ಕೊಂಕಣಿ ಉಲಯ್, ಕೊಂಕಣಿ ಉರಯ್, ಕೊಂಕಣಿ ಆಮ್ಚಿ ಆವಯ್..    कोंकणी उलोय, कोंकणी उरय, कोंकणी आमची आवय..       
Writers Writing
ಸಂಪಾದಕೀಯಾಂ
ಕೊಂಕ್ಣಿ ನಿರಂತರಿ..
ಮನಿಸ್ ಧಾಂವ್ಣಿ..
ಲೇಖನಾಂ
ಪ್ರಗತಿಶೀಲ್ ಬರವ್ಪಿ
ಮುಂಬಯಾಂತ್ ಪ್ರಗತಿಪರ್
ಮುಂಬಯಾಂತ್ಲಿ ಕೊಂಕ್ಣಿ
ಕವಿತಾ
ಬ್ರೊತೊ (ಪಯ್ಲಿ ಕವಿತಾ)
ಕವಿತಾ (ಹಫ್ತ್ಯಾಚಿ ಕವಿತಾ)

ಕವಿತಾಪಾಠ್ (ಕವಿತೆಚೆರ್ ಅಧ್ಯಯನ್)

ಚಿತ್ರಾಂ-ವಿಚಿತ್ರಾಂ (ಕವಿತಾಸ್ಪರ್ಧೊ)
ಕಾಣ್ಯೊ

ಮಟ್ವಿ ಕಥಾ (ಹಫ್ತ್ಯಾಚಿ ಕಾಣಿ)
ನ್ಯಾನೊ ಕಾಣ್ಯೊ
(ಜೊ.ಸಿ.ಸಿದ್ದಕಟ್ಟೆ)
ನೈತಿಕ್ ಕಾಣ್ಯೊ
ಅನುವಾದ್ ಕಾಣ್ಯೊ

ವಿಶ್ಲೇಶಣಾಂ

ಮುಗ್ದೊನಾತ್‌ಲ್ಲಿಂ ಗಿತಾಂ (ವಿಶ್ಲೇಷಣ್)

ಸಂವಾದ್
ಏಕ್ ಭೆಟ್ ಏಕ್ ಸಂವಾದ್
ಕೊಂಕ್ಣಿ ಕಾರ್ಯಿಂ

ಆಗ್ರಾರ್ ಕವಿಗೋಶ್ಟಿ
ಕೊಂಕ್ಣಿ ಸಹಮಿಲನ್ 2015

ಅಂಕಣಾಂ
ದಿವ್ಟಿ (ಜಿಯೋ ಆಗ್ರಾರ್)
ಭಲಾಯ್ಕಿ (ಡಾ|ಎಡ್ವರ್ಡ್ ನಜ್ರೆತ್)
ಮನ್ ಕಿ ಬಾತ್ (ಜೆ.ವಿ.ಕಾರ್ಲೊ)
 
 

