ಕೊಂಕ್ಣಿ ಕಾರ್ಯಿಂ

ದೇಶ್‌ಪ್ರೇಮ್ ಎಕಾ ದಿಸಾಚೆಂ

ಪರ್ತುನ್ ಯೆತ್ಲೊ ಪಂದ್ರಾ ಆಗಸ್ಟ್
ದೇಶ್‌ಪ್ರೇಮ್ ಚಂವ್ರತಲೆಂ
ಎಕಾ ದಿಸಾಕ್ ತಿರಂಗ್ಯಾನಿ
ಮಾಂಡ್ ಬಾಜಾರಾಂತಲೆ ಭರ್ತಲೆ

ಪರ್ತುನ್ ವಾಜ್ತಲೆಂ ರಾಶ್ಟ್ರಗಾನ್
ದೇಶ್‌ಪ್ರೇಮ್ ಭರ್ತಲೆಂ ಕಾಳ್ಜಾಂತ್
ತಿರಂಗಿ ಬಾವ್ಟೆ ಘೆವ್ನ್ ಹಾತಾನ್
ದೇಶ್‌ಮೊಗಿ ಭೊಂವ್ತಲೆ ಅೊರ್ರಾನ್

ಪರ್ತುನ್ ಭರ್ತಲೆ ಮೊಬಾಯ್ಲ್
ದೇಶ್‌ಭಕ್ತೆಚ್ಯಾ ಸಂದೆಶಾನಿ
ಪರ್ತುನ್ ಭೊವ್ತಲೆ ದೇಶ್‌ಭಕ್ತ್
ಧವೆಫುಲ್ಲ್ ವೆಶಾನಿ

ದೇಶ್‌ಭಕ್ತೆಚೆಂ ನಾಟಕ್ ಹೆಂ
ಎಕಾ ದಿಸಾಕ್ ನಟ್ಟಲೆಂ
ದುಸ್ರೆ ದಿಸಾ ಮುಖವ್ಟೆ
ಸಾಪ್ ಗಳೂನ್ ಪಡ್ಟಲೆ

ಸ್ವತಂತ್ರ್ ಜಾವ್ಚೊ ದೆಶ್ ಮ್ಹಣ್
ಹಾಂಸತ್ ತಾಣಿ ದಿಲೆ ಪ್ರಾಣ್
ದೆಸಾಕ್ ಒಂಪ್ಲಿ ಜೀಣ್ ತಾಣಿ
ವಿಸ್ರೂನ್ ಗೆಲೆ ಸಗ್ಳೆ ಜಾಣ್

ದೆಸ್ ರಾಖ್ಣೆಚೊ ಸೊಪೂತ್
ಘೆತ್ಲೊ ತಾಣಿ ಎಕ್ಮತಾನ್
ಸೀಮೆಚೆರ್ ಗೆಲೊ ತೊ ಭಾರ್ತೀಯ್
ನ್ಹಯ್ ಹಿಂದು ನ್ಹಯ್ ಮುಸ್ಲಮಾನ್

ಆಜ್ ಪಾವ್ನ್ ಭಾರತ್ ಭೂಂಯೆಂಚೆರ್
ತಾಂಡವ್ ಬಲಾತ್ಕಾರ್, ಭ್ರಶ್ಟಾಚಾರಾಚೊ
ಮ್ಹಾರ್ಗಾಯ್, ಗರೀಬಿ, ಜಾತೀಯ್ವಾದ್ ವಾಡ್ಲಾ
ಕಹರ್ ಚಡ್ಲಾ ಗುನ್ಯಾಂವಕಾರಾಂಚೊ

ಕೊಯ್ರಾಚ್ಯೊ ರಾಶಿ ಪಡ್ಲ್ಯಾತ್
ಶಿಕ್ಷಣ್ ವೆವಸ್ತಾ ಇಬಾಡ್ಲ್ಯಾತ್
ಜಾಗ್ರೂಕತಾಯೆನ್ ಫುಡೆಂ ಸರೂಂಯಾ
ಕಾಯ್ ಉದ್ರಗತೀಕ್ ಫಾಟ್ ಕರೂಯಾ?

ಕಾಲ್ ಜೀವ್ ತಾಣಿ ದಿಲ್ಲೊ
ಮೆಳ್ಚಿ ಮ್ಹಣ್ ಸ್ವತಂತ್ರತಾಯ್
ಪ್ರಾಣಾಂಚೊ ಕರೂನ್ ತ್ಯಾಗ್
ಹೊ ಅಸ್ಲೊ ದೆಸ್ ಉಬಾರೂಂಕ್ ಕಾಯ್?

