|
ಕೊಂಕ್ಣಿ
ಸಾಹಿತ್ಯಾಂತ್ ಹರ್ ಪ್ರಕಾರಾಚೆಂ ಸಾಹಿತ್ಯ್ ವಾಚುಂಕ್
ಮೆಳ್ತಾ, ತೆಚ್ಚ್‌ಪರಿಂ ಗಿನ್ಯಾನ್ ವ್ಹಾಡಂವ್ಚ್ಯಾ
ಇರಾದ್ಯಾನ್, ದೀಸ್ಪಡ್ತ್ಯಾ ಜಿಣ್ಯೆಂತ್ ಸಯ್ತ್ ಗರ್ಜೆಚಿ
ಜಾಣ್ವಾಯ್ ದೀಂವ್ಕ್ ಥೊಡ್ಯಾಂನಿ ಕಮರ್ ಭಾಂದ್ಲಾಂ, ತಾಂತುಂ
ಸರ್ವಾಂಚ್ಯಾಕೀ ಮುಕಾರ್ ಪಾವ್ಲಾ ಡಾ|ಎಡ್ವರ್ಡ್ ನಜ್ರೆತ್.
ಕಾಂಯ್ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್ ವೆವೆಗ್ಳ್ಯಾ
ಪತ್ರಾಂನಿ, ಅಂತರ್‌ಜಾಳಿಂನಿ ಸಯ್ತ್ ಕೊಂಕ್ಣಿ ಲೊಕಾಂಕ್
ಆಪ್ಲ್ಯಾ ಜಾಣ್ವಾಯೆಕ್ ವಾಂಟುನ್ ಘೆತಾ ಮಾತ್ ನ್ಹಯ್,
ಪರೋಕ್ಶ್ ರಿತಿನ್ ಕಿತ್ಲೆಶ್ಯಾಗೀ ಲೊಕಾಂನಿ ಅಪ್ಲಿ ಭಲಾಯ್ಕಿ
ಸಾಂಭಾಳಿಶೆಂ ಕರ್ಚ್ಯಾಂತ್ ಜಾಯ್ತಿ ದೇಣ್ಗಿ ತಾಣೆ ದಿಲ್ಯಾ.
ಏಕ್ ಕಾಣ್ಯೆಗಾರ್ ಜಾವ್ನ್, ಏಕ್ ವಾವ್ರಾಡಿ ಜಾವ್ನ್ ತಾಣೆ
ದೀವ್ನ್ ಆಸ್ಚೊ ವಾವ್ರ್ ಉತ್ರಾಂವ್ಕ್ ಸಾಧ್ಯ್ ಜಾಲ್ಲೆತಸಲೊ
ನ್ಹಯ್. ದಾಯ್ಜ್.ಕೊಮ್ ಅಂತರ್‌ಜಾಳಿಚೆರ್ ಸಯ್ತ್
’ಭಲಾಯ್ಕೆದಾಯ್ಜ್’ ಅಂಕಣ್ ತಾಣೆಂ ಚಲವ್ನ್ ವೆಲಾಂ, ಆತಾಂ
’ಪಯ್ಣಾರಿ.ಕೊಮ್’ ಚೆರ್ ಸಯ್ತ್ ಹಾಚೆಂ ಅಂಕಣ್ ಲೊಕಾಂಕ್
ಭೋವ್ ಉಪ್ಕಾರ್ತೆಲೆಂ ಮ್ಹಳ್ಳೊ ಭರ್ವಸೊ ಆಮ್ಚೊ. |
|
ಆಯ್ಲೆವಾರ್ ದುಬಾಯ್
ಥಾವ್ನ್ ಮ್ಹಾಕಾ ತುರ್ತ್ ಫೊನ್ ಆಯಿಲ್ಲೊ. ಅರ್ಜೆಂಟ್
ಉಲೊಂವ್ಕ್ ಆಸಾ ಮ್ಹಣ್ ಆಸ್ಪತ್ರೆಕ್ ಪಯ್ಲೆಂ ಫೊನ್ ಕರ್ನ್
ಮ್ಹಜ್ಯಾ ಮೊಬಾಯ್ಲ್ ಫೊನಾಚೊ ನಂಬರ್ ಘೆತ್‍ಲ್ಲೊ. “ಮ್ಹಜೆಂ
ಕೊಲೆಸ್ಟ್ರೋಲ್ 280 ಆಸಾ ಡೊಕ್ಟರ್.. ಕಿತೆಂಯ್ ಡೇಂಜರ್
ನಾಮೂ?” ಫೊನ್ ಕೆಲ್ಲೊ ಮಾನಾಯ್ ಟೆನ್ಶನಾರ್ ಆಸ್‍ಲ್ಲೊ!
ಹಾಂವೆಂ ತಾಚಿ ಪ್ರಾಯ್, ತಾಚ್ಯಾ ಕುಡಿಚಿ ಲಾಂಬಾಯ್-ವಜನ್
ತಶೆಂ ಹೆರ್ ಗಜಾಲಿ ವಿಚಾರ್ಲೆ. ಪ್ರಾಯ್ ಆಜೂನ್ 28, ಕಾಜಾರ್
ಜಾಂವ್ಕ್ ನಾ.. ‘ಉರ್‍ಲ್ಲೆ ಪ್ರೋರಬ್ಲಮ್ ಕಿತೆಂಯ್ ನಾಂತ್..’
ತೊ ಸಗ್ಳೊಚ್ ಭಿಯೆಲ್ಲೊ, ‘ಪ್ರೋರಬ್ಲಮ್ ಫಕತ್ ಹ್ಯಾ
ಕೊಲೆಸ್ಟ್ರೋಲಾಚೆ..’ ತೊ ಆಮ್ಸೊರಾನ್ ಮ್ಹಣಾಲೊ; ರಿಪೋರ್ಟ್
ಹಾತಾಕ್ ಮೆಳೊನ್ ಕೊಲೆಸ್ಟ್ರೋಲ್ ಚಡ್ ಆಸಾ ಮ್ಹಣ್
ಸಮ್ಜಲ್ಲ್ಯಾ ತಕ್ಷಣ್ ತಾಕಾ ಮ್ಹಜೊ ಉಡಾಸ್ ಆಯಿಲ್ಲೊ!
ಕೊಲೆಸ್ಟ್ರೋಲ್ ಏಕ್ ರಿಸ್ಕ್
ಮಾತ್ರ್?
