ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] #ರಾಧಾ #ಕೃಷ್ಣಾ (- ಉದಯ್ ಮಾಂಬ್ರೊ)

ಹಿ ಕವಿತಾ ಆಧುನಿಕ್ ಕಾಳಾಚಿ ಕವಿತಾ. ಆಧುನಿಕ್ ಕಾಳ್ ಸೋಶಿಯಲ್ ಮೀಡಿಯಾಚೊ ಕಾಳ್, ದೆಕುನ್ ಮನಿಸ್ ಜಿಯೆತಾ ಸಯ್ತ್ ಸೋಶಿಯಲ್ ಮೀದಿಯಾಕ್ ಲಾಗುನ್ ಮ್ಹಳ್ಳೆಪರಿಂ ಅಪ್ಣಾನ್ ಬಸ್ಚೆಂ, ಹಾಸ್ಚೆಂ, ಖಾಂವ್ಚೆಂ, ಪಿಯೆಂವ್ಚೆಂ ಸಗ್ಳೆಂ ತೊ ಫೇಸ್‌ಬುಕಾಚೆರ್ ಘಾಲುನ್ ಚ್ಯಾರ್-ಪಾಂಚಾಂಕ್ ಟ್ಯಾಗ್ ಕೆಲ್ಲೆಖರಿತ್ ತಾಣೆಂ ಖೆಲ್ಲೆಂ ಪೊಟಾಂತ್ ಜಿರನಾ. ಆನಿ ಜೆದನಾಂ ಭಕ್ತ್ ಅಸಲಿಂ ಫಿತಿಸ್ಪಣಾಂ ಕರ್ತಾನಾ ದೇವ್ ಸಯ್ತ್ ಕಸೊ ವ್ಹಗೊ ರಾವ್ತಲೊ? ಹಿ ಏಕ್ ವಿಡಂಬನಾತ್ಮಕ್ ಅಧ್ಭುತ್ ಕವಿತ ವಾಚುನ್ ಗೆಲ್ಲೆಪರಿಂಚ್ ಜಾಂವ್ಚೊ ಅನ್ಭವ್ ಸೊಭಿತ್.

- ಸಂ

[ಕವಿತಾ] #ರಾಧಾ #ಕೃಷ್ಣಾ (- ಉದಯ್ ಮಾಂಬ್ರೊ)