ಸಂಪಾದಕೀಯ್ - 4. ಸಂವೇದನ್ ಸಂಘರ್ಶ್ ಆನಿ ಸಾಹಿತ್

ಅಜೀಕ್ ಕಾಂಯ್ 31 ವರ್ಸಾಧಿಂ ಜೆದ್ನಾಂ ಪಯ್ಲೆಪಾವ್ಟಿಂ ಬೊಂಬೊಯ್ ಯೆಂವ್ಚ್ಯಾ ವಾಟೆರ್, ರಾವ್‌ಲ್ಲ್ಯಾ ಬಸ್ಸಾಂತ್ ಹಾಂವ್ ಬಸೊನ್ ಆಸ್‌ಲ್ಲೊಂ, ಅನಿ ಭಾಯ್ರ್ ಎಕ್ಲೊ ಲ್ಹಾನ್ ಭುರ್ಗೊ ಮ್ಹಜೆಲಾಗಿಂ ಭಿಕ್ ಮಾಗ್ತಾಲೊ. ಹಾಂವ್‌ಚ್ಚ್ ಸುತಾಂತ್ ಉಮ್ಕಳ್ತಾಲೊಂ ಅನಿ ಮ್ಹಜೆಲಾಗಿಂ ಭಿಕ್ ಮಾಗ್ಚೊ ಭುರ್ಗೊ ಕಿತ್ಲೊ ದುಬ್ಳೊ ಆಸ್ಯೆತಾ ಮ್ಹಣುನ್ ಮತಿಂಚ್ ಚಿಂತ್ಲೆಂ, ಬೊಲ್ಸಾಂತ್ ಆಸ್ಚ್ಯಾ ಥೊಡ್ಯಾ ಚಿಲ್ಲರ್ ನಾಣ್ಯಾಂ ಪಯ್ಕಿಂತ್ಲೆಂ ಏಕ್ ನಾಣೆಂ ತ್ಯಾ ಭುರ್ಗ್ಯಾಕ್ ದಿಲೆಂ. ತೆಂ ನಾಣೆಂ ಘೆವ್ನ್ ತೊ ಭುರ್ಗೊ ಗೆಲೊ, ಥೊಡ್ಯಾಚ್ ಮಿನುಟಾಂನಿ ಅಪ್ಲೆಬರಾಬರ್ ಕಾಂಯ್ ಸಾತಾಟ್ ಭುರ್ಗ್ಯಾಂಕ್ ಘೆವ್ನ್ ಆಯ್ಲೊ ಆನಿ ತ್ಯಾ ಸಾತಾಟ್ ಭುರ್ಗ್ಯಾಂನಿ ವ್ಹಡಾ ತಾಳ್ಯಾನ್ ಮ್ಹಜೆಲಾಗಿಂ ಭಿಕ್ ಮಾಗುಂಕ್ ಧರ್ಲೆಂ. ಬೊಲ್ಸಾಂತ್ ಉರ್‌ಲ್ಲಿಂ ನಾಣಿಂ ತಾಂಕಾಂ ದಿತೊಂ ತರ್, ಭೋವ್ಶಾ ತಿಂ ಮ್ಹಜ್ಯಾಕೀ ಗ್ರೇಸ್ತ್ ಜಾತಿಂ. ತಿತ್ಲೆಂ ವ್ಹಡ್ ಮನ್ ಕೆಲ್ಲೆಂ ತರ್, ಉಪಾಶಿಂಚ್ ಹಾಂವೆಂ ಗಾಂವಾಕ್ ವ್ಹಚೊಂಕ್ ಪಡ್ತೆಂ ದೆಕುನ್ ದೊಳೆ ಕುಡ್ಡೆ ಕೆಲೆ, ಕಾನ್ ಕೆಪ್ಪೆ ಕೆಲೆ...

ಭೊಂಬೊಯ್ ಶ್ಹೆರ್ ಹರ್ಯೆಕಾ ದಿಸಾ/ಖಿಣಾನ್ ಬದ್ಲೊನ್ ಅಸಾ, ಬೊಂಬೊಯ್ ಮ್ಹಳ್ಳೆಂ ನಾಂವ್ ಸಯ್ತ್ ಉಪ್ರಾಂತ್ ’ಮುಂಬಯ್’ ಜಾಲೆಂ. ಹ್ಯಾ ಶ್ಹೆರಾಕ್ ಕೊಣ್ ’ಹಾದ್‌ಸಾಚೆಂ ಶ್ಹೆರ್’ ಮ್ಹಣ್ತಿತ್, ಆನಿ ಕೊಣ್ ’ಮಾಯಾನಗ್ರಿ’ ಮ್ಹಣ್ತಿತ್, ಪುಣ್ ಹಕೀಗತ್ ಹಿ; ಆಜ್ ಪಾಸೊನ್ ಮುಂಬಯ್ ಸಂಘರ್ಶಾಚೆಂ ಶ್ಹೆರ್, ಹಾಂಗಾಸರ್ ಜಿಯೆತೆಲ್ಯಾ ಹರ್ಯೆಕಾ ಜೀವಿಕ್ ಅಪ್ಲ್ಯಾ ವಾಂಟ್ಯಾಚೆಂ ಸಂಘರ್ಶ್ ಕರುಂಕ್ ಪಡ್ತಾ, ಜಿಣ್ಯೆಚೆಂ ಸೂತ್ರ್ ಭೋವ್ ಸಂಪೆಂ - ಜೆದೊಳ್ ಪಾಸೊನ್ ಜೊ ಸಂಘರ್ಷ್ ಕರುಂಕ್ ಸಕ್ತಾ ತೆದೊಳ್ ಪಾಸೊನ್ ತೊ ಜಿಯೆಂವ್ಕ್ ಸಕ್ತಲೊ. ಆನಿ ಹ್ಯಾ ಸಂಘರ್ಶಾಚ್ಯಾ ಶ್ಹೆರಾಂತ್ ಪಾಟ್ಲ್ಯಾ ತೀಸ್ ವರ್ಸಾಂ ಥಾವ್ನ್ ಯೇವ್ನ್ ವಚೊನ್ ಆಸಾಂ, ಚಡ್ತಾವ್ ವರ್ಸಾಂ ಮುಂಬಯಾಂತ್ ವಸ್ತಿ ಕೆಲ್ಯಾ, ಜಾಗೆ, ಕೊಟ್ರ್ಯೊ ಬದ್ಲುನ್, ಎಕೇಕ್ ಲಿಸಾಂವಾಂ ಶಿಕುನ್. ಪುಣ್ ಏಕ್ ಸವಾಲ್ ಮ್ಹಜ್ಯಾ ಮತಿಂತ್ ಸದಾಂಚ್ ಖಂಚೊನ್ ಅಸ್ಲೆಂ;

