ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಸವ್ಣೆಂ (- ಅತುಲ್ ರ. ಪಂಡಿತ್)

ಕಾಂಯ್ ತೆಂಪಾಥಾವ್ನ್ ಹಿ ಏಕ್ ಸಾಮಾನ್ಯ್ ರಿವಾಜ್ ಕಶಿ ಜಾಲ್ಯಾ. ಘೊಂಟೆರಾಂತ್ ಜಲ್ಮಲ್ಲಿಂ ಸುಕಣಿಂ, ಜೆದನಾಂ ಉಡುಂಕ್ ಶಿಕ್ತಾತ್ ತೆದನಾಂ ತಿಂ ಸಮಾಜ್-ಗಾಂವ್ ಸೊಡುನ್ ವಿದೇಶಾಕ್ ಪೊಳ್ತಾತ್ ಆನಿ ದೀಸ್ ಗೆಲ್ಲೆಪರಿಂಚ್ ತಾಂಕಾಂ ಹಿ ಸಮಾಜ್, ಹೊ ಘೊಂಟೆರ್ ಆನಿ ಗಾಂವ್ಚಿ ಯಾದ್ ಪಯ್ಸ್ ಜತಾ. ಸುಕಣ್ಯಾಂಕ್ ಇಮಾಜಿ ಕರುನ್ ಹ್ಯ ಕವಿತೆಂತ್ ಉಭಿಂ ಕೆಲ್ಲ್ಯಾ ರುಪಣ್ಯಾಂಕ್ ವ್ಹಳ್ಕುಂಕ್ ತ್ರಾಸ್ ನಾಂತ್. ಸೊಭಿತ್ ರಿತಿನ್ ತಿಂ ರುಪಣಿಂ ಉಭಿಂ ಜಾತತ್.

ಬಾಬ್ ಅತುಲ್ ರ. ಪಂಡಿತ್ ಗೊಂಯ್ಚೊ ಏಕ್ ನಾಮ್ನೆಚೊ ಕಥಾಕಾರ್, ಸಮೀಕ್ಷಕ್ ತಶೆಂಚ್ ಕವಿ. ಸಭಾರ್ ಸಾಹಿತಿಕ್ ಸರ್ತೆಂನಿ ಇನಮಾಂ ಅಪ್ಣಾಯಿಲ್ಲ್ಯಾ ಹಾಚ್ಯಾ ಹ್ಯಾ ಕವಿತೆಚಿ ಸಕತ್ ಪಾರ್ಕುಂಕ್ ತುಕಾಚ್ ಸೊಡತಾಂ.

- ಸಂ

[ಕವಿತಾ] ಸವ್ಣೆಂ (- ಅತುಲ್ ರ. ಪಂಡಿತ್)

