[ಕವಿತಾ] ಕೊಲಾಜ್ ಎಕಾ ಮ್ಹಾನಗರಾಚೆಂ (- ಶಯ್ಲೇಂದ್ರ ಮೆಹ್ತಾ)

ಕೊಲಾಜ್ ಎಕಾ ಮ್ಹಾನಗರಾಚೆಂ

ಹ್ಯಾ ಮ್ಹಾನಗರಾಂತಲೆ ರಸ್ತೆ
ಭರುನ್ ವ್ಹಾಂವ್ತನಾ ದಿಸ್ರಾತ್
ವಾಹ್ನಾಂಚ್ಯಾ ಲೊಟಾಂತ್
ನಾಗ್ಡ್ಯಾಉಘ್ಡ್ಯಾ ಪೊರಾಂಚ್ಯಾ
ಕುಡೀವ್ಯ್ಲ್ಯಾ ಚಿಖ್ಲಾಚೆ ಥರ್
ವಾಡತ್ ವತಾತ್
ಗಟಾರಾಂತ್ಲ್ಯಾ ಮಾನ್ಸೂನ್ ತಳ್ಯಾಂನಿ
ಜಾತಾಯ್ ವರ್ಸಾನವ್ರ್ಸ್ ವಿಸ್ರ್ಜನ್
ಬ್ಯಾಕ್ಟೆರಿಯಾಂಚಿ ಅದ್ಲಾಬದಲ್ ಕರೀತ್
ಮೊರ್ಯಾ ಮೊರ್ಯಾಚ್ಯಾ ಸುರ್ತಾಲಾರ್

ಭೂಕೆಚೆ ಇಂಡೆಕ್ಸ್ ಛಾಪಿಲ್ಯಾ
ಖಬ್ರೆಪತ್ರಾಂಚಿಂ ಸುಟಾವಿಂ ಪಾನಾಂ
ದುಸ್ರೆವಟೆನ್ ಆಶಿಲ್ಲ್ಯಾ
ನವ್ಯಾ ಪ್ರೆಷಿತಾಚೊ ಫೊಟೊ ಲಿಪೊವ್ನ್
ಗುಠ್ಲಾಯತಾತ್ ಬಾಳ್ಕಾಂಚೆ,
ಪೊಸ್ಕ್ಯಾ ಸುಣ್ಯಾಂಚೆ ‘ಪ್ರಸಾದ್’
ವತಾತ್ ವ್ಹಾವನ್ ವಾದ್ರ್ಯೊ ಜಾಲ್ಯಾ
ಕಾಗ್ದಿ ವಾಫೊರಾಂಚ್ಯಾ ಝೆತಾನ್
ರದ್ದಿ ಕರುನ್ ಭೌಶೀಕ್ ಯಾದೀಂಚಿ

ಚೌಕಾಚೌಕಾಂನಿ ಹೊರ್ಡಿಂಗಾಂಚೆ
ಪಾನಾಂವಿರಯತ್ ಝಾಂಡಾಂಚೆ ಸಾಂಗಾಡೆ
ರಾತೀಚ್ಯಾ ಕಾಳ್ಖಾಂತ್ ಲೆಗೀತ್
ವಿಂಗ್ಡವಿಂಗಡ್ ರುಪ್ಡ್ಯಾಂತಲ್ಯಾ ರಾಖ್ಣದಾರಾಂಚೆರ್
ಊಜ್ವಾಡಾಚಿಂ ಫುಲಾಂ ಫಾಫ್ಡಿತ್
ಊಬೆ ಮಖ್ಖ್ , ಸ್ಥಿತ್ಪ್ರಜ್ಞ್
ಎಕೂಚ್ ಘೊಶ್ಣಾ ರಂಗಯ್ಲ್ಲೆ
‘ಅಪ್ನಾ ಕಾಮ್ ಬನ್ತಾ
ಭಾಡ್ ಮೆಂ ಗಯಿ ಜನ್ತಾ’

