ಕೊಂಕ್ಣಿ ಕಾರ್ಯಿಂ

[ಕವಿತಾ] ಹಾಂವೆಸಾಚೆ ಪುಜಾರಿ (- ಅವಿನಾಶ್ ಕುಂಕಳಕಾರ್)

ಹಾಂವೆಸಾಚೆ ಪುಜಾರಿ

ಖೂಬ್ ಜಾಲೆ ಬಲಾತ್ಕಾರ್
ಅಸ್ತುರೆಚೆರ್ ಅನ್ಯಾಯ್,ಅತ್ಯಾಚಾರ್
ಜಶಿ ತುಮ್ಚಿ ಆವ್ಯ್,ಭಯ್ಣ್
ತಶೀಚ್ ದುಸ್ರ್ಯಾಚಿ... ಹೊ ಕೆಲಾ ತುಮಿ ವಿಚಾರ್ ?

ಶರೀರ್ ಸುಖಾಚಿ ಭೂಕ್ ಮಾರೂಕ್
ಜನಾವ್ರ್ ಜಾವ್ಪಾಚಿ ಗರಜ್ ನಾಂ
ತೆ ಸುಖ್ ಅಣ್ಭವಪಾಚಿ ವ್ಯವ್ಸ್ತಾ
ಕೆಲಾ ದೆವಾನ್
ಬಳ್ಜಬರಿ ಕರೂನ್ ಉಪ್ಕಾರಚಿನಾ.

ಬಳ್ಜಬರೀನ್ ಖರ್ಯಾ ಸುಖಾಚಿ ಭೂಕ್ ಭಾಗ್ನಾ
ತೆ ಸೂಖ್ ಅಣ್ಭವಚೆ ಜಾಲ್ಯಾರ್
ಅಸ್ತುರೆಚೊ ಆದರ್ ಕರ್ಚ್ಯಾ ಖೆರೀಜ್
ದುಸ್ರೊ ಉಪಾಯ್ ನಾಂ.

ಹಾಂವೆಸಾಚೆ ಪುಜಾರಿ
ಆಜೂನಯ್ ಹೆಡ್ಟಾ ಗಾಂವಾರ್
ಎಕ್ ಎಕ್ಸುರೆ ಅಸ್ತುರೆಚಿ ವಾಟ್ ಪಳಯ್ತ್
ಆನಿ ತಿ ಬಾಬ್ಡಿ ಭಿವೂನ್
ಕಾಡ್ತಾ ದೀಸ್ ತ್ಯಾ ನರಾಧಮಾಕ್
ಆಪ್ಲ್ಯಾ ಅಸ್ತೀತ್ವಾಚಿ ರಾಖಣ್ ಕರೂಕ್.

ಆತ್ಮಹ್ತ್ಯಾ ಕರೂನ್ ಲೆಗೀತ್
ಅಸ್ತೀತ್ವಾರ್ ಪಡಿಲ್ಲೊ ದಾಗ್
ಕಾಡೂಕ್ ಕೊಣಾಕ್ ಜಮ್ಬೆ ನಾಂ
ಆವ್ಯ್,ಬಾಪಾಯ್ಚ್ಯಾ ದುಕಾಂಚ್ಯಾ ಥೆಂಬ್ಯಾನಿ
ಆಪ್ಲ್ಯಾ ಭುರ್ಗ್ಯಾಚಿ ಮೆಲ್ಲಿ ಕೂಡ್
ಧೂವ್ನ್ ಕಾಡ್ಲಿ ತರಿ ತೊ ದಾಗ್ ಪುಸ್ಲೊ ನಾಂ.

ಗಾಂವಾರ್ ಹೆಡ್ಪಿ ತೆ ಸುಣೆ, ನರಾಧಮಾಚೆ
ತೆ ಘಡ್ಣುಕೆತ್ ತಾಂಚೆ ಕಾಂಯ್ಚ್ ಅಡ್ಲೆ ನಾಂ
ವ್ಹಡಾ ಮಂತ್ರಾಚೊ ಪಾಟ್ಬಳ್ ತಾಂಕಾಂ
ಲಾಭ್ಲೆಲೊ ಆಸ್ರತಾ
ತೆ ಹೆಡ್ಟಾ ಆಜೂನಯ್ ತಕ್ಲಿ ವಯ್ರ್ ಕಾಡೂನ್
ತಾಂಕಾಂ ದುಸ್ರ್ಯಾಚ್ಯಾ ದುಖಾಚೆ ಪಡ್ಲೆಲೆ ನಾಂ.

ಪೂಣ್ ವಿಸ್ರತಾತ್ ತೆ ದೆವಾಚೊ ನ್ಯಾಯ್
ಜಾಣಾ ಜಾವ್ನ್...
ದೆವ್ ಆಪ್ಲ್ಯಾ ನ್ಯಾಯಾಕ್ ಕೆನ್ನಾ ಮುಕ್ನಾ
ದೆವಾಚ್ಯಾ ನ್ಯಾಯಾಚ್ಯಾ ತಾಗ್ಡೆಚ್ಯಾ ದಾಲ್ಯಾತ್
ವಜನ್ ಜರಿ ನಾಸ್ಲೆ ತರಿ
ತೊ ಮೊಜ್ಮಾಪ್ ಕರೂಂಕ್ ಕೆನ್ನಾ ಚುಕ್ನಾ

ಮೆಳ್ತಲೆ ತಾಂಕಾಂಯ್ ಬಿ ಫಳ್
ತಾಣಿ ಬಳ್ಜಬರೀನ್ ಕೆಲ್ಯಾ ಕಶ್ಟಾಚೆ
ದರೆಕ್ ಯುಗಾತ್ ಅವ್ತಾರ್ ಘೆತಾ ದೆವ್
ನಾಶ್ ಕರೂಂಕ್ ತಸ್ಲ್ಯಾ ದುಶ್ಟಾಚೆ.

