ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

ಸಂಪಾದಕೀಯಾಂ

ಕೊಂಕ್ಣಿ ನಿರಂತರಿ..
ಮನಿಸ್ ಧಾಂವ್ಣಿ..

ಲೇಖನಾಂ

ಪ್ರಗತಿಶೀಲ್ ಬರವ್ಪಿ
ಮುಂಬಯಾಂತ್ ಪ್ರಗತಿಪರ್
ಮುಂಬಯಾಂತ್ಲಿ ಕೊಂಕ್ಣಿ

ಕವಿತಾ

ಬ್ರೊತೊ (ಪಯ್ಲಿ ಕವಿತಾ)

ಕವಿತಾ (ಹಫ್ತ್ಯಾಚಿ ಕವಿತಾ)

ಕವಿತಾಪಾಠ್ (ಅಧ್ಯಯನ್)

ಚಿತ್ರಾಂ-ವಿಚಿತ್ರಾಂ

ಕಾಣ್ಯೊ

ಮಟ್ವಿಕಥಾ (ಹಫ್ತ್ಯಾಚಿ ಕಾಣಿ)

ವಿಶ್ಲೇಶಣಾಂ

ಮುಗ್ದೊನಾತ್‌ಲ್ಲಿಂ ಗಿತಾಂ

ಸಂವಾದ್

ಏಕ್ ಭೆಟ್ ಏಕ್ ಸಂವಾದ್

ಕೊಂಕ್ಣಿ ಕಾರ್ಯಿಂ

ಆಗ್ರಾರ್ ಕವಿಗೋಶ್ಟಿ
ಕೊಂಕ್ಣಿ ಸಹಮಿಲನ್ 2015

ಅಂಕಣಾಂ

ದಿವ್ಟಿ (ಜಿಯೋ ಆಗ್ರಾರ್)

ಸಕಾಳಿಕ್ (ಸ್ಟೀಫನ್ ಕ್ವಾಡ್ರಸ್)

ಭಲಾಯ್ಕಿ (ಡಾ|ಎಡ್ವರ್ಡ್ ನಜ್ರೆತ್)

ಮನ್ ಕಿ ಬಾತ್ (ಜೆ.ವಿ.ಕಾರ್ಲೊ)

ನಾನು-ಇಸಂ (ನಾನು ಮರೋಳ್)

[ಕವಿತಾ] ಎಕ್ವೆರಿಯಮ್ (- ಉರ್ಜಿತಾ ಭೊಬೆ)

ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸವಾಲ್ ಜೆದನಾಂ ಎಕಾ ಕವಿಕ್ ತರ್ ಕೆಲೆಂ, ತರ್ ತೆದನಾಂ ಮೆಳ್ಚಿ ಜವಾಬ್ ಖರಿಚ್ ಜಾವ್ನ್ ವಿಜ್ಮಿತ್ ಕರತಾ. ಜಿವಿತ್ ಮ್ಹಳ್ಯಾರ್ ಚ್ಯಾರ್ ವಣದಿಂಚೆಂ ಏಕ್ ಆಕ್ವೇರಿಯಮ್ ಭಾಶೆನ್ ದಿಸತಾ ಮ್ಹಣಚಿ ಹಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಕಾಂಯ್ ಅಪಣಾಚೊಚ್ ಖರೊ ಅಣ್ಬವ್ ಕಾಂಯ್ ವ್ಹಾಳ್ಳಾಕಾಯ್ ಕಿತೆಂ ಮ್ಹಳ್ಳೊ ದುಭಾವ್ ಯೆತಾ. ಹಾಂಗಾಸರ್ ಆಮಿ ಹ್ಯಾ ಸಂಸಾರಾಂತ್ ಮಾಸಳ್ಯೊ ತರ್, ತ್ಯೊ ವಣದ್ಯೊ ಪಳೆಯಾತ್; ಜಾವ್ಯೆತಾ ಆಮ್ಚ್ಯಾ ಧರ್ಮಾಚ್ಯೊ, ಜಾವ್ಯೆತಾ ಭಾಸೆಚ್ಯೊ, ಜಾವ್ಯೆತಾ ಆಧ್ಯಾತ್ಮಿಕತೆಚ್ಯೊ, ಜಾವ್ಯೆತಾ ವಯ್ಚಾರಿಕತೆಚ್ಯೊ ವಾ ಹೆರ್ ಕಸಲ್ಯೊಯ್ ಪುಣ್ ಹ್ಯಾ ಚ್ಯಾರ್ ವಣದಿಂ ಭಿತರ್ ಬಂದ್ ಜಾಲ್ಲೊ ಕವಿಚೊ ಅಣ್ಬವ್ ಅಪುರ್ಭಯೆಚೊ ಮ್ಹಣಚ್ಯಾಂತ್ ದೋನ್ ಉತರಾಂ ನಾಂತ್.

