![]() |
|
ಸಂಪಾದಕೀಯ್
-
7. ವೇಳ್, ವೆಕ್ತಿತ್ವ್ ಆನಿ ಬುರ್ನಾಸ್ ಸವಯೊ |
|
ಸಾಹಿರ್
ಲುಧ್ಯಾನ್ವಿಚೆಂ ಏಕ್ ಅಪುರ್ಭಾಯೆಚೆಂ ಪದ್ ಯಾದಿಕ್ ಯೆತಾ, ಬಿ. ಆರ್.
ಚೋಪ್ರಾನ್ 1965 ಇಸ್ವೆಂತ್ ಹೆಂ ಪದ್ ’ವಖ್ತ್’ ಫಿಲ್ಮಾಂತ್ ಮಹಮ್ಮದ್
ರಫಿ ಥಾವ್ನ್ ಗಾವಯಿಲ್ಲೆಂ ಜಾವ್ನಾಸಾ;
वख्त से दिन और रात
वख्त से कल और आज
वख्त कि हर शै गुलाम
वख्त क हर शै पे राज
ವೆಳಾ ಥಾವ್ನ್‌ಂಚ್ ದೀಸ್ ಅನಿ ರಾತ್
ವೆಳಾ ಥಾವ್ನ್‌ಂಚ್ ಕಾಲ್ ಆನಿ ಫಾಲೆಂ
ವೆಳಾಒ ಗುಲಾಮ್ ಹರ್ಯೆಕ್ ರಾಯ್
ವೆಳಾಚೆಂಚ್ ರಾಜ್ ಹರ್ಯೆಕಾ ರಾಯಾಚೆರ್
ಹ್ಯಾ ಸಂಪಾದಕೀಯಾಚೆಂ ತಕ್ಲೆನಾಂವ್, ಸಾಹೀರಾಚ್ಯೆ ಕವಿತೆಕ್ ಸಂಬಂಧ್
ಜಸೊ ಅಷ್ಟಮಿ ಆನಿ ಕಾಸೀಮ್ ಸಾಯ್ಬಾಕ್ ಆಸ್ಚೆಪರಿಂ ನ್ಹಯ್.
ಆಮ್ಚ್ಯಾ ದೀಸ್ಪಡ್ತೆ ಜಿಣ್ಯೆಂತ್ ಆಮಿ ಕಿತ್ಲೆಶೆಗೀ ಪಾವ್ಟಿಂ
ಹೆರಾಂಕ್ ಮೆಳುಂಕ್ ವೆತಾಂವ್, ಹೆರಾಂಕ್ ರಾಕಾಶೆಂ ಕರ್ತಾಂವ್, ಕೊಣಾಕ್
ವೆಳಾಚಿ ಪರ್ವಾ ನಾ, ಕೊಣಾಕ್ ವೆಳಾಚೊ ಮಹತ್ವ್ ಕಳಿತ್ ನಾ, ಆನಿ
ಕೊಣಾಕ್ ವೆಳಾಚೊ ಮತ್ಲಬ್‌ಚ್ಚ್ ಕಳಿತ್ ನಾ.
ಏಕ್ ಘಡಿತ್ ಮ್ಹಜ್ಯಾ ಜಿಣ್ಯೆಂತ್ ವೆಳಾಚೊ ಮಹತ್ವ್ ಶಿಕಯಿಲ್ಲೆಂ
ಅಜೂನ್ ಮ್ಹಜ್ಯಾ ಮತಿಂತ್ ಜಿವೆಂಚ್ ಉರ್ಲಾಂ;
1991 ಇಸ್ವೆಂತ್ ಮಂಗ್ಳುರಾಂತ್ಲ್ಯಾ ಸಾಂ|ಲುವಿಸ್ ಕೊಲೆಜಿಂತ್
ಪಿ.ಜಿ.ಡಿ.ಸಿ.ಎ. ಶಿಕುನ್, ಜೊಕ್ತೆಂ ಕಾಮ್ ನಾಸ್ತಾನಾ ’ಯುರೇಕಾ
ಫೋರ್ಬ್‌ಸ್’ ಸಂಸ್ಥ್ಯಾಂತ್ ಘರಾನ್ ಘರ್ ವಚುನ್ ’ವ್ಯಾಕ್ಯೂಮ್
ಕ್ಲೀನರ್’ ವಿಖ್ಚೆಂ ಕಾಮ್ ಲಾಭ್ಲೆಂ. ’ಚೊರಾಕ್ ಚೊರುಂಕ್ ಸಯ್ತ್
ಶಿಸ್ತ್ ಆನಿ ವೆಳಾಚಿ ಪರ್ವಾ ಕರ್ಚಿ ಭೋವ್ ಗರ್ಜೆಚಿ’ ಮ್ಹಳ್ಳೆಂ
ಲಿಸಾಂವ್ ಪಯ್ಲೆಪಾವ್ಟಿಂ ಶಿಕ್‌ಲ್ಲೊಂ ಹಾಂಗಾಸರ್‌ಚ್ಚ್.
