[ಕವಿತಾ] ರುಂದ್ ಆನಿ ಅಶಿರ್ ದಾರ್ (- ವಿನ್ಸಿ ಕ್ವಾಡ್ರೊಸ್)

ರುಂದ್ ಆನಿ ಅಶಿರ್ ದಾರ್

ಮ್ಹಜ್ಯಾ ತರ್ನ್ಯಾ ಜಿವಿತಾಂತ್
ಆಯುಶ್ಯಾಚಿ ನವಿಚ್ ಕಂರಿ ಫುಲಿ'ಲಿ ತೆದ್ನಾಂ
ಮ್ಹಜ್ಯಾ ದಯ್ವತಾಚೆಂ ದರ್ಶನ್ ಘಡ್ಲೆಂ
ಸಟಿಯೆ ರಾತಿ ಬರಯ್ಲ್ಲಿಯೆ ಪರ್ಮಾಣೆಂ
ಚ್ಯಾರ್ ಅಳಿಂಚೊ ಎಕ್ ಪ್ರವಚೆವ್ನ್ ದಿಲ್ಲೆಂ

ಪುತಾ, ಮ್ಹಜೆ ಕಡೆಂ ಆಸಾತ್ ದನ್ ದಾರಾಂ
ಎಕ್ ರುಂದ್, ದುಡುಗಿರೆಸ್ತ್ಕಾಯೆನ್ ಭರ್ಲಲೆಂ
ಸಂವ್ಸಾರಾಂತ್ಲ್ಯಾ ಸಗ್ಳ್ಯಾ ಸುಖಾಂಚೆಂ
ದುಸ್ರೆಂ ದಾರ್ ಅಶಿರ್, ಅತ್ಮಿಕ್ ಗಿರೆಸ್ತ್ಕಾಯೆಚೆಂ
‘Choice is yours', ಪ್ರವಚೆವ್ನ್ ಸಂಪಯ್ಲ್ಲೆಂ

ಹಾಂವೆಂ ಕೆಲೆಂ ದುರ್ಲಕ್ಶ್ ಪ್ರವಚೆವ್ನ್ಾಚೆರ್
ಚಲತ್ ರಾವ್ಲಂ ರಸ್ತೊ ಸುಖಾಚೊ
ಆವಯ್-ಬಾಪಾಯ್ ಕುಸ್ತಾರ್ಚ್ಯಾ ಫಲ್ಗಾಚೊ
ಮಾಡಯ್ತ್ ಸಂವ್ಸಾರ್ ಚ್ಯಾರ್ ದಿಸಾಂಚೊ
ಆನಂದುಚ್ ಆನಂದ್ ಮೆಳಯ್ತ್ ಜಿವಿತಾಚೊ

ಮ್ಹಜೆಂ ಸರ್ವಸ್ತ್ ಅಂಪ್ಲೆಂ ತ್ಯಾ ರುಂದ್ ದಾರಾಕ್
ಚ್ಯಾರಿತ್ರ್ಯಾಚೆಂ ಮ್ಹಾಕಾ ನಾಸ್ಲೆಂ ಭಾನ್
ಗಿರೆಸ್ತ್ಕಾಯೆಚ್ಯಾ ಪಾಖಾಂನಿ ಉಡತ್
ಮಾರ್ಲೆಂ ಶೆವ್ಟುನ್ ಮನಿಸ್ಪಣ್
ದಾಖಯ್ಲೆಂ ಧನಿಪಣ್, ಥಡೆಂ ದಾದ್ಲೆಪಣ್

ಹಾತ್ ಹಾಲಯ್, ಯೆತಾಲೊ ಸಂವ್ಸಾರ್ ಮ್ಹಜಿಯೆ ಫಾಟ್ಲ್ಯಾನ್
ಸ್ತ್ರೆೆ ಲಿಂಗಾಕ್ ದಿಲೊ ನಾಂ ಕೆದ್ನಾಂಚ್ ರೆಸ್ಪೆತ್
ಸದಾಂಚ್ ಹಾಂವ್ಪಣಾನ್ ಜಿಯೆಲಂ
ಕಿತ್ಯಾಕ್ ಮ್ಹಜೆ ಕಡೆಂ ದಯ್ವತ್ ಆಸ್ಲೆಂ
ರುಂದ್ ದಾರ್ ಆನಿಕ್ ಝಗ್ಝಗ್ಪಾಕ್ ಲಾಗ್ಲೆಂ

