![]() |
|
ಸಂಪಾದಕೀಯ್
-
5. ಕರೆಜ್ಮ್ ಆಮ್ಕಾಂ ಕಿತ್ಲೊ ಪ್ರಸ್ತುತ್ |
|
ಜೆದ್ನಾಂಯ್ ಕರೆಜ್ಮಾಚೊ ಕಾಳ್ ಸುರು ಜಾತೆಚ್ಚ್ ಎಕಾ ಥರಾಚಿ
ಕಾವ್ಜೆಣಿ ಮತಿಂತ್ ಉದೆತಾಲಿ. ಚುಕಾನಾಸ್ತಾಂ ಸಕಾಳಿಂ ತಶೆಂಚ್
ಸಾಂಜೆರ್ ಮಾಗ್ಣಿಂ ಕರುನ್ ವ್ಹಡ್ ಜಾಲ್ಲ್ಯಾ ಮ್ಹಜ್ಯಾ
ಭುರ್ಗ್ಯಾಪಣಾಲ್ಯಾ ದಿಸಾಂತ್ ಸಯ್ತ್ ’ಕರೆಜ್ಮಾಚೊ ನಿಯಾಳ್’,
’ಖುರ್ಸಾಚಿ ವಾಟ್’, ’ಪ್ರಾಚಿತ್/ಉಪಾಸ್/ಜಿಂಜ್ವಾರ್’ ಪಾಳುಂಕ್ ಆಸ್ಲೆ.
ಆಲ್ತಾರ್ ಭುರ್ಗೊ ಜಾವ್ನ್ ಇಗರ್ಜೆಂತ್ ಮಾತ್ ನ್ಹಯ್, ಘರಾಂತ್ ಸಯ್ತ್
ಖುರ್ಸಾಚಿ ವಾಟ್ ಚಲ್ತಾಲಿ, ಆನಿ ತಿಚ್ಚ್ ಭಕ್ತ್‌ಪಣ್ ಆನಿ ಶಿಸ್ತ್
ಘರಾಂತ್ ಸಾಂಭಾಳುಂಕ್ ಆಸ್ಲಿ.
ಹೊ ಪ್ರಭಾವ್ ಪ್ರಾಯೆನ್ ವ್ಹಡ್ ಜಾಲ್ಲೆಪರಿಂಯೀ ಆಸ್ಲೊ, ಪುಣ್
ಭುರ್ಗ್ಯಾಪಣಾರ್ ಆಸ್ಚೆತಿತ್ಲಿ ಶಿಸ್ತ್ ನಾತ್‌ಲ್ಲಿ ತರ್‌ಯೀ
ಕಾಳ್ಜಾಂತ್ ಎಕಾ ಥರಾಚಿ ಕಾವ್ಜೆಣಿ ಆಸ್ಲಿ, ಅಪ್ಣಾನ್ ಕುಮ್ಸಾರಾಕ್
ವಚುಂಕ್ ಜಾಯ್, ಪ್ರಾಚಿತ್ ಕರುಂಕ್ ಜಾಯ್, ಖುರ್ಸಾಚಿ ವಾಟ್ ಆನಿ ಹೆರ್
ಮಾಗ್ಣಿಂ ಕರುಂಕ್ ಜಾಯ್ ಮ್ಹಳ್ಳಿಂ. ಮುಂಬಯ್ ತಸ್ಲ್ಯಾ ಬಿಜಿ
ಶ್ಹೆರಾಂತ್ ಸಯ್ತ್, ಹ್ಯಾ ಚಿಂತ್ನಾಂಥಾವ್ನ್ ಮುಕ್ತಿ ನಾತ್‌ಲ್ಲಿ.