 ******

- ಅವಿನಾಶ್ ಕುಂಕಳಕಾರ್. [ಫೆಬ್ರೆರ್, 2020]

[kovita] Hamvesache Puzari (- Avinash Kunkullkar)

Hamvesache Puzari

Khub zale bolatkar
osturecher onyai,oteachar
zoxi tumchi auy,bhoinn
toxich dusreachi... Ho kela tumi vichar ?

xorir sukhachi bhuk maruk
zonaur zaupachi goroz nam
te sukh onnbhoupachi vyousta
kela devan
bollzobori korun upkarochina.

Bollzoborin khorea sukhachi bhuk bhagna
te sukh onnbhouche zalear
osturecho ador korchea kheriz
dusro upai nam.

Hamvesache puzari
azunoi heddtta gamvar
ek eksure osturechi vatt polloit
ani ti babddi bhivun
kaddta dis tea noradhomak
aplea ostitvachi rakhonn koruk.

Atmohtea korun legit
ostitvar poddil'lo dag
kadduk konnak zombe nam
auy ,bapaichea dukanchea thembeani
aplea bhurgeachi mel'li kudd
dhuvn kaddli tori to dag puslo nam.

Gamvar heddpi te sunne,noradhomache
te ghoddnnuket tanche kainch oddle nam
vhodda montracho pattboll tankam
labhlelo asrota
te heddtta azunoi tokli voir kaddun
tankam dusreachea dukhache poddlele nam.

Punn visrotat te devacho nyai
zanna zaun...
Devo aplea neayak ken'na mukna
devachea neayachea tagddechea daleat
vozon zori nasle tori
to mojmap korunk ken'na chukna

melltole tankaim bi foll
tanni bollzoborin kelea koxttache
dorek yugat ovtar gheta devo
nax korunk toslea duxttache.

******

- Ovinax Kunkollokar. [Feb, 2020]

[कविता] हांवेसाचे पुजारी (- अविनाश कुंकळकार)

ह्या संसारांत जियेतलो मनीस कांय दीस गेल्लेपरीं मनजात जाला काय? शिकप आसून, समजणी आसून मनीस कित्याक अजून मनजातीक सयत लजेर घालचीं कामा करून आसा? ह्या चिंतपाचेर विणलली कविता ही.

बाब अविनाश कुंकळकार गोंयचो कवी, ह्या कवितेच्या सकतेक समजुंक तुका उलो दितां.

- सं

[कविता] हांवेसाचे पुजारी (- अविनाश कुंकळकार)

हांवेसाचे पुजारी

खूब जाले बलात्कार
अस्तुरेचेर अन्याय,अत्याचार
जशी तुमची आवय,भयण
तशीच दुसर्‍याची... हो केला तुमी विचार ?

शरीर सुखाची भूक मारूक
जनावर जावपाची गरज नां
ते सुख अणभवपाची व्यवस्ता
केला देवान
बळजबरी करून उपकारचिना.

बळजबरीन खर्‍या सुखाची भूक भागना
ते सूख अणभवचे जाल्यार
अस्तुरेचो आदर करच्या खेरीज
दुसरो उपाय नां.

हांवेसाचे पुजारी
आजूनय हेडटा गांवार
एक एकसुरे अस्तुरेची वाट पळयत
आनी ती बाबडी भिवून
काडता दीस त्या नराधमाक
आपल्या अस्तीत्वाची राखण करूक.

आत्महत्या करून लेगीत
अस्तीत्वार पडिल्लो दाग
काडूक कोणाक जमबे नां
आवय, बापायच्या दुकांच्या थेंब्यानी
आपल्या भुरग्याची मेल्ली कूड
धूवन काडली तरी तो दाग पुसलो नां.

गांवार हेडपी ते सुणे,नराधमाचे
ते घडणुकेत तांचे कांयच अडले नां
व्हडा मंत्राचो पाटबळ तांकां
लाभलेलो आसरता
ते हेडटा आजूनय तकली वयर काडून
तांकां दुसर्‍याच्या दुखाचे पडलेले नां.

पूण विसरतात ते देवाचो न्याय
जाणा जावन...
देव आपल्या न्यायाक केन्ना मुकना
देवाच्या न्यायाच्या तागडेच्या दाल्यात
वजन जरी नासले तरी
तो मोजमाप करूंक केन्ना चुकना

मेळतले तांकांय बी फळ
ताणी बळजबरीन केल्या कश्टाचे
दरेक युगात अवतार घेता देव
नाश करूंक तसल्या दुश्टाचे.

******

- अविनाश कुंकळकार. [फेबरेर, २०२०]

ದಾಯ್ಜ್.ಕೊಮ್