![]() |
|
ಸಂಪಾದಕೀಯ್
-
6. ಗರ್ಜ್ ಆನಿ ಮರ್ಜ್ |
|
ಜೆದ್ನಾಂ ಮುಂಬಯ್ ಶ್ಹೆರಾಂತ್ ದಿಸಾಚೊ ಗ್ರಾಸ್ ಸೊಧುನ್ ಪಾವ್‌ಲ್ಲೊಂ,
ತೆದ್ನಾಂ ಸಮ್ಜಲ್ಲೆಂ ಏಕ್ ಅಡ್ಹೂಕ್ ಸತ್ ಹೆಂ: ಹ್ಯಾ ಶ್ಹೆರಾಂತ್
’ಬರೆಂ’ ವಾ ’ವಾಯ್ಟ್’ ಮ್ಹಳ್ಳೆಂ ನಾ, ಬಗಾರ್ ಮನಿಸ್ ಮ್ಹಳ್ಳ್ಯೊ
ಜೀವಿ ಜಿಯೆತಾತ್ ಆನಿ ಕರ್ತಾತ್ ಕರ್ನ್ಯೊ ಫಕತ್ತ್ ಆಪಾಪ್ಲ್ಯಾ
’ಗರ್ಜೆಕ್’ ವಾ ’ಮರ್ಜೆಕ್’.
ಜಿಯೆತಲೊ ಹರ್ ಮನಿಸ್ ತೀನ್ ಸಂಗ್ತ್ಯಾಂಚೆರ್ ಚಡ್ತಿಕ್ ಮಹತ್ವ್ ದಿತಾ;
ನ್ಹೆಸಾಪ್, ಜೆವಾಣ್ ತಶೆಂಚ್ ರಾವುಂಕ್ ಏಕ್ ಸುವಾತ್.
ಪೋಟ್ ಭರ್ಚ್ಯಾಕ್ ಭಲಾಯ್ಕೆಚೆಂ ಖಾಣ್ ಖಾಂವ್ಕ್ ಆಶೆಂವ್ಚೆಂ ಸಹಜ್,
ಗರ್ಜೆಚೆಂ ನ್ಹೆಸಾಪ್ ಆಶೆಂವ್ಚೆಂ ಸಹಜ್, ದೀಸ್ ಸಾರುಂಕ್ ಏಕ್ ಪಾಕೆಂ
ಆಶೆಂವ್ಚೆಂ ಸಹಜ್ - ಹೆಂ ಸರ್ವ್ ಗರ್ಜೆಚೆಂ. ಪುಣ್ ಜೆದ್ನಾಂ ಹರ್ಯೆಕಾ
ಜೆವ್ಣಾಕ್ ತುಪಾಶಿತ್ ಆಶೆಂವ್ಚೆಂ, ವಾ ಹರ್ಯೆಕಾ ದಿಸಾ ಸೂಟ್-ಬೂಟ್
ನ್ಹೆಸೊನ್ ಜಿಯೆಂವ್ಚೆಂ, ವಾ ವ್ಹಡಾ ಬಂಗ್ಲ್ಯಾಂತ್ ವಸ್ತಿ ಕರ್ಚೆಂ -
ಹೆಂ ಸರ್ವ್ ಮರ್ಜೆಚೆಂ ಜಿವಿತ್.
ಆನಿ ಜಶೆಂ ಸಂಸಾರಾಚ್ಯಾ ಖಂಚ್ಯಾಯ್ ಕೊನ್ಶ್ಯಾಂತ್ ಕೆದಾಳಾಯ್
ಜಾಂವ್ಚೆಪರಿಂಚ್ ಹಾಂಗಾಸರ್‌ಯೀ ಮರ್ಜೆನ್ ಜಿಯೆಂವ್ಚೆ ಪಾಸತ್
ಗರ್ಜೆಂತ್ ಜಿಯೆತೆಲ್ಯಾಂಚೆರ್ ಜುಲುಮ್ ಚಲ್ತಾ. ಆನಿ ಮರ್ಜೆಂತ್
ಜಿಯೆತೆಲ್ಯಾಂಚ್ಯಾ ಭಳಾಸಮೊರ್ ಗರ್ಜೆಂತ್ ಜಿಯೆತೆಲ್ಯಾಂನಿ
ಸಾಕ್ರಿಫಿಸ್ ಕರುಂಕ್ ಪಡ್ತಾ. ಆನಿ ತೊ ಸಾಕ್ರಿಫಿಸ್ ’ಜೀವ್‍ಘಾತಾ
ಮುಖಾಂತ್ರ್’ಯೀ ಆಸ್ಯೆತಾ.
