[ಕವಿತಾ] ಜೀಣ್ ಕೊಣಾಕ್ ನಾಕಾ ವ್ಹಯ್? (- ಎಚ್. ಮನೋಜ್ ಜೆ)

ಜೀಣ್ ಕೊಣಾಕ್ ನಾಕಾ ವ್ಹಯ್?

ಜೀಣ್ ಕೊಣಾಕ್ ನಾಕಾ ವ್ಹಯ್?
ಸಂವ್ಸಾರ್ ತೀಚೊ ಉಕ್ತಡಾರ್
ಭುರ್ಗಿಂ ಉಘ್ಡಿ ನಾಗ್ಡಿ ತೀನ್ ಚಾರ್
ಪೊಟಾಚಿ ಖಳ್ಗಿ ಭರುಂಕ್
ನಾ ಕೊಣಾಚೊ ಆದಾರ್
ಕೊಣುಂಯ್ ವಾಟ್ಸೂರೊ ಉಡಯ್ತಾ
ಪಾಚ್ ದಾ ರುಪಯ್ ಹಾತಾರ್
ತರಿ ತಿ ಮಾನ್ತಾ ದೆವಾಚೆ ಉಪ್ಕಾರ್
ಜೀಣ್ ತೀಕಾ ನಾಕಾ ವ್ಹಯ್?

ಬಾಬ್ಡೊ ಜಾಣ್ಟೊ ಘರ್ಚೊ ಆಂಥ್ರುಣಾರ್
ದುಯೆಂಸಾನಿ ತಾಕಾ ಲಾಯ್ಲಾ ಫಾಂಸ್
ದಿತಾ ದೊತೊರ್ ವಖ್ದಾಂ ಖಾಸ್
ಭುರ್ಗಿಂ ಬಾಳಾಂ ನಾತ್ರಾಂ ಪೊಣ್ಟುರಾಂ
ಮಾಗ್ತಾ ಮಾಗ್ಣೆ, ದೆವಾ ಸುಟ್ಕಾ ಕರ್
ಪೂಣ್ ಜಾಣ್ಟೊ ಮಾಗ್ತಾ ನಾತೀಚೆಂ
ಲಗ್ನ್ ಪಳೊವಂಕ್ ಸಾಯ್ಬಾ ದವ್ರ್
ಜೀಣ್ ಕೊಣಾಕ್ ನಾಕಾ ವ್ಹಯ್?

ಅಕ್ಸ್ಮಾತ್ ತುಟ್ಲೊ ತೀಚೊ ಮ್ಹುರ್ತಮಣಿ
ತಾಚೆ ವಿಣೆ ಜೀಣ್ ಅಳ್ಣಿ ಅಳ್ಣೀಶಿ
ಸಾನುಲೆಂ ಮೊಗಾಚೆಂ ಪ್ರತೀಕ್ ತೀಚೆ ವ್ಹಟ್ಯೆಂತ್
ಘೊವಾಚ್ಯೊ ಯಾದಿ ಲಾಯ್ತಾ ಭುಲವ್ಣಿ
ಆತಾಂ ಜಿಣ್ ಫಕತ್ ತಾಚ್ಯಾ ಉಗ್ಡಾಸಾನಿ
ಕರುಂಕ್ ಬರೊ ಫುಡಾರ್ ತ್ಯಾ ಧಾಕ್ಲ್ಯಾ ಜಿವಾಚೊ
ದಿತಾ ಆದಾರ್ ತೀಚೊ ಆತ್ಮವಿಶ್ವಾಸ್
ಜೀಣ್ ತೀಕಾ ನಾಕಾ ವ್ಹಯ್?

ಜಲ್ಮಾಕ್ ಯೆತ್ ಸಾವ್ನ್
ಮನೀಸಜಾತ್ ಹಾಂಗಾ ಜಿಯೆತಾ
ರಚತ್ಲ್ಯಾನ್ ಹಿ ಸಂದ್
ಸಗ್ಲ್ಯಾಂಕ್ ಫಾವೊ ಕೆಲ್ಯಾತ್
ಸೈಮಾಂತಲಿ ಜಣ್ ಎಕ್ ವಸ್ತ್
ಭೊಗ್ಪಾಕ್ ಆಮಿ ಆತುರತಾ
ತೀಚಿ ಜತ್ನಾಯ್ ಘೆವಂಕ್
ಕಿತ್ಯಾಕ್ ಆಮಿ ಫಾಟಿಂ ಸರ್ತಾ?
ಜೀಣ್ ಕೊಣಾಕ್ ನಾಕಾ ವ್ಹಯ್ ?

ಜೀಣ್ ಫಕತ್ ಮನ್ಶಾಂಕ್ ವ್ಹಯ್?
ತಿ ತರ್ ಸಗ್ಲ್ಯಾಂಕ್ ಸಾರ್ಕೀಚ್
ಧರ್ತರೆವೆಲ್ಯಾ ಜಣ್ ಎಕ್ ಜೀವಾಂಕ್
ಜಗೂಂಕ್ ಜಾಯ್ ಹೊಚ್ ನೆಮ್
ಮನ್ಶಾನ್ ಪಾಳ್ಪಾಕ್ ಜಾಯ್
ತಾಂಕಾಯ್ ಜಗ್ಪಾಕ್ ಆದಾರ್ ದಿವ್ ಜಾಯ್
ಸೈಮ್ ರಾಖ್ಪಾಚೊ ಹೊಚ್ ಉಪಾಯ್
ಜೀಣ್ ಕೊಣಾಕ್ ನಾಕಾ ವ್ಹಯ್?

