[ಕವಿತಾ] ಮ್ಹಜೊ ಅವ್ತಾರ್ ಸೊಂಪ್ತಲೊ (- ಮನೋಜ್ ನರೇಂದ್ರ ಕಾಮತ್)

ಮ್ಹಜೊ ಅವ್ತಾರ್ ಸೊಂಪ್ತಲೊ

ಜೀಣ್ ಮ್ಹಣ್ಲ್ಯಾರ್
ಎಕ್ ಅವ್ತಾರೂಚ್
ತೊ ಸೊಂಪ್ತಲೊಚ್ ಕೆನ್ನಾತರಿ
ಸೊಪುಂಕೂಚ್ ಜಾಯ್!
ನವೊ ಅವ್ತಾರ್ ಘೆವ್ಪಾಖಾತೀರ್
ಎಕ್ ನವಿ ಸುರ್ವಾತ್ ಕರ್ಪಾಖಾತೀರ್

ಆಡಾಂಗಿ ಮಸ್ತೆಪಣ್ ಜಾಲೆಂ
ಬಾಳ್ಪಣಾ ಖೆಳ್ ಜಾಲೆ
ಇಶ್ಟಾಗತಿ ಮೆಳ್ ಜಾವ್ನ್
ಮಾಯೆಚೆ ಸುಮೆಳ್ ಜಾಲೆ
ಶಿಕ್ಷಾ ಜಾಲಿ, ತೊಖ್ಣಾಯ್ ಜಾಲಿ
ರಾಖಣ್ ಜಾಲಿ, ರಾಖೂನ್ ಜಾಲೆಂ

ಜಾಣ್ಟೆ ಪಿಳ್ಗೆಕ್
ಸಾಂಬಾಳೂನ್ ಜಾಲೆಂ
ತರ್ಣಾಟೆ ಪಿಳ್ಗೆಕ್
ವಾಟ್ ದಾಖೊವ್ನ್ ಜಾಲೆಂ
ಶಿಕಪ್ ಪುರಾಯ್ ಕರೂನ್ ಜಾಲೆಂ
ಹೆರಾಂಕೂಯ್ ಶಿಕೊವ್ನ್ ಜಾಲೆಂ
ಭುರ್ಗ್ಯಾಂಕ್ ವಾಡೊವ್ನ್ ಜಾಲೆಂ
ತಾಂಕಾಂ ಫುಡಾರಾಚಿ ವಾಟ್
ದಾಖೊವ್ನ್ ಜಾಲೆಂ

ಆಪ್ಲೆ ಭಾಶೆನ್
ಜಿಯೆವ್ನ್ ಜಾಲೆಂ
ದುಸ್ರ್ಯಾಂಭಶೆನೂಯ್
ಜಿಯೆವ್ನ್ ಜಾಲೆಂ
ಆತಾಂ ಮೆಕ್ಳೊಂ ಜಾವಂಕ್ ಜಾಯ್
ನವಿ ವಾಟ್ ರೆಖೂಂಕ್ ಜಾಯ್

ದೂಖ್ ಜಾಲೆಂ, ಸುಖೂಯ್ ಜಾಲೆಂ
ರೂಚ್ ಘೆವ್ನ್ ಅರುಚೂಯ್ ಜಾಲೆಂ
ಘರಾಬೊ ಜಾಲೊ
ಸಮಾಜ್ ಜಾಲೊ
ಎಕ್ಟೆಪಣ್ ಜಾಲೆಂ
ಸಮ್ಜಿಕಾಯ್ ಜಾಲಿ
ವಾದ್ ಆನಿ ವಿವಾದ್ ಜಾಲೆ
ಜಿಣೆಚೆ ಸಗ್ಳೆ ಸಾದ್ ಜಾಲೆ
ಪಾನಾಂ ಝಡ್ಲಿಂ, ನವಿಂ ಆಯ್ಲಿಂ
ಪರ್ತೂನ್ ತಿ ಝಡ್ಟಲಿಂ