2015 ವರ್ಸಾ ಮಹಾರಾಶ್ಟ್ರಾಂತ್ ಪಡ್‌ಲ್ಲೊ ಪಾವ್ಸ್ ಉಣೊ, ಪುಣ್
ದಿಸಾನ್‌ದೀಸ್ ಹಾಂಗಾಸರ್ ಜಿಯೆತೆಲ್ಯಾಂಚೊ ಸಂಖೊ ಚಡುನ್ ಯೆತಾ,
ದೇಶಾಚ್ಯಾ ವೆವೆಗ್ಳ್ಯಾ ಸುವಾತೆಂತ್ಲೊ ಲೋಕ್, ದೀಸ್ಪಡ್ತೊ ಗ್ರಾಸ್
ಸೊಧುನ್ ಯೆತಾ, ಅಶೆಂ ಆಸ್ತಾನಾ ಹಾಂಗಾಸರ್ ಜಿಯೆತೆಲ್ಯಾ ಲೊಕಾಂಕ್
ಗರ್ಜೆಚೆಂಚ್ ಉದಾಕ್ ಮೆಳ್ಚೆಂಚ್ ತ್ರಾಸಾಚೆಂ. ಹ್ಯಾ ಮಧೆಂ ಕೋಂಕ್ರಿಟ್
ಭಾಂದ್ಪಾಂ ಉಭಾರ್ತೆಲ್ಯಾಂಚೊ ಸಂಖೊಯ್ ಚಡುನ್ ವೆತಾ, ತಾಂಚಿಂ ಭಾಂದ್ಪಾಂ
ಉಭಿಂ ಕರುಂಖ್ ಚಡಿತ್ ಉದ್ಕಾಚಿ ಗರ್ಜ್ ಆಸಾ. ರಾಜ್ಯಾಂತ್ ಬೊರ್ಗೊಳ್
ಆಸಾ, ಬೆಳೆಂ ನಾ, ಬೆಳೆಂ ಕರ್ಚ್ಯಾಕ್ ಬೆಂಕಾಂನಿ ರೀಣ್ ಕಾಡ್‌ಲ್ಲ್ಯಾಂನಿ
ತೆಂ ಫಾರಿಕ್ ಕೆಲ್ಲೆಪರಿಂ ನಾ, ಆನಿ ತಾಂಚಿ ಬೋಬ್ ಆಯ್ಕತೆಲಿಂ ನಾಂತ್,
ಜಿಯೆಂವ್ಚೆ ಹೆರ್ ವಾಟ್ ತಾಂಚೆಮುಖಾರ್ ನಾ, ತಾಂಚೆಪಾಟ್ಲ್ಯಾನ್ ಏಕ್
ಸಗ್ಳೆಂ ಕುಟಾಮ್ ಜಿಯೆಂವ್ಚ್ಯಾ ವಾಟೆಕ್ ಲಬ್ದೊನ್ ಆಸಾ, ತ್ಯಾ ವೆಳಾರ್
’ಜೀವ್ಘಾತ್’ ಸೊಡ್ಲ್ಯಾರ್ ಹೆರ್ ವಾಟೊ ತಿಂ ವಿಂಚಿನಾಂತ್. ಇತ್ಲೆಂ
ಸರ್ವ್ ಹಾಂಗಾಸರ್ ಸದಾಂಯ್ ಮ್ಹಳ್ಳೆಪರಿಂ ಜಾತಾ ತರ್‌ಯೀ, ಪಳೆತೆಲಿಂ
ನಾಂತ್, ಆಯ್ಕತೆಲಿಂ ನಾಂತ್, ಕರ್ತೆಲಿಂ ನಾಂತ್. ಅಸಲಿಂ ಮೊರ್ನಾಂ
ಕಾಂಯ್ ಥೊಡ್ಯಾ ನ್ಯೂಜ್ ಮೀಡಿಯಾಚಿಂ ಹೆಡ್‌ಲಾಯ್ನ್ ಜಾತಾತ್, ಕಾಂಯ್
ಥೊಡ್ಯಾ ಕವಿಂಚ್ಯಾ ಕವಿಂಕ್ ವಸ್ತ್ ಜಾತಾ ಸೊಡ್ಲ್ಯಾರ್ ಹಕೀಗತೆಂತ್
ಗರ್ಜೆಕ್ ಜಿಯೆತೆಲ್ಯಾಂಕ್ ಸದಾಂಚಿಂ ಮೊರ್ನಾಂ ಮಾತ್ ಖಾಯಮ್.
