[ಕವಿತಾ] ಯಾದಿಂಚೊ ಪೊಸೊ (- ಗೌರಾಂಗ್ ಬಾಬುರಾವ್ ಭಾಂಡೀಯೆ)

 ಯಾದಿಂಚೊ ಪೊಸೊ

ಭುರ್ಗೆಪಣಾಂತ್ಲ್ಯೊ ಯಾದಿ ಉಸ್ಪೂಂಕ್
ಭುರ್ಗೊ ಜಾವ್ನ್ ಗೆಲೊಂ ಹಾಂವ್,
ರಿತೊ ಜಾವ್ಪಿ ಯಾದಿಂಚೊ ಪೊಸೊ
ಆಯ್ಲೊ ಮ್ಹಜೊ ಜೀವ್ ಖಾಂವ್ಕ್.

ಭಾಂಗ್ರಾಳೆ ದೀಸ್ ತೆ
ಭಾಂಗ್ರಾಳ್ಯಾ ಮನ್ಶಾಂನಿ ಭರಿಲ್ಲೆ,
ಆಪ್ಲೆಪಣಾಚ್ಯಾ ನಾತ್ಯಾನ್
ಶೆಜಾರ್ ಶೆಜಾರ್ ಜೊಡಿಲ್ಲೆಂ.

ಅನಂತಾಚ್ಯಾ ಫುಲಾಂನಿ ಆಮ್ಚೆಂ
ಆಂಗಣ್ ಶಿವ್ರಿಲ್ಲೆಂ ಆಸ್ತಾಲೆಂ,
ರತನಆಬೊಲೆಂ ಕಿತ್ಯಾಕ್ ಕೊಣ್ ಜಾಣಾ
ಹಳೂಚ್ ಲಜೂನ್ ಫುಲ್ತಾಲೆಂ.

ಪೊರ್ಸಾಂತಲಿ ಜಾಣ್ಟಿ ದಸಣ್
ನೆಣಾರಪಣ್ ಮಿರಯ್ತಾಲಿ
ಲಯ್ರಾಈಚ್ಯಾ ಜಾತ್ರೆಚಿ ಸುಲೂಸ್
ಜುಸ್ತ್ ಮೊಗ್ರೆಕ್ ಚಡ್ಟಾಲಿ.

ವಯ್ಣೆವೆಲ್ಯಾ ಚುಡ್ಟಾಂಚೆರ್ ನ್ಹಿದ್ಪಾಚಿ
ಒಡೂಚ್ ಆಗ್ಳಿ ಆಶಿಲ್ಲಿ
ಖಳಾವೆಲ್ಯಾ ಬೆಡ್ಯಾಂಚೆರ್ ಲೊಳ್ಪಾಚಿ
ಮಜಾಚ್ ವೆಗ್ಳಿ ಆಶಿಲ್ಲಿ.

ಖಾಣೊಣೆಂತಲೆ ಮಾಗ್ ಆತಾಂ
ಶಿಂಪ್ಪಾ ಖಾತೀರ್ ಉರುಂಕ್ ನಾ
ಕಲ್ಲ್ಯಾಚೊ ಆದ್ಲೊ ಝೆತ್
ಆಯ್ಚ್ಯಾ ಸ್ಪ್ರಿಂಕ್ಲರಾಂನಿ ನಾ.

ಗಾರ್ಫಾಂ, ಆಮುಲ್ಲ್ಯೊ, ತೆಫ್ಳಿ ಆತಾಂ
ಆದ್ಲೆ ಬಶೆನ್ ಲಾಗ್ನಾತ್,
ಪರ್ಮಳ್ ಆಪ್ಲೊ ಫಾಂಕೊವ್ನ್
ಆಪೂಣ್ ಲಾಗಿಲ್ಲ್ಯಾಚೆಂ ಸಾಂಗ್ನಾತ್.

ಆಪ್ಣಾಲ್ಯಾ ಪರಸ್ ಹೆರಾಂಲ್ಯಾ ಭಾಟಾಂತಲಿಂ
ಆಡ್ಸರಾಂ ರುಚೀಕ್ ಲಾಗ್ತಾಲಿಂ,
ಸೂಕತ್ ಘಾಲ್ಲೆ ಪಣ್ಸಾಚೆ ಪಾಪಡ್
ಕುರು ಕುರು ಕರೂನ್ ಖಾತಾಲಿಂ.

ಪಿರಾಡ್ಯಾಚ್ಯಾ ಬೆಟಾನ್ ಆಮಿ
ಕಿತ್ಲಿಂ ಶತ್ಕಾಂ ಮಾರ್ತಾಲೆ,
ಬಾೆಲ್ ಶೆಟ್ಲೊ ಜಾಲ್ಯಾರ್ ಆಮ್ಕಾಂ
ತೊರ್ಗಾಂ ಧಡೆ ಸುಧ್ದಾಂ ಚಲ್ತಾಲೆ.