ರಗ್ತಾಂತ್ ಚಡುನ್ ಆಸ್‍ಲ್ಲೆಂ ಕೊಲೆಸ್ಟ್ರೋಲ್
ಕಾಳ್ಜಾಘಾತಾಚೆ ಸಂದ್ರಾಪ್ ಚಡಯ್ತಾ ಮ್ಹಳ್ಳೆಂ ವ್ಹಯ್. ಪೂಣ್
ಫಕತ್ ಕೊಲೆಸ್ಟ್ರೋಲ್ ಮಾತ್ರ್ ಮಿತಿಪ್ರಾಸ್ ಥೊಡೆಂ ಚಡುನ್
ಹೆರ್ ರಿಸ್ಕೆಚ್ಯೊ ಗಜಾಲಿ(ರಗ್ತಾದಾಬ್, ಡಯಾಬೆಟಿಸ್,
ಮೊಟಾಯ್, ಧುಮ್ಟಿ ಸೆಂವ್ಚಿ ತಸಲೆ) ನಾಂತ್ ತರ್ ಕಾಳ್ಜಾಘಾತ್
ಜಾತಾ ಮ್ಹಣ್ ಸಾಂಗುಂಕ್ ಜಾಯ್ನಾ. ಕಾಳ್ಜಾಘಾತ್ ಜಾವ್ಯೆತ್
ತಸಲ್ಯೊ ರಿಸ್ಕೆಚ್ಯೊ ಹೆರ್ ಗಜಾಲಿಯ್ ಆಸ್‍ಲ್ಲ್ಯಾಂಕ್
ರಗ್ತಾಂತ್ ಕೊಲೆಸ್ಟ್ರೋಲಾಚೊ ಪ್ರಮಾಣ್ ಉಣೊ ಕೆಲ್ಯಾರ್ ಆನಿ
ಮಿತಿ ಭಿತರ್ ದವರ್ಲ್ಯಾರ್ ಕಾಳ್ಜಾಘಾತಾಚೆ ಅವ್ಕಾಸ್
ತಿತ್ಲ್ಯಾ ಮಾಪಾನ್ ತರ್‍ಯಿ ಉಣೆಂ ಜಾತಿತ್.
ಕೊಲೆಸ್ಟ್ರೋಲ್ ಆಮ್ಚ್ಯಾ ಕುಡಿ ಭಿತರ್ ಜೀವ್ ಕಣಾಂನಿ ಆಸ್ಚಿ
ಚರ್ಬೆ ತಸಲಿ ವಸ್ತ್. ನಿರ್ದಿಷ್ಟ್ ಮಾಪಾನ್ ಕೊಲೆಸ್ಟ್ರೋಲ್
ಕುಡಿಚ್ಯಾ ಜೆರಾಲ್ ಭಲಾಯ್ಕೆಕ್ ಗರ್ಜೆಚೆಂ. ಆಮಿ ಜೆರಾಲ್
ಥರಾನ್ ಕೊಲೆಸ್ಟ್ರೋಲ್ ರಗ್ತಾಂತ್ ಆಸಾ ಮ್ಹಣ್ ಸಾಂಗ್ತಾಂವ್
ತರ್‍ಯಿ ಕೊಲೆಸ್ಟ್ರೋಲ್ ಮೆಂದು, ಶಿರೊ, ಕಾಳಿಜ್ ತಶೆಂ
ಕುಡಿಚ್ಯಾ ಹರ್ ಭಾಗಾಂನಿ ಆಸಾ.
ಕೊಲೆಸ್ಟ್ರೋಲ್ ಆಪುಣ್
ಜಾವ್ನ್ ಪಿಡಾ ಹಾಡ್ಚೆಂ ಅನಾಹುತ್ ನ್ಹಯ್. ಕುಡಿಂತ್ ಥೊಡ್ಯಾ
ಮಾಪಾನ್ ಕೊಲೆಸ್ಟ್ರೋಲ್ ಆಸ್ಚೆಂ ಗರ್ಜ್. ಜೀವ್ ಕಣಾಂಚೆಂ
ಭಾಯ್ಲೆಂ ಪದರ್(ವಾ ಆವರಣ್- ಛಿeಟಟ membಡಿಚಿಟಿe)
ಕೊಲೆಸ್ಟ್ರೊಲಾಥಾವ್ನ್ ತಯಾರ್ ಜಾತಾ. ಕುಡಿಚ್ಯಾ ಭಿತರ್
ವಿಟಮಿನ್ ಡಿ, ಜಿರ್ವಣೆಕ್ ಗರ್ಜ್ ಆಸ್ಚೆ ಪಿಂತಾಚೆ
ಆಸಿಡ್(biಟe ಚಿಛಿiಜs) ಧರ್‍ಲ್ಲೆಂ ಜಾಯಿತ್ತೆ ಹೆರ್
ಹಾರ್ಮೋನ್ ತಯಾರ್ ಜಾಂವ್ಕ್ ಕೊಲೆಸ್ಟ್ರೋಲಾಚಿ ಗರ್ಜ್ ಆಸಾ.
ಕುಡಿ ಭಿತರ್ ಕೊಲೆಸ್ಟ್ರೋಲ್ ಲಿವರಾಂತ್(ವಾ
ಪಿತ್ತಜನಕಾಂಗಾಂತ್) ತಯಾರ್ ಜಾತಾ. ಪೂಣ್ ಮೀತ್ ಚುಕುನ್
ವೆಚೆಂ ಚಡಿತ್ ಕೊಲೆಸ್ಟ್ರೋಲ್ ಆಮಿ ಸೆಂವ್ಚ್ಯಾ ಮಾಸಾಂತ್,
ತಾಂತಿಯಾಂನಿ, ದೂಧ್ ಆನಿ ದುಧಾ ಥಾವ್ನ್ ತಯಾರ್ ಕೆಲ್ಲ್ಯಾ
ವಸ್ತುಂ ಥಾವ್ನ್ ಮೆಳ್ತಾ. ಮನ್ಜಾತಿಂ ಥಾವ್ನ್ ತಯಾರ್
ಜಾಲ್ಲ್ಯಾ(ಮಾಸಾಚ್ಯಾ) ಖಾಣಾಂಪ್ರಾಸ್ ಆಮ್ಚ್ಯಾ ಸದಾಂಚ್ಯಾ
ಖಾಣಾಂತ್ ಆಸ್ಚ್ಯಾ ಸಾಂಧ್ರ್ ಚರ್ಬೆ (sಚಿಣuಡಿಚಿಣeಜ
ಜಿಚಿಣ) ಥಾವ್ನ್ ರಗ್ತಾಂತ್ ಕೊಲೆಸ್ಟ್ರೋಲ್ ಪ್ರಮಾಣ್ ಚಡುನ್
ವೆತಾ. ಸಾಂಧ್ರ್ ಚರಬ್ ಲೊಣಿ-ತುಪಾಂತ್, ಚೀಸ್ ಆನಿ ತಸಲ್ಯಾ
ಲೊಣಿಯೆ ಥಾವ್ನ್ ತಯಾರ್ ಕೆಲ್ಲ್ಯಾ ವಸ್ತುಂನಿ, ನಾರ್ಲಾಚ್ಯಾ
ಆನಿ ಪಾಮೋಲಿನ್ ತಸಲ್ಯಾ ತೆಲಾಂತ್, ದುಕ್ರಾಚ್ಯಾ,
ಗೊರ್ವಾಂಚ್ಯಾ, ಬೊಕ್ರ್ಯಾಚ್ಯಾ ಅಶೆಂ ಮನ್ಜಾತಿಂಚ್ಯಾ
ಮಾಸಾಂತ್ ಆಸ್ಚ್ಯಾ ಚರ್ಬೆಂತ್ ಚಡ್ ಆಸ್ತಾ.
