ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಜಣ್ ಎಕ್ಲ್ಯಾಚೊ ದೇವ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಸಂಸಾರಾಂತ್ ಆಜ್ ಮೆಟಾ ಮೆಟಾಂನಿ, ವಾಟೆ ವಾಟೆಂನಿ ಮೆಳತಾತ್ ದೇವ್. ಮನಿಸ್ ಜ್ಯೆ ಕಿತೆಂ ಕಲ್ಪನ್ ಕರುಂಕ್ ಸಕತಾ ಥಂಯ್ ಏಕ್ ದೇವ್. ಥೊಡೆಪಾವ್ಟಿಂ ಅಶೆಂಯ್ ಭಗತಾ; ಹ್ಯಾ ಸಂಸಾರಾಂತ್ ಜಿಯೆತೆಲ್ಯಾ ಮನಶ್ಯಾಂಚ್ಯಾಕೀ ಚಡಿತ್ ದೇವ್ ಆಸಾತ್‌ಕಾಯ್? ಪುಣ್ ವಿಡಂಬನ್ ತೆಂ ನ್ಹಯ್, ಬಗರ್ ಇತಲೆ ದೇವ್ ಆಸುನ್‌ಯೀ ಮನೀಸ್ ಅಜೂನ್ ಖಂಚ್ಯಾಯ್ ದೆವಾಕ್ ಪಾತ್ಯೆನಾ ಆನಿ ಖಂಚ್ಯಾಯ್ ದೆವಾಕ್ ಆಯ್ಕನಾ. ಮನಶಾಕ್ ದೇವ್ ಫಕತ್ ಏಕ್ ದಾಕವ್ಪಾಕ್ ಮಾತ್ರ್ ಶಿವಾಯ್ ತ್ಯಾ ದೆವಾಚೆಂ ಚಿಂತಪ್ ಅಪ್ಲ್ಯಾ ಕರ್ಮಾಂತ್ ತೊ ಕರುಂಕ್ ಆಶೆನಾ. ಹ್ಯಾ ಹಕೀಗತೆಚ್ಯಾ ಪಾಟ್‌ಭುಂಯ್‌ಚೆರ್ ಉಭಿ ಕೆಲ್ಲಿ ಹಿ ಸೊಭಿತ್ ಕವಿತಾ ಜಾವ್ನಾಸಾ.

- ಸಂ

[ಕವಿತಾ] ಜಣ್ ಎಕ್ಲ್ಯಾಚೊ ದೇವ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಜಣ್ ಎಕ್ಲ್ಯಾಚೊ ದೇವ್ ಹಾಂಗಾ ಜಣ್ ಎಕ್ಲ್ಯಾಚೊ ಎಕ್ ದೇವ್ ಆಸಾ. ಎಕ್ ಮನೀಸ್ ಎಕ್ ದೇವ್ ದೊನ್ ಮನೀಸ್ ದೊನ್ ದೇವ್ ತೀನ್ ಮನೀಸ್ ತೀನ್ ದೇವ್ ಗಾಂವಾಂ-ಗಾಂವಾಂತ್ ದೇವ್ ವಾಡ್ಯಾ-ವಾಡ್ಯಾರ್ ದೇವ್ ತಿಟ್ಯಾರ್ ದೇವ್ ತಿಸ್ಕಾರ್ ದೇವ್ ಆತಾಂ ದೆವ್ ರಸ್ತ್ಯಾಂಚೆರುಯ್ ಪಾವ್ಲ್ಯಾತ್! ದೆವಾಚೆ ಹಾಂಗಾ ವಾಂಟೆ ಘಾಲ್ಯಾತ್ ಹ್ಯಾ ಜಾತೀಚೊ ದೇವ್ ತ್ಯಾ ಜಾತೀಚೊ ದೇವ್ ಮನಿಸ್ ಶ್ರೀಮಂತ್ ಜಾಲ್ಯಾರ್ ಶ್ರೀಮಂತ್ ದೇವ್ ಮನಿಸ್ ಗರೀಬ್ ಜಾಲ್ಯಾರ್ ಗರೀಬ್ ದೇವ್ ಹಾಂಗಾ ದೆವಾ ಖಾತೀರ್ ಝಗ್ಡಿಂ ಚಲ್ತಾತ್ ದೆವ್ಳಾಚ್ಯಾ ಹಕ್ಕಾಖಾತೀರ್ ಮಾರಾಮಾರ್ಯೊ ಚಲ್ತಾತ್ ದೆವಾಚೆರ್ ಶೆಕ್ ಗಾಜೊವಂಕ್ ಝುಜಾಂ ಚಲ್ತಾತ್. ಹಾಂಗಾ ಮನೀಸ್ ದೆವಾಚೆರ್ ನದರ್ ದವ್ರತಾ ದೆವ್ಳಾಂತ್ಲ್ಯಾ ಭಟಾಚೆರ್ ನದರ್ ದವ್ರತಾ ದೆವ್ಳಾಂತಲೊ ಭಟ್ ತಾಟಾಂತ್ಲ್ಯಾ ಪೈಶಾಂಚೆರ್ ನದರ್ ದವ್ರತಾ ದೆವಾಕ್ ಭಜ್ಪಾಚೆಂ ಮಾತ್ ಕುಶೀನಚ್ ಉರ್ತಾ. ಇತ್ಲೆಯ್ ದೆವ್ ಉಣೆ ಮ್ಹಣ್ ಥೊಡ್ಯಾ ಮನ್ಶ್ಯಾಂಕಯ್ ಹಾಂಗಾ ದೆವ್ ಕೆಲ್ಯಾತ್. ತಾಂಕಾ ಪಾಲ್ಖೆಂತ್ ಬಸಯ್ತಾತ್ ತಾಂಕಾ ರಥಾಂತ್ ಬಸಯ್ತಾತ್ ತಾಂಕಾ ಖಾಂದ್ಯಾರ್ ಘೆವ್ನ್ ಮಿರಯ್ತಾತ್ ತಾಂಚ್ಯಾ ಪಾಂಯಾಕಡೆನ್ ನಾಕಾಂ ಝರಯ್ತಾತ್ ಆತಾಂ ತಾಂಚಿಂ ಲಗ್ನಾಯ್ ಲಾಯ್ತಾತ್! ಹಾಂಗಾ ಇತ್ಲೆಯ್ ದೆವ್ ಜಾಲೆ ತರಿ ಮನೀಸ್ ಆಜೂನ್ ದೆಂವ್ಚಾರಚ್ ಉಲ್ಲಾ ಆಪ್ಲೆಂ ದೆಂವ್ಚಾರಪಣ್ ಲಿಪೊವಂಕ್ ದೆವಾಕ್ ಹಾಂಣಿ ದಾವ್ಣೆಕ್ ಬಾಂದ್ಲಾ! ದೆವಾಕ್ ಹಾಂಣಿ ದಾವ್ಣೆಕ್ ಬಾಂದ್ಲಾ! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ಮಾಯ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆಣಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Zonn ekleach devo* (- Sakharam Shennvi Borkar)*
Somsarant az metta mettamni, vatte vattemni mellotat devo. Monis jye kitem kolpon korunk sokota thoim ek devo. Thoddepauttim oxem-i bhogota; hea somsarant jietelea monoxeancheaki choddit devo asat‌kai? punn viddombon tem nhoi, bogor itole devo asun‌yi monis ozun khonchyai devak patyena ani khonchyai devak aikona. Monoxak devo fokot ek dakoupak matr xivai tea devachem chintop oplea kormant to korunk axena. Hea hokigotechea patt‌bhum-i‌cher ubhi kel'li hi sobhit kovita zaunasa. - Som
[kovita] Zonn ekleach devo* (- Sakharam Shennvi Borkar)*
