ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಜಿವಿತಾಚೆಂ ರೋದ್ (- ಅವಿಲ್ ರಸ್ಕೀನ್ಹಾ)

ಹ್ಯಾ ಸಂಸಾರಾಂತ್ ಹರೇಕಾ ಸಂಗ್ತೆಂನಿ ಎಕಾಮೆಕಾ ಪೂರಕ್ ಜಾಂವ್ಚ್ಯೊ ಸಂಗ್ತ್ಯೊ ಆಸಾತ್ ಆನಿ ಜಿವಿತಾಚೆಂ ರೋದ್ ಮುಕಾರ್ ವರುಂಕ್ ಹ್ಯೊ ದೊನ್‌ಯೀ ಎಕಾ ನಾ ಎಕಾ ರಿತಿನ್ ಮಜತ್‌ದಾರ್ ಜಾತಾತ್. ಸತ್ ಆನಿ ಫಟ್, ದೀಸ್ ಆನಿ ರಾತ್, ಉಜ್ವಾಡ್ ಆನಿ ಕಾಳೊಕ್, ಭಲಾಯ್ಕಿ ಆನಿ ಪಿಡಾ, ಬರೆಂ ಆನಿ ವಾಯ್ಟ್, ಜಯ್ತ್ ಆನಿ ಸಲ್ವಣ್. ಪುಣ್ ಮನಿಸ್ ಜಿತ್ಲ್ಯೆ ಮಾಪಾನ್ ಜಯ್ತಾಕ್ ವೆಂಗ್ತಾ ತಿತ್ಲ್ಯೆಚ್ ಮಾಪಾನ್ ಸಲ್ವಣೆಕ್ ವೆಂಗಿನಾ. ಹೆಂ ಸಹಜ್ ಪುಣ್ ಫಕತ್ ಉಜ್ವಾಡಾಕ್, ದಿಸಾಕ್, ಸತಾಕ್ ಆಶೆಂವ್ಚೆಂಯ್ ಪಿಶೆಂಪಣ್. ಹ್ಯಾ ಸಂಸಾರಾಂತ್ ಆಯಿಲ್ಲೊ ಕೊಣ್‌ಯೀ ನಾ ಜೊ ಫಕತ್ ಎಕಾಚ್ ಸಂಗ್ತೆಚೊ ಅನ್ಭೋಗ್ ಕರುನ್ ಗೆಲ್ಲೊ. ಅಶೆಂ ಮ್ಹಣ್ತಾನಾ ಕವಿಚಿಂ ಉತ್ರಾಂ ಭೋವ್ ಸಹಜ್ ಆನಿ ಸೊಂಪಿಂ, ಜಿವಿತಾ ಆವ್ದೆಂತ್ ಜ್ಯೆ ಕಿತೆಂ ಆಮ್ಕಾಂ ಫುಡ್ ಕರುಂಕ್ ಮೆಳ್ತಾ ತೆಂ ಆಮ್ಕಾಂ ಎಕಾ ನಾ ಎಕಾ ರಿತಿರ್ ಪಾರ್ಕುಂಕ್ ಯೆತಾ ದೆಕುನ್ ತೆಂ ಸ್ವಿಕಾರ್ ಕರುನ್ ಅಪ್ಲ್ಯಾ ಜಿವಿತಾಚ್ಯಾ ರೋದಾಕ್ ಕಸ್ಲೆಂಚ್ ಭಾದಕ್ ಜಾಯ್ನಾಸ್ಚೆಪರಿಂ ಪಳೆಂವ್ಕ್ ಮನ್ಶ್ಯಾನ್ ಶಿಕುಂಕ್ ಜಾಯ್.

ಬಾಬ್ ಅವಿಲ್ ರಾಸ್ಕಿನ್ಹಾ ಏಕ್ ಶಿಕ್ಪಿ ತಶೆಂಚ್ ಕೊಂಕಣಿ ಸಾಹಿತ್ಯಿಕ್ ತಶೆಂಚ್ ಸಮಾಜಿಕ್ ಶೆತಾಂನಿ ಖೂಬ್ ವಾವ್ರ್ ಕೆಲ್ಲೊ ಸಂಪಾದಕ್. ತಾಚೆಂ ಚಡ್ತಾವ್ ಉಲವ್ಪ್ ಕಾಮಾಂತ್ ದೆಕುನ್ ತಾಣೆಂ ಬರಯಿಲ್ಲೆಂ ಉಣೆಂ ಪುಣ್ ತಾಣೆ ಕೆದ್ನಾಂಯ್ ಬರಯಿಲ್ಲೆಂ ಆಸಾ ತೆಂ ಸಗ್ಳಿಂ ಚೀತ್ ದಿವ್ನ್ ಆಯ್ಕತಾತ್ ಆನಿ ಹಿ ಕವಿತಾ ಸಯ್ತ್ ತೆಚ್ ವರ್ಗಾಚಿ. ಹ್ಯಾ ಕವಿತೆಂತ್ಲೆಂ ಬಾಕಿಚೆಂ ರಾಜಾಂವ್ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