ಕೊಲೆಸ್ಟ್ರೋಲಾಚೆಂ ಪ್ರಮಾಣ್ ಆಮ್ಚ್ಯಾ ಕುಡಿಂತ್ ಆಸ್ಚ್ಯಾ
ಚರ್ಬೆಚೆಂ ಮಾಪ್ ಜಾವ್ನ್ ಘೆತಾಂವ್. ಹೆಂ ಮಾಪ್ ಧಾ
ಮಿಲಿಲೀಟರ್(ವಾ ಏಕ್ ಡೆಸಿ ಲೀಟರ್) ರಗ್ತಾಂತ್ ಕಿತ್ಲೆಂ
ಮಿಲಿಗ್ರಾಮ್ ಕೊಲೆಸ್ಟ್ರೋಲ್ ಆಸಾ ತೆಂ ಕಳಯ್ತಾ.
ಜೆರಾಲ್ ಥರಾನ್ ಎಕಾ ಡೆಸಿಲೀಟರಾಂತ್ 150 ಥಾವ್ನ್ 200
ಮಿಲಿಗ್ರಾಮ್ ಪರ್ಯಾಂತ್ ಕೊಲೆಸ್ಟ್ರೋಲ್ ಆಸ್ಚೆಂ ಭಲಾಯ್ಕೆಕ್
ಬರೆಂ, 240 ಮಿಲಿಗ್ರಾಮ್/ಡೆಸಿಲೀಟರ್ ತಿತ್ಲೆಂ ಬಾಧಕ್
ಹಾಡಿನಾ. ಕೊಲೆಸ್ಟ್ರೋಲಾಚೊ ಪ್ರಮಾಣ್ ತ್ಯಾ ಪ್ರಾಸ್ ಚಡುನ್
ಗೆಲ್ಯಾರ್ ಚತ್ರಾಯ್ ಜಾಯ್.
ಸುಶೇಗ್ ಜಿವಿತಾಚೊ ಸಮಸ್ಸೊ!
ಆರ್ಥಿಕ್ ಪರಿಗತ್ ಬರಿ ಜಾಯಿತ್ತ್ ಯೆತಾಂ ಆಮ್ಚೆಪಯ್ಕಿಂ
ಜಾಯಿತ್ತ್ಯಾಂಚೆಂ ಜಿವಿತ್ ಸುಶೇಗಾಯೆಚೆಂ ಜಾಲಾಂ. ಖಾಣಾಂತ್
ಮೀತ್ ಸಾಂಬಾಳಿನಾಸ್ತಾಂ, ಕುಡಿಕ್ ಚಡ್ ಭೊರ್‍ನಾಸ್ಚೆಂ ವಾ
ದಫ್ತರಾಂತ್ ಬಸುನ್ ಕಾಮ್ ಕರ್ತೆಲ್ಯಾ ಸಭಾರ್ ಜಣಾಂ ಥಂಯ್
ರಗ್ತಾಂತ್ ಕೊಲೆಸ್ಟ್ರೋಲ್ ಚಡುನ್ ವೆತಾ. ದಾಕ್ಲ್ಯಾಕ್
ಅಮೇರಿಕಾಂತ್ ಲಗ್ಬಗ್ 100 ಮಿಲಿಯಾ ವ್ಹಡಾಂ ಥಂಯ್ ರಗ್ತಾಂತ್
ಕೊಲೆಸ್ಟ್ರೋಲ್ ಡೆಸಿಲೀಟರಾಕ್ 200 ಮಿಲಿಗ್ರಾಮ್ ಪ್ರಾಸ್
ಚಡ್ ಆಸಾ. ತಾಂಚೆ ಪಯ್ಕಿಂ 40 ಮಿಲಿಯಾ ಜಣಾಂ ಥಂಯ್
ಕೊಲೆಸ್ಟ್ರೋಲ್ ಅಪಾಯಾಚ್ಯಾ 240 ಮಿಲಿಗ್ರಾಮ್/ಡೆಸಿಲಿಟರಾ
ಪ್ರಾಸ್ ಚಡ್ ಆಸಾ! ಹೆ ಅಂಕೆ ಆರ್ಥಿಕ್ ಪರಿಗತ್ ಬರಿ ಆಸ್ಲ್ಲ್ಯಾ
ಆಮ್ಕಾಂಯ್ ಲಾಗು ಕರ್ಯೆತಾ. ಹಳ್ಳೆಂನಿ ಘಾಮ್ ಪೀಳ್ನ್,
ಶೆತಾಂ-ಭಾಟಾಂನಿ ಭೊರಾಚೆಂ ಕಾಮ್ ಕರ್ನ್ ಆಸ್‍ಲ್ಲ್ಯಾಂ ಥಂಯ್
ಕೊಲೆಸ್ಟ್ರೋಲ್ ಚಡ್ ಆಸಾನಾ. ತಾಂಕಾಂ ಜೆರಾಲ್ ಥರಾನ್
ಕಾಳ್ಜಾಘಾತಾಚ್ಯೊ ಹೆರ್ ರಿಸ್ಕ್‍ಯಿ ಉಣೆಂಚ್.
ಕೊಲೆಸ್ಟ್ರೋಲ್ ಆನಿ ಕಾಳ್ಜಾಚ್ಯೊ
ಪಿಡಾ:
ಕೊಲೆಸ್ಟ್ರೋಲಾಚ್ಯಾ ಪ್ರಮಾಣಾಕ್ ಆನಿ ಕಾಳ್ಜಾಘಾತಾಕ್ ಶೀದಾ
ಸಂಬಂದ್ ಆಸಾ. ರಗ್ತಾಂತ್ ಕೊಲೆಸ್ಟ್ರೋಲ್ ಕಿತ್ಲೆಂ ಚಡ್
ಆಸ್ತಾ, ಕಾಳ್ಜಾಘಾತ್ ಜಾಂವ್ಚಿ ರಿಸ್ಕ್ ತಿತ್ಲಿಚ್ ಆಸ್ತಾ.
ರಗ್ತಾಂತ್ ಕೊಲೆಸ್ಟ್ರೋಲ್ ಚಡುನ್ ಗೆಲ್ಲೆಪರಿಂ
ರಗ್ತಾಂನಳಿಯಾಂ ಭಿತರ್ ಚರಬ್ ಜಮುನ್ ವೆಚೊ ಸಮಸ್ಸೊಯ್ ಚಡುನ್
ಯೆತಾ.
ಉದಕ್ ವ್ಹಾಳ್ಚ್ಯಾ ಥೊಡ್ಯಾ ಲೊಂಕ್ಡಾಚ್ಯಾ ನಳಾಂಭಿತರ್
ಲಾಂಬಾಯೆಕ್ ಮಾತಿಖಾವ್ನ್ ನಳ್ ಅಶೀರ್ ಜಾಂವ್ಚೊ ಆಸ್ತಾ.
ರಗ್ತಾನಳಾಂ ಭಿತರ್‍ಯಿ ಅಶಿಚ್ ಚರಬ್ ಜಮೊನ್ ರಗ್ತಾಚಲವ್ಣೆಕ್
ಬಾಧಕ್ ಹಾಡ್ಚೊ ಅತಿರೋಸ್ಕ್ಲಿರೋಸಿಸ್ ಸಮಸ್ಸೊ ಯೆತಾ. ಹೊ
ಸಮಸ್ಸೊ ಕಾಳ್ಜಾಚ್ಯಾ ಕೊರೊನರಿ ರಗ್ತಾನಳಿಯಾಂಕ್ ಯೇತ್ ತರ್,
ಕಾಳ್ಜಾಚ್ಯಾ ಮಾಸಾಳ್ ಭಾಗಾಂಕ್ ರಗತ್ ಪಾಂವ್ಚ್ಯಾಂತ್
ಆಡ್ಕಳ್ ಯೆವ್ಯೆತಾ. ಕಾಳ್ಜಾಚ್ಯಾ ಮಾಸಾಳ್ ಭಾಗಾಂಕ್
ರಗ್ತಾಚಲವ್ಣಿ ಹಳ್ತಾನ್ ಉಣಿ ಜಾಯಿತ್ತ್ ಆಯಿಲ್ಲ್ಯಾನ್
ಆಂಜೈನಾ ದೂಕ್ ಯೆವ್ಯೆತಾ.
