[ಕವಿತಾ] ನವೆಂ ದುಯೆಂಸ್ (- ಉರ್ಜಿತಾ ಭೊಬೆ)

ನವೆಂ ದುಯೆಂಸ್

ಕಿತ್ಲಿಂ ಮಡಿಂ ಆಡ್ವಿಂ ಪಡ್ಲ್ಯಾಂತ್
ಅಖ್ಖೆಂ ಜಗೂಚ್ ಅಶಾಂತ್ ವಿಭ್ರಾಂತ್
ಮ್ಹಜಿ ನದರ್ ಧುಂವ್ರೆಲ್ಯಾ
ಮ್ಹಾಕಾ ಫಕತ್ ದಿಸ್ತಾ ಭೀರಾಂತ್

ಪೊರಾಂ ಬಾಳಾಂಕ್ ಹಾಂಡೀರ್ ಮಾರೂನ್
ತಿಂ ಶಾರ್ ಸೊಡೂನ್ ವತಾತ್ ಗಾವಾಂತ್
ದಿಸ್ನಾ ತ್ಯಾ ಪೊರಾಂಚಿ ನಾಗ್ಡಿ ಕೂಡ್
ಕರ್ಪತನಾ ರಖ್ರಖೀತ್ ವತಾಂತ್

ಅರ್ದಕುಟಿ ವಣತ್ ಉರ್ಲ್ಯಾ
ತಶೀಚ್ ಮ್ಹಜ್ಯಾ ಮಾಗೀಲದಾರಾಂತ್
ಮ್ಹಜಿ ನದರ್ ಧುಂವ್ರೆಲ್ಯಾ
ಮ್ಹಾಕಾ ಫಕತ್ ದಿಸ್ತಾ ಭೀರಾಂತ್

ಲೊಕ್ ಘರಾಂತ್ ಕಿದ್ಯಾಕ್ ರಾವ್ನಾತ್
ಪಾಸ್ಯೆರ್ ಕಿದ್ಯಾಕ್ ನ್ಹಿದ್ತಾತ್
ಹಾಂಗಾ ಥಂಯ್ ಭೊವುನ್ ಭೊವುನ್
ಖಾವ್ಪಾಕ್ ಕಿದ್ಯಾಕ್ ಸೊದ್ತಾತ್

ಜೆಂವ್ಕ್ ಖಾಂವ್ಕ್ ಮೆಳ್ನಾ ಜಾಲ್ಯಾರ್
ದಾರಾಂ ಫೊಡೂನ್ ಘುಸತ್ ಘರಾಂತ್
ಮ್ಹಜಿ ನದರ್ ಧುಂವ್ರೆಲ್ಯಾ
ಮ್ಹಾಕಾ ಫಕತ್ ದಿಸ್ತಾ ಭೀರಾಂತ್

ಶೆಜ್ರಾ ಕೊಣಯ್ ದುಯೆಂತ್ ಪಡ್ಲ್ಯಾರ್
ಕಾಳ್ಜಾಂತ್ ಮ್ಹಜ್ಯಾ ಧಡ್ಧಡಟಾ
ಸಂಕಟ್ ಮ್ಹಜೆರ್ ಯೆನಾ ಮುಂ
ಹಾಂವ್ ತೆಂಚ್ ಯೆವ್ಜುಂಕ್ ಪಡ್ಟಾಂ

ಮ್ಹಾಕಾ ಮ್ಹಜೆಂಚ್ ಪಡ್ಲಾಂ ಆತಾಂ
ಶೆಜ್ರಾ ಕಿತ್ಲೊಯ್ ಯೆಂವ್ ಆಕಾಂತ್
ಮ್ಹಜಿ ನದರ್ ಧುಂವ್ರೆಲ್ಯಾ
ಮ್ಹಾಕಾ ಫಕತ್ ದಿಸ್ತಾ ಭೀರಾಂತ್

ದಯಾ ಮಾಯಾ ಕರೂಣಾ ಮೊಗ್
ಉಮಾಳೆ ಸಗ್ಳೆ ಸುನ್ನ್ ಜಾಲ್ಯಾತ್
ಆಪ್ಲೆ ಫುಡೆಂ ಕೊಣಚ್ ದಿಸ್ನಾ
ಶೀರೊ ಸಗ್ಳ್ಯೊ ಮುಂಯೆಲ್ಯಾತ್

ಸಂಕಟ್ ಹೆಂ ಜೆನ್ನಾಚ್ಯಾನ್ ಆಯ್ಲಾಂ
ನವೆಂ ದುಯೆಂಸ್ ಜಲ್ಮಲಾಂ ಕಾಳ್ಜಾಂತ್
ಭೀರಾಂತೀಚೆಂ ದುಯೆಂಸ್ ಆತಾಂಚ್ ಜಾಲಾಂ
ಕಾಯ್ ಸದಾಂಚ್ ಆಸ್ಲೆಂ ಮ್ಹಜ್ಯಾ ಮನಾಂತ್?

