ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಸಂವ್ಸಾರ್ ಕಸೊ ದಿಸ್ತಾ (- ಆನ್ನಿ ದೆ ಕೊಲ್ವಾಲೆ)

ಅಶೆಂ ಪಳೆಂವ್ಕ್ ಗೆಲ್ಯಾರ್ ಮನಿಸ್ ಮ್ಹಳ್ಳೊಚ್ ವಿಕೃತ್ ಜಾನ್ವಾರ್. ದರೆಕಾಂತ್ ಅಪ್ಲೊ ಫಾಯ್ದೊ ಪಳೆಂವ್ಚೊ. ಹೊಚ್ ಮನಿಸ್ ದೇವ್-ಧರ್ಮ್ ಮ್ಹಣುನ್ ಬೊಬಾಟ್ತಾ. ಪುಣ್ ಅಪಲ್ಯಾ ಸ್ವಾರ್ಥಾಕ್ ಲಾಗುನ್ ಗರ್ಭಾಂತಲ್ಯಾ ಬಾಳಾಚೊ ಜೀವ್ ಸಂಹಾರ್ ಕರತಾ. ಆಮ್ಚ್ಯಾ ದೇಶಾಂತ್ ಅಜೂನ್ ಸಯ್ತ್ ಚಾಲು ಆಸ್ಚ್ಯಾ ಎಕಾ ವಿಕೃತ್ ಮನೋಗತೆಚೆರ್ ಬರೊಚ್ ಕರುನ್ ಆರ್ಸೊ ಧರಲಾ ಬಾಯ್ ಆನ್ನಿ ದೆ ಕೊಲ್ವಾಲೆನ್.

ಹ್ಯಾ ಕವಿತೆಚ್ಯಾ ಎಕೆಕಾ ಕಡ್ವ್ಯಾಂತಲಿ ಕಾಣಿ ಸಮ್ಜುಂಕ್ ತುಕಾಚ್ ಆತಾಂ ಉಲೊ ದಿತಾಂ.

- ಸಂ

[ಕವಿತಾ] ಸಂವ್ಸಾರ್ ಕಸೊ ದಿಸ್ತಾ (- ಆನ್ನಿ ದೆ ಕೊಲ್ವಾಲೆ)

