[ಖಬಾರ್:] ಮುಂಬಯಾಂತ್ ಕೊಂಕ್ಣಿ ಸಹಮಿಲನ್ 2015

ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚ್ಯಾ ಮುಖೇಲ್ಪಣಾರ್, ಮುಂಬಯಾಂತ್ ಆಸ್ಚ್ಯಾ ಸರ್ವ್ ಕೊಂಕ್ಣಿ ಬರಯ್ಣಾರ್, ಸಂಗೀತ್‌ಕಾರ್, ಕಲಾಕಾರ್ ತಶೆಂಚ್ ವಾವ್ರಾಡ್ಯಾಂಕ್ ಆಸಾ ಕೆಲ್ಲೆಂ ಕೊಂಕಣಿ ಸಹಮಿಲನ್ 2015, ಹೆಚ್ಚ್ ದಸೆಂಬ್ರಾಚ್ಯಾ 13 ತಾರಿಕೆರ್ ಆಯ್ತಾರಾ ಸಾಂಜೆರ್ 4 ವೊರಾರ್ ಅಂಧೇರಿಚ್ಯಾ ಗ್ಯಾನ್ ಆಶ್ರಮಾಂತ್ ಆಸಾ ಕೆಲೆಂ.

’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್’ ಮ್ಹಳ್ಳಿಂ ತತ್ವಾಂ ಘೆವುನ್, ಕೊಂಕಣಿ ನಿರಂತರಿ.. ಪಯ್ಣಾರಿ.ಕೊಮ್ ಅಂತರ್‌ಜಾಳಿಚೆಂ ಉಗ್ತಾವಣ್ ಕಾರ್ಯೆಂ ಹೆಚ್ಚ್ ಸಂಧರ್ಭಾರ್ ಜಾಲೆಂ.

ಎಕ್ತಾರಾಚ್ಯಾ ಮುಂಬಯ್ ಘಟಕಾಚೊ ಮುಖೆಲಿ ಸಂಯೋಜಕ್ ಜೋಯ್ ಪಾಲಡ್ಕಾನ್ ಸ್ವಾಗತ್ ಉತ್ರಾಂನಿ, ಹಿ ಏಕ್ ಸುರ್ವಾತ್ ಮಾತ್ರ್, ಕೊಂಕ್ಣಿ ಭಾಸೆಚೊ ಮೋಗ್ ಆನಿ ಹುಸ್ಕೊ ಆಸ್ಲೆಲ್ಯಾ ಸರ್ವ್ ಮುಂಬಯಾಂತ್ಲ್ಯಾ ಕೊಂಕ್ಣಿ ಲೊಕಾಕ್ ಎಕ್ವಟಿತ್ ಕರ್ಚೆದಿಶೆನ್ ಆಮ್ಚೊ ವಾರ್ ಸದಾಂ ಆಸ್ತಲೊ ಮ್ಹಳೆಂ. ಮಾನೆಸ್ತ್ ಹಿಲರಿ ಡಿ’ಸಿಲ್ವಾ, ಮಾನೆಸ್ತ್ ಲಾರೆನ್ಸ್ ಡಿ’ಸೋಜ್ ಕಮಾನಿ, ಆನಿ ಮಾನೆಸ್ತ್ ನಜ್ರೆತ್ ನೆರಿ ತಾಕೊಡೆ ಹಾಣಿಂ ಮುಖೆಲ್ ಮಾನ್ ಸಯ್ರ್ಯಾಂಕ್ ಫುಲಾಂಚೆ ತುರೆ ದೀವ್ನ್ ಸ್ವಾಗತ್ ಕೆಲೊ.

ಕೊಂಕ್ಣಿ ಆಮ್ಚಿ ಭಾಸ್, ಮ್ಹೊಂವಾ ಪ್ರಾಸ್ ರೂಚ್ ಮ್ಹಳ್ಳ್ಯಾ ಉತ್ರಾಂನಿ ಮುಂಬಯಾಂತ್ಲ್ಯಾ ತಾಲೆಂತ್‌ವಂತ್ ಗಾವ್ಪಿ ಜೆರಿ ಬೊಂದೆಲಾಚ್ಯಾ ಉತ್ರಾಂಕ್, ಡೆಲಿಶಾ ಡಿ’ಸೋಜಾನ್ ಸಂಗೀತ್ ಬಸವ್ನ್, ಲ್ಯಾನ್ಸಿ ಡಿ’ಸೋಜ್ ನಿಡ್ಡೋಡಿಸವೆಂ ಸ್ವಾಗತ್ ಗೀತ್ ಗಾಯ್ಲೆಂ

ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚಿ ಗರ್ಜ್ ಕೊಂಕ್ಣೆಕ್ ಕಿತ್ಯಾಕ್ ಆಸಾ ಮ್ಹಳ್ಳ್ಯಾಚೆರ್, ಆನಿ ಹ್ಯೇ ದಿಶೆನ್ ಜಾವ್ನ್ ಆಸ್ಚ್ಯಾ ವಾವ್ರಾವಿಶಿಂ ಎಕ್ತಾರಾಚೊ ಮುಖೆಲ್ ಸಮಿತಿಚೊ ಸಂದೊ ಜಿಯೋ ಆಗ್ರಾರಾರಾನ್ ಪ್ರಸ್ತಾವಿಕ್ ಉತ್ರಾಂನಿ ಸವಿಸ್ತಾರ್ ಮಾಹೆತ್ ದಿಲಿ.

ಪಯ್ಣಾರಿ.ಕೊಮ್ ಅಂತರ್‌ಜಾಳಿವಿಶಿಂ ಪರಿಚಯ್ ದಿಲೆಲ್ಯಾ ನಜ್ರೆತ್ ನೆರಿ ತಾಕೊಡೆನ್, ಆಧುನಿಕ್ ಕೊಂಕ್ಣಿ ಕಾಳಾರ್ ಅಂತರ್‌ಜಾಳಿಚೊ ಪಾತ್ರ್ ಕಸಲೊ ಮ್ಹಳ್ಳ್ಯಾಚೆರ್ ವಿವರ್ ದಿತಾಸ್ತಾನಾ, ಸಂಪಾದಕ್ ತಶೆಂಚ್ ಸಂಪಾದಕೀಯ್ ಮಂಡಳಿಚಿ ಮಟ್ವಿ ವಳೊಕ್ ಕರುನ್ ದಿಲಿ.

ಕಾಣಿಕ್ ಪತ್ರಾಚೊ ಸ್ಥಾಪಕ್-ಸಂಪಾದಕ್ ಮಾನೆಸ್ತ್ ಆಂಡ್ರು ಮೆಂಡೊನ್ಸಾಚ್ಯಾ ಅಧ್ಯಕ್ಷ್‌ಪಣಾಖಾಲ್, ದಾಯ್ಜಿ‌ವರ್ಲ್ಡ್ ಹಫ್ತ್ಯಾಳ್ಯಾಚೊ ಸಂಪಾದಕ್ ಹೇಮಾಚಾರ್ಯ ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲ್ಯಾ ಕಾರ್ಯಾಚಿ ಸುರ್ವಾತ್ ಮಾ|ಬಾ|ಸಿರಿಲ್ ಡಿ’ಸೋಜ್ ಕೆಂಳ್ಬೆಟ್ ಹಾಣಿಂ ದಿವ್ಟಿ ಪೆಟವ್ನ್ ಸಹಮಿಲನಾಚೆಂ ಉಗ್ತಾವಣ್ ಕೆಲೆಂ.

ಕಾರ್ಯಾಚೊ ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲ್ಯಾ ಹೇಮಾಚಾರ್ಯನ್ ’ಕೊಂಕ್ಣೆಂತ್ ಭರ್ಪೂರ್ ಮೋಗ್ ಆಸಾ, ಆನಿ ತೊ ಮೋಗ್ ಪರತ್ ಜಿವಾಳ್ ದವರ್ಚೆಂ ಆಮ್ಚೆ ಸರ್ವಾಂಚೆಂ ಕರ್ತವ್ಯ್ ಜಾವ್ನಾಸ್ತಾಂ, ಸಮಾಜ್ ಜೊಡ್ತೆಲ್ಯಾಂಕ್ ಆಮಿ ಆಧಾರ್ ದಿವ್ಯಾಂ, ಸಮಾಜ್ ಮೊಡ್ತೆಲ್ಯಾಂಕ್ ಆಮಿ ಪಯ್ಸ್ ದವರ್ಯಾಂ, ತಸಲೆ ಅಪ್ಲೆಚ್ಚ್ ನಾಸ್ ಜಾತೆಲೆ’ ಮ್ಹಳ್ಳೊ ಸಂಧೇಶ್ ದಿಲೊ.

