![]() |
|
ಸಂಪಾದಕೀಯ್
-
8. ದೋನ್ ಸಂಸಾರ್ |
|
ಮುಂಬಯಾಂತ್ ಜಿಣ್ಯೆಸಂಘರ್ಶ್ ಕರ್ಚೆ, ಅಜೀಕ್ ಕಾಂಯ್ ಅಟ್ರಾ
ವರ್ಸಾಧ್ಲೆ ದೀಸ್ ತೆ. ಮಿರಾರೋಡಾಂತ್ ಇಗರ್ಜೆಲಾಗ್ಸಾರ್ ಎಕಾ ಲ್ಹಾನ್
ಭಾಡ್ಯಾಚಾ ಕುಡಾಂತ್ ರಾವ್ತಾಲೊಂ. ಸಕಾಳಿಂ ಸಾತ್ ವೊರಾಕ್ ಹಾಂವೆಂ
ಬೊರಿವ್ಲಿಂತ್ ಕಂಪ್ಯೂಟರ್ ಕ್ಲಾಸಿ ಘೆಂವ್ಕ್ ಆಸಾತ್ ದೆಕುನ್ ಸಕಾಳಿಂ
ಸಾಡೆಪಾಂಚಾಂಕ್ ಪುಣೀಂ ಉಟೊಂಕ್ ಆಸ್ಲೆಂ. ಮ್ಹಜ್ಯಾ ಹಾತಾಂತ್ ವ್ಹಡ್
ಭಾವಾನ್ ದಿಲ್ಲೆಂ ಏಕ್ electronic
ವೋಚ್ ಆಸ್ಲೆಂ, ತಾಂತುಂ ಅಲಾರಾಮ್ ಆಸ್ಲೆಂ ದೆಕುನ್ ಸಕಾಳಿಂ ವೆಳಾರ್
ಉಟೊನ್ ಉಟಾಉಟಿಂ ತಯಾರ್ ಜಾವ್ನ್ ವೆಳಾರ್ ಸ್ಟೇಶನಾಕ್ ಪಾಂವ್ಚೆಂ
ಸದಾಂಚೆಂ ಜಾಲ್ಲೆಂ.
ತೊ ಕಾಳ್ ಪಾವ್ಸ್ ಸುರು ಜಾಂವ್ಚೊ
ದೆಕುನ್ ಪಾವ್ಸ್ ಸುರು ಜಾಲ್ಲೊಚ್ಚ್ ಸರ್ವ್ ಶಿಕ್ಷಕಾಂ ಎಕ್ಟಾಂಯ್
ಜಾವ್ನ್ ’ಖಂಡಾಲಾ’ ವೆಚಿ ಯೆವ್ಜಣ್ ಘಾಲ್ಲಿ, ಹಾಂವ್ ಹ್ಯಾ
ಸಂಸ್ಥ್ಯಾಕ್ ನವೊಚ್ಚ್ ದೆಕುನ್ ಚುಕಾರಿ ಮಾರ್ಚೆಪರಿಂ ನಾತ್ಲೆಂ,
ದೆಕುನ್ ಮನ್ ನಾಸ್ಚ್ಯಾ ಮನಾಂತ್ ಹಾಂವ್‌ಯೀ ಗೆಲ್ಲೊಂ, ಪುಣ್
ಖಂಡಾಲಾಂತ್ ಉದ್ಕಾಖೆಳಾಂತ್ ಮ್ಹಜ್ಯಾ ಹಾತಾಂತ್ಲೆಂ
electronic ವೋಚ್ ಖಂಯ್ಚರ್/ಕೆದಾಳಾ/ಕಶೆಂ
ಚುಕ್ಲೆಂ ಮ್ಹಣುನ್ ಕಳ್ಳೆಂಚ್ಚ್ ನಾ.