ಥೊಡ್ಯಾಚ್ ವರಸಾಧಿಂ ಕವಿತಾ ಬರಂವ್ಕ್ ಲಾಗ್‌ಲ್ಲ್ಯಾ ಬಯ್ ಉರ್ಜಿತಾಚ್ಯಾಚಿ ಕಾವ್ಯಾಳ್ ವಾಡಾವಳ್ ಕೊಂಕಣಿ ಕವಿತೆಚ್ಯಾ ನದ್ರೆನ್ ಭೋವ್ ಸಂತೊಸಾಚೆಂ. ಹೆಂ ಚಿಂತಪ್ ತುಜೆಂಯ್ ಕರುಂಕ್ ಆತಾಂ ತುಜೆರ್ ಸೊಡತಾಂ.

- ಸಂ

[ಕವಿತಾ] ಎಕ್ವೆರಿಯಮ್ (- ಉರ್ಜಿತಾ ಭೊಬೆ)

ಎಕ್ವೆರಿಯಮ್ ಸಕಾಳಿಂ ಉಠತ್ ಸಾಕೂನ್ ಕಾಲ್ ರಾತಿಂ ಸಪ್ನಾತ್ ಪಳಯ್ಲ್ಲೊ ಎಕ್ವೆರಿಯಮ್ ದೊಳ್ಯಾಮುಖಾರ್ ನಾಚ್ತಾಲೊ ಸಕಾಳ್ಚ್ಯಾನ್ ಜಸೊ ಫಾಟೀಕ್ ಲಾಗಿಲ್ಲೊ ದುದ್ ತಾಪಯ್ತನಾ ಚ್ಯಾಕ್ ಆದನ್ ದವ್ರತನಾ ಝಾಡಾಂಕ್ ಉದಕ್ ಘಾಲ್ತನಾ ಪೆಪರ್ ಭೀತರ್ ಘೆತ್ನಾ...... ತೊ ನಾಚ್ತಾಲೊ ದೊಳ್ಯಾಮುಖಾರ್ ಕಿದ್ಯಾಕ್? ಕಳ್ಳೆಂ ನಾ. ಮಾಗೀರ್ ಮ್ಹಾಕಾ ದಿಸ್ಲೆಂ ತೊ ಮ್ಹಾಕಾ ಕಸ್ಲಿ ಯಾದ್ ಕರೂನ್ ದಿತಾ... ವಣ್ಟೀಂಚಿ.... ಹಾಂವೆಂ ಬಾಂದಿಲ್ಲೆ ವಣ್ಟೀಂಚಿ ಕಾಚೆಂಚ್ಯಾ ವಣ್ಟೀಂಚಿ ಯಾದ್ ಹಾಂವೆಂ ಮ್ಹಜೆ ಭೊವ್ತಣಿ ಕಾಂಚೆಚ್ಯೊ ವಣ್ಟಿ ಬಾಂದ್ಲ್ಯಾತ್ ತಾಂತ್ಲ್ಯಾನ್ ಮ್ಹಾಕಾ ಲೊಕ್ ದಿಸ್ತಾತ್ ತಾಂಕಾಯ್ ಹಾಂವ್ ದಿಸ್ತಾಂ ಪೂಣ್....... ಪೂಣ್ ಮ್ಹಜೊ ಆವಾಜ್ ತಾಂಚೆಮೆರೆನ್ ಪಾವ್ನಾ. ಮ್ಹಾಕಾ ಉಲೊವ್ಚೆಂ ಆಸ್ತಾ, ತೊಂಡ್ ಉಗಡ್ಲ್ಯಾರ್ ಉತರ್ ಫುಟ್ನಾ, ಉತರ್ ಫುಟ್ಲ್ಯಾರ್ ಆವಾಜ್ ಭಾಯ್ರ್ ಸರ್ನಾ, ಆನಿ ಭಾಯ್ರ್ ಸರ್ತಾ ತೊ ಆವಾಜ್ ಕಾಚೆಚ್ಯಾ ವಣ್ಟೀಂಕ್ ಆದ್ಳುನ್ ಪರ್ತುನ್ ಯೆತಾ......... ಮ್ಹಣ್ ಹಾಲೀಸರಾಕ್ ಹಾಂವ್ ಒಗೀಚ್ ಆಸ್ತಾಂ. ಕಾಳ್ಜಾಂತ್ ಉತ್ರಾಂ ಖತ್ಖತತ್ ವತಾತ್ ಚಿಂತ್ನಾಂಕ್ ಉಕ್ಳಿ ಯೆತಾ ಒತೊ ಲೆಗೀತ್ ಯೆತಾ ಪೂಣ್..... ಕಾಚೆಕ್ ಆದ್ಳಪಾಚೆ ಭಯಾನ್ ತಿಂ ಭೀತ್ರಚ್ ತುಂಬ್ತಾತ್ ಆನಿ ಹಾಂವ್ ಪೆಂವ್ತಾಂ ತೆ ಕಾಂಚೆಚ್ಯಾ ವಣ್ಟೀಂನಿ ಎಕ್ವೆರಿಯಮಾನ್ ಪೆಂವ್ಪಿ ನುಸ್ತ್ಯಾವರಿಂ. ಸದಾಂಚ್ ರೀತೆಂ ಕರೂನ್ ಲೆಗೀತ್ ತೆಂ ಭರತ್ ವತಾ. ಖಾರೆ ಉದ್ಕಾನ್ ದರ್ಯಾವರಿ ಖಾರೆ ಮ್ಹಜೆಚ್ ದುಕಾಂನಿ ಪೂಣ್ ಆತಾಂ...... ಆತಾಂ ಥಾರಾಯ್ಲಾಂ. ಕೆನ್ನಾತರಿ ಎಕ್ ದೀಸ್ ಹಿ ವಣತ್ ಫೊಡ್ಟಲೆಂ. ಕಂವ್ಚ್ಯೊ ಕಂವ್ಚ್ಯೊ ಜಾತ್ಲ್ಯೊ ಚಕ್ಚಕೀತ್ ಕಂವ್ಚ್ಯೊ ಉಜ್ವಾಡಾಂತ್ ಲಖ್ಲಖಪಿ. ಆನಿ..... ಹ್ಯಾ ಕಂವ್ಚ್ಯಾಂತಲ್ಯಾನ್ ಮ್ಹಜೆ ಕಾಳ್ಜಾಂತಲಿಂ ಉತ್ರಾಂ ತುಂಬಿಲ್ಲಿ ಚಿಂತ್ನಾ ಆಡ್ಡೂನ್ ಆಡ್ಡೂನ್ ಸಾಂಗ್ತಲೆಂ ಆನಿ ತಾಜೊ ಗಾಜ್ ಪಾವ್ತಲೊ ದಿಗಂತರಾ.......... **** - ಉರ್ಜಿತಾ ಭೊಬೆ**. [ಜನೆರ್, 2020]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Ekveriyom'* (- Urjita Bhobe)*
