[ಕವಿತಾ] ಹುಸ್ಕೊ (- ಅತಿಶಾ ಸುರ್ಲೀಕಾರ್)

ಹುಸ್ಕೊ

ಬಂದ್ಖಣೀತಲಿ ಜೀಣ್ ಕಿರಾ
ಆತಾ ಕಳುನ್ ಆಯ್ಲಿ
ಸ್ವತಾ ಬಂದ್ಖಣ್ ಭೊಗ್ತನಾ
ತಳ್ಮಳ್ ತುಜಿ ಸಮ್ಜಲಿ..

ಕೆಲ್ಲ್ಯಾ ಮಾಪಾನ್ ಭರ್ತಲಿ
ಬಿರ್ಮುತ್ ರೆ ಕಿರಾ ಫುಟ್ಟಲಿ
ಕಾಮ್ ಧಂದೊ ಸೊಡೂನ್
ಸಗ್ಳಿ ಘರಾ ಬಸ್ತಲಿ ..

ಶಿರಾಪ್ ತೆ ಸೈಮಾಚೆ
ಲಾಗ್ಲೆ ಬೆಭಾನ್ ಮನ್ಶಾಕ್ ರೆ
ಸೈಮ್ ಮೆಕ್ಳೊ ಸ್ವಾಸ್ ಘೆತಾ
ಆಮಿ ಭೊಗ್ತಾ ಬಂದ್ಖಣ್ ರೆ..

ಪಳೊವ್ ನಜೊ ಕ್ವೊರೆಂಟಾಇನ್ ಜೀಣ್
ಹಾಸತ್ ಖೆಳತ್ ಸಾರ್ತಾ ಖೀಂಣ್
ಹುಸ್ಕ್ಯಾ ಮೆಕ್ಳೊ ಜಾವ್ನಾ ಆಜುನ್
ದಗ್ ದಗ್ ಪೊಟಾನ್ ಬಸ್ಲಾ ಫುಗೂನ್...

ದಿಸವ್ಡ್ಯಾಚೆರ್ ಭಾಗಯ್ತಾಲೊ
ಜೆವ್ಣಾಂ ಖಾಣಾಂಚೊ ಶೀಣ್
ಫಾರೀಕ್ ಕಶೆ ಜಾತ್ಲೆ?
ಬುಡ್ಡೀಲ್ಲೆ ತೆ ರೀಣ್....

ರಾಂಧ್ಲಿ ಪೆಜ್, ಭಾಜ್ಲೆಂ ಖಾರೆಂ
ದೊಂಗರ್ ಪೊರ್ಸಾಂತಲೆ ಹಾಡ್ಲೆ ವಜೆಂ
ಕೊಣೆ ಶಿವ್ರಾಕ್ ತರ್
ಕೊಣೆಂ ಸುರ್ಬುಸ್ ಖಾಲೆಂ ನುಸ್ತೆಂ...

ಕಿತ್ಲೆ ದೀಸ್ ಅಶೆ ಚಲ್ತಲೆಂ?
ಹುಸ್ಕಯಾಚೆ ದೀಸ್ ಕೆನ್ನಾ ಸೊಪ್ತಲೆ?
ಘರಾಂತ್ ಬಸುನ್ ಕಶೆ ಕಾಯ್
ಸಂವ್ಸಾರ್ ಗಾಡೆ ಚಲ್ತಲೆ?

ಪಯ್ಸೊ ಆಡ್ಕೊ ಸೊಪ್ಪಾಕ್ ಪಾವ್ಲೊ
ಪಾವ್ಸ್ ಮಾಥ್ಯಾರ್ ತೆಕತ್ ಆಯ್ಲೊ
ಪುರೂಮೆತಾಂಚೊ ವೆಪಾರ್ ದೆವಾ
ಘರಾಂತ್, ಆಂಗ್ಣಾತ್ ಕುಸ್ಪಾಕ್ ಲಾಗ್ಲೊ...

ಸುಖ್ರುಪ್ ಉರ್ಚೊ ಘರಾಬೊ ಆಮ್ಚೊ
ಗರೀಬಾಂಚೊ ಮಾತ್ ಹುಸ್ಕೊ ವೆಗ್ಳೊ
ಲೊಕ್ಡಾವನ್ ಜರ್ ಸೊಪ್ಲೊ ನಾ ಬೆಗೀನ್
ಪಾತೀಶೆರ್ ಜಾತ್ಲೊ ಭಾವ್ - ಭಯ್ಣ್ ಸಗ್ಳೊ....

ಅರೀಶ್ಟಾಂಕ್ ತೊಂಡ್ ದೀತ್
ವಾಜಯ್ಲ್ಯೊ ತಾಟ್ - ಥಾಲ್ಯೊ
ಅದಿ - ಮದಿ ಪೆಟೀತ್ ತಾಳ್ಯೊ
ಗೊ ಕೊರೊ ನಾಚ್ಯೊ ಗಾಯ್ಲ್ಯೊ ಹೊವ್ಯೊ...

