ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಪೂಣ್ ಆಸ್ ಆಮಿ ಸೊಡುನಾ (- ಉರ್ಜಿತಾ ಭೊಬೆ)

ಮನಿಸ್ ಹ್ಯಾ ಸಂಸಾರಾಂತ್ ಜಿಯೆವ್ನ್ ಆಸ್ತಾ ಪರಯಾಂತ್ ಜಾಯ್ತೆಂ ಜೊಡತಾ ತಶೆಂಚ್ ಜಾಯ್ತೆಂ ಹೊಗಡಾಯ್ತಾ. ಕಿತೆಂಚ್ ಸ್ಥಿರ್ ಮ್ಹಳ್ಳೆಂ ನಾ. ಸಕ್ಕಡ್ ಕ್ಷಣಿಕ್. ಜಾಂವ್ ಆಸ್ತ್-ಬದಿಕ್, ನಾಂವ್, ಹುದ್ದೊ, ಸಗಳೆಂ ಕ್ಷಣಿಕ್ ಮಾತ್. ಪುಣ್ ಕಿತೆಂಯ್ ಆಸಾ ಜೆಂ ಮನಶಾಕ್ ಧಯರಾನ್ ಜಿಯೆಂವ್ಕ್ ಕರತಾ ತೆಂ ಜಾವ್ನಾಸಾ ಭರ್ವಸೊ. ಆನಿ ಹ್ಯಾ ಭಿರಾಂಕುಳ್ ದಿಸಾಂನಿ ಸಯ್ತ್ ಮನಿಸ್ ಭರವಸೊ ಸಾಂಡಿನಾಸ್ತಾಂ ಜಿಯೆಂವ್ಕ್ ಉಲೊ ದಿಂವ್ಚಿ ಕವಿತಾ ಹಿ.

- ಸಂ

[ಕವಿತಾ] ಪೂಣ್ ಆಸ್ ಆಮಿ ಸೊಡುನಾ (- ಉರ್ಜಿತಾ ಭೊಬೆ)

ಪೂಣ್ ಆಸ್ ಆಮಿ ಸೊಡುನಾ ಹಯ್ ಖರೆಂಚ್! ಭೀರಾಂತೆಚೆಂ ಚಾದರ್ ಚೊಯ್ವಾಟೆನ್ ಫಾಕಾರಲಾಂ ಭಯಾಣ್ ಕಿಣ್ಣ್ ಸಗ್ಳೊ ವಾಠಾರ್ ಹಾಂವೆಂ ಖಂಯ್ ನಾಕಾರಲಾಂ? ಕಾಳ್ಜಾಂತ್ ಧಡ್ಧಡ್, ದುಗ್ದುಗ್ ಹಾಂವ್ ನಾ ಮ್ಹಣ್ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಹುಸ್ಕೊ ಜಾಲಾ ಮನಾರ್ ಸ್ವಾರ್ ಬಂದಚ್ ದಿಸ್ತಾ ದರ್ ಎಕ್ ದಾರ್ ವಸಾಡ್ ಪಡ್ಲ್ಯಾತ್ ರಸ್ತೆ ಸಗ್ಳೆ ಕಾಳೊಖ್ ಕರ್ತಾತ್ ಕಾಳ್ಜಾರ್ ವಾರ್ ಪರ್ದೆಶಾಂತ್ ಉರ್ಲ್ಯಾಂತ್ ಭುರ್ಗಿಂ ಆವ್ಯ್ಚ್ಯೊ ರಾತಿ ಸರೂನ್ ಸರ್ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಪಸ್ರ್ಯಾಂಕ್, ಮಾಂಡಾಂಕ್ ಪಡ್ಲಾಂ ಕುಲೂಪ್ ಬಾಜಾರಾಚೊ ಸರ್ಲಾ ಹುರೂಪ್ ಶಾಂತ್ತಾಯಚ್ ಆಸಾ ಖರಿ ತೊಂಡ್ ತೀಜೆಂ ದಿಸ್ತಾ ಕುರೂಪ್ ಮ್ಹರ್ಯಾಂತ್ ಆಸಾತ್ ಆಪ್ಲಿಂ ತರಿ ಖೊಸ್ ಕಿತ್ಯಾಕ್ ಭೊಗ್ನಾ? ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಘರ್ಚಿಂ ಘರ್ಚ್ಯಾಂಕ್ ಮೆಳೂಂಕ್ ಲಾಗ್ಲ್ಯಾಂತ್ ಶೆಜಾರಿ ಆತಾಂ ದಿಸುಂಕ್ ಲಾಗ್ಲ್ಯಾಂತ್ ವಳ್ಖಂ ಲೆಗೀತ್ ನಾಶಿಲ್ಲೆ ಜೆ ಎಕ್ಮೆಕಾಂಕ್ ಪಾವೂಂಕ್ ಲಾಗ್ಲ್ಯಾತ್ ಕಿತ್ಲೆ ಜಾಣಾಂಚಿಂ ಖರಿಂ ರೂಪಾಂ ಹರ್ಶಿಂ ಆಮ್ಕಾಂ ದಿಸ್ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ದೊತೊರ್ ಜೀವಾರ್ ಜಾಲ್ಯಾತ್ ಉದಾರ್ ಜೀವ್ ವಾಟಾಯ್ತಾತ್ ಸೊಸುನ್ ಮಾರ್ ಕಾಂಯ್ ಜಾಣ್ ದೀಸ್ ರಾತ್ ಝಗ್ಡಟಾತ್ ವಾರ್ಯಾರ್ ಉಡೊವ್ನ್ ಘರ್ ಸಂಸಾರ್ ಕೊಣ್ ಫುಕಟ್ ತಪಾಸತಾ ಉಪ್ಕಾರಾಚೆ ಹಿಶೊಬ್ ಮಾಂಡ್ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಗರ್ಜೆಕ್ ಕೊಣಯ್ ಪಾವ್ತಾ ಆತಾಂ ಪೂಣ್ ಭೆಶ್ಟೆಚ್ ಭಾಯ್ರಯ್ ಸೊಡಿನಾತ್ ದಯೆಚಿ ಮೊವ್ಸಾಣ್ ಎಕವ್ಟೆನ್ ಶೀಸ್ತೀಚೆಂ ಚೀಲ್ಖತ್ ತೊಡಿನಾತ್ ಹಾಂತ್ಲ್ಯಾನ್ ಭಾಯ್ರ್ ಸರ್ತಲೀಂಚ್ ಜಾಯ್ ಧೀರ್ ಆನಿ ಕರೂಣಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಭಂಯ್ ಆಸ್ಲೊ ತರಿ ಧೀರ್ ಸೊಡ್ಚೊ ನ್ಹಿಂ ಎಕ್ಟೊ ಆಸ್ಲೊ ತರಿ ಎಕ್ಸುರೊ ಜಾವ್ಚೊ ನ್ಹಿಂ ಕುಡೀಂತ್ ಅಂತರ್ ದವ್ರಲಾಂ ಕಾಳ್ಜಾನ್ ವಾಂಗಡ್ ಸೊಡುನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಆಶೆಚಿಂ ಜನೆಲಾಂ ಉಗ್ತಿಂ ಜಾಲ್ಯಂತ್ ಕಿರ್ಣಾಂ ಧೀರಾಚಿ ಘರಾಂತ್ ರೀಗ್ಲ್ಯಾಂತ್ ಆಶೆರಚ್ ತರ್ ಚಲ್ತಾ ಸಂಸಾರ್ ವಿಶ್ವಾಸಾನ್ ಮನಾ ರಂಗ್ಲ್ಯಾಂತ್ ಭೀರಾಂತ್ ಜರಿ ಅನಿಶ್ಚಿತಾಚಿ ವಿಶ್ವಾಸ್ ಆಮ್ಚೊ ಗಳ್ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ರೊಕ್ಡೆಂಚ್ ರೂಪ್ ಪರ್ತತಲೆಂ ರಸ್ತೆ ಮನ್ಶಾನಿ ಭರ್ತಲೆ ವೆಳೆರ್ ಭುರ್ಗಿಂ ಖೆಳ್ಟಲಿ ಲೊಕ್ ಹಾತಾಂತ್ ಹಾತ್ ಧರ್ತಲೆ ಚೈತ್ನ್ಯ್ ಜಾಲಾಂ ಜಾಗೆಂ ಆತಾಂ ಉರ್ಬೆಚಿ ಶಕ್ತ್ ಹರೂನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ದೆಶಾಚೆಂ ರೂಪ್ ಬದ್ಲತಲೆಂ ಘರಾಂತ್ ಸುಖ್ ಪರ್ತತಲೆಂ ಕಿತ್ಲೆಂ ಕಿದೆಂ ಭೊಗ್ಲಾಂ ಆಮಿ ಹೆಂಯ್ ಆಮಿ ನಿಸ್ತರತಲೆ ಮೆಳುನ್ ಲಡಾಯ್ ಜಿಖ್ತಲೆ ಹಾಂತುಂತ್ ಕಸ್ಲೊಚ್ ದುಬಾವ್ ನಾ ಇತ್ಲೆ ದೀಸ್ ಭಾಯ್ರ್ ಸರೂನಾ ಪೂಣ್ ಆಸ್ ಆಮಿ ಸೊಡುನಾ ಆಸ್ ಆಮಿ ಸೊಡುನಾ **** - ಉರ್ಜಿತಾ ಭೊಬೆ**. [ಎಪ್ರಿಲ್, 2020]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Punn as ami sodduna* (- Urjita Bhobe)*
Monis hea somsarant jieun asta poroyant zaitem zoddota toxench zaitem hogoddaita. Kitench sthir mholl'llem na. Sokkodd kxonnik. Zamv ast-bodik, namv, hud'do, sogollem kxonnik mat. Punn kitem-i asa jem monoxak dhoiran jieunko korota tem zaunasa bhorvoso. Ani hea bhirankull disamni soit monis bhorouso sanddinastam jieunko ulo dimvchi kovita hi. - Som
[kovita] Punn as ami sodduna* (- Urjita Bhobe)*
Punn as ami sodduna hoi khorench! bhirantechem chador choivatten fakarolam bhoyann kinn'nn sogllo vatthar hamvem khoim nakarolam? kallzant dhodd'dhodd, dugdug hamv na mhonn'na itle dis bhair soruna punn as ami sodduna husko zala monar svar bondoch dista dor ek dar vosadd poddleat roste soglle kallokh kortat kallzar var pordexant urleant bhurgim auycheo rati sorun sorna itle dis bhair soruna punn as ami sodduna posreank, manddank poddlam kulup bazaracho sorla hurup xant'taich asa khori tondd tijem dista kurup mhoreant asat aplim tori khos kiteak bhogna? itle dis bhair soruna punn as ami sodduna ghorchim ghorcheank mellunk lagleant xezari atam disunk lagleant vollkhom