ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

ಸಂಪಾದಕೀಯಾಂ

ಕೊಂಕ್ಣಿ ನಿರಂತರಿ..
ಮನಿಸ್ ಧಾಂವ್ಣಿ..

ಲೇಖನಾಂ

ಪ್ರಗತಿಶೀಲ್ ಬರವ್ಪಿ
ಮುಂಬಯಾಂತ್ ಪ್ರಗತಿಪರ್
ಮುಂಬಯಾಂತ್ಲಿ ಕೊಂಕ್ಣಿ

ಕವಿತಾ

ಬ್ರೊತೊ (ಪಯ್ಲಿ ಕವಿತಾ)

ಕವಿತಾ (ಹಫ್ತ್ಯಾಚಿ ಕವಿತಾ)

ಕವಿತಾಪಾಠ್ (ಅಧ್ಯಯನ್)

ಚಿತ್ರಾಂ-ವಿಚಿತ್ರಾಂ

ಕಾಣ್ಯೊ

ಮಟ್ವಿಕಥಾ (ಹಫ್ತ್ಯಾಚಿ ಕಾಣಿ)

ವಿಶ್ಲೇಶಣಾಂ

ಮುಗ್ದೊನಾತ್‌ಲ್ಲಿಂ ಗಿತಾಂ

ಸಂವಾದ್

ಏಕ್ ಭೆಟ್ ಏಕ್ ಸಂವಾದ್

ಕೊಂಕ್ಣಿ ಕಾರ್ಯಿಂ

ಆಗ್ರಾರ್ ಕವಿಗೋಶ್ಟಿ
ಕೊಂಕ್ಣಿ ಸಹಮಿಲನ್ 2015

ಅಂಕಣಾಂ

ದಿವ್ಟಿ (ಜಿಯೋ ಆಗ್ರಾರ್)

ಸಕಾಳಿಕ್ (ಸ್ಟೀಫನ್ ಕ್ವಾಡ್ರಸ್)

ಭಲಾಯ್ಕಿ (ಡಾ|ಎಡ್ವರ್ಡ್ ನಜ್ರೆತ್)

ಮನ್ ಕಿ ಬಾತ್ (ಜೆ.ವಿ.ಕಾರ್ಲೊ)

ನಾನು-ಇಸಂ (ನಾನು ಮರೋಳ್)

[ಕವಿತಾ] ಜಿಣೆಚಿ ಸಾಂಜ್ (- ಸುನೇತ್ರಾ ಜೋಗ್)

ಅಸ್ತುರೆಚೆಂ ಜಿವಿತ್ ಮ್ಹಳ್ಯಾರ್ ಎಕಾ ವಾತಿಪರಿಂಚ್. ಫಕತ್ ಅಪ್ಲ್ಯಾ ಜಿವಾಕ್ ಝಳಂವ್ಚೆಂ ಆನಿ ಅಖೇರ್ ಪರಯಾಂತ್ ಉಜವಾಡ್ ದಿಂವಚೆಂ. ಹಾಂಗಾಸರ್ ಮರಣ್ ಘೆವ್ನ್ ಆಯಿಲ್ಲ್ಯಾ ಯಮಕ್ ಸಯ್ತ್ ಅಪ್ಲ್ಯಾ ಭುರಗ್ಯಾಂಚಿ ಜತನಾಚಿಂ ನಿಬಾಂ ದಿವುನ್ ಏಕ್ ಅಸ್ತುರಿ ಜಿಯೆತಾ. ಆನಿ ಅಖೇರಿಕ್ ತಿಂಚ್ ಭುರಗಿಂ ತಿಕಾ ಎಕ್ಸುರಿಚ್ ಸಾಂಡುನ್ ವೆತಾನಾ ತಿ ಎಕ್ಸುರಿ, ನಿತ್ರಾಣಿ ಆನಿ ಅಸ್ಕತ್ ಜಾವ್ನ್ ತೆಚ್ ಯಮಕ್ ರಾಕುನ್ ಉರತಾ ಪುಣ್ ತೊ ಯಮ ಸಯ್ತ್ ಮರಣ್ ಘೆವ್ನ್ ಯೇನಾ. ಭೋವ್ ಸೊಂಪಿ ಕಾಣಿ ಮ್ಹಳ್ಳೆಪರಿಂ ದಿಸ್ಚಿ ಹಿ ಕವಿತಾ ಕಾಂಯ್ ಕಾಣಿಯೊ ಸಾಂಗುನ್ ವೆತಾ.

