ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಭುಂಯ್ ಪುತಾ (- ಮಹೇಶ್ ಗಾಂವ್ಕಾರ್)

ಝಡ್ ರೂಕ್ ಜಾತಾ, ಆನಿ ಫಳಾಂ ದಿತಾ. ಫಳಾಂತ್ಲಿ ಭೀ ಪರತ್ ಖಿರಲತಾ ಆನಿ ಹೆಂ ರೋದ್ ಅಶೆಂಚ್ ಮುಕಾರ್ ಚಲತಾ. ಹೆಂ ಪ್ರಕ್ರುತಿಚೆಂ ನೇಮ್. ಏಕ್ ಆವಯ್ ಆಪಲ್ಯಾ ಭುರಗ್ಯಾಂಕ್ ಜಲ್ಮ್ ದಿತಾ ಆನಿ ತೊ ಭುರಗೊ ಶಿಕುನ್ ವ್ಹಡ್ ಜಾತಾ ಆನಿ ಅಪಲೊ ಗಾಂವ್ ಸೊಡುನ್ ಪರಗಾಂವಾಕ್ ವೆತಾ ಪುಣ್ ಅಪಲೊ ಗಾಂವ್, ಅಪಲಿ ಆವಯ್ ವಿಸರತಾ. ಹಾಂಗಾಸರ್ ಹೆಚ್ ಚಿಂತಪಾಚಿ ಕವಿತಾ ವಾಚುಂಕ್ ಮೆಳತಾ.

ಬಾಬ್ ಮಹೇಶ್ ಗಾಂವಕರಾಚ್ಯಾ ಕವಿತೆಂತ್ ಏಕ್ ಸೊಭಿತ್ ವ್ಹಾಳೊ ಆಸಾ. ದೆಕುನ್ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಮನಾಂತ್ ವೆಗ್-ವೆಗಳಿಂ ಚಿತರಾಂ ಉಭಿಂ ಜಾತಾತ್. ಹಿಂ ಚಿತರಾಂ ತುಂ ಪಳೆಂವ್ಕ್ ತುಕಾಚ್ ಉಲೊ ದಿತಾಂ.

- ಸಂ

[ಕವಿತಾ] ಭುಂಯ್ ಪುತಾ (- ಮಹೇಶ್ ಗಾಂವ್ಕಾರ್)

ಭುಂಯ್ ಪುತಾ ಗಾಂವ್ಚ್ಯಾ ಮ್ಹಜ್ಯಾ ಭುಂಯ್ ಪುತಾ ಸಂಯ್ರಾಣಿ ತುಕಾ ಸಾದಯ್ತಾ ನಾಡೆಪೆನ್ನಾ ತುಜಿ ಪಟಾಂತ್ ಘಾಲುನ್ ಹಾಂಸ್ತ್ಯಾ ಮುಖಾನ್ ತುಕಾ ಯೆವ್ಕಾರತಾ ವ್ಹಟ್ಯೆಂತ್ ತಿಚ್ಯಾ ವಾಡ್ಲೊ ತುಂ ಆಂಗಾ ಖಾಂದಾರ್ ಖೆಳ್ಳೊ ಪಾಖಾಂತ್ ಬಳ್ಗೆ ಭರ್ತಕಚ್ ವಾರ್ಯಾಸಯ್ತ್ ಶಾರಾ ದಿಕೆಕ್ ಉಡ್ಲೊ ವಾರ್ಯಾ ಝತಾರ್ ಉಡ್ಲೊ ತುಂ ಪರ್ತುನ್ ಕೆನ್ನಾ ನಾ ಆಯ್ಲೊ ನಾಳ್ ತುಜಿ ಹ್ಯಾ ಮಾತ್ಯೆಂತಚ್ ಪುರ್ಲ್ಯಾ ತುಕಾ ವಿಸರ್ ಕಸೊ ಪಡ್ಲೊ ಸಾಂಗ್ ವಿಸರ್ ಕಸೊ ಪಡ್ಲೊ ಶಾರಾಂತಲೆ ವಾರೆಂ ನವೆಂ ಭಿನ್ಲೆ ತುಜ್ಯಾ ಆಂಗಾಪಾಂಗಾಕ್ ವಾಯಂಗಣಾತಲಿ ಶೆತಾ ಮೆರ್ ನ್ಹಯ್ ದೆಗೆವ್ಯಲಿ ಆಮುಲ್ಲೆಂ ತೊರಾಂ ಗಠ್ಣಾಂತಲಿ ಗರ್ವಾಂ ವಾಸ್ರಾಂ ನಾಗ್ಡಿ ಉಗ್ಡಿ ಗಾಂವ್ಚಿ ಪೊರಾಂ ಗಾಂವ್ಚಿ ರಿತ್ ಗಾಂವ್ಚಿ ಭಾಸ್ ದಂಗುಲ್ಯಾಂತಲಿ ಚುನ್ನಾ ಕಾಣ್ಣಾಂ ವಿಸ್ರತ್ ಗೆಲೊ ದಿಸಪ್ಟ್ಟಿ ಖಿಣಾ ಖಿಣಾಕ್ ವಿಖಾಳ್ ವಿಚಾರಾಂಚೆ ಆಂಗ್ಲೆ ಘಾಲುನ್ ತುಂ ಥಂಯ್ ಶಾರಾಂತ್ ಜಳ್ಪೆತಾ ಸಂಯ್ರಾಣಿ ತುಜೆರ್ ನಿರ್ಶೆವ್ನ್ ಲೆಗಿತ್ ಭೆಟೆಕ್ ತುಜೆ ಆಶೆತಾ ಹಾಲಿಂಸರಾಕ್ ಪುತಾ ತುಂ ಯೆತ್ಲೊ ದೆಖುನ್ ದವಾನ್ ಭಿಜ್ಜಿಲೆ ವಲೆ ವಾಟೆರ್ ತಣಾನ್ ಭರಿಲ್ಲ್ಯಾ ಪಾಂಚ್ವ್ಯಾ ಮಳಾರ್ ನದರ್ ಮಖುನ್ ತಿ ಬಸ್ತಾ ಉಂಚ್ ಉಂಚೆಲ್ಯಾ ದಂಗುಲ್ಲ್ಯಾಂನಿಂ ಸಾದ್ ತಿಗೆಲೊ ಘುಂತಾ ಪುತಾ ಸಾದ್ ತಿಗೆಲೊ ಘುಂತಾ. **** - ಮಹೇಶ್ ಗಾಂವ್ಕಾರ್**. [ಮಾರ್ಚ್, 2020]

