ಸಾಹಿತ್ಯಾಂತ್ ಮನೋರಂಜನ್ ಏಕ್ ಪ್ರಕಾರ್, ಪುಣ್ ಮನೋರಂಜನ್ ಸರ್ವ್ ಸಾಹಿತ್ಯ್ ಜಾಯ್ಜಯ್ ಮ್ಹಣುನ್ ನಾ. ಜೊಕ್ತ್ಯಾ ಸವಾಲಾಂಕ್ ಜೊಕ್ತ್ಯೊ ಜವಾಬಿ ದೀಂವ್ಕ್ ಹಾಂಗಾಸರ್ ಜೊಕ್ತೊ ವೆಕ್ತಿ ಆಸಾ, ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ಹೊ ಸರ್ವಾಂಕ್ ವ್ಹಳ್ಕೆಚೊ ಅನಿ ಆಪ್ಲ್ಯಾ ಸಮಾಜಿಕ್ ಕಾಳ್ಜೆಭರಿತ್ ಲೇಖನಾಂನಿ ಹಾಣೆಂ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಕೊಂಕ್ಣಿ ವಾವ್ರ್ ತಸೆಂಚ್ ಕೊಂಕ್ಣಿ ವಾವ್ರಾಕ್ ಪಾಟಿಂಬೊ ದಿಲಾ. ಹ್ಯಾ ಅಂಕಣಾಂತ್ ಅಸಲಿಂ ಸವಾಲಾಂ ಆಮಿಂ ಆಶೆತಾಂವ್, ಫಕತ್ತ್ ಸಂಯ್ಬಾಕ್/ಸ್ವಭಾವಾಕ್ ಮಾತ್ರ್ ಖೊಂಕ್ಚೆತಸ್ಲಿಂ ಸವಾಲಾಂ ಶಿವಾಯ್ ವೆಕ್ತಿಕ್/ಸಂಸ್ಥ್ಯಾಕ್ ನ್ಹಯ್. ಫಾತೊರ್ ಮಾರ್ಚೆಂ ಭೋವ್ ಸಲೀಸ್ ಪುಣ್ ಫಾತೊರ್ ವಿಂಸ್ಚೆಂ ತ್ರಾಸಾಚೆಂ. ವಾಚ್ಪ್ಯಾಂನಿ ಹಿಂ ಸವಾಲಾಂ ಶೀದಾ ನಾನುಕ್ ಧಾಡ್ಯೆತಾ, ವಿಂಚ್ಣಾರ್ ಸವಾಲಾಂಕ್ ಮಾತ್ರ್ ಆಮಿ ಜವಾಬ್ ದಿತೆಲ್ಯಾಂವ್. ತುಮ್ಚ್ಯಾ ಅಭಿಪ್ರಾಯೆಕ್ ಉಗ್ತ್ಯಾ ಮನಾಚೊ ಸ್ವಾಗತ್ ಆಸಾ.

ಮಯ್ನೊ: ಅಕ್ತೋಬರ್ 2016

ಸ: ಆದಿಂ ಧಾ - ಬಾರಾ ಭುರ್ಗಿಂ ಜಲ್ಮಾಲ್ಯಾರಿ ಆವಯ್ - ಬಾಪಯ್ ಸಂತೊಸಾನ್ ಆಸ್‍ಲ್ಲಿಂ.ಆತಾಂ ಏಕ್ ದೊಗಾಂ ಭುರ್ಗ್ಯಾಂಚೆಂ ಪಾಲನ್ - ಪೋಷಣ್ ಕರ್‍ನ್ ವ್ಹಡ್ ಕರ್‍ತಾನಾ ಆವಯ್-ಬಾಪಯ್ ರಡ್ತಾತ್ ಕಿತ್ಯಾಕ್ ?