ಬಾಯ್ ಸುನೇತ್ರಾ ಜೋಗಾಚ್ಯೊ ಕವಿತಾ ವೆಗಳೊಚ್ ಅನ್ಭವ್ ಹಾಡುನ್ ದಿತಾ. ತ್ಯಾ ಅನ್ಭವಾಕ್ ಭಗುಂಕ್ ವಾಚಪ್ಯಾ, ಆತಾಂ ತುಕಾಚ್ ಉಲೊ ದಿತಾಂ.

- ಸಂ

[ಕವಿತಾ] ಜಿಣೆಚಿ ಸಾಂಜ್ (- ಸುನೇತ್ರಾ ಜೋಗ್)

ಜಿಣೆಚಿ ಸಾಂಜ್ ಎಕ್ ದೀಸ್ ಕೊಣೆಂತರಿ ದಾರಾರ್ ಮ್ಹಜ್ಯಾ ಮಾರ್ಲೆಂ ದಾರ್ ಉಗ್ಡೂನ್ ಪಳಯ್ ಜಾಲ್ಯಾರ್ ದಾರಾತ್ ಯಮ್ ಉಬೊ ಮ್ಹಣೂಂಕ್ ಲಾಗ್ಲೊ, ಚಲ್ ತುಕಾ ವ್ಹರ್ಪಾಕ್ ಆಯ್ಲಾಂ ಮ್ಹಾಕಾ ಕಲ್ಲ್ ಜಾಲೆಂ.. ಆತಾಂಚ್ ರೆ, ದೆವಾ? ಹಾಂವೆಂ ಮ್ಹಣ್ಲೆಂ.. ಭುರ್ಗಿಂ ಮ್ಹಜಿಂ ಆಸಾತ್ ಲ್ಹಾನ್, ಮಾತ್ಶಿಂ ತರಿಂ ವ್ಹಡ್ ಜಾವಂ ತಾಂಕಾಂ ಸೊಡೂನ್ ಕಶೆಂ ಯೆವಂ? ತಾಕಾ ಮ್ಹಜಿ ಕಾಕೂಟ್ ಆಯ್ಲಿ ಘಡ್ಯೆ, ಬರೆಂ ತರ್, ಮಾಗೀರ್ ಯೆತಾಂ, ಅಶೆಂ ಮ್ಹಣೂನ್ ತೊ ಗೆಲೊ.. ಜೀವಾಕ್ ಮ್ಹಜ್ಯಾ ಸು ಜಾಲೆಂ.. ಕಾಂಯ್ ವರ್ಸಾಂನಿ ತಿನ್ಸಾಂಜಚೆಂ, ಪರತ್ ಎಕ್ದಾಂ ವಾಜ್ಲೆಂ ದಾರ್ ಉಗ್ಡೂನ್ ಭಾಯ್ರ್ ಪಳಯ್ ಜಾಲ್ಯಾರ್, ಪರತ್ ಯಮ್ ಉಬೊ ದಾರಾರ್ ಯೆತಾ ನ್ಹಿ ಆಯ್ಜ್ ತುಂ? ಪ್ರಸ್ನ್ ತಾಣೆಂ ಕೆಲೊ ಆರೆ ದೆವಾ, ಕಿತೆಂ ಸಾಂಗುಂ? ಆವ್ರೊ ಮ್ಹಜೊ ಉಡ್ಲೊ.. ಹೆ ಫಾವ್ಟೂಯ್ ಸೊಡ್ ಮ್ಹಾಕಾ, ಭುರ್ಗ್ಯಾಂಕ್ ಮ್ಹಜಿ ಗರಜ್ ಆಸಾ ಮಾತ್ಶಿಂ ಮಾರ್ಗಾಕ್ ಲಾಗುಂ ತಿಂ, ಮಾಗೀರ್ ಕೆನ್ನಾಯ್ ವ್ಹರ್ ಮ್ಹಾಕಾ.. ಬರೆಂ ತರ್, ಮಾಗೀರ್ ಯೆತಾಂ, ಮಾನೂನ್ ಘೆತಾಂ ತುಜೆಂ ಉತರ್ ಪರತ್ ವಚ್ಪಾಕ್ ಗೆಲೊ ಯಮ್, ಮ್ಹಾಕಾ ವಾಂಗ್ಡಾ ಘೆತ್ಲೆ ಬಗರ್ ಅಶೀಂಚ್ ಕಾಂಯ್ ವರ್ಸಾಂ ಗೆಲಿಂ... ಭುರ್ಗಿಂ ಮ್ಹಜಿಂ ಜಾಲಿಂ ವ್ಹಡ್, ರಮ್ಲಿಂ ಆಪ್ಲ್ಯಾ ಸಂವ್ಸಾರಾ ಗೆಲಿಂ ಪಯ್ಸ್ ದಿಗಂತರಾ.. ಭುರ್ಗ್ಯಾ ಬಾಳಾಂನಿಂ ತಾಂಚೆಂ, ಘರ್ ಗೆಲೆಂ ಭರೂನ್ ಹಾಂವ್ ಮಾತ್ ಕಾಡ್ಟಾಂ ದೀಸ್, ಯಾದಿ ತಾಂಚ್ಯೊ ಕಾಢೂನ್.. ಜಿಣೆಚ್ಯಾ ಸಾಂಜ್ವೆಳಾರ್, ರಾವ್ಲಾಂ ಆತಾಂ ಪಳಯ್ತ್ ವಾಟ್ ಯಮ್ ಕೆನ್ನಾ ಯೆತ್ಲೊ? ವ್ಹರ್ಪಾಕ್ ತುಕಾಂ ಆಯ್ಲಾಂ, ಚಲ್, ಯೊ ಮ್ಹಣ್ಟಲೊ.. ವಾಟ್ ತಾಚಿ ಪಳಯ್ತ್ ರಾವ್ಲಾಂ, ದಾರಾರ್ ಲಾವ್ನ್ ನದರ್ ಕೆನ್ನಾಯ್ ಆಯ್ಲೊ ವ್ಹರೂಂಕ್ ತರಿ, ಕಸ್ಲೀಚ್ ನಾ ಆಡ್ಖಳ್ ಮನಾಕ್ ಮ್ಹಜ್ಯಾ ಜಾತಾತ್ ಭಾಸ್, ಯಮ್ ದಾರಾರ್ ಆಯ್ಲಾ ಪೂಣ್ ಭುರ್ಗ್ಯಾಂ ವರೀಚ್ ಘಡ್ಯೆ ಮ್ಹಾಕಾ, ತೊ ಲೆಗೀತ್ ವಿಸ್ರಲಾ.. ತೊ ಲೆಗೀತ್ ವಿಸ್ರಲಾ... ****** - ಸುನೇತ್ರಾ ಜೋಗ್. [ಜನೆರ್, 2020]

