ಕೊಂಕ್ಣಿ ಕಾರ್ಯಿಂ

[ಕವಿತಾ] ತೆಂವೂಯ್ ಎಕ್ ಚಲೀಚ್ ! [- ಮನೋಜ್ ನರೇಂದ್ರ ಕಾಮತ್]

ತೆಂವೂಯ್ ಎಕ್ ಚಲೀಚ್!

ಆಪ್ಣಾಕ್ ಮೆಳ್ನಾ
ಮ್ಹೂಣ್ ಎಸೀಡ್ ಮಾರಿಲ್ಲೆಂ
ತೆಂವೂಯ್ ಎಕ್ ಚಲೀಚ್ ಆಸ್ಲೆಂ
ಆವ್ಯ್ಚೆಂ ತೆಂ ಸಪನ್
ಬಾಪಾಯ್ಚೆಂ ಮೊಗಾ ದಾಲನ್ ಆಸ್ಲೆಂ

ಆಯ್ಜ್ ತಾಚೊ ಚೆಹ್ರೊ
ವಳ್ಖೂಂಕ್ ಕಠೀಣ್ ಜಾಲ್ಲೊ
ಸೌಂದ್ರ್ಯ್ ಲಾಶಿಲ್ಲೆಂ
ಕಾಳೀಜ್ ತಳ್ಮಳಿಲ್ಲೆಂ
ಸೊಬೀತ್ ಮುಖಾಮಳ್ ಜಳಿಲ್ಲೊ
ಅವಿಚಾರೀಪಣಾಕ್ ಬಳಿ ಪಡೂನ್

ಆಯ್ಜ್ ಕೊಣಾಕೂಚ್ ತೆಂ ನಾಕಾ ಆಸ್ಲೆಂ
ಪಳಯ್ತ್ಲ್ಯಾಚೆ ನದ್ರೆಕ್ ಚುಕಯ್ತಾಲೆಂ
ನದ್ರೂಯ್ ಮುದ್ದಾಮ್ ಚುಕ್ತಾಲಿ
ಅಚ್ಳಯ್ ಚುಕಿಲ್ಲೆವರಿ
ತೆಂ ಫುಡಾರ್ ಶೆಣೊವ್ನ್ ಬಶಿಲ್ಲೆಂ
ಆತ್ಮವಿಶ್ವಾಸೂಯ್ ವಗ್ಡಾವ್ಲ್ಲೊ

ಕಾಂಯ್ ವರ್ಸಾಂ
ಅಶೀಂಚ್ ಗೆಲಿಂ ಶೆಣೂನ್
ಉಜ್ವಾಡಾನ್ ಲೆಗೀತ್
ಕಾಳೊಖ್ ಸೊಸೂನ್
ವಾತ್ ದಿವ್ಯಾಚಿ ಪೆಟ್ಲೀಚ್ ನಾ
ಸಾಸಾಯ್ ಉಜ್ವಾಡ್ ಜಾಲೊಚ್ ನಾ

ಆಯ್ಜ್ ತಾಂಣೆಂ ನವೊ ಮಾಗ್ ಕಾಡಿಲ್ಲೊ
ಚಿತ್ರಾಂ ರಂಗೊವಂಕ್ ತೆಂ ಶಿಕ್ಲೆಂ
ದಡಿಲ್ಲ್ಯೊ ಭಾವ್ನಾ ಉಕ್ತಾವಂಕ್ ಶಿಕ್ಲೆಂ
ತೆಂ ಚಿತ್ರಾಂಚೊ ಮೊಗ್ ಕರ್ತಾಲೆಂ
ಆಪ್ಲೊ ಮೊಗ್ ಥಂಯ್ ಸೊದ್ತಾಲೆಂ

ತಾಚೊ ಸಮಾಜಾವಯಲೊ ವಿಶ್ವಾಸ್ ಉಡಿಲ್ಲೊ
ಸಮಾಜಾಖಾತೀರ್ ಖೆಳ್ಣೆಂ ಮಾನಿಲ್ಲೆಂ ತೆಂ
ಹಳು ಹಳು ಜಿಯೆವಂಕ್ ಶಿಕ್ಲೆಂ
ವ್ದೆಶ್ ಧಗ್ಧಗಿಲ್ಲೊ ಜಿರೊವಂಕ್ ಶಿಕ್ಲೆಂ
ದೆಖ್ಣೆಂ, ನದ್ರೆಕ್ ಶಿರ್ಕಾವಪಿ
ಸಮಾಜಾಕ್ ದೆಖ್ ದಿವಂಕ್ ಶಿಕ್ಲೆಂ !

