[ಕವಿತಾ] ಆಪಾಯಾಚ್ಯೊ ಘಾಂಟಿ (- ಫೆಲ್ಸಿ ಲೋಬೊ, ದೆರೆಬಯ್ಲ್)

ಆಪಾಯಾಚ್ಯೊ ಘಾಂಟಿ


ತಣ್ ಭೆಂಡುಂಕ್ ವೆಚ್ಯಾ
ಉಗ್ತ್ಯಾ ಗಾದ್ಯಾಂತ್ ಯ್
ಮೊಡಿಂ ಪಡ್ಲ್ಯಾಂತ್
ಜುಲುಮೆಚೆಂ ಖಾಣ್ ಜಾವ್ನ್
ಕಿಸ್ಪರ್ಲೆಲೆಂ ಫುಲ್ ಜಾವ್ನ್

ಪಿಡೆಸ್ತಾಂಚ್ಯಾ ವಾವ್ರಾ ಥಳಾರ್ ಯ್
ಉಸ್ವಾಸ್ ಭಾಂದ್ಲಾ
ಗಳೊ ಚಿರ್ಡುನ್
ಕಾಳ್ಕೆ ರಾತಿ ಕುಡಿ ಶಿಂಧುನ್
ಮನ್ಶ್ಯಾಪಣಾಕ್ ಸಾಂಡುನ್

ಪಯ್ಣಾ ವಾಟೆ ರಸ್ತ್ಯಾನಿಂಯ್
ಮಾಸೂಮ್ ಜಿವಾಂಕ್ ತಾಸಾಯ್ಲಾಂ
ಲೊಂಕ್ಡಾ ಆಯ್ದಾಂ ವಿಂಚುನ್
ರಾನ್ವಟಿ ಮನ್ಶ್ಯಾ ರುಪಾಂ ಆರಾವ್ನ್
ಸ್ವತಾಕ್ ವಿಸ್ರೊನ್

ದೆವಾಳ್ ಮಂದಿರಾಂ ಭಿತರ್ ಯ್
ಪಿಂಪ್ರ್ಯಾಂಕ್ ಗ್ರಾಸಿಲಾಂ
ಚರ್ಬೆಲ್ಲ್ಯಾ ಕುಡಿಂಚಿ ತೃಷಾ ಥಾಂಭಂವ್ಕ್
ಕ್ರೂರ್ ಮನ್ಜಾತ್ ಜಾವುನ್
ದೆವಾಕ್ ಚ್ ವಿಸ್ರೊನ್

ವಾಟ್ಸುರ್ಯಾಂಕ್ ಯ್ ತಾಂಡುನ್ ವೆಲಾಂ
ಗುಡ್ಯಾ ಮೊಲ್ಯಾಂನಿ
ಮೊಡಿಂ ಲಿಪ್ಲ್ಯಾಂತ್
ಪ್ರಭಾವ್, ಅಧಿಕಾರಾಚ್ಯಾ ಧಯ್ರಾನ್
ನೀತ್, ಶಿಕ್ಷೆಚೆಂ ಮೋಲ್ ವಿಸ್ರೊನ್

ಕುಟ್ಮಾಂತ್ ಧೊತಿ ನಿಬಾನ್ ಯ್
ಆಂಗಾರ್ ದಾಗ್ ಝಳ್ಕಾಲ್ಯಾತ್
ಕುಡಿರ್ ಮತಿನಿಂ ಮಾವ್ ಉರ್ಲ್ಯಾ
ಜುಲುಮೆಕ್ ಹೆಡಾವ್ನ್
ರಾಕ್ಸಾ ಪ್ರವೃತ್ತೆಕ್ ಸಾಕ್ಸ್ ಜಾವ್ನ್

ಘರಾಂನಿ ಘುಸ್ಚೆ ವಾವ್ರಾಡಿಯ್
ಎಕ್ಸುರೆಕ್ ದಾವ್ಲಿ ಮಾರ್ತಾತ್
ಫ್ರಿಜ್ ಟಿವಿ ಸಾರ್ಕೆಂ ಕರ್ಚ್ಯಾ ನಿಬಾಕ್
ಆಪಾಯಾಚ್ಯೊ ಘಾಂಟಿ ವಾಜ್ತಾತ್
ಪಾಚಾರ್ನ್ ತಿ ಅಜುನ್ ಅಸುರಕ್ಷಿತ್ ಮ್ಹಣ್.

