melo
montri padri puzari sorv zomlo
sorter roddunk lokak‌yi haddlo
middian lokancho purxamv kaddlo
des videxi legun mornak paulo

atam kal eklo hanga mela
pett korunk got na dekun igorjent ghantt‌yi vajlina
puroskar hastat buk nachtat
konnak‌yi khobor na konnak‌ch fikir na
kovi zal'lea kormak ek chimtti sukh na
kovichea mornak ek thembho duk na
 

- Valley Quadros, Mumbai [April 2018]

Vol'li kvaddros: Mull kannyegar tor‌yi, kovitaxetant odhyoin, vixlexonnacho vaur. ’chear mukham’ (2002), ’kott‌putlli’ (2004), ’dorbharantli pimr‍gonn’ (2006), ’bozar’ (2017) porgott‌l'le svotache kovitazome. ’kovitapatth’ (2005), ’dor‍yak udak’ (2006), ’kallok nat‌l'lo gamv’ (2007), ’mugdonat‌l'lim gitam’ (2017) edoll porgott‌l'le kovita odhyoinache buk. Konknnexivai kanoddi, inglix, hindi bhasamni soit kovita boroileant.

ದಾಯ್ಜ್.ಕೊಮ್