ತರ್ ಥೊಡೆಪಾವ್ಟಿಂ ರಗ್ತಾನಳಿಯೆ ಭಿತರ್ ಚರಬ್ ಆಸ್‍ಲ್ಲಿ
ಸುವಾತ್ ಹಳ್ತಾನ್ ಫುಟ್ತಾ ಆನಿ ಥಂಯ್ ರಗತ್ ಘೆಟೊ ಜಾತಾ.
ಹೆಂ ಕಾಳ್ಜಾಚ್ಯಾ ಮಾಸಾಳ್ ಭಾಗಾಂಚಿ ರಗ್ತಾಚಲವ್ಣಿ ಎಕಾನೇಕ್
ಬಂಧ್ ಕರ್ತಾ ಆನಿ ತವಳ್ ಕಾಳ್ಜಾಘಾತ್ ಜಾತಾ.
ಬರೆಂ, ಪಾಡ್ ಆನಿ ಸರ್ವ್:
ಕೊಲೆಸ್ಟ್ರೋಲ್ ಆಪ್ಣಾಯಿತ್ಲ್ಯಾಕ್ ರಗ್ತಾಂತ್ ವ್ಹಾಳುನ್
ವಚುಂಕ್ ಸಕನಾ. ಲಾಯ್ಪೊಪ್ರೋರೀಟೀನ್ ಮ್ಹಳ್ಳಿ ಏಕ್ ವಸ್ತ್
ಕೊಲೆಸ್ಟ್ರೋಲಾಕ್ ರಗ್ತಾಂತ್ ವ್ಹಾವೊವ್ನ್ ವ್ಹರ್ಚೆಂ ಕಾಮ್
ಕರ್ತಾ. ಹ್ಯಾ ಲಾಯ್ಪೋಪ್ರೋರೀಟೀನಾಂತ್ ಚಡ್
ದಾಟಾಯೆಚೆಂ(high ಜeಟಿsiಣಥಿ ಟiಠಿoಠಿಡಿoಣieಟಿ) ಆನಿ
ಉಣ್ಯಾ ದಾಟಾಯೆಚೆಂ(ಟoತಿ ಜeಟಿsiಣಥಿ ಟiಠಿoಠಿಡಿoಣieಟಿ)
ಮ್ಹಣ್ ದೋನ್ ಥರ್ ಆಸಾತ್. ಜೆಂ ಕೊಲೆಸ್ಟ್ರೋಲ್ ಉಣ್ಯಾ
ದಾಟಾಯೆಚ್ಯಾ ಲಾಯ್ಪೋಪ್ರೋರೀಟಿನಾಚೆರ್ ವ್ಹಾಳುನ್ ವೆತಾ
ತೆಂ ಕುಡಿಚ್ಯಾ ವಿವಿಧ್ ಭಾಗಾಂಕ್ ಚರಬ್ ವ್ಹರ್ಚೆಂ ಕಾಮ್
ಕರ್ತಾ. ರಗ್ತಾನಳಿಯಾಂ ಭಿತರ್ ಪಾವ್‍ಲ್ಲೆಂ ಉಣ್ಯಾದಾಟಾಯೆಚೆಂ
ಕೊಲೆಸ್ಟ್ರೋಲ್ ರಗ್ತಾನಳಿಯಾಂ ಭಿತರ್ ಚರ್ಬೆಚೆ ಘೆಟೆ
ಜಮೊವ್ನ್ ವಚುಂಕ್ ಪ್ರೇರಣ್ ದಿತಾ. ಅಶೆಂ ಉಣ್ಯಾದಾಟಾಯೆಚೆಂ
ಕೊಲೆಸ್ಟ್ರೋಲ್ ಕಾಳ್ಜಾಚ್ಯಾ ರಗ್ತಾನಳಿಯಾಂನಿ ಆಡ್ಕಳ್
ಉಬ್ಜೊಂವ್ಕ್ ಕಾರಣ್ ಜಾವ್ಯೆತ್. ತ್ಯಾ ಖಾತಿರ್ ಉಣ್ಯಾ
ದಾಟಾಯೆಚ್ಯಾ ಲಾಯ್ಪೋಪ್ರೋರೀಟಿನಾಚೆರ್ ಆಸ್ಚ್ಯಾ
ಕೊಲೆಸ್ಟ್ರೋಲಾಕ್ ಪಾಡ್ ಕೊಲೆಸ್ಟ್ರೋಲ್ ಮ್ಹಣ್ ನಾಂವ್ ಆಸಾ.
ಚಡ್ ಸಾಂಧ್ರ್ ಚರಬ್ ಆಸ್ಚೆಂ ಖಾಣ್ ಸೆವ್‍ಲ್ಲ್ಯಾನ್ ಉಣ್ಯಾ
ದಾಟಾಯೆಚೆಂ ಕೊಲೆಸ್ಟ್ರೋಲ್ ಚಡ್ತಾ. ಥಾಯ್ರೋಯ್ಡ್
ಗೃಂಥಿಚ್ಯಾ ಬೆಕಾರ್ಪಣಾನ್ ಉಬ್ಜೊಂಚ್ಯಾ hಥಿಠಿoಣhಥಿಡಿoiಜ
ಮ್ಹಳ್ಳ್ಯಾ ಸಮಸ್ಸ್ಯಾಂತ್‍ಯಿ ಉಣ್ಯಾ ದಾಟಾಯೆಚೆಂ
ಕೊಲೆಸ್ಟ್ರೋಲ್ ಚಡ್ತಾ.