ಸಂವ್ಸಾರ್ ಕಸೊ ದಿಸ್ತಾ ಸಂವ್ಸಾರ್ ಕಸೊ ದಿಸ್ತಾ ಪಳೆವಂಚಿ ಖುಬ್ ಆಸ್ಲಿ ಆಸ್ ಜಲ್ಮಾಕ್ ಹಾಂವ್ ಎವಂಚ್ಯಾ ಆದಿಂಚ್ ಕೆಲೊ ಮ್ಹಜೊ ನಾಸ್ ಮಾಂಯ್ ಸಂವ್ಸಾರ್ ಕಸೊ ದಿಸ್ತಾ ಗೆ ಸನ್ಸಾರ್ ಕಸೊ ದಿಸ್ತಾ? ಕುಸ್ವ್ಯಾಂತ್ ತುಜಿಯಾ ಪಳಯ್ಲ್ಲೊ ಕಾಳಖ್ ಸಂವ್ಸಾರಾಂತ್ಲ್ಯಾ ಉಜ್ವಾಡಾಚಿ ಮೆವ್ಲಿ ನಾಂ ವಳಖ್ ಮಾಂಯ್, ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? ಸಂವ್ಸಾರಾಂತ್ ಎವ್ನ್ ಹಾಂವ್ ಪಾಲೆವಂಕ್ ಸದಿ ಫುಲಂಕ್ ಸದಿ ಕಂರಿ ಮ್ಹಾಕಾ ಫುಟ್ಚೆ ಆದಿಂಚ್ ಕಿರ್ಲೊ'ಲೆ ಬಿ-ಎಚಿಯೊ ಕೆಲ್ಯೊ ಫಡಿ ಮಾಂಯ್ ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? ಮಾಂಯ್ ಮ್ಹಜೊ ಪಾಯ್ ಕಸೊ ದಿಸ್ತಾ ? ಮ್ಹಜೊ ವ್ಹಡ್ಲೊ ಭಾವ್ ಆಮುರ್ಕಚ್ ಹಾನ್ಸ್ತಾ? ತುಂ ಕಸ್ಲಿ ಸಾಡಿ ನ್ಹೆಸ್ತಾ ? ಮಾಂಯ್ ಮ್ಹಾಕಾ ಸಾಂಗ್ ಗೆ ಮಾಂಯ್, ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? ಮ್ಹಾಕಾ ಪಸುಂಕ್ ಜಾಂವ್ಚೆ ನಾಂ ಮ್ಹುಣ್ ಪಾತಕ್ ಆಧಾರ್ಲೆಂ ಜಿವ್ ಘೆವ್ಪಾಚೆಂ ಜಲ್ಮಾನ್ ಹಾಡ್ಲೆಲೆಂ ಜಾಲ್ಯಾರ್ ಹಾಂವ್ ಕಿತೆಂ ಆಸಾ ತೆಂಚ್ ಖಾವ್ಪಾಚೆಂ ತುಜ್ಯಾ ಜಾನ್ಟೆಪಣಾರ್ ಮಾತ್ ಹಾಂವ್ ತುಜೊ ಆಧಾರ್ ಜಾವ್ಪಾಚೆಂ ಪುಣ್ ಭಾಗ್ ಮೆಳಂಕ್ ನಾಂ ಸಂವ್ಸಾರ್ ಪವ್ಪಾಚೆಂ ಮಾಂಯ್ ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? ತುಜ್ಯಾ ಕುಸ್ವ್ಯಾಂತ್ ದತರಾನ್ ಮ್ಹಜಿ ಗಂಟಿ ಕಾತರ್ಲಿ ತೆದ್ನಾ ಮಾಂಯ್ ತುಜೊ ಗಳೊ ಗುಸ್ಮಟಂಕ್ ನಾಂ ಗೆ? ದತರಾನ್ ಮ್ಹಜೆ ಕಾಳ್ಜಾಚಿಯೊ ಶಿರೊ ಕಾತರ್ಲಿಯೊ ತೆದ್ನಾ ತುಜೆ ಕಾಳಿಜ್ ಚಡ್ಫಡಂಕ್ ನಾಂ ಗೆ? ದತರಾನ್ ಮ್ಹಜೆ ಹಾತ್ ಕಾತರ್ಲೆ ತೆದ್ನಾ ತುಜೆ ಹಾತ್ ಕಡ್ಕಡಂಕ್ ನಾಂ ಗೆ ದತರಾನ್ ಮ್ಹಜೆ ದಳೆ ಉಂಬ್ಟಾಯ್ಲೆ ತೆದ್ನಾಯ್ ತುಜ್ಯಾ ದಳ್ಯಾಂತ್ ದುಕ್ ಎವಂಕ್ ನಾಂ ಗೆ ಮಾಂಯ್ ಮ್ಹಾಕಾ ಸಾಂಗ್ ಗೆ ಮಾಯ್ನ್ ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? ಅತ್ಮೊ ಮ್ಹಜೊ ಆಶೆತಾ ಮ್ಹಜ್ಯಾ ಭಾವಾ ವಾಂಗ್ಡಾ ಖೆಳಂಕ್ ಮ್ಹಜ್ಯಾ ಮಾಯಂಕ್ ಆನಿ ಪಾಯ್ಕ್ ಮೆಳಂಕ್ ಆಜುನುಯ್ ಮ್ಹಜೊ ಅತ್ಮೊ ಆಶೆತಾ ತೊ ಸಂವ್ಸಾರ್ ಪಳೆವಂಕ್ ಮಾಂಯ್ ಸಂವ್ಸಾರ್ ಕಸೊ ದಿಸ್ತಾ ಗೆ ಸಂವ್ಸಾರ್ ಕಸೊ ದಿಸ್ತಾ? **** - ಆನ್ನಿ ದೆ ಕೊಲ್ವಾಲೆ**. [ಮಾರ್ಚ್, 2020]