ಬಾವ್ಟೆ ಘೆವ್ನ್ ಮೀರೊವ್ಚೆ ಪರಸ್
ಸಾನ್ನ್ ಘೆವ್ನ್ ವಾವುರಚೆಂ
ಧುಳ್ಕಟಿಲ್ಲೆಂ ದೆಸಾ ಭಾವಿಶ್ಯ್
ಮೆಳುನ್ ಆಮಿ ಸಾವ್ರಚೆಂ

ಕೊಣಾಕ್ ಆತಾಂ ಉರ್ಲ್ಯಾ ಯಾದ್
ಹುತಾತ್ಮ್ಯಾಂಚ್ಯಾ ತ್ಯಾಗಾಚಿ
ಕೊಣಾಕ್ ಆಸಾ ಖಂತ್
ತಾಣಿ ಭೊಗಿಲ್ಲ್ಯಾ ಭೊಗಾಂಚಿ

ಎಕಾ ದಿಸಾಕ್ ಸಗ್ಳೆ ಲಾಯ್ತಲೆ
ಮುಖವ್ಟೊ ದೆಶ್ ಭಕ್ತಾಚೊ
ಕೊಣಾಕ್ ಆಸಾ ಮಾನ್ ಖರೊ
ತಾಣಿ ಗಳಯ್ಲ್ಲ್ಯಾ ರಗ್ತಾಚೊ

ಪಂದ್ರಾ ತಾರ್ಖೆಕ್ ಚಾಂಟೆ ಪಾವ್ಲಾ
ಭಗತ್ ಸಿಂಗ್ ಆನಿ ಗಾಂಧಿ ದಿಸ್ತಲೆ
ದುಸ್ರೆ ದಿಸಾ ದೇಶ್‌ಪ್ರೇಮ್
ಕಾಳ್ಜಾಂತ್ ಒಗ್ಗಿ ನ್ಹೀದ್ತಲೆಂ

ದುಸ್ರೆ ದಿಸಾ ದೇಶ್‌ಪ್ರೇಮ್
ಕಾಳ್ಜಾಂತ್ ಒಗ್ಗಿ ನ್ಹೀದ್ತಲೆಂ
ಕವ್ಳ್ಯೊ, ತಿಸ್ತ್ಯೊ, ವಾದ್ರ್ಯೊ ಜಾವ್ನ್
ಖಾಚಿ ಕೊನ್ಶಾನಿ ಪಡ್ಟಲೆಂ

- ಉರ್ಜಿತಾ ಭೊಬೆ: [ಅಗೊಸ್ತ್ 2018]

कविता

"The poet is a liar who always speaks the truth. (Jean Cocteau)" नामणेच्या फ्रेंच कविचीं उत्रां हीं. पूण जेदनां कवी सत‌च उलयता, तें समाजीक चिंत्पाक अडहूक लाग्ता, पूण सत तें सत‌च आनी एका प्रामाणीक कविची जवाभदारी‌यी तिच्च; सत उलंवची.

आमच्या दीस्पडते जिण्येंत आमी कितले पावटीं आमकांच डोंग करून जियेतांव म्हळ्ळें अमकांच खबर ना. स्वातंत्रोत्सव दिसाची पर्भीं आमी एकामेका पाटयतांव पूण आमकांच अमी विचाऱ्यां, आमकां ताचो महत्व कळीत आसा? फेसतां-परबेंचो उल्लास आमी वाटसाप-फेस‌बुकाचेर दितांव, पूण आमकां तांचो महत्व कळीत आसा? तर ह्या एकेका दिसाचें नीब घेवन परभीं पाटवन बाकिच्या हेर दिसांनी आमी सदांचेपरीं ’बदलानात‌ल्लें चिंतप’ दवर्न कितें फायदो? हेंच चिंतप बाय उर्जिता अपल्या कवितेंत अपुर्भायेन विचार्ता.

बाय उर्जिताक हांव थोडेच तेंपाथावन वळकतां, तिची कविता प्रतिभा, हेरांचें साहीत वाचतेल्या वर्गाच्या हिचें चिंतप म्हाका खायस, पूण तिच्या कवितेंतलें सत म्हाका खूब आंवडता. ’कविता म्हळ्यार उत्रांची रास वा प्रासांनी सजयिल्ल्यो पोकोळ वळी न्हय’ हें तिच्या कवितेंनी हांवें पार्किलां देकून हिच्यो कविता परत परत वाचुंक मन कर्तात.

- सं

देशप्रेम एका दिसाचें

परतुन येतलो पंदरा आगश्ट
देशप्रेम चंवरतलें
एका दिसाक तिरंग्यानी
मांड बाजारांतले भरतले

परतुन वाजतलें राश्ट्रगान
देशप्रेम भरतलें काळजांत
तिरंगी बावटे घेवन हातान
देसमोगी भोंवतले अॉर्रान

परतुन भरतले मोबायल
देशभक्तेच्या संदेशानी
परतुन भोवतले देशभक्त
धवेफुल्ल वेशानी

देशभक्तेचें नाटक हें
एका दिसाक नटटलें
दुसरे दिसा मुखवटे
साप गळून पडटले

स्वतंत्र जावचो देश म्हण
हांसत ताणी दिले प्राण
देसाक ओंपली जीण ताणी
विसरून गेले सगळे जाण

देस राखणेचो सोपूत
घेतलो ताणी एकमतान
सीमेचेर गेलो तो भारतीय
न्हय हिंदू न्हय मुसलमान

आज पावन भारत भूंयेंचेर
तांडव बलात्कार, भ्रश्टाचाराचो
म्हारगाय, गरीबी, जातीयवाद वाडला
कहर चडला गुन्यांवकारांचो

कोयराच्यो राशी पडल्यात
शिक्षण वेवस्था इबाडल्यात
जागरूकतायेन फुडें सरूंया
काय उदरगतीक फाट करूया?

