ಕೊಂಕ್ಣಿ ಕಾರ್ಯಿಂ

[ಕವಿತಾ] ಚಂದ್ರಾಕಡೆನ್ ಸಂವಾದ್ [ ಶುಭಾ ಬರಡ್]

ಚಂದ್ರಾಕಡೆನ್ ಸಂವಾದ್

ಚಂದ್ರಾ..
ಚಂದ್ರಾ ಕಿತ್ಯಾಕ್ ತುಂ ತ್ಯಾ ನಕೆತ್ರಾಂಕ್ ಇತ್ಲೊ ಚಿಕ್ಟತಾ?
ಕೃಷ್ಣಾವರಿ ತುಂ ‘ಚಂದ್ರಲೀಲಾ’ ರಚಯ್ತಾ ಕಾಯ್?
ಚಂದ್ರಾನ್ ಮ್ಹಣ್ಲೆಂ, ನಾ..
ಚಂದ್ರಾನ್ ಮ್ಹಣ್ಲೆಂ ನಾ, ತುಮ್ಚ್ಯಾ ಮೊಗ್ಚಿ ಸಾಕ್ಷ್ ಜಾವ್ಪಾಕ್
ಹ್ಯಾ ನಕೆತ್ರಾಂಚಿ ‘ನಕೆತ್ರಸಂಖ್ಯಾ’ ವಾಡಯ್ತಾಂ
***
ಚಂದ್ರಾ..
ಚಂದ್ರಾ ಕಿತ್ಯಾಕ್ ತುಂ ಅಸೊ ಪಾನಾಂಚ್ಯಾ ಖಾಂಚಿಂನಿ ಲಿಪ್ಲಾ?
ಲಿಪ್ಚೊರಯಾಂ ತುಕಾ ಚಾನ್ನ್ಯಾಚೊ ಭೊಗ್ ಘೆವ್ಪಾಕ್ ಜಾಯ್?
ಚಂದ್ರಾನ್ ಮ್ಹಣ್ಲೆಂ ನಾ..
ಚಂದ್ರಾನ್ ಮ್ಹಣ್ಲೆಂ ನಾ, ಮ್ಹಾಕಾ ಕಳ್ನಾ ಭೊಗ್ ಘೆವ್ಪಾಕ್
ಹಾಂವ್ ಫಕ್ತ್ ಪೃಥ್ವೀಚಿ ಲಜ್ ರಾಖ್ತಾಂ
***
ಚಂದ್ರಾ..
ಚಂದ್ರಾ ಕಶೆ ಆಯ್ಲೆ ತುಜೆರ್ ಹೆ ಕಾಳೆ ಡಾಗ್?
ಕೊಣೆ ತುಜೊಯ್ ಕೆಲಾ ಕಾಯ್ ಬಲ್ತ್ಕಾರ್?
ಚಂದ್ರಾನ್ ಮ್ಹಣ್ಲೆಂ ನಾ
ಚಂದ್ರಾನ್ ಮ್ಹಣ್ಲೆಂ ನಾ, ರಚ್ಣಾರ್ಯಾಚ್ಯಾ ಕರ್ಮಾಚೊ
ಹಾಂವೂಂಚ್ ಜಾವ್ನ್ ಆಸಾ ಸಾರ್
***
ಚಂದ್ರಾ..
ಚಂದ್ರಾ, ಉಮಾಶೆಚೆ ರಾತೀಕ್ ತುಂ ಖಂಯ್ ಶೆಣ್ಟಾ?
ಕಾಳ್ಖಾಕ್ ಭಿಯೆವ್ನ್ ತೂಂಯ್ ಪಳೂನ್ ವತಾ?
ಚಂದ್ರಾನ್ ಮ್ಹಣ್ಲೆಂ ನಾ..
ಚಂದ್ರಾನ್ ಮ್ಹಣ್ಲೆಂ ನಾ, ಪುನ್ವೆಚೊ ಉಜ್ವಾಡ್ ಪಸ್ರಾವಪಾಕ್
ಕಾಳೊಖ್ ಮ್ಹಾಕಾ ಪಾಂಗುರಚೊಚ್ ಪಡ್ಟಾ.
*****

- ಶುಭಾ ಬರಡ್ [ಎಪ್ರಿಲ್, 2019]

कविता

मनीस चंद्रेमालागीं वेवेगळ्या काळार संवाद चलवन आयला. भुरगेपणार चंदमामा, तर्नाट‌पणार चंद्रमा आनी जाणतेपणार चंद्रेम. आनी ह्या वेवेगळ्या काळार सयत उलवपाचो लय वेगळो. हांगासर‌यी एक असलेंच संवाद आसा पूण हांगासर प्रतिमा वेगळ्यो देकून ह्या संवादांत वेवेगळ्यो काणियो दिसतात देकून ही कविता कांय मनाच्या पडद्याचेर एक वेगळेंच पिंतूर उभें जाता.