ಪ್ರದುಶೀತ್ ಹವೆಚಿ ಕಾಗಾಳ್ ಕರೀತ್
ಎಅರ್ ಕಂಡಿಶ್ನ್ಡ್ ಗಾಡ್ಯಾಂನಿ
ಪೆಟ್ರೊಲಾಚೊ ಫೊಗ್ ಪೆಟಯ್ತ್
ಸಂಸ್ಕೃತಾಯೆಚೆ ಬೊನ್ಸಾಯ್
ಭೊಂವ್ತಾತ್ ಹುಮ್ರೆ ಝರಯ್ತ್
ಹಾರ್ಶೆಮಹಾಲಾಂಚೆ
ಚಂದ್ರಿಮಾವಯ್ಲ್ಯಾ ಭವಿಶ್ಯಾಂತ್ಲ್ಯಾ
ಕೊಲ್ನೀಂಚೆ ಡಿಝಾಯ್ನ್
ತಯಾರ್ ಕರ್ಪಾಚ್ಯಾ ಹಾವೆಸಾನ್

ಊಕ್ತಿಂ ವ್ಹಾಂವ್ತಿಂ ಚವ್ನಾಂ ವಾಡತ್ ರಾವ್ತಾತ್
ಅಸ್ಮಾನ್ ಉದ್ರಗತೀಚ್ಯಾ ನೆಮಾಪ್ರಮಾಣ್
ಜಾಯ್ನಾ ಸಂಸ್ರ್ಗಬಾದಾ ತಾಂಚಿ
ಸನ್ ಸ್ಕ್ರೀನ್ ಕ್ರಿಮ್ ಲೆಪ್ಡಾಯ್ಲ್ಲ್ಯಾ
ದಿಸ್ಭರ್ ಶೊ ಕೆಸೀಂತ್ ಝೆಮತ್ಲ್ಯಾ
ಆನಿ ರಾತೀಕಡೆಂ
ಸೆಕ್ಸ್ ಟೊಯ್ ಜಾಲ್ಲ್ಯಾ ಬಾವ್ಲ್ಯಾಂಕ್
ಕೊರ್ದ್ ಸೊಂಪ್ಸರ್ ನಾಚ್ತನಾ
ಬಡ್ಬಡತ್ ರಾವ್ತಾತ್ ತ್ಯೊ ಎಕೂಚ್ ಮಂತ್ರ್
‘ಜಿತ್ನಿ ಚಾಬಿ ಭರಿ ರಾಮ್ ನೆ
ಊತ್ನಾ ಚಲೆ ಖಿಲೊನಾ’

ಜಂಯ್ ಪಾವ್ನಾ
ರಸ್ತ್ಯಾಂವಯ್ಲ್ಯಾ ಲಾಯ್ಟೀಂಚೊ ಉಜ್ವಾಡ್
ಆನಿ ಮಹಾನಗರಪಾಲಿಕೆಚ್ಯೊ ಕೊಯ್ರಾಚ್ಯೊ ಗಾಡ್ಯೊ
ಅಶಾ ಕಾಳ್ಖ್ಯಾ ಘಾಣೀಚ್ಯಾ ಸಾಮ್ರಾಜ್ಯಾಂತ್
ದರ್ ದಿಸಾ ಜಾತಾತ್ ಬಸ್ಕಾ, ಸಭಾ ಆನಿ ಚರ್ಚಾಸ್ತ್ರಾಂ
ಪಳಯ್ತ್ ಹಾತಾಂತ್ಲ್ಯಾ ಮೊಬಾಯ್ಲಾಂಚೆರ್ ಪೊರ್ನ್ ಚಿತ್ರಫೀತಾಂ
ಧವೆ ಪಾವ್ಡರೀಚ್ಯಾ ಆದಾರಾನ್
ದಾಮೂನ್ ದವ್ರಪ್ ಸೊಪೆಂ ಕಾಯ್ ಕಠೀಣ್
ಆಪ್ಲ್ಯೊ ಬಂಡ್ಖೊರ್ ವಾಸ್ನಾ
ಹಾಚೆರ್ ಮಾತ್ ಜಾಯ್ನಾ ಕಶೆಂಚ್ ಎಕ್ಮತ್
ತ್ಯಾಚ್ ಗುಣ್ಸೂತ್ರಾಂಚ್ಯೊ ತುಟತ್ ವಚ್ಪಿ ಸರಪ್ಳ್ಯೊ
'ಯೆಡಾ ಬನ್ಕೆ ಪೆಡಾ ಖಾಊಂಗಾ' ಚಿಂ ಸಪ್ನಾಂ ಪಳಯ್ತ್
ತಡ್ಫಡೂನ್ ಪಾವ್ತಾತ್
ಶಾರಾಚ್ಯಾ ಶೀಮೆವ್ಯ್ಲ್ಯಾ ಮಸ್ಣಭುಂಯೆರ್
ಮಡ್ಯಾ ಗಾಡ್ಯಾಂನಿ ನಿಮಾಣಿ ಭೊಂವಂಡಿ ಮಾರೂನ್