ಚಡ್ ದಾಟಾಯೆಚೆಂ ಲಾಯ್ಪೋಪ್ರೋರೀಟೀನ್ ಕುಡಿಕ್ ಉಪ್ಕಾರಾಚೆಂ
ಕಾಮ್ ಕರ್ತಾ. ಕುಡಿಚ್ಯಾ ವಿವಿಧ್ ಭಾಗಾಂ ಥಾವ್ನ್ ಚರಬ್
ಜಮೊವ್ನ್ ತಿ ಲಿವರ್ ವಾ ಪಿಂತಾಜನಕಾಂಗಾಂತ್ ವ್ಹರ್ನ್
ಪಾಯ್ತಾ. ಥಂಯ್ ಕೊಲೆಸ್ಟ್ರೋಲ್ ನಾಸ್ ಜಾತಾ. ಅಶೆಂ
ರಗ್ತಾಂತ್ ಕೊಲೆಸ್ಟ್ರೋಲ್ ಉಣೆಂ ಕರ್ಚೆಂ ಬರೆಂ ಕಾಮ್ ಚಡ್
ದಾಟಾಯೆಚೆಂ ಲಾಯ್ಪೋಪ್ರೋರೀಟಿನ್ ಕರ್ತಾ. ರಗ್ತಾಂತ್ ಚಡ್
ದಾಟಾಯೆಚೆಂ ಲಾಯ್ಪೊಪ್ರೋರೀಟಿನ್ ಉಣೆಂ ಆಸ್‍ಲ್ಲೆ ತಿತ್ಲಿ
ಕಾಳ್ಜಾಘಾತಾಚಿ ರಿಸ್ಕ್ ಚಡ್ತಾ. ದಾಕ್ಲ್ಯಾಕ್ ಒಟ್ಟಾರೆ
ಕೊಲೆಸ್ಟ್ರೋಲ್ ಪ್ರಮಾಣ್ ಫಕತ್ 200 ಮಿಲಿಗ್ರಾಮ್/ಡೆಸಿಲೀಟರ್
ತಿತ್ಲೆಂ ಆಸೊನ್‍ಯಿ, ಜರ್ ಚಡ್ ದಾಟಾಯೆಚ್ಯಾ
ಕೊಲೆಸ್ಟ್ರೋಲಾಚೊ ಪ್ರಮಾಣ್ ಉಣೊ ಆಸಾ ಆನಿ ಉಣ್ಯಾ
ದಾಟಾಯೆಚ್ಯಾ ಕೊಲೆಸ್ಟ್ರೋಲಾಚೊ ಪ್ರಮಾಣ್ ಚಡ್ ಆಸಾ ತರ್
ಪರಿಗತ್ ಸಾರ್ಕಿ ನಾ ಮ್ಹಣ್ ಸಮ್ಜುಯೆತ್. ಧುಮ್ಟಿ ಸೆಂವ್ಚೆಂ,
ಕುಡಿಂತ್ ಚಡ್ ಮೊಟಾಯ್ ಆನಿ ಕುಡಿಕ್ ಕಿತೆಂಯ್ ವ್ಯಾಯಮ್
ನಾಸ್ಚೆಂ ರಗ್ತಾಂತ್ ಬರ್ಯಾ ಕೊಲೆಸ್ಟ್ರೋಲಾಚೊ ಪ್ರಮಾಣ್
ದೆಂವುಂಕ್ ಕಾರಣ್. ಡಯಾಬೆಟಿಸ್ ಆಸ್‍ಲ್ಲ್ಯಾಂ ಥಂಯ್ ಚಡ್
ದಾಟಾಯೆಚೆಂ ಕೊಲೆಸ್ಟ್ರೋಲ್ ಉಣೆಂ ಆಸ್ತಾ. ಮಯ್ನ್ಯಾಚೊ
ಸ್ರಾವ್ ಜಾಯಿತ್ತ್ ಆಸ್ಚ್ಯಾ ಸ್ತ್ರಿಯಾಂ ಥಂಯ್ ತಾಂಚ್ಯಾಚ್
ಪ್ರಾಯೆಚ್ಯಾ ದಾದ್ಲ್ಯಾಂಪ್ರಾಸ್ ಹಾರ್ಟ್‍ಎಟೆಕ್ಕ್ ಜಾಂವ್ಚೆ
ಸಂದರ್ಬ್ ಉಣೆಂ. ಹಾಕಾ ತಾಂಚ್ಯಾ ರಗ್ತಾಂತ್ ಚಡ್
ದಾಟಾಯೆಚ್ಯಾ ಕೊಲೆಸ್ಟ್ರೋಲಾಚೊ ಪ್ರಮಾಣ್ ಚಡ್ ಆಸ್‍ಲ್ಲೆಂ
ಕಾರಣ್.
ರಗ್ತಾಂತ್ ಟ್ರೈಗ್ಲಿಸಾರಯ್ಡ್(ಖಿಡಿigಟಥಿಛಿeಡಿiಜes)
ಮ್ಹಳ್ಳಿ ಆನ್ಯೇಕ್ ವಸ್ತ್ ಆಸಾ. ಕುಡಿಚ್ಯಾ ಮಾಸಾಳ್
ಭಾಗಾಂಕ್ ಚರಬ್ ವ್ಹರ್ಚೆಂ ಕಾಮ್ ಟ್ರೈಗ್ಲಿಸಾರಯ್ಡ್ ಕರ್ತಾ.
ಟ್ರೈಗ್ಲಿಸಾರಯ್ಡ್ ಆನಿ ಕಾಳ್ಜಾಘಾತಾಕ್ ಶೀದಾ ಸಂಬಂಧ್ ನಾ.
ಥೊಡ್ಯಾಂ ಥಂಯ್ ಫಕತ್ ಟ್ರೈಗ್ಲಿಸಾರಯ್ಡ್ ಮಾತ್ರ್ ಚಡುನ್
ಆಸ್ತಾ. ರಗ್ತಾಂತ್ ಟ್ರೈಗ್ಲಿಸಾರಯ್ಡ್ ಚಡ್ ಆಸ್ಲ್ಯಾರ್
ಕಾಳ್ಜಾಘಾತ್ ಜಾಂವ್ಚೆ ಸಂದ್ರಾಪ್ ಚಡ್ತಾತ್ ಮ್ಹಣ್ ಸ್ವಷ್ಟ್
ಸಾಂಗುಂಕ್ ಜಾಯ್ನಾ. ಕುಡಿಂತ್ ಮೊಟಾಯ್ ಚಡ್ ಆಸ್‍ಲ್ಲ್ಯಾಂ
ಥಂಯ್, ಚಡ್‍ದಾಟಾಯೆಚೆಂ ಲಾಯ್ಪೋಪ್ರೋರೀಟಿನ್ ಉಣೆಂ ಆಸ್‍ಲ್ಲ್ಯಾಂ
ಥಂಯ್, ಡಯಾಬೆಟಿಸ್ ಆನಿ ಬ್ಲಡ್‍ಪ್ರೆಶ್ಶರ್ ಚಡ್‍ಲ್ಲ್ಯಾಂ
ಥಂಯ್ ರಗ್ತಾಂತ್ ಟ್ರೈಗ್ಲಿಸಾರಯ್ಡ್ ಚಡ್ತಾ. ರಗ್ತಾಂತ್
ಟ್ರೈಗ್ಲಿಸಾರಯ್ಡ್ ಚಡುಂಕ್ ಪ್ರೇರಣ್ ಜಾಲ್ಲಿಂ ಕಾರಣಾಂ
ಕಾಳ್ಜಾಘಾತಾಚಿ ರಿಸ್ಕ್‍ಯಿ ಚಡಯ್ತಾತ್ ಜಾಲ್ಲ್ಯಾನ್, ಚಡ್‍ಲ್ಲ್ಯಾ
ಟ್ರೈಗ್ಲಿಸಾರಾಯ್ಡಾಚೊ ಪ್ರಮಾಣ್ ಕಾಳ್ಜಾಘಾತಾಚಿ ರಿಸ್ಕ್
ದಾಕಾಯ್ತಾ ಮ್ಹಣ್ ಸಾಂಗ್ಯೆತಾ. ಪೀಟ್ ಆನಿ ಸಾಕರ್ ಆಸ್‍ಲ್ಲೆಂ
ಚಡ್ ಖಾಣ್ ಆನಿ ಸಾಂಧ್ರ್‍ಚರ್ಬೆಚೆಂ ಖಾಣ್ ಸೆವ್‍ಲ್ಲ್ಯಾನ್
ರಗ್ತಾಂತ್ ಟ್ರೈಗ್ಲಿಸಾರಯ್ಡಾಚೊ ಪ್ರಮಾಣ್ ಚಡ್ತಾ.
