ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಅಸ್ತುರಿ ಎಕ್ ಕವಿತಾ (- ಉರ್ಜಿತಾ ಭೊಬೆ)

ಅಸ್ತುರಿ ಏಕ್ ಕವಿತಾ - ಹೆಂ ವಾಚ್ತಾನಾಂಚ್ ಎಕಾ ವಾಚಪ್ಯಾಚ್ಯಾ ಮನಾಂತ್ ವೆಗ್-ವೆಗಳಿಂ ಭಾವನಾಂ ಉದೆತಾತ್. ಎಕಾ ಅಸ್ತುರೆಚಿಂ ವೆಗ್-ವೆಗಳಿಂ ರುಪಾಂ, ಆನಿ ಕಸಲಿಂಚ್ ಶರ್ತಾಂ ನಾತ್ಲೊ ತಿಚೊ ಮೋಗ್ ಆನಿ ತ್ಯಾಗ್ ಕಾಳ್ಜಾಂತ್ ಉಮಾಳೆ ಹಾಡಯ್ತಾ.

ಕೊಂಕಣಿಂತ್ ಅಸ್ತುರಿ ಸಾಹಿತ್ಯಾಮುಖಾಂತ್ರ್ ಥೊಡ್ಯಾಂನಿ ಅಪ್ಲಿ ಒಳೊಕ್ ದಿಲ್ಯಾ ಆನಿ ತಾಂತುಂ ಬಾಯ್ ಉರ್ಜಿತಾ ಎಕ್ಲಿ ಮ್ಹಣ್ ಸಾಂಗ್ಯೆತಾ. ದೂಕ್/ವೇದನಾಂ ಸೊಸುನ್ ಹಾಸೊ ಕಶ್ಯೊ ದಿಂವ್ಚ್ಯೊ, ಪರತ್ ಪರತ್ ಸಲ್ವೊನ್, ಫಕತ್ ಜಿಕ್ಪಾಚೊ ಆಶಾವಾದ್ ಕಸೊ ಭರ್ಚೊ ಹಿಂ ಸಂವೇದನಾಂ ತಿಚ್ಯಾ ದರೇಕಾ ಕವಿತೆಂನಿ ದಿಸುನ್ ಯೆತಾತ್. ಹಿ ಕವಿತಾ ಕಾಂಯ್ ತ್ಯಾ ಸಿಂತಿಮೆಂತಾಂಕ್ ಸೊಡ್ನ್ ದೀನಾ. ಹ್ಯಾ ಕವಿತೆಚ್ಯಾ ಸಕ್ತೆಕ್ ಮಾಪುಂಕ್ ಆನಿ ಸಮ್ಜುಂಕ್ ತುಕಾಚ್ ಉಲೊ ದಿತಾಂ.

- ಸಂ

[ಕವಿತಾ] ಅಸ್ತುರಿ ಎಕ್ ಕವಿತಾ (- ಉರ್ಜಿತಾ ಭೊಬೆ)

