ವಿಚಾರ್‌ವಾದ್ ಅಂಕಣ್: ಮನ್ ಕಿ ಬಾತ್

ಕೊಂಕ್ಣಿ ಸಾಹಿತ್ಯಾಂತ್ ವಿಚಾರ್‌ವಂತ್ ಸಾಹಿತ್ಯಾಚೊ ಭೊರ್ಗೊಲ್ ಆಸಾ. ವಿಚಾರ್‌ವಂತ್ ಚಿಂತ್ಪಾಚಿ ಗರ್ಜ್ ಸಮಾಜಿಕ್ ಆಸಾ ಮ್ಹಣುನ್ ಚಿಂತೆಲ್ಯಾ ಸಂಪಾದಕಾಂಚೊಚ್ಚ್ ಬೊರ್ಗೊಳ್ ಕೊಂಕ್ಣೆಂತ್ ಆಸಾ. ದೆಕುನ್ ಲೊಕಾಂಕ್ ಕುಂಡೊ ಪಸಂದ್ ಮ್ಹಣುನ್, ಕುಂಡೊಚ್ಚ್ ರಸ್ಚ್ಯಾಂತ್ ಆನಿ ವಾಂಟ್ಚಾಂತ್ ತೆ ಸಮಧಾನ್ ಸೊಧ್ತಾತ್. ದೆಕುನ್ ರಾಂದ್ಪಾವೊಳಿ, ಹಾಸೊ, ಮಸ್ಕಿರಿ, ಕುಚುಲ್ಯೊ ಆನಿ ಕಿತೆಂ ಮಾತ್ತಿ ಗೊಬೊರ್.

ಆನಿ ವಿಪರ್ಯಾಸ್ ಮ್ಹಳ್ಯಾರ್, ಹಾಂಕಾಂ ಹಾಸೊ/ಹ್ಯೂಮರ್ ಮ್ಹಳ್ಳ್ಯಾ ಸಬ್ಧಾಚೊ ಮತ್ಲಬ್‌ಯೀ ಕಳಿತ್ ನಾ; ಹಾಸೊ ಮ್ಹಳ್ಯಾರ್ ಡಬ್ಬಲ್ ಮೀನಿಂಗಾಚ್ಯೊ ನೋನ್-ವೆಜ್ ಜೋಕ್ಸ್ ಸಾಂಗ್ಚ್ಯೊ ಮ್ಹಣುನ್ ಚಿಂತಾತ್. ಆನಿ ತಕ್ಲೆಂತ್ ಪಾವ್ಲಿ ಉಣಿ ಆಸ್ಚಾ ಥೊಡ್ಯಾಂಕ್ Rational ಅನಿ Revolutional ಮ್ಹಳ್ಳ್ಯಾ ಸಬ್ಧಾಚೊ ಮತ್ಲಬ್ ಸಯ್ತ್ ಕಳಿತ್ ನಾ. ಮಕ್ಕರ್ ಇತ್ಲ್ಯಾರ್‌ಚ್ಚ್ ನಾ, ಪಯ್ಸಿಲ್ಯಾ ಬೊಲ್ಯಾಂ ಇಡ್ಯಾಂನಿ ಲಿಪೊನ್ ಫಾತೊರ್ ಮಾರ್ಚಿ ಹಾಂಚಿ ಪಿಸಾಯ್. ಅಸಲ್ಯಾ ಪಾವ್ಲಿ ಉಣೆ ಆಸ್ಲೆಲ್ಯಾಂಕ್ ’ಬಾದೂರ್’ ಮ್ಹಣ್ ಸಮ್ಜತೆಲೆ ಆನಿ ವ್ಹಾರೆಂ ಘಾಲ್ತೆಲೆಯ್ ಯಥೇಶ್ಟ್ ಮಾಪಾನ್ ಅಸಾತ್. ಹಿ ಜಾಲ್ಯಾ ಆಮ್ಚಿ ಪರಿಗತ್. ಕೊಣಾಚ್ಯಾಕೀ ಬೊಲ್ಸಾಕ್ ಹಾತ್ ಘಾಲುನ್, ತಾಚೆಂಚ್ ಲುಟುನ್, ತಾಚ್ಯಾ ದುಡ್ವಾಂತ್ ಧರ್ಮಾಚೆಂ ಘೊಟುನ್, ಉಪ್ರಾಂತ್ ತಾಕಾಚ್ಚ್ ’ನೈತಿಕತೆಚೊ ಪಾಠ್’ ದಿತೆಲ್ಯಾ ಸಂಸಾರಾಂತ್ ಜಿಯೆತಾಸ್ತಾನಾ ಖರೆಂಚ್ ವಿಚಾರುಂಕ್ ಪಡ್ತಾ ’ಆಮಿ ಖರೆಂಚ್ ಜಿವ್ಯಾಂ ಮಧೆಂ ಆಸಾಂವ್?’.

