ವಿಚಾರ್‌ವಾದ್ ಅಂಕಣ್: ಮನ್ ಕಿ ಬಾತ್

ಕೊಂಕ್ಣಿ ಸಾಹಿತ್ಯಾಂತ್ ವಿಚಾರ್‌ವಂತ್ ಸಾಹಿತ್ಯಾಚೊ ಭೊರ್ಗೊಲ್ ಆಸಾ. ವಿಚಾರ್‌ವಂತ್ ಚಿಂತ್ಪಾಚಿ ಗರ್ಜ್ ಸಮಾಜಿಕ್ ಆಸಾ ಮ್ಹಣುನ್ ಚಿಂತೆಲ್ಯಾ ಸಂಪಾದಕಾಂಚೊಚ್ಚ್ ಬೊರ್ಗೊಳ್ ಕೊಂಕ್ಣೆಂತ್ ಆಸಾ. ದೆಕುನ್ ಲೊಕಾಂಕ್ ಕುಂಡೊ ಪಸಂದ್ ಮ್ಹಣುನ್, ಕುಂಡೊಚ್ಚ್ ರಸ್ಚ್ಯಾಂತ್ ಆನಿ ವಾಂಟ್ಚಾಂತ್ ತೆ ಸಮಧಾನ್ ಸೊಧ್ತಾತ್. ದೆಕುನ್ ರಾಂದ್ಪಾವೊಳಿ, ಹಾಸೊ, ಮಸ್ಕಿರಿ, ಕುಚುಲ್ಯೊ ಆನಿ ಕಿತೆಂ ಮಾತ್ತಿ ಗೊಬೊರ್.

ಆನಿ ವಿಪರ್ಯಾಸ್ ಮ್ಹಳ್ಯಾರ್, ಹಾಂಕಾಂ ಹಾಸೊ/ಹ್ಯೂಮರ್ ಮ್ಹಳ್ಳ್ಯಾ ಸಬ್ಧಾಚೊ ಮತ್ಲಬ್‌ಯೀ ಕಳಿತ್ ನಾ; ಹಾಸೊ ಮ್ಹಳ್ಯಾರ್ ಡಬ್ಬಲ್ ಮೀನಿಂಗಾಚ್ಯೊ ನೋನ್-ವೆಜ್ ಜೋಕ್ಸ್ ಸಾಂಗ್ಚ್ಯೊ ಮ್ಹಣುನ್ ಚಿಂತಾತ್. ಆನಿ ತಕ್ಲೆಂತ್ ಪಾವ್ಲಿ ಉಣಿ ಆಸ್ಚಾ ಥೊಡ್ಯಾಂಕ್ Rational ಅನಿ Revolutional ಮ್ಹಳ್ಳ್ಯಾ ಸಬ್ಧಾಚೊ ಮತ್ಲಬ್ ಸಯ್ತ್ ಕಳಿತ್ ನಾ. ಮಕ್ಕರ್ ಇತ್ಲ್ಯಾರ್‌ಚ್ಚ್ ನಾ, ಪಯ್ಸಿಲ್ಯಾ ಬೊಲ್ಯಾಂ ಇಡ್ಯಾಂನಿ ಲಿಪೊನ್ ಫಾತೊರ್ ಮಾರ್ಚಿ ಹಾಂಚಿ ಪಿಸಾಯ್. ಅಸಲ್ಯಾ ಪಾವ್ಲಿ ಉಣೆ ಆಸ್ಲೆಲ್ಯಾಂಕ್ ’ಬಾದೂರ್’ ಮ್ಹಣ್ ಸಮ್ಜತೆಲೆ ಆನಿ ವ್ಹಾರೆಂ ಘಾಲ್ತೆಲೆಯ್ ಯಥೇಶ್ಟ್ ಮಾಪಾನ್ ಅಸಾತ್. ಹಿ ಜಾಲ್ಯಾ ಆಮ್ಚಿ ಪರಿಗತ್. ಕೊಣಾಚ್ಯಾಕೀ ಬೊಲ್ಸಾಕ್ ಹಾತ್ ಘಾಲುನ್, ತಾಚೆಂಚ್ ಲುಟುನ್, ತಾಚ್ಯಾ ದುಡ್ವಾಂತ್ ಧರ್ಮಾಚೆಂ ಘೊಟುನ್, ಉಪ್ರಾಂತ್ ತಾಕಾಚ್ಚ್ ’ನೈತಿಕತೆಚೊ ಪಾಠ್’ ದಿತೆಲ್ಯಾ ಸಂಸಾರಾಂತ್ ಜಿಯೆತಾಸ್ತಾನಾ ಖರೆಂಚ್ ವಿಚಾರುಂಕ್ ಪಡ್ತಾ ’ಆಮಿ ಖರೆಂಚ್ ಜಿವ್ಯಾಂ ಮಧೆಂ ಆಸಾಂವ್?’.