	ಸುನೇತ್ರಾ ಜೋಗ್: ಪದ್ಯುತ್ತರ್ (M.A.) ಶಿಕಪ್ ಜೊಡ್ಪಿ ಬಾಯ್ ಸುನೇತ್ರಾ ಜೋಗ್, BSNL ಸಂಸ್ಥ್ಯಾಂತ್ ಕಾಮ್ ಕರ್ನ್ ವೋಲ್ಯುಂಟರಿ ರಿಟಾಯರ್ಡ್‌ಮೆಂಟ್ ಘೆತ್ಲಾಂ. ಕೊಂಕಣಿ ತಶೆಂಚ್ ಮರಾಠಿಂತ್ ತಿಣೆಂ ಖೂಬ್ ವಾವ್ರ್ ಕೆಲಾ ಆನಿ ಕರುನ್ ಆಸಾ. ಹಿಣೆಂ ’ಆಜಿಯೆಕ್ ವಾಚುಂಕ್ ಶಿಕಯ್ಲೆಂ ಆನಿ ಹೆರ್ ಕಾಣ್‌ಯೊ (- ಸುಧಾ ಮೂರ್ತಿ)’ ತರ್ಜಣ್ ಕೆಲಾ, ತಶೆಂಚ್ ದೀಶ್ಟ್ ನಾಸ್ಚ್ಯಾ ಭುರ್ಗ್ಯಾಂಕ್ ಸಮ್ಜುಂಚ್ಯಾ 'Braille' ಭಾಶೆಂತ್ ತರ್ಜಣ್ ಕೆಲಾ. ಹ್ಯಾ ಬುಕಾಕ್ ಗೊಯಾಂ ಕೊಂಕಣಿ ಅಕಾಡೆಮಿಚೊ ಪುರಸ್ಕಾರ್, ತಶೆಂಚ್ ಕೊಂಕಣಿ ಕಲಾ ಆನಿ ಸಂಸ್ಕೃತಿಚೊ ಪುರಸ್ಕಾರ್ ಲಾಭ್ಲಾ. ’ಜಾಣ್ತೆಲೊ ಆನಿ ತಾಚೊ ದೇವ್’, ’ಹಾಂವೆಂ ದೂದ್ ಪಿಯೆಂವ್ಚೆಂ ಸೊಡ್ಲೆಂ ತ್ಯಾ ದಿಸಾ’, ’ಸರ್ಗಾಚೆ ವಾಟೆರ್ ಕಿತೆಂ ತರೀ ಘಡ್ಲೆಂ’, ’ಶೆಣಿಲ್ಲ್ಯಾ ದೆವ್ಳಾಚೆ ರಹಸ್ಯ್’, ಹೆ ಸರ್ವ್ ಸುಧಾ ಮೂರ್ತಿಚೆ ಬೂಕ್ ಕೊಂಕಣೆಂತ್ ತರ್ಜಣ್ ಕೆಲ್ಯಾತ್. ತಶೆಂಚ್ ’ಡಿಸ್‌ಓರ್ಡರ್ಲಿ ವುಮನ್ (ಮಾಲತಿ ರಾವ್)’ ಬೂಕ್ ಸಾಹಿತ್ ಅಕಾಡೆಮಿನ್ ಪರ್ಗಟ್ ಕೆಲಾ.
[kovita] Jinnechi Sanz* (- Sunetra Jog)*
Osturechem jivit mhollear eka vatiporinch. Fokot oplea jivak zhollomvchem ani okher poroyant uzovadd dimvochem. Hangasor moronn gheun ayil'lea yomok soit oplea bhurogeanchi zotonachim nibam divun ek osturi jieta. Ani okherik tinch bhurogim tika eksurich sanddun vetana ti eksuri, nitranni ani oskot zaun tech yomok rakun urota punn to yomo soit moronn gheun yena. Bhovo sompi kanni mholl'lleporim dischi hi kovita kaim kannio sangun veta. Bai Sunetra Jogacheo kovita vegolloch onbhou haddun dita. Tea onbhovak bhogunk vachopea, atam tukach ulo ditam. - Som
[kovita] Jinnechi Sanz* (- Sunetra Jog)*
Jinnechi sanz ek dis konnentori darar mhojea marlem dar ugddun polloi zalear darat yom' ubo mhonnunk laglo, chol tuka vhorpak ailam mhaka kol'l zalem.. Atanch re, deva? hamvem mhonnlem.. Bhurgim mhojim asat lhan, matxim torim vhodd zaum tankam soddun koxem yeum? taka mhoji kakutt aili ghoddye, borem tor, magir yetam, oxem mhonnun to gelo.. Jivak mhojea su zalem.. Kaim vorsamni tinsanzochem, porot ekdam vajlem dar ugddun bhair polloi zalear, porot yom' ubo darar yeta nhi aiz tum? prosn tannem kelo are deva, kitem sangum? auro mhozo uddlo.. He fauttuy sodd mhaka, bhurgeank mhoji goroz asa matxim margak lagum tim, magir ken'nai vhor mhaka.. Borem tor, magir yetam, manun ghetam tujem utor porot vochpak gelo yom', mhaka vangdda ghetle bogor oxinch kaim vorsam gelim... Bhurgim mhojim zalim vhodd, romlim aplea somvsara gelim pois digontora.. Bhurgea ballamnim tanchem, ghor gelem bhorun hamv mat kaddttam dis, yadi tancheo kaddhun.. Jinnechea sanjvellar, raulam atam polloit vatt yom' ken'na yetlo? vhorpak tukam ailam, chol, yo mhonnttolo.. Vatt tachi polloit raulam, darar laun nodor ken'nai ailo vhorunk tori, koslich na addkholl monak mhojea zatat bhas, yom' darar aila punn bhurgeam vorich ghoddye mhaka, to legit visrola.. To legit visrola... ** - Sunetra Jog.** [Zoner, 2020]

