ಕೊಂಕ್ಣಿ ಕಾರ್ಯಿಂ

[ಕವಿತಾ] ಝುಜಾಚೆಂ ವ್ಹಾರೆಂ [ಸರಸ್ವತಿ ದಾಮೋದರ್ ನಾಯ್ಕ್]

ಝುಜಾಚೆಂ ವ್ಹಾರೆಂ

ಮೊಳ್ಬಾಂತ್ ಕುಪಾಂ ದಾಂಟುನ್ ಆಯ್ಲ್ಯಾಂತ್
ಕಾಳಿಕುಟ್ ಭಿರಾಂಕುಳ್ ವಿಶ್ವ ಝುಜಾಂಚಿ
ಪ್ರತಿಶೋದ್ ಧುಮ್ಸುಂಕ್ ಲಾಗ್ಲಾ
ಭುಂಯೆವೆಲ್ಯಾ ದೆಸಾಂಭಿತರ್
ಜಾಗ್ಯಾ ಖಾತಿರ್, ಧರ್ಮಾ ಖಾತಿರ್, ತೆಲಾ ಖಾತಿರ್
ಉದ್ಕಾ ಖಾತಿರ್, ಮೊತೆಪಣಾ ಖಾತಿರ್, ಇಸ್ಟಾಗಾತಿ ಖಾತಿರ್
ದುಸ್ಮಾನ್‌ಪಣಾಂ ವಾಡ್ತಾತ್
ಬೋಂಬ್ ಉಡವ್ನ್ ಕೆದ್ನಾ ಕರ್ತೆಲ್ಯೆ ಉಧ್ವಸ್ತ್
ದೇಶ್ ದೇಶಾಂಕ್ ಸಾಂಗುಂಕ್ ನ್ಹಜೊ
ಆಯ್ಜ್ ಸುಖಾನ್ ಜಿಯೆತಲೆ ಸಾಂಗುಂಕ್ ಜಾಯ್ನಾ
ಕೆನ್ನಾ ಜಾತಲೆ ರೆಫ್ಯೂಜಿ
ಘರ್‌ದಾರ್ ಸಂಸಾರ್ ಸನೊವನ್ ಬಸ್ಲೆಲೆ
ಕೆನ್ನಾ ಕಾಯ್ ಸಂಪ್ತಲೊ ಖೆಳ್ ಹ್ಯಾ ಝುಜಾಂಚೊ?
ಕೆನ್ನಾ ಕಾಯ್ ಮನಿಸ್ ಶಾಣೊ ಜಾತಲೊ?
ಕೆನ್ನಾ ಕಾಯ್ ದೇಶಾಭಿತರ್ ಸಂಬಂಧ್ ಸುಧಾರ್ತಲೊ?
ಮ್ಹಜ್ಯಾ ಇಶ್ಟಾನ್ ಹುಸ್ಕೊ ಉಕ್ತಯ್ಲೊ


ತೊ ಖರೆಂಚ್ ಮನಾತ್ಲ್ಯಾನ್ ಉಲಯ್ತಾಲೊ
ಮ್ಹಾಕಾಯ್ ಹುಸ್ಕೊ ಜಾತ ಪರಿಸ್ತಿತೆಚೊ
ಮ್ಹಣ್ ಹಾಂವೆಂ ಮನಾನ್‌ಚ್ ತಾಕಾ ಮ್ಹಂಟ್ಲೆಂ
ತುಂ ತುಜ್ಯಾ ಪರ್ಕ್ಯಾ ಧರ್ಮಾನ್ ಕಾಜಾರ್ ಜಾಲ್ಯಾ
ಪುತಾಕ್ ಮಾಫ್ ಕರ್ತಲೊ ತೆನ್ನಾ
ತುಂ ತುಜ್ಯಾ ಶೆಜಾರ್‍ಯಾಂಕಡೆ ಚಿಮ್ಟಿಭರ್ ಜಾಗ್ಯಾಖಾತಿರ್
ಝಗ್ಗಡ್ಚೊ ನಾ ತೆನ್ನಾ
ತುಜ್ಯಾ ಧರನ್ ಭುಕೆನ್ ಉಭ್ಯಾ ಆಸ್ಲೆಲ್ಯಾ
ಭಿಕಾರಿಕ್ ಹಿಸ್-ಫಿಸ್ ಕರ್ಚೊನಾ ತೆನ್ನಾ
ಅಸ್ತುರ್ಯೆಕ್ ಸೊನ್ಮಾನ್ ದಿತೆಲೊ ತೆನ್ನಾ
ತುಜ್ಯಾ ಗಾಂವಾನ್ ಆಯಿಲ್ಲ್ಯಾ ಪರ್ಕ್ಯಾಕ್ ಆಪ್ಲೆ ಮ್ಹಣ್ತೆಲೊ ತೆನ್ನಾ
ಝುಜಾಚೆಂ ಹೆಂ ವ್ಹಾರೆಂ ಎಕಾ ತುಜ್ಯಾ ಕೊಡ್ಲ್ಯಾನ್ ದೇಶಾ ಕೊಡೆ ವಾವ್ತಾ
ತೆಂ ತುಂ ಬಂದ್ ಕರುಂಕ್ ಸಮ್ಜುಕಾಯೆಚಿ ಭುಮಿಕಾ ಘೆತೆಲೊ ತೆನ್ನಾ