ಜೆ.ವಿ.ಕಾರ್ಲೊ ಏಕ್ ವಿಚಾರ್‌ವಾದಿ ಚಿಂತ್ಪಿ/ಬರವ್ಪಿ ಮ್ಹಣುನ್ ಪಾತ್ಯೆತೆಲ್ಯಾಂ ಮಧ್ಲೊ ಹಾಂವ್‌ಯೀ ಎಕ್ಲೊಂ. ಆನಿ ಹಾಚೆಂ ಹೆಂ ಅಂಕಣ್ ವಾಚ್ತಾಂ ವಾಚ್ತಾಂ ತುಂಯ್ ಎಕ್ಲೊ ಜಾತಲೊಯ್ ಮ್ಹಳ್ಳೊ ಭರ್ವಸೊ ಆಸಾ ತರ್‌ಯೀ ಕೋಣ್ ವಾಚ್ತಲೊ ಅನಿ ಸಮ್ಜತಲೊ ಮ್ಹಳ್ಳೆಂ ಪಯ್ಲೆಂ ಸವಾಲ್ ಅಧುರೆಂಚ್ ಸೊಡ್ತಾಂ.

ಆಮಿ ಕಿತ್ಲೆ ವಿಶಾಲ್ ಮನಾಚೆ ಮ್ಹಣ್ ಸಮ್ಜಲ್ಯಾರೀ ದುಸ್ರ್ಯಾ ಧರ್ಮಾಂ ವಿಶಿಂ, ಸಂಸ್ಕೃತೆ ವಿಶಿಂ ಕಂಯ್‍ಗೀ ಮತಿಚಾ ಕೊನ್ಶ್ಯಾರ್ ಎಕಾ ಥರಾಚಿ ನಾಸೊಸ್ಣಿಕಾಯ್ ಲಿಪೊನ್ ಉರೊನ್ ಆಸ್ತಾಚ್ ಮ್ಹಳ್ಯಾರ್ ಫಟ್ ಜಾಂವ್ಚಿ ನಾ. ಜೋನ್ ಸುಂಟಿಕೊಪ್ಪಾಚಿ ಕಾಣಿ ‘ಶ್ರದ್ಧಾ’ ಅಸಲ್ಯಾ ಎಕಾ ಮನೋಭಾವನಾಚೆಂ ಅನಾವರಣ್ ಕರ್ತಾ. ಕಾಣಿ  ವಾಚುಲ್ಲಿಚ್ ಮ್ಹಜೊ ಉಗ್ಡಾಸ್ ಬೋವ್ ಪಾಟಿಂ, ಮ್ಹಳ್ಯಾರ್ ಹಾಂವ್ ಪಯ್ಲೆಂತ್‍ಗೀ ವ, ದುಸ್ರೆಂತ್‍ಗೀ ಶಿಕೊನ್ ಆಸ್ಚಾ ಕಾಳಾಕ್ ಪಾವ್ಲೊ. ಆಮ್ಕಾಂ ಲಾಗ್ಶಿಲೆಂ ಶ್ಹೆರ್ ಮ್ಹಳ್ಯಾರ್ ಸಕ್ಲೇಶ್ಪುರ್ ಜಾವ್ನಾಸ್ಲೆಂ ಆನಿ ತೆಂ ಆಮ್ಚಾ ಘರಾ ಥಾವ್ನ್ 18 ಕಿ.