’ಮುಂಬಯಾಂತ್ ಜಿಯೆತೆಲ್ಯಾಂಕ್ ಹೆರಾಂಚೆಂ ಸಂವೇದನ್ ಸಮ್ಜತಾಗಾಯ್?’.

ಹ್ಯಾ ಸವಲಾಕ್ ಕಾರಣ್‌ಯೀ ಆಸಾ, ಸದಾಂಯ್ ಘರಾ ಥಾವ್ನ್ ಕಾಮಾಕ್ ವೆಚ್ಯಾ ರಸ್ತ್ಯಾರ್ ಜಾಂವ್, ಟ್ರ್‍ಏಯ್ನಿಂತ್ ಜಾಂವ್, ಬಸ್ಸಾಂನಿ ಜಾಂವ್ ದೊಳ್ಯಾಸಮೊರ್ ಎಕ್ಲ್ಯಾನ್ ದುಸ್ರ್ಯಾಚೆರ್ ಎಕಾ ನಾ ಎಕಾ ರಿತಿಚೆರ್ ಸಕ್ತೆಚೊ ಉಪೇಗ್ ಕರ್ಚೊ ದಿಸೊನ್ ಯೆತಾ. ಟ್ರೇಯ್ನಿಚ್ಯಾ  ದಾರಾಚೆರ್ ಉಭೊ ಆಸ್ಚ್ಯಾ ಭಳ್ವಂತಾಂಕ್ ಲೊಟುನ್ ಭಿತರ್ ರಿಗ್ಚೆ ಅಸ್ಕತ್ಯಾಂಚೆಂ ಸಂಘರ್ಶ್, ಆನಿ ಸಭಾರ್ ಪಾವ್ಟಿಂ ತಿ ಸಕತ್ ನಾಸ್ತಾಂ, ಜನೆಲಾಚೆರ್ ಉಮ್ಕಳೊನ್ ಪಯ್ಣ್ ಕರ್ಚಿ ಅನಿವಾರ್ಯತಾ, ಕೊಣ್ ಥಕೊನ್, ಆನಿ ಕೊಣ್ ದೆಗೆಚ್ಯಾ ಖಾಂಬ್ಯಾಕ್ ಆದ್ಳೊನ್ ಪಡ್ತಾ, ಆನಿ ನಶಿಬ್‌ವಂತ್ ಕೊಣ್ ಹಾತ್/ಪಾಂಯ್ ಮೊಡುನ್ ಜಿವೊ ಉರ್ತಾ ತರ್ ಕೊಣ್ ಪಡ್‌ಲ್ಲೆ ಜಾಗ್ಯಾಚೆರ್ ಅಪ್ಲೊ ಜೀವ್ ಸೊಡ್ತಾ. ಆನಿ ಹೆಂ ಸರ್ವ್ ದೊಳ್ಯಾಂಸಮೊರ್ ಪಳೆವ್ನ್, ಕಾಳಿಜ್ ಘಟ್ ಕರುನ್ ಬಾಕಿಚೊ ಲೋಕ್ ಆಪಾಪ್ಲ್ಯಾ ಕಾಮಾಕ್ ಲಾಗ್ತಾ. ಹಾಚೆಭಾಯ್ರ್ ಚಡಿತ್ ಚಿಂತುಂಕ್ ಸಯ್ತ್ ಸಯ್ರಾಣ್ ಜಾಂವ್ ವೇಳ್ ಜಾಂವ್ ನಾಸ್ತಾನಾ ಮನಿಸ್ ನಿತ್ರಾಣಿ ಜಾತಾ. ಹೆಂ ಸರ್ವ್ ಸದಾಂಚೆಂ, ಹಾಂಗಾ ದೊಳ್ಯಾಂಸಮೊರ್ ಮೊರ್ನಾಂ ಸದಾಂಚಿಂ, ಝಗ್ಡಿಂ, ಲೂಟ್‌ಮಾರ್ ಸದಾಂಚಿಂ, ಜುಲುಮ್ ಸದಾಂಚೊ ಆನಿ ಹ್ಯಾ ಸರ್ವ್ ’ಸದಾಂಚ್ಯಾಂಕ್’ ಅಪ್ಣಾಯಿಲ್ಲೊ ಮನಿಸ್ ಖರೊಚ್ಚ್ ’ಸಂವೇದನಾಂಕ್ ಮಾರುನ್ ಜಿಯೆತಾ?’