- ಸರಸ್ವತಿ ದಾಮೋದರ್ ನಾಯ್ಕ್ [ಮಾರ್ಚ್, 2019]

कविता

भायल्या दुस्मानांलागीं झुज्येत पूण भितरल्या दुस्मानालागीं झुजचें कशें? हें सवाल भोव मार्मीक सवाल. आज संसाराच्या वेवेगळ्या प्रांतांत झुजाची भिरांत धोसता, देकून आज पासोन झुजाक आयतें जांवच्याक खर्च जांवचो दुडू गर्जेवंतांक लाभानासताना लोक भुकेन मोर्ता. पूण हें झूज एक नेम मात्र, पूण खरेंपणीं आटोव कर्चो तर त्या दुस्मानाच्याकी भिरांकूळ दुस्मान आमचेमधेंच आसता, आमचेपयकिंत आसता आनी चड करून आमचेभितर‌च आसता म्हळ्ळें चिंतप चिंतचे कितले आसात?

झुजाचें व्हारें कविता घेवन आयिल्ली गोंयचो नाम्नेची कवी बाय सरस्वती दामोदर नायक खंडीत हेच चिंत्पाक आपल्या कवितेंत घेवन आयल्या. देकून ही कविता फकत उत्रांची सजावळ जावन उराना, बगार माटसो नियाळ करुंक उलो दिता. आतां तें काम तुजेर सोडतां.

- सं

[कविता] झुजाचें व्हारें [सरस्वती दामोदर नायक]

झुजाचें व्हारें

मोळबांत कुपां दांटून आयल्यांत
काळिकूट भिरांकूळ विश्व झुजांची
प्रतिशोद धुम्सुंक लागला
भुंयेवेल्या देसांभितर
जाग्या खातीर, धर्मा खातीर, तेला खातीर
उदका खातीर, मोतेपणा खातीर, इसटागाती खातीर
दुस्मान‌पणां वाडतात
बोंब उडवन केदना कर्तेल्ये उध्वसत
देश देशांक सांगुंक न्हजो
आयज सुखान जियेतले सांगुंक जायना
केन्ना जातले रेफयूजी
घर‌दार संसार सनोवन बसलेले
केन्ना काय संप्तलो खेळ ह्या झुजांचो?
केन्ना काय मनीस शाणो जातलो?
केन्ना काय देशाभितर संबंध सुधार्तलो?
म्हज्या इश्टान हुसको उक्तयलो


तो खरेंच मनातल्यान उलयतालो
म्हाकाय हुसको जात परिसतितेचो
म्हण हांवें मनान‌च ताका म्हंटलें
तूं तुज्या पर्क्या धर्मान काजार जाल्या
पुताक माफ कर्तलो तेन्ना
तूं तुज्या शेजार‍यांकडे चिमटिभर जाग्याखातीर
झग्गडचो ना तेन्ना
तुज्या धरन भुकेन उभ्या आसलेल्या
भिकारीक हीस-फीस कर्चोना तेन्ना
असतूऱ्येक सोन्मान दितेलो तेन्ना
तुज्या गांवान आयिल्ल्या पर्क्याक आपले म्हणतेलो तेन्ना
झुजाचें हें व्हारें एका तुज्या कोडल्यान देशा कोडे वावता
तें तूं बंद करुंक समजुकायेची भुमिका घेतेलो तेन्ना
 

