ಬದಲ್ಚ್ಯಾ ಸಂಸಾರಾಚೆಂ ನೇಮ್ ಅಶೆಂ ಆಸುಯೆತಾ; ಕೊಣಾಚ್ಯಾಕೀ ಗುನ್ಯಾಂವಾಕ್, ಕೊಣೆಂಕೀ ರಾಜ್ವಟ್ಕಿ ಚಲಂವ್ಕ್ ಕೊಣಾಚ್ಯಾಕೀ ಬಳಾಕ್ ಗಳ್ಸುನ್ ಅಮಾಯಕಾಂಚೆರ್ ತೆಂ ಬಳ್ ಪ್ರಯೋಗ್ ಕರ್ಚೆಂ ಸದಾಂಚೆಂ. ದೆಕುನ್ ಹಾಂಗಾಸರ್ ಗಳ್ಯಾಂನಿ ಪದಾಂ ಯೆಂವ್ಚೆ ಬದ್ಲಾಕ್ ಗೆಟೆಲ್ಲೆಂ ರಗತ್ ಯೆತಾ. ಕನ್ನಡ ಭಾಶೆಂಚ್ಯಾ ಹ್ಯಾ ಮಾರ್ಮಿಕ್ ಕವಿತೆಚೆಂ ಕೊಂಕಣಿ ತರ್ಜಣ್ ಹೆಂ ಕಾಂಯ್ ಥೊಡ್ಯಾಂಕ್ ಕವಿತಾ ಬರಂವ್ಚ್ಯಾ ದಿಶೆಂತ್ ತ್ರಾಣ್ ದೀಂವ್ಕ್ ಸಕತ್ ಮ್ಹಳ್ಳ್ಯಾ ಭರ್ವಶ್ಯಾನ್.

- ಸಂ

ಆಂಕ್ಡೊ - 17. ಭೊಗ್ಶಿಯಾತ್ ಪದಾಂ ಚೊರಿ ಜಾವ್ನಾಂತ್

ಭೊಗ್ಶಿಯಾತ್ ಪದಾಂ ಚೊರಿ ಜಾವ್ನಾಂತ್

ಪದಾಂ ಯೇನಾಂತ್ ಗಳ್ಯಾಂನಿ ಆತಾಂ
ಫಕತ್ ಗೆಟೆಲ್ಲೆಂ ರಗತ್
ಮೊಡ್ಯಾಂಕ್ ಲಾಸ್‌ಲ್ಲಿ ಸೊಸುಂಕ್ ಜಾಯ್ನಾಸ್ಲಿ ಘಾಣ್,
ರಾಗಾರ್ ಜಾಲ್ಯಾತ್ ಸಂತೊಸ್ ಭೊಗ್ತೆಲೆ ಸಗ್ಳೆ
ಹಿಂ ದಳ್ದಿರ್ ಪದಾಂ ಕಂಯ್?

ಮೊಗಾಳ್ ಮಾನೆಸ್ತಾನೊ,
ಬರೇಲಿಂತ್ ಕಿಡ್ಯಾಂಚ್ಯಾ ವಕ್ತಾಂತ್ ನ್ಹಾಂವ್ಕ್ ಬಸ್ಲೆಲ್ಯಾಂಚ್ಯಾ
ಪಾಂಯಾಂ ಪದಾ ಆಸ್ಲಿಂ ಪದಾಂ;
ಭೋಜ್‌ಪುರಾಂತ್ ಭುಕೆಂತ್ ದೊಳೆ ಧಾಂಪುನ್
ಇಕ್ರಾ ವರ್ಸಾಂಚ್ಯಾ ಚೆಡ್ಯಾಚ್ಯಾ ದೊಳ್ಯಾಂನಿ
ರಾಯಚೂರು ಆವ್ಘಡಾಂತ್ ನಾತ್‍ಲ್ಲ್ಯಾ
ತೆಲಂಗಾಣಂತ್ ಆಟ್ ಜಣಾಂಚ್ಯಾ ಗೊಮ್ಟ್ಯಾಂನಿ
ಒಸ್ಮಾನಿಯಾ ಆಸ್ಪತ್ರೆಂತ್ ಜಿವಿಂ ಮೊಡಿ ಜಾಲ್ಲ್ಯಾ
ಚಾರ್ ಕೂಲ್ಕಾರ್ ಬಾಯ್ಲಾಂಚ್ಯಾ ಹರ್ಧ್ಯಾಂನಿ
ಮುಂಬಯ್-ಗುಜರಾತ್ ರಾಜ್‌ರಸ್ತ್ಯಾಚೆರ್
ಟ್ರಕ್ ಚಡುನ್, ಜೀವ್ ಸಾಂಡ್ಲೆಲ್ಯಾಂಚ್ಯಾ ಹುನ್ ರಕ್ತಾಂತ್
ಖಾಸ್ಗಿ ಬಸ್ಸಾಚ್ಯಾ ಆವ್ಘಡಾಂತ್ ಮೆಲ್ಲ್ಯಾ
ಸೋನಿಪತ್‌ಚ್ಯಾ ಶೂ ಫ್ಯಾಕ್ಟರಿಂತ್ ಕಾಮಾಚ್ಯಾ ಸ್ವಪ್ಣಾಂನಿ
ರಾನ್ ವಾಟೆರ್ ಚಲ್ತಾನಾ ಉಜ್ಯಾಕ್ ಶಿರ್ಕಲ್ಲ್ಯಾ
ತಮಿಳ್‌ನಾಡ್‌ಚ್ಯಾ ಪಾಂಚ್ ಪಾಟ್ಯಾಂಚ್ಯಾ ಆಳಾಂಚ್ಯಾ ಬೊಬೆಂತ್
ದೂದ್ ಹಾಡುಂಕ್ ಯೇವ್ನ್ ಪೊಲಿಸಾಂಚ್ಯಾ ಲಾಠಿಕ್ ಬಲಿ ಜಾಲ್ಲ್ಯಾ
ಕೊಲ್ಕಾತ್ತಾಚ್ಯಾ ಬತ್ತೀಸ್ ಜಣಾಂಚ್ಯಾ ರಾಗಾಂತ್
ಆಸ್ಪರೆಥಾವ್ನ್ ಘರಾಶಿಂ ಚಲ್ತಾನಾ ಉಸ್ವಾಸ್ ಸೊಡುನ್
ಸೂರತ್‌ಚ್ಯಾ ಬಾಸಟ್ ಜಣಾಂಚ್ಯಾ ಉಸ್ವಾಸಾಂತ್...