ಆತಾಂ ಸಕಾಳಿಂ ಉಟೊಂಕ್ ಅಲಾರಾಮ್ ನಾ, ಅಲಾರಾಮಾಚೆಂ ಘಡಿಯಾಳ್ ಹಾಡ್ಯಾಂ
ಮ್ಹಳ್ಯಾರೀ ತಾಂಕ್ ನಾ ದೆಕುನ್, ರಾತಿಂ ನಿದ್ತಾನಾ ಗರ್ಜೆಚ್ಯಾಕೀ
ಚಡಿತ್ ಉದಾಕ್ ಪಿಯೆವ್ನ್ ನಿದ್ತಾಲೊಂ. ಕೆದ್ನಾಂ ಸಕಾಳಿಂ ಚ್ಯಾರಾಂಕ್
ಜಾಗ್ ಜಾತಾಲಿ ತರ್ ಕೆದ್ನಾಂ ಪಾಂಚಾಂಕ್. ಅಶೆಂ ಸುಮಾರ್ ದೀಸ್ ಪಾಶಾರ್
ಕೆಲೆ. ಕಶಿಗೀ ಹಿ ಗಜಾಲ್ ಮ್ಹಜ್ಯಾ ಹೊಕ್ಲೆಕ್ ಕಳೊನ್ ಆಯ್ಲಿ, ತಿ
ಮುಂಬಯಾಕ್ ನವಿಚ್ಚ್ ಆಯಿಲ್ಲಿ ಆನಿ ಮಯ್ನ್ಯಾಕ್ ದೋನ್ ಹಜಾರ್ ರುಪಯ್
ಸಾಂಭಾಳಾಚೆಂ ನವೆಂಚ್ ಕಾಮ್ ತಿಕಾ ಮೆಳ್‌ಲ್ಲೆಂ. ತಿಚೊ ಪಯ್ಲೊ
ಸಾಂಭಾಳ್ ಮೆಳ್‌ಲ್ಲೊಚ್ಚ್ 1800 ರುಪ್ಯಾಚೆಂ ಟೈಟನಾಚೆಂ ವೋಚ್ ತಿಣೆಂ
ಮ್ಹಾಕಾ ಗಿಫ್ಟ್ ದಿಲೆಂ.
ಉಪ್ರಾಂತ್ ಹಾಂವ್ ಕಾಮಾಕ್
ಲಾಗೊನ್ ಕುವೇಯ್ಟಾಕ್ ಪಾವ್ಲೊಂ ತರ್‌ಯೀ ಇಕ್ರಾ-ಭಾರಾ ವರ್ಸಾಂ
ಮ್ಹಣಾಸರ್ ಹೆಂ ವೋಚ್ ಮಾತ್ರ್ ಚುಕಯ್ಲೆಂನಾ ವಾ ಬದ್ಲಿಲೆಂಚ್ ನಾ.
ಏಕ್ ಪಾವ್ಟಿಂ ರಜೆರ್ ಗಾಂವಾಕ್ ಪಾವ್‌ಲ್ಲೆವೆಳಾರ್ ಇಸ್ಕೊಲಾಂತ್
ಶಿಕುನ್ ಆಸ್ಚ್ಯಾ ಮ್ಹಜ್ಯಾ ಭಾಚ್ಯಾಕ್ ಮ್ಹಜ್ಯಾ ವೋಚಾಚೆರ್ ಆಶಾ
ಆಯ್ಲಿ ದೆಕುನ್ ’ಮಾಮಾ, ತುಜೆಂ ವೋಚ್ ಮ್ಹಾಕಾ ದಿತಾಯ್‌ಗೀ’ ಮ್ಹಣಾಲೊ.
ಆತಾಂ ಮ್ಹಜ್ಯಾ ಭಾಚ್ಯಾಕ್ ಹ್ಯಾ ವೋಚಾಪಾಟ್ಲ್ಯಾನ್ ಲಿಪೊನ್ ಆಸ್‌ಲ್ಲೆ
ಮ್ಹಜೆ ಉಮಾಳೆ ಆನಿ ಯಾದಿ ಕಶೆಂ ಸಮ್ಜಾಂವ್? ಅಖೇರಿಕ್ ತೆಂ ವೋಚ್ ತಾಕಾ
ದಿಲೆಂಚ್.
ಥೊಡ್ಯಾ ತೆಂಪಾ ಉಪ್ರಾಂತ್ ಕಳೊನ್ ಆಯ್ಲೆಂಕೀ, ಮ್ಹಜ್ಯಾ ಭಾಚ್ಯಾನ್
ತೆಂ ವೋಚ್ ತಾಚ್ಯಾ ಖಂಚ್ಯಾಕೀ ಇಸ್ಟಾಕ್ ದಿಲೆಂ ಮ್ಹಣುನ್.