ಅಸ್ತುರಿ ಎಕ್ ಕವಿತಾ ಕೆನ್ನಾ ಜಿಯೆತಾ ಜೀಣ್ ಅಸ್ತುರಿ ಅಲ್ಲಡ್, ಖೆಳ್ಕರ್ ಬಾಲ್ಕವಿತೆವರಿಂ ನೆಣಾರಪಣಾತ್ಲ್ಯಾ ಖೊಶ್ಯೆಂತ್ ಲೀನ್ ಲ್ಹವ್ ಲ್ಹವ್ಶೆ ಜಿವಿತಾಚೆ ಖೀಣ್ ಕೆನ್ನಾ ತಿಜಿ ಜೀಣ್ ಎಕ್ ಸುತ್ಕಿ ಗೀತ್ ಸುತಕ್ ನಿರಾಗಸತಾಯೆಚ್ಯಾ ಮರ್ಣಾಚೆಂ ಲಜ್ಕುರ್ಯಾ ಬಡ್ಬಡಗೀತಾಂತ್ಲ್ಯಾನ್ ಜುವಾನಪಣಾಚ್ಯಾ ಧೂಲ್ಪದಾಚಿ ಜೀಣ್ ಹ್ಯಾ ಧೂಲ್ಪದಾಚಿ ತಾಂಕ್ ದಾದ್ಲೆ ಮನ್ಶಾಕ್ ಭೂಲೊವ್ಪಿ ಹ್ಯಾ ಕವಿತೆಚ್ಯೊ ಉಪ್ಮಾ ತಾಂಚಿ ಭಾಸ್ ಬದ್ಲತಾ ತಿಜಿ ರೂಪ್ಕಾಂ ತಾಂಚಿ ಜಾತ್ ಬದ್ಲತಾ ತಿಣೆ ಜುಳಯ್ಲ್ಲಿಂ ಯಮ್ಕಾಂ ತಾಂಚಿ ಮೊಖ್ ಬದ್ಲತಾ ಮಾಗೀರ್ ಹ್ಯಾ ಕವಿತೆಕ್ ಯೆತಾ ಎಕ್ ಆತ್ಮವಿಶ್ವಾಸ್ ತ್ಯಾ ನರಾಂಚ್ಯಾ ಚೀರ್ಪಿ ನದ್ರಾಂಕ್ ಭೆದ್ಪಾಚೊ ಹಳು ಹಳು ಹಿ ಕವಿತಾ ಎಕ್ ವೀರ್ಗೀತ್ ಜಾಯ್ತ್ ವತಾ ಸ್ವತಃಚ್ಯಾಚ್ ಆವಾಜಾಚ್ಯಾ ಮೊಗಾಂತ್ ಪಡಿಲ್ಲೆಂ ಗೀತ್ ಕಾರಣ್ ಆನಿ ಕೊಣ್ ಹೊ ಆವಾಜ್ ಆಯ್ಕೂನ್ ಘೆನಾ. ಎಕ್ ಸಕ್ಷಮ್ ಕವಿತೆವರಿಂ ಅಸ್ತುರೆಕಯ್ ಆಸ್ತಾ ಎಕ್ ಧಾರ್ ತಿ ಚಿರತ್ ವತಾ ಅಪ್ಮಾನಾಚಿಂ ಮತಾಂ ಆನಿ ಹಿಣಾವ್ಪಿ ನದ್ರೊ. ಹಿ ಕವಿತಾ ಆತಾಂ ಸ್ವತಃಚೊ ಮಾನ್ ದವ್ರೂಂಕ್ ಶಿಕ್ತಾ ಫಕತ್ ವಾಚೂನ್ ಉಡೊವ್ಪಾಚಿ ನ್ಹಿಂ ಆಯ್ಕುನ್ ಘೆವ್ಪಾಚಿ, ಸಮ್ಜೂನ್ ಘೆವ್ಪಾಚಿ, ಮತೀಂತ್ ಧರ್ಪಾಚಿ ಕವಿತಾ. ಆನಿ ಮಾಗೀರ್ ತಿಕಾ ಯೆತಾ ಜಾಣ್ ಜಗ್ಪಾಚಿ ಎಕ್ ಅಸ್ತುರಿ ಮ್ಹಣ್. ಮಾನಾನ್. ಫಕತ್ ಜಲ್ಮಾಕ್ ಆಯ್ಲ್ಯಾ ಮ್ಹಣ್ ನ್ಹಿಂ. ಜಗ್ಪಾಚಿ ಇತ್ಸಾ ಆಸಾ ಮ್ಹಣ್. ಆಪ್ಲ್ಯಾ ಅಸ್ತಿತ್ವಾಚಿ ಜಾಣೀವ್ ರಾಖೂನ್ ಬದಲ್ ಘಡವ್ಪಾಕ್ ಆಪ್ಲ್ಯಾ ಮತಾಂಚೊ ವಿಜಯ್ ಕರ್ಪಾಕ್ ಸ್ವತಃಚ್ಯಾ ಅಸ್ತಿತ್ವಾಕ್ ನ್ಹಿಂ ತರ್ ಅನ್ಯಾಯಾಕ್ ವಿರೊಧ್ ಕರೂನ್ ಸ್ವತಃಚೆರ್ ಮೊಗ್ ಕರೀತ್ ಜಗ್ಪಾಚಿ ಜಾಣ್. ದರ್ ಎಕಾ ಅಸ್ತುರೆಚಿ ಜೀಣ್ ಎಕ್ ಸ್ತೊತ್ರ್! ಎಕ್ ಮಹಾಕಾವ್ಯ್ ಜ್ಯಾಚಿ ತಿ ಕವ್ಯಿತ್ರಿ ಆನಿ ತಿಜೆಂ ಸತ್ ಭಿತರ್ಲ್ಯಾ ಭಿತರ್ ಖತ್ಖತನಾ. ತೆಂ ಭಾಯ್ರ್ ಯೆತಾ ಸಳ್ಸಳೂನ್!! **** - ಉರ್ಜಿತಾ ಭೊಬೆ**. [ಮಾರ್ಚ್, 2023]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್ (2018), ’ಅಂತರ್‌ನಾದ್ (2021), ಪರ್ಗಟ್ ಜಾಲ್ಯಾತ್. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Osturi Iek Kovita* (- Urjitha Bhobe)*
Osturi Iek Kovita - hem vachtananch ieka vachpeachea monant veg-vegllim bhavanam udetat. Ieka osturechim veg-vegollim rupam, ani kosolinc xortam natlo ticho mog ani teag kallzant umalle haddoita. Konknnint osturi sahiteamukantr thodd'eani opli o'llo'k dilea ani tantun Bai Urjita Bhobe iekli mhonn sanguieta. Duk/Vedonam sosun haso kaxeo diunchyo, porot solvon, fokot jikpaco Axavad koso bhorcho him somvedonam tichea doreka kovitemni disun ietat. Hi kovita kaim tea sintimentank sodd'n dina. hea kovitechea soktek mapunk ani somzunk tukac ulo ditam. - Som
[kovita] Osturi Iek Kovita* (- Urjitha Bhobe)*
Osturi Iek Kovita ken'na jieta jinn osturi ol'lodd, khellkor balkoviteurim nennaroponnatlea khoxyent lin lhou lhouxe jivitache khinn ken'na tiji jinn ek sutki git sutok niragosotayechea mornnachem lojkurea boddboddogitantlean zuvanoponnachea dhulpodachi jinn hea dhulpodachi tank dadle monxak bhuloupi hea kovitecheo upma tanchi bhas bodlota tiji rupkam tanchi zat bodlota tinne zulloil'lim yomkam tanchi mokh bodlota magir hea kovitek yeta ek atmovixvas tea noranchea chirpi nodrank bhedpacho hollu hollu hi kovita ek virgit zait vota svotHcheach avazachea mogant poddil'lem git karonn ani konn ho avaz aikun ghena. Ek sokxom' koviteurim osturekoi asta ek dhar ti chirot vota opmanachim motam ani hinnaupi nodro. Hi kovita atam svotHcho man dourunk xikta fokot vachun uddoupachi nhim aikun gheupachi, somzun gheupachi, motint dhorpachi kovita. Ani magir tika yeta zann zogpachi ek osturi mhonn. Manan. Fokot zolmak ailea mhonn nhim. Zogpachi itsa asa mhonn. Aplea ostitvachi zannivo rakhun bodol ghoddoupak aplea motancho vizoi korpak svotHchea ostitvak nhim tor oneayak virodh korun svotHcher mog korit zogpachi zann. Dor eka osturechi jinn ek stotr! ek mohakauy jeachi ti kouyitri ani tijem sot bhitorlea bhitor khotkhotona. Tem bhair yeta sollsollun!! **** - Urjita Bhobe.** [Mar, 2023]