ಜೆ.ವಿ.ಕಾರ್ಲೊ ಏಕ್ ವಿಚಾರ್‌ವಾದಿ ಚಿಂತ್ಪಿ/ಬರವ್ಪಿ ಮ್ಹಣುನ್ ಪಾತ್ಯೆತೆಲ್ಯಾಂ ಮಧ್ಲೊ ಹಾಂವ್‌ಯೀ ಎಕ್ಲೊಂ. ಆನಿ ಹಾಚೆಂ ಹೆಂ ಅಂಕಣ್ ವಾಚ್ತಾಂ ವಾಚ್ತಾಂ ತುಂಯ್ ಎಕ್ಲೊ ಜಾತಲೊಯ್ ಮ್ಹಳ್ಳೊ ಭರ್ವಸೊ ಆಸಾ ತರ್‌ಯೀ ಕೋಣ್ ವಾಚ್ತಲೊ ಅನಿ ಸಮ್ಜತಲೊ ಮ್ಹಳ್ಳೆಂ ಪಯ್ಲೆಂ ಸವಾಲ್ ಅಧುರೆಂಚ್ ಸೊಡ್ತಾಂ.

ಭಾರತೀಯ್ ಪವ್ಜೆಚಾ ಸಾಮಾನ್ಯ್ ವರ್ಗಾಚಾ ಆಭ್ತರ್ಥಿಂಚಾ ವಿಂಚವ್ಣೆ ಲಾಗೊನ್ ಬಿಹಾರಾಚಾ ಮುಜಾಫರ್ಪುರಾಕ್ ಆಯ್ಲೆಲ್ಯಾ ತರ್ನಾಟ್ಯಾ ಅಭ್ಯರ್ಥಿಂಕ್ ಅಜ್ಯಾಪ್ ರಾಕೊನ್ ಆಸುಲ್ಲೆಂ. ತಿ ದೈಹಿಕ್ ಪರೀಕ್ಷಾ ನ್ಹಯ್ ಆಸ್ಲಿ ತರೀ ಮಿಲಿಟರಿ ಅಧಿಕಾರಿನಿಂ ತಾಂಕಾ ಉಗ್ತ್ಯಾ ಮಯ್ದಾನಾರ್ ಫಕತ್ ಭಿತೆರ್ಲ್ಯಾ ಚಡ್ಡೆರ್ ಬಸವ್ನ್ ಲಿಕಿತ್ ಪರಿಕ್ಷಾ ಚಲಯಿಲ್ಲಿ ಖಬಾರ್ ವಾಚುನ್ ತುಮ್ಕಾಂ ಕಶೆಂ ಭಗ್ಲೆಂ ಹಾಂವ್ ನೆಣಾ. ಪುಣ್ ಮ್ಹಜಾ ಮತಿಂತ್ ಮಾತ್ರ್ ಎಕಾ ನಮುನ್ಯಾಚೊ ವಿಷಾದ್ ಭರ್ಲೊ. ಬಿಹಾರಾಂತ್ ಪರೀಕ್ಷೆನಿಂ ನಕ್ಕಲ್ ಕರ್ಚೊ ವೊಸೊ ವ್ಯಾಪಕ್ ಜಾವ್ನಾಸ್ತಾಂ, ಅಪ್ಣೆ ಅಸಲೆಂ ಕ್ರಮ್ ಘೆಜೆ ಪಡ್ಲೆಂ ಮ್ಹಳ್ಳಿ ಸಫಾಯ್ ಪವ್ಜೆಚೆ ಅಧಿಕಾರಿ ದಿತಾತ್. ಶಿಕ್ಷಣ್, ಉದ್ಯೋಗ್ ಜೊಡ್ಚಿ ಏಕ್ ಮಾತ್ರ್ ವಾಟ್ ಆನಿ ತೆಂ ಕಸಲ್ಯಾಯ್ ವಾಟಾಂನಿ ಜೊಡಿಜೆಚ್ ಮ್ಹಳ್ಳಿ ಪರಿಗತ್ ಬಿಹಾರ್ ಆನಿ ಥೊಡ್ಯಾ ರಾಜ್ಯಾನಿಂ ಆಸಾ. ತಾಂಕಾ ಶಿಕ್ಷಣ್ ದಿಂವ್ಚಿ ಶಿಕ್ಷಕಾಂಯ್ ತ್ಯಾಚ್ ವಾಟೆನ್ ಆಯ್ಲೆಲ್ಯಾನ್ ಹೆಂ ವಿಷ್ಚಕ್ರ್ ಘುಂವೊನಂಚ್ ಆಸಾ. ಹಾಂತು ಕೊಣಾಕ್ ದುರ್ಸೊಂಚೆ? ಆಮ್ಚಾ ದೇಶಾಚಾ ದುರ್ಬಳ್ಕಾಯೆಕ್ಗೀ, ಶಿಕ್ಷಣ್ ಶೆತಾಕ್?