ಹಾಂಗಾಸರ್ ಸವಾಲ್ ವೋಚಾಚೆಂ ನ್ಹಯ್, ವೋಚಾಚ್ಯಾ ಮೊಲಾಚೆಂ ನ್ಹಯ್ ವಾ
ಮಟ್ಟಾಚೆಂ ನ್ಹಯ್. ಬಗಾರ್ ವೆಳಾಕಾಳಾತೆಕಿದ್ ಬದ್ಲೊನ್ ಯೆಂವ್ಚ್ಯಾ
ಚಿಂತ್ಪಾಚೆಂ.
ದೆವಾನ್ ರಚ್‌ಲ್ಲ್ಯಾ ರಚ್ನೆಂತ್ ಆಮಿ ಸಮ್ಜಲ್ಲೆಪರಿಂ ಏಕ್ ಸಂಸಾರ್
ಆಸ್ಲೊ, ಪುಣ್ ಮನ್ಶ್ಯಾನ್ ಅಪ್ಲ್ಯಾ ಫಾಯ್ದ್ಯಾಖಾತಿರ್ ಹಳ್ತಾರ್
ಅನ್ಯೇಕ್ ಸಂಸಾರ್ ರಚ್ಲೊ. ಖಂಚ್ಯಾಕೀ ಬುಕಾಂತ್ ವಾಚ್‌ಲ್ಲೊ ಉಡಾಸ್
ಅಜೂನ್ ಮತಿಂತ್ ಆಸಾ.
ಅಶೆಂ ಮ್ಹಣ್ತಾಸ್ತಾನಾ ಅನ್ಯೇಕಾ ಘಡಿತಾಚೊ ಉಡಾಸ್ ಯೆತಾ, ಹೊ ಕಾಂಯ್
ಅಜೀಕ್ ತೀಸ್ ವರ್ಸಾಧ್ಲೊ. ಪರ್ಗಾಂವಾಂತ್ ಘೊಳುನ್ ಆಸ್ಲಿ ಮ್ಹಜಿ ಆವಯ್
ಪಾಟಿಂ ಆಯಿಲ್ಲ್ಯಾ ಕಾಳಾಚೆಂ ಹೆಂ ಘಡಿತ್, ತವಳ್ ಆಮಿ ವಕೋಲಾಂತ್
ರಾವ್ತಾಲ್ಯಾಂವ್. ಬೊಂಬೊಯಾಂತ್ ಮ್ಹಜ್ಯಾ ಕಮಾಯಾಂತ್ ಮ್ಹಜ್ಯಾ ಆವಯ್ಕ್
ಏಕ್ ಜೋಡ್ ವ್ಹಾಣೊ ಘೆಂವ್ಕ್ ಮನ್ ಜಾಲೆಂ, ಸಾಂತಾಕ್ರೂಜ್
ಸ್ಟೆಶನಾಬಗ್ಲೆನ್ ಎಕಾ ವ್ಹಾಣಾಂಚ್ಯಾ ದುಕಾನಾಂತ್ಲ್ಯೊ ಕೊಲ್ಹಾಪುರಿ
ವ್ಹಾಣೊ ಘೆತ್ಲ್ಯೊ ಆನಿ ಭೋವ್ ಆತುರಾಯೆನ್ ತ್ಯೊ ವ್ಹರುನ್ ಮ್ಹಜ್ಯಾ
ಆವಯ್ಕ್ ದಿಲ್ಯೊ. ತಿಕಾ ಭೋವ್ ಸಂತೊಸ್ ಜಾಲೊ ದೆಕುನ್ ಸಾಂಜೆರ್ ಆಮಿ
ವಕೋಲಾಥಾವ್ನ್ ಸಾಂತಾಕ್ರೂಜ್ ಸ್ಟೇಶನಾ ಪರ್ಯಾಂತ್ ಚಲುನ್ ವೆತಾಸ್ತಾನಾ
ತಿಣೆಂ ಹ್ಯೊ ನವ್ಯೊ ವ್ಹಾಣೊ ಘಾಲ್ಯೊ ಆನಿ ಆಮಿ ಚಲೊನ್ ಗೆಲ್ಲೆಪರಿಂಚ್,
ಸ್ಟೇಶನ್ ಲಾಗಿಂ ಯೆತಾ ಯೆತಾನಾ ತಿಣೆಂ ಸಾಂಗ್ಲೆಂ ’ಪುತಾ ತುಂ ವ್ಹಚ್,
ಹಾಂವ್ ಹಳ್ತಾರ್ ಚಲ್ತಾಂ, ತುಜೆಸವೆಂ ಚಲೊಂಕ್ ಮ್ಹಾಕಾ ಕಂಯ್ ತ್ರಾಣ್
ಆಸಾ?’