- सरस्वती दामोदर नायक [मार्च, २०१९]

सरस्वती दामोदर नायक: बी.कोम पद्वेचेचें शिकप जोड‌ल्ली बाय सरस्वती दामोदर नायक गोंयच्या कोंकणी नेमाळ्यांनी कविता बरयता. ’मुक्त‌रंग’ हिचो पर्गट जल्लो कविताजमो. बाळ साहित्याचे च्यार बूक हिणे पर्गट केल्यात. २०१३ इस्वेंत कोंकणी भाशा मंडळ थावन बाळ साहित्याचेर पुरसकार हिका लाभला. हेर साहितीक स्पर्ध्यांनी सयत हिणें इनामां आपणायल्यांत.

Kovita

Bhailea dusmanamlagim zhujyet punn bhitorlea dusmanalagim zhujchem koxem? hem soval bhovo marmik soval. Az somsarachea vevegllea prantant zhuzachi bhirant dhosta, dekun az pason zhuzak aitem zamvcheak khorch zamvcho duddu gorjeuntank labhanastana lok bhuken morta. Punn hem zhuz ek nem' matr, punn khoremponnim attovo korcho tor tea dusmanacheaki bhirankull dusman amchemodhench asta, amchepoikint asta ani chodd korun amchebhitor‌ch asta mholl'llem chintop chintche kitle asat?

zhuzachem vharem kovita gheun ayil'li gõycho namnechi kovi bai sorosvoti damodor naik khonddit hech chintpak aplea kovitent gheun ailea. Dekun hi kovita fokot utranchi sozaull zaun urana, bogar mattso niall korunk ulo dita. Atam tem kam' tujer soddtam.

- Som.

[Kovita] Zhuzachem Vharem   [Sorosvoti Damodor Naik]

Zhuzachem Vharem

mollbant kupam danttun aileant
kallikutt bhirankull vixvo zhuzanchi
protixod dhumsunk lagla
bhumyevelea desambhitor
zagea khatir, dhorma khatir, tela khatir
udka khatir, moteponna khatir, isttagati khatir
dusman‌ponnam vaddtat
bomb uddoun kedna kortelye udhvost
dex dexank sangunk nhozo
aiz sukhan jietole sangunk zaina
ken'na zatole refyuji
ghor‌dar somsar sonoun boslele
ken'na kai somptolo khell hea zhuzancho?
ken'na kai monis xanno zatolo?
ken'na kai dexabhitor sombondh sudhartolo?
mhojea ixttan husko uktoilo


to khorench monatlean uloitalo
mhakai husko zato poristitecho
mhonn hamvem monan‌ch taka mhonttlem
tum tujea porkea dhorman kazar zalea
putak maf kortolo ten'na
tum tujea xezar‍yankodde chimttibhor zageakhatir
zhoggoddcho na ten'na
tujea dhoron bhuken ubhea aslelea
bhikarik his-fis korchona ten'na
osturyek sonman ditelo ten'na
tujea gamvan ayil'lea porkeak aple mhonntelo ten'na
zhuzachem hem vharem eka tujea koddlean dexa kodde vauta
tem tum bond korunk somzukayechi bhumika ghetelo ten'na

- Sorosvoti Damodor Naik [March, 2019]

Sorosvoti Damodor Naik: Bi.Kom' podvechechem xikop zodd‌l'li bai sorosvoti damodor naik gõychea konkonni nemalleamni kovita boroita. ’Mukt‌rong’ hicho porgott zol'lo kovitazomo. Ball sahiteache chear buk hinne porgott keleat. 2013 isvent konkonni bhaxa monddoll thaun ball sahiteacher puroskar hika labhla. Her sahitik spordheamni soit hinnem inamam apnnaileant.

ದಾಯ್ಜ್.ಕೊಮ್