ಹೆ ಚೆರ್ಕೆ ಫವ್ಜೆಕ್ ಕಿತ್ಯಾಕ್ ಲಾಗೊನ್ ಭರ್ತಿ ಜಾತಾತ್? ದೇಶಾಚಾ ಅಬಿಮಾನಾನ್ ತೊವೊನ್? ಆರ್ಥಿಕ್ ಪರಿಗತಿಕ್ ಲಾಗೊನ್? ದುರ್ಬಳ್ಕಾಯೆ ಲಾಗೊನ್ ಮ್ಹಳ್ಯಾರ್ ಚಡ್ ಸಂಪೆ ದಿಸೊಂಕ್ ಆಸಾ. ಚಡಾವತ್ ತರ್ನಾಟ್ಯಾಂಕ್ ಹ್ಯಾ ನಕ್ಲಿ ದೇಶ್ಭಕ್ತಾಂ ತಸಲೆ ಭಾರತ್ ಮಾಯೆಚಿ ಸೆವಾ ಕರ್ಚೆ ತಸಲೆ ಉದಾತ್ತ್ ಧ್ಯೇಯ್ ಆಸ್ಚೆ ಸಂಭವ್ ಬಿಲ್ಕುಲ್ ಆಸ್ಚೆ ನಾಂತ್. ತಾಂಚಾ ಘರ್ಚಿ ಆರ್ಥಿಕ್ ಪರಿಗತ್ ಚಿಕ್ಕೆ ಸುದ್ರಾಂವ್ಚೆಚ್ ತಾಂಚೆ ಉದಾತ್ತ್ ಧ್ಯೇಯ್ ಜಾವ್ನಾಸ್ತಾತ್ ಮ್ಹಳ್ಳೆಂ ಖರೆಂ ಜಾವ್ನಾಸಾ.

70-80 ವ್ಯಾ ದಶಕಾನಿಂ ಚಡ್ತಾವ್ ಶಿಕಾಪ್ ನಾತ್ಲೆಲ್ಯಾ ತರ್ನಾಟ್ಯಾಂಕ್ ಮಿಲಿಟರಿಕ್ ಭರ್ತಿ ಜಾವ್ಚೆಂಚ್ ಸಲೀಸಾಯೆಚೆಂ ಕಾಮ್ ಜಾವ್ನಾಸ್ಲೆಂ. ಘರ್ಚಿ ದುರ್ಬಳ್ಕಾಯ್, ಬಾಪಾಯ್ಚಿಂ ಇಜಾ ಸೊಸುಂಕ್ ಜಾಯ್ನಾಸ್ತಾಂ ಘರಾ ಕೊಣಾಕೀ ಸಾಂಗಿನಾಸ್ತಾಂ ಮಿಲಿಟರಿಕ್ ಭರ್ತಿ ಜಾಲ್ಲೆಚ್ ಅಧಿಕ್. ಪಾಟಿಂ ಆಯ್ಲ್ಯಾ ನಂತರ್ ತಾಂಕಾ ಘರಾಂತ್ ಮ್ಹಾನ್ ಲಾಭಲ್ಲೊ ದುಸ್ರಿ ಗಜಾಲ್.