ಪುಣ್ ತಿತ್ಲೆಂ ಕಠೋರ್ ಫಯ್ಸಯ್ ದಿಂವ್ಚಿ ಗರ್ಜ್ ನಾ, ಮುಂಬಯಾಂತ್ ಜಿಯೆತಲೊ ಹರ್ಯೆಕ್ ಮನಿಸ್ ಜಶೆಂ ಆಪ್ಲ್ಯಾ ಮತಿಂತ್ಲ್ಯಾ ಸಂವೇದನಾಂಕ್ ಉಗ್ತೆಂ ಧಾಖಯ್ನಾಸ್ತಾಂ, ದೊಳೆ ಧಾಂಪುನ್ ಸಯ್ತ್ ಸರ್ವ್ ಪಳೆಂವ್ಚಿ, ಕಾನ್ ಧಾಂಪುನ್ ಸಯ್ತ್ ಸರ್ವ್ ಆಯ್ಕುಂಚಿ ಸಕತ್ ಅಪ್ಣಾಥಂಯ್ ರುತಾಂ ಕರ್ತಾ. ಹಾಂಗಾಸರ್ ’ಹೆರಾಂಚೆಂ ಸಂವೇದನ್’ ತಾಚಿ ಅಸ್ಕತ್ಕಾಯ್ ಮ್ಹಣುನ್ ತಾಕಾ ಪಿಳುನ್/ಗಿಳುನ್ ಸೊಡ್ಚೆ ಭಂವ್ತೊಣಿ ಆಸ್ತಾನಾ, ತೆಂ ಸಂವೇದನ್ ಲಿಪಂವ್ಚಿ ಕಲಾ ಶಿಕ್ಚಿ ಅನಿವಾರ್ಯತಾ ಸರ್ವಾಂಕ್.

ಸಾಹಿತಿ ಅಸಲೆಚ್ಚ್ ಸಮಾಜೆಂತ್ಲೊ, ಅಶೆಂ ಮ್ಹಣ್ತಾನಾ ಎಕಾ ಸಾಹಿತಿಕ್ ಸಯ್ತ್ ಹ್ಯಾ ಚಿಂತ್ಪಾಂತ್ಲೊ ಮೆಕ್ಳೊ ಕರುಂಕ್ ಜಾಯ್ನಾ. ಇತ್ಲೆಂ ಸರ್ವ್ ಬರೆಂ/ವಾಯ್ಟ್ ಘಡ್ತಾ, ಗಡೊನ್ ಆಸಾ ತರ್‌ಯೀ, ಮುಂಬಯ್ ಅಜೂನ್ ’ಸ್ವಪ್ಣಾಂಚೆಂ ಶ್ಹೆರ್’, ಜೆಂ ಮಿನತ್ ಕರ್ತೆಲ್ಯಾ ಕೊಣಾಕ್‌ಚ್ಚ್ ತಾಚೊ ಪ್ರತಿಫಳ್ ಲಾಬಾನಾಶೆಂ ಕರಿನಾ, ಜಾವ್ಯೆತಾ ಏಕ್ ದೀಸ್ ಪಾಟಿಂ-ಫುಡೆ, ಪುಣ್ ಮುಂಬಯ್ ಶ್ಹೆರ್ ತೆಂ ಮುಂಬಯ್‌ಚ್ಚ್ - ’ಆಮ್ಚಿ ಮುಂಬಯ್’