	Urjita Bhobe: Sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’Urzasrot (2018), 'Ontornad (2021)’ porgott zaleat. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] अस्तुरी एक कविता (- उर्जिता भोबे)
असतुरी एक कविता - हें वाचतानांच एका वाचप्याच्या मनांत वेग-वेगळीं भावनां उदेतात. एका असतुरेचीं वेग-वेगळीं रुपां, आनी कसलिंच शर्तां नातलो तिचो मोग आनी त्याग काळजांत उमाळे हाडयता. कोंकणिंत असतुरी साहित्यामुखांत्र थोड्यांनी अपली ओळोक दिल्या आनी तांतूं बाय उर्जिता एकली म्हण सांग्येता. दूक/वेदनां सोसून हासो कश्यो दिंवच्यो, परत परत सलवोन, फकत जिकपाचो आशावाद कसो भर्चो हीं संवेदनां तिच्या दरेका कवितेंनी दिसून येतात. ही कविता कांय त्या सिंतिमेंतांक सोडन दीना. ह्या कवितेच्या सक्तेक मापुंक आनी समजुंक तुकाच उलो दितां. - सं
[कविता] अस्तुरी एक कविता (- उर्जिता भोबे)
अस्तुरी एक कविता केन्ना जियेता जीण अस्तुरी अल्लड, खेळकर बालकवितेवरीं नेणारपणातल्या खोशयेंत लीन ल्हव ल्हवशे जिविताचे खीण केन्ना तिजी जीण एक सुतकी गीत सुतक निरागसतायेच्या मरणाचें लजकुऱ्या बडबडगीतांतल्यान जुवानपणाच्या धूलपदाची जीण ह्या धूलपदाची तांक दादले मनशाक भूलोवपी ह्या कवितेच्यो उपमा तांची भास बदलता तिजी रूपकां तांची जात बदलता तिणे जुळयल्लीं यमकां तांची मोख बदलता मागीर ह्या कवितेक येता एक आत्मविश्वास त्या नरांच्या चीरपी नदरांक भेदपाचो हळू हळू ही कविता एक वीरगीत जायत वता स्वतःच्याच आवाजाच्या मोगांत पडिल्लें गीत कारण आनी कोण हो आवाज आयकून घेना. एक सक्षम कवितेवरीं अस्तुरेकय आसता एक धार ती चिरत वता अपमानाचीं मतां आनी हिणावपी नदरो. ही कविता आतां स्वतःचो मान दवरूंक शिकता फकत वाचून उडोवपाची न्हीं आयकुन घेवपाची, समजून घेवपाची, मतींत धरपाची कविता. आनी मागीर तिका येता जाण जगपाची एक अस्तुरी म्हण. मानान. फकत जल्माक आयल्या म्हण न्हीं. जगपाची इत्सा आसा म्हण. आपल्या अस्तित्वाची जाणीव राखून बदल घडवपाक आपल्या मतांचो विजय करपाक स्वतःच्या अस्तित्वाक न्हीं तर अन्यायाक विरोध करून स्वतःचेर मोग करीत जगपाची जाण. दर एका अस्तुरेची जीण एक स्तोत्र! एक महाकाव्य ज्याची ती कवयित्री आनी तिजें सत भितरल्या भितर खतखतना. तें भायर येता सळसळून!! **** - उर्जिता भोबे.** [मार्च, २०२३]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत (२०१८), ’अंतर‌नाद (२०२१), पर्गट जाल्यात. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.