ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ವಿಚಾರಾಂಕ್ ಸ್ವಾಗತ್ (- ವಿಜಯ್ ಕುಮಾರ್ ಎನ್. ಪೈ, ಕೊಚಿನ್)

ದರ್ಪಣ್ (ಆರ್ಸೊ) ಮುಕಾರ್ ದವರುನ್ ಗಾಲಾಂನಿ ದೆಂವ್ಚಿಂ ದುಕಾಂ ಪುಸುನ್ ವಿಚಾರಾಂಕ್ ಆಪವ್ಣೆಂ ದಿಂವ್ಚೊ ಕವಿ ಹಾಂಗಾಸರ್ ಕಾಂಯ್ ಸಾಲಾಂನಿ ಗಜಾಲಿಂಕ್ ಉಭ್ಯೊ ಕರ್ತಾ. ಕೊಚ್ಚಿನ್ ಕೊಂಕಣಿ ಬೊಲಿಂತ್ ಬರಯಿಲ್ಲಿ ಅಪ್ರೂಪ್ ಗಝಲ್ ಹಿ. ಎಕಾ ಅರ್ಥಾನ್ ರಮ್ಯ್ (ರೊಮ್ಯಾಂಟಿಕ್) ಚಿಂತಪ್ ನಿಶೆತಾ ಪುಣ್ ಮಾತ್ಶೆಂ ಖೊಲಾಯೆನ್ ಪಾರ್ಕಿಲ್ಯಾರ್ ಜಿವಿತಾಚ್ಯಾ ಸುಕ್-ದುಕಾಂಚ್ಯಾ ಉಮಾಳ್ಯಾಂಕ್ ಸುಡಾಳ್ ರಿತಿರ್ ಕವಿನ್ ಉತ್ರಾಂವ್ಚೆಂ ಸಾಧನ್ ಕರ್ಚೆಂ ದಿಸುನ್ ಯೆತಾ.

ಕವಿ ಬಾಬ್ ವಿಜಯ್ ಕುಮಾರ್ ನಾರಾಯಣ್ ಪೈ, ಕೊಚಿನಾಂತ್ಲೊ ಏಕ್ ಭರ್ವಶ್ಯಾಚೊ ಕವಿ. ಕೊಚಿನ್ ತಶೆಂಚ್ ಲಾಗ್ಶಿಲ್ಯಾ ಪರಿಸರಾಂತ್ಲ್ಯಾ ಸಮೇಸ್ತ್ ಕೊಂಕಣಿ ಕವಿಂಕ್ ಲಾಗಿಂ ಹಾಡುನ್ ಕೊಂಕಣಿ ಬಾವ್ಟೊ ಉಭಾರುನ್ ಧರ್ಚೆಂ ಮಿಸಾಂವ್ ಹಾತಿಂ ಘೆತ್‌ಲ್ಲ್ಯಾ ಥೊಡ್ಯಾ ಯುವ ಮುಖೆಲ್ಯಾಂ ಪಯ್ಕಿಂತ್ಲೊ ಎಕ್ಲೊ. ಕವಿತಾ ಸರ್ತೆಂನಿ ಇನಾಮಾಂ ತಶೆಂಚ್ ಕೊಂಕಣಿ ವಾವ್ರಾಕ್ ಲಾಗುನ್ ಪುರಸ್ಕಾರ್ ಸಯ್ತ್ ಹಾಣೆಂ ಜೊಡ್ಲಾ. ಕೊಚಿನ್ ಭಾಯ್ಲ್ಯಾ ಕೊಂಕಣಿ ಕವಿತೆಂಚೆಂ ಅಧ್ಯಯನ್ ಕರ್ಪಾಚಿ ಖೂಪ್ ಇಛ್ಛಾ ಆಸ್ಚ್ಯಾ ಹ್ಯಾ ಕವಿಥಾವ್ನ್ ಫುಡೆಂ ಅಪುರ್ಭಾಯೆಚ್ಯೊ ಕವಿತಾ ಅಪೇಕ್ಶಾ ಕರುಯೆತಾ. ಹ್ಯಾ ಗಝಲಾಂತ್ಲ್ಯಾ ಗಜಾಲಿಂಕ್ ಸಮ್ಜುಂಕ್ ತುಕಾಚ್ ಸೊಡ್ತಾಂ.