ಲೊಕ್ಸಂಖ್ಯಾ ನಿಯಂತ್ರಣಾಚ್ಯಾ ನಾಂವಾನ್
ವಜಾ ಜಾಯ್ತ್ ವತಾತ್ ವೆವ್ಸ್ಥೆಂತಲೆ ಕುಸ್ಕೆ ಬಟಾಟೆ
ಬೆರ್ಜೆಚ್ಯಾ ರಾಜ್ಕಾರಣಾಕ್ ಚಡ್ಟಾ ನವೊ ರಂಗ್
ನವಿಂ ಭಜ್ನಾಂ ಗಾಯ್ತ್ ಉಪಾಶಿ ಗರ್ದಿ ಧುಂದ್
ಘುಡ್ಯಾನಿ ಆನಿ ಬನೆರಾಂನಿ ಸಜಯ್ಲ್ಲ್ಯಾ
ಕೊನ್ಶ್ಯಾ - ಕೊನ್ಶ್ಯಾ ವಯ್ಲ್ಯಾ ಘುಮ್ಟ್ಯಾನಿ
ಕಿರವ್ಟೀಕ್ ಲಾವ್ನ್ ಫಂಡ್ ಪೆಟ್ಯಾಂಚ್ಯೊ ಚಾವ್ಯೊ
ಘುಟ್ಮಳಟಾ ಕಾವ್ಳ್ಯಾನದರೆಚಿ ಫೌಜ್ ಪೊರ್ನಿ

ಹಾಂಸ್ಪಾಚೊ ಗಡ್ಗಡ್ ಸೊಂಪ್ತಾಂ ಸೊಂಪ್ತಾಂ
ಧುಂವ್ರಾಚ್ಯಾ ಕುಪಾಫಾಟಲೊ
ಮುಖಾಮಳ್ ಶೆಣಿಲ್ಲೊ
ಸಂವ್ಕಳೀಚೊ ಪ್ರೆಶಿತ್
ಚಿಲೀಮ್ ಫುಕ್ತಾಂ ಫುಕ್ತಾಂ ಸುಸ್ಕಾರತಾ,
'ಅರೆ ಭಾಯ್, ಚುತಿಯೊಂಕಿ ಬಸ್ತಿ ಮೆಂ
ಗಾಂಡು ಸರ್ದಾರ್ ಹೈ!"

 ******

- ಶಯ್ಲೇಂದ್ರ ಮೆಹ್ತಾ. [ಎಪ್ರಿಲ್, 2020]

[kovita] Collage eka Manogorachem (- Shailendra Mehta)

Collage eka Manogorachem

hea mhangorantole roste
bhorun vhamvtona disrat
vahnanchea lottant
nagddeaughddea poranchea
kuddiuylea chikhlache thor
vaddot votat
gottarantlea mansun tolleamni
zatai vorsanours visrzon
boॕktterianchi odlabodol korit
morea moreachea surtalar

bhukeche inddeks chhapilea
khobraptranchim suttavim panam
dusreutten axil'lea
novea prexitacho fotto lipoun
gutthlaitat ballkanche,
poskea sunneanche ‘prosad’
votat vhaun vadreo zalea
kagdi vaforanchea jhetan
rod'di korun bhouxik yadinchi