ಹಾಂವೀ ಎನ್ಸಿಸಿಕ್ ಭರ್ತಿ ಜಾಲೊಂ!

ಹಾಂವೆ ಪಿಯುಸಿ ಘರಾ ಥಾವ್ನ್ ವಚೊನ್ ಯೇವ್ನ್ ಕೆಲ್ಲೆಂ. ಸಕ್ಲೇಶ್ಪುರ್ ಕೊಲೆಜ್ ನಾತ್ಲಿ. ಮುಕ್ಲ್ಯಾ ಶಿಕ್ಪಾಕ್ ಹಾಸನ್ ವಚಾಜೆ ಪಡ್ಲೆಂ. ತ್ಯಾ ವಗ್ತಾ ಹಾಸನ್ ಜೆಜ್ವಿತಾಂಚಾ ಬೋರ್ಡಿಂಗಾಂತ್ ಕೊಲೆಜ್ ವಿದ್ಯಾರ್ಥಿಂಕ್ ಘೆನಾತ್ಲೆ. ಹಳ್ಳೆಚಾ ದುಸ್ರ್ಯಾ ಭುರ್ಗ್ಯಾಂ ಬರಿಂ ಹಾಂವೆಂಯ್ ಎಕಾ ಇಷ್ಟಾ ಸಂಗಿ ಸರ್ಕಾರಿ ಕೊಲೆಜಿ ಲಾಗಿಂಚ್ ಏಕ್ ರೂಮ್ ಕೆಲೆಂ. ಘರಾ ಥಾವ್ನ್ ಮೆಳ್ಚಾ ಪಯ್ಶ್ಯಾಂನಿ ಆಮಿ ಹೊಟೆಲಾಂತ್ ಜೆಂವ್ಚೆ ಮಾರಾಗ್ ಪಡ್ತಾಲೆಂ ದೆಕುನ್ ಅನಿವಾರ್ಯ್ ಜಾವ್ನ್ ಆಮಿಂ ರೂಮಾಂತಚ್ ರಾಂದಿಜೆ ಆಸ್ಲೆಂ. ದೊನ್ಪರಾಂ ಸಾಂಜೆರ್ ಶಿತ್ ಕರುನ್ ಹೊಟ್ಲಾಂತ್ಲೊ ಸಾಂಬಾರ್ ಹಾಡ್ಲ್ಯಾರ್ ಜೆವಾಣ್ ತಿರ್ಸಾತಾಲೆಂ ತರೀ ಸಾಕಾಳಿಂಚೆ ಮಾತ್ರ್ ಏಕ್ದೀಸ್ ಉಪ್ಪಿಟ್ಟು (ಸಜ್ಜಿಗೆ?) ಆನಿ ಏಕ್ದೀಸ್ ಚಿತ್ರಾನ್ನಾ (ರಾತ್ಚಾ ಶಿತಾಕ್ ಪೊಣ್ಣ್ ದೀವ್ನ್ ಲಿಂಬೊ ಪಿಳ್ಚೊ!) ಕರ್ನ್ ಖಾಂವ್ಚೊ ಕಾಂಠಾಳೊ ಯೆತಾಲೊ. ಜೀಬ್ ಹೊಟ್ಲಾಚಾ ತಿಂಡೆಕ್ ಆಶೆತಾಲಿ. ಹೊಟ್ಲಾಚಿ ತಿಂಡಿ ಹಫ್ತ್ಯಾಕ್ ದೋನ್ ಪಾವ್ಟಿಂ ತರೀ ಪುಂಕ್ಯಾ ಖಾಂವ್ಚಿ ವಾಟ್ ಎಕಾ ಇಷ್ಟಾನ್ ಸಾಂಗೊನ್ ದಿಲಿ. ಹಳ್ಳೆಂ ಥಾವ್ನ್ ಯೇವ್ನ್ ಕೊಲೆಜಿಕ್ ಸೆರ್ವಾಲ್ಲೆ ಚಡಾವತ್ ದುಬ್ಳೆ ಭುರ್ಗೆ ಅಶೆಂಚ್ ಕರ್ತಾಲೆ. ತಿ ವಾಟ್ ಜಾವ್ನಾಸ್ಲಿ ಎನ್ಸಿಸಿಕ್ ಭರ್ತಿ ಜಾಂವ್ಚಿ! ಹಫ್ತ್ಯಾಕ್ ದೋನ್ ದೀಸ್ ಸಾಕಾಳಿಂ ಚಿಕ್ಕೆ ವೆಗ್ಗಿಂ ಉಟೊನ್ ಕವಾಯತಾಕ್ ಗೆಲ್ಯಾರ್ ಜಾಲೆಂ. ಕವಾಯತಾ ನಂತರ್ ಪೋಟ್ ಭರ್ನ್ ಹೊಟ್ಲಾಚಿ ತಿಂಡಿ ಲಾಬ್ತಾಲಿ. ಇಡ್ಲಿ-ವಡಾ, ದೋಸೆ, ಪೂರಿ ಇತ್ಯಾದಿ.. ಪೋಟ್ ಭರ್ನ್ ತಿಂಡಿ ಖಾಂವ್ಚಾ ವರ್ನಿ ಊಂಚ್ ದುಸ್ರೆ ಕಸಲೆಯ್ ಉದಾತ್ತ್ ಧ್ಯೇಯ್ ಆಮ್ಕಾಂ ನಾತುಲ್ಲೆ. ಸಿ ಸರ್ಟಿಫಿಕೆಟ್ ಘೆವ್ನ್ ಪವ್ಜೆಂಜ್ ವ ಪೊಲಿಸ್ ಖಾತ್ಯಾಂತ್ ಅಧಿಕಾರಿ ಹುದ್ದೊ ಅಪ್ಣಾಂವ್ಚೊ ಉದ್ದೇಶ್ ಆಮ್ಕಾಂ ಬಿಲ್ಕುಲ್ ನಾತ್ಲೊ. ಹ್ಯಾ ಲಾಗೊನ್ ಎನ್ಸಿಸಿಕ್ ಭರ್ತಿ ಜಾಲ್ಲೆ ಶ್ಹೆರಾಂತ್ಲೆ ಮಸ್ತು ವಿದ್ಯಾರ್ಥಿ ಆಸುಲ್ಲೆ. ತಾಂಕಾ ರಾವೊಂಕ್ ಏಕ್ ಬಿಡಾರ್ ಆಸುಲ್ಲೆಂ. ಪೋಟ್ ಭರ್ನ್ ಜೇಂವ್ಕ್ ಆಸುಲ್ಲೆಂ. ಅಶೆಂ ಸಕ್ಟಾಂಕೀ ಎನ್ಸಿಸಿಕ್ ಭರ್ತಿ ಜಾಂವ್ಕ್ ಅಪಾಪ್ಲೊ ಲಿಪ್ತೊ ಸ್ವಾರ್ತ್ ಆಸುಲ್ಲೊ. ಅಪುಣ್ ಭಾರತ್ ಮಾತಾಚಿ ಸೆವಾ ಕರುಂಕ್ ಎನ್ಸಿಸಿಕ್ ಭರ್ತಿ ಜಾಲಾಂ ಮ್ಹಣೊನ್ ಕೊಣೆಂಯ್ ಸಾಂಗುಲ್ಲೆಂ ಹಾಂವೆ ಅಯ್ಕೊಂಕ್ ನಾ.