Zonn ekleacho devo hanga zonn ekleacho ek devo asa. Ek monis ek devo don monis don devo tin monis tin devo gamvam-gamvant devo vaddea-vaddear devo tittear devo tiskar devo atam devo rosteancherui pauleat! devache hanga vantte ghaleat hea zaticho devo tea zaticho devo monis xrimont zalear xrimont devo monis gorib zalear gorib devo hanga deva khatir zhogddim choltat deullachea hokkakhatir maramareo choltat devacher xek gazounk zhuzam choltat. Hanga monis devacher nodor dourota deullantlea bhottacher nodor dourota deullantolo bhott tattantlea poixancher nodor dourota devak bhojpachem mat kuxinoch urta. Itley devo unne mhonn thoddea monxeankoi hanga devo keleat. Tanka palkhent bosoitat tanka rothant bosoitat tanka khandear gheun miroitat tanchea pamyakodden nakam zhoroitat atam tanchim lognai laitat! hanga itley devo zale tori monis azun demvcharoch ul'la aplem demvcharoponn lipounk devak hamnni daunnek bandla! devak hamnni daunnek bandla! **** - Sakharam Shennvi Borkar.** [May, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, bimb, zag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] जण एकल्याचो देव (- सखाराम शेण्वी बोर्कार)
संसारांत आज मेटा मेटांनी, वाटे वाटेंनी मेळतात देव. मनीस ज्ये कितें कल्पन करुंक सकता थंय एक देव. थोडेपावटीं अशेंय भगता; ह्या संसारांत जियेतेल्या मनश्यांच्याकी चडीत देव आसात‌काय? पूण विडंबन तें न्हय, बगर इतले देव आसून‌यी मनीस अजून खंच्याय देवाक पात्येना आनी खंच्याय देवाक आयकना. मनशाक देव फकत एक दाकवपाक मात्र शिवाय त्या देवाचें चिंतप अपल्या कर्मांत तो करुंक आशेना. ह्या हकीगतेच्या पाट‌भुंय‌चेर उभी केल्ली ही सोभीत कविता जावनासा. - सं
[कविता] जण एकल्याचो देव (- सखाराम शेण्वी बोर्कार)
जण एकल्याचो देव हांगा जण एकल्याचो एक देव आसा. एक मनीस एक देव दोन मनीस दोन देव तीन मनीस तीन देव गांवां-गांवांत देव वाड्या-वाड्यार देव तिट्यार देव तिस्कार देव आतां देव रस्त्यांचेरुय पावल्यात! देवाचे हांगा वांटे घाल्यात ह्या जातीचो देव त्या जातीचो देव मनिस श्रीमंत जाल्यार श्रीमंत देव मनिस गरीब जाल्यार गरीब देव हांगा देवा खातीर झगडीं चलतात देवळाच्या हक्काखातीर मारामाऱ्यो चलतात देवाचेर शेक गाजोवंक झुजां चलतात. हांगा मनीस देवाचेर नदर दवरता देवळांतल्या भटाचेर नदर दवरता देवळांतलो भट ताटांतल्या पैशांचेर नदर दवरता देवाक भजपाचें मात कुशीनच उरता. इतलेय देव उणे म्हण थोड्या मनश्यांकय हांगा देव केल्यात. तांका पालखेंत बसयतात तांका रथांत बसयतात तांका खांद्यार घेवन मिरयतात तांच्या पांयाकडेन नाकां झरयतात आतां तांचीं लग्नाय लायतात! हांगा इतलेय देव जाले तरी मनीस आजून देंवचारच उल्ला आपलें देंवचारपण लिपोवंक देवाक हांणी दावणेक बांदला! देवाक हांणी दावणेक बांदला! *** - सखाराम शेण्वी बोर्कार.** [माय, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.