ಬರೆಂ ಆನಿ ಪಾಡ್ ಲಾಯ್ಪೋಪ್ರೋರೀಟೀನ್, ಟ್ರೈಗ್ಲಿಸಾರಯ್ಡ್
ಹೆಂ ಸರ್ವ್ ಸಾಂಗಾತಾ ಕೊಲೆಸ್ಟ್ರೋಲಾಚೆಂ ಒಟ್ಟಾರೆ ಮಾಪ್
ದಾಕಾಯ್ತಾ. ಚಡ್‍ಲ್ಲೆಂ ಕೊಲೆಸ್ಟ್ರೋಲ್ ಪರಿಗತ್ ಬರಿ ನಾ
ಮ್ಹಣ್ಲ್ಯಾಚೆಂ ಸುಚನ್ ಮಾತ್ರ್. ನೀಜ್ ಗಜಾಲ್ ಕಿತೆಂ ಮ್ಹಣ್
ಸಮ್ಜುಂಕ್ ಪ್ರತ್ಯೇಕ್ ಘಟಕ್ ತಪಾಸುನ್ ಪಳಂವ್ಚೆಂ ಗರ್ಜೆಚೆಂ.
ಕೊಲೆಸ್ಟ್ರೋಲ್ ತಪಾಸ್ಣಿ: ರಗ್ತಾಂತ್ ಫಕತ್ ಕೊಲೆಸ್ಟ್ರೋಲ್
ಮಾತ್ರ್ ತಪಾಸ್ಣಿ ಕರ್ಚಿ ತರ್ ಕೆದ್ನಾಂಯ್ ಕರ್ಯೆತಾ, ಪೂಣ್
ಕಾಳ್ಜಾಘಾತಾಚಿ ರಿಸ್ಕ್ ಸಮ್ಜುಂಚೆ ಖಾತಿರ್ ರಗ್ತಾಂತ್
ಕೊಲೆಸ್ಟ್ರೋಲ್, ಟ್ರೈಗ್ಲಿಸಾರಯ್ಡ್, ಚಡ್ ದಾಟಾಯೆಚೆ,
ಉಣ್ಯಾ ದಾಟಾಯೆಚೆ ಲಾಯ್ಪೊಪ್ರೋರೀಟೀನ್ ಹೆಂ ಸರ್ವ್ ತಪಾಸುನ್
ಪಳೆಂವ್ಚೆಂ ಬರೆಂ. ತಶೆಂ ಕರ್ಚೆ ಖಾತಿರ್ ಲಗ್ಬಗ್ ಧಾ
ಥಾವ್ನ್ ಬಾರಾ ವ್ಹರಾಂಚೊ ಜಿಂಜ್ವಾರ್ ಜಾಯ್; ಮ್ಹಳ್ಯಾರ್
ಆದ್ಲ್ಯಾ ರಾತಿಂ 9 ವ್ಹರಾಂಚೇರ್ ಜೆವಾಣ್ ಜಾಲಾಂ ತರ್
ದುಸ್ರ್ಯಾ ಸಕಾಳಿಂ 7 ಥಾವ್ನ್ 9 ವ್ಹರಾಂ ಉಪ್ರಾಂತ್ ನಿರಾಳ್
ಪೊಟಾಚೆರ್ ರಗ್ತಾಂತ್ ಕೊಲೆಸ್ಟ್ರೋಲ್ ತಪಾಸ್ಣಿ ಕರ್ಯೆತಾ.
ತವಳ್ ಪರ್ಯಾಂತ್ ಉದಕ್ ಮಾತ್ರ್ ಪಿಯೆವ್ಯೆತಾ. ನ್ಹಯ್ ತರ್
ತಪಾಸ್ಣೆಚೊ ರಿಪೋರ್ಟ್ ಸಾರ್ಕೊ ಆಸಾನಾ.
ಕೊಲೆಸ್ಟ್ರೋಲ್ ಉಣೊ ಕರುಂಕ್
‘ಹಾಂವೆಂ ದುಕ್ರಾಚೆಂ
ಮಾಸ್ ಖಾಂವ್ಚೆಂ ರಾವಯ್ಲಾಂ. ಅಪ್ರೂಪ್ ಬೀಫ್ ಆನಿ
ಥೊಡೆಪಾವ್ಟಿಂ ಚಿಕ್ಕನ್ ಮಾತ್ರ್ ಖಾಂವ್ಚೆಂ.. ರಾಂದಾಯ್
ಮಸ್ತು ವಾಪಾರ್ತಾಂವ್.. ಪೂಣ್ ಕೊಲೆಸ್ಟ್ರೋಲ್ ಉಣೊಂಚ್
ಜಾಯ್ನಾ..’ ಜಾಯಿತ್ತ್ಯಾಂನಿ ತೀನ್ ತೀನ್ ಮಯ್ನ್ಯಾಂಕ್
ಆಪ್ಲ್ಯಾ ರಗ್ತಾಂತ್ ಕೊಲೆಸ್ಟ್ರೋಲ್ ತಪಾಸುನ್ ಖಂತ್
ಉಚಾರ್ಚಿ ಆಸ್ತಾ. ಕೊಲೆಸ್ಟ್ರೋಲ್ ಪ್ರಮಾಣ್ ಮಿತಿಪ್ರಾಸ್‍ಚಡ್
ಆಸ್ಚೆಂ ಕಾಳ್ಜಾಘಾತಾಕ್ ಪ್ರೇರಣ್ ಜಾಂವ್ಚ್ಯಾ ಗಜಾಲಿಂ
ಪಯ್ಕಿಂ ಏಕ್ ಜಾಲ್ಲ್ಯಾನ್ ಕೊಲೆಸ್ಟ್ರೋಲ್ ಉಣೊ ಕರುಂಕ್
ಪ್ರಾಮಾಣಿಕ್ ಪ್ರಯತ್ನ್ ಜಾಯ್. ಆದ್ಲ್ಯಾ ಲೇಕನಾಂತ್
ವಿವರಾಯಿಲ್ಲೆಪರಿಂ ಫಕತ್ ಕೊಲೆಸ್ಟ್ರೋಲ್ ಚಡುನ್ ಆಸ್ಲ್ಯಾರ್
ಮಾತ್ರ್ ಹಾರ್ಟ್‍ಎಟೆಕ್ಕ್ ಜಾಂವ್ಚಿ ರಿಸ್ಕ್ ಆಸಾ ಮ್ಹಣುಂಕ್
ಜಾಯ್ನಾ.ಚಡ್‍ಲ್ಲ್ಯಾ ಕೊಲೆಸ್ಟ್ರೋಲ್ ಸಾಂಗಾತಾ ಹೆರ್
ಗಜಾಲಿಯ್ ಆಸ್ಲ್ಯಾರ್ ತಸಲಿ ರಿಸ್ಕ್ ಆಸಾ ಮ್ಹಣ್ ಸಮ್ಜುಯೆತಾ.
