ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಆವಯ್ (- ಎಚ್. ಮನೋಜ್ ಜೆ)

ಜೆದನಾಂ ಆಮಚೆಸಮೊರ್ ಏಕ್ ಅಸ್ತುರೆಚೆಂ ರುಪಣೆಂ ಉಭೆಂ ಜಾತಾ, ತೆದನಾಂ ಮೋಗ್, ದಯಾ ಆನಿ ಸೊಸ್ಣಿಕಾಯೆಚೊ ನಿಯಾಳ್ ಯೆತಾ. ಪುಣ್ ಜೆದನಾಂ ಎಕಾ ಆವಯಚೆಂ ರುಪಣೆಂ ಉಭೆಂ ಜಾತಾ, ತೆದನಾಂ ಏಕ್ ಸಂಸಾರ‌ಚ್ ಉಭೊ ಜಾತಾ. ಎಕಾ ಆವಯಚಿ ಸಕತ್ ತಿತಲಿ ಅಗಾಧ್ ಆನಿ ವಿಶಾಲ್.

ಬಾಬ್ ಎಮ್. ಮನೋಜ್ ಎಚ್. ಏಕ್ ಸಾಹಿತಿಕ್ ಶಿಕ್ಷಕ್ ಜಾವ್ನ್ ಕಾಮ್ ಕರುನ್ ಆಸಾ. ಅಪಲ್ಯಾ ಆವಯ್ ಶಾಂತಾಬಾಯೆಕ್ ಸಮರ್ಪಿತ್ ಕೆಲ್ಲ್ಯಾ ಹ್ಯಾ ಕವಿತೆಚ್ಯಾ ಎಕೆಕಾ ವಳಿಂನಿ ತಾಣೆಂ ಅಪ್ಲೆಂ ಕಾಳಿಜ್ ಖಿರವ್ನ್ ತೀಂತ್ ಕರುನ್ ಬರಯಿಲ್ಲೆಂ ಪಾರಕುಂಕ್ ತುಕಾಚ್ ಸೊಡತಾಂ.

- ಸಂ

[ಕವಿತಾ] ಆವಯ್ (- ಎಚ್. ಮನೋಜ್ ಜೆ)

ಆವಯ್ ಹಾಂವ್ ಆವಯ್ ಸಾನ್ನ್ ಭುರ್ಗ್ಯಾಚಿ ಪಾಳ್ಣ್ಯಾಂತ್ ಖೆಳಟ್ಲ್ಯಾ ಸಾನೂಲ್ಯಾಚಿ ಮ್ಹ್-ಯಾಂತ್ ಆಸತ್ ತರ್.. ಲಿಕ್ಲಿಕೀತ್ ದೊಳ್ಯಾಂಚಿ ತಾಚಿ ಮ್ಹಜೆರ್ ನದರ್ ದೊಳ್ಯಾ ಆಡ್ ಗೆಲೆಂ ತರ್ ಉಕಾ-ಯಾನಿ ರಡ್ಲೆಂ ಫಾಟಿ ವಳ್ಳೆಂ ಮುಮುರಖೆಂ ಹಾಂಸ್ಲೆಂ! ಹಾಂವ್ ಆವಯ್ ತ್ಯಾ ಸವ್ಣ್ಯಾ ವರಿ ಜೀವ್ ತೊಡೂನ್ ವಾವ್ರ್ ಕರಿ ಗಾಂವ್ ಭರ್ ಹೆಡೂನ್ ಆಪ್ಲೆ ಚೊಂಚೀನ್ ದಾಣೊ ಗೊಟೊ ಹಾಡೂನ್ ಪೀಲಾಂಚೆಂ ಪೊಟ್ ಭರೀನ್ ಘೊಟೆರಾಂತ್ ಪೀಲಾಂಕ್ ಉಬೆಕ್ ಧರುನ್ ಮೊಗ್ ಆನಿ ಮಾಯಾ ಕರೀನ್! ಹಯ್... ಹಾಂವ್ ಆವಯ್ ಕವಿತಾನಿ ವಾಚೀಲ್ಲಿ ಬರೊವ್ಪ್ಯಾನಿ ಘಡಯ್ಲ್ಲಿ ಕಾಣ್ಯಾನಿ ಆಯ್ಕ್ಲ್ಲಿ ಧುವೆನ್ ಅನುಭವಿಲ್ಲಿ ಆವಯ್ನ್ ಕುರ್ವಾಳಿಲ್ಲಿ ಬಾಪಾಯಾನ್ ಮಿರ್ಯೆಲ್ಲಿ ಹಾಂವ್ ಆವಯ್ ತೀಚ್ ತಿ ಬಾಪಾಯ್ಚಿ ಸಾನೂಲಿ ಹಾಂವ್ ಆವಯ್ **** - ಎಚ್. ಮನೋಜ್ ಜೆ**. [ಮಾರ್ಚ್, 2020]

