ಕೊಂಕ್ಣಿ ಕಾರ್ಯಿಂ

[ಕವಿತಾ] ಜಿವಿತ್ ಕವಿತಾ [ಸುನೇತ್ರಾ ಜೋಗ್]

ಜಿವಿತ್ ಕವಿತಾ

ಹಾಲಿಂ ಹಾಲಿಂ ಮ್ಹಾಕಾ ಮಾತ್ಶೆಂ ಜಿವಿತ್ ಕಳೂಂಕ್ ಲಾಗ್ಲಾಂ
ಕೊಣ್ ಕೊಣಾಚೊ ನಾಸ್ತಾ ಹೆಂ ಸತ್ಯ್ ಹೊಲ್ಮೂಂಕ್ ಲಾಗ್ಲಾಂ
ಘೊವ್, ಬಾಯ್ಲ್, ಧೂವ್, ಪೂತ್ ಸಗ್ಳಿಂ ನಾತಿಂ ಫಟ್
ಸಗ್ಳ್ಯಾಂ ವಾಂಗಡಾ ಆಸೂನ್ ಲೆಗೀತ್ ಎಕ್ಟೆಂ ದಿಸೂಂಕ್ ಲಾಗ್ಲಾಂ..

ಆಪ್ಲೆ ಮ್ಹಣೂನ್ ಜಾಂಚೊ ಕೆಲೊ ಮೊಗ್ ಆಯ್ಜಮೆರೆನ್
ತಾಂಕಾಂ ಲೆಗೀತ್ ಆತಾಂ ಮ್ಹಜೆಂ ವೊಜೆಂ ಜಾವಂಕ್ ಲಾಗ್ಲಾಂ
ಧ್ಯಾಸ್ ಎಕ್ ಮನಾಂತ್ ಘೆವ್ನ್ ಜೀವ್ ಜಳಯ್ಲೊ
ಆತಾಂ ದಿಸ್ತಾ ಖಂಯ್ತರಿ ಮ್ಹಜೆಂಚ್ ಚುಕೂಂಕ್ ಲಾಗ್ಲಾಂ..

ಕಾಳ್ಜಾಂತ್ಲ್ಯಾನ್ ದೆಖಿಲ್ಲೆಂ ಸೊಬೀತ್ ಸುಂದರ್ ಸಪನ್
ಪೂರಾಯ್ ನಾ ಜಾಯ್ತ್ ಹ್ಯಾ ಭಂಯಾನ್ ಕಾಳೀಜ್ ರಡೂಂಕ್ ಲಾಗ್ಲಾಂ..
ದುಃಖ್ ಮ್ಹಜೆಂ ಉತ್ರಾಂ ಜಾವ್ನ್ ಜೆನ್ನಾ ಯೆವಂಕ್ ಲಾಗ್ಲಾಂ
ಹಾಂವ್ ತಾಕಾ ಎಕ್ ಬರಿ ಕವಿತಾ ಸಮ್ಜೂಂಕ್ ಲಾಗ್ಲಾಂ....

- ಸುನೇತ್ರಾ ಜೋಗ್ [ಜ್ಯೂನ್ 2018]

कविता

जेदनां ’जिवीत’ म्हळ्यार कितें म्हळ्ळें समजता तेदनां ’कविता’ अपशीच उदेता मात्र न्हय, ती कविता उलवंक लाग्ता.

समाजेंत ’कवी’ म्हळ्ळे एक वेगळो मनीस. ताची दीश्ट वेगळी, ताची समजणी वेगळी, ताची तान-भूक वेगळी. देकून जाणारी सांग्तात; ’रवीन देखानासचें कवी देखुंक सक्ता’.

हांगासर‌यी असलीच कविता आसा, जी जिविताविशीं समजयता, आनी एक कविता कशी समजुवेता म्हळ्ळेविश्यांत सांग्ता. बाय सुनेत्रा जोग गोंयची एक नामणेची तर्जण‌कार्न, बरवपीण, कवयत्री. तिच्या कवितेचो स्वाद चाकुंक आतां तुमकांच सोडतां.

- सं

[कविता] जिवीत कविता [सुनेत्रा जोग]

जिवीत कविता

हालीं हालीं म्हाका मातशें जिवीत कळूंक लागलां
कोण कोणाचो नासता हें सत्य होल्मूंक लागलां
घोव, बायल, धूव, पूत सगळीं नातीं फट
सगळ्यां वांगडा आसून लेगीत एकटें दिसूंक लागलां..