ಸಕಾಳಿಂ ಸಾಡೆ ಪಾಂಚಾಂಕ್ ಉಟೊನ್, ಸಾತ್ ವೊರಾಂಕ್ ಸಕಾಳಿಚೆಂ
ಮೀಟಿಂಗಾಕ್ ಹಾಜರ್ ಜಾಂವ್ಕ್ ಆಸ್ಲೆಂ, ಪಂದ್ರಾ ಮಿನುಟಾಚೆಂ ಮಿಟಿಂಗ್
ಕಡ್ಡಾಯ್ ದೆಕುನ್ ಮಿಟಿಂಗ್ ಸಂಪವ್ನ್, ಆಮಿ ಘರಾಂಕ್ ಭೆಟೊ ಸುರು
ಕರ್ಚ್ಯೊ ಆಸ್ಲ್ಯೊ. ಚಡ್ತಾವ್ ಘರಾಂನಿ ದಾದ್ಲೆ ನೋವ್ ವೊರಾಶೆಂ
ಕಾಮಾಕ್ ವೆತಾತ್ ದೆಕುನ್ ತಾಂಕಾ ಮೆಳ್‌ಲ್ಲೆಶಿವಾಯ್ ’ವ್ಯಾಕ್ಯೂಮ್
ಕ್ಲೀನರ್’ ವಿಖ್ಚೆಪರಿಂ ನಾತ್ಲೆಂ. ದೆಕುನ್ ದಿಸಾಚೆಂ ಚಡಾವತ್ ಜಾವ್ನ್
ನವ್ಯಾ ಘರಾಂನಿ ಭೆಟೊ ಕೆಲ್ಯಾರೀ, ವ್ಯಾಕ್ಯೂಮ್ ಕ್ಲೀನರಾಚೊ ಡೆಮೊ
ದೀಂವ್ಕ್ ಆನಿ ತೆಚ್ಚ್‌ಪರಿಂ ವಿಖ್ಚೊ ನಿರ್ಣಾಯ್ ಕರಂವ್ಕ್ ಘರ್ಚ್ಯಾ
ಮುಖೇಸ್ತಾನ್/ದಾದ್ಲ್ಯಾನ್ ಘರಾಂತ್ ಆಸ್ಚೆಂ ಅವಶ್ಯ್ ಜಾವ್ನಾಸ್ಲೆಂ.
ಆನಿ ಚಡ್ತಾವ್ ಜಾವ್ನ್ ಮುಖೇಸ್ತ್, ಹಫ್ತ್ಯಾಚ್ಯಾ ಅಖ್ರೇಕ್ (ಸನ್ವಾರಾ/ಆಯ್ತಾರಾ)
ಆಸ್ತಾಲೆ ದೆಕುನ್ ಆಮ್ಚಿ ಚಡ್ತಾವ್ ಮಿನತ್ ಸನ್ವಾರಾ/ಆಯ್ತಾರಾ
ಆಸ್ತಾಲಿ.
ಅಶೆಂ ಎಕಾ ದಿಸಾ ಮಂಗ್ಳುರಾಂತ್ಲ್ಯಾ ಎಕಾ ರೆಸಿಡೆನ್ಶಿಯಲ್
ಕೊಂಪ್ಲೆಕ್ಸಾಕ್ ಹಾಂವ್ ರಿಗ್ಲೊಂ. ಮ್ಹಜ್ಯಾ ಖಾಂದಾರ್ ವ್ಯಾಕ್ಯೂಮ್
ಕ್ಲೀನರ್ ಆಸ್ಲೆಂ. ಮ್ಹಜೆ ಪಾಟ್ಲ್ಯಾನ್ ಏಕ್ ವಾಚ್‌ಮೇನ್ ಧಾಂವುನ್
ಆಯ್ಲೊ ಆನಿ ವಿಚಾರುಂಕ್ ಲಾಗ್ಲೊ ’ಸರ್ ತುಕಾ ಹ್ಯಾ ಬಿಲ್ಡಿಂಗಾಕ್
ರಿಗುಂಕ್ ಪರ್ವಣ್ಗಿ ಆಸಾಗಿ?’
ಹಾಂವೆಂ ಜವಾಬ್ ಜಾವ್ನ್ ಸವ್ಲ್ ಕೆಲೆಂ "ಕೊಣಾಚಿ ಪರ್ವಣ್ಗಿ
ವಿಚಾರುಂಕ್ ಪಡ್ತಾ?"