ಮಿ., ಪಯ್ಸ್ ಆಸುಲ್ಲೆಂ. ಮ್ಹಜ್ಯೊ ವ್ಹಡ್ ದೊಗೀ ಭಯ್ಣಿ ಎಕಾ ಹಿಂದು ಕುಟ್ಮಾಚಾ ಘರಾಂತ್ ಎಕಾ ವಿಂಗಡ್ ಕುಡಾಂತ್ ರಾವೊನ್ ಎಸೆಸೆಲ್ಸಿ ಶಿಕ್ತಾಲಿಂ ಆನಿ ಮ್ಹಾಕಾಯೀ ತಾಂಚೆ ಸಂಗಿ ಸೊಡ್‍ಲ್ಲೊ. ಆತಾಂಚಾ ಧಾವೆ ಕ್ಲಾಸಿಂತ್ಲ್ಯಾ ಭುರ್ಗ್ಯಾಂಕ್ ಪಳೆತಾನಾ, ತ್ಯಾ ಕಾಳಾರ್ ಧಾವೆಂತ್ ಶಿಕೊನ್ ಆಸ್ಚಾ ಮ್ಹಜಾ ಭಯ್ಣಿನಿಂ ತಾಂಕಾಯ್ ಸಾಂಬಾಳ್ನ್ ಮ್ಹಾಕಾಯ್ ಸಾಂಭಾಳ್ನ್ ಇಸ್ಕೊಲ್ ಶಿಕ್‍ಲ್ಲೆಂ ಚಿಂತಾನಾ ಅಜ್ಯಾಪ್ ದಿಸ್ತಾ.

ಆಮಿ ರಾವೊನ್ ಆಸ್ಚಾ ಘರ್ಚಿ ಧನಿನ್ ಎಕ್ಲಿ ವಿಧವ್ ಜಾವ್ನಾಸ್ಲಿ ಆನಿ ಆಮಿಂ ತಿಕಾ ‘ದೊಡ್ಡಮ್ಮ’ ಮ್ಹಣೊನ್ ಅಪಯ್ತೆಲ್ಯಾಂವ್. ಏಕ್ದೀಸ್ ಬಹುಶಃ ಮ್ಹಜಾ ಭಯ್ಣಿಂಕ್ ಕೊವೆಂತಾಂತ್ ಸ್ಕೂಲ್ ಡೇ ಆಸುಲ್ಲೊ. ಮ್ಹಾಕಾ ದೊಡ್ಡಮ್ಮಾಚಾ ಸುಪರ್ದಿಕ್ ಸೊಡ್ನ್ ತಿಂ ಗೆಲ್ಲಿಂ. ತೊ ದೀಸ್ ದೊಡ್ಡಮ್ಮಾಕ್ ದಿವ್ಳಾಕ್ ವೆಚೊ ದೀಸ್. ತಿ ಘರಾ ಆಸುಲ್ಲ್ಯಾ ಮ್ಹಾಕಾಯ್ ಘೆವ್ನ್ ದಿವ್ಳಾಕ್ ಗೆಲಿ. ಹಾಂವೆ ಪಯ್ಲೇ ಪಾವ್ಟಿಂ ದೀವ್ಳ್ ಪ್ರವೇಶ್ ಕರ್ಚೆಂ. ತ್ಯಾ ಘಾಂಟಿಂಚೊ ನಾದ್, ಊದುಬತ್ತೀಂಚೊ ಪರ್ಮಳ್ ಆನಿ ಧುಂವೊರ್, ಭೊಟಾಂಚೆ ಮಂತ್ರೋಚ್ಛಾರ್ ಸಗ್ಳೆಂ ದೆಕೊನ್ ಹಾಂವ್ ಪುರ್ತೊ ಘಾಬ್ರೆವ್ನ್ ಗೆಲ್ಲೊಂ. ಹಾಂವ್ ದೊಡ್ಡಮ್ಮಾಚಾ ಪಾಲ್ವಾಕ್ ಘಟ್ಟ್ ಧರುನ್ ತಿಕಾಚ್ ಚಿಡ್ಕೊನ್ ರಾವ್ಲೊಂ. ತಿಚಿ ಸರ್ತಿ ಯೆತಾನಾ ಹಾಂವೀ ಲಾಯ್ನಿರ್ ಮುಕಾರ್ ಪಾವ್‍ಲ್ಲೊಂ. ಆಮ್ಚೆ ಮುಕಾರ್ ಉಕಲ್ಲೆಲ್ಲ್ಯಾ ಆರತಿಕ್ ಹಾಂವೆಂಯ್ ತಿಚೆ ಬರಿಂಚ್ ಹಾತ್ ವೊಡ್ಡಾವ್ನ್ ದೊಳ್ಯಾಂಕ್ ಲಾಗಾಯ್ಲೆ. ಪ್ರಸಾದ್ ಘೆತ್ಲೊ. ಭಟಾನ್ ಮ್ಹಜಾ ಕಪಾಲಾಚೆರ್ ಕುಂಕುಮ ಘಸ್ಟಿಲೊ. ಪಾಟಿಂ ಯೆತಾನಾ ದೊಡ್ಡಮ್ಮಾನ್ ಕಾಣ್ಘೆವ್ನ್ ದಿಲ್ಲಿ ಚಿರ್ಮುಲಿ ಖಾಯಿತ್ತ್ ಹಾಂವ್ ದಿವ್ಳಾಂತ್ಲಿ ಗಜಾಲ್ ವಿಸ್ರೊನ್ ಗೆಲೊಂ.

ಆಮಿ ಘರಾ ಪಾವ್ತಾನಾ ಮ್ಹಜಿ ಭಯ್ಣಿಂ ಯೇವ್ನ್ ರಾಂದ್ಚಾರ್ ವೆಸ್ತ್ ಜಾಲ್ಲಿಂ. ಕೆದ್ನಾ ಮ್ಹಜಾ ವ್ಹಡ್ಲ್ಯಾ ಭಯ್ಣಿನ್ ಮ್ಹಜಾ ಕಪಾಲಾ ವಯ್ಲೆಂ ಕುಂಕುಮ ದೆಕ್ಲೆಂಗೀ ತೆಂ ನಾಗಿನ್‍ಚ್ ಜಾಲೆಂ. ತಾಚೊ ತೊ ಅವ್ತಾರ್ ಹಾಂವೆ ಹಾಚೆ ಆಧಿಂ ಕೆದಿಂಕ್‍ಚ್ ದೆಕೊಂಕ್ ನಾತ್ಲೊ. ಹಾತಾಂತ್ಲ್ಯಾ ಬಾಣ್ಶಿರ್ಯಾನ್ ತಾಣೆ ಮ್ಹಜಾ ಕಪಾಲಾ ವಯ್ಲೆಂ ಕುಂಕುಮ ಕಾಕ್ಕುಸ್ ಘಾಸುಲ್ಲೆ ಬರಿಂ ಪುಸುನ್ ಕಾಡ್ಲೊ ಆನಿ ಎಕಾ ಬಾರೀಕ್ ಲಾಂಕ್ಡಾಂತ್ ಮ್ಹಾಕಾ ಪೊಪಾಂವ್ಕ್ ಸುರು ಕೆಲೆಂ. ಮ್ಹಜೆಂ ದುಸ್ರೆಂ ಭಯ್ಣ್ ತಾಕಾ ಆಡಾಂವ್ಕ್ ಪ್ರಯತನ್ ಕರ್ತಾಲೆಂ ತರೀ ಮ್ಹಜೆಂ ವ್ಹಡ್ಲೆಂ ಭಯ್ಣ್ ಒನಕೆ ಓಬವ್ವ ಜಾಲ್ಲೆಂ. ಮ್ಹಜ್ಯೊ ಅರಾಬಾಯೊ ಆಯ್ಕೊನ್ ದೊಡ್ಡಮ್ಮಾನ್ ದಾಂವೊನ್ ಯೇವ್ನ್ ಮ್ಹಾಕಾ ಆರಾವ್ನ್ ಘೆನಾತ್ಲೆಂ ತರ್ ಮ್ಹಾಕಾ ಲಗಾಡ್‍ಚ್ ಕಾಡ್ತೆಂ ಕೊಣ್ಣಾ! ಮ್ಹಜಾ ಬಾಯೆಕ್ ಯೆಂ ಸಗ್ಳೆಂ ಆತಾಂ ಉಡಾಸ್ ನಾ. ತಾಕಾ ಎಕಾ ಸಂಗ್ತೆಚೊ ಮಾತ್ರ್ ಉಡಾಸ್ ಆಸಾ! ಮ್ಹಜೆಂ ಕಾಜಾರ್ ಜಾಲ್ಲ್ಯಾ ವಗ್ತಾ ಬಾಯೆನ್ ಮ್ಹಜಾ ಬಾಯ್ಲೆಕ್, ಉಪ್ರಾಂತ್ ವಿಸ್ರಾನಾಸ್ತಾಂ ಪುತಾಕ್ ಸಾಂಗುಲ್ಲೆಂ ಆಸಾ: ‘ಹೊ ಜೆರಿ ಆಸಾ ಪಳೆ, ಭಾರಿ ಪಾರ್ಪೊಳ್. ಮ್ಹಾಕಾ ಇತ್ಲೆಂ ದೊಸ್ತಾಲೊ ಕೀ ಹರ್ಯೇಕ್ ದೀಸ್ ಚಡ್ಡೇಂತ್ ಹಾಗೊನ್ ಯೆತಾಲೊ!’

ಮ್ಹಾಕಾ ದುಸ್ರೊ ಉಗ್ಡಾಸ್ ಯೆತಾ ಮುಸ್ಲಿಮಾಂಚಾ ಮೊಹರ್ರಾಮಾಚೊ. ತ್ಯಾ ದೀಸ್ ಮುಸ್ಲಿಮ್ ಭಾವಾಡ್ತಿ ಹರ್ಧೆಂ ಬಡವ್ನ್, ಸ್ವ-ಶಿಕ್ಷಾ ಲಾವ್ನ್ ಸಕ್ಲೇಶ್ಪುರ್ ಪೆಂಟೆಂತ್ ಪುರ್ಶಾಂವ್ ಯೆತಾಲೆ. ಸಗ್ಳೊ ಲೋಕ್, ಜಾತ್ ಕಾತ್ ಪರ್ವಾ ನಾಸ್ತಾಂ ರಸ್ತ್ಯಾ ಬಗ್ಲೆನ್ ಜಮೊ ಆಸ್ತಾಲೊ. ಎಕ್ಲೊ ಮೌಲ್ವಿ ಹಾತಿಂ ಮೊರಾಂಚಾ ಪಾಕಾಚಿಂ ಸಾರೊನ್ ಘೆವ್ನ್ ಸಕ್ಡಾಂಕೀ ಮಾರ್ನ್ ಯೆತಾಲೊ. ಹಾಚಾ ಸಾರೊನಿಚೆ ಮಾರ್ ಖೆಲ್ಯಾರ್ ಅದೃಷ್ಟ್ ಮ್ಹಣೊನ್ ಲೋಕ್ ಮಾಂದ್ತಾಲೊ. ಮ್ಹಜಾ ಭಯ್ಣಿಚೆ ದೊಳೆ ಚುಕವ್ನ್ ಹಾಂವೀ ಹ್ಯಾ ಜಮ್ಯಾಂತ್ ರಾವೊನ್ ಆಸ್ತಾಲೊಂ!