ಸಿಂಜಿಚ್ಯಾ ಬುಧ್ವಾರಾ ತಶೆಂಚ್ ನಿಮಾಣ್ಯಾ ಸುಕ್ರಾರಾ ಶಿಸ್ತೆಚೊ
ಉಪ್ವಾಸ್ ಮಾತ್ರ್ ಚುಕಯ್ನಾತ್ಲೊಂ. ಕರೆಜ್ಮಾಚ್ಯಾ ಕಾಳಾಂತ್ ಜಿಣಿ
ಬದ್ಲುಂಕ್, ವಾಯ್ಟಾಥಾವ್ನ್ ಬರ್‍ಯಾಕ್ ಪರ್ತುಂಕ್, ಆಮ್ಚೆರ್
ಗುನ್ಯಾಂವ್ ಕೆಲ್ಲ್ಯಾಂಕ್ ಕಾಳ್ಜಾಥಾವ್ನ್ ಭಗ್ಸುಂಕ್ ಏಕ್ ನೀಬ್ ತಶೆಂ.
ವೆಳಾಕಾಳಾತೆಕಿದ್ ಏಕ್ ಲ್ಹಾನ್ ಚಿಂತಾಪ್ ಮ್ಹಜ್ಯಾ ಮತಿಂತ್ ಕಿರ್ಲೊನ್,
ಪಾಳೆವ್ನ್ ರೂಕ್ ಜಾಲ್ಲೊಚ್ಚ್ ಕಳೊಂಕ್ ನಾ. ಆನಿ ತೆಂ ಚಿಂತಾಪ್ ಹೆಂ
ಜಾವ್ನಾಸ್ಲೆಂ, ಕರೆಜ್ಮಾಚ್ಯಾ ಕಾಳಾಂತ್ ಆಮಿ ಬರಿಂ ಜಾಯ್ಜಯ್, ಪುಣ್
’ಕಿತ್ಲಿಂ ಬರಿಂ?’, ಆನಿ ಹೆಂ ಬರೆಂಪಣ್ ಮೆಜ್ಚೆಂ ಮಾಪ್ ಕಸ್ಲೆಂ? ಆನಿ
ತೆಂ ’ಬರೆಂ’ ಯಾ ’ನ್ಹಯ್’ ಮ್ಹಳ್ಳೆಂ ಪಾರ್ಕಿತೆಲೆ ಕೊಣ್?
ಜಲ್ಮಲ್ಲೊ ಹರ್ಯೆಕ್ ಮನಿಸ್ ಪಾತ್ಕಿ ಆನಿ ಪಾತ್ಕಾಚ್ಯಾ ಕೊಂಡಾಂತ್
ಜಿಯೆವ್ನ್ ಆಸಾ, ಲೊಳೊನ್ ಆಸಾ. ಹೆಂ ಸೈಂಬಿಕ್ ಆನಿ ಸಹಜ್. ಪುಣ್
ಸಾಂಕೇತಿಕ್ ರಿತಿನ್ ಜಾಯ್ತೆ ’ಸೊರೊ/ಆಮಾಲ್ ಸೆಂವ್ತೆಲೆ ಹ್ಯಾ ಚಾಳೀಸ್
ದಿಸಾಂನಿ ಆಮಾಲ್ ಸೆವಿನಾ’, ಜಾಯ್ತೆ ಹ್ಯಾ ಚಾಳಿಸ್ ದಿಸಾಂನಿ ’ಮಾಸ್/ಮಾಸ್ಳಿ
ಖಾಯ್ನಾಂತ್’, ವಾ ತಾಂಚ್ಯಾ ಚಿಂತ್ಪಾಪರಿಂ ’ಪ್ರಾಚಿತ್ ಕರ್ತಾತ್’,
ಪುಣ್ ಸವಾಲ್ ಹೆಂ. ಹೆ ಸರ್ವ್ ಸಾಂಕೇತಿಕ್; ಮ್ಹಣ್ಜೆ - ಭಾಯ್ಲೆಂ
ಧಾಖವ್ಪ್. ಪುಣ್ ಆಮ್ಚೆಭಿತರ್ ಹ್ಯಾ ಕರೆಜ್ಮಾಂತ್ ಕಾಂಯ್ ಬದ್ಲಾವಣ್
ಜಾಲಾಂ? ಭಿತರ್ ಮ್ಹಳ್ಯಾರ್ ಕಾಳ್ಜಾ-ಮನಾಂತ್ ಮ್ಹಣುನ್ ಪರತ್ ಸಾಂಗ್ತಾಂ.