ಸಂಸಾರಾರ್ ಕೆದೊಯ್ ಯೆಂವ್ ಸಾಂವಾರ್
ದೊಳೆ, ಕಾಳ್ಜಾಂ, ದಾರಾಂ ಧಾಪಾತ್
ಸ್ವಾರ್ಥಾನ್ ನದರ್ ಧುಂವ್ರೆತಾ
ಮ್ಹಾಕಾ ಸದಾಂಚ್ ದಿಸ್ತಾ ಭೀರಾಂತ್
ಮ್ಹಜಿ ನದರ್ ಧುಂವ್ರೆತಾ
ಮ್ಹಾಕಾ ಫಕತ್ ದಿಸ್ತಾ ಭೀರಾಂತ್

 ******

- ಉರ್ಜಿತಾ ಭೊಬೆ. [ಜುಲಾಯ್, 2020]

[kovita] Novem duyems (- Urjitha Bhobe)

Novem duyems

kitlim moddim addvim poddleant
okhkhem zoguch oxant vibhrant
mhoji nodor dhumvrelea
mhaka fokot dista bhirant

poram ballank handdir marun
tim xar soddun votat gavant
disna tea poranchi nagddi kudd
korpotona rokhrokhit votant

ordokutti vonnot urlea
toxich mhojea magilodarant
mhoji nodor dhumvrelea
mhaka fokot dista bhirant

lok ghorant kideak raunat
pasyer kideak nhidtat
hanga thoim bhovun bhovun
khaupak kideak sodtat

jeunko khaunko mellna zalear
daram foddun ghusot ghorant
mhoji nodor dhumvrelea
mhaka fokot dista bhirant

xejra konnoi duyent poddlear
kallzant mhojea dhodd'dhoddotta
sonkott mhojer yena mum
hamv tench yeuzunk poddttam

mhaka mhojench poddlam atam
xejra kitloi yemv akant
mhoji nodor dhumvrelea
mhaka fokot dista bhirant

doya maya korunna mog
umalle soglle sun'n zaleat
aple fuddem konnoch disna
xiro soglleo mumyeleat

sonkott hem jen'nachean ailam
novem duyems zolmolam kallzant
bhirantichem duyems atanch zalam
kai sodanch aslem mhojea monant?

somsarar kedoi yemv samvar
dolle, kallzam, daram dhapat
svarthan nodor dhumvreta
mhaka sodanch dista bhirant
mhoji nodor dhumvreta
mhaka fokot dista bhirant

******

- Urjita Bhobe. [Jul, 2020]

[कविता] नवें दुयेंस (- उर्जिता भोबे)

सगळ्या संसाराक भिरांतेन जियेवंक लायिल्ले मारेकार दीस खरेच जावन सरवांक भिरांतिचे. ह्या थोड्याच मयन्यांनी कशें सगळें बदलून गेलां? ह्या बदलावाणेंत ग्रेसत म्हण ना, दुबळो म्हण ना. दुडूच सगळें म्हणून पात्येवन जियेल्लो मनीस सयत दुडवांत कितेंच करुंक सकानासतां आसचो काळ हो. हेंच चिंतप ह्या कवितेचें.

- सं

[कविता] नवें दुयेंस (- उर्जिता भोबे)

नवें दुयेंस

कितलीं मडीं आडवीं पडल्यांत
अख्खें जगूच अशांत विभ्रांत
म्हजी नदर धुंवरेल्या
म्हाका फकत दिसता भीरांत

पोरां बाळांक हांडीर मारून
तीं शार सोडून वतात गावांत
दिसना त्या पोरांची नागडी कूड
करपतना रखरखीत वतांत

अर्दकुटी वणत उरल्या
तशीच म्हज्या मागीलदारांत
म्हजी नदर धुंवरेल्या
म्हाका फकत दिसता भीरांत

लोक घरांत किद्याक रावनात
पासयेर किद्याक न्हिदतात
हांगा थंय भोवुन भोवुन
खावपाक किद्याक सोदतात

जेंवक खांवक मेळना जाल्यार
दारां फोडून घुसत घरांत
म्हजी नदर धुंवरेल्या
म्हाका फकत दिसता भीरांत

शेजरा कोणय दुयेंत पडल्यार
काळजांत म्हज्या धडधडटा
संकट म्हजेर येना मूं
हांव तेंच येवजुंक पडटां

म्हाका म्हजेंच पडलां आतां
शेजरा कितलोय येंव आकांत
म्हजी नदर धुंवरेल्या
म्हाका फकत दिसता भीरांत

दया माया करूणा मोग
उमाळे सगळे सुन्न जाल्यात
आपले फुडें कोणच दिसना
शीरो सगळ्यो मुंयेल्यात

संकट हें जेन्नाच्यान आयलां
नवें दुयेंस जल्मलां काळजांत
भीरांतीचें दुयेंस आतांच जालां
काय सदांच आसलें म्हज्या मनांत?

संसारार केदोय येंव सांवार
दोळे, काळजां, दारां धापात
स्वार्थान नदर धुंवरेता
म्हाका सदांच दिसता भीरांत
म्हजी नदर धुंवरेता
म्हाका फकत दिसता भीरांत

******

-  उर्जिता भोबे. [जुलाय, २०२०]

ದಾಯ್ಜ್.ಕೊಮ್