- ಸಂ

[ಕವಿತಾ] ಜಿವಿತಾಚೆಂ ರೋದ್ (- ಅವಿಲ್ ರಸ್ಕೀನ್ಹಾ)

ಜಿವಿತಾಚೆಂ ರೋದ್ ಕಶೆಂ ವೆಳಾಕಾಳಾಂತ್ ಬದ್ಲಾವಣ್ ಜಾತಾ ತಶೆಂ ಮನ್ಶಾಜಿವಿತಾಂತ್‍ಯೀ ಬದ್ಲಾವಣ್ ಜಾತಾ ದೀಸ್ ಪಾಶಾರ್ ಜಾತಾನಾ ರಾತ್ ಯೆತಾ ರಾತ್ ಪಾಶಾರ್ ಜಾತಾನಾ ದೀಸ್ ಉದೆತಾ ಮನ್ಶಾ ಜಿವಿತ್ ರೊದಾಪರಿಂ ಘುಂವೊನ್‍ಚ್ ಆಸ್ತಾ ಹರ್ ಘಡಿತಾಂ ಮನ್ಶಾಜಿವಿತಾಂತ್ ಗಾಂಚ್ ಕಶಿಂ ಹರ್ ಬದ್ಲಾವಣ್ ಹರ್ ಘಡಿತ್ ತುವೆಂ ಸ್ವಿಕಾರ್ ಕರುಂಕ್ ಜಾಯ್ ತೆಂ ಏಕ್ ಪಂಥಾಹ್ವಾನ್ ಜಾವ್ನ್ ಘೆಜಯ್ ಥೊಡ್ಯಾಂತ್ ಜೀಕ್ ತುಜಿ ಜಾತಲಿ ಥೊಡ್ಯಾಂತ್ ಸಲ್ವಣಿ ತುಂ ದೆಖ್ತಲೊಯ್ ಜೀಕ್ ಲಾಭ್ತಾನಾ ಲೆಕಾವರ್ತೊ ಫುಲಾನಾಕಾ ಸಲ್ವಣ್ ಆಪ್ಣಾಯ್ತಾನಾ ಕಂಗಾಲ್ ಜಾಯ್ನಾಕಾ ಖಂಚ್ಯಾಯ್ ಸಮಯೆ ಆಶಾವಾದಿ ಜಾ ನಿರಾಶೆಕ್ ತುಜೆರ್ ಸಾವ್ಳಿ ಘಾಲುಂಕ್ ದೀನಾಕಾ ಆಕಾಂತಾಂತ್ ಥಿರಾಸಣ್ ಸಾಂಬಾಳ್ಶಿ ತರ್ ಅಂತಿಮ್ ಜೀಕ್ ತುಜಿ ಜಾತಲಿ ಧಯ್ರಾನ್ ಜಿವಿತಾಕ್ ಫುಡ್ ಕರ್ ಆನಿ ತುಂ ಜಯ್ತೆವಂತ್ ಜಾತಲೊಯ್ ****** - ಅವಿಲ್ ರಸ್ಕೀನ್ಹಾ [ಎಪ್ರಿಲ್, 2023]

	ಅವಿಲ್ ರಾಸ್ಕಿನ್ಹಾ: ಕಾಣಿಕ್ ನೇಮಾಳ್ಯಾಚೊ ಸಂಪಾದಕ್ ಜಾವ್ನ್ ವೀಸ್ ವರ್ಸಾಂ ವಾವ್ರ್ ಕೆಲಾ. ಸಾಂತಾಕ್ರೂಜ್ ಪ್ರಕಾಶನಾಖಾಲ್ ಚೊವ್ದಾ ಕೊಂಕಣಿ ಪುಸ್ತಕಾಂ ಪ್ರಕಾಶಿತ್ ಕೆಲ್ಯಾಂತ್. 2023 ಇಸ್ವೆಚೊ ಆಸ್ಟಿನ್ ಪ್ರಭು ನಾಂವಾಚೊ ಪತ್ರಿಕುಧ್ಯಮ್ ಪುರಸ್ಕಾರ್ ಜೊಡ್ಪಿ.
[kovita] Jivitachem Rod* (- Avil Rasquinha)*
Hea somsarant horeka songtemni ekameka purok zamvcheo songteo asat ani jivitachem rod mukar vorunk heo don‌yi eka na eka ritin mozot‌dar zatat. Sot ani fott, dis ani rat, ujvadd ani kallok, bholaiki ani pidda, borem ani vaitt, zoit ani solvonn. Punn monis jitlye mapan zoitak vengta titlyech mapan solvonnek vengina. Hem sohoz punn fokot ujvaddak, disak, sotak axemvchem-i pixemponn. Hea somsarant ayil'lo konn‌yi na zo fokot ekach songtecho onbhog korun gel'lo. Oxem mhonntana kovichim utram bhovo sohoz ani sompim, jivita audent jye kitem amkam fudd korunk mellta tem amkam eka na eka ritir parkunk yeta dekun tem svikar korun oplea jivitachea rodak koslench bhadok zainascheporim polleunko monxean xikunk zai. Bab Avil Rasquinha ek xikpi toxench konkonni sahityik toxench somajik xetamni khub vaur kel'lo sompadok. Tachem choddtavo uloup kamant dekun tannem boroyil'lem unnem punn tanne kednam-i boroyil'lem asa tem sogllim chit divn aikotat ani hi kovita soit tech vorgachi. Hea kovitentlem bakichem razamv parkunk tukach soddtam. - Som
[kovita] Jivitachem Rod* (- Avil Rasquinha)*
Jivitachem Rod koxem vellakallant bodlaunn zata toxem monxajivitant‍yi bodlaunn zata dis paxar zatana rat yeta rat paxar zatana dis udeta monxa jivit rodaporim ghumvon‍ch asta hor ghodditam monxajivitant ganch koxim hor bodlaunn hor ghoddit tuvem svikar korunk zai tem ek ponthahvan zaun ghezoi thoddeant jik tuji zatoli thoddeant solvonni tum dekhtoloi jik labhtana lekaurto fulanaka solvonn apnnaitana kongal zainaka khonchyai somoye axavadi za niraxek tujer saulli ghalunk dinaka akantant thirasonn samballxi tor ontim' jik tuji zatoli dhoiran jivitak fudd kor ani tum zoiteunt zatoloi **** - Avil Rasquinha.** [Apr, 2023]