ತಾಳೊ ಪಿಂಜ್ತಾಪರ್ಯಾಂತ್ ’ಎಕಾಮೆಕಾಚೊ ಮೋಗ್ ಕರಾ’ ಮ್ಹಣುನ್
ಬೊಬಾಟುಂಕ್ ಸಲೀಸ್, ಪುಣ್ ಕಿತ್ಲೆಶಿಂ ಆಮಿ ತಿಂ ಪಾಳ್ತಾಂವ್?,
’ದುಸ್ಮಾನಾಂಕ್ ಭಗ್ಸಿಯಾತ್’ ಮ್ಹಣೊನ್ ಆರಾಬ್ಬಾಯೊ ದೀಂವ್ಕ್ ಸಲೀಸ್,
ಪುಣ್ ಕಿತ್ಲೆಶಿಂ ಆಮಿ ಆಮ್ಚ್ಯಾಂಕ್‌ಚ್ಚ್ ಭಗ್ಸಿತಾಂವ್?, ಮಾಸ್
ಖಾಯ್ನಾಯೆ ರಾವ್ತಾಂವ್ ಜಾವ್ಯೆತ್ ಪುಣ್ ಹೆರಾಂಚಿಂ ಮಾಸಾಂ
ಖಾಂವ್ಚಾಂತ್ ಪಾಟಿಂ ಆಸಾಂವ್?, ಹ್ಯಾ ಸಂಧರ್ಭಾರ್ ’ರೆತಿರೊ’ ಮ್ಹಳ್ಳೊ
ಅನ್ಯೇಕ್ ಡೋಂಗ್ ವಾ ಫ್ಯಾಶನ್ ಆಜ್‌ಕಾಲ್ ಚಲ್ತಾ. ಆನಿ ಹ್ಯಾ
ಫ್ಯಾಶನಾನ್ ಸಯ್ತ್ ಜಾಯ್ತಿ ಬದ್ಲಾವಣ್ ದೆಖ್ಲ್ಯಾ;
ರೆತಿರೆಚೆ ಜಾಗೆ ಬದಲ್ಲ್ಯಾತ್, ನವೆ ಜಾಗೆ ಉದೆಲ್ಯಾತ್, ನವ್ಯೊ ರಿತಿ
ಉದೆಲ್ಯಾತ್ - ಜಶೆಂ ಓನ್‌ಲಾಯ್ನ್ ಕುಮ್ಸಾರ್ ವಾ ಓನ್‌ಲಾಯ್ನ್ ಆರತಿ
ಚಲ್ಚೆಪರಿಂ. ಪುಣ್ ಚಿಂತಾಪ್ ಬದ್ಲೊಂಕ್ ನಾ. ಹ್ಯಾ ಮಾಗ್ಣಿಂ/ವೊರೆಸಾಂವಾಂನಿ ಕೊಣಾಚೊಗೀ ದುಡು,
ಕೋಣ್‌ಗೀ ಜಮಯ್ತಾ ಆನಿ ಕೊಣಾಚ್ಯಾಗೀ ಖಾತ್ಯಾಂತ್ ಜಮೊ ಜಾತಾ. ಹೊ
ಖುರ್ಸಾಉಮೊ, ಬಾಳ್ಕಾಉಮೊ ದೀವ್ನ್ ಜಮೊ ಜಾಂವ್ಚೊ ದುಡು ಸಯ್ತ್ ಕಾಂಯ್
ಎಕಾ ರಿತಿಚ್ಯಾ ವೆಪಾರಾಪರಿಂ ದಿಸಾನಾ? ಇತ್ಲೆಂ ವಾಚುನ್ ಆತಾಂ ದಾಂತ್
ಖಿರ್ಲುಂಚ್ಯಾ ಭಾಗೆವಂತಾಂನಿ ಆಟೊವ್ ಕರ್ಚಿ ಗರ್ಜ್ ಆಸಾ; ಕರೆಜ್ಮಾಚೊ
ಮಹತ್ವ್ ಕಸ್ಲೊ? ಜಿಣಿ ಬದ್ಲುಂಕ್ ಹೊ ಕರೆಜ್ಮ್ ಖಂಚ್ಯಾ ರಿತಿನ್