ಹಾಂವ್ ಮುಖಾರ್ ಗೆಲೊಂ ಪುಣ್ ಮತಿಂತ್ ಕಿತೆಂಗೀ ಝಳ್ಕಾಲೆಂ ದೆಕುನ್
ಪಾಟಿಂ ಪಳೆತಾನಾ ಕಿತೆಂ ದೆಖ್ತಾಂ?, ತ್ಯಾ ವ್ಹಾಣಾಂಚ್ಯಾ ದೆಗಾಂನಿ
ಮ್ಹಜ್ಯಾ ಆವಯ್ಚ್ಯಾ ಪಾಂಯಾಂಕ್ ತೊಪುನ್ ತಿಚ್ಯಾ ಪಾಂಯಾಂನಿ ರಗಾತ್
ದೆಂವ್ತಾಲೆಂ. ಕಾಂಯ್ ಮ್ಹಾಕಾ ಕಳ್ಳೆಂ ತರ್ ಮ್ಹಾಕಾ ದುಖತ್ ಕೊಣ್ಣಾ
ಮ್ಹಣುನ್ ಮೌನ್‌ಪಣಿಂ ಸೊಸುನ್ ಇತ್ತುನ್ ಪರ್ಯಾಂತ್ ಚಲುನ್ ಆಯಿಲ್ಲಿ.
ಆಜ್ ಮ್ಹಜಿ ಆವಯ್ ನಾ, ಪುಣ್ ತಿಚಿ ಯಾದ್ ಜಿಣ್ಯೆಲಿಸಾಂವ್ ಜಾವ್ನ್
ಜಿವಂತ್ ಆಸಾ.
ಹಾಂಗಾಸರ್ ತಿಣೆ, ವಾ ಹಾಂವೆಂ ಅಶೆಂ ಕರ್ಯೆತೆಂ, ತಶೆಂ ಕರ್ಯೆತೆಂ
ಮ್ಹಳ್ಳಿಂ ವಾರ್ಜಿಕ್ ಚಿಂತ್ನಾಂ ತುಜ್ಯಾ ಮತಿಂತ್ ಘುಸೊಂಕ್ ಪುರೊ.
ತೆಂ ಹಾಂಗಾಸರ್ ಸವಾಲ್ ನ್ಹಯ್, ಬದ್ಲೊನ್ ಯೆಂವ್ಚ್ಯಾ ಕಾಳಾರ್ ಕಶಿಂ
ಮನ್ಶಾಂ ಬದಲ್ತಾತ್, ವಿಚಾರ್ ಬದಲ್ತಾತ್, ಮೌಲ್ಯಾಂ ಬದಲ್ತಾತ್, ಸರ್ವ್
ಯಾಂತ್ರಿಕ್ ಜಾಲ್ಲ್ಯಾ ಬಜಾರಿ ವೆವಸ್ತೆಂತ್ ಆಮಿ ಜಿಯೆವ್ನ್ ಆಸಾಂವ್,
ದುಡು ದೀವ್ನ್ ಗಾಡ್ವಾಕ್ ಮಾನ್ ಜಾತಾ, ಚರಂಡೆಚ್ಯಾ ಖಚ್ರ್ಯಾಕ್ ಸಯ್ತ್
ಪಾಟೊಸಾರ್ ಬಸವ್ನ್ ಧುಂಪಯ್ತಾತ್, ಸಮಾಜೆಂತ್ ಗುಪ್ತಿ ನಾಲಿಸಾಯ್
ಕರ್ತೆಲ್ಯಾಂಕ್ ಪರ್ಗಟ್ ಫುಲಾಂ ಲಾಭ್ಚೊ ಕಾಳ್ ಹೊ.