ಜಿಣೆಚೆ ರುತು ಬದ್ಲಲೆ
ಕಾಳೊಖ್ ಜಾಲೊ, ಉಜ್ವಾಡ್ ಜಾಲೊ
ಹಾರ್ ಜಾಲಿ, ಜೈತ್ ಜಾಲೆಂ
ಅವ್ಮಾನ್ ಜಾಲೊ, ಮಾನ್ ಜಾಲೊ
ತರ್ನಾಟೆಂಪಣ್ ಜಾಣ್ಟೆಂ ಜಾಲೆಂ
ಮೊಗ್, ವಿರಹ್ ಸಪನ್ ಜಾಲೆಂ
ರೌದ್ರ್ ರೂಪ್ ಶಾಂತ್ ಜಾಲೆಂ
ನಾದ್ ವಾಜೂನ್ ಮೊನೊ ಜಾಲೊ
ಸಾದ್ ತುಜೊ ಶೆಣೂನ್ ಗೆಲೊ
ಕಾರಣ್ ಜಾಲೆಂ, ರಾಜ್ಕಾರಣ್ ಜಾಲೆಂ
ರಾಸ್ಲಿಲೆಚೆ ಉಗ್ಡಾಸ್ ಜಾಲೆ
ತತ್ವಗಿನ್ಯಾನ್ ಜಾಲೆಂ, ವಿದ್ನ್ಯಾನ್ ಜಾಲೆಂ
ಧರ್ಮ್ ಆನಿ ಅಧರ್ಮ್ ಜಾಲೊ
ಸಂಘರ್ಶ್, ದ್ವಂದ್, ಸಮೊಪಚಾರ್ ಜಾಲೊ
ರಾಜಾ- ಪ್ರಜಾ, ಉಪಾದೆಸ್ ಜಾಲೊ
ಸತ್ತೆಚೊ ಸೊಸ್ ಜಾಲೊ
ಸ್ವಾರ್ಥ್ ಆನಿ ಪರ್ಮಾರ್ಥ್ ಜಾಲೊ
ಮೊಖ್ ಆನಿ ಶೊಕ್ ಜಾಲೊ
ಕ್ರೌರ್ಯ್ ಆನಿ ಭಾವ್ಕಿ ಜಾಲಿ
ಬುಟ್ಟಿ ಯೆವ್ನ್ ವ್ದಾರ್ಕಾ
ಶಾಪೀತ್ ಗುಡುಪ್ಪ್ ಜಾತ್ಲಿ!

ಆಯ್ಜ್ ಜೀವ್ ಶಾಂತ್ ಜಾವ್ನ್
ರಾಂನಾಂತ್ಲ್ಯಾ ಹರ್ಣಾ ಆಂಗಾರ್
ಜರಾಚೊ ಬಾಣ್ ಪಾಂಯಾಕ್ ಭೆದೂನ್
ಅವ್ತಾರ್ ಮ್ಹಜೊ ಸೊಂಪ್ತಲೊ
ಅವ್ತಾರ್ ಮ್ಹಜೊ ಸೊಂಪ್ತಲೊ

 ******

- ಮನೋಜ್ ನರೇಂದ್ರ ಕಾಮತ್. [ಮಾಯ್, 2020]

[kovita] Mhozo ovtar somptolo (- Manoj Narendra Kamat)

Mhozo ovtar somptolo

Jinn mhonnlear
ek ovtaruch
to somptoloch ken'natori
sopunkuch zai!
novo ovtar gheupakhatir
ek novi survat korpakhatir

addangi mosteponn zalem
ballponna khell zale
ixttagoti mell zaun
mayeche sumell zale
xikxa zali, tokhnnai zali
rakhonn zali, rakhun zalem

zanntte pillgek
samballun zalem
tornnatte pillgek
vatt dakhoun zalem
xikop purai korun zalem
herankuy xikoun zalem
bhurgeank vaddoun zalem
tankam fuddarachi vatt
dakhoun zalem

aple bhaxen
jieun zalem
dusreambhoxenuy
jieun zalem
atam mekllom zaunk zai
novi vatt rekhunk zai

dukh zalem, sukhuy zalem
ruch gheun oruchuy zalem
ghorabo zalo
somaz zalo
ektteponn zalem
somjikai zali
vad ani vivad zale
jinneche soglle sad zale
panam zhoddlim, novim ailim
portun ti zhoddttolim