ಆಡಳ್ತೆದಾರಾಂಚ್ಯಾ ಪಿಸಾಯೆಕ್ ಬಲಿ ಜಾಲ್ಲ್ಯಾ ಹಾಂಚೆ ಸರ್ವಾಂನಿ
ತುಮಿ ಸೊಧುನ್ ಆಸ್ಚಿಂ ಪದಾಂ ಆಸ್ಲಿಂ
ಆತಾಂ ತುಮ್ಚ್ಯಾ ಗಳ್ಯಾಂನಿ ಯೆಂವ್ಚ್ಯಾ
ಗೆಟೆಲ್ಲೆಂ ರಗತ್ ಮೊಡೆಂ ಲಾಸ್‌ಲ್ಲಿ ಘಾಣ್ ಹಾಂಚಿಚ್,
ಭಿಂಯೆನಾಕಾತ್.. ಮುಕಾರ್ ಎಕಾ ದಿಸಾ
ತುಮ್ಚ್ಯಾ ಗಳ್ಯಾಂನಿ ಪದಾಂ ಆಯ್ಲ್ಯಾರೀ
ಹಾಂಚಿಂಚ್ ತಿಂ ಆಸ್ತಲಿಂ!

***

[ಕನ್ನಡ  ಮೂಳ್: ಸಹ್ಯಾದ್ರಿ ನಾಗರಾಜ್, ಕೊಂಕಣಿಕ್: ವಲ್ಲಿ ಕ್ವಾಡ್ರಸ್]

ಸಹ್ಯಾದ್ರಿ ನಾಗರಾಜ್: ಚಿಕ್‌ಮಗಳೂರ್‌ಚ್ಯಾ ನಂದಿ ಗಾಂವ್ಚೊ ಏಕ್ ಪತ್ರ್‌ಕರ್ತ್ ಜಾವ್ನಾಸ್ಚೊ, ಏಕ್ ವೃತ್ತಿಪರ್ ಫೊಟೊಗ್ರಾಫರ್ ತಶೆಂಚ್ ಕವಿ. ಸದ್ದ್ಯಾಕ್ ಬೆಂಗ್ಳುರಾಂತ್ ವಸ್ತಿ ಕರುನ್ ಆಸ್ಚೊ ಹೊ ಕನ್ನಡ್ ಭಾಶೆಂತ್ ಬರಯ್ತಾ.

[अनुवादित कविता] रंगाळ सावळी

बदल्च्या संसाराचें नेम अशें आसुयेता; कोणाच्याकी गुन्यांवाक, कोणेंकी राज्वटकी चलवंक कोणाच्याकी बळाक गळसून अमायकांचेर तें बळ प्रयोग कर्चें सदांचें. देकून हांगासर गळ्यांनी पदां येंवचे बदलाक गेटेल्लें रगत येता. कन्नड भाशेंच्या ह्या मार्मीक कवितेचें कोंकणी तर्जण हें कांय थोड्यांक कविता बरंवच्या दिशेंत त्राण दीवंक सकत म्हळ्ळ्या भर्वश्यान.