आपले म्हणून जांचो केलो मोग आयजमेरेन
तांकां लेगीत आतां म्हजें वोजें जावंक लागलां
ध्यास एक मनांत घेवन जीव जळयलो
आतां दिसता खंयतरी म्हजेंच चुकूंक लागलां..

काळजांतल्यान देखिल्लें सोबीत सुंदर सपन
पूराय ना जायत ह्या भंयान काळीज रडूंक लागलां..
दुःख म्हजें उत्रां जावन जेन्ना येवंक लागलां
हांव ताका एक बरी कविता समजूंक लागलां....

- सुनेत्रा जोग [ज्यून २०१८]

सुनेत्रा जोग: पद्युत्तर (M.A.) शिकप जोडपी बाय सुनेत्रा जोग, BSNL संस्थ्यांत काम कर्न वोल्युंटरी रिटायर्ड‌मेंट घेतलां. कोंकणी तशेंच मराठिंत तिणें खूब वावर केला आनी करून आसा. हिणें ’आजियेक वाचुंक शिकयलें आनी हेर काण‌यो (- सुधा मूर्ती)’ तर्जण केला, तशेंच दीश्ट नासच्या भुर्ग्यांक समजुंच्या 'Braille' भाशेंत तर्जण केला. ह्या बुकाक गोयां कोंकणी अकाडेमिचो पुरसकार, तशेंच कोंकणी कला आनी संसकृतिचो पुरसकार लाभला. ’जाणतेलो आनी ताचो देव’, ’हांवें दूद पियेंवचें सोडलें त्या दिसा’, ’सर्गाचे वाटेर कितें तरी घडलें’, ’शेणिल्ल्या देवळाचे रहस्य’, हे सर्व सुधा मूर्तिचे बूक कोंकणेंत तर्जण केल्यात. तशेंच ’डीस‌ओर्डरली वुमन (मालती राव)’ बूक साहीत अकाडेमीन पर्गट केला.

Kovita

Jednam ’jivit’ mhollear kitem mholl'llem somzota tednam ’kovita’ opxich udeta matr nhoi, ti kovita ulounko lagta.

Somajent ’kovi’ mholl'lle ek vegllo monis. Tachi dixtt veglli, tachi somzonni veglli, tachi tan-bhuk veglli. Dekun zannari sangtat; ’rovin dekhanaschem kovi dekhunk sokta’.

Hangasor‌yi osolich kovita asa, ji jivitavixim somzoita, ani ek kovita koxi somzuveta mholl'llevixeant sangta. Bai sunetra zog gõychi ek namnnechi torzonn‌karn, boroupinn, kouyotri. Tichea kovitecho svad chakunk atam tumkanch soddtam.

- Som.

[Kovita] Jivit Kovita [Sunetra Jog]

Jivit Kovita

Halim halim mhaka matxem jivit kollunk laglam
konn konnacho nasta hem soty holmunk laglam
ghovo, bail, dhuv, put sogllim natim fott
soglleam vangodda asun legit ekttem disunk laglam..

Aple mhonnun zancho kelo mog aizomeren
tankam legit atam mhojem vojem zaunk laglam
dheas ek monant gheun jivo zolloilo
atam dista khointori mhojench chukunk laglam..

Kallzantlean dekhil'lem sobit sundor sopon
purai na zait hea bhomyan kalliz roddunk laglam..
DuHkh mhojem utram zaun jen'na yeunk laglam
hamv taka ek bori kovita somzunk laglam....

- Sunetra Jog  [June 2018]

Sunetra Jog: Podyut'tor (M.A.) xikop zoddpi bai sunetra zog, BSNL somstheant kam' korn volyunttori rittairdd‌mentt ghetlam. Konkonni toxench moratthint tinnem khub vaur kela ani korun asa. Hinnem ’ajiek vachunk xikoilem ani her kann‌yo (- sudha murti)’ torzonn kela, toxench dixtt naschea bhurgeank somzunchea 'Braille' bhaxent torzonn kela. Hea bukak goyam konkonni okaddemicho puroskar, toxench konkonni kola ani somskriticho puroskar labhla. ’zanntelo ani tacho devo’, ’hamvem dud piemvchem soddlem tea disa’, ’sorgache vatter kitem tori ghoddlem’, ’xennil'lea deullache rohosy’, he sorv sudha murtiche buk konkonnent torzonn keleat. Toxench ’ddis‌orddorli vumon (maloti ravo)’ buk sahit okaddemin porgott kela.

ದಾಯ್ಜ್.ಕೊಮ್