ಏಕ್
ಸಂಸಾರ್ ಆಸ್ಲೊ, ತ್ಯಾ ಸಂಸಾರಾಂತ್ ಸಿಂತಿಮೆಂತಾಂಕ್, ಮನ್ಶಾಮೊಲಾಂಕ್
ಮೋಲ್ ಆಸ್ಲೆಂ, ಅನ್ಯೇಕಾ ಸಂಸಾರಾಂತ್ ಸರ್ವ್ ಬಜಾರಿ, ತಾರ್ಲೊ ದೀವ್ನ್
ಬಾಂಗ್ಡೊ ಘೆಂವ್ಚೊ ಸಂಬಂಧ್ ಜಾಲಾ, ದಿಂವ್ಚೆಂ/ಘೆಂವ್ಚೆಂ ಸಯ್ತ್ ಏಕ್
ಧಾಖವ್ಪ್, ಚಿಂತುಂಕ್ ವೇಳ್ ನಾ, ಸರ್ವಾಂಕ್ ಧಾಂವೊಂಕ್ ಅಸಾ, ಕೊಣಾಕ್
ಪಾಟಿಂ ಘಾಲ್ಚಿ ಧಾಂವ್ಣಿ, ಕೊಣಾಕ್ ಧಾಖಂವ್ಚಿ ಧಾಂವ್ಣಿ, ಆನಿ ಹ್ಯಾ
ಧಾಂವ್ಣೆಂತ್ ಅಖೇರಿಕ್ ಭಗುಂಕ್ ಮೆಳ್ಚೆಂ ಮಾತ್ ’ಖರ್ಶೆವ್ಣಿ’.
ದೆಕುನ್ ಜಾಯ್ಜಯ್ ಗಾಂವಾಂತ್ ಮನ್ಶಾಂ ಮೌಲ್ಯಾಂ ಸೊಧ್ಲ್ಯಾರೀ
ಮೆಳ್ಚಿಂ ಭೋವ್ ಅಪ್ರೂಪ್, ತಿಂಚ್ ಮನ್ಶಾಂ ಮೌಲ್ಯಾಂ ಪರ್ಗಾಂವಾಂತ್
ಅಜೂನ್ ಕುಸ್ಕೊನ್ ತರ್‌ಯೀ ಜಿಯೆತಾತ್ ಮ್ಹಳ್ಳೆಂ ಭೋವ್ ಸಮಧಾನೆಚೆಂ.
ಆಯ್ಲೆವಾರ್ ದುಭಯಾಕ್ ಯೆಂವ್ಚೊ ಆಸಾಂ ಮ್ಹಣುನ್ ಭೋವ್ ಥೊಡ್ಯಾ ಖಾಸ್
ಮಿತ್ರಾಂಕ್ ಖಬಾರ್ ದಿಲ್ಲಿ, ತಾಂತುಂ ಎಕ್ಲ್ಯಾನ್ ಮ್ಹಜೆಖಾತಿರ್ ಏಕ್
ಮೊಬಾಯ್ಲ್, ಸಿಮ್ ಘೆವ್ನ್ ದವರ್ಲೆಂ, ಕಾಂಯ್ ಮ್ಹಾಕಾ ಸಂಪರ್ಕ್
ಕರುಂಕ್ ಉಪ್ಕಾರತ್ ಕೊಣ್ಣಾ ಮ್ಹಳ್ಳೆ ಚಿಂತ್ಪಾನ್. ಅಜೂನ್ ಆಸಾತ್ ಎಕಾ
ಸಂಸಾರಾಂತ್ ಜಿಯೆತೆಲೆ, ಜೆ ಹೆರಾಂಕ್, ಹೆರಾಂಚ್ಯಾ ಭಾಂದ್ಪಾಸಾಂಕ್,
ಹೆರಾಂಚಾ ಕಶ್ಟಾಂಕ್ ಸಮ್ಜುಂಕ್ ಸಕ್ಚೆ ಮನ್ಶಾ ಮೌಲ್ಯಾಂಕ್ ಧನ್-ದಿರ್‍ವ್ಯಾಚ್ಯಾಕೀ
ಪ್ರಾಮುಖ್ಯತಾ ದಿಂವ್ಚೆ.