#ರಾಧಾ #ಕೃಷ್ಣಾ ಕೃಷ್ಣಾನ್ ಗೊರ್ವಾಂ ಚರ್ವಾಕ್ ಸೊಡ್ಲಿ ಯಮುನೆಚ್ಯಾ ದೆಗೆರ್ ಸದ್ಚೆವರಿ ಝಾಡಾರ್ ಬಸ್ಲೊ ಮುರ್ಲಿ ವಾಜೊವಂಕ್ ಸುರ್ವಾತ್ ಕೆಲಿ ತಿನ್ಸಾಂಜ್ ಜಾಲಿ ತರಿ ರಾಧಾಯ್ ನಾ, ಗವ್ಳಣೀಯ್ ನಾ ನ್ಹಂಯ್ಚೆ ದೆಗೆರ್ ತಾಂಚಿ ವಸ್ತ್ರಾಂಯ್ ನಾ ಕಿತೆಂ ಜಾಲಾಂ ಕಾಯ್ ? ರಾಧಾ ಖಂಯ್ ಗೆಲಿ ಕಾಯ್ ? ಪೆಂದ್ಯಾನ್ ಖಬರ್ ಹಾಡ್ಲಿ ರಾಧಾ ಕಾನಾಂತ್ ಗುಡ್ಡಯೊ ಘಾಲೂನ್ ಮೊಬಾಯ್ಲಾಚೆರ್ ಗೀತಾಂ ಆಯ್ಕತಾ ಮೊಬಾಯ್ಲ್ ಘೆವ್ನ್ ಮಾನ್ನ್ಯಾಂತ್ ವತಾ ವರಾಂಚಿ ವರಾಂ ಮಾನ್ನ್ಯಾಂತ್ ನ್ಹಾತಾ ಆಡ್ ಕೆಲ್ಲ್ಯಾ ದಾರಾ ಭಿತರ್ ಮುರ್ಲೀಚೆ ಸೂರ್ ಕಶೆ ಪಡತ್ ತಿಚ್ಯಾ ಕಾನಾರ್ ? ಮೊಠೊ ಪೆಚ್ ಜಾಲೊ ಯಮುನೆಕಡಲೊ ಖೆಳ್ ಉಲ್ಲೊ ಕೃಷ್ಣಾನ್ ವೆಳ್ ಕೆಲೊ ನಾ ಫೆಸ್ಬುಕಾರ್ ಆಪ್ಲೊ ಎಕಾವಂಟ್ ಕಾಡ್ಲೊ ಪಾಂಖಾ ಝಡಿಲ್ಲ್ಯಾ ಮೊರಾಚೊ ಪ್ರೊಫಾಯ್ಲ್ ಫೊಟೊ ಘಾಲೊ ಕೃಷ್ಣಾನ್ ಸ್ಟೆಟಸ್ ಘಾಲೊ ರಾಧೆಕ್ ಟೆಗ್ ಕೆಲೊ "ಆಧುನಿಕ್ ರಾಧೆನ್ ಕಾನಾಂತ್ ಗುಡ್ಡಯೊ ಘಾಲ್ಯೊ ಮೊರ್ ಪಾಂಖಾ ಫುಲೊವಂಕ್ ವಿಸ್ಲ್ಲೊ" ರಾಧೆನ್ ತೊ ಸ್ಟೆಟಸ್ ವಾಚ್ಲೊ ರಾಧೆನ್ ತಾಕಾ ಕೊಮೆಂಟ್ ಘಾಲೊ, "ಮೊರಾನ್ ಆತಾಂ ಯು ಟಯುಬಾಚೆರ್ ನಾಚಾಚೊ ವಿಡಿಒ ಪೊಸ್ಟ್ ಕರ್ಚೊ ಸಾಥೀಕ್ ಮುರ್ಲೀಚೊ ಸೂರ್ ಘೆವಂಚೊ ರಾಧಾ ಕಾನಾಂತ್ ಗುಡ್ಡಯೊ ಘಾಲೂನ್ ಆಯ್ಕತಾ" ದೆಖೂನ್ ಹಾಲಿಂ ಯಮುನೆಚ್ಯಾ ದೆಗೆರ್ ಬಾಜಾರಾತ್ಲ್ಯಾ ಸಾಂಕ್ವಾರ್ ಸಿತಾರಾಮಾಲ್ಯಾ ಪಸ್ರ್ಯಾರ್ ರಾಜಾರಾಮಾಲ್ಯಾ ಹೊಟೆಲಾರ್ ಮೊಟಾರಸಾಯಕಲೀಚೆರ್ ಗಾಡಿ ಚಲಯ್ತನಾ ಉಠ್ಟಾ, ಬಸ್ತಾ, ನ್ಹಿದ್ತನಾ ಕೃಷ್ಣಾ ಆನಿ ರಾಧಾ ಮೊಬಾಯ್ಲ್ ಸ್ಕ್ರೊಲ್ ಕರ್ತನಾಚ್ ದಿಸ್ತಾತ್ ಗೊರ್ವಾಂ ಬಾಬ್ಡಿ ಚರ್ವಾಖಾತೀರ್ ಮಾರ್ಗಾಮಾರ್ಗಾರ್ ಭೊಂವ್ತಾತ್ **** - ಉದಯ್ ಮಾಂಬ್ರೊ**. [ಎಪ್ರಿಲ್, 2020]

	ಉದಯ್ ಮಾಂಬ್ರೊ: ಗೊಂಯ್ಚೊ ಏಕ್ ನಾಮ್ಣೆಚೊ ಲೇಕಕ್, ಕವಿ, ವಾವ್ರಾಡಿ ತಶೆಂಚ್ ಪದಾಂ ಘಡ್ಣಾರ್. ’ಹಾಯ್ ಸಾಯ್ಭಾ’, ’ಮನ್ಶಾಚ್ಯಾ ಸೋಧಾಂತ್’ ಹಾಚೆ ಎದೊಳ್ ಪರ್ಗಟ್ ಜಾಲ್ಲೆ ಬೂಕ್. ಕವಿತಾ, ಕಥಾ, ಅಣ್ಬವ್ ಸಾಹಿತ್ ಬರಂವ್ಚೊ ಹೊ ಏಕ್ ಕೊಂಕಣಿ ವಾವ್ರಾಡಿ ತಶೆಂಚ್ ಚಿಂತ್ಪಿ ಜಾವ್ನಾಸ್ಚ್ಯಾ ಹಾಚ್ಯಾ ಕವಿತೆಂಚೆರ್ ಮುಂಬಂಯ್ತ್ ’ಕವಿತಾಪಾಠ್’ ಕಾಮಾಸಾಳಾಂತ್ ಅಧ್ಯಯನ್ ಚಲ್ಲಾಂ.
[kovita] #Radha #Krixnna* (- Uday Mhambro)*
Hi kovita adhunik kallachi kovita. Adhunik kall soxiyol middiacho kall, dekun monis jieta soit soxiyol midiak lagun mholl'lleporim opnnan boschem, haschem, khamvchem, piemvchem sogllem to fes‌bukacher ghalun chear-panchank tteag kel'lekhorit tannem khel'lem pottant jirona. Ani jedonam bhokt osolim fitisponnam kortana devo soit koso vhogo rautolo? hi ek viddombonatmok odhbhut kovito vachun gel'leporinch zamvcho onbhou sobhit. - Som
[kovita] #Radha #Krixnna* (- Uday Mhambro)*
#Radha #Krixnna krixnnan gorvam chorvak soddli yomunechea deger sodcheuri zhaddar boslo murli vazounk survat keli tinsanz zali tori radhai na, goullonni-i na nhoinche deger tanchi vostram-i na kitem zalam kai ? radha khoim geli kai ? pendean khobor haddli radha kanant gudd'ddoyo ghalun mobailacher gitam aikota mobail gheun man'neant vota voranchi voram man'neant nhata add kel'lea dara bhitor murliche sur koxe poddot tichea kanar ? mottho pech zalo yomunekoddolo khell ul'lo krixnnan vell kelo na fesbukar aplo ekauntt kaddlo pankha zhoddil'lea moracho profail fotto ghalo krixnnan sttettos ghalo radhek tteg kelo "adhunik radhen kanant gudd'ddoyo ghaleo mor pankha fulounk visl'lo" radhen to sttettos vachlo radhen taka komentt ghalo, "moran atam yu ttoyubacher nachacho viddio postt korcho sathik murlicho sur gheuncho radha kanant gudd'ddoyo ghalun aikota" dekhun halim yomunechea deger bazaratlea sankvar sitaramalea posrear razaramalea hottelar mottarosaikolicher gaddi choloitona utthtta, bosta, nhidtona krixnna ani radha mobail skrol kortonach distat gorvam babddi chorvakhatir margamargar bhomvtat **** - Uday Mhambro.** [Apr, 2020]