- ಸಂ

[ಕವಿತಾ] ವಿಚಾರಾಂಕ್ ಸ್ವಾಗತ್ (- ವಿಜಯ್ ಕುಮಾರ್ ಎನ್. ಪೈ, ಕೊಚಿನ್)

ವಿಚಾರಾಂಕ್ ಸ್ವಾಗತ್

ಆಜಿ ಆಯಿಲಾಯ್ ತಿಂ ಮೆಳ್ಪಾಕ್ ಇತ್ಲೆ ಕಾಳ್ ಪರ್ತೂನ್
ದರ್ಪಣ್ ಪುಸೂನ್ ಸ್ವಯ್ ಚೊಯ್ಲೊ ಹಾಂವೆಂ ಪರ್ತೂನ್ ಪರ್ತೂನ್

ದೂಕ್ ಆಶಿಲೆಂ ಆಸುಯಾತ್ ತಾಂಕಾಂ ಮ್ಹಜ್ಯೆ ಖಾತೀರ್
ಜೊಡೂನ್ ಹಾತ್ ಕ್ಷಮಾ ಮಾಗ್ತಲೊಂ ಪರ್ತೂನ್ ಪರ್ತೂನ್

ತಿಂ ಆಶಿಲೆ ಕಾಲಾಕ್ ಅಶಿ ತಶಿ ಕಶಿ ಆಶಿಲೆಂ
ಉತ್ತರಾಂ ಸೊದಿತಾಲೊ ಉಲೊವ್ಪಾಕ್ ಪರ್ತೂನ್ ಪರ್ತೂನ್

ಸಾಂಗೂನಾತೀಲ್ ಯೆತಾನಿ ವೆತಾನಿ ಸುಕ್ ದೂಕ್ ಪರ್ತೀತಾನಿ
ಆಶ್ರು ಹೊಳ್ನು ಗಾಲ್ ತಿಮ್ತಾ ಆಶಿಲೆಂ ಪರ್ತೂನ್ ಪರ್ತೂನ್

ಇತ್ಲೆ ರಾಕೂನ್ ಬಸ್ಲೊ ತೆ ಒಟು ಆಶಿಲ್ಲ್ಯಾನ್ ಇತ್ಲೆ ದುಕೊವ್ನೂಯ್
ಚೊಯ್ತಾ ಆಶಿಲೊ ಹಾಂವ್ ತಾಂನಿ ಯೆತಾಯ್ವೆ ಮ್ಹಣ್ ಪರ್ತೂನ್ ಪರ್ತೂನ್

ಇತ್ಲೆ ಖುಶೆಂತು ಹಾಂವ್ ತೊಚಿ ತೊ ಜಾಲೊ ಪರ್ತೂನ್
ಚಾಂದ್ನ್ಯಾಂತು ಬೆಸೂನ್ ಸ್ವಾಗತ್ ಕರ್ತಾಂ ’ವಿಚಾರಾಂಕ್’ ಪರ್ತೂನ್ ಪರ್ತೂನ್

******

- ವಿಜಯ್ ಕುಮಾರ್ ಎನ್. ಪೈ, ಕೊಚಿನ್. [ಎಪ್ರಿಲ್, 2023]

ವಿಜಯ್ ಕುಮಾರ್ ಎನ್. ಪೈ: ವಿಜಯ್ ಕುಮಾರ್ ನಾರಾಯಣ್ ಪೈ: ಕೊಚಿನಾಂತ್ಲೊ ಕವಿ, ಕೊಂಕಣಿ ಸಾಹಿತ್ಯಾಂತ್ ಕಾರ್ಯಾಳ್ ರಿತಿಚೊ ವಾವ್ರ್ ಕರ್ಪಿ. ಮಯ್ನ್ಯಾಳ್ಯೊ ಕವಿಗೋಶ್ಟಿಂನಿ ಹಾಚೆಂ ಖೂಬ್ ಯೋಗ್‍ದಾನ್ ಆಸಾ, ಕವಿತಾ ಸರ್ತೆಂನಿ ಇನಾಮ್, ಕೊಂಕಣಿ ವಾವ್ರಾಕ್ ಪುರಸ್ಕಾರ್ ಹಾಣೆಂ ಜೊಡ್ಲಾ. ’ಸ್ಪಂದನ’ ನೇಮಾಳ್ಯಾಂತ್ ತಶೆಂಚ್ ’ಕಾವ್ಯಾ ಧನುಶ್’ ಕವಿತಾಸಂಕಲನಾಂತ್ ಹಾಚಿ ಕವಿತಾ ಪ್ರಕಾಶಿತ್ ಜಾಲ್ಯಾ.

[kovita] Vicharank Svagot (- Vijay Kumar N. Pai)

Dorponn (arso) mukar dourun galamni demvchim dukam pusun vicharank apounnem dimvcho kovi hangasor kaim salamni gozalink ubheo korta. Kochchin konkonni bolint boroyil'li oprup gozhol hi. Eka orthan romy (romeanttik) chintop nixeta punn matxem kholayen parkilear jivitachea suk-dukanchea umalleank suddall ritir kovin utramvchem sadhon korchem disun yeta.