ಅನ್ಶಿ ಆತಾಂ ಆಳ್ಶಿ ಜಾಲ್ಯಾ
ಮಾಡಾಕ್ ಲೆಗೀತ್ ಮೊಠೆಂಪಣ್ ಆಯ್ಲಾಂ,
ಕಾವ್ಥೆನ್ ಆಪ್ಣೆಂ ಮಾಡಿ ಜಾವ್ಪಾಚೆಂ
ಸಪನ್ ಲೆಗೀತ್ ಉದ್ಕಾಂತ್ ಪಾಯ್ಲಾಂ.

ಶೆಣ್ಯಾವಯಲೊ ಪಣಸ್ ಆತಾಂ
ಆದ್ಲೆ ಬಶೆನ್ ಲಾಗ್ನಾ,
ಕಳ್ಸೊ ಭರ್ ಉದಕ್ ಸೊಡೂನ್
ಮಿರ್ವೆಲ್ ಕಾಂಯ್ ಮಾಗಿನಾ.

ಭಾತ್ಯೊ, ಪಾಲೊ ಖಾವ್ಪಿ ಮಾಯೆಸ್ತ್
ಗೊರ್ವಾಂ ಆತಾಂ ಗೊಠ್ಯಾಂತ್ ನಾ,
ಮಾಕ್ಡಾಂಕ್ ಆಮುಡಪಾಚಿ ತಾಂಕ್ ಆಯ್ಚ್ಯಾ
ಪಗ್, ಜರ್ಮನ್ ಪೆಟ್ಯಾಂತ್ ನಾ.

ಪೂಣ್ ಥೊಡೆಂ ಭೊವ್ ಉರ್ಲಾಂ ನದ್ರೆ ಸಾಮ್ಕಾರ್
ಬಾಕಿ ಸಗ್ಳೆಂ ಇತಿಹಾಸಜಮಾ,
ಆತಾಂ ಘರಾಂ, ಮನ್ಶಾಂ ಕೊಣ್ ನಾ ಹಾಂಗಾ
ಮ್ಹಜ್ಯೊ ಯಾದಿ ತರಿ ಕಸ್ಲ್ಯಾ ಕಾಮಾ?

 ******

- ಗೌರಾಂಗ್ ಬಾಬುರಾವ್ ಭಾಂಡೀಯೆ  [ಮಾಯ್, 2023]

ಗೌರಾಂಗ್ ಬಾಬುರಾವ್ ಭಾಂಡೀಯೆ: ಸಾವಯ್-ವೆರೆಂ ರಾವ್ತಾ. ಸದ್ಯಾಕ್ ಧೆಂಪೆ ಮಹಾವಿದ್ಯಾಲಯಾಂತ್ ಕೊಂಕ್ಣಿ ವಿಶ್ಯಾಚೊ ಸಹಾಯಕ್ ಪ್ರಾಧ್ಯಾಪಕ್ ಮ್ಹಣುನ್ ಅಧ್ಯಾಪನ್ ಕರ್ತಾ. ಕಥಾ, ಕವಿತಾ ಬರೊವ್ಪಾಚಿ ಆವಡ್ ಆಸಾ. ಜಾಯ್ತ್ಯೊ ಕಥಾ, ಕವಿತಾ ಪ್ರಕಾಶೀತ್ ಜಾಲ್ಯಾತ್ ಆನಿ ಸರ್ತೀಂನಿ ಇನಾಮಾಂ ಫಾವ್ ಜಾಲ್ಯಾಂತ್. ಕೊಂಕ್ಣಿ ಸಾಹಿತ್ಯ್ ಸರಿತೆಚಿ ಸಾಧ್ನಾ ಅದೀಕ್ ಪ್ರಗಾಲ್ಪ್‌ಪಣಾನ್ ಕರೀತ್ ಆಸಾ.

[kovita] Yadincho Poso (- Gourang Baburavo Bhanddiye)

Yadincho Poso

bhurgeponnantleo yadi uspunk
bhurgo zaun gelom hamv,
rito zaupi yadincho poso
ailo mhozo jivo khaunko.

Bhangralle dis te
bhangrallea monxamni bhoril'le,
apleponnachea natean
xezar xezar zoddil'lem.

Onontachea fulamni amchem
angonn xivril'lem astalem,
rotonabolem kiteak konn zanna
holluch lozun fultalem.

Porsantoli zanntti dosonn
nennaroponn miroitali
loiraichea zatrechi sulus
zust mogrek choddttali.

Voinnevelea chuddttancher nhidpachi
odduch aglli axil'li
khollavelea beddeancher lollpachi
mozach veglli axil'li.