ಮರ್ಣಾಂತ್ಲ್ಯಾನ್ ಭಾಯ್ರ್ ಸರೂನ್
ತೆಂ ಜಗೂಕ್ ಸೊದ್ತಾಲೆಂ
ಸಮಾಜಾಚಿ ವಿಚಾರಸರಣಿ
ಬದ್ಲೂಂಕ್ ಸೊದ್ತಾಲೆಂ
ವಿಖಾರ್ ಸೌಂದ್ರ್ಯಾಂತ್ ನಾಶಿಲ್ಲೊ
ವಿಖಾರಿ ನದ್ರೆಂತ್ ನರಾಚ್ಯಾ
ವಿಖಾರ್ ಮಾದೀವಿಶಿಂ ಮಾತಿಲ್ಲೊ
ಎಕ್ ಜೀಣ್ ಸಾಸ್ಣಾಚಿ
ವಿಖಾರಿ ಕರೂನ್
ಸೌಂದ್ರ್ಯಾಚಿ ಸಂಕ್ಲ್ಪನಾ ಬದ್ಲೂನ್

ತೆಂ ಲೊಕಾಂಕ್ ಬದ್ಲೂಂಕ್ ಶಕ್ನಾಸಲೆಂ
ತಾಣೆಂ ಆಪ್ಣಾಕೂಚ್
ಬದ್ಲಪಾಚೊ ಯತ್ನ್ ಕೆಲ್ಲೊ
ದೆಖ್ ದಿವ್ನ್ ಹೆರಾಂಖಾತೀರ್
ಮ್ಹಜೆ, ತುಜೆ, ಸಗ್ಳ್ಯಾಂಖಾತೀರ್

ಹಿ ಮಾನ್ಸೀಕ್ ಕೀಡ್
ಆತಾಂ ತರಿಂ ಸೊಂಪೂಂಕ್ ಜಾಯ್
ವಿಕೃತೀಂತ್ಲ್ಯಾನ್ ಭಾಯ್ರ್ ಸರೂನ್
ಅಸ್ತುರೆಚೆಂ ಮನ್ ಆನಿ ಇಭ್ರತ್
ಜಪ್ಪಾಕ್ ದಾದ್ಲ್ಯಾನ್ ಶಿಕೂಂಕ್ ಜಾಯ್

 ******

- ಮನೋಜ್ ನರೇಂದ್ರ ಕಾಮತ್. [ದಸೆಂಬ್ರ್, 2019]

[kovita] Temvuy ek cholich!! (- Monoz Norendro Kamot)

Temvuy ek cholich!

apnnak mellna
mhunn esidd maril'lem
temvuy ek cholich aslem
auychem tem sopon
bapaichem moga dalon aslem

aiz tacho chehro
vollkhunk kotthinn zal'lo
soundry laxil'lem
kalliz tollmollil'lem
sobit mukhamoll zollil'lo
ovichariponnak bolli poddun

aiz konnakuch tem naka aslem
polloitleache nodrek chukoitalem
nodruy mud'dam' chuktali
ochlloi chukil'leuri
tem fuddar xennoun boxil'lem
atmovixvasuy vogddaul'lo

kaim vorsam
oxinch gelim xennun
ujvaddan legit
kallokh sosun
vat diveachi pettlich na
sasai ujvadd zaloch na

aiz tamnnem novo mag kaddil'lo
chitram rongounk tem xiklem
doddil'leo bhauna uktaunk xiklem
tem chitrancho mog kortalem
aplo mog thoim sodtalem

tacho somazauyolo vixvas uddil'lo
somazakhatir khellnnem manil'lem tem
hollu hollu jieunk xiklem
vdex dhogdhogil'lo jirounk xiklem
dekhnnem, nodrek xirkaupi
somazak dekh divonk xiklem !

