ಕೊಂಕ್ಣಿ ಕಾರ್ಯಿಂ

ದೇವ್ ಕಸೊ ದಿಸ್ತಾ...!?

ಹಾಂವ್ ಭಿಕಾರಿ
ದೆವಾ ನಾಂವಿ ಕಮಾಯ್ತಾಂ
ಚರ್ಚ್ ಮಂದಿರ್ ಮಸ್ಜಿದ್ ಗುರುದ್ವಾರ್
ಥಂಯ್ ಹಾಂಗಾ ಬಸೊನ್ ಭಿಕ್ ಮಾಗ್ತಾಂ
ಭಿಕ್ ದಿತಾ ತೊಚ್ ಮ್ಹಾಕಾ ದೇವ್
ಪುಣ್ ಭಕ್ತಾಂಕ್ ಖರೊಚ್ ದಿಸ್ತಾ ದೇವ್?

ತ್ಯಾ ದೀಸ್ ಹಾಂವ್ ಚರ್ಚಾಕ್ ಪಾವ್‍ಲ್ಲೊಂ
ಗೇಟಿರ್‌ಚ್ ಮ್ಹಾಕಾ ಭಾಯ್ರ್ ಲೊಟ್ಲೊ
ತುಜ್ಯಾ ತಸ್ಲ್ಯಾಂಕ್ ರೀಗ್ ನಾ
ತುಕಾ ದಿಲ್ಯಾರ್ ಕಿತೆಂ ಮೆಳ್ತಾ?
ದೇವ್ ಭಿತರ್ ಆಸಾ - ಮಾತ್ರ್
ದಾನ್ ಕಂರ್‍ಡ್ಯಾಂತ್ ಪಾಂಯ್ಶಿಂ ಘಾಲ್ಯಾರ್

ಮಂದಿರಾಕ್ ಪಾವ್ತಾನಾ
ಲಾಂಬ್ ನಾಮ್ ವೊಡ್‍ಲ್ಲ್ಯಾ ಪುಜಾರಿನ್
’ಹಟ್’ ಕರುನ್ ಕುಶಿಕ್ ಲೊಟ್ಲೊ
ತುಜೊ ಜಾಗೊ ಥಂಯ್
ಹಾಂಗಾ ದೇವ್ ಭಕ್ತಿಂಕ್
ದಾನ್ ಪೆಟಿಂತ್ ದಾನ್ ಘಾಲ್ಚ್ಯಾಂಕ್
ದೂದ್ ವೊತುನ್ ನಾಮ್ ವೊಡ್ಚ್ಯಾಂಕ್.

ಮಸ್ಜಿದೆಚ್ಯಾ ವಾಟೆರ್
ತಕ್ಲಿ ಬಾಗವ್ನ್ ಆಸ್ಲೆ ಭಕ್ತ್
ಉದಾರ್ ಮನಾನ್ ವಾಟ್ಲೆಂತ್ ಮ್ಹಜ್ಯಾ
ಆವಾಜ್ ಕರುನ್ ಸುಟೆ ಪಡ್ಲೆ
ಆರ್ಧ್ಯಾ ವೊರಾನ್ ಸಗ್ಳೆ ನಪಂಯ್ಚ್
ದಾಂವ್ಡಾಯ್ಲೆಂ ಮ್ಹಾಕಾ
ನಾ ಜಾಗೊ ತುಕಾಯ್ ಹಾಂಗಾ

ಭುಕೆನ್ ಪೋಟ್ ಬೊಬೊ ಘಾಲ್ತಾನಾ
ಗುರುದ್ವಾರಾಚಿ ದಿಸ್ಲಿ ವಾಟ್
ಮ್ಹಜೆ ತಸ್ಲ್ಯಾ ಸಭಾರಾಂಕ್ ಲಾಯ್ನಿರ್
ಪೊಟಾಕ್ ಕೊಕೊ ನಶಿಬ್ ಜಾತಾನಾ
ತ್ಯಾ ಭಿಕಾರ್‍ಯಾನ್ ತಾಚ್ಯಾ ಬಸ್ಯೆಂತ್ಲೊ
ವಾಂಟೊ ಮ್ಹಾಕಾ ದಿತಾನಾ
ದೇವ್ ಮಾತ್ರ್ ಮ್ಹಾಕಾ
ತಾಚ್ಯಾ ಖಾಣಾಚ್ಯಾ ಬೊಸ್ಯೆಂತ್ ದಿಸ್ಲೊ!

- ಪ್ರಸನ್ನ್ ನಿಡ್ಡೋಡಿ [ಮಾರ್ಚ್ 2018]

कविता

ह्या संसारांत देव आनी धर्माखातीर हऱ्येकलो एकामेकाचीं मासां खाता पूण निजायकी देव कसो दिसता आनी तो खंय आसता म्हळ्ळें कोणेंय चिंतलां? हेच्च चिंत्पाच्या भंवतोणी गुंत‌ल्ली ही कविता कांय सोभीत काणिंच उभी कर्ताना कवितेंत दिसचीं भांदपां आनी देव आमचेच भंवतोणिचे म्हणून भग्ता.