ಉಪ್ಕಾರ್ತಾ? ವರ್ಸಾನ್ ವರಸ್ ಲಾಖಾಂನಿ ಚಡೊನ್ ವೆಚ್ಯಾ
ಉಮ್ಯಾನಿಭಾಚ್ಯಾ ದುಡ್ವಾಚೆಂ ಲೇಖ್ ಕರ್ತೆಲ್ಯಾಂಕ್ ಏಕ್ ಸವಾಲ್;
ಹ್ಯಾ ದುಡ್ವಾಂತ್ ಕಿತ್ಲೆಶಿಂ ಘರಾಂ ನಾಸ್ಚ್ಯಾಂಕ್ ಘರಾಂ
ಭಾಂದ್ಲ್ಯಾಂತ್? - ದುಬ್ಳ್ಯಾ ಫಿರ್ಗಜಾಂಕ್ ಕೊಲೆ ವ್ಹರುಂದಿ,
ಆಮ್ಚ್ಯಾಚ್ ಫಿರ್ಗಜೆಂನಿ ಕಾಂಯ್ ದುಬ್ಳಿಂ ನಾಂತ್? ಕಿತ್ಲೆಶ್ಯಾ
ಘರಾಂನಿ ಆಸ್ಚ್ಯಾ ಪಿಡೇಸ್ತಾಂಕ್ ಪಳೆತೆಲಿ ಗತ್ ನಾ, ಜಾಯ್ತಿಂ
ಪ್ರಾಯೆಸ್ತ್ ಆವಯ್-ಬಾಪುಯ್ ಆಜ್ ಆಶ್ರ್ಯಾಂತ್ ಆಸಾತ್. ಆಮಿಂ ಪರತ್
ಥೊಡಿಂ ಆಶ್ರಮಾಂ ಭಾಂದುಂಕ್ ಮಾತ್ರ್ ಸಕ್ತಾಂವ್ ಶಿವಾಯ್,
ಭುರ್ಗ್ಯಾಪಣಾಥಾವ್ನ್ ಚಲುಂಕ್ ಶಿಕಯಿಲ್ಲ್ಯಾ ಆವಯ್-ಬಾಪಾಯ್ಕ್
ತಾಂಚ್ಯಾ ಉತರ್ ಪ್ರಾಯೆರ್ ಆಶ್ರಮಾಂತ್ ಧಾಡ್ಚೆಂ ಸಾರ್ಕೆಂ ನ್ಹಯ್
ಮ್ಹಳ್ಳೆಂ ಚಿಂತಾಪ್ ಬದ್ಲುಂಕ್ ಸಕ್ತಾಂವ್? ಆಮಿ ಅನಾಥ್ ಆಸ್ರೊ
ಭಾಂದುಂಕ್ ಸಕ್ತಾಂವ್, ಬರೆಂ. ಪುಣ್ ಭುರ್ಗಿಂ ಅನಾಥ್ ಕಶಿಂ ಜಾಲಿಂ?
ಹ್ಯಾ ವೆವಸ್ತೆಚೆರ್ ಉಜ್ವಾಡ್ ಫಾಂಕಂವ್ಕ್ ಸಕ್ತಾಂವ್?
ಆಮ್ಚೆಂ ಮುಳಾವೆಂ ಚಿಂತಾಪ್‌ಚ್ಚ್ ಪೊಕೊಳ್, ಆನಿ ಜಲ್ಮಾಥಾವ್ನ್
ಮೊರ್ನಾಪರ್ಯಾಂತ್ ಆಮಿ ಕರ್ಚೊ ’ಡೋಂಗ್’ ಆನಿ, ಹ್ಯಾ ಚಿಂತ್ಪಾಕ್
ಬದ್ಲುಂಕ್ ’ಕರೆಜ್ಮ್’ ವಾ ಕಸ್ಲೋಯ್ ಕಾಳ್ ಆಸಾ ಮ್ಹಣ್ ಕೊಣಾಕ್‌ಯೀ
ಭಗ್ತಾಗೀ ಮ್ಹಳ್ಳೆಂ ವ್ಹಡ್ಲೆಂ ಸವಾಲ್.
