ಕೊಂಕ್ಣಿ ಕಾರ್ಯಿಂ

[ಕವಿತಾ] ಆವಯ್ಚೊ ಮಾರ್ [ಅಮೇಯ್ ನಾಯ್ಕ್, ಗೊಂಯ್]

ಆವಯ್ಚೊ ಮಾರ್

ಭುರ್ಗೆಪಣಾಂತ್ ಆವಯ್ ಮ್ಹಾಕಾ
ಖೂಬ್ ಮಾರ್ತಾಲಿ,
ತಿಚೆ ಕಡೆನ್ ತಸೊ
ತರೆತರೆಚೊ
ಮಾರ್ ಆಸ್ಲೆಲೊ.

ಜಸೊ,
ಎಕ್ ದೊನ್ ವರ್ಸಾಂಚೊ ಆಸ್ತನಾ,
ಕಸ್ಲೀಂಯ್ ಮಸ್ತೆಪಣಾಂ ಕರ್ತನಾ,
'ಧಾಯ್' ಕರ್ತಾಲಿ
ಮೊಗಾನ್.

ಪಿರಾಯ್ ವಾಡ್ಲಿ
ತಶಿ
ಮಸ್ತೆಪಣಾಂಯ್ ವಾಡ್ಲಿಂ.
ತಶಿ
ಆವ್ಯ್ಚಿ ಮಾರ್ಪಾಚಿ
ತರಾಯ್ ವಾಡ್ಲಿ.

ಪೂಣ್
ಸಂವ್ಯ್ ಮಾತ್ತೂಯ್ ಸುಟೂಂಕ್ ನಾ ಮ್ಹಜಿ
ಮಾರ್ ಖಾವ್ಪಾಚಿ.

ಫುಡೆಂ, ಆವ್ಯ್ಚ್ಯಾ ಹಾತಾಂತ್
'ಶಿಟ್ಟಿ' ಆಸ್ತಾಲಿ
ಸಾದಿ ಸರಳ್
ಅಶೀಟ್ಟ್ ಹಾತಾರ್ ಪಡ್ಟಾಲಿ
ಕೆನ್ನಾ ಕೆನ್ನಾ ಚುಕ್ತಾಲಿ
ವಾ
ಹಾಂವ್ ಚುಕಯ್ತಾಲೊಂ...
ತಿಚೆರ್ 'ಭಾರ್' ಬೀನ್ ಯೆತ್ಕಚ್
ಕುಲ್ಯಾರ್ ಪಡ್ಟಕಚ್
ಖೂಬ್ ದುಖ್ತಾಲಿ.

ಹಾಂವ್
ಆನೀಕ್ ಮಾತ್ಸೊ ವ್ಹಡ್ ಜಾಲೊಂ.
ಶಿಟ್ಟೆಚೊ ಮಾರ್ ಖಾವ್ನ್ ಖಾವ್ನ್,
ಕುಲೊಯ್ ಮ್ಹಜೊ ಘಟ್ ಜಾಲೊಂ.
ಮಾಗೀರ್ ಹಾಂವೆಂ
ಸಾನ್ನಿ ಮುಣ್ಯಾಂಚೊ,
ಚಪ್ಪಲಾಂಚೊಯ್ ಖಾಲ್ಲೊಂ ಮಾರ್.

ತ್ಯಾ ದಿಸಾ...
ತ್ಯಾ ದಿಸಾ ಮ್ಹಜ್ಯಾಯ್
ಸೊಶೀಕತಾಯೆಚೊ ಬಾಂಧ್ ಫುಟ್ಲೊಂ.
ಕಾನ್ಸುಲಾರ್ ತಿಚ್ಯಾ
ದೊನ್ ಫುಲಯ್ಲಿ...

ಚೆಡೊ ತಿಚೊ ವ್ಹಡ್ ಜಾಲ್ಲೊ
ತಿಕಾ ಸಮ್ಜಲೆಂ.
ಬಾಬ್ಡಿ ಒಗ್ಗಿ ಪಡ್ಲಿ
ಜೀಬ್ ಶೆಣಿಲ್ಲೆವರಿ.

ತ್ಯಾ ದಿಸಾ ಸಾವ್ನ್
ಆಜುನೂಯ್ ಖಾತಾಂ ಹಾಂವ್
ತಿಚೊ
ಮೊನೆಪಣಾಂ ಮಾರ್...
ಸಗ್ಳೆ ಮಾರ್ ಸೊಸ್ಲೆ
'ಹೊ' ಮಾತ್
ಮಾತ್ತೂಯ್ ಸೊಸೂಂಕ್ ಜಾಯ್ನಾ.