ಉಧ್ಘಾಟಕ್ ಮಾ|ಬಾ|ಸಿರಿಲ್ ಡಿ’ಸೋಜಾನ್ ಕೊಂಕ್ಣಿ ಭಾಸ್ ಕಶಿ ಆಮ್ಕಾಂ ಖಂಚ್ಯಾಯ್ ಗಾಂವಾಂತ್ ಆಮಿ ಆಸಾಂವ್ ತರ್‌ಯೀ ಎಕಾ ರಿತಿಚಿ ಸಕತ್ ಕುಡಿಂತ್ ಉಭ್ಜಾಯ್ತಾ ಮ್ಹಣುನ್, ಸರ್ವಾಂನಿ ಆಪ್ಲ್ಯಾ ಘರಾಂನಿ ಕೊಂಕ್ಣಿ ಭಾಸೆಕ್ ಮಹತ್ವ್ ದೀಂವ್ಕ್ ಜಾಯ್ ಮ್ಹಣುನ್ ಉಲೊ ದಿಲೊ.

     

ತ್ಯೇ ಉಪ್ರಾಂತ್ ಹಿಲರಿ ಡಿ’ಸಿಲ್ವಾನ್ ನಿರ್ದೇಶನ್ ದಿಲ್ಲೊ ’ಖಣ್’ ಮ್ಹಳ್ಳೊ ನಾಟ್ಕುಳೊ ಮಿರಾ ರೋಡ್ ಕೊಂಕ್ಣಿ ಕಲಾಕಾರಾಂನಿ ಖೆಳವ್ನ್ ಧಾಖಯ್ಲೊ. ತಶೆಂಚ್ ಚಲುಂಕ್ ತಾಂಕ್ ನಾಂ ತರ್‌ಯೀ, ಕೊಂಕ್ಣಿ ಬರಯ್ಣಾರಾಂಚ್ಯಾ ಸಹಮಿಲನಾಕ್ ವ್ಹಡಾ ಹುಮೆದಿನ್ ಆಯಿಲ್ಲ್ಯಾ ಮಾಲ್ಘಡ್ಯಾ ಬರಯ್ಣಾರ್ ಮಾನೆಸ್ತ್ ರೊನಾಲ್ಡ್ ಪಿರೇರ್ ಆಂಜೆಲೊರ್ ಹಾಕಾ ಫುಲಾಂಚೊ ತುರೊ ದೀವ್ನ್ ಮಾನ್ ಕೆಲೊ.

ವಲ್ಲಿ ಕ್ವಾಡ್ರಸಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ಕವಿಗೋಶ್ಟಿಂತ್ ಹೇಮಾಚಾರ್ಯ, ವಿ.ಡಿಸಿಲ್ವಾ ಕಾಂಜೂರ್‌ಮಾರ್ಗ್, ನಜ್ರೆತ್ ನೆರಿ ತಾಕೊಡೆ, ಐರಿನ್ ತಾಕೊಡೆ, ಜಿಯೋ ಆಗ್ರಾರ್, ವಿ.ಫಿಲಿಪ್ ಕಾಂಜೂರ್‌ಮಾರ್ಗ್, ಪ್ರಸನ್ನ ನಿಡ್ಡೋಡಿ, ಅಶೋಕ್ ಡಾಯಸ್ ಬೈಂದೂರ್ ತಶೆಂಚ್ ವಲ್ಲಿ ಕ್ವಾಡ್ರಸಾನ್ ಹಾಣಿಂ ಕವಿತಾ ವಾಚ್ಲಿಂ.

ಹಿಲರಿ ಡಿ’ಸಿಲ್ವಾನ್ ಉಪ್ಕಾರ್ ಆಟಯ್ಲೊ, ವಲ್ಲಿ ಕ್ವಾಡ್ರಸಾನ್ ಹೆಂ ಕಾರ್ಯೆಂ ಚಲವ್ನ್ ವೆಲೆಂ.

- ಆಮ್ಚೊ ಭಾತ್ಮಿ, ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚೊ ಎಕ್ತಾರ್