	Avil Rasquinha : Kannik nemalleacho sompadok zaun vis vorsam vaur kela. Santakruz Prokaxonakhal chouda Konkonni pustokam prokaxit keleant. 2023 isvecho Austin Prabhu namvacho potrikudhyom' puroskar zoddpi.
[कविता] जिविताचें रोद (अवील रसकीन्हा)
ह्या संसारांत हरेका संग्तेंनी एकामेका पूरक जांवच्यो संग्त्यो आसात आनी जिविताचें रोद मुकार वरुंक ह्यो दोन‌यी एका ना एका रितीन मजत‌दार जातात. सत आनी फट, दीस आनी रात, उज्वाड आनी काळोक, भलायकी आनी पिडा, बरें आनी वायट, जयत आनी सलवण. पूण मनीस जितल्ये मापान जयताक वेंग्ता तितल्येच मापान सलवणेक वेंगिना. हें सहज पूण फकत उज्वाडाक, दिसाक, सताक आशेंवचेंय पिशेंपण. ह्या संसारांत आयिल्लो कोण‌यी ना जो फकत एकाच संग्तेचो अनभोग करून गेल्लो. अशें म्हणताना कविचीं उत्रां भोव सहज आनी सोंपीं, जिविता आवदेंत ज्ये कितें आमकां फूड करुंक मेळता तें आमकां एका ना एका रितीर पार्कुंक येता देकून तें स्विकार करून अपल्या जिविताच्या रोदाक कसलेंच भादक जायनासचेपरीं पळेवंक मनश्यान शिकुंक जाय. बाब अवील रासकिन्हा एक शिकपी तशेंच कोंकणी साहित्यीक तशेंच समाजीक शेतांनी खूब वावर केल्लो संपादक. ताचें चडताव उलवप कामांत देकून ताणें बरयिल्लें उणें पूण ताणे केदनांय बरयिल्लें आसा तें सगळीं चीत दिवन आयकतात आनी ही कविता सयत तेच वर्गाची. ह्या कवितेंतलें बाकिचें राजांव पार्कुंक तुकाच सोडतां. - सं
[कविता] जिविताचें रोद (अवील रसकीन्हा)
जिविताचें रोद कशें वेळाकाळांत बदलावण जाता तशें मनशाजिवितांत‍यी बदलावण जाता दीस पाशार जाताना रात येता रात पाशार जाताना दीस उदेता मनशा जिवीत रोदापरीं घुंवोन‍च आसता हर घडितां मनशाजिवितांत गांच कशीं हर बदलावण हर घडीत तुवें स्विकार करुंक जाय तें एक पंथाहवान जावन घेजय थोड्यांत जीक तुजी जातली थोड्यांत सलवणी तूं देख्तलोय जीक लाभताना लेकावर्तो फुलानाका सलवण आपणायताना कंगाल जायनाका खंच्याय समये आशावादी जा निराशेक तुजेर सावळी घालुंक दीनाका आकांतांत थिरासण सांबाळ्शी तर अंतीम जीक तुजी जातली धयरान जिविताक फूड कर आनी तूं जयतेवंत जातलोय **** - अवील रसकीन्हा. [एपरील**, २०२३]

	अवील रासकिन्हा: काणीक नेमाळ्याचो संपादक जावन वीस वर्सां वावर केला. सांताक्रूज प्रकाशनाखाल चोवदा कोंकणी पुसतकां प्रकाशीत केल्यांत. २०२३ इस्वेचो आसटीन प्रभू नांवाचो पत्रिकुध्यम पुरसकार जोडपी.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.