ದಿಸ್ತಾಂ ಮ್ಹಾಕಾ
ಸಾಂಗ್ಚೆಂ ಕಶೆಂ ತಿಕಾ...
" ವಾಜಯ್ ಗೆ...
ವಾಜಯ್ ಗೆ, ಮ್ಹಜ್ಯಾ ಪೊಲ್ಯಾರ್...
ಹಾತಾರ್
ವಾ ಕುಲ್ಯಾರ್...

ಪಳಯ್...
ಪಳಯ್... ಹಾಂವ್ ಲಾಗೀಂಚ್ ಆಸಾಂ
ಲಾಗೀಂಚ್
ತುಜ್ಯಾ ಉಲ್ಯಾರ್."

ಕಿತ್ಲೆಯ್ ಕೆಲೆ ಪ್ರಯ್ತ್ನ್ ತರಿ
ತಿಕಾ
ಭುರ್ಗೆಪಣ್ ಮ್ಹಜೆಂ ಮೆಳ್ನಾ,
ಮ್ಹಾಕಾಯ್ ಆತಾಂ ಮ್ಹಜ್ಯಾ
'ತ್ಯಾ'
ಭುರ್ಗೆಪಣಾಂತ್ ವಚೂಂಕ್ ಕಳ್ನಾ...
'ತ್ಯಾ'
ಭುರ್ಗೆಪಣಾಂತ್ ವಚೂಂಕ್ ಕಳ್ನಾ.

- ಅಮೇಯ್ ನಾಯ್ಕ್, ಗೊಂಯ್ [ಮಾರ್ಚ್, 2019]

कविता

हे मार हासवन सुरू कर्तात, मधेंच रडयतात, काळजाक पिगळयतात आनी कविता वाचून गेल्लेपरिंच कोशेडदांत सिंतिमेंतांची पिंर्गोण सयत पिंर्गशें करयतात. कितें कविता एका तर्न्या कविथावन.

अजीक तीन वर्साधीं एका कविगोश्टिंत बाब अमेय नायक हाची एक कविता वाचून ताच्या सोधनेर हांव आसलों. पूण म्हाका तो मेळ्ळोच आयलेवार गोंयांत चल‌ल्ल्या साहितीक सम्मेळनांत. जितलो प्रतिभावंत तो की, तितलेंच खाल्तेंपण ताचें. ही कविता थंयचर ताणें प्रसतूत केल्ली आनी आयकोवपी जायत्यांच्या तोंडार बिगां घालुंक सक‌ल्ली कविता. गोंयांत तर‌यी उत्रांविणें फकत साहितीक प्रतिभा अपुर्भायेन उलंवची पळेताना खरेंच भग्ता; कोंकणेंत बरे कवी वेगिंच येतले. आनी ते बरे दीस वेगिंच येंव म्हणून राकोन रावतां आनी सद्द्याक ही कविता वाचुंक तुका उलो दितां.

- सं

[कविता] आवयचो मार  [अमेय नायक, गोंय]

आवयचो मार

भुरगेपणांत आवय म्हाका
खूब मारताली,
तिचे कडेन तसो
तरेतरेचो
मार आसलेलो.

जसो,
एक दोन वर्सांचो आसतना,
कसलींय मस्तेपणां करतना,
'धाय' करताली
मोगान.

पिराय वाडली
तशी
मस्तेपणांय वाडलीं.
तशी
आवयची मारपाची
तराय वाडली.

पूण
संवय मात्तूय सुटूंक ना म्हजी
मार खावपाची.

फुडें, आवयच्या हातांत
'शिट्टी' आसताली
सादी सरळ
अशीट्ट हातार पडटाली
केन्ना केन्ना चुकताली
वा
हांव चुकयतालों...
तिचेर 'भार' बीन येतकच
कुल्यार पडटकच
खूब दुखताली.

हांव
आनीक मात्सो व्हड जालों.
शिट्टेचो मार खावन खावन,
कुलोय म्हजो घट जालों.
मागीर हांवें
सान्नी मुण्यांचो,
चप्पलांचोय खाल्लों मार.

त्या दिसा...
त्या दिसा म्हज्याय
सोशीकतायेचो बांध फुटलों.
कानसुलार तिच्या
दोन फुलयली...

चेडो तिचो व्हड जाल्लो
तिका समजलें.
बाबडी ओग्गी पडली
जीब शेणिल्लेवरी.

त्या दिसा सावन
आजुनूय खातां हांव
तिचो
मोनेपणां मार...
सगळे मार सोसले
'हो' मात
मात्तूय सोसूंक जायना.