ಜ: ಆದಿಂ ಘಾಮ್ ಗಳೊವ್ನ್ ತೊಟಾಂತ್ ಕಾಮ್ ಕರ್ನ್ ಪ್ರೋಟಿನ್‍ಯುಕ್ತ್ ಖಾಣ್ ಮೆಳ್ತಾನಾ ಖಂಚೊಯ್ ಪಿಡಾ ಲಾಗಿಂ ಯೆನಾತ್‍ಲ್ಲ್ಯೊ.ಆತಾಂ ಸಗ್ಳೊ ದೀಸ್ ಥಂಡ್ A.Cಂತ್ ಬಸೊನ್ , ಜೀವ್ ಪಿಟೊ ಕರಿನಾಸ್ತಾನಾ ಸತ್ವ್ ಹೀನ್ ಖಾಣಾಂ ಖಾವ್ನ್ ನಾಂವ್ ನಾತ್‍ಲ್ಲ್ಯೊ ಪಿಡಾ ಆಪ್ಣಾವ್ನ್ ಕಳ್ವಳೊನ್ ಆಸ್ತಾನಾ , ತಾಂಚ್ಯಾ ಪಿಲ್ಕಾಟ್ಯಾಂನಿ ಬೊಯ್ ಪ್ರೆಂಡ್ - ಗರ್ಲ್ ಫ್ರೆಂಡ್ ಮುಣೊನ್ ಘರಾಂತ್ ದೋನ್ ಪೌವ್ಟಿಂ ಜೆವ್ಣಾಕ್ ಕಷ್ಟ್ ತರೀ Five Star Hotel ಚಿಂ ಸ್ವಪ್ಣಾಂ ದೆಖ್ತಾನಾ ತಿಂ ಲಾಚಾರ್ ಆವಯ್ ಬಾಪಯ್ ಆನಿ ಕಿತೆಂ ಕರ್ತಾಲಿಂ ?

ಸ : ಮ್ಹಾಕಾ ಮೊಜ್ಯಾ ಜಿವಿತಾ ವಯ್ರ್ ಲ್ಹಾನ್ ಕಾಣಿ ಬೊರಯ್ಜೆ ಮುಣೊನ್ ಆಶಾ. ತುಜಿ ಕಿತೆಂ ಆಪೇಕ್ಷಾ ?

ಜ: "ಪಯ್ಣಾರಿ"ಚೊ ಮೂಳ್ ಉದ್ದೇಶ್‍ಚ್ ನವ್ಯಾ ಲೇಖಕ್ / ಲೇಖಕಿಂಕ್ ಪ್ರೋತ್ಸಾಹ್ ದೀವ್ನ್,ತಾಂಚಿ ಸಾಹಿತಿಕ್ ಪ್ರತಿಭಾ ಉಜ್ವಾಡಾಕ್ ಹಾಡ್ಚೊ.ಮುಕಾರ್ ಸರ್ ಬಾಯೆ....ತುಕಾ ಉಗ್ತೊ ಸ್ವಾಗತ್.

ಸ : ಖರೊ ಮೋಗ್ ಕರ್ತೆಲ್ಯಾಂಕ್ ಖರೊ ಮೊಗ್ ಮೆಳಾನಾ.ಹ್ಯಾ ವಿಶಯಾಂತ್ ತುಜಿ ಆಭಿಪ್ರಾಯ್ ?

ಜ: ಜೆಜು ಕ್ರೀಸ್ತ್‍ಚ್ ಆಮ್ಕಾಂ ಆಮರ್ ಉದಾಹರಣ್ ಜಾವ್ನಾಸ್ತಾನಾ ಹಾಚ್ಯಾಕಿ ವರ್ತೆಂ ವಿವರಾಂವ್ಕ್ ಹಾಂವ್ ಸಕಾನಾ ಭಾವಾ.

ಸ : ಭಾರತಾಂತ್ ನಿತಳ್ ರಾಜ್‍ಕಾರಣ್ ಕೆದಾಳಾ ಯೆತ್ ?

ಜ: ಶಿಕ್ಪಿ ಯುವಜಣಾಂನಿ ತಾಂಚೊ ಸ್ವಾರ್ಥ್, ಆಭಿಲಾಷ ವಿಸ್ರೋನ್ ದೇಶಾ ಥಂಯ್ ತಾಂಚೆಂ ಕರ್ತವ್ಯ್ ಜಾಣಾ ಜಾಲ್ಯಾರ್ ಖಂಡಿತ್ ಜಾವ್ನ್ ತುಜೆಂ ಸ್ವಪಾಣ್ ಸತ್ ಜಾತೆಲೆಂ.

ಸ : ಇಗರ್ಜಾಂನಿ ಲಾಯಿಕ್ ಪವಿತ್ರ್ ಕುಮ್ಗಾರ್ ವಾಂಟ್ತಾತ್. ಹೆಂ ಸಾರ್ಕೆಂಗಿ ? ತುಜಿ ಆಭಿಪ್ರಾಯ್ ಕಿತೆಂ ಹ್ಯಾ ವಿಷಯಾಂತ್ ?