	Sunetra Jog: Podyut'tor (M.A.) xikop zoddpi bai sunetra zog, BSNL somstheant kam' korn volyunttori rittairdd‌mentt ghetlam. Konknni toxench moratthint tinnem khub vaur kela ani korun asa. Hinnem ’ajiek vachunk xikoilem ani her kann‌yo (- sudha murti)’ torzonn kela, toxench dixtt naschea bhurgeank somzunchea 'Braille' bhaxent torzonn kela. Hea bukak goyam konknni okaddemicho pursokar, toxench konknni kola ani somsokriticho pursokar labhla. ’zanntelo ani tacho devo’, ’hamvem dud piemvchem soddlem tea disa’, ’sorgache vatter kitem tori ghoddlem’, ’xennil'lea deullache rohsy’, he sorv sudha murtiche buk konknnent torzonn keleat. Toxench ’ddis‌orddoroli vumon (malti ravo)’ buk sahit okaddemin porgott kela.
[कविता] जिणेची सांज (- सुनेत्रा जोग)
असतुरेचें जिवीत म्हळ्यार एका वातिपरिंच. फकत अपल्या जिवाक झळंवचें आनी अखेर परयांत उजवाड दिंवचें. हांगासर मरण घेवन आयिल्ल्या यमक सयत अपल्या भुरग्यांची जतनाचीं निबां दिवून एक असतुरी जियेता. आनी अखेरीक तिंच भुरगीं तिका एक्सुरीच सांडून वेताना ती एक्सुरी, नित्राणी आनी असकत जावन तेच यमक राकून उरता पूण तो यम सयत मरण घेवन येना. भोव सोंपी काणी म्हळ्ळेपरीं दिसची ही कविता कांय काणियो सांगून वेता. बाय सुनेत्रा जोगाच्यो कविता वेगळोच अनभव हाडून दिता. त्या अनभवाक भगुंक वाचप्या, आतां तुकाच उलो दितां. सं.
[कविता] जिणेची सांज (- सुनेत्रा जोग)
जिणेची सांज एक दीस कोणेंतरी दारार म्हज्या मारलें दार उगडून पळय जाल्यार दारात यम उबो म्हणूंक लागलो, चल तुका व्हरपाक आयलां म्हाका कल्ल जालें.. आतांच रे, देवा? हांवें म्हणलें.. भुरगीं म्हजीं आसात ल्हान, मातशीं तरीं व्हड जावं तांकां सोडून कशें येवं? ताका म्हजी काकूट आयली घडये, बरें तर, मागीर येतां, अशें म्हणून तो गेलो.. जीवाक म्हज्या सू जालें.. कांय वर्सांनी तिनसांजचें, परत एकदां वाजलें दार उगडून भायर पळय जाल्यार, परत यम उबो दारार येता न्ही आयज तूं? प्रस्न ताणें केलो आरे देवा, कितें सांगूं? आवरो म्हजो उडलो.. हे फावटूय सोड म्हाका, भुरग्यांक म्हजी गरज आसा मातशीं मार्गाक लागूं तीं, मागीर केन्नाय व्हर म्हाका.. बरें तर, मागीर येतां, मानून घेतां तुजें उतर परत वचपाक गेलो यम, म्हाका वांगडा घेतले बगर अशींच कांय वर्सां गेलीं... भुरगीं म्हजीं जालीं व्हड, रमलीं आपल्या संवसारा गेलीं पयस दिगंतरा.. भुरग्या बाळांनीं तांचें, घर गेलें भरून हांव मात काडटां दीस, यादी तांच्यो काढून.. जिणेच्या सांजवेळार, रावलां आतां पळयत वाट यम केन्ना येतलो? व्हरपाक तुकां आयलां, चल, यो म्हणटलो.. वाट ताची पळयत रावलां, दारार लावन नदर केन्नाय आयलो व्हरूंक तरी, कसलीच ना आडखळ मनाक म्हज्या जातात भास, यम दारार आयला पूण भुरग्यां वरीच घडये म्हाका, तो लेगीत विसरला.. तो लेगीत विसरला... **** - सुनेत्रा जोग.** [जनेर, २०२०]