ಲೊಕ್ಡಾವನಾಚ್ಯಾ ಕಾಳಾರ್
ಖರೆಂ - ಖೊಟೆಂ ಆಯ್ಲೆ ಮುಖಾರ್
ಇಲೆಸಾವಾಂಕ್ ಸೊಪೂತ್ ಘೆವ್ಪಿ
ದಿಲ್ಲ್ಯಾ ಉತ್ರಾಕ್ ಗೆಲೆ ನೆಗಾರ್ ....

ಸಾಖರ್, ಪಾಲೊ, ತಾಂದ್ಳಾ ಗೊಟೊ
ಕಾಟ್ಯಾ ಖುಟ್ಯಾತ್ಲ್ಯಾನ್ ಆಮಿ ಹಾಡ್ಲೊ ಖರೊ
ಖಂಯ್ ರೆ ಗೆಲೊ ಗಾಂವ್ಚೊ ಧನಿ?
ದಿವ್ಚೆ ಸೊಡೂನ್ ಪೆಜ್ - ಪಾಣಿ

ಇಲೆಸಾಂವಾಚೆ ಇಜ್ಮೊಲ್ ಮಾಗೀತ್
ಭೌವ್ಲೊ ತುಂ ರಾತ್ - ದೀಸ್
ಗರಜ್ ತುಜಿ ಆಸ್ತನಾ
ಕಿದ್ಯಾಕ್ ಲಿಪ್ಲೊ ದಾರಾ ಖಾಚೀಕ್?

ಮನಾಂತ್ ಘೊಳ್ಟಾ ಎಕುಚ್ ವಿಚಾರ್
ಆತಾ ಕಿದೆ ಜಾತ್ಲೆ ಮುಖಾರ್?
ಕೊರೊನಾಚೊ ಖೆತ್ರಿ ತಿಠ್ಯಾರ್
ಕೌಲ್ ಆಮಿ ಘೆಯ್ನಾಜಾಲ್ಯಾರ್
ಬೆತ್ಕಾಡಯೊ ಪಡಟ್ಲ್ಯೊ ಹಾತಿ ಪಾಯಾರ್...

ವಿಚಾರಾಂಚೆ ಚಕ್ರ್ ಹೆ ಥಾಂಬ್ನಾ
ಕಿದೆ ಕರ್ಚೆ ಆಜೂನ್ ಕಳ್ನಾ
ಕೊರೊನಾಚೆ ಚಕ್ರವ್ಯುಹ್ ಮೊಡ್ನಾ
ಘರಾ ಆಮಿ ಬಸ್ಲ್ಯಾ ಶಿವಾಯ್
ಪರ್ಯಾಯ್ ದುಸ್ರೊ ಸುಚ್ನಾ....

ಭೊಗ್ಶಿ ದೆವಾ, ಭೊಗ್ಶಿ ಆಮಂಕಾ
ಮಾಗ್ತಾ ಭೊಗ್ಸಣ್ ಭುರ್ಗಿಂ ತುಜಿ
ಆತಾ ಆನೀಕ್ ಸೊಸ್ನಾ
ಹುಸ್ಕ್ಯಾನ್ ಭರ್ಲೆಲಿ ಜೀಣ್ ಆಮ್ಚಿ.....

 ******

- ಅತಿಶಾ ಸುರ್ಲೀಕಾರ್. [ಎಪ್ರಿಲ್, 2020]

[kovita] Husko (- Atisha Surlikar)

Husko

bondkhonnitoli jinn kira
ata kollun aili
svota bondkhonn bhogtona
tollmoll tuji somzoli..

Kel'lea mapan bhortoli
birmut re kira futt'ttoli
kam' dhondo soddun
soglli ghora bostoli ..

Xirap te soimache
lagle bebhan monxak re
soim' mekllo svas gheta
ami bhogta bondkhonn re..

Pollovo nozo kvorenttain jinn
hasot khellot sarta khimnn
huskea mekllo zauna azun
dog dog pottan bosla fugun...

Disouddeacher bhagoitalo
jeunnam khannancho xinn
farik koxe zatle?
budd'ddil'le te rinn....

Randhli pez, bhajlem kharem
dongor porsantole haddle vojem
konne xivrak tor
konnem surbus khalem nustem...

Kitle dis oxe choltolem?
huskoyache dis ken'na soptole?
ghorant bosun koxe kai
somvsar gadde choltole?

poiso addko soppak paulo
paus mathear tekot ailo
purumetancho vepar deva
ghorant, angnnat kuspak laglo...

Sukhrup urcho ghorabo amcho
goribancho mat husko vegllo
lokddaun zor soplo na begin
patixer zatlo bhavo - bhoinn sogllo....

Orixttank tondd dit
vazoileo tatt - thaleo
odi - modi pettit talleo
go koro nacheo gaileo hoveo...

Lokddaunachea kallar
khorem - khottem aile mukhar
ilesavank soput gheupi
dil'lea utrak gele negar ....