बाय शुभा बरडेन कांय शेंभोरां वयर कविता बरयल्यात, गोंयच्या नाम्नेच्या नेमाळ्यांनी त्यो पर्गट जाल्यात. आल इंडिया रेडियोचेर कविता सादर केल्यात तशेंच सभार कविगोश्टिंनी वांटो घेतला. हांगासर सयत एक वेगळीच कविता घेवन आयल्या आनी ह्या कवितेची सोभाय चाकुंक तुका सोडतां.

- सं

[कविता] चंद्राकडेन संवाद [ शुभा बरड ]

चंद्राकडेन संवाद

चंद्रा..
चंद्रा कित्याक तूं त्या नकेत्रांक इतलो चिकटता?
कृष्णावरी तूं ‘चंद्रलीला’ रचयता काय?
चंद्रान म्हणलें, ना..
चंद्रान म्हणलें ना, तुमच्या मोगची साक्ष जावपाक
ह्या नकेत्रांची ‘नकेत्रसंख्या’ वाडयतां
***
चंद्रा..
चंद्रा कित्याक तूं असो पानांच्या खांचिंनी लिपला?
लिपचोरयां तुका चान्न्याचो भोग घेवपाक जाय?
चंद्रान म्हणलें ना..
चंद्रान म्हणलें ना, म्हाका कळना भोग घेवपाक
हांव फक्त पृथ्वीची लज राखतां
***
चंद्रा..
चंद्रा कशे आयले तुजेर हे काळे डाग?
कोणे तुजोय केला काय बलत्कार?
चंद्रान म्हणलें ना
चंद्रान म्हणलें ना, रचणाऱ्याच्या कर्माचो
हांवूंच जावन आसा सार
***
चंद्रा..
चंद्रा, उमाशेचे रातीक तूं खंय शेणटा?
काळखाक भियेवन तूंय पळून वता?
चंद्रान म्हणलें ना..
चंद्रान म्हणलें ना, पुनवेचो उजवाड पसरावपाक
काळोख म्हाका पांगुरचोच पडटा.
*****

- शुभा बरड [एप्रिल, २०१९]

शुभा बरड: गोंयच्या मडगांवांत वसती करून आसची बाय शुभा बरड कोंकणी कविता बरयता. शेंबोरां वयर कविता बरयल्यात आनी गोंयच्या वेवेगळ्या नेमाळ्यांनी त्यप पर्गटल्यात. आल इंडिया रेडियोचेर कविता सादर केल्यांत तशेंच सभार कविगोश्टिंत हिणें वांटो घेतला. हिच्या कवितेंचो जमो ’वसुंधरा’ २०१५ इस्वेंत पर्गट जाला.

Kovita

Monis chondremalagim vevegollea kallar somvad choloun aila. Bhurogeponnar chondomama, tornatt‌ponnar chondroma ani zannteponnar chondrem'. Ani hea vevegollea kallar soit uloupacho loi vegllo. Hangasor‌yi ek osolench somvad asa punn hangasor protima vegolleo dekun hea somvadant veveglleo kannio distat dekun hi kovita kaim monachea poddodeacher ek vegollench pintur ubhem zata.

Bai xubha borodden kaim xembhoram voir kovita boroileat, gõychea namnechea nemalleamni teo porgott zaleat. Al inddia reddiocher kovita sador keleat toxench sobhar kovigoxttimni vantto ghetla. Hangasor soit ek vegllich kovita gheun ailea ani hea kovitechi sobhai chakunk tuka soddtam.

- Som.

[Kovita] Chondrakodden Somvad[ Xubha Borodd ]

Chondrakodden Somvad

Chondra..
Chondra kiteak tum tea noketrank itlo chikttota?
krixnnauri tum ‘chondrolila’ rochoita kai?
chondran mhonnlem, na..
Chondran mhonnlem na, tumchea mogchi sakx zaupak
hea noketranchi ‘noketrosonkhea’ vaddoitam
***
chondra..
Chondra kiteak tum oso pananchea khanchimni lipla?
lipchoroyam tuka chan'neacho bhog gheupak zai?
chondran mhonnlem na..
Chondran mhonnlem na, mhaka kollna bhog gheupak
hamv fokt prithvichi loz rakhtam
***
chondra..
Chondra koxe aile tujer he kalle ddag?
konne tuzoi kela kai boltkar?
chondran mhonnlem na
chondran mhonnlem na, rochnnareachea kormacho
hamvunch zaun asa sar
***
chondra..
Chondra, umaxeche ratik tum khoim xenntta?
kallkhak bhieun tum-i pollun vota?
chondran mhonnlem na..
Chondran mhonnlem na, punvecho ujvadd posraupak
kallokh mhaka pangurochoch poddtta.
*****

- Xubha Borodd [April, 2019]

Xubha Borodd: gõychea moddgamvant vosti korun aschi bai xubha borodd konkonni kovita boroita. Xemboram voir kovita boroileat ani gõychea vevegllea nemalleamni typ porgottleat. Al inddia reddiocher kovita sador keleant toxench sobhar kovigoxttint hinnem vantto ghetla. Hichea kovitencho zomo ’Vosundhora’ 2015 isvent porgott zala.

ದಾಯ್ಜ್.ಕೊಮ್