ಕಿತ್ಯಾಕ್ - ಹೆಂಚ್ ಏಕ್ ’ಸಂವೇದನ್’

- ವಲ್ಲಿ ಕ್ವಾಡ್ರಸ್ [ಮಾರ್ಚ್, 2016]

 

   

 

valleyquadros@gmail.com

ವಲ್ಲಿ ಕ್ವಾಡ್ರಸ್: 1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ, ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004 ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್, ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್ ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’, ’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್ ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್ ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್ ವಾವ್ರ್ ಕರುನ್ ಆಸಾ.

ತುಮ್ಚೆ ವಿಚಾರ್ ವ ಅಭಿಪ್ರಾಯ್ ಧಾಡುಂಕ್

संपादकीय - 4. संवॆदन संघर्श आनि साहित

अजीक कांय ३१ वर्साधिं जेद्नां पय्लेपाव्टिं बोंबोय येंव्च्या वाटेर, राव्‌ल्ल्या बस्सांत हांव बसोन आस्‌ल्लों, अनि भाय्र एक्लो ल्हान भुर्गो म्हजेलागिं भिक माग्तालो. हांव्‌च्च सुतांत उम्कळ्तालों अनि म्हजेलागिं भिक माग्चो भुर्गो कित्लो दुब्ळो आस्येता म्हणुन मतिंच चिंत्लें, बोल्सांत आस्च्या थोड्या चिल्लर नाण्यां पय्किंत्लें ऎक नाणें त्या भुर्ग्याक दिलें. तें नाणें घेव्न तो भुर्गो गेलो, थोड्याच मिनुटांनि अप्लेबराबर कांय साताट भुर्ग्यांक घेव्न आय्लो आनि त्या साताट भुर्ग्यांनि व्हडा ताळ्यान म्हजेलागिं भिक मागुंक धर्लें. बोल्सांत उर्‌ल्लिं नाणिं तांकां दितों तर, भॊव्शा तिं म्हज्याकी ग्रॆस्त जातिं. तित्लें व्हड मन केल्लें तर, उपाशिंच हांवें गांवाक व्हचोंक पड्तें देकुन दोळे कुड्डे केले, कान केप्पे केले...

भोंबोय श्हेर हर्येका दिसा/खिणान बद्लोन असा, बोंबोय म्हळ्ळें नांव सय्त उप्रांत ’मुंबय’ जालें. ह्या श्हेराक कोण ’हाद्‌साचें श्हेर’ म्हण्तित, आनि कोण ’मायानग्रि’ म्हण्तित, पुण हकीगत हि; आज पासोन मुंबय संघर्शाचें श्हेर, हांगासर जियेतेल्या हर्येका जीविक अप्ल्या वांट्याचें संघर्श करुंक पड्ता, जिण्येचें सूत्र भॊव संपें - जेदोळ पासोन जो संघर्ष करुंक सक्ता तेदोळ पासोन तो जियेंव्क सक्तलो. आनि ह्या संघर्शाच्या श्हेरांत पाट्ल्या तीस वर्सां थाव्न यॆव्न वचोन आसां, चड्ताव वर्सां मुंबयांत वस्ति केल्या, जागे, कोट्र्यो बद्लुन, एकॆक लिसांवां शिकुन. पुण ऎक सवाल म्हज्या मतिंत सदांच खंचोन अस्लें;

’मुंबयांत जियेतेल्यांक हेरांचें संवॆदन सम्जतागाय?’.