ಕೊಲೆಸ್ಟ್ರೋಲ್ ಕಿತ್ಯಾಕ್ ಚಡ್?: ರಗ್ತಾಂತ್ ಕೊಲೆಸ್ಟ್ರೋಲ್
ಚಡುಂಕ್ ಥರಾವೋಳ್ ಗಜಾಲಿ ಕಾರಣ್ ಜಾತಾತ್. ಕೊಲೆಸ್ಟ್ರೋಲಾಚೊ
ಪ್ರಮಾಣ್ ಸೆಂವ್ಚ್ಯಾ ಖಾಣಾಚೆರ್ ಮಾತ್ರ್ ಹೊಂದೊನ್ ನಾ.
ಕೊಲೆಸ್ಟ್ರೋಲ್ ಸಕ್ಡಾಂಚ್ಯಾ ಕುಡಿಂತ್ ತಯಾರ್ ಜಾತಾ, ಪೂಣ್
ಥೊಡ್ಯಾಂಚ್ಯಾ ಕುಡಿಂತ್ ಆಪಾಪಿಂಚ್ ಚಡ್ ಕೊಲೆಸ್ಟ್ರೋಲ್
ತಯಾರ್ ಜಾತಾ. ಅಶೆಂ ತಯಾರ್ ಜಾಲ್ಲೆಂ ಪಾಡ್ ಕೊಲೆಸ್ಟ್ರೋಲ್
ಅನಾಹುತಾಂಕ್ ಕಾರಣ್ ಜಾವ್ಯೆತಾ. ಅನುವಂಶೀಯ್ ಗೂಣ್, ಖಾಣ್,
ಕುಡಿಚೆಂ ವಜನ್, ಪ್ರಾಯ್, ಆಮಾಲ್ ಪಿಯೊಣೆಂ ಆನಿ ಕುಡಿಚೆರ್
ಪಡ್ಚೊ ಭೊರ್ ಹೆಂ ಸರ್ವ್ ರಗ್ತಾಂತ್ ಪಾಡ್ ಕೊಲೆಸ್ಟ್ರೋಲ್
ಚಡುಂಕ್ ಪ್ರೇರಣ್ ಜಾವ್ಯೆತಾ.
ಜಲ್ಮಾ ಥಾವ್ನ್
ಯೆಂವ್ಚ್ಯಾ (ಅನುವಂಶೀಯ್) ಎಕಾ ಗುಣಾವರ್ವಿಂ ಹಜಾರಾಂತ್
ದೊಗಾಂ ಥಂಯ್ ಕೊಲೆಸ್ಟ್ರೋಲ್ ಆಪಾಪಿಂಚ್ ಚಡುನ್ ವೆಚೊ
ಸಮಸ್ಸೊ ಆಸ್ತಾ. ಹೊ ಕುಟ್ಮಾಥಾವ್ನ್ ಯೆಂವ್ಚೊ ಊನ್; ತ್ಯಾ
ಕುಟ್ಮಾಚ್ಯಾ ಜಾಯಿತ್ತ್ಯಾ ಸಾಂದ್ಯಾಂಚ್ಯಾ ರಗ್ತಾಂತ್
ಕೊಲೆಸ್ಟ್ರೋಲ್ ಚಡುನ್ ಆಸ್ತಾ.
ಖಾಣಾಕ್ ಆನಿ ಕೊಲೆಸ್ಟ್ರೋಲ್ ಪ್ರಮಾಣಾಕ್ ಲಾಗ್ಶಿಲ್ಯಾನ್
ಸಂಬಂಧ್ ಆಸಾ. ಮಾಸ್, ಲೊಣಿ, ಲೊಣ್ಯೆಥಾವ್ನ್ ತಯಾರ್ ಕೆಲ್ಲಿಂ
ಪಕ್ವನಾಂ, ಸಾಂಧ್ರ್ ತೆಲಾಂ ಚಡ್ ವಾಪಾರ್ಚೆಂ ಹೆಂ ಸರ್ವ್
ಕುಡಿಂತ್ ಕೊಲೆಸ್ಟ್ರೋಲ್ ಚಡುಂಕ್ ಕಾರಣ್
ಜಾತಾ.(ನಾರ್ಲಾಚ್ಯಾ, ಪಾಮೋಲಿನ್ ತಸಲ್ಯಾ ತೆಲಾಂತ್ ಸಾಂಧ್ರ್
ಚರಬ್ ಚಡ್ ಆಸ್ತಾ) ಸಾಂಧ್ರ್ ಚರಬ್ ಆಸ್ಲ್ಲ್ಯಾ ತೆಲಾಂತ್
ಭಾಜ್‍ಲ್ಲಿಂ ವಾ ತಸಲಿಂ ತೆಲಾಂ ವಾಪಾರ್ನ್ ತಯಾರ್ ಕೆಲ್ಲಿಂ
ಖಾಣಾಂ ಕೊಲೆಸ್ಟ್ರೋಲ್ ಚಡುಂಕ್ ಕಾರಣ್ ಜಾತಾತ್.
ಕುಡಿಚೆ ಮೊಟಾಯೆಕ್ ಆನಿ ಕೊಲೆಸ್ಟ್ರೋಲ್ ಪ್ರಮಾಣಾಕ್ ಶೀದಾ
ಸಂಬಂದ್ ಆಸಾ. ಕುಡಿಚೆಂ ವಜನ್ ಚಡುನ್ ಗೆಲ್ಲೆಪರಿಂ ಕುಡಿಂತ್
ಪಾಡ್ ಕೊಲೆಸ್ಟ್ರೋಲ್ ಚಡುನ್ ವೆತಾ. ಮೊಟಾಯ್ ಉಣಿ ಜಾಲ್ಯಾರ್
ಕೊಲೆಸ್ಟ್ರೋಲ್ ದೆಂವ್ತಾ. ಕುಡಿಕ್ ಕಸಲೊಯ್ ಭೊರ್ ನಾತ್‍ಲ್ಲೆಂ
ಕಾಮ್ ವಾ ದಫ್ತರಾಂತ್ ಬಸುನ್ ಕಾಮ್ ಕರ್ತೆಲ್ಯಾಂ ಥಂಯ್‍ಯಿ
ಕೊಲೆಸ್ಟ್ರೋಲ್ ಚಡ್ತಾ. ದಫ್ತರಾಂತ್ ಬಸುನ್ ಕಾಮ್
ಕರ್ತೆಲ್ಯಾಂ ಥಂಯ್ ಮತಿಚೊ ಭೊರ್ ಚಡ್ ಆಸ್ಲ್ಯಾರ್
ಕೊಲೆಸ್ಟ್ರೋಲ್ ಚಡ್ತಾ. ಅಶೆಂ ಕಾಮ್ ಕರ್ತೆಲೆ ಆಪ್ಲ್ಯಾ
ಖಾಣಾಂತ್ ಚತ್ರಾಯ್ ಘೆನಾತ್‍ಲ್ಲೆಂ ಆನಿ ಕಸಲೆಂಯ್ ವ್ಯಾಯಮ್
ಕರಿನಾತ್‍ಲ್ಲೆಂಚ್ ಕೊಲೆಸ್ಟ್ರೋಲ್ ಚಡುಂಕ್ ಪ್ರೇರಣ್ ಜಾತಾ.