ಎಕ್ ದಿಸ್ ಮ್ಹಾಕಾ ಹಲ್ಮಲೆಂ ಜಾಣ್ಟೆಪಣ್
ಬಂಧನ್ ಆಯ್ಲೆಂ ಮ್ಹಜ್ಯಾ ಹಾಲ್ಚಾಲಿಂಚೆರ್
ಸಲ್ಲೊ ದಿವ್ಪಾಕ್ ನಾಂ ಆವಯ್-ಬಾಪಾಯ್, ನಾಂ ಕೊಣ್
ವ್ಹಾಂವನ್ ಗೆಲಿ ಹಾತಾಂತ್ಲಿ ರಾಂಪಣ್
ಕೆಲೆಂ ತಿಜರಿಯೆಚಿ ಚಾವಿಯೆನುಯ್ ಲಚ್ಯಾಣ್

ಘಡ್ಲೆಂ ಪರ್ಥುನ್ ತ್ಯಾಚ್ ದಯ್ವತಾಚೆಂ ದರ್ಶನ್
ತಾಣೆಂ ಆಯ್ಜ್ ಮ್ಹಾಕಾ ದಿಲೆಂ ನಾಂ ಪ್ರವಚೆವ್ನ್
ಪುಣ್ ಆಪಯ್ಲೊ ಭಿತರ್ ಅಶಿರ್ ದಾರಾಂತ್ಲ್ಯಾನ್
ಖುಶಾಲ್ಕಾಯೆನ್ ಕೆಲಿ ತಯಾರಿ ನವ್ಸರ್ಣಿಯೆಚ್ಯಾ ಮನಾನ್
ಜಾಯ್ನಾಂ ಜಾಲೆಂ ಮ್ಹಜೆ ಕಡೆಂ ವಚಂಕ್ ಉಠನ್

ಚಿಂತ್ಲೆಂ, ತಾಚ್ಯಾಚ್ ಹಾತಾಕ್ ಧರುಂಕ್
ಮನ್ ಪಾವ್ತಾಲೆಂ ಪುಣ್ ಹಾತ್ ಕಶ್ಟತಾಲೆ
ಗಿರೆಸ್ತ್ಕಾಯೆಚೊ ಜಾಯ್ನಾಸ್ಲೊ ಕಾಯಂಚ್ ಫಾಯ್ದೊ
ಯೆನಾಸ್ಲೊ ಕೊಣುಚ್ ಮ್ಹಜ್ಯಾ ಆಧಾರಾಕ್
ಸಯ್ರಾಣಾವ್ಿ ನಾಸ್ಲೆಂ ಮ್ಹಜ್ಯಾ ಸಾಂಗಾತಾಕ್

ದಯ್ವತಾನ್ ಅಶಿರ್ ದಾರ್ ಧಾಂಪುಂಕ್ ಸುರು ಕೆಲೆಂ
ಥಡ್ಯಾ ವೆಳಾನ್ ತೆಂ ಬಂದುಯ್ ಜಾಲೆಂ
ತ್ಯಾಚ್ ಖಿಣಾಕ್ ರುಂದ್ ದಾರಾಂತ್ಲ್ಯಾನ್ ಎಕ್ ಕಿಳಾಂಚ್
ಕಾನ್ ಫಡ್ಟಾಲೆ ತರಿ ಥಂಯ್ ಕಣುಚ್ ನಾಸ್ಲೊ
ಅರ್ನತಲ್ಯಾ ಗಳ್ಯಾಂತ್ ಘಾಲುಂಕ್ ಉದ್ಕಾಚೊ ಥೆಂಬಯ್ ನಾಸ್ಲೊ

ಕೊಣಾಕ್ ತರಿ ಆಪವಂಕ್ ಹಾಂವೆಂ ಹಾತ್ ಹಾಲಯ್ಲೊ
ಮ್ಹಜೆಂ ಕೊಣಾಕ್ ಆಯ್ಕಂಕ್ ಯೆನಾಸ್ಲೆಂ
ಆರ್ಡಪಾಚೊ ಯತ್ನ್ ಕರ್ತಾಲಂ ಪುಣ್ ನಿರ್ಫಳ್
ರಗ್ತಾಚೊ ದಾಬ್ ವಾಡ್ಲೊ, ಆಂಗ್ ಶಿರ್ಶಿರ್ಲೆಂ
ಕೊಣಾಚಚ್ ಆಧಾರ್ ನಾಸ್ತಾನಾಂ ಮಾಥೆಂ ಭಿರ್ಭಿರ್ಲೆಂ