ದೇಶಾಭಿಮಾನಾಚೆಂ ಅಮಾಲ್

ಬಿಜೆಪಿ ಅಧಿಕಾರಾಕ್ ಆಯಿಲ್ಲ್ಯಾ ಹರ್ ವಗ್ತಾ ದೇಶಾಚೆಂ ಗುಮಾನ್ ಸೊಜೆರಾಂ ಥೈಂ ಘುಂವ್ಚೆ ತಸಲಿಂ, ಆನಿ ತ್ಯಾ ಥಾವ್ನ್ ಆಮ್ ಲೊಕಾಚೊ ದೇಶಾಭಿಮಾನಾಚೊ ಭಾವೋನ್ಮಾದ್ ಎವರೆಸ್ಟಾಕ್ ಪಾವಂವ್ಚಿ ತಸಲಿಂ ಘಟನಾಂ ಸಾಮಾನ್ಯ್ ಮ್ಹಳ್ಳೆ ಪರಿಂ ಘಡೊನಂಚ್ ಆಸ್ತಾತ್

ಚೈನಾ ವಯ್ಲ್ಯಾ ಝಜಾಂತ್ ಜಾಂವ್ ಪಾಕಿಸ್ತಾನಾ ವಯ್ಲ್ಯಾ ಝಜಾನಿಂ ಅಶೆಂ ಘಡೊಂಕ್ ನಾತ್ಲೆಂ. ಕಾರ್ಗಿಲ್ಚಾ ಝಜಾ ನಂತರ್ ಜೀವ್ ಹೊಗ್ಡಾಯಿಲ್ಲ್ಯಾ ಸೊಜೆರಾಂಕ್ ಪುರ್ಶಾಂವಾನಿ ವರ್ನ್, ಲಾಕೊಂ ರುಪಯ್ ಪರಿಹಾರ್, ಸೈಟಾಂ ಇತ್ಯಾದಿ ದಿಂವ್ಚಿ ಪರಂಪರಾ ಸುರು ಜಾಲಿ ಮ್ಹಣ್ಯೆತ್. ಹ್ಯಾ ಪಾವ್ಟಿಂ ಬಿಜೆಪಿ ಅಧಿಕಾರಾಕ್ ಆಯ್ಲೆಲ್ಯಾ ನಂತರ್ ಸಿಯಾಚೆನ್ ಬರ್ಫಾ ದೊಂಗ್ರಾರ್ ಘಡ್ಲೆಲ್ಯಾ ಅವ್ಘಡಾ ನಂತರ್ ಯೀ ಅಶೆಂಚ್ ಘಡ್ಲೆಂ. ಸರ್ಲೆಲ್ಯಾ ಎಕಾ ಸೊಜೆರಾಚೆಂ ಮೋರ್ನ್ ತ್ಯಾ ಗಾಂವಾಕ್ ಆಯ್ಲೆಂ ಮ್ಹಣ್ತಾನಾ ತ್ಯಾ ಗಾಂವ್ಚಾ ಜಿಲ್ಲಾ ಮಂತ್ರಿನ್, ಎಂಎಲ್ಯೆ ಧರ್ಲ್ಲೆಂ ಜಿಲ್ಲಾಧಿಕಾರಿ ತಶೆಂ ಸರ್ವ್ ಅಧಿಕಾರಿನಿಂ ಹಾಜರ್ ಆಸೊನ್ ಮೊರ್ನಾಚಾ ಪುರ್ಶಾಂವಾಂತ್ ಭಾಗ್ ಘೆಂವ್ಚೆ ಅವಶ್ಯ್ ಮ್ಹಳ್ಳೊ ಸಂಪ್ರದಾಯ್ ಸುರು ಜಾಲಾ. ಭಾಗ್ ಘೆನಾತ್ಲ್ಯಾಂಕ್ ದೇಶ್ ದ್ರೋಹಿ ಮ್ಹಣ್ಚೆ ತಿತ್ತುನ್ ಪಾವ್ಲಾಂ.

ಫವ್ಜೆಕ್ ಗೆಲ್ಲೊ ಪೂತ್ ಸರೊನ್ ದೋನ್ ಹಫ್ತೆ ಉತರ್ಲ್ಯಾರೀ ಮೊರ್ನಾಚಿ ಅನಿಕೀ ವಿಲೆವಾರಿ ಜಾಂವ್ಕ್ ನಾ. ಮಾಡ್ತಿರ್ ಮೆಲ್ಲ್ಯಾ ಸೊಜೆರಾಚಾ ಘರ್ಚಾನಿಂ ಟ್ರಾಜಿಡಿ ಕಶಿ ಸ್ವೀಕಾರಿಲ್ಯಾ ಮ್ಹಳ್ಳೆಂ ಪೊಜ್ಡೆಂ ಕುತೂಹಲ್ ಮಾಧ್ಯಮಾಕ್, ಜಣಾಂಕ್, ತಶೆಂಚ್ ದೇಶ್ ಭಕ್ತಿಕ್ ಸಂಘ್ ಸಂಸ್ಥ್ಯಾಂಕ್. ತ್ಯಾ ಎದೆಶ್ಯಾ ನಾಡಾಂತ್ಲ್ಯಾ ಘರಾ, ಮಾಧ್ಯಮಾನಿಂ ಖಬಾರ್ ಪ್ರಗಟ್ ಜಾಲ್ಲಿಚ್ ಲೋಕ್ ಚಿಕ್ಕಾರ್ ಭರೊನ್ ಗೆಲಾ. ಮಾಡ್ತಿರ್ ಸೊಜೆರಾಚಾ ಅಂತಿಮ್ ಸಂಸ್ಕಾರಾ ದಿಸಾ ನೆಸೊನ್ ಮಿಲಿಟರಿಚಾ ಮೊರ್ನಾ ಗಾಡ್ಯೆಕ್ ಬೈಕಾರ್ ಸಾಥ್ ದೀಮವ್ಕ್ ಮ್ಹಣೊನ್ ಎಕಾ ದೇಶಾಭಿಮಾನಿ ವಿದ್ಯಾರ್ಥಿ ಸಂಘಟನಾನ್ ಎದೊಳಚ್ ಶೆಂಭರೋಂ ಟೀ ಶರ್ಟಾಂಚೆರ್ ‘ವೀರ್ ಅಮರ್---ಪರ್ತ್ಯಾನ್ ಜಲ್ಮೊನ್ ಯೇ.’ ಮ್ಹಣೊನ್ ಛಾಪುನ್ ತ್ಯಾ ದೀಸ್ ನೆಸೊಂಕ್ ತಯಾರ್ ಕರ್ನ್ ಧವರ್ಲ್ಯಾಂತ್.