ತುಜೆಂ ಕೊಲೆಸ್ಟ್ರೋಲ್ ತಪಾಸ್ಣಿ
ಕರಯ್:
ಜೆರಾಲ್ ಭಲಾಯ್ಕಿ ಬರಿ ಆಸಾ, ಕುಡಿಂತ್ ಚಡ್ ಮೊಟಾಯ್ ನಾ,
ಧುಮ್ಟಿ ಸೆಂವ್ಚಿ ಸವಯ್ ನಾ ಆನಿ ಹೆರ್ ಕಿತೆಂಯ್ ಸಮಸ್ಸೆ
ನಾಂತ್ ತರ್‍ಯಿ ಚಾಳೀಸ್ ವರ್ಸಾಂ ಪ್ರಾಯೆ ಉಪ್ರಾಂತ್
ಹರ್ಯೆಕಾ ವರ್ಸಾ ಕೊಲೆಸ್ಟ್ರೋಲ್ ತಪಾಸ್ಣಿ ಕರಂವ್ಚಿ ಬರಿ.
ಆರ್ಥಿಕ್ ಪರಿಗತ್ ಬರಿ ಆಸುನ್ ಕುಡಿಕ್ ಚಡ್ ಭೊರಾಚೆಂ ಕಾಮ್
ಕರಿನಾತ್‍ಲ್ಲ್ಯಾಂನಿ, ಚಡ್ತಾವ್ ಶೆರಾಂತ್ ಜಿಯೆವ್ನ್ ಆಸ್‍ಲ್ಲ್ಯಾಂನಿ
ವೀಸ್ ವರ್ಸಾಂಚೆ ಪ್ರಾಯೆ ಉಪ್ರಾಂತ್ ಹರ್ ಪಾಂಚ್ ವರ್ಸಾಂಕ್
ಏಕ್ ಪಾವ್ಟಿಂ ತರ್‍ಯಿ ರಗತ್ ತಪಾಸ್ಣಿ ಗರ್ಜ್ ಮ್ಹಣ್
ಅಮೇರಿಕಾಚ್ಯಾ ಹಾರ್ಟ್‍ಎಸೋಸಿಯೇಶನಾನ್ ಶಿಫಾರಸ್ ಕೆಲ್ಯಾ.
ಕೊಲೆಸ್ಟ್ರೋಲ್ ಏಕ್ ಮಾತ್ರ್ ಕಾಳ್ಜಾಘಾತಾಕ್ ಕಾರಣ್ ನ್ಹಯ್
ತರ್‍ಯಿ ಚಡ್‍ಲ್ಲ್ಯಾ ಕೊಲೆಸ್ಟ್ರೋಲಾಕ್ ಆನಿ ಕಾಳ್ಜಾಘಾತಾಕ್
ಲಾಗ್ಶಿಲ್ಯಾನ್ ಸಂಬಂಧ್ ಆಸಾ. ರಗ್ತಾಂತ್ 200 ಮಿಲಿಗ್ರಾಮ್/ಡೆಸಿಲೀಟರ್
ತಿತ್ಲೆಂ ಕೊಲೆಸ್ಟ್ರೋಲ್ ಆಸ್‍ಲ್ಲ್ಯಾಂ ಪ್ರಾಸ್ 240
ಮಿಲಿಗ್ರಾಮ್ ಕೊಲೆಸ್ಟ್ರೋಲ್ ಆಸ್‍ಲ್ಲ್ಯಾಂಕ್ ಕಾಳ್ಜಾಘಾತ್
ಜಾಂವ್ಚೆ ಸಂದ್ರಾಪ್ ದೋನ್ ವಾಂಟೆ ಚಡ್. ಕಾಳ್ಜಾಘಾತಾಕ್
ಪ್ರೇರಣ್ ಜಾಂವ್ಚ್ಯೊ ಜಾಯಿತ್ತ್ಯೊ ಗಜಾಲಿ ಕೊಲೆಸ್ಟ್ರೋಲ್
ಚಡುಂಕ್ ಕಾರಣ್; ತಶೆಂ ಕೊಲೆಸ್ಟ್ರೋಲ್ ಕಾಳ್ಜಾಘಾತಾಚ್ಯಾ
ರಿಸ್ಕೆಚೆಂ ಏಕ್ ಮಾಪ್‍ಯಿ ಜಾವ್ಯೆತಾ.
ಜೆರಾಲ್ ಥರಾನ್ ಕೊಲೆಸ್ಟ್ರೋಲಾಚೊ ಪ್ರಮಾಣ್ ಸುಮಾರ್ 200
ಮಿಲಿಗ್ರಾಮ್/ಡೆಸಿಲೀಟರ್ ಪ್ರಾಸ್ ಉಣೊ ಆಸುನ್, ಉಣ್ಯಾ
ದಾಟಾಯೆಚೆಂ ಕೊಲೆಸ್ಟ್ರೋಲ್ 130 ಮಿಲಿಗ್ರಾಮ್ ಪ್ರಾಸ್ ಉಣೆಂ
ಆನಿ ಚಡ್ ದಾಟಾಯೆಚೆಂ ಕೊಲೆಸ್ಟ್ರೋಲ್ 40 ಮಿಲಿಗ್ರಾಮ್
ಪ್ರಾಸ್ ಚಡ್ ಆಸ್ಚೆಂ ಗರ್ಜ್. ‘ತಪಾಸ್ಣಿ ನಾಕಾ..ಕಿತೆಂಯ್
ಚಡ್‍ಉಣೆಂ ಆಸ್ಲ್ಯಾರ್ ಉಪ್ರಾಂತ್ ರಗ್ಳೆ..’ ಮ್ಹಣ್
ಥೊಡ್ಯಾಂನಿ ತಪಾಸ್ಣೆಕ್ ಚುಕಾರಿ ಮಾರ್ಚಿ ಆಸಾ. ಅಶೆಂ
ಕೆಲ್ಲ್ಯಾನುಂಚ್ ಅಪಾಯ್ ಜಾಯ್ತ್. ಎಕಾವೆಳಾ ರಿಸ್ಕ್ ಆಸಾತರ್
ತಾಕಾ ಫಾವೊ ತೆಂ ಮೇಟ್ ಘೆವ್ನ್, ರಗ್ತಾಂತ್
ಕೊಲೆಸ್ಟ್ರೋಲಾಚೊ ಪ್ರಮಾಣ್ ಮಿತಿ ಭಿತರ್ ಹಾಡ್ಯೆತಾ.
ಕೊಲೆಸ್ಟ್ರೋಲ್ ಮಿತಿ ಭಿತರ್ ಆಸಾ ತರ್ ತೊ ಚಡುನ್ ವಚಾನಾಶೆಂ
ಚತ್ರಾಯೇನ್ ಆಸ್ಯೆತಾ.
(ಕೊಲೆಸ್ಟ್ರೋಲ್ ಉಣೊ ಕರುಂಕ್ ಸಲಹಾ ಮುಕ್ಲ್ಯಾ ಲೇಕನಾಂತ್)
( -
ಡಾ|ಎಡ್ವರ್ಡ್ ಎಲ್. ನಜ್ರೆತ್,
ಎಪ್ರಿಲ್, 2016)
|
