|
ಏಕ್ ಪಾವ್ಟಿಂ ಸವಯ್ ಜಾಲ್ಲ್ಯಾ ಉಪ್ರಾಂತ್ ಧುಮ್ಟಿ ಸೆಂವ್ಚಿ
ರಾವೊಂವ್ಕ್ ಸಲೀಸ್ ನಾ. ಸಂಸಾರ್ ಭೊರ್ ಹರ್ ದೀಸ್ ಜಾಯಿತ್ತೆ
ಜಣ್ ಸಿಗ್ರೆಟ್ ಸೊಡುಂಕ್ ಪ್ರಯತ್ನ್ ಕರಿತ್ತ್ ಆಸ್ತಾತ್.
ತ್ಯಾ ಪಯ್ಕಿಂ ಥೊಡ್ಯಾಂಕ್ ಮಾತ್ರ್ ಪರಿಪೂರ್ಣ್ ಥರಾನ್ ತೆಂ
ಸಾಧ್ಯ್ ಜಾತಾ. ಸಿಗ್ರೆಟ್ ಸೆಂವ್ಚಿ ಬಂಧ್ ಕೆಲ್ಲ್ಯಾ
ಥೊಡ್ಯಾ ತೆಂಪಾ ಉಪ್ರಾಂತ್ ಪರತ್ ಸೆಂವ್ಕ್ ಧರ್‍ಲ್ಲೆ ಆಸಾತ್.
ಸಭಾರಾಂಕ್ ಧುಮ್ಟೆಂತ್ ಆಸ್ಚ್ಯಾ ನಿಕೋಟಿನ್ ಮ್ಹಳ್ಳ್ಯಾ
ವಸ್ತುಚೆರ್ ಹೊಂದೊವ್ಣಿ (dependency-addiction)
ಆಸ್ತಾ. ಅಶೆಂ ನಿಕೋಟಿನಾಚೆರ್ ಹೊಂದೊವ್ಣಿ ಆಸ್‍ಲ್ಲ್ಯಾಂಕ್
ಧುಮ್ಟಿ ಬಂಧ್ ಕರುಂಕ್ ವಿಶೇಸ್ ತ್ರಾಸ್ ಜಾತಾತ್. ಉಣ್ಯಾ
ಪ್ರಮಾಣಾಚೆರ್ ಧುಮ್ಟಿ ಸೆವುನ್ ಆಸ್ಲ್ಯಾರ್ ತಿ ಸೊಡುಂಕ್
ಸಲೀಸ್. ಸಿಗ್ರೆಟ್ ತಶೆಂ ಹೆರ್ ರುಪಾರ್ ಧುಮ್ಟೆಚೊ ಪುರ್ತೊ
ತ್ಯಾಗ್ ಕರುಂಕ್ ಘಟ್ಟ್ ಮನ್ ಆನಿ ಸಾಂಡ್ತಾಲೊಂಚ್/ಸಾಂಡ್ತಾಲಿಂಚ್
ಮ್ಹಳ್ಳೆಂ ಹಟ್ ಜಾಯ್.