Khannonnentole mag atam
ximppa khatir urunk na
kol'leacho adlo jhet
aichea sprinkloramni na.

Garfam, amul'leo, teflli atam
adle boxen lagnat,
pormoll aplo fankoun
apunn lagil'leachem sangnat.

Apnnalea poros heramlea bhattantolim
addsoram ruchik lagtalim,
sukot ghal'le ponnsache papodd
kuru kuru korun khatalim.

Piraddeachea bettan ami
kitlim xotkam martale,
bAel xettlo zalear amkam
torgam dhodde sudhdam choltale.

Onxi atam allxi zalea
maddak legit motthemponn ailam,
kauthen apnnem maddi zaupachem
sopon legit udkant pailam.

Xenneavoilo ponnos atam
adle boxen lagna,
kollso bhor udok soddun
mirvel kaim magina.

Bhateo, palo khaupi mayest
gorvam atam gottheant na,
makddank amuddopachi tank aichea
pog, zormon petteant na.

Punn thoddem bhovo urlam nodre samkar
baki sogllem itihasozoma,
atam ghoram, monxam konn na hanga
mhojeo yadi tori koslea kama?

******

- Gourang Baburavo Bhanddiye [May, 2023]

[कविता] यादिंचो पोसो (गौरांग बाबुराव भांडीये)

दरेका मनश्याक भुरगेंपण हंत उत्रून येवपाक पडताच. भुरगेंपण एक असलें हंत; जें कितलो जाणतो जाल्यारी यादिंत उर्चे तसल्यो खूप काणियो आसतात. केदनांय त्या एकेका काणियांक याद करुंक लाग्ताना मतिंत उल्लास, आनंद उमाळून येंवचें सहज.

बाब गौरंग भांड्ये एक युवकवी, अपल्या भुरग्यापणाल्यो यादी कितल्यो सोंप्या रितीन याद कर्ची पळयताना आमकां त्यो वाचून गेल्लेपरिंच आमच्या यादिंच्या संसाराक पावयतात.

- सं

[कविता] यादिंचो पोसो (गौरांग बाबुराव भांडीये)

यादिंचो पोसो

भुरगेपणांतल्यो यादी उस्पूंक
भुरगो जावन गेलों हांव,
रितो जावपी यादिंचो पोसो
आयलो म्हजो जीव खांवक.

भांगराळे दीस ते
भांगराळ्या मनशांनी भरिल्ले,
आपलेपणाच्या नात्यान
शेजार शेजार जोडिल्लें.

अनंताच्या फुलांनी आमचें
आंगण शिवरिल्लें आसतालें,
रतनआबोलें कित्याक कोण जाणा
हळूच लजून फुलतालें.

पोरसांतली जाणटी दसण
नेणारपण मिरयताली
लयराईच्या जात्रेची सुलूस
जुस्त मोगरेक चडटाली.

वयणेवेल्या चुडटांचेर न्हिदपाची
ओडूच आगळी आशिल्ली
खळावेल्या बेड्यांचेर लोळपाची
मजाच वेगळी आशिल्ली.

खाणोणेंतले माग आतां
शिंपपा खातीर उरुंक ना
कल्ल्याचो आदलो झेत
आयच्या स्प्रिंक्लरांनी ना.

गार्फां, आमुल्ल्यो, तेफळी आतां
आदले बशेन लागनात,
परमळ आपलो फांकोवन
आपूण लागिल्ल्याचें सांगनात.

आपणाल्या परस हेरांल्या भाटांतलीं
आडसरां रुचीक लागतालीं,
सूकत घाल्ले पणसाचे पापड
कुरू कुरू करून खातालीं.

पिराड्याच्या बॅटान आमी
कितलीं शतकां मारताले,
बाॅल शेटलो जाल्यार आमकां
तोरगां धडे सुध्दां चलताले.

अनशी आतां आळशी जाल्या
माडाक लेगीत मोठेंपण आयलां,
कावथेन आपणें माडी जावपाचें
सपन लेगीत उदकांत पायलां.

शेण्यावयलो पणस आतां
आदले बशेन लागना,
कळसो भर उदक सोडून
मिरवेल कांय मागिना.

भातयो, पालो खावपी मायेस्त
गोरवां आतां गोठ्यांत ना,
माकडांक आमुडपाची तांक आयच्या
पग, जर्मन पेट्यांत ना.

पूण थोडें भोव उरलां नदरे सामकार
बाकी सगळें इतिहासजमा,
आतां घरां, मनशां कोण ना हांगा
म्हज्यो यादी तरी कसल्या कामा?

******

-  गौरांग बाबुराव भांडीये. [माय, २०२३]

ದಾಯ್ಜ್.ಕೊಮ್