ವಾಚ್‌ಮೆನಾನ್ ಜವಾಬ್ ದಿಲಿ "ಸೆಕ್ರೆಟರಿ ಮಾನೆಸ್ತ್ ಮೆಲ್ವಿನ್ ಪಿಂಟೊ"
"ಮ್ಹಾಕಾ ತೊ ಖಂಯ್ಚರ್ ಮೆಳ್ತಲೊ?" ಹಾಂವೆಂ ಸವಾಲ್ ಕೆಲೆಂ.
"ಸರ್, ತೊ ಆತಾಂ ಆಫಿಸಾಕ್ ಗೆಲಾ, ತೊ ಫಾ|ಮುಲ್ಲರ್ಸಾಚ್ಯಾ ಆಫಿಸಾಂತ್
ಮ್ಯಾನೆಜರ್" ವಾಚ್‌ಮೆನಾನ್ ಜವಾಬ್ ದಿಲಿ.
ಹಾಂವೆಂ ಘಳಾಯ್ ಕರಿನಾಸ್ತಾನಾ, ಕಂಕ್ನಾಡಿ ಪಾವ್ಲೊಂ, ಮ್ಯಾನೆಜರ್
ಬಿಜಿ ಆಸ್ಲೊ ದೆಕುನ್ ಇಂಟರ್‌ಕೋಮಾಚೆರ್ ತಾಚೆಲಾಗಿಂ ಉಲಂವ್ಕ್
ರಿಸೆಪ್ಶನಾಂತ್ ಮ್ಹಾಕಾ ಆವ್ಕಾಸ್ ಲಾಭ್ಲೊ. ಹಾಂವೆಂ ಮ್ಯಾನೆಜರಾಕ್
ಮುಖಾಮುಖಿ ಮೆಳುಂಕ್ ವಿನತಿ ಕೆಲಿ, ಪುಣ್ ತೊ ಮೆತೆರ್ ಆಸ್ಲೊ ದೆಕುನ್
"ಫಾಲ್ಯಾಂ ಸಕಾಳಿಂ ಸಾಡೆ ನೋವ್ ವೊರಾಕ್ ಆಫಿಸಾಕ್ ಯೇವ್ನ್ ಮೇಳ್"
ಮ್ಹಣುನ್ ರಿಸೀವರ್ ದವರ್ಲೆಂ.
ಹಾಂವ್ ಜಾಯ್ತ್ ಮ್ಹಣುನ್ ದುಸ್ರೆ ದಿಸಾಕ್ ರಾಕುನ್ ರಾವ್ಲೊಂ.
ದುಸ್ರೆ ದಿಸಾ ಸಕಾಳಿಂ ಹರ್ಶೆಂಚೆಪರಿಂ ಹಾಂವ್ ಸಾತ್ ವೊರಾಂಕ್
ಮಿಟಿಂಗಾಕ್ ಹಾಜರ್ ಆಸ್ಲೊಂ, ಸವಾಯ್ ಸಾತಾಂಕ್ ಬೈಕ್ ಚಾಲು ಕರುನ್
ಕೊಣಜೆ ಕುಶಿನ್ ಗೆಲೊಂ, ಥೊಡ್ಯಾ ಘರಾಂನಿ ಭೆಟೊ ದೀಂವ್ಕ್ ಆಸ್ಲ್ಯೊ.
ಪುಣ್ ಮ್ಹಾಕಾ ಸಾಡೆ ನೊವಾಂಕ್ ಕಂಕ್ನಾಡಿ ಯೇಂವ್ಕ್ ಆಸ್ಚಿ ಗಜಾಲ್
ಉಡಾಸಾಂತ್ ಆಸ್ಲಿ. ದೆಕುನ್ ಹಾಂವ್ ಪಾವ್ಣೆ ನೊವಾಂಕ್ ಕೊಣಜೆ ಥಾವ್ನ್
ಮಂಗ್ಳುರ್ಚ್ಯಾ ವಾಟೆರ್ ಪಾಟಿಂ ಭಾಯ್ರ್ ಸರ್ಲೊಂ. ಚಡ್ ಮ್ಹಳ್ಯಾರ್
ಪಂದ್ರಾ-ವೀಸ್ ಮಿನುಟಾಂನಿ ಕಂಕ್ನಾಡಿ ಪಾವೊಂಕ್ ಸಾಧ್ಯ್, ಪುಣ್
ಅಚಾನಕ್ ರಸ್ತ್ಯಾಚೆರ್ ಮ್ಹಜ್ಯಾ ಬಾಯ್ಕಾಚೆಂ ಪಾಟ್ಲೆಂ ಟಯರ್ ಪಂಕ್ಚರ್.