बाब प्रसन्न निड्डोडी जिण्ये अणबवांत हेळ‍ल्लो कवी म्हणून ताचीं कविताच गोवाय दितात. हाच्या कवितेंचो पयलो जमो ’तान’ वेगिंच कोंकणी कवितारसिकांक मेळच्यार आसा.

- सं

देव कसो दिसता...!?

हांव भिकारी
देवा नांवी कमायतां
चर्च मंदीर मसजीद गुरुद्वार
थंय हांगा बसोन भीक माग्तां
भीक दिता तोच म्हाका देव
पूण भक्तांक खरोच दिसता देव?

त्या दीस हांव चर्चाक पाव‍ल्लों
गेटीर‌च म्हाका भायर लोटलो
तुज्या तसल्यांक रीग ना
तुका दिल्यार कितें मेळता?
देव भितर आसा - मात्र
दान कंर‍ड्यांत पांयशीं घाल्यार

मंदिराक पावताना
लांब नाम वोड‍ल्ल्या पुजारीन
’हट’ करून कुशीक लोटलो
तुजो जागो थंय
हांगा देव भक्तिंक
दान पेटिंत दान घाल्च्यांक
दूद वोतून नाम वोडच्यांक.

मसजिदेच्या वाटेर
तकली बागवन आसले भक्त
उदार मनान वाटलेंत म्हज्या
आवाज करून सुटे पडले
आर्ध्या वोरान सगळे नपंयच
दांवडायलें म्हाका
ना जागो तुकाय हांगा

भुकेन पोट बोबो घाल्ताना
गुरुद्वाराची दिसली वाट
म्हजे तसल्या सभारांक लायनीर
पोटाक कोको नशीब जाताना
त्या भिकार‍यान ताच्या बस्येंतलो
वांटो म्हाका दिताना
देव मात्र म्हाका
ताच्या खाणाच्या बोस्येंत दिसलो!

- प्रसन्न निड्डोडी [मार्च २०१८]

प्रसन्न निड्डोडी: प्रसन्न निड्डोडी लिखणें नांवार बरंवचो हिलरी डी’सिलवा मुंबयांत क्रियाळ कोंकणी मोगी, एक निर्देशक, बरयणार, विमर्शक, कवी पूण सर्वांच्याकी पयलें भोव खाल्तो आनी मायामोगाळ वेक्तित्वाचो. कोंकणी, मराठी, हिंदी कवितेंचेर अध्ययन करून आसचो प्रसन्न निड्डोडी सभार साहितीक स्पर्ध्यांनी इनामां जोडुंक सकला, तशेंच मुंबयांत सभार कविगोश्टिंनी वांटो घेतला.

Hea somsarant devo ani dhormakhatir horyeklo ekamekachim masam khata punn nizaiki devo koso dista ani to khoim asta mholl'llem konnem-i chintlam? hechch chintpachea bhomvtonni gunt‌l'li hi kovita kaim sobhit kanninch ubhi kortana kovitent dischim bhandpam ani devo amchech bhomvtonniche mhonnun bhogta.

Bab proson'n nidd'ddoddi jinnye onnbovant hell‍l'lo kovi mhonnun tachim kovitach gouai ditat. Hachea kovitencho poilo zomo ’tan’ veginch konkonni kovitarosikank mellchear asa.

- Som.

KOVITA

Devo koso dista...!?

hamv bhikari
deva namvi komaitam
chorch mondir mosjid gurudvar
thoim hanga boson bhik magtam
bhik dita toch mhaka devo
punn bhoktank khoroch dista devo?

tea dis hamv chorchak pavo‍l'lom
gettir‌ch mhaka bhair lottlo
tujea tosleank rig na
tuka dilear kitem mellta?
devo bhitor asa - matr
dan komr‍ddeant pamyxim ghalear

mondirak pautana
lamb nam' vodd‍l'lea puzarin
’hott’ korun kuxik lottlo
tuzo zago thoim
hanga devo bhoktink
dan pettint dan ghalcheank
dud votun nam' voddcheank.

Mosjidechea vatter
tokli bagoun asle bhokt
udar monan vattlent mhojea
avaz korun sutte poddle
ardhea voran soglle nopomych
damvddailem mhaka
na zago tukai hanga

bhuken pott bobo ghaltana
gurudvarachi disli vatt
mhoje toslea sobharank lainir
pottak koko noxib zatana
tea bhikar‍yan tachea bosyentlo
vantto mhaka ditana
devo matr mhaka
tachea khannachea bosyent dislo!

- Proson'n Nidd'ddoddi [March 2018]

Proson'no Nidd'ddoddi: proson'no nidd'ddoddi likhnnem namvar boromvcho hilori ddi’silva mumboyant kriall konknni mogi, ek nirdexok, boroinnar, vimorxok, kovi punn sorvancheaki poilem bhovo khalto ani mayamogall vektitvacho. Konknni, moratthi, hindi kovitencher odhyoin korun ascho proson'no nidd'ddoddi sobhar sahitik spordheamni inamam zoddunk sokla, toxench mumboyant sobhar kovigoxttimni vantto ghetla.

ದಾಯ್ಜ್.ಕೊಮ್