	ಮಹೇಶ್ ಗಾಂವ್ಕಾರ್: ನಾಟಕಾಂ, ಕವಿತಾ ಬರಂವ್ಚೊ ಹೊ ನಟನ್, ನಿರ್ದೇಶನ್ ಕರ್ತಾ ತಶೆಂಚ್ ವಾಜಂತ್ರಾಂ ಸಯ್ತ್ ಖೆಳತಾ. ಹಾಚ್ಯೊ ಮರಾಠಿ ಕವಿತಾ ಸಾಹಿತ್ಯ್ ಯಾತ್ರಿ ಕಲಾ ಪ್ರಕಾಶನ್ ಪುಣೆ ಹಾಂಚ್ಯಾ ಪ್ರೇಮ್ ಸಾಗರ್, ಪ್ರೇಮ್ ಗೃಂಥ್, ಆನಿ ಪೊಯೆಟ್ರಿ, ದ ಮಾಯ್ಲ್ ಸ್ಟೋನ್ ಹ್ಯಾ ಜಮ್ಯಾಂನಿ ಕವಿತಾ ಪರ್ಗಟ್ಲ್ಯಾತ್. 2015 ಇಸ್ವೆಚೊ ಕೊಂಕಣಿ ಭಾಶಾ ಮಂಡಳ್ (ಗೊಂಯ್) ಸಾಹಿತ್ ಪುರಸ್ಕಾರ್ ಜೊಡ್‌ಲ್ಲ್ಯಾ ಹಾಚೆ ’ಫುಲಾ ಪಾಕ್ಳ್ಯೊ’, ’ಯಾದೀಂಚೆ ಉಮಾಳೆ’, ’ಅವ್ಯಕ್ತ್ ಭಾಸ್’ ಯೆದೊಳ್ ಪರ್ಗಟ್‌ಲ್ಲೆ ಬೂಕ್. ’ಕಾಳ್ಖಾತಲೆಂ ಉಲೊ’ ಸದ್ದ್ಯಾಕ್ ಪರ್ಗಟ್ಣೆರ್ ಆಸಾ. ಆಕಾಶ್‌ವಾಣಿ ಪಣ್ಜಿ ಕೇಮ್ದ್ರಾರ್ ತಶೆಂಚ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಶದೆಂತ್ ಕವಿತಾ ಸಾದರ್ ಕೆಲ್ಯಾತ್.
[kovita] Bhumyputa (- Mahesh Gaonkar)
Zhodd ruk zata, ani follam dita. Follantli bhi porot khirolota ani hem rod oxench mukar cholota. Hem prokrutichem nem'. Ek auy apolea bhurogeank zolm' dita ani to bhurogo xikun vhodd zata ani opolo gamv soddun porogamvak veta punn opolo gamv, opoli auy visorota. Hangasor hech chintopachi kovita vachunk mellota. Bab Mahesh Gaonkarachea kovitent ek sobhit vhallo asa. Dekun kovita vachun gel'leporinch monant veg-vegollim chitoram ubhim zatat. Him chitoram tum polleunko tukach ulo ditam. - Som
[kovita] Bhumyputa (- Mahesh Gaonkar)
Bhumyputa gamvchea mhojea bhumyputa soimranni tuka sadoita naddepen'na tuji pottant ghalun hamstea mukhan tuka yeukarota vhottyent tichea vaddlo tum anga khandar khell'llo pakhant bollge bhortokoch vareasoit xara dikek uddlo varea zhotar uddlo tum portun ken'na na ailo nall tuji hea matyentoch purlea tuka visor koso poddlo sang visor koso poddlo xarantole varem novem bhinle tujea angapangak vaingonnatoli xeta mer nhoi degeuyoli amul'lem tora gotthnnantoli gorvam vasram nagddi ugddi gamvchi poram gamvchi rit gamvchi bhas donguleantoli chun'na kann'nnam visrot gelo disoptt'tti khinna khinnak vikhall vicharanche angle ghalun tum thoim xarant zollpeta soimranni tujer nirxeono legit bhettek tuje axeta halimsorak puta tum yetlo dekhun dovan bhijjile vole vatter tonnan bhoril'lea panchvea mollar nodor mokhun ti bosta unch unchelea dongul'leamnim sad tigelo ghumta puta sad tigelo ghumta. **** - Mahesh Gaonkar.** [Mar, 2020]