ಕ್ರಿಸ್ತಾಂವಾ ಮಧೆಂ ಅಸಲಿ ನಾಸೊಸ್ಣಿಕಾಯ್ ತೀಸ್ ಚಾಳಿಸ್ ವರ್ಸಾಂ’ಧಿಂ ದಿಸ್‍ಲ್ಲೆ ತಿತ್ಲಿ ಆತಾಂ ದಿಸಾನಾ ತರೀ ಪುರ್ತಿ ಆಳ್ವೊನ್ ಗೆಲ್ಯಾ ಮ್ಹಣೊನ್ ಸಾಂಗೊಂಕ್ ಜಾಯ್ನಾ. ಕೊಂಕಣಿ ಕ್ರಿಸ್ತಾಂವಾಂಕ್ ಆಪ್ಲಿ ಮೂಳ್ ಸಂಸ್ಕೃತಿ ಪಾಳಿನಾತ್ಲೆಬರಿಂ ಪುಡ್ತುಗೇಜಾನಿಂ ಘಾಲ್ಲ್ಯಾ ಬಂಧಡೆ ನಿಮ್ತಿಂ ಜಾವ್ಯೆತ್, ವ ಆಧುನಿಕ್ ಶಿಕ್ಷಣಾ ಥಾವ್ನ್ ಜಾವ್ಯೆತ್ ಆಮಿಂ ತೆವ್ಶಿನ್ ಪಾಶ್ಚಾತ್ಯ್‍ಯೀ ನ್ಹಯ್ ಹೆವ್ಶಿನ್ ಭಾರತೀಯ್‍ಯೀ ನ್ಹಯ್ ತಸಲಿ ಸಂಸ್ಕೃತಿ ಪಾಳುನ್ ಯೆತೇ ಆಸಾಂವ್.

ಧರ್ಮಾ ವರ್ನಿ ಸಂಸ್ಕೃತೆಚಿ ವೋಡ್ ಬಳಾಧಿಕ್ ಮ್ಹಳ್ಳ್ಯಾಕ್ ಇತಿಹಾಸ್ (ಲಾಗ್ಶಿಲೆಂ ಉಧಾಹರಣ್ ಪಾಕಿಸ್ತಾನಾ ಥಾವ್ನ್ ಬಾಂಗ್ಲಾದೇಶಾಚೆಂ ವಿಭಜನ್.) ಸಾಕ್ಸ್ ಜಾವ್ನಾಸಾ. ಹೆಂ ಸತ್ ಜಣಾ ಜಾಲ್ಲಿ ಪವಿತ್ರ್ ಸಭಾ ಆರಾಧನ್ ವಿಧಿ ಸ್ಥಳೀಯ್ ಭಾಸ್, ರಿತಿ ರಿವಾಜಿನಿಂ ಚಲಂವ್ಕ್ ರಾಜಿ ಜಾತಾ. ಲಾತಿನ್ ಭಾಸ್ ನಪಂಯ್ಚ್ ಜಾಲಿ. ಮೀಸಾನಿಂ ಆರತಿ, ಪಣ್ತ್ಯೊ, ದೇಶಿ ಸಂಗೀತಾನ್ ವಿಣ್ಲೆಲ್ಲಿಂ ಭಜನಾಂ ಸುರು ಜಾಲಿಂ. ಭಾರತೀಯಾಂಚಾ ಕಾಳ್ಜಾಕ್ ಧಾಡ್ ಘಾಲುಂಕ್ ಹಿ ಸುಲಭ್ ವಾಟ್ ಮ್ಹಣೊನ್ ಇಗರ್ಜ್ ಮಾತೆನ್ ಚಿಂತ್ಲೆ ಜಾಯ್ಜೆ. ಹಾಂತು ಬರೆಂಪಣ್ ಜಾಲೆಂ ತರೀ ದುಸ್ರೆ ಸಭಾರ್ ಸಮಸ್ಸೆ ಉದೆಲೆ. ಉಧಾಹರಣಾಕ್ ಇಗರ್ಜಿನಿಂ ವಾಪಾರ್ಚಿ ಲಿತುರ್ಜಿಕ್ ಭಾಸ್, ಇಗರ್ಜ್ ಮಾತೆಚಾ ಆಡಳ್ತ್ಯಾಂತ್ ಸಮಾಸಮ್ ಪ್ರಾತಿನಿಧಿತ್ವ್ ನಾ ಮ್ಹಣೊನ್ ಅಲ್ಪ್‍ಸಂಕ್ಯಾತಾಂಚೊ ವಿಳಾಪ್ ಇತ್ಯಾದಿ..