ಗರ್ಜೆಕ್ ಜಿಯೆತೆಲ್ಯಾಂನಿ ಪಿಯುಂಕ್ ಜಾಯ್ ಜಾಲ್ಲೆಂ ಉದಾಕ್,
ಮರ್ಜೆಕ್ ಜಿಯೆತೆಲ್ಯಾಂಚ್ಯಾ ವೊಡ್ತಾಂತ್ಲ್ಯಾ ಫುಲಾಂ ಝಡಾಂಕ್ ಪಾವ್ತಾ,
ವಾ ಮರ್ಜೆಕ್ ಜಿಯೆತೆಲ್ಯಾಂಚ್ಯೊ ಗಾಡಿಯೊ ಧುಂವ್ಕ್ ಉಪೇಗ್ ಜಾತಾ ವಾ
ಮರ್ಜೆಕ್ ಜಿಯೆತೆಲ್ಯಾಂಚ್ಯಾ ಕುಜ್ನಾ/ನ್ಹಾಣಿಯಾಂನಿ ವೊಮ್ತೊನ್
ವಿಭಾಡ್ ಜಾತಾ. ಹ್ಯಾ ಪರಿಗತೆಂತ್ ಮರ್ಜೆಕ್ ಜಿಯೆತೆಲ್ಯಾ ಲೊಕಾಂಕ್
ಮನರಂಜನ್ ಜಾಯ್, ’ಜೀವ್ಘಾತ್’ ಫಕತ್ ಏಕ್ ಖಬಾರ್, ಜಶೆಂ ಖಿಣಾಂ
ಖಿಣಾಂಕ್ ಆಯ್ಕುಂಕ್ ಮೆಳ್ಚ್ಯಾ ಖಬ್ರಾಂಪರಿಂ ಹಾಂಗಾಸರ್
ಜಿಯೆತೆಲ್ಯಾಂಚ್ಯಾ ಮತಿಂತ್ ಯಾದಿಚಿ ಶ್ಯಾಥಿ ಕ್ಷಣಿಕ್, ಗಜನಿಚ್ಯಾ
ಆಮೀರ್ ಖಾನಾಪರಿಂ ಉಡಾಸ್ ಉಣೊ. ದೆಕುನ್ ಥೊಡ್ಯಾಚ್ ಘದಿಯಾಂನಿ
ಅನ್ಯೇಕ್ ಖಬಾರ್ ಪ್ರಮುಖ್ ಸ್ಥಾನ್ ಘೆತಾ ಆನಿ ಉಪ್ರಾಂತ್ ಹಳ್ತಾರ್
ಮತಿಚ್ಯಾ ಪಡ್ದ್ಯಾಂತ್ಲೆಂ ಹಳ್ತಾರ್ ಮಾಜ್ವೊನ್ ವೆತಾ. ದೆಕುನ್
ಮನರಂಜನ್ ಭೋವ್ ಗರ್ಜೆಚೆಂ, ಐ.ಪಿ.ಎಲ್. ಏಕ್ ಅಸಲೆಂಚ್ ಮನರಂಜನಾಚೆಂ
ಫಿತಿಸ್ಪಣ್.
ಹ್ಯಾ ದೇಶಾಂತ್ ಕಿತೆಂಯ್ ಜಾತಾ, ಮರ್ಜೆಕ್ ಜಿಯೆತೆಲ್ಯಾ ಕೊಣೆಂಯ್
ಕಿತೆಂಯ್ ಕೆಲ್ಯಾರೀ ಜಾತಾ, ತಾಕಾ ವಿಚಾರ್ ಕರ್ತಲೊ ಕೊಣ್‍ಯೀ ನಾ
ದೆಕುನ್ ಕಶೆಂಯ್ ಚಲ್ತಾ. ಪುಣ್ ಗರ್ಜೆಕ್ ಜಿಯೆತಲಿಂ ಅಪ್ಲ್ಯಾ
ಗರ್ಜೆಕ್ ಸಯ್ತ್ ಮರ್ಜೆಗಾರಾಂಚ್ಯಾ ದಯೆಚಿ ಭಿಕ್ ಮಾಗುನ್ ಜಿಯೆತಾತ್.
ಆನಿ ಹೆಂ ಸರ್ವ್ ಫಾವೊ ಕೆಲ್ಲ್ಯಾ ಸರ್ಕಾರಾಕ್ ದೋಶ್ ದಿತಾ ಆನಿ
ಐ.ಪಿ.ಎಲ್ ಖೆಳಾಂತ್ ಮಗ್ನ್ ಜಾತಾ. ಆನಿ ಮುಂಬಯಾಂತ್ ಏಕ್ ಐ.ಪಿ.ಎಲ್.
ಮ್ಯಾಚ್ ಆಸಾ ಕರುಂಕ್ ಕಾಂಯ್ ಹಜಾರೊಂ ಲೀಟರ್ ಉದ್ಕಾಚೊ ವಿಭಾಡ್ ಜಾತಾ.
ಆನಿ ವಿಪರ್ಯಾಸ್ ಮ್ಹಳ್ಯಾರ್, ಮ್ಯಾಚ್ ಪಳೆಂವ್ಕ್ ಯೆಂವ್ಚೊ ಲೋಕ್,
ವೀಸ್ ರುಪ್ಯಾಂಚೆಂ ಉದಾಕ್ ಶೆಂಭೊರ್ ರುಪ್ಯಾಂನಿ ಮೊಲಾಕ್ ಘೆತಾ.
ಆತಾಂ ಅಧುರೆಂಚ್ ಉರ್ತಾ ಏಕ್ ಸವಾಲ್ ’ಗರ್ಜ್’ ಆನಿ ’ಮರ್ಜ್’ ಮಧೆಂ
ಆಸ್ಚೊ ಅಂತರ್ ಉಣೊ ಕರ್ಚಿ ವಾಟ್ ಕಸಲಿ?
- ವಲ್ಲಿ ಕ್ವಾಡ್ರಸ್ [ಮಾಯ್, 2016] | |
|
|
|
|
|
 |
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
|
संपादकीय -
6. गर्ज आनि
मर्ज |
|
जेद्नां मुंबय
श्हेरांत दिसाचो ग्रास सोधुन पाव्ल्लों, तेद्नां
सम्जल्लें ऎक अड्हूक सत हें: ह्या श्हेरांत ’बरें’
वा ’वाय्ट’ म्हळ्ळें ना, बगार मनिस म्हळ्ळ्यो जीवि
जियेतात आनि कर्तात कर्न्यो फकत्त ’गर्जेक’ वा ’मर्जेक’.
जियेतलो हर मनिस तीस संग्त्यांचेर चड्तिक महत्व
दिता; न्हेसाप, जेवाण तशेंच रावुंक ऎक सुवात. पॊट
भर्च्याक भलाय्केचें खाण खांव्क आशेंव्चें सहज,
गर्जेचें न्हेसाप आशेंव्चें सहज, दीस सारुंक ऎक
पाकें आशेंव्चें सहज - हें सर्व गर्जेचें. पुण
जेद्नां हर्येका जेव्णाक तुपाशित आशेंव्चें, वा
हर्येका दिसा सूट-बूट न्हेसोन जियेंव्चें, वा व्हडा
बंग्ल्यांत वस्ति कर्चें - हें सर्व मर्जेचें
जिवित.
आनि जशें संसाराच्या खंच्याय कोन्श्यांत केदाळाय
जांव्चेपरिंच हांगासर्यी मर्जेन जियेंव्चे पासत
गर्जेंत जियेतेल्यांचेर जुलुम चल्ता. आनि मर्जेंत
जियेतेल्यांच्या भळासमोर गर्जेंत जियेतेल्यांनि
साक्रिफिस करुंक पड्ता. आनि तो साक्रिफिस
’जीव्घाता मुखांत्र’यी आस्येता.