ಆಸುಂ. ಆಮಿ ಮಾರುನ್ ಕಾಡ್ನ್, ಆತಾಂ ಜಿವಂತ್ ಜಾಲೆಲ್ಯಾ ಜೆಜುಚ್ಯಾ
ಫೆಸ್ತಾಚೊ ದಭಾಜೊ ಆಚರಣ್ ಕರ್ಯಾಂ ಆನಿ ವೆಗಿಂಚ್ ಪರತ್ ತಾಕಾ ವಿಖುಂಕ್
ತೀಸ್ ನಾಣಿಂ ದಿತೆಲ್ಯಾಂಕ್ ಸೊಧ್ಯಾಂ.
- ವಲ್ಲಿ ಕ್ವಾಡ್ರಸ್ [ಎಪ್ರಿಲ್, 2016] | |
|
|
|
|
|
 |
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
|
संपादकीय -
5. करेज्म आम्कां कित्लो प्रस्तुत |
|
जेद्नांय करेज्माचो
काळ सुरु जातेच्च एका थराचि काव्जेणि मतिंत उदेतालि.
चुकानास्तां सकाळिं तशेंच सांजेर माग्णिं करुन
व्हड जाल्ल्या म्हज्या भुर्ग्यापणाल्या दिसांत
सय्त ’करेज्माचो नियाळ’, ’खुर्साचि वाट’,
’प्राचित/उपास/जिंज्वार’ पाळुंक आस्ले. आल्तार
भुर्गो जाव्न इगर्जेंत मात न्हय, घरांत सय्त
खुर्साचि वाट चल्तालि, आनि तिच्च भक्त्पण आनि
शिस्त घरांत सांभाळुंक आस्लि.
हो प्रभाव प्रायेन व्हड जाल्लेपरिंयी आस्लो, पुण
भुर्ग्यापणार आस्चेतित्लि शिस्त नात्ल्लि तर्यी
काळ्जांत एका थराचि काव्जेणि आस्लि, अप्णान
कुम्साराक वचुंक जाय, प्राचित करुंक जाय, खुर्साचि
वाट आनि हेर माग्णिं करुंक जाय म्हळ्ळिं. मुंबय
तस्ल्या बिजि श्हेरांत सय्त, ह्या चिंत्नांथाव्न
मुक्ति नात्ल्लि. सिंजिच्या बुध्वारा तशेंच
निमाण्या सुक्रारा शिस्तेचो उप्वास मात्र
चुकय्नात्लों. करेज्माच्या काळांत जिणि बद्लुंक,
वाय्टाथाव्न बयाक पर्तुंक, आम्चेर गुन्यांव
केल्ल्यांक काळ्जाथाव्न भग्सुंक ऎक नीब तशें.
वेळाकाळातेकिद ऎक ल्हान चिंताप म्हज्या मतिंत
किर्लोन, पाळेव्न रूक जाल्लोच्च कळोंक ना. आनि तें
चिंताप हें जाव्नास्लें, करेज्माच्या काळांत आमि
बरिं जाय्जय, पुण ’कित्लिं बरिं?’, आनि हें बरेंपण
मेज्चें माप कस्लें? आनि तें ’बरें’ या ’न्हय’
म्हळ्ळें पार्कितेले कोण?
जल्मल्लो हर्येक मनिस पात्कि आनि पात्काच्या
कोंडांत जियेव्न आसा, लोळोन आसा. हें सैंबिक आनि
सहज. पुण सांकॆतिक रितिन जाय्ते ’सोरो/आमाल
सेंव्तेले ह्या चाळीस दिसांनि आमाल सेविना’, जाय्ते
ह्या चाळिस दिसांनि ’मास/मास्ळि खाय्नांत’, वा
तांच्या चिंत्पापरिं ’प्राचित कर्तात’, पुण सवाल
हें. हे सर्व सांकॆतिक; म्हण्जे - भाय्लें धाखव्प.