choukachoukamni horddinganche
panamviroit zhanddanche sangadde
ratichea kallkhant legit
vingddovingodd rupddeantolea rakhnnodarancher
ujvaddachim fulam fafddit
ube mokhkh , sthitprogone
ekuch ghoxnna rongoil'le
‘opna kam' bonta
bhadd mem goyi zonta’

produxit hovechi kagall korit
eor konddixndd gaddeamni
poॕtrolacho fog pettoit
somskritayeche bonsai
bhomvtat humre zhoroit
harxemohalanche
chondrimauylea bhovixeantlea
kolninche ddizhain
toyar korpachea havesan

uktim vhamvtim chounam vaddot rautat
osman udrogotichea nemapromann
zaina somsrgobada tanchi
son skrin krim' lepddail'lea
disbhor xo kesint jhemotlea
ani ratikoddem
seks ttoi zal'lea bauleank
kord sompsor nachtona
boddboddot rautat teo ekuch montr
‘jitni chabi bhori ram' ne
utna chole khilona’

zom-i pauna
rosteamvoilea laittincho ujvadd
ani mohanogoropalikecheo koiracheo gaddeo
oxa kallkhea ghannichea samrajeant
dor disa zatat boska, sobha ani chorchastram
polloit hatantlea mobailancher porn chitrofitam
dhove pauddorichea adaran
damun dourop sopem kai kotthinn
apleo bonddkhor vasna
hacher mat zaina koxench ekmot
teach gunnsutrancheo tuttot vochpi soroplleo
'yedda bonke pedda khaunga' chim sopnam polloit
toddfoddun pautat
xarachea ximeuylea mosnnobhumyer
moddea gaddeamni nimanni bhomvonddi marun

loksonkhea niyontronnachea namvan
voza zait votat veusthentole kuske bottatte
berjechea rajkaronnak choddtta novo rong
novim bhojnam gait upaxi gordi dhund
ghuddeani ani boneramni sozoil'lea
konxea - konxea voilea ghumtteani
kirouttik laun fondd petteancheo chaveo
ghuttmollotta kaulleanodorechi fouz porni

hamspacho goddgodd somptam somptam
dhumvrachea kupafattolo
mukhamoll xennil'lo
somvkollicho prexit
chilim' fuktam fuktam suskarota,
'ore bhai, chutionki bosti mem
ganddu sordar hoi!"

******

- Shailendra Mehta [April, 2020]

[कविता] कोलाज एका म्हानगराचें (- शयलेंद्र मेहता)

हव्यासी कवी सगळ्यांनी भरून गेल्ल्या आयच्या काळार जिण्ये अनभवाक गाळून, तांतल्या कोडू यादिंक पिळून जेदनां झरयिल्लें आवक नियाळून जेयेताना, ह्या संघर्शांनी गळच्या एकेका थेंबे दुकां सयत कवितेच्यो झरी कश्यो फुटवंक सक्तीत म्हळ्ळें समजुंक ही कविता जरूर वासची. हांतूं एकेक सब्ध आटोम बांबापरीं अपूट सताची कुरूः दिताना उत्रां उत्रांनी इमाजी एकेक काणी सांगून वेतात.

बाब शयलेंद्र मेहता ह्या मुंबय आनी मुंबयच्या एकेका कोनश्यार जियेल्लो आनी पार्किल्लो जागो कवी. धारावी जोपड‌पट्टेंत वसती कर्तेल्या गरीब लोकां पासत खूप वावर करून आयला. मुंबय तसल्या म्हा-शेरांत मनीस म्हळ्ळ्या जिविंक कशें किडे करून अपल्याच फायद्याक घासतात आनी पुसतात म्हळ्ळें लागसिल्यान पळेवन, पार्कून आयिल्लो संवेदन‌शीळ कवी. आनी हें मनशाक किडे कर्चोय मनीस‌च म्हळ्ळें परत सांगची गर्ज ना. बाकिचें सर्व कविताच सांगून वेता. कवितेची एकेक वळ कवितारसिकांच्या आंगाची लोंव उभी कर्ता. आनी हो अनभव करुंक तुकाच उलो दितां.