ಧುಮ್ಟೆಚೆ ಘಾಯ್ ಮಾಜ್ವೊಂಕ್ ಲಾಗ್ತಾತ್:
‘ಸಿಗ್ರೆಟ್ ಸೆವಿನಾತ್‍ಲ್ಲೆ ಮೊರಾನಾಂತ್‍ವೇ.. ಸಿಗ್ರೆಟ್
ಸೊಡ್ನ್ ಕಿತೆಂಯ್ ಬರೆಂಪಣ್ ಜಾಯ್ನಾ..’ ಮ್ಹಣ್ ಥೊಡ್ಯಾಂನಿ
ಸಾಂಗ್ಚೆ ಆಸ್ತಾ. ಮತಿಭಿತರ್ ಆಪ್ಣೆಂ ಕರ್ನ್ ಆಸ್ಚೆಂ ಚೂಕ್
ಮ್ಹಣ್ ಕಳಿತ್ ಆಸ್ಲ್ಯಾರ್‍ಯಿ ಅಸಲಿಂ ನಿಬಾಂ ದೀವ್ನ್,
ಕರ್ನ್ ಆಸ್ಲ್ಲ್ಯಾ ಪಾಡ್ ಗಜಾಲಿಂಚೆಂ ಸಮರ್ಥನ್ ಕರ್ಚೆಂ
ಮನ್ಶ್ಯಾಗೂಣ್. ತೆ ಸತ್ ಮಾನುನ್ ಘೆಂವ್ಕ್ ಇನ್ಕಾರ್
ಕರ್ತಾತ್ ಆನಿ ಆಪ್ಣಾಕ್‍ಚ್ ಫಟಯ್ತಾತ್. ಸಿಗ್ರೆಟ್ ಸೆವ್‍ಲ್ಲ್ಯಾ
ಸರ್ವಾಂಕ್ ಹಾರ್ಟ್‍ಎಟೆಕ್ಕ್ ಜಾಯ್ನಾ ತೆಂ ಖರೆಂ, ಪೂಣ್
ಹಾರ್ಟ್‍ಎಟೆಕ್ಕ್ ಜಾಲ್ಲ್ಯಾಂ ಪಯ್ಕಿಂ ಜಾಯಿತ್ತ್ಯಾಂಕ್
ಸಿಗ್ರೆಟ್ ಸೆಂವ್ಚಿ ವಾ ಧುಮ್ಟಿ ಸೆಂವ್ಚಿ ಸವಯ್ ಆಸ್ತಾ
ಮ್ಹಳ್ಳೆಂ ಉಡಾಸಾಂತ್ ಆಸುಂ.
‘ಏಕ್ ಎಟೆಕ್ಕ್ ಜಾಲ್ಲ್ಯಾ ಉಪ್ರಾಂತ್ ಸೊಡ್ಯಾಂ..’ ಮ್ಹಣ್
ಚಿಂತ್ಚೆಯ್ ಆಸ್ತಿತ್. ಪೂಣ್ ಪಯಿಲ್ಲೆಂ ಎಟೆಕ್ಕ್‍ಚ್
ಜಿವಿತಾಂತ್ಲ್ಯಾ ನಿಮಾಣ್ಯಾ ದಿಸಾ ಜಾಯ್ತ್. ಸಿಗ್ರೆಟ್
ಸಾಂಡುಂಕ್ ಅವ್ಕಾಸ್‍ಚ್ ನಾಸ್ತಾಂ ಆವ್ಕ್ ಆಕೇರ್ ಜಾಯ್ತ್.
ಕಾಳ್ಜಾಘಾತ್ ಜಾಲ್ಲ್ಯಾ ಉಪ್ರಾಂತ್ ದೆವಾನ್ ‘ಬರೆಂ’
ಮ್ಹಣುನ್ ವಾಂಚುನ್ ಉರ್ಲ್ಯಾರ್‍ಯಿ ಉಪ್ರಾಂತ್ಲೆ ದೀಸ್
ವಿಶೇಸ್ ಸಮಸ್ಸ್ಯಾಂಚೆ ಜಾತಾತ್. ಹಾರ್ಟ್‍ಎಟೆಕ್ಕ್ ಜಾತಾ
ಪರ್ಯಾಂತ್ ರಿಸ್ಕ್ ನಿವಾರುಂಕ್ ರಾಕ್ಚೆಂ ನ್ಹಯ್.
‘ಆಮ್ಕಾಂ ಬೂಧ್ ಸಾಂಗ್ಚೆ ದಾಕ್ತೆರ್‍ಯಿ ಸಿಗ್ರೆಟ್
ಸೆವ್ತಾತ್..’ ಥೊಡ್ಯಾಂನಿ ನೀಬ್ ದಿಂವ್ಚೆಂ ಆಸ್ತಾ. ಅಶೆಂ
ಸೆವ್‍ಲ್ಲ್ಯಾ ದಾಕ್ತೆರಾಂಕ್‍ಯಿ ಹಾರ್ಟ್‍ಎಟೆಕ್ಕ್ ಜಾಲ್ಲೆಂ
ಆಸಾ. ಥೊಡೆ ದಾಕ್ತೆರ್ ಸಿಗ್ರೆಟ್ ವೊಡ್ತಾತ್ ತೆಂ ಹೆರಾಂಕ್
ಸಿಗ್ರೆಟ್ ವೊಡುಂಕ್ ಪ್ರೇರಣ್ ಜಾಯ್ನಾ ಜಾಂವ್. ತಶೆಂ ಥೊಡೆ
ಪೊಲಿಸ್ ಕಾನೂನ್ ಮೊಡ್ತಾತ್ ಮ್ಹಣ್ ಹೆರ್ ತಶೆಂ ಕರುಂಕ್
ವೆತಿತ್ ಸಮಸ್ಸ್ಯಾಂತ್ ಪಡ್ತಿತ್.