	ಆನ್ನಿ ದೆ ಕೊಲ್ವಾಲೆ: ಕವಿ, ಲೇಖಕ್ ತಶೆಂಚ್ ತಿಯಾತ್ರಿಸ್ಟ್ ನಾಮ್ಣೆಚಿ ಗೊಂಯ್ಚಿ ಕವಿ. ಆಮ್ಚೊ ಆವಾಜ್, ಫುಡಾರಿ, ಉಜ್ವಾಡ್, ಗುಲಾಬ್, ದೊರ್ ಮಯ್ನ್ಯಾಚಿ ರೊಟಿ ಪತ್ರಾಂನಿ ಹಿಚಿಂ ಬರ್ಪಾಂ ಪರ್ಗಟ್ಲ್ಯಾಂತ್. ಉಮಾಳೆ (2017) ಹಿಚೊ ಪಯ್ಲೊ ಕವಿತಾಜಮೊ, ಶಿಕಾರ್ (2019) ಆಯ್ಲೆವಾರ್ ಪರ್ಗಟ್‌ಲ್ಲೊ ಕವಿತಾಜಮೊ. ವಾಲೆರಿಯೋ ಕಾರ್ವಾಲ್ಹೊ ಕೊಂಕಣಿ ಪುರಸ್ಕಾರ್, 125 ವೊ ತಿಯಾತ್ರಿಸ್ಟ್ ವರ್ಸುಗೆಚೊ ಪುರಸ್ಕಾರ್ ಹಿಕಾ ಯೆದೊಳ್ ಲಾಬ್‌ಲ್ಲೆ ಪುರಸ್ಕಾರ್.
[kovita] SONVSAR KOSO DISTA (- Annie De Colvale)
Oxem polleunko gelear monis mholl'lloch vikrit zanvar. Dorekant oplo faido pollemvcho. Hoch monis devo-dhorm' mhonnun bobatt'ta. Punn opolea svarthak lagun gorbhantolea ballacho jivo somhar korota. Amchea dexant ozun soit chalu aschea eka vikrit monogotecher boroch korun arso dhorola bai an'ni de kolvalen. Hea kovitechea ekeka koddveantoli kanni somzunk tukach atam ulo ditam. - Som
[kovita] SONVSAR KOSO DISTA (- Annie De Colvale)
SONVSAR KOSO DISTA Sonvsar koso dista Polleunchi khub asli as Zolmak hanv eunchea adinch Kelo mhozo nas Maim sonvsar koso dista ge Sonsar koso dista? Kusveant tujia Polloil'lo kallokh Sonvsarantlea uzvaddachi Mevli nam vollokh Maim ,sonvsar koso dista ge Sonvsar koso dista ? Sonvsarant eun hanv Paleunk sodi Fulonk sodi Komri mhaka futtche adinch Kirlo'le bi-echio keleo foddi Maim sonvsar koso dista ge Sonvsar koso dista? Maim mhozo pai koso dista ? Mhozo vhoddlo bhav amurkoch hansta? Tum kosli saddi nhesta ? Maim mhaka sang ge Maim ,sonvsar koso dista ge Sonvsar koso dista? Mhaka posunk zanvche nam mhunn Patok adharlem jiv ghevpachem Zolman haddlelem zalear Hanv kitem asa tench khavpachem Tujea zantteponnar mat Hanv tuzo adhar zavpachem Punn bhag mellonk nam Sonvsar povpachem Maim sonvsar koso dista ge Sonvsar koso dista ? Tujea kusveant Dotoran mhoji gomtti katorli Tedna maim tuzo gollo gusmottonk nam ge? Dotoran mhoje kallzachio xiro katorlio Tedna tuje kalliz choddfoddonk nam ge? Dotoran mhoje hat katorle Tedna tuje hat koddkoddonk nam ge Dotoran mhoje dolle umbttaile Tednai tujea dolleant duk eunk nam ge Maim mhaka sang ge Main sonvsar koso dista ge Sonvsar koso dista? Otmo mhozo axeta Mhojea bhava vangdda khellonk Mhojea maink ani paik mellonk Azunui mhozo otmo axeta To sonvsar polleunk Maim sonvsar koso dista ge Sonvsar koso dista? **** - Annie De Colvale.** [March, 2020]