jinneche rutu bodlole
kallokh zalo, ujvadd zalo
har zali, zoit zalem
ovman zalo, man zalo
tornattemponn zannttem zalem
mog, viroh sopon zalem
roudr rup xant zalem
nad vazun mono zalo
sad tuzo xennun gelo
karonn zalem, rajkaronn zalem
raslileche ugddas zale
totvoginean zalem, vidnean zalem
dhorm' ani odhorm' zalo
songhorx, dvond, somopochar zalo
raza- proza, upades zalo
sot'techo sos zalo
svarth ani pormarth zalo
mokh ani xok zalo
kroury ani bhauki zali
butt'tti yeun vdarka
xapit guddupp zatli!

aiz jivo xant zaun
ramnantlea hornna angar
zoracho bann pamyak bhedun
ovtar mhozo somptolo
ovtar mhozo somptolo

******

- Manoj Narendra Kamat. [May, 2020]

[कविता] म्हजो अवतार सोंपतलो (- मनोज नरेंद्र कामत)

मनीस ह्या संसारांत अपल्या जिण्ये आवदेंत सभार रितिचो पात्र खेळता. सांगपाक, दाकवपाक, तशेंच हेर. ह्या पात्रांक तो खेळून गेल्लेपरिंच अपलें आवक संपयता. पूण हीं चिंतनां कितलेश्यांक मनांत अयिल्लीं आसात? हें अधुरें प्रश्न.

- सं

[कविता] म्हजो अवतार सोंपतलो (- मनोज नरेंद्र कामत)

म्हजो अवतार सोंपतलो

जीण म्हणल्यार
एक अवतारूच
तो सोंप्तलोच केन्नातरी
सोपुंकूच जाय!
नवो अवतार घेवपाखातीर
एक नवी सुर्वात कर्पाखातीर

आडांगी मसतेपण जालें
बाळपणा खेळ जाले
इश्टागती मेळ जावन
मायेचे सुमेळ जाले
शिक्षा जाली, तोखणाय जाली
राखण जाली, राखून जालें

जाणटे पिळगेक
सांबाळून जालें
तर्णाटे पिळगेक
वाट दाखोवन जालें
शिकप पुराय करून जालें
हेरांकूय शिकोवन जालें
भुर्ग्यांक वाडोवन जालें
तांकां फुडाराची वाट
दाखोवन जालें

आपले भाशेन
जियेवन जालें
दूसऱ्यांभशेनूय
जियेवन जालें
आतां मेकळों जावंक जाय
नवी वाट रेखूंक जाय

दूख जालें, सुखूय जालें
रूच घेवन अरुचूय जालें
घराबो जालो
समाज जालो
एकटेपण जालें
समजिकाय जाली
वाद आनी विवाद जाले
जिणेचे सगळे साद जाले
पानां झडलीं, नवीं आयलीं
पर्तून ती झडटलीं

जिणेचे रुतू बदलले
काळोख जालो, उज्वाड जालो
हार जाली, जैत जालें
अवमान जालो, मान जालो
तर्नाटेंपण जाणटें जालें
मोग, विरह सपन जालें
रौद्र रूप शांत जालें
नाद वाजून मोनो जालो
साद तुजो शेणून गेलो
कारण जालें, राजकारण जालें
रासलिलेचे उगडास जाले
तत्वगिन्यान जालें, विदन्यान जालें
धर्म आनी अधर्म जालो
संघर्श, द्वंद, समोपचार जालो
राजा- प्रजा, उपादेस जालो
सत्तेचो सोस जालो
स्वार्थ आनी पर्मार्थ जालो
मोख आनी शोक जालो
क्रौऱ्य आनी भावकी जाली
बुट्टी येवन व्दार्का
शापीत गुडुप्प जातली!

आयज जीव शांत जावन
रांनांतल्या हर्णा आंगार
जराचो बाण पांयाक भेदून
अवतार म्हजो सोंप्तलो
अवतार म्हजो सोंप्तलो

******

- मनोज नरेंद्र कामत. [माय, २०२०]

ದಾಯ್ಜ್.ಕೊಮ್