काल जीव ताणी दिल्लो
मेळची म्हण स्वतंत्रताय
प्राणांचो करून त्याग
हो असलो देस उबारूंक काय?

बावटे घेवन मीरोवचे परस
सान्न घेवन वावुरचें
धुळकटिल्लें देसा भाविश्य
मेळुन आमी सावरचें

कोणाक आतां उरल्या याद
हुतात्म्यांच्या त्यागाची
कोणाक आसा खंत
ताणी भोगिल्ल्या भोगांची

एका दिसाक सगळे लायतले
मुखवटो देश भक्ताचो
कोणाक आसा मान खरो
ताणी गळयल्ल्या रगताचो

पंदरा तारखेक चांटे पावला
भगत सिंग आनी गांधी दिसतले
दुसरे दिसा देशप्रेम
काळजांत ओग्गी न्हीदतलें

दुसरे दिसा देशप्रेम
काळजांत ओग्गी न्हीदतलें
कवळ्यो, तिस्त्यो, वादर्यो जावन
खाची कोनशानी पडटलें

- उर्जिता भोबे: [अगोसत २०१८]

उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत’ पर्गट जाला. कोंकणी कवितेंनी नवी सकत भर्चे दिशेन बाय उर्जिता वावर करून आसा.

"The poet is a liar who always speaks the truth. (Jean Cocteau)" namnnechea french kovichim utram him. Punn jednam kovi sot‌ch uloita, tem somajik chintpak oddhuk lagta, punn sot tem sot‌ch ani eka pramannik kovichi zovabhdari‌yi tichch; sot ulomvchi.

Amchea dispoddte jinnyent ami kitle pauttim amkanch ddong korun jietamv mholl'llem omkanch khobor na. Svatontrotsou disachi porbhim ami ekameka pattoitamv punn amkanch omi vichaream, amkam tacho mohotv kollit asa? festam-porbencho ul'las ami vattsap-fes‌bukacher ditamv, punn amkam tancho mohotv kollit asa? tor hea ekeka disachem nib gheun porobhim pattoun bakichea her disamni ami sodancheporim ’bodlanat‌l'lem chintop’ dourn kitem faido? hench chintop bai urjita oplea kovitent opurbhayen vicharta.

Bai urjitak hamv thoddech tempathaun vollkotam, tichi kovita protibha, heranchem sahit vachtelea vorgachea hichem chintop mhaka khais, punn tichea kovitentlem sot mhaka khub amvoddta. ’kovita mhollear utranchi ras va prasamni sozoyil'leo pokoll volli nhoi’ hem tichea kovitemni hamvem parkilam dekun hicheo kovita porot porot vachunk mon kortat.

- Som.

KOVITA

Dexprem' eka disachem

portun yetlo pondra agxtt
dexprem' chomvrotolem
eka disak tirongeani
mandd bazarantole bhortole

portun vajtolem raxttrogan
dexprem' bhortolem kallzant
tirongi bautte gheun hatan
desmogi bhomvtole aorran

portun bhortole mobail
dexobhktechea sondexani
portun bhoutole dexobhkt
dhoveful'l vexani

dexobhktechem nattok hem
eka disak nott'ttolem
dusre disa mukhoutte
sap gollun poddttole

svotontr zaucho dex mhonn
hamsot tanni dile prann
desak ompli jinn tanni
visrun gele soglle zann

des rakhnnecho soput
ghetlo tanni ekmotan
simecher gelo to bharti-i
nhoi hindu nhoi musloman

az paun bharot bhumyencher
tanddou bolatkar, bhroxttacharacho
mhargai, goribi, zatiyvad vaddla
kohor choddla guneamvokarancho

koiracheo raxi poddleat
xikxonn veustha ibaddleat
zagrukotayen fuddem sorumya
kai udrogotik fatt koruya?

kal jivo tanni dil'lo
mellchi mhonn svotontrotai
prannancho korun teag
ho oslo des ubarunk kai?


bautte gheun mirouche poros
san'n gheun vavurochem
dhullkottil'lem desa bhavixy
mellun ami saurochem

konnak atam urlea yad
hutatmeanchea teagachi
konnak asa khont
tanni bhogil'lea bhoganchi

eka disak soglle laitole
mukhoutto dex bhoktacho
konnak asa man khoro
tanni golloil'lea rogtacho

pondra tarkhek chantte paula
bhogot sing ani gandhi distole
dusre disa dexprem'
kallzant oggi nhidtolem

dusre disa dexprem'
kallzant oggi nhidtolem
koulleo, tisteo, vadreo zaun
khachi konxani poddttolem

- Urjita Bhobe  [August, 2018]

Urjita Bhobe: Sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’Urzasrot’ porgott zala. Konkonni kovitemni novi sokot bhorche dixen bai urjita vaur korun asa.

ದಾಯ್ಜ್.ಕೊಮ್