ಆತಾಂ ಸವಾಲ್ ಉಟ್ತಾ ಹೆಂ - ತುಂ ಖಂಚ್ಯಾ ಸಂಸಾರಾಂತ್
ಆಸಾಯ್? ಮ್ಹಾಕಾ
ನ್ಹಯ್ ತುಕಾಚ್ಚ್ ತುಂ ಜವಾಬ್ ದೀ
- ವಲ್ಲಿ ಕ್ವಾಡ್ರಸ್ [ಸಪ್ತೆಂಬರ್, 2016] | |
|
|
|
|
|
 |
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
|
संपादकीय -
8. दॊन संसार |
|
मुंबयांत
जिण्येसंघर्श कर्चे, अजीक कांय अट्रा वर्साध्ले
दीस ते. मिरारॊडांत इगर्जेलाग्सार एका ल्हान
भाड्याचा कुडांत राव्तालों. सकाळिं सात वोराक हांवें
बोरिव्लिंत कंप्यूटर क्लासि घेंव्क आसात देकुन
सकाळिं साडेपांचांक पुणीं उटोंक आस्लें. म्हज्या
हातांत व्हड भावान दिल्लें ऎक एलेकऒनिक वॊच आस्लें,
तांतुं अलाराम आस्लें देकुन सकाळिं वेळार उटोन
उटाउटिं तयार जाव्न वेळार स्टॆशनाक पांव्चें सदांचें
जाल्लें.
तो काळ पाव्स सुरु जांव्चो देकुन पाव्स सुरु
जाल्लोच्च सर्व शिक्षकां एक्टांय जाव्न ’खंडाला’
वेचि येव्जण घाल्लि, हांव ह्या संस्थ्याक नवोच्च
देकुन चुकारि मार्चेपरिं नात्लें, देकुन मन
नास्च्या मनांत हांव्यी गेल्लों, पुण खंडालांत
उद्काखेळांत म्हज्या हातांत्लें एलेकऒनिक वॊच
खंय्चर/केदाळा/कशें चुक्लें म्हणुन कळ्ळेंच्च ना.
आतां सकाळिं उटोंक अलाराम ना, अलारामाचें घडियाळ
हाड्यां म्हळ्यारी तांक ना देकुन, रातिं निद्ताना
गर्जेच्याकी चडित उदाक पियेव्न निद्तालों. केद्नां
सकाळिं च्यारांक जाग जातालि तर केद्नां पांचांक.
अशें सुमार दीस पाशार केले. कशिगी हि गजाल म्हज्या
होक्लेक कळोन आय्लि, ति मुंबयाक नविच्च आयिल्लि आनि
मय्न्याक दॊन हजार रुपय सांभाळाचें नवेंच काम तिका
मेळ्ल्लें. तिचो पय्लो सांभाळ मेळ्ल्लोच्च १८००
रुप्याचें टैटनाचें वॊच तिणें म्हाका गिफ्ट दिलें.
उप्रांत हांव कामाक लागोन कुवॆय्टाक पाव्लों तर्यी
इक्रा-भारा वर्सां म्हणासर हें वॊच मात्र
चुकय्लेंना वा बद्लिलेंच ना.
ऎक पाव्टिं रजेर गांवाक पाव्ल्लेवेळार इस्कोलांत
शिकुन आस्च्या म्हज्या भाच्याक म्हज्या वॊचाचेर आशा
आय्लि देकुन ’मामा, तुजें वॊच म्हाका दिताय्गी’
म्हणालो. आतां कशें सम्जांव म्हज्या भाच्याक ह्या
वॊचापाट्ल्यान लिपोन आस्ल्ले म्हजे उमाळे आनि यादि?
अखॆरिक तें वॊच ताका दिलेंच.
थोड्या तेंपा उप्रांत कळोन आय्लेंकी, म्हज्या
भाच्यान तें वॊच ताच्या खंच्याकी इस्टाक दिलें
म्हणुन.
हांगासर सवाल वॊचाचें न्हय, वॊचाच्या मोलाचें न्हय
वा मट्टाचें न्हय. बगार वेळाकाळातेकिद बद्लोन
येंव्च्या चिंत्पाचें.
देवान रच्ल्ल्या रच्नेंत आमि सम्जल्लेपरिं ऎक
संसार आस्लो, पुण मन्श्यान अप्ल्या फाय्द्याखातिर
हळ्तार अन्यॆक संसार रच्लो. खंच्याकी बुकांत वाच्ल्लो
उडास अजून मतिंत आसा.