ಸವ್ಣೆಂ ಸವ್ಣೆಂ ಚಿಂವ್ಚಿಂವ್ ಕರ್ಪಿ ಸವ್ಣಿಂ ಖಂಯ್ ಉಡೂನ್ ಗೆಲಿಂ ಕಾಯ್? ದಾಣೆ ಟಿಪ್ತಾಂ ಟಿಪ್ತಾಂ ಡೊಲರಾಂಕ್ ಭುಲ್ಲಿ ಕಾಯ್? ಘೊಂಟೆರಾಂತಲಿ ಚಿಂವ್ಚಿಂವ್ ಆತಾಂ ಪಡ್ನಾ ಕಾನಾರ್ ದಿಗಂತರಾ ಗೆಲ್ಲಿಂ ಸವ್ಣಿಂ ಪರ್ತುಪಾಚೆಂ ಘೆನಾತ್ ಮನಾರ್ ಕಾಡ್ಯೊಬಡಯೊ ಜಮೊವ್ನ್ ಚಿಮ್ಣಿ ಘೊಂಟೆರ್ ಆಪ್ಲೊ ಸಜಯ್ತಾಲಿ ನವೆಂ ಬಾಳಕ್ ಜಲ್ಮಾ ಯೆತ್ಲೆಂ ಮನಾಂಮನಾಂ ಸುಖಾವ್ತಾಲಿ ಸವ್ಣೆಂ ತಿಚೆಂ ವ್ಹಡ್ ಜಾಲೆಂ ಸಾಂಗ್ನಾಸತನಾ ಉಡೂನ್ ಗೆಲೆಂ 'ಕರಿಯ್ರ್ ಕರಿಯ್ರ್' ಮ್ಹಣೂನ್ ಗಲ್ಫಾಂತ್ ಘೊಂಟೆರ್ ಬಾಂದೂನ್ ರಾವ್ಲೆಂ ಚಿಂವ್ಚಿಂವ್ ಕರೀತ್ ಚಿಮ್ಣೆನ್ ಘೊಂಟೆರಭರ್ ಕೆಲೊ ಆಕಾಂತ್ ರಾವ್ಲಿ ಚೊಂಚೀಂತ್ ಘೆವ್ನ್ ದಾಣೆ ಪಿಲಾ ಖಾತೀರ್ ಘೊಂಟೆರಾಂತ್ ಶೆಣಿಲ್ಲಿ ವಾಟ್ ಸೊದೀತ್ ಪಿಲು ಯೆತ್ಲೆಂ ಘೊಂಟೆರಾಂತ್ ಹೆಚ್ ಆಶೆನ್ ಜಗ್ತಾತ್ ಬಾವ್ಡಿಂ ಚಿಮ್ಣೊ-ಚಿಮ್ಣಿ ದೀಸ್-ರಾತ್ ಜಿವಾಪಾಡ್ ಜಪ್ತಾತ್ ಘೊಂಟೆರ್ ಪೂಣ್ ಪಿಲು ಆಯ್ಲೆಂಚ್ ನಾ ಆಈಬಾಬಾಚಿ ಖಬರ್ ಘೆವಂಕ್ ಪಿಲೂಕ್ ಖರೆಂಚ್ ಫಾವ್ಲೆಂ ನಾ? ತಾಕಾ ಖರೆಂಚ್ ಜಮ್ಲೆಂ ನಾ? ಮನಾಂತ್ಲ್ಯಾನ್ ದಿಸ್ಲೆಂ ನಾ? ನಾ.... ಕಾರಣ್.... ಆಈಬಾಬಾಚ್ಯಾ ಪ್ರೆಮಾಚೊ ಅರ್ಥ್ ತಾಣೆಂ ಸೊದ್ಲೊಚ್ ನಾ ತಾಕಾ ಗಾವ್ಲೊಚ್ ನಾ ತಾಕಾ ಸಮ್ಜೂಂಕ್ ಪಾವ್ಲೊಚ್ ನಾ ತಾಕಾ ಸಮ್ಜೂಂಕ್ ಪಾವ್ಲೊಚ್ ನಾ. **** - ಅತುಲ್ ರ. ಪಂಡಿತ್**. [ಎಪ್ರಿಲ್, 2020]

	ಅತುಲ್ ರಘುನಾಥ್ ಪಂಡಿತ್: 1975 ಇಸ್ವೆಥಾವ್ನ್ ಕೊಂಕಣಿಂತ್ ಕಥಾಕಾರ್, ಕವಿ, ನಿಬಂಧ್‌ಕಾರ್, ತರ್ಜಣ್‌ಕಾರ್ ಜಾವ್ನ್ ವಾವ್ರ್. ’ಸುನಪರಾಂತ್’ ದಿಸಾಳ್ಯಾಂತ್ 28 ವರ್ಸಾಂ ವಾವ್ರ್, ಉಪ್ರಾಂತ್ ’ಗೋವಾಧೂತ್’ ಮರಾಠಿ ಪತ್ರಾಂತ್ ವಾವ್ರ್. ಸದ್ದ್ಯಾಕ್ ’ಪ್ರುಡೆಂಟ್’ ಕೊಂಕಣಿ ನ್ಯೂಜ್ ಚ್ಯಾನಲಾಂಚೊ ’ಮುಖೆಲ್ ಸಹ-ಸಂಪಾದಕ್’ ಜಾವ್ನ್ ವಾವ್ರ್. ಕವಿತಾ, ಕಥಾ ಅಶೆಂ ಸಭಾರ್ ಸಾಹಿತಿಕ್ ಸರ್ತೆಂನಿ ಇನಾಮಾಂ ಅಪ್ಣಾಯಿಲ್ಲೊ ಹೊ ಏಕ್ ಸಾಹಿತಿಕ್ ಸಮೀಕ್ಷಕ್‌ಯೀ ಜಾವ್ನಾಸಾ.
[kovita] SAUNNEM (- Atul R. Pandit)
Kaim tempathaun hi ek samany rivaz koxi zalea. Ghontterant zolmol'lim sukonnim, jedonam uddunk xiktat tedonam tim somaz-gamv soddun videxak polltat ani dis gel'leporinch tankam hi somaz, ho ghontter ani gamvchi yad pois zota. Sukonneank imaji korun hyo kovitent ubhim kel'lea ruponneank vhollkunk tras nant. Sobhit ritin tim ruponnim ubhim zatot. Bab Atul R. Pandit Gõycho ek namnecho kothakar, somikxok toxench kovi. Sobhar sahitik sortemni inomam opnnayil'lea hachea hea kovitechi sokot parkunk tukach soddotam. - Som
[kovita] SAUNNEM (- Atul R. Pandit)
SAUNNEM Sounnem chimvchimv korpi sounnim khoim uddun gelim kai? danne ttiptam ttiptam ddAelrank bhul'li kai? ghontterantoli chimvchimv atam poddna kanar digontora gel'lim sounnim portupachem ghenat monar kaddeoboddoyo zomoun chimnni ghontter aplo sozoitali novem ballok zolma yetlem monam'monam sukhautali sounnem tichem vhodd zalem sangnasotona uddun gelem 'koriyr koriyr' mhonnun golfant ghontter bandun raulem chimvchimv korit chimnnen ghontterobhor kelo akant rauli chonchint gheun danne pila khatir ghontterant xennil'li vatt sodit pilu yetlem ghontterant hech axen zogtat bauddim chimnno-chimnni dis-rat jivapadd zoptat ghontter punn pilu ailench na aibabachi khobor gheunk piluk khorench faulem na? taka khorench zomlem na? monantlean dislem na? na.... Karonn.... Aibabachea premacho orth tannem sodloch na taka gauloch na taka somzunk pauloch na taka somzunk pauloch na. **** - Atul R. Pandit.** [Apr, 2020]