 ******

- ಫೆಲ್ಸಿ ಲೋಬೊ, ದೆರೆಬಯ್ಲ್   [ಮಾಯ್, 2023]

ಫೆಲ್ಸಿ ಲೋಬೊ, ದೆರೆಬಯ್ಲ್: ಏಕ್ ಶಿಕ್ಷಕಿ ಜಾವ್ನ್ ವಾವ್ರ್ ಕರ್ಚಿ ಹಿ ಕವಿತಾ, ಲೇಕನಾಂ, ಸಮೀಕ್ಶಾ ಬರಯ್ತಾ. ಕವಿಸಮ್ಮೇಳನಾಂನಿ ಕವಿತಾ ಸಾದರ್ ಕೆಲ್ಯಾತ್. ಸಮಾಜಿಕ್ ಜಾಗರಣ್ ದಿಂವ್ಚಿ ಶ್ಯಾಥಿ ಆಸ್ಚಿ ಬಾಯ್ ಫೆಲ್ಸಿ ಲೋಬೊ ದೆರೆಬಯ್ಲ್ ಅಸ್ತುರಿ ಸಂವೇದನಾಂಕ್ ಲಾಗುನ್ ವ್ಹಳ್ಕಿಚಿ ಜಾಲ್ಯಾ. ’ಪಾಲ್ವಾ ಪೊಂತ್’ ಹಿಚ್ಯಾ ಕವಿತೆಂಚೊ ಜಮೊ ಪರ್ಗಟ್ಲಾ.

[kovita] Apayacheo Ghantti (- Felcy Lobo Derebail)

Apayacheo Ghantti

tonn bhenddunk vechea
ugtea gadeant y
moddim poddleant
zulumechem khann zaun
kisporlelem ful zaun

piddestanchea vaura thollar y
usvas bhandla
gollo chirddun
kallke rati kuddi xindhun
monxeaponnak sanddun

poinna vatte rosteanim-i
masum' jivank tasailam
lonkdda aidam vinchun
ranvotti monxea rupam araun
svotak visron

devall mondiram bhitor y
pimpreank grasilam
chorbel'lea kuddinchi trixa thambhounko
krur monzat zavun
devak ch visron

vattsureank y tanddun velam
guddea moleamni
moddim lipleant
probhavo, odhikarachea dhoiran
nit, xikxechem mol visron

kuttmant dhoti niban y
angar dag zhollkaleat
kuddir motinim mavo urlea
zulumek heddaun
raksa prourit'tek saks zaun

ghoramni ghusche vauraddiy
eksurek dauli martat
friz ttivi sarkem korchea nibak
apayacheo ghantti vajtat
pacharn ti ozun osurokxit mhonn.

******

- Felcy Lobo Derebail [Feb, 2025]

[कविता] आपायाच्यो घांटी (फेल्सी लोबो, देरेबयल)

दिसाळें हातीं घेवन वाचुंक धरलें तर, वा टिविंनी येंवच्यो दिसाळ्यो खबरो आयकुंक धरलें तर ज्ये कितें वाचुंक/आयकुंक मेळता तें ह्या कवितेच्या एकेका वळिंनी भोव मार्मीक रितीन उत्रायिल्लें दिसून येता.

वृत्तेन शिक्षकी जावनासची बाय फेल्सी लोबो देरेबैल एक वयचारीक चिंत्पाची कवी, समाजीक हुसको, मनशामोलांक अपल्या बर्पांनी उकलन धर्ची ही समाजेंत जांवच्या हर रितिच्या शोषणाच्या विरोद अपली लिखणी उकल्ता. ह्या कवितेंत तिणें उत्रांनी पिंत्रायिल्ल्या चित्रांक ओळकुंक तशेंच कवितेचो स्वाद चाकोंक तुका उलो दितां.

- सं

[कविता] आपायाच्यो घांटी (फेल्सी लोबो, देरेबयल)

आपायाच्यो घांटी

तण भेंडुंक वेच्या
उग्त्या गाद्यांत य
मोडीं पडल्यांत
जुलुमेचें खाण जावन
किस्परलेलें फूल जावन

पिडेसतांच्या वावरा थळार य
उस्वास भांदला
गळो चिर्डून
काळके राती कुडी शिंधून
मनश्यापणाक सांडून

पयणा वाटे रसत्यानिंय
मासूम जिवांक तासायलां
लोंकडा आयदां विंचून
रान्वटी मनश्या रुपां आरावन
स्वताक विस्रोन

देवाळ मंदिरां भितर य
पिंपऱ्यांक ग्रासिलां
चरबेल्ल्या कुडिंची तृषा थांभवंक
क्रूर मनजात जावून
देवाक च विस्रोन

वाटसूऱ्यांक य तांडून वेलां
गुड्या मोल्यांनी
मोडीं लिपल्यांत
प्रभाव, अधिकाराच्या धयरान
नीत, शिक्षेचें मोल विस्रोन

कुटमांत धोती निबान य
आंगार दाग झळकाल्यात
कुडीर मतिनीं माव उरल्या
जुलुमेक हेडावन
राक्सा प्रवृत्तेक साक्स जावन

घरांनी घुसचे वावराडीय
एक्सुरेक दावली मार्तात
फ्रीज टिवी सार्कें कर्च्या निबाक
आपायाच्यो घांटी वाजतात
पाचार्न ती अजून असुरक्षीत म्हण.

******

-  फेल्सी लोबो, देरेबयल [फेब्रेर, २०२५]

ದಾಯ್ಜ್.ಕೊಮ್