Jivit mhollear kitem mholl'llem soval jedonam eka kovik tor kelem, tor tedonam mellchi zovab khorich zaun vijmit korota. Jivit mhollear chear vonnodinchem ek akveriyom' bhaxen disota mhonnochi hi kovita vachun gel'leporinch kaim oponnachoch khoro onnbou kaim vhall'llakai kitem mholl'llo dubhavo yeta. Hangasor ami hea somsarant masolleo tor, teo vonnodeo polleyat; zauyeta amchea dhormacheo, zauyeta bhasecheo, zauyeta adheatmikotecheo, zauyeta voicharikotecheo va her kosoleoi punn hea chear vonnodim bhitor bond zal'lo kovicho onnbou opurbhoyecho mhonnocheant don utoram nant. Thoddeach vorosadhim kovita borounko lag‌l'lea boi urjitacheachi kaveall vaddaull konkonni kovitechea nodren bhovo sontosachem. Hem chintop tujem-i korunk atam tujer soddotam. - Som
[kovita] Ekveriyom'* (- Urjita Bhobe)*
Ekveriyom' sokallim utthot sakun kal ratim sopnat polloil'lo ekveriyom' dolleamukhar nachtalo sokallchean zoso fattik lagil'lo dud tapoitona cheak adon dourotona zhaddank udok ghaltona pepor bhitor ghetna...... To nachtalo dolleamukhar kideak? koll'llem na. Magir mhaka dislem to mhaka kosli yad korun dita... Vonnttinchi.... Hamvem bandil'le vonnttinchi kachenchea vonnttinchi yad hamvem mhoje bhoutonni kanchecheo vonntti bandleat tantlean mhaka lok distat tankai hamv distam punn....... Punn mhozo avaz tanchemeren pauna. Mhaka ulouchem asta, tondd ugoddlear utor futtna, utor futtlear avaz bhair sorna, ani bhair sorta to avaz kachechea vonnttink adllun portun yeta......... Mhonn halisorak hamv ogich astam. Kallzant utram khotkhotot votat chintnank uklli yeta oto legit yeta punn..... Kachek adllopache bhoyan tim bhitroch tumbtat ani hamv pemvtam te kanchechea vonnttimni ekveriyoman pemvpi nusteavorim. Sodanch ritem korun legit tem bhorot vota. Khare udkan doreavori khare mhojech dukamni punn atam...... Atam tharailam. Ken'natori ek dis hi vonnot foddttolem. Komvcheo komvcheo zatleo chokchokit komvcheo ujvaddant lokhlokhopi. Ani..... Hea komvcheantolean mhoje kallzantolim utram tumbil'li chintna add'ddun add'ddun sangtolem ani tazo gaz pautolo digontora.......... **** - Urjita Bhobe.** [Zoner, 2020]