ದೇಶಾಭಿಮಾನಾಚೆಂ ಅಮಾಲ್ ಸಗ್ಳ್ಯಾ ಪರಿಸರಾಂತ್ ಇತ್ಲೆಂ ದಾಟ್ ಭರೊನ್ ಗೆಲಾಂಗಿ ತ್ಯಾ ಸರ್ಲೆಲ್ಯಾ ಸೊಜೆರಾಚಾ ಅವಯ್-ಬಾಪಯ್ಕ್, ಭಾವಾಂ-ಭಯ್ಣಿಂಕ್, ತ್ಯಾ ತರ್ನ್ಯಾ ಪತಿಣೆಕ್ ಆನಿ ತ್ಯಾ ಮಾಸುಮ್ ಭುರ್ಗ್ಯಾಂಕ್ ನಿರ್ಮಳ್ಕಾಯೆನ್ ಖಾಸ್ಗೆನ್ ದೋನ್ ದುಕಾಂ ಗಳವ್ನ್ ಅಪ್ಲೆಂ ಕಾಳಿಜ್ ಹಾಳೂ ಕರುಂಕ್ ಅವ್ಕಾಸ್ ನಾ. ತಾಂಚಿ ದುಕಾಂ ದೇಶಾಭಿಮಾನಾಚಾ ಗರ್ಮೆನ್ ಸುಕೊನ್ ಗೆಲ್ಯಾಂತ್. ಸಗ್ಳೊ ಏಕ್ ಅಸಂಗತ್ ನಾಟಕ್ ಕಸೊ ದಿಸ್ತಾ.

ಮ್ಹಾತಾರೊ ಬಾಪುಯ್ ಮ್ಹಣ್ತಾ: ದೇಶಾ ಖಾತಿರ್ ಜೀವ್ ದಿಲ್ಲ್ಯಾ ಮ್ಹಜಾ ಪುತಾಚೆರ್ ಮ್ಹಾಕಾ ವಿಶೇಸ್ ಅಭಿಮಾನ್ ಭಗ್ತಾ!

ತರ್ನಾಟಿ ವಿಧವ್ ಮ್ಹಣ್ತಾ: ಮ್ಹಜಾ ಎಕಾಚ್ ಪುತಾಕೀ ಸೊಜೆರ್ ಜಾವ್ನ್ ಧಾಡ್ನ್ ಮ್ಹಜಾ ಪತಿಚೆಂ ಸಪಾಣ್ ಜಾರಿ ಕರ್ತೆಲಿಂ!

ಮ್ಹಾತಾರಿ ಅವಯ್ ಖಂಯ್ ಗೀ ಶೂನ್ಯಾಂತ್ ಕಸಲೆಂಗಿ ದೆಕೊನ್ ಆಸಾ.

ಜೈ ಭಾರತ್ ಮಾತಾ!

( - ಜೆ.ವಿ. ಕಾರ್ಲೊ ಹಾಸನ್, ಮಾರ್ಚ್ 2016)