ಧುಮ್ಟಿ ಸೆಂವ್ಚಿ ಭಲಾಯ್ಕೆಕ್ ಮಾರೆಕಾರ್ ಜಾತಾ ಆನಿ ತಿ
ಸಾಂಡ್ಲ್ಯಾರ್ ಭಲಾಯ್ಕಿ ಬರಿ ಜಾತಾ ಮ್ಹಳ್ಳೆಂ ಮತಿಂತ್ ಘೆಜೆ.
ಧುಮ್ಟಿ ಸೆಂವ್ಚಿ ಸೊಡ್‍ಲ್ಲ್ಯಾ ಥೊಡ್ಯಾಚ್ ವರ್ಸಾಂ ಭಿತರ್
ಧುಮ್ಟಿ ಸೆವ್‍ಲ್ಲ್ಯಾನ್ ಕಾಳ್ಜಾಚ್ಯಾ ಆನಿ ಕುಡಿಚ್ಯಾ ಹೆರ್
ಭಾಗಾಂಚ್ಯಾ ಭಲಾಯ್ಕೆಚೆರ್ ಆಸ್‍ಲ್ಲೆ ಅಪಾಯ್ ಉಣೆಂ ಜಾಂವ್ಕ್
ಧರ್ತಾತ್. ದಾಕ್ಲ್ಯಾಕ್ ಧಾ ವರ್ಸಾಂ ಥಾವ್ನ್ ದಿಸಾಕ್ ಧಾ
ಸಿಗ್ರೆಟಿ ಸೆವುನ್ ಆಸ್‍ಲ್ಲೊ, ಸಿಗ್ರೆಟ್ ಸೊಡಿತ್ ತರ್
ಮುಕ್ಲ್ಯಾ ಥೊಡ್ಯಾ ವರ್ಸಾಂನಿ ಕಾಳ್ಜಾಘಾತ್ ಜಾಂವ್ಚೆ
ಸಂದ್ರಾಪ್ ತ್ಯಾಚ್ ಪ್ರಾಯೆಚ್ಯಾ, ಜಿವಿತಾಂತ್ ಸಿಗ್ರೆಟ್‍ಚ್
ಸೆವಿನಾತ್‍ಲ್ಲ್ಯಾಂ ತಿತ್ಲೆಚ್ ಜಾತಾತ್. ಮ್ಹಣ್ಲ್ಯಾರ್
ಧುಮ್ಟಿ ಸೆವ್‍ಲ್ಲ್ಯಾನ್ ಭಲಾಯ್ಕೆಚೆರ್ ಜಾಲ್ಲೆ ಘಾಯ್
ಮಾಜ್ವೊನ್ ವೆತಾತ್!
ಧುಮ್ಟಿ ಆತಾಂಚ್ ಸಾಂಡ್:
‘ಧುಮ್ಟಿ ಸೊಡುಂಕ್ ತನ್ರ್ಯಾಟ್ಯಾಂನಿ ಮನ್ ಕರಿಜೆ, ಆವ್ಕ್
ಅರ್ಧೆಂ ಜಾಲ್ಲ್ಯಾಂನಿ ನ್ಹಯ್’ ಮ್ಹಣ್ ಸಾಂಗ್ಚೆಂ ಆಸ್ತಾ.
ಖಂಚಾಯ್ ಪ್ರಾಯೆಚೆರ್, ಕಿತ್ಲ್ಯಾಯ್ ವರ್ಸಾಂ ಥಾವ್ನ್
ಸೆವುನ್ ಆಸ್ಲ್ಯಾರ್‍ಯಿ ಧುಮ್ಟಿ ಸಾಂಡ್‍ಲ್ಲ್ಯಾಂತ್
ಬರೆಂಪಣ್ ಆಸಾ. ಧುಮ್ಟಿ ಸೊಡುಂಕ್ ಪ್ರಾಯೆಚಿ ಗಡ್ ನಾ.