	Urjita Bhobe: sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’urzasrot’ porgott zala. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] एक्वेरियम (- उर्जिता भोबे)
जिवीत म्हळ्यार कितें म्हळ्ळें सवाल जेदनां एका कवीक तर केलें, तर तेदनां मेळची जवाब खरीच जावन विज्मीत करता. जिवीत म्हळ्यार च्यार वणदिंचें एक आकवेरियम भाशेन दिसता म्हणची ही कविता वाचून गेल्लेपरिंच कांय अपणाचोच खरो अणबव कांय व्हाळ्ळाकाय कितें म्हळ्ळो दुभाव येता. हांगासर आमी ह्या संसारांत मासळ्यो तर, त्यो वणद्यो पळेयात; जाव्येता आमच्या धर्माच्यो, जाव्येता भासेच्यो, जाव्येता आध्यात्मिकतेच्यो, जाव्येता वयचारिकतेच्यो वा हेर कसल्योय पूण ह्या च्यार वणदीं भितर बंद जाल्लो कविचो अणबव अपुर्भयेचो म्हणच्यांत दोन उतरां नांत. थोड्याच वरसाधीं कविता बरवंक लाग‌ल्ल्या बय उर्जिताच्याची काव्याळ वाडावळ कोंकणी कवितेच्या नद्रेन भोव संतोसाचें. हें चिंतप तुजेंय करुंक आतां तुजेर सोडतां. - सं
[कविता] एक्वेरियम (- उर्जिता भोबे)
एक्वेरियम सकाळीं उठत साकून काल रातीं सपनात पळयल्लो एक्वेरियम दोळ्यामुखार नाचतालो सकाळच्यान जसो फाटीक लागिल्लो दुद तापयतना च्याक आदन दवरतना झाडांक उदक घालतना पेपर भीतर घेतना...... तो नाचतालो दोळ्यामुखार किद्याक? कळ्ळें ना. मागीर म्हाका दिसलें तो म्हाका कसली याद करून दिता... वण्टींची.... हांवें बांदिल्ले वण्टीँची काचेंच्या वण्टींची याद हांवें म्हजे भोवतणी कांचेच्यो वण्टी बांदल्यात तांतल्यान म्हाका लोक दिसतात तांकाय हांव दिसतां पूण....... पूण म्हजो आवाज तांचेमेरेन पावना. म्हाका उलोवचें आसता, तोंड उगडल्यार उतर फुटना, उतर फुटल्यार आवाज भायर सरना, आनी भायर सरता तो आवाज काचेच्या वण्टींक आदळुन परतुन येता......... म्हण हालीसराक हांव ओगीच आसतां. काळजांत उतरां खतखतत वतात चिंतनांक उकळी येता ओतो लेगीत येता पूण..... काचेक आदळपाचे भयान तीं भीतरच तुंबतात आनी हांव पेंवतां ते कांचेच्या वण्टींनी एक्वेरियमान पेंवपी नुस्त्यावरीं. सदांच रीतें करून लेगीत तें भरत वता. खारे उदकान दर्यावरी खारे म्हजेच दुकांनी पूण आतां...... आतां थारायलां. केन्नातरी एक दीस ही वणत फोडटलें. कंवच्यो कंवच्यो जातल्यो चकचकीत कंवच्यो उजवाडांत लखलखपी. आनी..... ह्या कंवच्यांतल्यान म्हजे काळजांतलीं उतरां तुंबिल्ली चिंतना आड्डून आड्डून सांगतले़ं आनी ताजो गाज पावतलो दिगंतरा.......... **** - उर्जिता भोबे.** [जनेर, २०२०]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत’ पर्गट जाला. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.