ಖುಯಂ ಗೆಲೆಂ ಮ್ಹಜೆಂ ತರ್ನಾಟೆಪಣ್?
ಮ್ಹಜಿಯೆ ಭಿತರ್ಲೆಂ ತೆಜ್ ಆನಿ ಹಾಂವ್ಪಣ್?
ಧನಿಪಣ್ ಆನಿ ತೆಂ ದಯ್ವತ್?
ಬಂದ್ ಕರುನ್ ಅಶಿರ್ ಶಾಸ್ವತ್ ದಾರ್?
ಉಗ್ತೆಂ ಸಡುನ್ ಪಲ್ಕೆಂ ರುಂದ್ ದಾರ್?

 ******

- ವಿನ್ಸಿ ಕ್ವಾಡ್ರೊಸ್. [ಮಾರ್ಚ್, 2020]

[kovita] Rund Ani Oxir Dar (- Vincy Quadros)

Rund ani Oxir Dar

Mhojea tornea jivitant
Ayuxyachi novich komri fuli’li tednam
Mhojea doivotachem dorxon ghoddlem
Sottie rati boroil’lie pormannem
Chear ollincho ek provocheon dil’lem

Puta, mhoje koddem asat don daram
Ek rund, duddu-girestkayen bhorlolem
Sonvsarantlea sogllea sukhanchem
Dusrem dar oxir, otmik girestkayechem
‘Choice is yours’, provocheon sompoil’lem

Hanvem kelem durlokx provocheonacher
Cholot ravlom rosto sukhacho
Avoi-bapai kustarchea folgacho
Maddoit sonvsar chear disancho
Anonduch anond melloit jivitacho

Mhojem sorvost omplem tea rund darak
Chearitreachem mhaka naslem bhan
Girestkayechea pakhamni uddot
Marlem xevttun monisponn
Dakhoilem dhoniponn, thoddem dadleponn

Hat haloi, yetalo sonvsar mhojie fattlean
Stree lingak dilo nam kednanch respet
Sodanch hanvponnan jiyelom
Kiteak mhoje koddem doivot aslem
Rund dar anik zhogzhogpak laglem

Ek dis mhaka holmolem zanntteponn
Bondhon ailem mhojea halchalincher
Sol’lo divpak nam avoi-bapai, nam konn
Vhanvon geli hatantli ramponn
Kelem tizoriechi chavienui locheann

Ghoddlem porthun Teach doivotachem dorxon
Tannem aiz mhaka dilem nam provocheon
Punn apoilo bhitor oxir darantlean
Khuxalkayen keli toyari novsornniechea monan
Zainam zalem mhoje koddem vochonk utthon

Chintlem, tacheach hatak dhorunk
Mon pavtalem punn hat koxttotale
Girestkayecho zainaslo kainch faido
Yenaslo konnuch mhojea adharak
Soirannaui naslem mhojea sangatak

Doivotan oxir dar dhampunk suru kelem
Thoddea vellan tem bondui zalem
Teach khinnak rund darantlean ek killanch
Kan foddttale tori thoim konnuch naslo
Ornotolea golleant ghalunk udkacho themboi naslo

Konnak tori apounk hanvem hat haloilo
Mhojem konnak aikonk yenaslem
Arddopacho yotn kortalom punn nirfoll
Rogtacho dab vaddlo, ang xirxirlem
Konnachoch adhar nastanam mathem bhirbhirlem

Khuim gelem mhojem tornatteponn?
Mhojie bhitorlem tez ani hanvponn?
Dhoniponn ani tem doivot?
Bond korun oxir xasvot dar?
Ugtem soddun polkem rund dar?