ಧುಮ್ಟಿ ಸೆಂವ್ಚಿ ಉಣಿ ಕೆಲ್ಲಿಚ್ ರಗ್ತಾ ನಳಿಯಾಂನಿ ರಗತ್
ಘೆಟೆ ಜಾಂವ್ಚೆ ಸಂದ್ರಾಪ್ ಉಣೆಂ ಜಾಯಿತ್ತ್ ಯೆತಾತ್.
ಕಾಳ್ಜಾಚ್ಯಾ ಕಾಮಾಚಿ ಶ್ಯಾಥಿ ವಾಡ್ತಾ ಆನಿ ಚಡ್ ಭೊರ್
ನಾಸ್ತಾಂ ಕಾಳಿಜ್ ಕುಡಿಚ್ಯಾ ಹರ್ ಭಾಗಾಂಕ್ ರಗತ್ ಪಂಪ್
ಕರುಂಕ್ ಸಕ್ತಾ. ಆನಿ ಜೆರಾಲ್ ಭಲಾಯ್ಕೆಂತ್ ಸುದ್ರಾಪ್ ಜಾತಾ.
ಧುಮ್ಟೆಚೊ ಉಪೇಗ್ ಉಣೊ ಕರಿತ್ತ್ ಆಯಿಲ್ಲ್ಯಾನ್ ಆನಿ ಧುಮ್ಟಿ
ಸೆಂವ್ಚಿ ಪುರ್ತಿ ರಾವಾಯಿಲ್ಲ್ಯಾನ್ ಕಾಳ್ಜಾಘಾತ್ ಜಾಂವ್ಚೆ
ಸಂದ್ರಾಪ್‍ಯಿ ಉಣೆಂ ಜಾತಾತ್. ಕುಡಿಂತ್ ವಿಶೇಸ್ ಮೊಟಾಯ್
ಆಸ್‍ಲ್ಲ್ಯಾಂಕ್, ಬ್ಲಡ್ ಪ್ರೆಶ್ಶರ್ ವಾ ರಗ್ತಾದಾಬ್ ಚಡ್‍ಲ್ಲ್ಯಾಂಕ್,
ಡಯಾಬೆಟಿಸ್ ಸಮಸ್ಸೊ ಆಸ್‍ಲ್ಲ್ಯಾಂಕ್ ಕಾಳ್ಜಾಘಾತ್ ಜಾಂವ್ಚೆ
ಸಂದ್ರಾಪ್ ಚಡ್. ಅಸಲ್ಯಾಂಕ್ ಜರ್ ಧುಮ್ಟಿ ಸೆಂವ್ಚಿ ಸವಯ್
ಆಸಾ, ಹಾರ್ಟ್‍ಎಟೆಕ್ಕ್ ರಾಕುನ್‍ಂಚ್ ಆಸ್ತಾ ಮ್ಹಣ್ಯೆತಾ.
ಕಾಳ್ಜಾಘಾತ್ ಜಾಂವ್ಚೊ ಆಡಾಂವ್ಚೆ ಖಾತಿರ್, ಧುಮ್ಟೆಚೊ
ಉಪೇಗ್ ರಾವಾಯಿಲ್ಲ್ಯಾ ತಿತ್ಲ್ಯಾ ಸಲೀಸಾಯೆನ್ ಹೆರ್
ಗಜಾಲ್ಯೊ ನಿವಾರುಂಕ್ ಜಾಯ್ನಾಂತ್. ದಾಕ್ಲ್ಯಾಕ್ ಕುಡಿಚಿ
ಮೊಟಾಯ್ ಉಣಿ ಕರುಂಕ್ ವಿಶೇಸ್ ಪ್ರಯತ್ನ್ ಜಾಯ್ ಆನಿ ಸಭಾರ್
ಪಾವ್ಟಿಂ ಸಾಧ್ಯ್‍ಚ್ ಜಾಯ್ನಾ. ಕಿತೆಂ ಕಿತೆಂ ಕೆಲ್ಯಾರ್‍ಯಿ
ಜಾಯಿತ್ತ್ಯಾಂಕ್ ರಗ್ತಾಂತ್ ಕೊಲೆಸ್ಟ್ರೋಲ್ ಉಣೆಂ ಜಾಯ್ನಾ.