अशें म्हण्तास्ताना अन्यॆका घडिताचो उडास येता, हो
कांय अजीक तीस वर्साध्लो. पर्गांवांत घोळुन आस्लि
म्हजि आवय पाटिं आयिल्ल्या काळाचें हें घडित, तवळ
आमि वकॊलांत राव्ताल्यांव. बोंबोयांत म्हज्या
कमायांत म्हज्या आवय्क ऎक जॊड व्हाणो घेंव्क मन
जालें, सांताक्रूज स्टेशनाबग्लेन एका व्हाणांच्या
दुकानांत्ल्यो कोल्हापुरि व्हाणो घेत्ल्यो आनि भॊव
आतुरायेन त्यो व्हरुन म्हज्या आवय्क दिल्यो. तिका
भॊव संतोस जालो देकुन सांजेर आमि वकॊलाथाव्न
सांताक्रूज स्टॆशना पर्यांत चलुन वेतास्ताना तिणें
ह्यो नव्यो व्हाणो घाल्यो आनि आमि चलोन
गेल्लेपरिंच, स्टॆशन लागिं येता येताना तिणें
सांग्लें ’पुता तुं व्हच, हांव हळ्तार चल्तां,
तुजेसवें चलोंक म्हाका कंय त्राण आसा?’
हांव मुखार गेलों पुण मतिंत कितेंगी झळ्कालें
देकुन पाटिं पळेताना कितें देख्तां?, त्या
व्हाणांच्या देगांनि म्हज्या आवय्च्या पांयांक
तोपुन तिच्या पांयांनि रगात देंव्तालें. कांय
म्हाका कळ्ळें तर म्हाका दुखत कोण्णा म्हणुन मौन्पणिं
सोसुन इत्तुन पर्यांत चलुन आयिल्लि.
आज म्हजि आवय ना, पुण तिचि याद जिण्येलिसांव जाव्न
जिवंत आसा.
हांगासर तिणे, वा हांवें अशें कर्येतें, तशें
कर्येतें म्हळ्ळिं वार्जिक चिंत्नां तुज्या मतिंत
घुसोंक पुरो. तें हांगासर सवाल न्हय, बद्लोन
येंव्च्या काळार कशिं मन्शां बदल्तात, विचार
बदल्तात, मौल्यां बदल्तात, सर्व यांत्रिक जाल्ल्या
बजारि वेवस्तेंत आमि जियेव्न आसांव, दुडु दीव्न
गाड्वाक मान जाता, चरंडेच्या खच्र्याक सय्त
पाटोसार बसव्न धुंपय्तात, समाजेंत गुप्ति नालिसाय
कर्तेल्यांक पर्गट फुलां लाभ्चो काळ हो.
ऎक संसार आस्लो, त्या संसारांत सिंतिमेंतांक,
मन्शामोलांक मॊल आस्लें, अन्यॆका संसारांत सर्व
बजारि, तार्लो दीव्न बांग्डो घेंव्चो संबंध जाला,
दिंव्चें/घेंव्चें सय्त ऎक धाखव्प, चिंतुंक वॆळ
ना, सर्वांक धांवोंक असा, कोणाक पाटिं घाल्चि
धांव्णि, कोणाक धाखंव्चि धांव्णि, आनि ह्या
धांव्णेंत अखॆरिक भगुंक मेळ्चें मात ’खर्शेव्णि’.
देकुन जाय्जय गांवांत मन्शां मौल्यां सोध्ल्यारी
मेळ्चिं भॊव अप्रूप, तिंच मन्शां मौल्यां
पर्गांवांत अजून कुस्कोन तर्यी जियेतात म्हळ्ळें
भॊव समधानेचें.
आय्लेवार दुभयाक येंव्चो आसां म्हणुन भॊव थोड्या
खास मित्रांक खबार दिल्लि, तांतुं एक्ल्यान
म्हजेखातिर ऎक मोबाय्ल, सिम घेव्न दवर्लें, कांय
म्हाका संपर्क करुंक उप्कारत कोण्णा म्हळ्ळे
चिंत्पान. अजून आसात एका संसारांत जियेतेले, जे
हेरांक, हेरांच्या भांद्पासांक, हेरांचा कश्टांक
सम्जुंक सक्चे मन्शा मौल्यांक धन-दिव्याच्याकी
प्रामुख्यता दिंव्चे.
आतां सवाल उट्ता हें - तुं खंच्या संसारांत
आसाय?
म्हाका न्हय तुकाच्च तुं जवाब दी
- वल्लि
क्वाड्रस (सप्तेंबर,
२०१६) |
| |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