ह्या सवलाक कारण्‌यी आसा, सदांय घरा थाव्न कामाक वेच्या रस्त्यार जांव, टऎय्निंत जांव, बस्सांनि जांव दोळ्यासमोर एक्ल्यान दुस्र्याचेर एका ना एका रितिचेर सक्तेचो उपॆग कर्चो दिसोन येता. ट्रॆय्निच्या दाराचेर उभो आस्च्या भळ्वंतांक लोटुन भितर रिग्चे अस्कत्यांचें संघर्श, आनि सभार पाव्टिं ति सकत नास्तां, जनेलाचेर उम्कळोन पय्ण कर्चि अनिवार्यता, कोण थकोन, आनि कोण देगेच्या खांब्याक आद्ळोन पड्ता, आनि नशिब्‌वंत कोण हात/पांय मोडुन जिवो उर्ता तर कोण पड्‌ल्ले जाग्याचेर अप्लो जीव सोड्ता. आनि हें सर्व दोळ्यांसमोर पळेव्न, काळिज घट करुन बाकिचो लॊक आपाप्ल्या कामाक लाग्ता. हाचेभाय्र चडित चिंतुंक सय्त सय्राण जांव वॆळ जांव नास्ताना मनिस नित्राणि जाता. हें सर्व सदांचें, हांगा दोळ्यांसमोर मोर्नां सदांचिं, झग्डिं, लूट्‌मार सदांचिं, जुलुम सदांचो आनि ह्या सर्व ’सदांच्यांक’ अप्णायिल्लो मनिस खरोच्च ’संवॆदनांक मारुन जियेता?’

पुण तित्लें कठॊर फय्सय दिंव्चि गर्ज ना, मुंबयांत जियेतलो हर्येक मनिस जशें आप्ल्या मतिंत्ल्या संवॆदनांक उग्तें धाखय्नास्तां, दोळे धांपुन सय्त सर्व पळेंव्चि, कान धांपुन सय्त सर्व आय्कुंचि सकत अप्णाथंय रुतां कर्ता. हांगासर ’हेरांचें संवॆदन’ ताचि अस्कत्काय म्हणुन ताका पिळुन/गिळुन सोड्चे भंव्तोणि आस्ताना, तें संवॆदन लिपंव्चि कला शिक्चि अनिवार्यता सर्वांक.

साहिति असलेच्च समाजेंत्लो, अशें म्हण्ताना एका साहितिक सय्त ह्या चिंत्पांत्लो मेक्ळो करुंक जाय्ना. इत्लें सर्व बरें/वाय्ट घड्ता, गडोन आसा तर्‌यी, मुंबय अजून ’स्वप्णांचें श्हेर’, जें मिनत कर्तेल्या कोणाक्‌च्च ताचो प्रतिफळ लाबानाशें करिना, जाव्येता ऎक दीस पाटिं-फुडे, पुण मुंबय श्हेर तें मुंबय्‌च्च - ’आम्चि मुंबय’

कित्याक - हेंच ऎक ’संवॆदन’

- वल्लि क्वाड्रस [
मार्च, २०१६]

 

valleyquadros@gmail.com

वल्लि क्वाड्रस: १९८४ थाव्न कोंक्णेंत मट्व्यो काण्यो, कादंबरि, कविता, लॆखनां बरव्न आयिल्लो, २००४ थाव्न २०११ म्हणासर दाय्ज.कोम अंतर्‌जाळिचो संपादक जाव्न वाव्र केला. काणिक, उदेव, आम्चो-युवक पत्रांनि संपादकीय वाव्र केल्ल्या हाणे ’कुवॆय्ट्‌गारांचो झेलो विशॆस अंको’, ’दिवो-दाय्ज’, ’मित्र-दाय्ज’ तशेंच कर्नाटक कोंक्णी साहित्य अकाडेमिच्या ’शेक्ड्यांच्यो मट्व्यो काण्यो’ बुकाचें संपदन केलां. MBA शिकाप जोडुन सद्द्याक IBM कंपेनिंत ग्लॊबल ट्रान्सिशन प्रॊजेक्ट म्यानेजर जाव्न वाव्र करुन आसा.

तुमचे विचार व अभिप्राय धाडुंक

 

   

ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.
ಮುಖ್‌ಪಾನ್
 
ಆಶಾವಾದಿ ಪ್ರಕಾಶನ್
ಪ್ರಗತಿಶೀಲ್ ಬರಯ್ಣಾರ್

Buffer Email Facebook Google LinkedIn Print



Copyright 2003 - 2015
All rights reserved. This site is property
Ashawadi Prakashan.
All poinnari.com content are copyrighted and may not be copied / modified in any way.
Send questions or comments to:
editor@poinnari.com
  [Archive / Links]