ಪೂಣ್ ಮನ್ ಕರ್ನ್ ಧುಮ್ಟಿ ಆಡಾಯ್ಲಿ ತರ್ ಕಾಳ್ಜಾಘಾತ್
ಜಾಂವ್ಚೆಂ ಜಾಯಿತ್ತ್ಯಾ ವಾಂಟ್ಯಾಂನಿ ಉಣೆಂ ಕರ್ಯೆತಾ.
ಧುಮ್ಟೆಚೊ ವಾಪಾರ್ ಬಂಧ್ ಕೆಲ್ಲ್ಯಾ ಥೊಡ್ಯಾಚ್ ವರ್ಸಾಂ
ಭಿತರ್ ಧುಮ್ಟಿ ಸೆವ್‍ಲ್ಲ್ಯಾನ್ ಭಲಾಯ್ಕೆಚೆರ್ ಜಾಂವ್ಚೆ
ಸರ್ವ್ ರಿಸ್ಕ್ ಪರಿಪೂರ್ಣ್ ನಾ ಜಾತಾತ್.
ಧುಮ್ಟೆಚೊ ಉಪೇಗ್ ವಿಲಾಯ್ತಿ ಗಾಂವಾಂನಿ ಸಿಗ್ರೆಟಿಚ್ಯಾ
ರುಪಾರ್ ಜಾತಾ ಆನಿ ಸಿಗ್ರೆಟ್ ಸೆವುನ್ ಆಸ್‍ಲ್ಲ್ಯಾನ್
ಭಲಾಯ್ಕಿ ಪಾಡ್ ಜಾಯಿತ್ತ್ ಆಸ್ತಾ. ಕಿತ್ಲೆಶಿಂ ವರ್ಸಾಂ
ಥಾವ್ನ್ ಸಿಗ್ರೆಟ್ ಸೆವ್ನ್ ಆಸ್‍ಲ್ಲ್ಯಾಂನಿ ಸಿಗ್ರೆಟ್
ಸೊಡ್‍ಲ್ಲ್ಯಾನ್ ಭಲಾಯ್ಕೆಚೆರ್ ಜಾಲ್ಲೆ ವಾಯ್ಟ್ ಪರಿಣಾಮ್
ಹಳ್ತಾನ್ ನಿವಾರುನ್ ವೆತಾತ್. ಹೆ ವಿಶಿಂ ಸಂಸೋದ್ ಕರ್ನ್
ಲಾಬ್‍ಲ್ಲೆ ಥೊಡೆ ಗಜಾಲಿ ಅಶೆ ಆಸಾತ್:
|
ಸಿಗ್ರೆಟಿಚೊ ಉಪೇಗ್ ಬಂಧ್ ಕೆಲ್ಲೆ ಥಾವ್ನ್ |
ಭಲಾಯ್ಕೆಚೆರ್ ಜಾಂವ್ಚೆಂ ಬದ್ಲಾಪ್ |
|
20 ಮಿನುಟಾಂ
ಭಿತರ್ |
ಚಡ್‍ಲ್ಲೊ
ಬ್ಲಡ್ ಪ್ರೆಶ್ಶರ್(ರಗ್ತಾದಾಬ್) ಉಣೊ ಜಾತಾ ಆನಿ
ಕಾಳ್ಜಾಚೊ ವೇಗ್ (ಉಡ್ನಿ) ಸಾರ್ಕಿ ಜಾತಾ |
|
8 ವ್ಹರಾಂನಿ |
ರಗ್ತಾಂತ್