- सं

[कविता] कोलाज एका म्हानगराचें (- शयलेंद्र मेहता)

कोलाज एका म्हानगराचें

ह्या म्हानगरांतले रस्ते
भरुन व्हांवतना दिसरात
वाहनांच्या लोटांत
नागड्याउघड्या पोरांच्या
कुडीवयल्या चिखलाचे थर
वाडत वतात
गटारांतल्या मान्सून तळ्यांनी
जाताय वर्सानवर्स विसर्जन
बॕक्टेरियांची अदलाबदल करीत
मोरया मोरयाच्या सुरतालार

भूकेचे ईंडेक्स छापिल्या
खबरापत्रांचीं सुटावीं पानां
दुसरेवटेन आशिल्ल्या
नव्या प्रेषिताचो फोटो लिपोवन
गुठलायतात बाळकांचे,
पोसक्या सुण्यांचे ‘प्रसाद’
वतात व्हावन वादर्यो जाल्या
कागदी वाफोरांच्या झेतान
रद्दी करुन भौशीक यादींची

चौकाचौकांनी होर्डिंगांचे
पानांविरयत झांडांचे सांगाडे
रातीच्या काळखांत लेगीत
विंगडविंगड रुपड्यांतल्या राखणदारांचेर
ऊजवाडाचीं फुलां फाफडित
ऊबे मख्ख , स्थितप्रज्ञ
एकूच घोशणा रंगयल्ले
‘अपना काम बन्ता
भाड में गयी जन्ता’

प्रदुशीत हवेची कागाळ करीत
एअर कंडिशन्ड गाडयांनी
पॕत्रॉलाचो फोग पेटयत
संस्कृतायेचे बोन्साय
भोंवतात हुमरे झरयत
हारशेमहालांचे
चंद्रिमावयल्या भविश्यांतल्या
कॉलनींचे डिझायन
तयार करपाच्या हावेसान

ऊक्तीं व्हांवतीं चवनां वाडत रावतात
असमान उदरगतीच्या नेमाप्रमाण
जायना संसर्गबादा तांची
सन स्क्रीन क्रिम लेपडायल्ल्या
दिसभर शो केसींत झेमतल्या
आनी रातीकडें
सेक्स टॉय जाल्ल्या बावल्यांक
कॉर्द सोंपसर नाचतना
बडबडत रावतात त्यो एकूच मंत्र
‘जितनी चाबी भरी राम ने
ऊतना चले खिलोना’

जंय पावना
रस्त्यांवयल्या लायटींचो उजवाड
आनी महानगरपालिकेच्यो कोयराच्यो गाडयो
अशा काळख्या घाणीच्या साम्राज्यांत
दर दिसा जातात बसका, सभा आनी चर्चासत्रां
पळयत हातांतल्या मोबायलांचेर पॉर्न चित्रफीतां
धवे पावडरीच्या आदारान
दामून दवरप सोपें काय कठीण
आपल्यो बंडखोर वासना
हाचेर मात जायना कशेंच एकमत
त्याच गुणसूत्रांच्यो तुटत वचपी सरपळ्यो
'येडा बनके पेडा खाऊंगा' चीं सपनां पळयत
तडफडून पावतात
शाराच्या शीमेवयल्या मसणभुंयेर
मड्या गाडयांनी निमाणी भोंवंडी मारून

लोकसंख्या नियंत्रणाच्या नांवान
वजा जायत वतात वेवस्थेंतले कुसके बटाटे
बेरजेच्या राजकारणाक चडटा नवो रंग
नवीं भजनां गायत उपाशी गर्दी धुंद
घुडयानी आनी बनेरांनी सजयल्ल्या
कोनश्या - कोनश्या वयल्या घुमट्यानी
किरवटीक लावन फंड पेटयांच्यो चावयो
घुटमळटा कावळ्यानदरेची फौज पोरनी

हांसपाचो गडगड सोंपतां सोंपतां
धुंवराच्या कुपाफाटलो
मुखामळ शेणिल्लो
संवकळीचो प्रेशित
चिलीम फुकतां फुकतां सुस्कारता,
'अरे भाय, चुतियोंकी बस्ती में
गांडू सरदार है!"

******

- शयलेंद्र मेहता. [एपरील, २०२०]

ದಾಯ್ಜ್.ಕೊಮ್