mornnantlean bhair sorun
tem zoguk sodtalem
somazachi vicharosoronni
bodlunk sodtalem
vikhar soundreant naxil'lo
vikhari nodrent norachea
vikhar madivixim matil'lo
ek jinn sasnnachi
vikhari korun
soundreachi sonklpona bodlun

tem lokank bodlunk xoknasolem
tannem apnnakuch
bodlopacho yotn kel'lo
dekh divn herankhatir
mhoje, tuje, soglleankhatir

hi mansik kidd
atam torim sompunk zai
vikritintlean bhair sorun
osturechem mon ani ibhrot
zoppak dadlean xikunk zai

******

- Monoz Norendro Kamot. [Dec, 2019]

[कविता] तेंवूय एक चलीच ! [- मनोज नरेंद्र कामत]

एका दादल्याक ह्या संसारांत (भुर्गें जावन येताना) जल्म दिंवची जावनासा बायल. जल्मल्लें एक भुर्गें व्हड जाता अपल्या आवयचें दूद पियेवन. इतलें सर्व जाणासून‌यी आज आमच्या समाजेंत जुलूम चडून आयलां एका असतुरेचेर. जांव ती भयण, बायल, आवय व इश्टीण. मनशापण आसलो मनीस हें लिसांव केदना शिकत? केदना समजत? आनी केदना पाळीत?

अपणाक मेळणा म्हणून एसीड मार‌ल्ली चली सयत कोणाचिकी धूव, भयण जशें अपणाच्यय धुवेचेर, भयणिचेर अशें घडतना आमी कशें भग्तांव म्हळ्ळें चिंतप चिंतुंक सकानासले मनीस खरेंच जावन मनीस म्हणुंक फावो? हेच चिंत्पाभंवारीं विणलली कविता घेवन अयला बाब मनोज कामत. ह्या कवितेंतल्या हेर विचारांचेर आटोव करुंक तुमकांच सोडतां.

- सं

[कविता] तेंवूय एक चलीच ! [- मनोज नरेंद्र कामत]

तेंवूय एक चलीच!

आपणाक मेळना
म्हूण एसीड मारिल्लें
तेंवूय एक चलीच आसलें
आवयचें तें सपन
बापायचें मोगा दालन आसलें

आयज ताचो चेहरो
वळखूंक कठीण जाल्लो
सौंदर्य लाशिल्लें
काळीज तळमळिल्लें
सोबीत मुखामळ जळिल्लो
अविचारीपणाक बळी पडून

आयज कोणाकूच तें नाका आसलें
पळयतल्याचे नदरेक चुकयतालें
नदरूय मुद्दाम चुकताली
अचळय चुकिल्लेवरी
तें फुडार शेणोवन बशिल्लें
आत्मविश्वासूय वगडावल्लो

कांय वर्सां
अशींच गेलीं शेणून
उजवाडान लेगीत
काळोख सोसून
वात दिव्याची पेटलीच ना
सासाय उजवाड जालोच ना

आयज तांणें नवो माग काडिल्लो
चित्रां रंगोवंक तें शिकलें
दडिल्ल्यो भावना उक्तावंक शिकलें
तें चित्रांचो मोग करतालें
आपलो मोग थंय सोदतालें

ताचो समाजावयलो विश्वास उडिल्लो
समाजाखातीर खेळणें मानिल्लें तें
हळू हळू जियेवंक शिकलें
व्देश धगधगिल्लो जिरोवंक शिकलें
देखणें, नदरेक शिरकावपी
समाजाक देख दिवंक शिकलें!

मरणांतल्यान भायर सरून
तें जगूक सोदतालें
समाजाची विचारसरणी
बदलूंक सोदतालें
विखार सौंदर्यांत नाशिल्लो
विखारी नदरेंत नराच्या
विखार मादीविशीं मातिल्लो
एक जीण सासणाची
विखारी करून
सौंदर्याची संकल्पना बदलून

तें लोकांक बदलूंक शकनासलें
ताणें आपणाकूच
बदलपाचो यत्न केल्लो
देख दिवन हेरांखातीर
म्हजे, तुजे, सगळ्यांखातीर

ही मानसीक कीड
आतां तरीं सोंपूंक जाय
विकृतींतल्यान भायर सरून
अस्तुरेचें मन आनी इभ्रत
जपपाक दादल्यान शिकूंक जाय

******

- मनोज नरेंद्र कामत. [दसेंबर, २०१९९]

ದಾಯ್ಜ್.ಕೊಮ್