	Uday Mhambro: Gõycho ek namnnecho lekok, kovi, vauraddi toxench podam ghoddnnar. ’Hai Saibha’, ’Monxachea Sodhant’ hache edoll porgott zal'le buk. Kovita, kotha, onnbou sahit boromvcho ho ek konknni vauraddi toxench chintpi zaunaschea hachea kovitencher mumbomyt ’Kovitapatth’ kamasallant odhyoin chol'lam.
[कविता] #राधा #कृष्णा (- उदय म्हांबरो)
ही कविता आधुनीक काळाची कविता. आधुनीक काळ सोशियल मीडियाचो काळ, देकून मनीस जियेता सयत सोशियल मीदियाक लागून म्हळ्ळेपरीं अपणान बसचें, हासचें, खांवचें, पियेंवचें सगळें तो फेस‌बुकाचेर घालून च्यार-पांचांक ट्याग केल्लेखरीत ताणें खेल्लें पोटांत जिरना. आनी जेदनां भक्त असलीं फितिस्पणां कर्ताना देव सयत कसो व्हगो रावतलो? ही एक विडंबनात्मक अधभूत कवीत वाचून गेल्लेपरिंच जांवचो अनभव सोभीत. - सं
[कविता] #राधा #कृष्णा (- उदय म्हांबरो)
#राधा #कृष्णा कृष्णान गोरवां चरवाक सोडली यमुनेच्या देगेर सदचेवरी झाडार बसलो मुरली वाजोवंक सुरवात केली तिनसांज जाली तरी राधाय ना, गवळणीय ना न्हंयचे देगेर तांची वस्त्रांय ना कितें जालां काय ? राधा खंय गेली काय ? पेंद्यान खबर हाडली राधा कानांत गुड्डयो घालून मोबायलाचेर गीतां आयकता मोबायल घेवन मान्न्यांत वता वरांची वरां मान्न्यांत न्हाता आड केल्ल्या दारा भितर मुरलीचे सूर कशे पडत तिच्या कानार ? मोठो पेच जालो यमुनेकडलो खेळ उल्लो कृष्णान वेळ केलो ना फेसबुकार आपलो एकावंट काडलो पांखा झडिल्ल्या मोराचो प्रोफायल फोटो घालो कृष्णान स्टेटस घालो राधेक टॅग केलो "आधुनिक राधेन कानांत गुड्डयो घाल्यो मोर पांखा फुलोवंक विसल्लो" राधेन तो स्टेटस वाचलो राधेन ताका कॉमेंट घालो, "मोरान आतां यु टयुबाचेर नाचाचो विडिओ पोस्ट करचो साथीक मुरलीचो सूर घेवंचो राधा कानांत गुड्डयो घालून आयकता" देखून हालीं यमुनेच्या देगेर बाजारातल्या सांकवार सितारामाल्या पसर्‍यार राजारामाल्या हॉटेलार मोटारसायकलीचेर गाडी चलयतना उठटा, बसता, न्हिदतना कृष्णा आनी राधा मोबायल स्क्रोल करतनाच दिसतात गोरवां बाबडी चरवाखातीर मार्गामार्गार भोंवतात **** - उदय म्हांबरो.** [एपरील, २०२०]

	उदय म्हांबरो: गोंयचो एक नामणेचो लेकक, कवी, वावराडी तशेंच पदां घडणार. ’हाय सायभा’, ’मनशाच्या सोधांत’ हाचे एदोळ पर्गट जाल्ले बूक. कविता, कथा, अणबव साहीत बरंवचो हो एक कोंकणी वावराडी तशेंच चिंत्पी जावनासच्या हाच्या कवितेंचेर मुंबंयत ’कवितापाठ’ कामासाळांत अध्ययन चल्लां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.