	Atul Raghunath Pandit: 1975 isvethaun konkonnint kothakar, kovi, nibondh‌kar, torzonn‌kar zaun vaur. ’Sunoporant’ disalleant 28 vorsam vaur, uprant ’Govadhut’ moratthi potrant vaur. Sod'deak ’Pruddentt’ konkonni nyuz cheanolancho ’mukhel soho-sompadok’ zaun vaur. Kovita, kotha oxem sobhar sahitik sortemni inamam opnnayil'lo ho ek sahitik somikxok‌yi zaunasa.
[कविता] सवणें (- अतुल र. पंडित)
कांय तेंपाथावन ही एक सामान्य रिवाज कशी जाल्या. घोंटेरांत जल्मल्लीं सुकणीं, जेदनां उडुंक शिक्तात तेदनां तीं समाज-गांव सोडून विदेशाक पोळतात आनी दीस गेल्लेपरिंच तांकां ही समाज, हो घोंटेर आनी गांवची याद पयस जता. सुकण्यांक इमाजी करून ह्य कवितेंत उभीं केल्ल्या रुपण्यांक व्हळकुंक त्रास नांत. सोभीत रितीन तीं रुपणीं उभीं जातत. बाब अतूल र. पंडीत गोंयचो एक नाम्नेचो कथाकार, समीक्षक तशेंच कवी. सभार साहितीक सर्तेंनी इनमां अपणायिल्ल्या हाच्या ह्या कवितेची सकत पार्कुंक तुकाच सोडतां. -संं
[कविता] सवणें (- अतुल र. पंडित)
सवणें सवणें चिंवचिंव करपी सवणीं खंय उडून गेलीं काय? दाणे टिपतां टिपतां डाॅलरांक भुलली काय? घोंटेरांतली चिंवचिंव आतां पडना कानार दिगंतरा गेल्लीं सवणीं परतुपाचें घेनात मनार काडयोबडयो जमोवन चिमणी घोंटेर आपलो सजयताली नवें बाळक जल्मा येतलें मनांमनां सुखावताली सवणें तिचें व्हड जालें सांगनासतना उडून गेलें 'करियर करियर' म्हणून गल्फांत घोंटेर बांदून रावलें चिंवचिंव करीत चिमणेन घोंटेरभर केलो आकांत रावली चोंचींत घेवन दाणे पिला खातीर घोंटेरांत शेणिल्ली वाट सोदीत पिलू येतलें घोंटेरांत हेच आशेन जगतात बावडीं चिमणो-चिमणी दीस-रात जिवापाड जपतात घोंटेर पूण पिलू आयलेंच ना आईबाबाची खबर घेवंक पिलूक खरेंच फावलें ना? ताका खरेंच जमलें ना? मनांतल्यान दिसलें ना? ना.... कारण.... आईबाबाच्या प्रेमाचो अर्थ ताणें सोदलोच ना ताका गावलोच ना ताका समजूंक पावलोच ना ताका समजूंक पावलोच ना. **** - अतुल र. पंडित.** [एपरील, २०२०]

	अतूल रघुनाथ पंडीत: १९७५ इस्वेथावन कोंकणिंत कथाकार, कवी, निबंध‌कार, तर्जण‌कार जावन वावर. ’सुनपरांत’ दिसाळ्यांत २८ वर्सां वावर, उपरांत ’गोवाधूत’ मराठी पत्रांत वावर. सद्द्याक ’प्रुडेंट’ कोंकणी न्यूज च्यानलांचो ’मुखेल सह-संपादक’ जावन वावर. कविता, कथा अशें सभार साहितीक सर्तेंनी इनामां अपणायिल्लो हो एक साहितीक समीक्षक‌यी जावनासा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.