ಸಕಾಳಿಂ ನೋವ್ ಜಾಂವ್ಕ್ ಯೆತಾನಾ, ಬೈಕಾಂತ್ ಜಡಾಯೆಚೆಂ ವ್ಯಾಕ್ಯೂಮ್
ಕ್ಲೀನರ್ ಆಸಾ, ವಾಟೆರ್ ಏಕ್ ಗ್ಯಾರೆಜ್ ಸಯ್ತ್ ಉಗ್ತ್ಯೊ ಜಾಂವ್ಕ್
ನಾಂತ್ ದೆಕುನ್ ಹಾಂವ್ ಉಪಾವ್ ನಾಸ್ತಾನಾ ಬಾಯ್ಕ್ ಲೊಟುನ್ ಯೆತಾಲೊಂ.
ಮ್ಹಜ್ಯಾ ಮತಿಂತ್ ಸಾಡೆ ನೋವ್ ವೊರಾಂಕ್ ಮ್ಯಾನೆಜರಾಕ್ ಮೆಳುಂಕ್
ಆಸ್ಲೆಂ, ಪುಣ್ ವಾಟೆರ್ ಬಾಯ್ಕ್ ದವರುಂಕ್ ಭಿರಾಂತ್, ದೆಕುನ್ ಕಾಂಯ್
ಇಲ್ಲೆ ಮುಖಾರ್ ಗ್ಯಾರೆಜ್ ಉಗ್ತಿ ಜಾಲ್ಯಾಸ್ತೆಲಿ ಮ್ಹಳ್ಳೆ
ಭರ್ವಶ್ಯಾನ್ ಹಾಂವ್ ಬಾಯ್ಕ್ ಲೊಟುನ್ ಯೆತಾನಾ, ಪುರ್ತೊ ಘಾಮಾನ್ ಬುಡ್‌ಲ್ಲೊಂ.
ವೊರಾಂ ನೋವ್ ಜಾವ್ನ್ ವೀಸ್ ಮಿನುಟಾಂ ಜಾಲಿಂ ಮ್ಹಣ್ತಚ್, ಲಾಗ್ಸಿಲ್ಯಾ
ಎಕಾ ಗ್ಯಾರೆಜಿಂತ್ ಬಾಯ್ಕ್ ದವರ್ಲೆಂ ಆನಿ ಏಕ್ ರಿಕ್ಶಾ ಕರುನ್ ಹಾಂವ್
ಕಂಕ್ನಾಡಿ ಪಾವ್ತಾನಾ ವೊರಾಂ ನೋವ್ ಜಾವ್ನ್ ಪಾಂತೀಸ್ ಮಿನುಟಾಂ.
ಘಾಮೆಲ್ಲೊಂ ಹಾಂವ್ ಧಾಂವೊನ್ ರಿಸೆಪ್ಶನಾಚ್ಯಾ ಮೆಜಾಲಾಗಿಂ ಪಾವ್ತಾನಾ
ಮ್ಹಜಿ ದೀಶ್ಟ್ ಕೆಬಿನಾಭಿತರ್ ಗೆಲಿ, ಮ್ಯಾನೆಜರ್ ಆಯಿಲ್ಲೊ ಆನಿ
ತಾಣೆಂಯ್ ಮ್ಹಜೆರ್ ದೀಶ್ಟ್ ಘಾಲಿ, ಆನಿ ಮ್ಹಾಕಾ ಭಾಯ್ರ್ ಇಲ್ಲೊ ವೇಳ್
ಬೊಸುಂಕ್ ಫರ್ಮಾಯ್ಲೆಂ.
ಹಾಂವ್ ಭಾಯ್ರ್ ಬೊಸೊನ್ ಕಪಲಾರ್ ದೆಂವ್ಚೊ ಘಾಮ್ ಪುಸುನ್ ಆಸ್ಲೊಂ,
ಆನಿ ಮ್ಯಾನೆಜರ್ ಆಪ್ಲ್ಯಾ ಕ್ಯಾಬಿನಾಂತ್ ಬಸೊನ್ ಪೆಪರ್ ವಾಚ್ತಾಲೊ,
ಫೊನಾಚೆಂ ರಿಸೀವರ್ ಉಕಲ್ತಾಲೊ.