	ಎಚ್. ಮನೋಜ್ ಜೆ: ಗೊಂಯ್‌ಚ್ಯಾ ಚಿಕಾಲಿಮಾಂತಲ್ಯಾ ರೆಜಿನಾ ಮುಂದಿ ಹಾಯ್ ಸ್ಕೂಲಾಂತ್ ಶಿಕ್ಷಕ್ ಜಾವ್ನ್ ಕೊಂಕಣಿ ಶಿಕವ್ನ್ ಆಸಾ. ಹಾಚಿಂ ಕವಿತಾ, ಲೇಕನಾಂ ಗೊಂಯ್ಚ್ಯಾ ನೇಮಾಳ್ಯಾಂನಿ ಪರ್ಗಟ್ ಜಾಲ್ಯಾಂತ್. ಸಾಹಿತ್ಯ್ ವಾಚಪ್ ಹಾಚಿ ಪ್ರಮುಕ್ ಹವೇಸ್.
[kovita] Auy* (- H Manoj J)*
Jedonam amochesomor ek osturechem ruponnem ubhem zata, tedonam mog, doya ani sosnnikayecho niall yeta. Punn jedonam eka auyochem ruponnem ubhem zata, tedonam ek somsaro‌ch ubho zata. Eka auyochi sokot titoli ogadh ani vixal. Bab M. Manjj H. Ek sahitik xikxok zaun kam' korun asa. Opolea auy xantabayek somorpit kel'lea hea kovitechea ekeka vollimni tannem oplem kalliz khiroun tint korun boroyil'lem parokunk tukach soddotam. - Som
[kovita] Auy* (- H Manoj J)*
*Auy!* hamv auy san'n bhurgeachi pallnneant khellottlea sanuleachi mh-yant asot tor.. Liklikit dolleanchi tachi mhojer nodor dollea add gelem tor uka-yani roddlem fatti voll'llem mumurokhem hamslem! hamv auy tea sounnea vori jivo toddun vaur kori gamv bhor heddun aple chonchin danno gotto haddun pilanchem pott bhorin ghotterant pilank ubek dhorun mog ani maya korin! hoi... Hamv auy kovitani vachil'li boroupeani ghoddoil'li kanneani aikl'li dhuven onubhovil'li auyn kurvallil'li bapayan miryel'li hamv auy tich ti bapaichi sanuli hamv auy **** - H. Manoj J.** [Mar, 2020]

	H. Manoj J: Gõy‌chea Chicalimantolea Regina Mundi High Schoolant xikxok zaun konkonni xikoun asa. Hachim kovita, lekonam gõychea nemalleamni porgott zaleant. Sahity vachop hachi promuk hoves.
[कविता] आवय! (- एच. मनोज जे)
जेदनां आमचेसमोर एक असतुरेचें रुपणें उभें जाता, तेदनां मोग, दया आनी सोसणिकायेचो नियाळ येता. पूण जेदनां एका आवयचें रुपणें उभें जाता, तेदनां एक संसार‌च उभो जाता. एका आवयची सकत तितली अगाध आनी विशाल. बाब एम. मनोज एच. एक साहितीक शिक्षक जावन काम करून आसा. अपल्या आवय शांताबायेक समर्पीत केल्ल्या ह्या कवितेच्या एकेका वळिंनी ताणें अपलें काळीज खिरवन तींत करून बरयिल्लें पारकुंक तुकाच सोडतां. - सं
[कविता] आवय! (- एच. मनोज जे)
आवय! हांव आवय सान्न भुरग्याची पाळण्यांत खेळटल्या सानूल्याची म्ह-यांत आसत तर.. लिकलिकीत दोळ्यांची ताची म्हजेर नदर दोळ्या आड गेलें तर उका-यानी रडलें फाटी वळ्ळें मुमुरखें हांसलें! हांव आवय त्या सवण्या वरी जीव तोडून वावर करी गांव भर हेडून आपले चोंचीन दाणो गोटो हाडून पीलांचें पोट भरीन घोटेरांत पीलांक उबेक धरुन मोग आनी माया करीन! हय... हांव आवय कवितानी वाचील्ली बरोवप्यानी घडयल्ली काणयानी आयकल्ली धुवेन अनुभविल्ली आवयन कुरवाळिल्ली बापायान मिरयेल्ली हांव आवय तीच ती बापायची सानूली हांव आवय **** - एच. मनोज जे.** [मार्च, २०२०]

	एच. मनोज जे: गोंय‌च्या चिकालिमांतल्या रेजिना मुंदी हाय स्कूलांत शिक्षक जावन कोंकणी शिकवन आसा. हाचीं कविता, लेकनां गोंयच्या नेमाळ्यांनी पर्गट जाल्यांत. साहित्य वाचप हाची प्रमूक हवेस.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.