पुण आम्चेभितर ह्या करेज्मांत कांय बद्लावण जालां?
भितर म्हळ्यार काळ्जा-मनांत म्हणुन परत सांग्तां.
ताळो पिंज्तापर्यांत ’एकामेकाचो मॊग करा’ म्हणुन
बोबाटुंक सलीस, पुण कित्लेशिं आमि तिं पाळ्तांव?,
’दुस्मानांक भग्सियात’ म्हणोन आराब्बायो दींव्क
सलीस, पुण कित्लेशिं आमि आम्च्यांक्च्च भग्सितांव?,
मास खाय्नाये राव्तांव जाव्येत पुण हेरांचिं मासां
खांव्चांत पाटिं आसांव?, ह्या संधर्भार ’रेतिरो’
म्हळ्ळो अन्यॆक डॊंग वा फ्याशन आज्काल चल्ता. आनि
ह्या फ्याशनान सय्त जाय्ति बद्लावण देख्ल्या;
रेतिरेचे जागे बदल्ल्यात, नवे जागे उदेल्यात, नव्यो
रिति उदेल्यात - जशें ऒन्लाय्न कुम्सार वा ऒन्लाय्न
आरति चल्चेपरिं. पुण चिंताप बद्लोंक ना. आनि ह्या
माग्णिं/वोरेसांवांनि कोणाचोगी दुडु, कॊण्गी
जमय्ता आनि कोणाच्यागी खात्यांत जमो जाता. हो
खुर्साउमो, बाळ्काउमो दीव्न जमो जांव्चो दुडु सय्त
कांय एका रितिच्या वेपारापरिं दिसाना? इत्लें
वाचुन आतां दांत खिर्लुंच्या भागेवंतांनि आटोव
कर्चि गर्ज आसा; करेज्माचो महत्व कस्लो? जिणि
बद्लुंक हो करेज्म खंच्या रितिन उप्कार्ता? वर्सान
वरस लाखांनि चडोन वेच्या उम्यानिभाच्या दुड्वाचें
लॆख कर्तेल्यांक ऎक सवाल;
ह्या दुड्वांत कित्लेशिं घरां नास्च्यांक घरां
भांद्ल्यांत? - दुब्ळ्या फिर्गजांक कोले व्हरुंदि,
आम्च्याच फिर्गजेंनि कांय दुब्ळिं नांत? कित्लेश्या
घरांनि आस्च्या पिडॆस्तांक पळेतेलि गत ना, जाय्तिं
प्रायेस्त आवय-बापुय आज आश्र्यांत आसात. आमिं परत
थोडिं आश्रमां भांदुंक मात्र सक्तांव शिवाय,
भुर्ग्यापणाथाव्न चलुंक शिकयिल्ल्या आवय-बापाय्क
तांच्या उतर प्रायेर आश्रमांत धाड्चें सार्कें
न्हय म्हळ्ळें चिंताप बद्लुंक सक्तांव? आमि अनाथ
आस्रो भांदुंक सक्तांव, बरें. पुण भुर्गिं अनाथ कशिं
जालिं? ह्या वेवस्तेचेर उज्वाड फांकंव्क सक्तांव?
आम्चें मुळावें चिंताप्च्च पोकोळ, आनि जल्माथाव्न
मोर्नापर्यांत आमि कर्चो ’डॊंग’ आनि, ह्या
चिंत्पाक बद्लुंक ’करेज्म’ वा कस्लॊय काळ आसा म्हण
कोणाक्यी भग्तागी म्हळ्ळें व्हड्लें सवाल.
आसुं. आमि मारुन काड्न, आतां जिवंत जालेल्या
जेजुच्या फेस्ताचो दभाजो आचरण कर्यां आनि वेगिंच
परत ताका विखुंक तीस नाणिं दितेल्यांक सोध्यां.
- वल्लि क्वाड्रस (एप्रिल, २०१६) |
| |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