ಸುಮಾರ್ ವೇಳ್ ಬಸ್ಲೊಂ, ಮ್ಹಜಿ ಮತ್ ಗ್ಯಾರೆಜಿಂತ್ ದವರ್ಲೆಲ್ಯಾ
ಬಾಯ್ಕಾಚೆರ್ ಆಸ್ಲಿ, ವೇಳಾಚೊ ಕಾಂಟೊ ಎದೊಳ್‌ಚ್ಚ್ ಧಾ ಉತ್ರಲ್ಲೊ
ದೆಕುನ್ ಪರತ್ ಏಕ್ ಪಾವ್ಟಿಂ ರಿಸೆಪ್ಶನಾಚ್ಯಾ ಚೆಡ್ವಾಲಾಗಿಂ ವಿನತಿ
ಕರುಂಕ್ ಉಟ್ಲೊಂ. ತ್ಯಾ ಚೆಡ್ವಾನ್ ಕಿತೆಂ ಆಯ್ಕಲೆಂ ಕಳಿತ್ ನಾ,
ಮ್ಹಾಕಾ ಭಿತರ್ ವಚುನ್ ಮ್ಯಾನೆಜರಾಕ್ ಮೆಳುಂಕ್ ಆಡಾಯ್ಲೆಂನಾ.
ಹಾಂವ್ ಖಾಲ್ತೆಪಣಿಂ ದಾರಾಚೆರ್ ಆವಾಜ್ ಕರುನ್ ಭಿತರ್ ರಿಗೊನ್ ’ಗುಡ್
ಮೋರ್ನಿಂಗ್ ಸರ್’ ಮ್ಹಳೆಂ.
ಮ್ಯಾನೆಜರಾನ್ ಮ್ಹಜೆರ್ ಕಠೀಣ್ ರಾಗಾನ್ ದೀಶ್ಟ್ ಘಾಲುನ್ ವಿಚಾರ್ಲೆಂ
’ಟೆಲ್ ಮಿ’
ಹಾಂವೆಂ ಅಪ್ರಾದಿ ಜೀನ್ಸಾರ್ ’ಸರ್ ಕಾಲ್ ತುಮ್ಚೆಲಾಗಿಂ ಹಾಂವೆಂ
ಮೆಳುಂಕ್ ವೇಳ್ ಘೆತ್ಲಾ’
’ಕಿತ್ಲ್ಯಾ ವೆಳಾರ್?’
’ಸರ್ ಸಾಡೆ ನೊವಾಶೆಂ’
’ಸಾಡೆ ನೊವಾಶೆಂ ನ್ಹಯ್, ಸಾಡೆ ನೊವಾಂಕ್‌ಚ್ಚ್’ ಪುಣ್ ತುಂ ಸಾಡೆ
ನೊವಾಂಕ್ ಯೇವ್ನಾಂಯ್.
’ಸರ್ ಹಾಂವ್ ಇಲ್ಲೊ ತಡವ್ ಕರ್ನ್ ಆಯ್ಲೊಂ, ಇಲ್ಲೆಂ ಪ್ರೋಬ್ಲೆಮ್
ಜಾಲೆಂ’
’ತುಜೆಂ ಪ್ರೋಬ್ಲೆಮ್ ತುಜೆಲಾಗಿಂ ಆಸುಂ, ಹಾಂವೆಂ ವಿಚಾರ್ಲೆಂವೆ?
ತುಂ ವೆಳಾರ್ ಯೇವ್ನಾಯ್ ದೆಕುನ್ ತುಕಾ ದೀಂವ್ಕ್ ಮ್ಹಜೆಲಾಗಿಂ ವೇಳ್
ನಾ’
ಕಿತ್ಲೆಂ ಪರಾತ್ತಿಲ್ಯಾರೀ, ಮ್ಹಾಕಾ ಆಯ್ಕುಂಕ್ ತೊ ಕಬೂಲ್ ಜಾಲೊಚ್
ನಾ ದೆಕುನ್ ಹಾಂವ್ ಆಯಿಲ್ಲಿ ವಾಟ್ ಧರ್ನ್ ಗೆಲೊಂ.
ಹಾಂಗಾಸರ್ ಸವಾಲ್ ಕೊಣ್ ಬರೊ ಆನಿ ಕೊಣ್ ಖೊಟೊ ಮ್ಹಣುನ್ ನ್ಹಯ್, ಕೊಣೆ
ಕೆಲ್ಲೆಂ ಸಾರ್ಕೆಂ, ಕೊಣೆಂ ಕೆಲ್ಲಿ ಚೂಕ್ ಮ್ಹಣುನ್‍ಯೀ ನ್ಹಯ್,
ಸವಾಲ್ - ಹೆಂ ಜಿಣ್ಯೆ ಲಿಸಾಂವ್ ಕರುನ್ ಅಪ್ಣಾಥಂಯ್ ಜಾಯ್ತಿ ಶಿಸ್ತ್
ಸಾಂಭಾಳುಂಕ್ ಶಿಕ್‌ಲ್ಲಿ. ಆನಿ ಆಜ್ ಪಾಸೊನ್ ಹಾಂವ್ ತ್ಯಾ
ಮ್ಯಾನೆಜರಾಕ್ ಉಪ್ಕಾರಿ ಮನಾನ್ ಉಡಾಸ್ ಕಾಡ್ತಾಂ. ಕಿತ್ಯಾಕ್
ಮ್ಹಳ್ಯಾರ್ ಆಜ್ ಪಾಸೊನ್ ಹಿ ಶಿಸ್ತೆನ್ ಮ್ಹಜ್ಯಾ ವೃತ್ತಿಪರ್
ಜಿಣ್ಯೆಂತ್ ಮಹತ್ವಾಚೊ ಪಾತ್ರ್ ಘೆತ್ಲ್ಯಾ.