	सुनेत्रा जोग: पद्युत्तर (M.A.) शिकप जोडपी बाय सुनेत्रा जोग, BSNL संस्थ्यांत काम कर्न वोल्युंटरी रिटायर्ड‌मेंट घेतलां. कोंकणी तशेंच मराठिंत तिणें खूब वावर केला आनी करून आसा. हिणें ’आजियेक वाचुंक शिकयलें आनी हेर काण‌यो (- सुधा मूर्ती)’ तर्जण केला, तशेंच दीश्ट नासच्या भुर्ग्यांक समजुंच्या 'Braille' भाशेंत तर्जण केला. ह्या बुकाक गोयां कोंकणी अकाडेमिचो पुरसकार, तशेंच कोंकणी कला आनी संसकृतिचो पुरसकार लाभला. ’जाणतेलो आनी ताचो देव’, ’हांवें दूद पियेंवचें सोडलें त्या दिसा’, ’सर्गाचे वाटेर कितें तरी घडलें’, ’शेणिल्ल्या देवळाचे रहस्य’, हे सर्व सुधा मूर्तिचे बूक कोंकणेंत तर्जण केल्यात. तशेंच ’डीस‌ओर्डरली वुमन (मालती राव)’ बूक साहीत अकाडेमीन पर्गट केला.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.