- सं

भोगशियात पदां चोरी जावनांत

पदां येनांत गळ्यांनी आतां
फकत गेटेल्लें रगत
मोड्यांक लास‌ल्ली सोसुंक जायनासली घाण,
रागार जाल्यात संतोस भोग्तेले सगळे
हीं दळदीर पदां कंय?

मोगाळ मानेसतानो,
बरेलिंत किड्यांच्या वक्तांत न्हावंक बसलेल्यांच्या
पांयां पदा आसलीं पदां;
भोज‌पुरांत भुकेंत दोळे धांपून
इक्रा वर्सांच्या चेड्याच्या दोळ्यांनी
रायचूरू आवघडांत नात‍ल्ल्या
तेलंगाणंत आट जणांच्या गोमट्यांनी
ओस्मानिया आस्पत्रेंत जिवीं मोडी जाल्ल्या
चार कूल्कार बायलांच्या हर्ध्यांनी
मुंबय-गुजरात राज‌रसत्याचेर
ट्रक चडून, जीव सांडलेल्यांच्या हून रक्तांत
खासगी बस्साच्या आवघडांत मेल्ल्या
सोनिपत‌च्या शू फ्याकटरिंत कामाच्या स्वपणांनी
रान वाटेर चल्ताना उज्याक शिर्कल्ल्या
तमीळ‌नाड‌च्या पांच पाट्यांच्या आळांच्या बोबेंत
दूद हाडुंक येवन पोलिसांच्या लाठीक बली जाल्ल्या
कोल्कात्ताच्या बत्तीस जणांच्या रागांत
आस्परेथावन घराशीं चल्ताना उस्वास सोडून
सूरत‌च्या बासट जणांच्या उस्वासांत...

आडळतेदारांच्या पिसायेक बली जाल्ल्या हांचे सर्वांनी
तुमी सोधून आसचीं पदां आसलीं
आतां तुमच्या गळ्यांनी येंवच्या
गेटेल्लें रगत मोडें लास‌ल्ली घाण हांचीच,
भिंयेनाकात.. मुकार एका दिसा
तुमच्या गळ्यांनी पदां आयल्यारी
हांचिंच तीं आसतलीं!

***

[कन्नड मूळ: सह्याद्री नागराज, कोंकणीक: वल्ली क्वाड्रस]

सह्याद्री नागराज: चीक‌मगळूर‌च्या नंदी गांवचो एक पत्र‌कर्त जावनासचो, एक वृत्तिपर फोटोग्राफर तशेंच कवी. सद्द्याक बेंगळुरांत वसती करून आसचो हो कन्नड भाशेंत बरयता. 

[Onuvadit Kovita] Rongall Saulli

Bodolchea somsarachem nem' oxem asuyeta; konnacheaki guneamvak, konnenki rajvottki cholounko konnacheaki bollak gollsun omaikancher tem boll proyog korchem sodanchem. Dekun hangasor golleamni podam yemvche bodlak gettel'lem rogot yeta. Kon'noddo bhaxenchea hea marmik kovitechem konkonni torzonn hem kaim thoddeank kovita boromvchea dixent trann diunko sokot mholl'llea bhorvoxean.

- Som

Bhogxiat podam chori zaunant

Podam yenant golleamni atam
fokot gettel'lem rogot
moddeank las‌l'li sosunk zainasli ghann,
ragar zaleat sontos bhogtele soglle
him dolldir podam kom-i?

mogall manestano,
borelint kiddeanchea voktant nhaunko bosleleanchea
pamyam poda aslim podam;
bhoz‌purant bhukent dolle dhampun
ikra vorsanchea cheddeachea dolleamni
raichuru aughoddant nat‍l'lea
telongannont att zonnanchea gomtteamni
osmania aspotrent jivim moddi zal'lea
char kulkar bailanchea hordheamni
mumboi-guzorat raz‌rosteacher
ttrok choddun, jivo sanddleleanchea hun roktant
khasgi bossachea aughoddant mel'lea
sonipot‌chea xu feakttorint kamachea svopnnamni
ran vatter choltana ujeak xirkol'lea
tomill‌nadd‌chea panch patteanchea allanchea bobent
dud haddunk yeun polisanchea latthik boli zal'lea
kolkat'tachea bot'tis zonnanchea ragant
asporethaun ghoraxim choltana usvas soddun
surot‌chea basott zonnanchea usvasant...

Addolltedaranchea pisayek boli zal'lea hanche sorvamni
tumi sodhun aschim podam aslim
atam tumchea golleamni yemvchea
gettel'lem rogot moddem las‌l'li ghann hanchich,
bhimyenakat.. Mukar eka disa
tumchea golleamni podam aileari
hanchinch tim astolim!

***

[Kannad mull: Sahyadri Nagaraj, Konknnik: Valley Quadros]

Sahyadri Nagaraj: Chikmagallurchea Nandi gamvcho ek potr‌kort zaunascho, ek vrit'tipor fottografor toxench kovi. Sod'deak Bangalorant vosti korun ascho ho kon'nodd bhaxent boroita.