ಆಮ್ಕಾಂ ನಿಬಾಂ ದಿಂವ್ಚಿ ತರ್, ಹಜಾರ್ ನಿಬಾಂ ದಿವ್ಯೆತಾ, ಬಸ್ಸ್/ಟ್ರೇಯ್ನ್
ತಡವ್ ಜಾಲೆಂ, ರಿಕ್ಶಾ ಚುಕ್ಲಿ, ಅಲಾರ್ಮ್ ಆಯ್ಕೊಂಕ್ ನಾ, ರಾತಿಂ
ತಡವ್ನ್ ಕರ್ನ್ ನಿದ್ಲೊಂ..... ಏಕ್ ನ್ಹಯ್, ಹಜಾರ್ ನಿಬಾಂ ಯೆತಿತ್.
ಪುಣ್ ಜೆದ್ನಾಂ ಆಮ್ಚ್ಯಾ ಜಿಣ್ಯೆಂತ್ ಆಮಿ ಶಿಸ್ತ್ ಸಾಂಭಾಳ್ತಾಂವ್
ಆನಿ ವೆಳಾಕ್ ಜೊಕ್ತೊ ಮಾನ್ ದೀಂವ್ಕ್ ಸಕ್ತಾಂವ್, ತೆದ್ನಾಂ ಅಪ್ಶೆಂಚ್
ಏಕ್ ಶಿಸ್ತೆಚೆಂ ವೆಕ್ತಿತ್ವ್ ಉಭೆಂ ಜಾತಾ.
ಪುಣ್ ಜಾಯ್ತೊ ಲೋಕ್ ಆಮ್ಚೆ ಭಂವಾರಿಂ ಆಸ್ಚೊ, ವೆಳಾಚೆಂ ಮಹತ್ವ್
ಕಳಿತ್ ನಾಸ್ತಾನಾ, ವೆಳಾಕ್ ಮರ್ಯಾದ್ ಸಯ್ತ್ ದೀನಾಸ್ತಾನಾ, ಅಪ್ಲೆಂ
ವೆಕ್ತಿತ್ವ್ ಬುರ್ನಾಸ್ ಕರುನ್ ಜಿಯೆತಾ ಆನಿ ತಸಲ್ಯಾಂಕ್ ಕೊಣೆಂಯ್
ಕಿತೆಂಯ್ ಕೆಲ್ಲೆಪರಿಂ ನಾ ಬಗಾರ್ ’ವೆಳಾನ್’.
- ವಲ್ಲಿ ಕ್ವಾಡ್ರಸ್ [ಜೂನ್, 2016] | |
|
|
|
|
|
 |
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
|
संपादकीय -
7. वॆळ,
वेक्तित्व आनि बुर्नास सवयो |
|
साहिर लुध्यान्विचें ऎक
अपुर्भायेचें पद यादिक येता, बि. आर. चॊप्रान १९६५
इस्वेंत हें पद ’वख्त’ फिल्मांत महम्मद रफि थाव्न
गावयिल्लें जाव्नासा;
वख्त से दिन और रात
वख्त से कल और आज
वख्त कि हर शै गुलाम
वख्त क हर शै पे रज
वेळा थाव्न्ंच दीस अनि रात
वेळा थाव्न्ंच काल आनि फालें
वेळाओ गुलाम हर्येक राय
वेळाचेंच राज हर्येका रायाचेर
ह्या संपादकीयाचें तक्लेनांव, साहीराच्ये कवितेक
संबंध जसो अष्टमि आनि कासीम साय्बाक आस्चेपरिं
न्हय.
आम्च्या दीस्पड्ते जिण्येंत आमि कित्लेशेगी पाव्टिं
हेरांक मेळुंक वेतांव, हेरांक राकाशें कर्तांव,
कोणाक वेळाचि पर्वा ना, कोणाक वेळाचो महत्व कळित
ना, आनि कोणाक वेळाचो मत्लब्च्च कळित ना.