ನಿಕೋಟಿನ್ ಆನಿ ಕಾರ್ಬನ್ ಮೊನಾಕ್ಸಯ್ಡಾಚೊ
ಪ್ರಮಾಣ್ ಅರ್ಧ್ಯಾಕ್-ಅರ್ಧೊ ದೆಂವ್ತಾ. ಆನಿ
ರಗ್ತಾಂತ್ ಆಕ್ಸಿಜನಾಚೆಂ ಪ್ರಮಾಣ್ ಸಾಮಾನ್ಯ್
ಹಂತಾಕ್ ಪಾವ್ತಾ. |
|
24
ವ್ಹರಾಂನಿ |
ರಗ್ತಾಂತ್
ಆಸ್ಚ್ಯಾ ಕಾರ್ಬನ್ ಮೊನಾಕ್ಸಯ್ಡಾಚೊ ಪ್ರಮಾಣ್
ಪರಿಪೂರ್ಣ್ ಉಣೊ ಜಾತಾ ಆನಿ ಪೊಪ್ಸಾಂ ಥಾವ್ನ್
ಧುಂವ್ರಾಚೆಂ ಮ್ಹೆಳೆಂ ಆನಿ ಗೊಬೊರ್ ಭಾಯ್ರ್
ಘಾಲ್ಚಿ ಪ್ರಕ್ರಿಯಾ ಸುರು ಜಾತಾ. |
|
48 ವ್ಹರಾಂನಿ |
ಕುಡಿಂತ್
ನಿಕೋಟಿನ್ ಪರಿಪೂರ್ಣ್ ನಾ ಜಾತಾ; ಜಿಬೆಂತ್ ರೂಚ್
ಆನಿ ನಾಕಾಂತ್ ಫರ್ಮಳ್ ಭೊಗ್ಚಿ ಕ್ರಿಯಾ
ಸುಧ್ರ್ರಾತಾ. |
|
72 ವ್ಹರಾಂನಿ |
ಉಸ್ವಾಸ್
ಸೆಂವ್ಚಿ ಪ್ರಕ್ರಿಯಾ ಸಾರ್ಕಿ ಜಾತಾ; ಪೊಪ್ಸಾಂತ್
ವ್ಹಾರೆಂ ವೆಚ್ಯಾ ನಳಿಯಾಂನಿ ಆಸ್ಚಿ ಹುಲೊಪ್ ಉಣಿ
ಜಾಯಿತ್ತ್ ಯೆತಾ; ಕುಡಿಂತ್ ಜೆರಾಲ್ ಸಕತ್ ಬರಿ
ಜಾತಾ. |
|
2-12
ಹಫ್ತ್ಯಾಂನಿ |
ರಗ್ತಾ
ನಳಿಯಾಂನಿ ರಗ್ತಾ ಚಲವ್ಣಿ ಬರಿ ಜಾತಾ. |
|
3-9
ಮಯ್ನ್ಯಾಂನಿ |
ಪೊಪ್ಸಾಚಿ
ಸಕತ್ ಸುಮಾರ್ 10% ತಿತ್ಲಿ ಬರಿ ಜಾತಾ; ಖೊಂಕ್ಲಿ,
ಉಸ್ವಾಸ್ ಭಾಂದ್‍ಲ್ಲೆಪರಿಂ ಜಾಂವ್ಚೆಂ ಉಣೆಂ ಜಾತಾ.