	*Annie De Colvale: kovi, lekhok toxench tiatristt namnnechi gõychi kovi. Amcho Avaz, Fuddari, Ujvadd, Gulab, Dor Moineachi Rotti potramni hichim borpam porgottleant. Umalle* (2017) hicho poilo kovitazomo, Xikar (2019) ailevar porgott‌l'lo kovitazomo. Valerio karvalho konkonni puroskar, 125 vo tiatristt vorsugecho puroskar hika yedoll lab‌l'le puroskar.
[कविता] संवसार कसो दिसता (- आन्नी दे कोलवाले)
अशें पळेवंक गेल्यार मनीस म्हळ्ळोच विकृत जान्वार. दरेकांत अपलो फायदो पळेंवचो. होच मनीस देव-धर्म म्हणून बोबाटता. पूण अपल्या स्वार्थाक लागून गर्भांतल्या बाळाचो जीव संहार करता. आमच्या देशांत अजून सयत चालू आसच्या एका विकृत मनोगतेचेर बरोच करून आर्सो धरला बाय आन्नी दे कोलवालेन. ह्या कवितेच्या एकेका कडव्यांतली काणी समजुंक तुकाच आतां उलो दितां. -संं
[कविता] संवसार कसो दिसता (- आन्नी दे कोलवाले)
संवसार कसो दिसता संवसार कसो दिसता पळेवंची खूब आसली आस जल्माक हांव एवंच्या आदिंच केलो म्हजो नास मांय संवसार कसो दिसता गे सन्सार कसो दिसता? कुस्व्यांत तुजिया पळयल्लो काळख संवसारांतल्या उज्वाडाची मेवली नां वळख मांय, संवसार कसो दिसता गे संवसार कसो दिसता? संवसारांत एवन हांव पालेवंक सदी फुलंक सदी कंरी म्हाका फुटचे आदिंच किरलो'ले बी-एचियो केल्यो फडी मांय संवसार कसो दिसता गे संवसार कसो दिसता? मांय म्हजो पाय कसो दिसता? म्हजो व्हडलो भाव आमुर्कच हान्सता? तूं कसली साडी न्हेसता? मांय म्हाका सांग गे मांय ,संवसार कसो दिसता गे संवसार कसो दिसता? म्हाका पसुंक जांवचे नां म्हूण पातक आधारलें जीव घेवपाचें जल्मान हाडलेलें जाल्यार हांव कितें आसा तेंच खावपाचें तुज्या जानटेपणार मात हांव तुजो आधार जावपाचें पूण भाग मेळंक नां संवसार पवपाचें मांय संवसार कसो दिसता गे संवसार कसो दिसता? तुज्या कुस्व्यांत दतरान म्हजी गंटी कातरली तेदना मांय तुजो गळो गुस्मटंक नां गे? दतरान म्हजे काळजाचियो शिरो कातरलियो तेदना तुजे काळीज चडफडंक नां गे? दतरान म्हजे हात कातरले तेदना तुजे हात कडकडंक नां गे दतरान म्हजे दळे उंबटायले तेदनाय तुज्या दळ्यांत दूक एवंक नां गे मांय म्हाका सांग गे मायन संवसार कसो दिसता गे संवसार कसो दिसता? अत्मो म्हजो आशेता म्हज्या भावा वांगडा खेळंक म्हज्या मायंक आनी पायक मेळंक आजुनूय म्हजो अत्मो आशेता तो संवसार पळेवंक मांय संवसार कसो दिसता गे संवसार कसो दिसता? **** - आन्नी दे कोलवाले.** [मार्च, २०२०]

	आन्नी दे कोलवाले: कवी, लेखक तशेंच तियात्रिसट नामणेची गोंयची कवी. आमचो आवाज, फुडारी, उज्वाड, गुलाब, दोर मयन्याची रोटी पत्रांनी हिचीं बर्पां पर्गटल्यांत. उमाळे (२०१७) हिचो पयलो कविताजमो, शिकार (२०१९) आयलेवार पर्गट‌ल्लो कविताजमो. वालेरियो कार्वाल्हो कोंकणी पुरसकार, १२५ वो तियात्रिसट वर्सुगेचो पुरसकार हिका येदोळ लाब‌ल्ले पुरसकार.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.