ऎक घडित म्हज्या जिण्येंत वेळाचो महत्व शिकयिल्लें
अजून म्हज्या मतिंत जिवेंच उर्लां;
१९९१ इस्वेंत मंग्ळुरांत्ल्या सां।लुविस कोलेजिंत
पि.जि.डि.सि.ए. शिकुन, जोक्तें काम नास्ताना
’युरॆका फॊर्ब्स’ संस्थ्यांत घरान घर वचुन
’व्याक्यूम क्लीनर’ विख्चें काम लाभ्लें. ’चोराक
चोरुंक सय्त शिस्त आनि वेळाचि पर्वा कर्चि भॊव
गर्जेचि’ म्हळ्ळें लिसांव पय्लेपाव्टिं शिक्ल्लों
हांगासर्च्च.
सकाळिं साडे पांचांक उटोन, सात वोरांक सकाळिचें
मीटिंगाक हाजर जांव्क आस्लें, पंद्रा मिनुटाचें
मिटिंग कड्डाय देकुन मिटिंग संपव्न, आमि घरांक भेटो
सुरु कर्च्यो आस्ल्यो. चड्ताव घरांनि दाद्ले नॊव
वोराशें कामाक वेतात देकुन तांका मेळ्ल्लेशिवाय
’व्याक्यूम क्लीनर’ विख्चेपरिं नात्लें. देकुन
दिसाचें चडावत जाव्न नव्या घरांनि भेटो केल्यारी,
व्याक्यूम क्लीनराचो डेमो दींव्क आनि तेच्च्परिं
विख्चो निर्णाय करंव्क घर्च्या मुखॆस्तान/दाद्ल्यान
घरांत आस्चें अवश्य जाव्नास्लें. आनि चड्ताव जाव्न
मुखॆस्त, हफ्त्याच्या अख्रॆक (सन्वारा/आय्तारा)
आस्ताले देकुन आम्चि चड्ताव मिनत सन्वारा/आय्तारा
आस्तालि.
अशें एका दिसा मंग्ळुरांत्ल्या एका रेसिडेन्शियल
कोंप्लेक्साक हांव रिग्लों. म्हज्या खांदार
व्याक्यूम क्लीनर आस्लें. म्हजे पाट्ल्यान ऎक वाच्मॆन
धांवुन आय्लो आनि विचारुंक लाग्लो ’सर तुका ह्या
बिल्डिंगाक रिगुंक पर्वण्गि आसागि?’
हांवें जवाब जाव्न सव्ल केलें "कोणाचि पर्वण्गि
विचारुंक पड्ता?"
वाच्मेनान जवाब दिलि "सेक्रेटरि मानेस्त मेल्विन
पिंटो"
"म्हाका तो खंय्चर मेळ्तलो?" हांवें सवाल केलें.
"सर, तो आतां आफिसाक गेला, तो फा।मुल्लर्साच्या
आफिसांत म्यानेजर" वाच्मेनान जवाब दिलि.
हांवें घळाय करिनास्ताना, कंक्नाडि पाव्लों,
म्यानेजर बिजि आस्लो देकुन इंटर्कॊमाचेर ताचेलागिं
उलंव्क रिसेप्शनांत म्हाका आव्कास लाभ्लो. हांवें
म्यानेजराक मुखामुखि मेळुंक विनति केलि, पुण तो
मेतेर आस्लो देकुन "फाल्यां सकाळिं साडे नॊव वोराक
आफिसाक यॆव्न मॆळ" म्हणुन रिसीवर दवर्लें.
हांव जाय्त म्हणुन दुस्रे दिसाक राकुन राव्लों.
दुस्रे दिसा सकाळिं हर्शेंचेपरिं हांव सात वोरांक
मिटिंगाक हाजर आस्लों, सवाय सातांक बैक चालु करुन
कोणजे कुशिन गेलों, थोड्या घरांनि भेटो दींव्क
आस्ल्यो. पुण म्हाका साडे नोवांक कंक्नाडि यॆंव्क
आस्चि गजाल उडासांत आस्लि. देकुन हांव पाव्णे
नोवांक कोणजे थाव्न मंग्ळुर्च्या वाटेर पाटिं
भाय्र सर्लों. चड म्हळ्यार पंद्रा-वीस मिनुटांनि
कंक्नाडि पावोंक साध्य, पुण अचानक रस्त्याचेर
म्हज्या बाय्काचें पाट्लें टयर पंक्चर. सकाळिं नॊव
जांव्क येताना, बैकांत जडायेचें व्याक्यूम क्लीनर
आसा, वाटेर ऎक ग्यारेज सय्त उग्त्यो जांव्क नांत
देकुन हांव उपाव नास्ताना बाय्क लोटुन येतालों.