Kovi Bab Vijay Kumar Nayarai Pai, Cochinantlo ek bhorvoxeacho kovi. Kochin toxench lagxilea porisorantlea somest konkonni kovink lagim haddun konkonni bautto ubharun dhorchem misamv hatim ghet‌l'lea thoddea yuvo mukheleam poikintlo eklo. Kovita sortemni inamam toxench konkonni vaurak lagun puroskar soit hannem zoddla. Cochin bhailea konkonni kovitenchem odhyoin korpachi khup ichhchha aschea hea kovithaun fuddem opurbhayecheo kovita opekxa koruyeta. Hea gozholantlea gozalink somzunk tukach soddtam.

- Som

[kovita] Vicharank Svagot (- Vijay Kumar N. Pai)

Vicharank Svagot

Aji ayilai tim mellpak itle kall portun
dorponn pusun svoi choilo hamvem portun portun

duk axilem asuyat tankam mhojye khatir
zoddun hat kxoma magtolom portun portun

tim axile kalak oxi toxi koxi axilem
ut'toram soditalo uloupak portun portun

sangunatil yetani vetani suk duk portitani
axru hollnu gal timta axilem portun portun

itle rakun boslo te ottu axil'lean itle dukounuy
choita axilo hamv tamni yetaive mhonn portun portun

itle khuxentu hamv tochi to zalo portun
chandneantu besun svagot kortam ’vicharank’ portun portun

******

- Vijay Kumar N Pai, Kochin. [Apr, 2023]

Vijay Kumar Narayan Pai: Cochinantlo kovi, konkonni sahiteant kareall riticho vaur korpi. Moinealleo kovigoxttimni hachem khub yog‍dan asa, kovita sortemni inam', konkonni vaurak puroskar hannem zoddla. ’spondono’ nemalleant toxench ’Kavea Dhonux’ kovitasonkolonant hachi kovita prokaxit zalea.

[कविता] विचारांक स्वागत (विजय कुमार एन. पै)

दर्पण (आर्सो) मुकार दवरून गालांनी देंवचीं दुकां पुसून विचारांक आपवणें दिंवचो कवी हांगासर कांय सालांनी गजालिंक उभ्यो कर्ता. कोच्चीन कोंकणी बोलिंत बरयिल्ली अपरूप गझल ही. एका अर्थान रम्य (रोम्यांटीक) चिंतप निशेता पूण मातशें खोलायेन पार्किल्यार जिविताच्या सूक-दुकांच्या उमाळ्यांक सुडाळ रितीर कवीन उत्रांवचें साधन कर्चें दिसून येता.

कवी बाब विजय कुमार नारायण पै, कोचिनांतलो एक भर्वश्याचो कवी. कोचीन तशेंच लागशिल्या परिसरांतल्या समेसत कोंकणी कविंक लागीं हाडून कोंकणी बावटो उभारून धर्चें मिसांव हातीं घेत‌ल्ल्या थोड्या यूव मुखेल्यां पयकिंतलो एकलो. कविता सर्तेंनी इनामां तशेंच कोंकणी वावराक लागून पुरसकार सयत हाणें जोडला. कोचीन भायल्या कोंकणी कवितेंचें अध्ययन कर्पाची खूप इछ्छा आसच्या ह्या कविथावन फुडें अपुर्भायेच्यो कविता अपेक्षा करुयेता. ह्या गझलांतल्या गजालिंक समजुंक तुकाच सोडतां.

- सं

[कविता] विचारांक स्वागत (विजय कुमार एन. पै)

विचारांक स्वागत

आजी आयिलाय तीं मेळपाक इतले काळ पर्तून
दर्पण पुसून स्वय चोयलो हांवें पर्तून पर्तून

दूक आशिलें आसुयात तांकां म्हज्ये खातीर
जोडून हात क्षमा माग्तलों पर्तून पर्तून

तीं आशिले कालाक अशी तशी कशी आशिलें
उत्तरां सोदितालो उलोवपाक पर्तून पर्तून

सांगूनातील येतानी वेतानी सूक दूक पर्तीतानी
आश्रू होळनू गाल तिमता आशिलें पर्तून पर्तून

इतले राकून बसलो ते ओटू आशिल्ल्यान इतले दुकोवनूय
चोयता आशिलो हांव तांनी येतायवे म्हण पर्तून पर्तून

इतले खुशेंतू हांव तोची तो जालो पर्तून
चांदन्यांतू बेसून स्वागत कर्तां ’विचारांक’ पर्तून पर्तून.

******

- विजय कुमार एन. पै, कोचीन. [एपरील, २०२३]

विजय कुमार नारायण पै: कोचिनांतलो कवी, कोंकणी साहित्यांत काऱ्याळ रितिचो वावर कर्पी. मयन्याळ्यो कविगोश्टिंनी हाचें खूब योग‍दान आसा, कविता सर्तेंनी इनाम, कोंकणी वावराक पुरसकार हाणें जोडला. ’स्पंदन’ नेमाळ्यांत तशेंच ’काव्या धनूश’ कवितासंकलनांत हाची कविता प्रकाशीत जाल्या.

ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.