legit naxil'le je ekmekank pavunk lagleat kitle zannanchim khorim rupam horxim amkam disna itle dis bhair soruna punn as ami sodduna dotor jivar zaleat udar jivo vattaitat sosun mar kaim zann dis rat zhogddottat varear uddoun ghor somsar konn fukott topasota upkarache hixob manddna itle dis bhair soruna punn as ami sodduna gorjek konnoi pauta atam punn bhexttech bhairoi soddinat doyechi mousann ekoutten xistichem chilkhot toddinat hantlean bhair sortolinch zai dhir ani korunna itle dis bhair soruna punn as ami sodduna bhom-i aslo tori dhir soddcho nhim ektto aslo tori eksuro zaucho nhim kuddint ontor dourolam kallzan vangodd sodduna itle dis bhair soruna punn as ami sodduna axechim zonelam ugtim zalyont kirnnam dhirachi ghorant rigleant axeroch tor cholta somsar vixvasan mona rongleant bhirant zori onixchitachi vixvas amcho gollna itle dis bhair soruna punn as ami sodduna rokddench rup portotolem roste monxani bhortole veller bhurgim khellttoli lok hatant hat dhortole choitny zalam zagem atam urbechi xokt horuna itle dis bhair soruna punn as ami sodduna dexachem rup bodlotolem ghorant sukh portotolem kitlem kidem bhoglam ami hem-i ami nistorotole mellun loddai jikhtole hantunt kosloch dubavo na itle dis bhair soruna punn as ami sodduna as ami sodduna **** - Urjita Bhobe.** [Apr, 2020]

	Urjita Bhobe: sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’urzasrot’ porgott zala. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] पूण आस आमी सोडुना (- उर्जिता भोबे)
मनीस ह्या संसारांत जियेवन आसता परयांत जायतें जोडता तशेंच जायतें होगडायता. कितेंच स्थीर म्हळ्ळें ना. सक्कड क्षणीक. जांव आसत-बदीक, नांव, हुद्दो, सगळें क्षणीक मात. पूण कितेंय आसा जें मनशाक धयरान जियेवंक करता तें जावनासा भर्वसो. आनी ह्या भिरांकूळ दिसांनी सयत मनीस भरवसो सांडिनासतां जियेवंक उलो दिंवची कविता ही. - सं
[कविता] पूण आस आमी सोडुना (- उर्जिता भोबे)