म्हज्या मतिंत साडे नॊव वोरांक म्यानेजराक मेळुंक
आस्लें, पुण वाटेर बाय्क दवरुंक भिरांत, देकुन
कांय इल्ले मुखार ग्यारेज उग्ति जाल्यास्तेलि
म्हळ्ळे भर्वश्यान हांव बाय्क लोटुन येताना, पुर्तो
घामान बुड्ल्लों. वोरां नॊव जाव्न वीस मिनुटां
जालिं म्हण्तच, लाग्सिल्या एका ग्यारेजिंत बाय्क
दवर्लें आनि ऎक रिक्शा करुन हांव कंक्नाडि पाव्ताना
वोरां नॊव जाव्न पांतीस मिनुटां. घामेल्लों हांव
धांवोन रिसेप्शनाच्या मेजालागिं पाव्ताना म्हजि
दीश्ट केबिनाभितर गेलि, म्यानेजर आयिल्लो आनि
ताणेंय म्हजेर दीश्ट घालि, आनि म्हाका भाय्र इल्लो
वॆळ बोसुंक फर्माय्लें.
हांव भाय्र बोसोन कपलार देंव्चो घाम पुसुन आस्लों,
आनि म्यानेजर आप्ल्या क्याबिनांत बसोन पेपर
वाच्तालो, फोनाचें रिसीवर उकल्तालो.
सुमार वॆळ बस्लों, म्हजि मत ग्यारेजिंत दवर्लेल्या
बाय्काचेर आस्लि, वॆळाचो कांटो एदोळ्च्च धा
उत्रल्लो देकुन परत ऎक पाव्टिं रिसेप्शनाच्या
चेड्वालागिं विनति करुंक उट्लों. त्या चेड्वान कितें
आय्कलें कळित ना, म्हाका भितर वचुन म्यानेजराक
मेळुंक आडाय्लेंना.
हांव खाल्तेपणिं दाराचेर आवाज करुन भितर रिगोन
’गुड मॊर्निंग सर’ म्हळें.
म्यानेजरान म्हजेर कठीण रागान दीश्ट घालुन विचार्लें
’टेल मि’
हांवें अप्रादि जीन्सार ’सर काल तुम्चेलागिं हांवें
मेळुंक वॆळ घेत्ला’
’कित्ल्या वेळार?’
’सर साडे नोवाशें’
’साडे नोवाशें न्हय, साडे नोवांक्च्च’ पुण तुं
साडे नोवांक यॆव्नांय.
’सर हांव इल्लो तडव कर्न आय्लों, इल्लें प्रॊब्लेम
जालें’
’तुजें प्रॊब्लेम तुजेलागिं आसुं, हांवें
विचार्लेंवे? तुं वेळार यॆव्नाय देकुन तुका दींव्क
म्हजेलागिं वॆळ ना’
कित्लें परात्तिल्यारी, म्हाका आय्कुंक तो कबूल
जालोच ना देकुन हांव आयिल्लि वाट धर्न गेलों.
हांगासर सवाल कोण बरो आनि कोण खोटो म्हणुन न्हय,
कोणे केल्लें सार्कें, कोणें केल्लि चूक म्हणुन्यी
न्हय, सवाल - हें जिण्ये लिसांव करुन अप्णाथंय
जाय्ति शिस्त सांभाळुंक शिक्ल्लि. आनि आज पासोन
हांव त्या म्यानेजराक उप्कारि मनान उडास काड्तां.
कित्याक म्हळ्यार आज पासोन हि शिस्तेन म्हज्या
वृत्तिपर जिण्येंत महत्वाचो पात्र घेत्ल्या.
आम्कां निबां दिंव्चि तर, हजार निबां दिव्येता,
बस्स/ट्रॆय्न तडव जालें, रिक्शा चुक्लि, अलार्म
आय्कोंक ना, रातिं तडव्न कर्न निद्लों..... ऎक
न्हय, हजार निबां येतित. पुण जेद्नां आम्च्या
जिण्येंत आमि शिस्त सांभाळ्तांव आनि वेळाक जोक्तो
मान दींव्क सक्तांव, तेद्नां अप्शेंच ऎक शिस्तेचें
वेक्तित्व उभें जाता.
पुण जाय्तो लॊक आम्चे भंवारिं आस्चो, वेळाचें
महत्व कळित नास्ताना, वेळाक मर्याद सय्त दीनास्ताना,
अप्लें वेक्तित्व बुर्नास करुन जियेता आनि
तसल्यांक कोणेंय कितेंय केल्लेपरिं ना बगार ’वेळान’.
- वल्लि
क्वाड्रस (जून,
२०१६) |
| |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