ಆದ್ಲ್ಯಾ ಅಂಕಣಾಂತ್ ಹಾಂವ್ ಬೊಂಬಯ್ ಗೆಲ್ಲೆ ವಿಶ್ಯಾಂತ್ ಬರಯಿಲ್ಲೆಂ. ತ್ಯಾ ವಗ್ತಾ ಮ್ಹಾಕಾ ಪೊಯ್ಣಾರಿ.ಕಾಂ ಉಗ್ತಾವಣ್ ಜಾಲ್ಲ್ಯಾ ಗ್ಯಾನ್ ಆಶ್ರಮಾಕ್ ಮ್ಹಜಾ ಇಷ್ಟಾನ್ ಅಪವ್ನ್ ವೆಲ್ಲೆಂ. ಗ್ಯಾನ್ ಆಶ್ರಮ್ ಏಕ್ ರಾನ್ ಸುವಾತೀ ಮಧೆಂ ಆಸುಲ್ಲೆಂ ಆನಿ ಥೈಂ ರಾನಾ ಮಧೆಂ ವೊರೆಂ ವಿಂಗಡ್ ಏಕ್ ಕುಟೀರ್ ಬಾಂಧುನ್ ಎಕ್ಲೊ ಮ್ಹಾತಾರೊ ಜರ್ಮನ್ ಪಾದ್ರ್ಯಾಬ್ ರಾವ್ತಾಲೊ. ತಾಣೆ ಆಮ್ಚಾ ಋಷಿಂ ಬರಿಂ ಖಾಡ್, ಕೇಸ್ ಸೊಡುಲ್ಲೆ ಆನಿ ತೊ ಕಾವಿ, ವ ಕೇಸರ್ ನ್ಹೆಸ್ತಾಲೊ. ಥೈಂ ಭಾರತೀಯ್ ಶೈಲೆರ್ ಸುವಾರ್ತಾ ಪ್ರಸಾರ್ ಕರ್ಚೆ ವಿಶಿಂ ಶಿಕ್ಷಣ್ ದಿತಾಲೆ. ಹಾಂವ್ ಬೊಂಬಯ್ ಸೊಡ್ನ್ ಪಾಟಿಂ ಗಾಂವಾಕ್ ವೆಚೆ ಪಯ್ಲೆಂಚ್ ತ್ಯಾ ಪಾದ್ರ್ಯಾಬಾನ್ ‘I am a Christian Bramhin..’ ಮ್ಹಣೊನ್ ಇಲ್ಲಸ್ಟ್ರೇಟೆಡ್ ವೀಕ್ಲಿ ಒಫ್ ಇಂಡಿಯಾಕ್ ದಿಲ್ಲೆಂ ಸಂದರ್ಶನ್‍ಯೀ ವಾಚ್‍ಲ್ಲೆಂ. ಪುಣ್ ಕಾವಿ ವ ಕೇಸರ್ ನ್ಹಸ್ಲಲ್ಲೊ ಕ್ರಿಸ್ತಾಂವ್ ಧರ್ಮ್ ಪ್ರಚಾರಕ್ ಹೊ ಪಯ್ಲೊ ವ, ನಿಮಾಣೊ ನ್ಹಯ್. ಅಸಲಿಂ ಪನ್ನಾಸ್ ಆಶ್ರಮಾಂ ಭಾರತಾಂತ್ ತುಮ್ಕಾಂ ಪಳೆಂವ್ಕ್ ಮೆಳ್ತಾತ್ ಗೂಗಲಾಚೆರ್ ಸೊದ್ಲ್ಯಾರ್!