ಜ : ಸಾರ್ಕೆಂ ಯ್ಯಾ ಚೂಕ್ ತೆಂ ಇಗರ್ಜ್‍ಮಾತೆಚ್ಯಾ ವ್ಹಡಿಲಾಂನಿ ಚಿಂತುನ್‍ಚ್ ನಿರ್ಧಾರ್ ಘೆತ್ಲಾ.ಮೊಜಿ ಆಭಿಪ್ರಾಯ್ ದಿಂವ್ಚಿ ತರ್ ಬದ್ಲೊಂಚ್ಯಾ ಹ್ಯಾ ಕಾಳಾ ಪ್ರಮಾಣೆ ಆಮ್ಚಿ ಸಂಸ್ಕ್ರತಿ , ಧಾರ್ಮಿಕ್ ರಿತಿ ರಿವಾಜಿ ಬದ್ಲಾಲ್ಯಾತ್.ತೆಂ ನಾಸ್ತಾನಾ ವಾಡೊನ್ ಯೆಂವ್ಚ್ಯಾ ಕಥೋಲಿಕಾಂಕ್ ಇಗರ್ಜೆಂತ್ ಆಸ್‍ಲ್ಲ್ಯಾ 2-3 ಪಾದ್ರ್ಯಾಬಾಂಕ್ ಮಾತ್ರ್ ಕುಮ್ಗಾರ್ ದಿಂವ್ಕ್ ಆಸ್ಪದ್ ಆಸ್ಲ್ಯಾರ್ ಸಕಾಳಿಂ ಆರಂಭ್ ಜಾಲ್ಲೆಂ ಮೀಸ್ ದನ್ಪಾರಾಂ ಆಖೇರ್ ಜಾಂವ್ಕ್ ಆಸಾ.

ಸ : ಆಪುಣ್ ಆಪ್ಣಾಕ್ , ದೇವ್ ಸಮೆಸ್ತಾಂಕ್ ಮ್ಹುಣ್ ಚಿಂತ್ಲೆಲ್ಯಾ ವಿಶ್ಯಾಂತ್ ತುಂ ಕಿತೆಂ ಮುಣ್ತಾಯ್ ನಾನು ?

ಜ: ತಾಚ್ಯಾ ಕುಡಿ ಆನಿ ಆತ್ಮ್ಯಾಕ್ ಶಾಂತಿ ಮೆಳೊಂದಿ ಏ ಸೊಮ್ಯಾ....ಆಮೆನ್.

ಸ : ಮನ್ಶ್ಯಾಕ್ ಕಷ್ಟ್ ಯೆತಾನಾ ಮಾತ್ರ್ ದೆವಾಚೊ ಉಗ್ಡಾಸ್ ಯೆತಾ ಕಿತ್ಯಾಕ್ ?

ಜ: ತಶೆಂ ತರೀ ಆಪ್ಣಾಕ್ ಸುಖ್ ಮೆಳೊಂದಿ ಮುಳ್ಳೆಂ ಏಕ್ ಸುಖೆಂ ದೈರ್ಯ್ ಹ್ಯಾ ಕಪಟಿ ಮನ್ಶ್ಯಾ ಕುಳಾಕ್.

ಸ : ಸಂಸಾರಾಚ್ಯಾ ಹರ್ಯೇಕ್ಲ್ಯಾನ್ ಗ್ರೇಸ್ತ್‍ಕಾಯೆಕ್ ಆಶೆಂವ್ಚೆಂ ಕಿತ್ಯಾ ಖಾತಿರ್ ?

ಜ: ಭ್ರಷ್ಟ್ ರಾಜ್‍ಕಾರಣಿಂಚೆಂ "ಬಡತನ ನಿರ್ಮೂಲನ" ಘೋಷಣಾಂ ಸತ್ ಕರುನ್ " ಆಛ್ಛೇ ದೀನ್" ಮುಖಾರ್ ಪಳೊಂವ್ಚ್ಯಾ ಪಾಸೊತ್.

ಸ : ಹಂಕಾರ್ ಆನಿ ಸ್ವಾಭಿಮಾನ್ ಹಾಂಚೆ ಮಧ್ಲೊ ತಫಾವತ್ ಕಸ್ಲೊ ?

ಜ : ಹಂಕಾರ್ ಮನ್ಶ್ಯಾಕ್ ಧರ್ಣಿಕ್ ಶೆವ್ಟಾಯ್ತಾ ತರ್, ಸ್ವಾಭಿಮಾನ್ ಮನ್ಶ್ಯಾಕ್ ತಾಚ್ಯಾ ನಿಚೆವಾನಿ ದ್ರಡ್ ಕರ್ತಾ ಆನಿ ಯಶಸ್ವೆಚ್ಯಾ ಶಿಖರಾರ್ ಸೊಭಾಯ್ತಾ.