ಆಪ್ಲಿ ಜೀಣ್ ಸೊಬೊವಂಕ್
ಜಣ್ ಎಕ್ಲೊ ಝಟ್ತಾ
ಎಕಾಮೆಕಾಕ್ ಆದಾರ್ ದಿತ್ ಜಾಲ್ಯಾರ್
ಘಡ್ಟಾ ಬರೊ ಫುಡಾರ್
ಗರೀಬ್ ತಸೊಚ್ ಪಯ್ಶೆಕಾರ್
ಕರೀತ್ ಬರೊ ವಾವ್ರ್
ಜಾತ್ಲಿ ಜೀಣ್ ಸಾಕಾರ್
ಜೀಣ್ ಕೊಣಾಕ್ ನಾಕಾ ವ್ಹಯ್?

 ******

- ಎಚ್. ಮನೋಜ್ ಜೆ. [ಮಾಯ್, 2020]

[kovita] Jinn konnak naka vhoi? (- H Manoj J)

Jinn konnak naka vhoi?

jinn konnak naka vhoi?
somvsar ticho uktoddar
bhurgim ughddi nagddi tin char
pottachi khollgi bhorunk
na konnacho adar
konnum-i vattsuro uddoita
pach da rupoi hatar
tori ti manta devache upkar
jinn tika naka vhoi?

babddo zanntto ghorcho anthrunnar
duyemsani taka laila fams
dita dotor vokhdam khas
bhurgim ballam natram ponntturam
magta magnne, deva suttka kor
punn zanntto magta natichem
logn pollounk saiba dour
jinn konnak naka vhoi?

oksmat tuttlo ticho mhurtomonni
tache vinne jinn ollnni ollnnixi
sanulem mogachem protik tiche vhottyent
ghovacheo yadi laita bhulounni
atam jinn fokot tachea ugddasani
korunk boro fuddar tea dhaklea jivacho
dita adar ticho atmovixvas
jinn tika naka vhoi?

zolmak yet saun
monisozat hanga jieta
rochotlean hi sond
sogleank favo keleat
soimantoli zonn ek vost
bhogpak ami aturota
tichi zotnai gheunk
kiteak ami fattim sorta?
jinn konnak naka vhoi?

jinn fokot monxank vhoi?
ti tor sogleank sarkich
dhortorevelea zonn ek jivank
zogunk zai hoch nem'
monxan pallpak zai
tankai zogpak adar div zai
soim' rakhpacho hoch upai
jinn konnak naka vhoi?

apli jinn sobounk
zonn eklo zhott'ta
ekamekak adar dit zalear
ghoddtta boro fuddar
gorib tosoch poixekar
korit boro vaur
zatli jinn sakar
jinn konnak naka vhoi?

******

- H. Manoj J. [May, 2020]

[कविता] जीण कोणाक नाका व्हय? (- एच. मनोज जे)

जीण म्हळ्यार फकत अपूण, अपणाचें आनी अपणाखातीर म्हळ्ळ्या सुराती चिंतपान जियेतेल्यांक एक घडी चिंतुंक कर्ची कविता ही. आमी शिकून आयिल्लीं लिसांवां फकत बुकांनी कयद मात्र आसचीं वा तीं केदना तर‌यी पाळुंक आसचीं? हेच सवालांचेर उभी केल्ली कविता ही.

- सं

[कविता] जीण कोणाक नाका व्हय? (- एच. मनोज जे)

जीण कोणाक नाका व्हय?

जीण कोणाक नाका व्हय?
संवसार तीचो उक्तडार
भुरगीं उघडी नागडी तीन चार
पोटाची खळगी भरुंक
ना कोणाचो आदार
कोणुंय वाटसूरो उडयता
पाच दा रुपय हातार
तरी ती मानता देवाचे उपकार
जीण तीका नाका व्हय?

बाबडो जाणटो घरचो आंथरुणार
दुयेंसानी ताका लायला फांस
दिता दोतोर वखदां खास
भुरगीं बाळां नातरां पोणटुरां
मागता मागणे, देवा सुटका कर
पूण जाणटो मागता नातीचें
लग्न पळोवंक सायबा दवर
जीण कोणाक नाका व्हय?

अकस्मात तुटलो तीचो म्हुर्तमणी
ताचे विणे जीण अळणी अळणीशी
सानुलें मोगाचें प्रतीक तीचे व्हटयेंत
घोवाच्यो यादी लायता भुलवणी
आतां जिण फकत ताच्या उगडासानी
करुंक बरो फुडार त्या धाकल्या जिवाचो
दिता आदार तीचो आत्मविश्वास
जीण तीका नाका व्हय?

जल्माक येत सावन
मनीसजात हांगा जियेता
रचतल्यान ही संद
सगल्यांक फावो केल्यात
सैमांतली जण एक वस्त
भोगपाक आमी आतुरता
तीची जतनाय घेवंक
कित्याक आमी फाटीं सरता?
जीण कोणाक नाका व्हय?

जीण फकत मनशांक व्हय?
ती तर सगल्यांक सारकीच
धरतरेवेल्या जण एक जीवांक
जगूंक जाय होच नेम
मनशान पाळपाक जाय
तांकाय जगपाक आदार दिव जाय
सैम राखपाचो होच उपाय
जीण कोणाक नाका व्हय?

आपली जीण सोबोवंक
जण एकलो झटता
एकामेकाक आदार दित जाल्यार
घडटा बरो फुडार
गरीब तसोच पयशेकार
करीत बरो वावर
जातली जीण साकार
जीण कोणाक नाका व्हय?

******

- एच. मनोज जे. [माय, २०२०]

ದಾಯ್ಜ್.ಕೊಮ್