Sakhor, palo, tandlla gotto
kattea khutteatlean ami haddlo khoro
khoim re gelo gamvcho dhoni?
divche soddun pez - panni

ilesamvache ijmol magit
bhouvlo tum rat - dis
goroz tuji astona
kideak liplo dara khachik?

monant gholltta ekuch vichar
ata kide zatle mukhar?
koronacho khetri titthear
koul ami gheynazalear
betkaddoyo poddottleo hati payar...

Vicharanche chokr he thambna
kide korche azun kollna
koronache chokrouyuh moddna
ghora ami boslea xivai
poryai dusro suchna....

Bhogxi deva, bhogxi amonka
magta bhogsonn bhurgim tuji
ata anik sosna
huskean bhorleli jinn amchi.....

******

- Atisha Surlikar. [April, 2020]

[कविता] हुसको (- अतिशा सुर्लीकार)

मनीस अपणाक मरण‌च ना म्हळ्ळें चिंतनांनी धांवणेर आसलो. कोणाचीच व कसल्याचीच फिकीर नासताना अपूण‌च वर्तो म्हणून धर्तेक मुटिंब धरून चंद्र तारांक सयत अपले ताबेंत धरुंक चिंतून आसतानांच एक ल्हान वयरसान, ज्यें कोणाक‌च दिसानासचें वयरस, अख्ख्या संसाराक आज इतल्या भिरांतिचे दीस दीवंक पावलें म्हळ्यार दरेक मनीस अपल्याच घरांत बंधी जाताना अपणाथावन विवीध रितिच्या बंधखणेक दिल्ल्यो यादी काडून सारुंक पडचें कितलें वीपऱ्यास न्हय?

बाय आतिशा सुरलीकार वृत्तेन एक शिक्षकी देकून हिच्या कवितेचें लिसांव समेसतांक गमतेलें म्हळ्ळो म्हजो भर्वसो.

- सं

[कविता] हुसको (- अतिशा सुर्लीकार)

हुसको

बंदखणीतली जीण किरा
आता कळुन आयली
स्वता बंदखण भोगतना
तळमळ तुजी समजली..

केल्ल्या मापान भरतली
बिरमुत रे किरा फुट्टली
काम धंदो सोडून
सगळी घरा बसतली ..

शिराप ते सैमाचे
लागले बेभान मनशाक रे
सैम मेकळो स्वास घेता
आमी भोगता बंदखण रे..

पळोव नजो क्वॉरेंटाइन जीण
हासत खेळत सारता खींण
हुसक्या मेकळो जावना आजुन
दग दग पोटान बसला फुगून...

दिसवड्याचेर भागयतालो
जेवणां खाणांचो शीण
फारीक कशे जातले?
बुड्डील्ले ते रीण....

रांधली पेज, भाजलें खारें
दोंगर पोरसांतले हाडले वजें
कोणे शिवराक तर
कोणें सुरबुस खालें नुस्तें...

कितले दीस अशे चलतलें?
हुसकयाचे दीस केन्ना सोपतले?
घरांत बसुन कशे काय
संवसार गाडे चलतले?

पयसो आडको सोपपाक पावलो
पावस माथ्यार तेकत आयलो
पुरूमेतांचो वेपार देवा
घरांत, आंगणात कुसपाक लागलो...

सुखरुप उरचो घराबो आमचो
गरीबांचो मात हुस्को वेगळो
लॉकडावन जर सोपलो ना बेगीन
पातीशेर जातलो भाव - भयण सगळो....

अरीश्टांक तोंड दीत
वाजयल्यो ताट - थालयो
अदी - मदी पेटीत ताळयो
गो कोरो नाच्यो गायल्यो होवयो...

लॉकडावनाच्या काळार
खरें - खोटें आयले मुखार
इलेसावांक सोपूत घेवपी
दिल्ल्या उतराक गेले नेगार ....

साखर, पालो, तांदळा गोटो
काट्या खुट्यातल्यान आमी हाडलो खरो
खंय रे गेलो गांवचो धनी?
दिवचे सोडून पेज - पाणी

इलेसांवाचे इजमोल मागीत
भौवलो तूं रात - दीस
गरज तुजी आसतना
किद्याक लिपलो दारा खाचीक?

मनांत घोळटा एकुच विचार
आता किदे जातले मुखार?
कोरोनाचो खेत्री तिठ्यार
कौल आमी घेयनाजाल्यार
बेतकाडयो पडटल्यो हाती पायार...

विचारांचे चक्र हे थांबना
किदे करचे आजून कळना
कोरोनाचे चक्रव्युह मोडना
घरा आमी बसल्या शिवाय
पर्याय दुसरो सुचना....

भोगशी देवा, भोगशी आमंका
मागता भोगसण भुरगीं तुजी
आता आनीक सोसना
हुसक्यान भरलेली जीण आमची.....

******

- अतिशा सुर्लीकार. [एपरील, २०२०]

ದಾಯ್ಜ್.ಕೊಮ್