|
|
1 ವರಸ್
ಜಾತಾನಾ |
ತ್ಯಾಚ್
ಪ್ರಾಯೆಚ್ಯಾ ಸಿಗ್ರೆಟ್ ಸೆವಿನಾತ್‍ಲ್ಲ್ಯಾಕ್ ಸರಿ
ಕೆಲ್ಯಾರ್ ಕಾಳ್ಜಾಘಾತಾಚಿ ರಿಸ್ಕ್ 50% ತಿತ್ಲಿ
ಉಣಿ ಜಾತಾ. (ಮ್ಹಳ್ಯಾರ್ ಆನಿಕ್‍ಯಿ 50% ರಿಸ್ಕ್
ಆಸ್ತಾ) |
|
10 ವರ್ಸಾಂ
ಜಾತಾನಾ |
ತ್ಯಾಚ್
ಪ್ರಾಯೆಚ್ಯಾ ಸಿಗ್ರೆಟ್ ಸೆವಿನಾತ್‍ಲ್ಲ್ಯಾಕ್ ಸರಿ
ಕೆಲ್ಯಾರ್ ಪೊಪ್ಸಾಂತ್ ಕೆನ್ಸರ್ ಜಾಂವ್ಚಿ ರಿಸ್ಕ್
50% ತಿತ್ಲಿ ಉಣಿ ಜಾತಾ. (ಮ್ಹಳ್ಯಾರ್ ಆನಿಕ್‍ಯಿ
50% ರಿಸ್ಕ್ ಆಸ್ತಾ) |
|
15 ವರ್ಸಾಂ
ಜಾತಾನಾ |
ಕಾಳ್ಜಾಘಾತಾಚಿ ರಿಸ್ಕ್ ತ್ಯಾಚ್ ಪ್ರಾಯೆಚ್ಯಾ
ಸಿಗ್ರೆಟ್ ಸೆಂವ್ಚಿ ಸವಯ್ ನಾತ್‍ಲ್ಲ್ಯಾಕ್
ಬರಾಬರ್ ಜಾತಾ. |
ಅಶೆಂ ಸಿಗ್ರೆಟ್ ಸೆಂವ್ಚಿ ಸವಯ್ ಸಾಂಡ್‍ಲ್ಲ್ಯಾನ್ ಹಳ್ತಾನ್
ಕೂಡ್ ಭಲಾಯ್ಕೆಭರಿತ್ ಜಾತಾ ಆನಿ ಕಾಳ್ಜಾಘಾತ್ ತಶೆಂ
ಕೆನ್ಸರ್ ಯೆಂವ್ಚಿ ರಿಸ್ಕ್ ಉಣಿ ಉಣಿ ಜಾಯಿತ್ತ್ ಯೆತಾ.
ಧುಮ್ಟಿ ಸೊಡ್‍ಲ್ಲ್ಯಾಕ್ ಪ್ರತಿಕ್ರಿಯಾ:
ಸಿಗ್ರೆಟ್ ಸೆಂವ್ಚಿ ಸವಯ್ ಜಾಲ್ಲ್ಯಾಂ ವ್ಹಡಾಂ ಪಯ್ಕಿಂ
ಸುಮಾರ್ 70% ಜಣ್ ತಿ ಸವಯ್ ಸಾಂಡುಂಕ್ ಮನ್ ಕರ್ತಾತ್. ಹ್ಯಾ
ಪಯ್ಕಿಂ ಸುಮಾರ್ ತಿನಾಂತ್ ಏಕ್ ವಾಂಟೆ ಜಣ್ ಸಿಗ್ರೆಟ್
ಸೊಡುಂಕ್ ವಿಶೇಸ್ ಆಸಕ್ತ್ ಆಸ್ಚೆ. ಪೂಣ್ ಸವಯೆಚೆರ್ ಪಡ್‍ಲ್ಲ್ಯಾನ್
ತೆಂ ಸಾಧ್ಯ್ ಜಾಯ್ನಾ- ಅಶೆಂ ವಿಲಾಯ್ತಿ ಗಾಂವಾಂನಿ
ಕೆಲ್ಲ್ಯಾ ಸೊಧ್ನಾಂನಿ (ಸರ್ವೆಂನಿ) ಕಳಿತ್ ಜಾಲಾಂ.
ಧುಮ್ಟೆಂತ್ ಆಸ್ಚ್ಯಾ ನಿಕೋಟಿನಾಚೆರ್ ಕೂಡ್ ಹೊಂದೊನ್ ವೆತಾ
ಜಾಲ್ಲ್ಯಾನ್ ಧುಮ್ಟಿ ಸೊಡ್‍ಲ್ಲ್ಯಾನ್ ಕೂಡ್ ನಿರ್ಧಿಷ್ಟ್
ಥೊಡೆ ಪ್ರತಿಕ್ರಿಯಾ ದಾಕಯ್ತಾ ಆನಿ ತ್ಯೊ ನಿವಾರುಂಕ್ ಪರತ್
ಧುಮ್ಟಿ ಸೆವಿಜೆಚ್ಚ್ ತಸಲೊ ಭೊರ್ ಮತಿಚೆರ್ ಘಾಲ್ತಾ. ಹ್ಯಾ
ಪ್ರತಿಕ್ರಿಯೆಕ್ ‘withdrawal
symptoms’
ಮ್ಹಣ್ ನಾಂವ್ ಆಸಾ. ಧುಮ್ಟಿ ಪರತ್ ಸೆವಿಜೆ ಮ್ಹಣ್ಲಿ ಹಿ
ಒತ್ತಾಯ್ ಕುಡಿಚಿ ತಶೆಂ ಮತಿಚಿ ಜಾವ್ನಾಸುನ್, ಕಿತ್ಲ್ಯಾ
ಕಾಳಾಥಾವ್ನ್ ಧುಮ್ಟಿ ಸೆವುನ್ ಆಸಾಯ್ ಮ್ಹಳ್ಳ್ಯಾಚೇರ್ ಹೆಂ
ಹೊಂದೊನ್ ವೆತಾ.