पूण आस आमी सोडुना हय खरेंच! भीरांतेचें चादर चोयवाटेन फाकारलां भयाण किण्ण सगळो वाठार हांवें खंय नाकारलां? काळजांत धडधड, दुगदुग हांव ना म्हणना इतले दीस भायर सरूना पूण आस आमी सोडुना हुस्को जाला मनार स्वार बंदच दिसता दर एक दार वसाड पडल्यात रस्ते सगळे काळोख करतात काळजार वार परदेशांत उरल्यांत भुरगीं आवयच्यो राती सरून सरना इतले दीस भायर सरूना पूण आस आमी सोडुना पसऱ्यांक, मांडांक पडलां कुलूप बाजाराचो सरला हुरूप शांततायच आसा खरी तोंड तीजें दिसता कुरूप म्हऱ्यांत आसात आपलीं तरी खोस कित्याक भोगना? इतले दीस भायर सरूना पूण आस आमी सोडुना घरचीं घरच्यांक मेळूंक लागल्यांत शेजारी आतां दिसुंक लागल्यांत वळखं लेगीत नाशिल्ले जे एकमेकांक पावूंक लागल्यात कितले जाणांचीं खरीं रूपां हरशीं आमकां दिसना इतले दीस भायर सरूना पूण आस आमी सोडुना दोतोर जीवार जाल्यात उदार जीव वाटायतात सोसुन मार कांय जाण दीस रात झगडटात वाऱ्यार उडोवन घर संसार कोण फुकट तपासता उपकाराचे हिशोब मांडना इतले दीस भायर सरूना पूण आस आमी सोडुना गरजेक कोणय पावता आतां पूण भेश्टेच भायरय सोडिनात दयेची मोवसाण एकवटेन शीस्तीचें चीलखत तोडिनात हांतल्यान भायर सरतलींच जाय धीर आनी करूणा इतले दीस भायर सरूना पूण आस आमी सोडुना भंय आसलो तरी धीर सोडचो न्हीं एकटो आसलो तरी एकसुरो जावचो न्हीं कुडींत अंतर दवरलां काळजान वांगड सोडुना इतले दीस भायर सरूना पूण आस आमी सोडुना आशेचीं जनेलां उगतीं जाल्यंत किरणां धीराची घरांत रीगल्यांत आशेरच तर चलता संसार विश्वासान मना रंगल्यांत भीरांत जरी अनिश्चिताची विश्वास आमचो गळना इतले दीस भायर सरूना पूण आस आमी सोडुना रोकडेंच रूप परततलें रस्ते मनशानी भरतले वेळेर भुरगीं खेळटली लोक हातांत हात धरतले चैतन्य जालां जागें आतां उर्बेची शक्त हरूना इतले दीस भायर सरूना पूण आस आमी सोडुना देशाचें रूप बदलतलें घरांत सुख परततलें कितलें किदें भोगलां आमी हेंय आमी निस्तरतले मेळुन लडाय जिखतले हांतुंत कसलोच दुबाव ना इतले दीस भायर सरूना पूण आस आमी सोडुना आस आमी सोडुना *** - उर्जिता भोबे.** [एपरील, २०२०]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत’ पर्गट जाला. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.