******

- Vincy Quadros. [March, 2020]

[कविता] रुंद आनी अशीर दार (- विन्सी क्वाड्रोस)

मनीस ह्या संसारांत जियेतासतां जायतें शिकता. कांय थोडें व्हडिलां थावन, कांय थोडें इसकोलांत, कांय थोडें वाचून तर जायतें स्वताच्या जिवितांत. आनी बरी, जयताची वाट केदनांय अशीर आसता. ह्या कवितेंत सयत एक काणिंच आसा आनी कविता वाचून गेल्लेपरिंच वेवेगळ्यो काण्यो मतिंत उदेतात.

बाब विन्सी क्वाड्रोसाच्यो चडताव कवितेंनी नयतीक मोलां पारकुंक मेळतात. ह्या कवितेंच सयत आसचें असलेंच चिंतप पारकुंक तुका सोडतां.

-संं

[कविता] रुंद आनी अशीर दार (- विन्सी क्वाड्रोस)

रुंद आनी अशीर दार

म्हज्या तर्न्या जिवितांत
आयुश्याची नवीच कंरी फुली'ली तेदनां
म्हज्या दयवताचें दर्शन घडलें
सटिये राती बरयल्लिये पर्माणें
च्यार अळिंचो एक प्रवचेवन दिल्लें

पुता, म्हजे कडें आसात दन दारां
एक रुंद, दुडुगिरेसत्कायेन भरललें
संवसारांतल्या सगळ्या सुखांचें
दुस्रें दार अशीर, अत्मीक गिरेसत्कायेचें
‘चयचे ईस यवर्स', प्रवचेवन संपयल्लें

हांवें केलें दुरलक्ष प्रवचेवन्ाचेर
चलत रावलं रसतो सुखाचो
आवय-बापाय कुसतार्च्या फल्गाचो
माडयत संवसार च्यार दिसांचो
आनंदूच आनंद मेळयत जिविताचो

म्हजें सर्वसत अंपलें त्या रुंद दाराक
च्यारीतऱ्याचें म्हाका नासलें भान
गिरेसत्कायेच्या पाखांनी उडत
मारलें शेवटून मनिस्पण
दाखयलें धनिपण, थडें दादलेपण

हात हालय, येतालो संवसार म्हजिये फाटल्यान
स्त्रेे लिंगाक दिलो नां केदनांच रेस्पेत
सदांच हांवपणान जियेलं
कित्याक म्हजे कडें दयवत आसलें
रुंद दार आनीक झगझगपाक लागलें

एक दीस म्हाका हल्मलें जाणटेपण
बंधन आयलें म्हज्या हाल्चालिंचेर
सल्लो दिवपाक नां आवय-बापाय, नां कोण
व्हांवन गेली हातांतली रांपण
केलें तिजरियेची चावियेनूय लच्याण

घडलें पर्थून त्याच दयवताचें दर्शन
ताणें आयज म्हाका दिलें नां प्रवचेवन
पूण आपयलो भितर अशीर दारांतल्यान
खुशाल्कायेन केली तयारी नवसर्णियेच्या मनान
जायनां जालें म्हजे कडें वचंक उठन

चिंतलें, ताच्याच हाताक धरुंक
मन पावतालें पूण हात कश्टताले
गिरेसत्कायेचो जायनासलो कायंच फायदो
येनासलो कोणूच म्हज्या आधाराक
सयराणाव्ी नासलें म्हज्या सांगाताक

दयवतान अशीर दार धांपुंक सुरू केलें
थड्या वेळान तें बंदूय जालें
त्याच खिणाक रुंद दारांतल्यान एक किळांच
कान फडटाले तरी थंय कोणूच नासलो
अर्नतल्या गळ्यांत घालुंक उदकाचो थेंबय नासलो

कोणाक तरी आपवंक हांवें हात हालयलो
म्हजें कोणाक आयकंक येनासलें
आर्डपाचो यत्न कर्तालं पूण निर्फळ
रग्ताचो दाब वाडलो, आंग शिर्शिरलें
कोणाचच आधार नासतानां माथें भिर्भिरलें

खुयं गेलें म्हजें तर्नाटेपण?
म्हजिये भितरलें तेज आनी हांवपण?
धनिपण आनी तें दयवत?
बंद करून अशीर शास्वत दार?
उग्तें सडून पल्कें रुंद दार?

******

- विन्सी क्वाड्रोस. [मार्च, २०२०]

ದಾಯ್ಜ್.ಕೊಮ್