ಸ : ನಾನು , ತುಕಾ ಆಮ್ಚಿಂ ಸವಾಲಾಂ ವಾಚ್ತಾನಾ ಕಿತೆಂ ಜಾತಾ ?

ಜ: ಸತ್ ಸಾಂಗೊಂ ತರ್ " ಕುಛ್ ಕುಛ್ ಹೋತಾ ಹೈ " !

ಸ : ಪಯ್ಶ್ಯಾಂಕ್ ಪಳೆತಾನಾ ಮೆಲ್ಲೆಂಯ್ ತೊಂಡ್ ಉಗ್ತೆಂ ಕರ್‍ತಾ ಖಂಯ್. ಹೆಂ ಸತ್‍ಗೀ ?

ಜ: ತಶೆಂ ಮುಣೊನ್ ಮೊಜಿಂ ಆಬ್ ಆನಿ ವ್ಹಡ್ಲಿಮಾಂಯ್ ಸಾಂಗ್ತಾಲಿಂ.ಪುಣ್ ಆತಾಂ ಮೆಲ್ಲ್ಯಾಂಚ್ಯಾ ನಿಭಾನ್ ಮೊರ್ನಾಚ್ಯಾ ಘರಾ ಜಾಂವ್ಚೊ ಪಯ್ಶ್ಯಾಂಚೊ ದರ್ಭಾರ್ ಆನಿ ವಿಭಾಡ್ ಪಳೆವ್ನ್ ಮೆಲ್ಲ್ಯಾನ್ ತೊಂಡ್ ಉಗ್ತೆಂ ಕೆಲ್ಲೆಂ ಎದೊಳ್ ಪಳೆಂವ್ಕ್ ನಾ ಆನಿ ಎಕಾದಾ ವೆಳಾ ಕೆಲ್ಯಾರಿ ತುರಂತ್ ಬಂದ್ ಕರುಂಕ್ ಆಸಾ.

ಸ : ಹಾಂವ್ ಎಕಾ ಚೆಡ್ವಾಕ್ ಬಾಳ್ ಸಂಗಾತಿ ಕರುಂಕ್ ಆಶೆತಾಂ.ಕಶೆಂ ಕರ್ಚೆಂ ?

ಜ: ಭೊವ್ ಸಾದೆಂ.ಖಂಚಾಯ್ ತರೀ ಆನಾಥಶ್ರಮಾಕ್ ವಚೊನ್ ಥಂಯ್ಚ್ಯಾ ವ್ಹಡಿಲಾಂಕ್ ತುಜಿ ಆಶಾ ತಿಳ್ಶಿ.ತುಜ್ಯಾ ಆರ್ಹತೆಕ್ ತುಕಾ ಜೊಕ್ತಿ ಜವಾಭ್ ಮೆಳ್ತೆಲಿ.ದೇವ್ ತುಜೆರ್ ಬೆಸಾಂವ್ ಘಾಲುಂ.

nanumarol@gmail.com

ನಾನು ಮರೋಳ್: ಕೊಂಕ್ಣಿ ಸಂಸಾರಾಂತ್ ಪಾಟ್ಲ್ಯಾ ಪಂಚ್ವೀಸ್-ತೀಸ್ ವರ್ಸಾಂ ಥಾವ್ನ್ ಆಪ್ಲ್ಯಾ ಸಮಾಜಿಕ್ ಕಾಳ್ಜೆಚ್ಯಾ ಬರ್ಪಾಂನಿ ಹೊ ಪರಿಚಿತ್. ಕೊಂಕ್ಣಿ ಮೋಗಿ, ತಶೆಂಚ್ ಕೊಂಕ್ಣಿ ವಾವ್ರಾಡಿ, ಸದ್ದ್ಯಾಕ್ ದುಭಯಾಂತ್ ಆಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರ್ತಾ ತರ್‌ಯೀ ಕೊಂಕ್ಣಿ ಭಾಸೆಚೊ ಪೋಸ್ ಕರ್ಚ್ಯಾಂತ್ಲೊ ಹೊಯೀ ಎಕ್ಲೊ. ಆಜ್ ಜರ್‌ತರ್ ಕೊಂಕ್ಣಿ ಪರತ್ ಫುಲ್ತಲಿ ಮ್ಹಳ್ಳೊ ಭರ್ವಸೊ ಉದೆಶೆಂ ಕರುಂಕ್ ಕಾರಣ್ ಅಸಲೆಚ್ಚ್ ಕೊಂಕ್ಣಿ ಪಾಶಾಂವಿ ಮನಿಸ್.