ಹ್ಯಾ ಥರಾಚಿ ಪ್ರತಿಕ್ರಿಯಾ ಸೊರೊ ತಶೆಂ ಹೆರ್ ಮಾದಕ್
ಒಕ್ತಾಂಚೆರ್ ಸವಯೆಚೆರ್ ಪಡ್‍ಲ್ಲ್ಯಾಂಕ್‍ಯಿ ಜಾತಾ. ಪೂಣ್
ಧುಮ್ಟಿ ಸಾಂಡ್‍ಲ್ಲ್ಯಾನ್ ಜಾಂವ್ಚಿ ಪ್ರತಿಕ್ರಿಯಾ, ಮಾದಕ್
ಒಕ್ತಾಂ ತಿತ್ಲಿ ವಿಶೇಸ್ ನ್ಹಯ್; ತಶೆಂಚ್ ಪ್ರತಿಕ್ರಿಯಾಯ್
ಸರ್ವಾಂ ಥಂಯ್ ಏಕ್‍ಸಾರ್ಕಿ ಆಸಾನಾ. ಸಿಗ್ರೆಟ್ ಸೊಡ್‍ಲ್ಲ್ಯಾ
ಪಯ್ಕಿಂ ಸುಮಾರ್ 25% ಜಣಾಂಕ್ ಏಕ್ ಹಫ್ತೊಭರ್ ರಾತಿಂ
ಸಾರ್ಕಿ ನೀದ್ ಪಡನಾ ತರ್ ಲಗ್ಬಗ್ 70% ಜಣಾಂಕ್ ದೋನ್ ಹಪ್ತೆ
ಪರ್ಯಾಂತ್ ಚೀತ್ ದೀವ್ನ್ ಕಾಮ್ ಕರುಂಕ್ ಕಷ್ಟ್ ಜಾತಾತ್,
ಮತಿಚಿ ಸುಕ್ತಿ (Depression) ಆಸ್ತಾ. ಸುಮಾರ್
60% ಜಣಾಂಕ್ ಮಯ್ನೊ ಪರ್ಯಾಂತ್ ರಾಗ್ ಯೆಂವ್ಚೊ, ಚಡ್ಪಡ್ಚೆಂ
(Irritability)
ಆಸ್ಲ್ಯಾರ್ ದೋನ್-ತೀನ್ ಮಯ್ನೆ ಪರ್ಯಾಂತ್ ಭುಕ್ ಚಡ್‍ಲ್ಲಿ
ಪಳೆಂವ್ಕ್ ಮೆಳ್ತಾ. ಹಿ ಒತ್ತಾಯ್ ಹಳ್ತಾನ್ ಉಣಿ ಜಾಯಿತ್ತ್
ಯೆತಾ ಆನಿ ಘಟ್ ಮನ್ ಕರ್ನ್ ಧುಮ್ಟೆಥಾವ್ನ್ ಪಯ್ಸ್
ರಾವ್ಲ್ಯಾರ್, ಧುಮ್ಟಿ ಸೆಂವ್ಚಿ ಸವಯ್ ಪರಿಪೂರ್ಣ್ ಆಕೇರ್
ಜಾತಾ.
(ಧುಮ್ರಾಪಾನಾಥಾವ್ನ್ ಕಸೊ ಪರಿಹಾರ್ - ಫುಡ್ಲ್ಯಾ
ಆಂಕ್ಡ್ಯಾಂತ್)
( -
ಡಾ|ಎಡ್ವರ್ಡ್ ಎಲ್. ನಜ್ರೆತ್,
ಅಕ್ತೋಬರ್, 2016)
| 