ಪ್ರತಿರೋಧ್: ತೆಣೆ-ಹೆಣೆ

ಎಕಾ ವಾಟೆನ್ ಕ್ರಿಸ್ತಾಂವ್‍ಪಣಾಚಾ ಭಾರತೀಕರಣಾಕ್ ಕ್ರಿಸ್ತಾಂವ್ ಭಾವಾಡ್ತ್ಯಾನಿಂ ಪ್ರತಿರೋಧ್ ವ ಅಸೊಸ್ಣಿಕಾಯ್ ದಾಕಾಯ್ಲ್ಯಾರ್, ತೆಣೆ ‘ಷಡ್ಯಂತ್ರ್’ ‘ದಗಲ್ಬಾಜ್’ ಮ್ಹಣೊನ್ ಹಿಂದು ಸುರಿ ಪಾಜುನ್ ತಯಾರ್ ಜಾಲ್ಯಾತ್. ದೋನ್ ತೀನ್ ವರ್ಸಾಂ’ಧಿಂ ಕಾರ್ಡಿನಲ್ ಟೆಲೆಸ್ಪೊರ್ ಪಿ. ಟೊಪ್ಪೊನ್ ಜಾರ್ಖಾಂಡಾಚಾ ಧುರ್ವಾ ಜಿಲ್ಲ್ಯಾಂತ್ಲ್ಯಾ ಸಿಂಗ್‍ಪುರ್ ಹಳ್ಳೆಂತ್ ಜೆಜು ಬಾಳ್ಕಾಕ್ ಉಕಲ್ಲೆಲ್ಲ್ಯಾ ‘ಸರನಾ’ ರಾನ್ ಕುಳಿಯೆಚಾ ಸ್ತ್ರೀಯೆ ಬರಿಂ ದವ್ಯಾ ಕಾಪ್ಡಾರ್ ತಾಂಬ್ಡ್ಯಾ ದೆಗೆಚೆಂ ಕಾಪಾಡ್ ನ್ಹೆಸ್ಲೆಲ್ಯಾ ಮರಿಯೆಚಿ ಇಮಾಜ್ ಅನಾವರಣ್ ಕೆಲ್ಲೆಲ್ಲ್ಯಾಕ್ ಜಬರ್‍ದಸ್ತ್ ವಿರೋಧ್ ಜಾವ್ನ್ ‘ಸರನಾ’ ಸಮಾಜಿನ್ ವ್ಹಡ್ ಪುರ್ಶಾಂವ್ ಕಾಡ್ಲೊ. ತಾಂಚೊ ಧರ್ಮ್ ಗುರು ಬಂಧಾ ಟಿಗ್ಗಾನ್ ಮ್ಹಳ್ಳೆಂ: ‘ಮುಗ್ಧ್ ಸರನಾ ಲೊಕಾಕ್ ಕನ್ವೆಡ್ತರ್ ಕರ್ಚೆಂ ಷಡ್ಯಂತ್ರ್ ಹೆಂ. ಬಿಲ್ಕುಲ್ ಹೆಂ ಸಾರ್ಕೆಂ ನ್ಹಯ್. ಸರನಾ ಲೋಕ್ ನಿಸರ್ಗ್ ಮಾಯೆಚೆಂ ಆರಾಧನ್ ಕರ್ತಾ. ಹೆ ಕ್ರಿಸ್ತಾಂವ್, ಸರನಾ ಮಾಂಯ್ ಅಂಕ್ವಾರ್ ಮರಿ ಮ್ಹಣೊನ್ ಆಮ್ಕಾಂ ಬಾನಾಂವ್ಕ್ ಪ್ರೇತನ್ ಕರ್ತೇ ಆಸಾ.’

( - ಜೆ.ವಿ. ಕಾರ್ಲೊ ಹಾಸನ್, ಫೆಬ್ರೆರ್ 2016)