	Mahesh Gaonkar: Nattokam, kovita boromvcho ho notton, nirdexon korta toxench vazontram soit khellota. Hacheo moratthi kovita sahity yatri kola prokaxon punne hanchea Prem' Sagor, Prem' Grinth, ani Poyettri, 'The Milestone' hea zomeamni kovita porgottleat. 2015 isvecho Konkani Basha Mandal (Gõy) sahit puroskar zodd‌l'lea hache ’*Fula Paklleo’, ’Yadinche umalle’, ’Avyokt bhas’ yedoll porgott‌l'le buk. ’Kallkhantole Ulo*’ sod'deak porgottnner asa. Akax‌vanni ponnji kemdrar toxench okhil bharoti-i konkonni porixodent kovita sador keleat.
[कविता] भुंयपुता (- महेश गांवकार)
झड रूक जाता, आनी फळां दिता. फळांतली भी परत खिरलता आनी हें रोद अशेंच मुकार चलता. हें प्रक्रुतिचें नेम. एक आवय आपल्या भुरग्यांक जल्म दिता आनी तो भुरगो शिकून व्हड जाता आनी अपलो गांव सोडून परगांवाक वेता पूण अपलो गांव, अपली आवय विसरता. हांगासर हेच चिंतपाची कविता वाचुंक मेळता. बाब महेश गांवकराच्या कवितेंत एक सोभीत व्हाळो आसा. देकून कविता वाचून गेल्लेपरिंच मनांत वेग-वेगळीं चितरां उभीं जातात. हीं चितरां तूं पळेवंक तुकाच उलो दितां. - सं
[कविता] भुंयपुता (- महेश गांवकार)
भुंयपुता गांवच्या म्हज्या भुंयपुता सैमराणी तुका सादयता नाडेपेन्ना तुजी पोटांत घालून हांसत्या मुखान तुका येवकारता व्हटयेंत तिच्या वाडलो तूं आंगा खांदार खेळ्ळो पाखांत बळगे भरतकच वार्यासयत शारा दिकेक उडलो वार्या झोतार उडलो तूं परतून केन्ना ना आयलो नाळ तुजी ह्या मातयेंतच पुरल्या तुका विसर कसो पडलो सांग विसर कसो पडलो शारांतले वारें नवें भिनले तुज्या आंगापांगाक वायंगणातली शेता मेर न्हय देगेवयली आमुल्लें तोरा गोठणांतली गोरवां वासरां नागडी उगडी गांवची पोरां गांवची रीत गांवची भास दोंगुल्यांतली चुन्ना काण्णां विसरत गेलो दिसपट्टी खिणा खिणाक विखाळ विचारांचे आंगले घालून तूं थंय शारांत जळपेता सैमराणी तुजेर निर्शेवन लेगीत भेटेक तुजे आशेता हालिंसराक पुता तूं येतलो देखून दवान भिज्जिले वोले वाटेर तणान भरिल्ल्या पांचव्या मळार नदर मोखून ती बसता उंच उंचेल्या दोंगुल्ल्यांनीं साद तिगेलो घुमता पुता साद तिगेलो घुमता. **** - महेश गांवकार.** [मार्च, २०२०]

	महेश गांवकार: नाटकां, कविता बरंवचो हो नटन, निर्देशन कर्ता तशेंच वाजंत्रां सयत खेळता. हाच्यो मराठी कविता साहित्य यात्री कला प्रकाशन पुणे हांच्या प्रेम सागर, प्रेम गृंथ, आनी पोयेट्री, द मायल स्टोन ह्या जम्यांनी कविता पर्गटल्यात. २०१५ इस्वेचो कोंकणी भाशा मंडळ (गोंय) साहीत पुरसकार जोड‌ल्ल्या हाचे ’फुला पाकळ्यो’, ’यादींचे उमाळे’, ’अव्यक्त भास’ येदोळ पर्गट‌ल्ले बूक. ’काळखातलें उलो’ सद्द्याक पर्गटणेर आसा. आकाश‌वाणी पणजी केमद्रार तशेंच अखील भारतीय कोंकणी परिशदेंत कविता सादर केल्यात.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.