दिसतां म्हाका
सांगचें कशें तिका...
" वाजय गे...
वाजय गे, म्हज्या पोल्यार...
हातार
वा कुल्यार...

पळय...
पळय... हांव लागींच आसां
लागींच
तुज्या उल्यार."

कितलेय केले प्रयत्न तरी
तिका
भुरगेपण म्हजें मेळना,
म्हाकाय आतां म्हज्या
'त्या'
भुरगेपणांत वचूंक कळना...
'त्या'
भुरगेपणांत वचूंक कळना.

- अमेय नायक, गोंय  [मार्च, २०१९]

अमेय नायक, गोंय: बी.कोम. शिकपी अमेय विश्राम नायक गोंयचो उदेवन येंवचो प्रतिभावंत कवी. आकाश‌वाणिचेर, कविसम्मेळनांनी कविता सादर केल्यात. सुनापरांत, भांगार भुंय, बिंब नेमाळ्यांनी पर्गटल्यांत. ताच्या कविताजम्याचें नांव ’मोग डोट कोम’. २०१७ इस्वेचो साहीत अकाडेमिचो ’यूव पुरसकार’ जोडपी.

Kovita

He mar hasoun suru kortat, modhench roddoitat, kallzak piglloitat ani kovita vachun gel'leporinch koxedd'dant sintimentanchi pimrgonn soit pimrgoxem koroitat. Kitem kovita eka tornea kovithaun.

Ojik tin vorsadhim eka kovigoxttint bab omey naik hachi ek kovita vachun tachea sodhner hamv aslom. Punn mhaka to mell'lloch ailevar gõyant chol‌l'lea sahitik som'mellonant. Jitlo protibhaunt to ki, titlench khaltemponn tachem. Hi kovita thoinchor tannem prostut kel'li ani aikoupi zaiteanchea tonddar bigam ghalunk sok‌l'li kovita. Gõyant tor‌yi utramvinnem fokot sahitik protibha opurbhayen ulomvchi polletana khorench bhogta; konkonnent bore kovi veginch yetole. Ani te bore dis veginch yemv mhonnun rakon rautam ani sod'deak hi kovita vachunk tuka ulo ditam.

- Som.

[Kovita] Auycho Mar   [Omey Naik, Gõy]

Auycho Mar

bhurgeponnant auy mhaka
khub martali,
tiche kodden toso
toretorecho
mar aslelo.

Zoso,
ek don vorsancho astona,
koslim-i mosteponnam kortona,
'dhai' kortali
mogan.

Pirai vaddli
toxi
mosteponnam-i vaddlim.
Toxi
auychi marpachi
torai vaddli.

Punn
somvy mat'tuy suttunk na mhoji
mar khaupachi.

Fuddem, auychea hatant
'xitt'tti' astali
sadi soroll
oxitt'tt hatar poddttali
ken'na ken'na chuktali
va
hamv chukoitalom...
Ticher 'bhar' bin yetkoch
kulear poddttokoch
khub dukhtali.

Hamv
anik matso vhodd zalom.
Xitt'ttecho mar khaun khaun,
kuloi mhozo ghott zalom.
Magir hamvem
san'ni munneancho,
choppolanchoi khal'lom mar.

Tea disa...
Tea disa mhojyai
soxikotayecho bandh futtlom.
Kansular tichea
don fuloili...

Cheddo ticho vhodd zal'lo
tika somzolem.
Babddi oggi poddli
jib xennil'leuri.

Tea disa saun
azunuy khatam hamv
ticho
moneponnam mar...
Soglle mar sosle
'h' mat
mat'tuy sosunk zaina.

Distam mhaka
sangchem koxem tika...
" vazoi ge...
Vazoi ge, mhojea polear...
Hatar
va kulear...

Polloi...
Polloi... Hamv laginch asam
laginch
tujea ulear."

kitley kele proitn tori
tika
bhurgeponn mhojem mellna,
mhakai atam mhojea
'tea'
bhurgeponnant vochunk kollna...
'tea'
bhurgeponnant vochunk kollna.

- Omey Naik, Gõy [March, 2019]

Omey Naik, Gõy: Bi.Kom'. Xikpi omey vixram' naik gõycho udeun yemvcho protibhaunt kovi. Akax‌vannicher, kovisom'mellonamni kovita sador keleat. Sunaporant, bhangar bhum-i, bimb nemalleamni porgottleant. Tachea kovitazomeachem namv ’mog ddott kom'’. 2017 isvecho sahit okaddemicho ’yuvo puroskar’ zoddpi.

ದಾಯ್ಜ್.ಕೊಮ್