२०१५ वर्सा महाराश्ट्रांत पड्ल्लो पाव्स उणो, पुण
दिसान्दीस हांगासर जियेतेल्यांचो संखो चडुन येता,
दॆशाच्या वेवेग्ळ्या सुवातेंत्लो लॊक, दीस्पड्तो
ग्रास सोधुन येता, अशें आस्ताना हांगासर जियेतेल्या
लोकांक गर्जेचेंच उदाक मेळ्चेंच त्रासाचें. ह्या
मधें कॊंक्रिट भांद्पां उभार्तेल्यांचो संखोय चडुन
वेता, तांचिं भांद्पां उभिं करुंख चडित उद्काचि
गर्ज आसा. रास्यांत बोर्गोळ आसा, बेळें ना, बेळें
कर्च्याक बेंकांनि रीण काड्ल्ल्यांनि तें फारिक
केल्लेपरिं ना, आनि तांचि बॊब आय्कतेलिं नांत,
जियेंव्चे हेर वाट तांचेमुखार ना, तांचेपाट्ल्यान
ऎक सग्ळें कुटाम जियेंव्च्या वाटेक लब्दोन आसा,
त्या वेळार ’जीव्घात’ सोड्ल्यार हेर वाटो तिं
विंचिनांत. इत्लें सर्व हांगासर सदांय म्हळ्ळेपरिं
जाता तर्यी, पळेतेलिं नांत, आय्कतेलिं नांत,
कर्तेलिं नांत. असलिं मोर्नां कांय थोड्या न्यूज
मीडियाचिं हेड्लाय्न जातात, कांय थोड्या कविंच्या
कविंक वस्त जाता सोड्ल्यार हकीगतेंत गर्जेक
जियेतेल्यांक सदांचिं मोर्नां मात खायम.
गर्जेक जियेतेल्यांनि पियुंक जाय जाल्लें उदाक,
मर्जेक जियेतेल्यांच्या वोड्तांत्ल्या फुलां झडांक
पाव्ता, वा मर्जेक जियेतेल्यांच्यो गाडियो धुंव्क
उपॆग जाता वा मर्जेक जियेतेल्यांच्या कुज्ना/न्हाणियांनि
वोम्तुन विभाड जाता. ह्या परिगतेंत मर्जेक
जियेतेल्या लोकांक मनरंजन जाय, ’जीव्घात’ फकत ऎक
खबर, जशें खिणां खिणांक आय्कुंक मेळ्च्या खब्रांपरिं
हांगासर जियेतेल्यांच्या मतिंत यादिचि श्यथि
क्षणिक, गजनिच्या आमीर खानापरिं उडास उणो. देकुन
थोड्याच घदियांनि अन्यॆक खबार प्रमुख स्थान घेता
आनि उप्राम्त हळ्तार मतिच्या पड्द्यांत्लें हळ्तार
माज्वोन वेता. देकुन मनरंजन भॊव गर्जेचें, ऐ.पि.एल.
ऎक असलेंच मनरंजनाचें फितिस्पण.
ह्या दॆशांत कितेंय जाता, मर्जेक जियेतेल्या
कोणेंय कितेंय केल्यारी जाया, ताका विचार कर्तलो
कोण्यी ना देकुन कशेंय चल्ता. पुण गर्जेक जियेतलिं
अप्ल्या गर्जेक सय्त मर्जेगारांच्या दयेचि भिक
मागुन जियेतात. आनि हें सर्व फावो केल्ल्या
सर्काराक दॊश दिता आनि ऐ.पि.एल खेळांत मग्न जाता.
आनि मुंबयांत ऎक ऐ.पि.एल म्याच आसा करुंक कांय
हजारों लीटर उद्काचो विभाड जाता. आनि विपर्यास
म्हळ्यार, म्याच पळेंव्क येंव्चो लॊक, वीस
रुप्यांचें उदाक शेंभोर रुप्यांनि मोलाक घेता.
आतां अधुरेंच उर्ता ऎक सवाल ’गर्ज’ आनि ’मर्ज’ मधें
आस्चो अंतर उणो कर्चि वाट कसलि?
- वल्लि
क्वाड्रस (एप्रिल, २०१६) |
| |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
