|
ಬರ್‍ಯಾ ಭಲಾಯ್ಕೆನ್
ಆಸ್‍ಲ್ಲೆ ಮ್ಹಣ್ ಲೆಕ್‍ಲ್ಲೆ ಜಾಯಿತ್ತೆ ತರ್ನಾಟೆ,
ಎಕಾನೇಕ್ ಕಾಳ್ಜಾಘಾತ್ ಜಾವ್ನ್ ಮೊರ್ಚೆಂ ಆಯ್ಲೆವಾರ್ ಚಡುನ್
ಆಸಾ. ತರ್ನೆ ಪ್ರಾಯೆಚೆರ್ ಕಾಳ್ಜಾಘಾತಾಕ್ ಪ್ರೇರಣ್
ದಿಂವ್ಚ್ಯಾ ಜಾಯಿತ್ತ್ಯಾ ಗಜಾಲಿಂ ಪಯ್ಕಿಂ ಕುಡಿಕ್ ಕಿತೆಂಯ್
ವ್ಯಾಯಮ್ ನಾಸ್ತಾಂ ದೀಸ್ ಸಾರ್ಚೆಂ (physical
inactivity)
ಏಕ್ ಪ್ರಮುಕ್ ಕಾರಣ್. ಕುಡಿಕ್ ಕಿತೆಂಯ್ ವ್ಯಾಯಮ್ ನಾಸ್ತಾಂ
ದೀಸ್ ಸಾರ್ಚೆಂ ಕಾಳ್ಜಾಘಾತ್ ಮಾತ್ರ್ ನ್ಹಯ್ ಆಸ್ತಾಂ ಹೆರ್
ಸಭಾರ್ ಥರಾಂಚ್ಯಾ ಪಿಡೆಂತ್ ಪಡೊಂಕ್ ಕಾರಣ್ ಜಾವ್ಯೆತಾ.
ವ್ಯಾಯಮಾಂ ಪಯ್ಕಿಂ ಸದಾಂಯ್ ನಿಯಮಿತ್ ಥರಾನ್ ಚಲ್ಚೆಂ
ಸಲೀಸಾಯೆಚೆಂ ಆನಿ ಭಲಾಯ್ಕೆಕ್ ಭೋವ್ ಉಪ್ಕಾರಾಚೆಂ. ನಿಯಮಿತ್
ಥರಾನ್ ಸದಾಂಯ್ ವ್ಯಾಯಮ್ ಕರ್ಚೆಂ ವಾ ಚಲ್ಚೆಂ ಬರ್‍ಯಾ
ಭಲಾಯ್ಕೆಕ್ ವಿಶೇಸ್ ಆಧಾರಾಚೆಂ ಜಾತಾ. ಚಲ್ಚೆಂ ನೈಸರ್ಗಿಕ್
ವ್ಯಾಯಮ್ ಆನಿ ಸಲೀಸಾಯೆನ್ ಕರುಂಕ್ ಜಾತಾ. ಚಲ್ಚೆಂ ಹೆರ್
ವ್ಯಾಯಮಾಂ ಪ್ರಾಸ್ ಸುರಕ್ಶಿತ್, ಸರ್ವ್ ಪ್ರಾಯೆಚ್ಯಾಂಕ್
ಸಾಧ್ಯ್ ಆಸ್ಚೆಂ ಆನಿ ಭಲಾಯ್ಕೆಕ್ ಹೆರ್ ವ್ಯಾಯಾಮಾಂ ಪ್ರಾಸ್
ಬರೆಂ ಜಾಲ್ಲ್ಯಾನ್ ಚಲ್ಚ್ಯಾ ವ್ಯಾಯಮಾಕ್
king of exercises
ಮ್ಹಣ್ ಸಾಂಗ್ತಾತ್. ನಿಯಮಿತ್ ಥರಾನ್ ಚಲ್ಚೆಂ ಕಾಳ್ಜಾಘಾತ್
(heart
attack)
ಆಡಾಂವ್ಕ್, ಡಯಾಬೆಟಿಸ್ ಆನಿ ಚಡ್‍ಲ್ಲೊ ರಗ್ತಾದಾಬಾಕ್
ಲಗ್ತಿ ಸಮಸ್ಸ್ಯಾಂಚ್ಯಾ ಚಿಕಿತ್ಸೆಂತ್, ಲಾಂಭ್ ಆವ್ದೆಚ್ಯಾ
ಪೊಪ್ಸಾಕ್ ಲಗ್ತಿ ಜಾಲ್ಲ್ಯಾ ಪಿಡೆಂಕ್, ಪಾಂಯಾಂನಿ
ರಗ್ತಾಚಲವ್ಣಿ ಸಾಂಬಾಳ್ನ್ ವ್ಹರುಂಕ್, ಪಾಂಯ್ ಆನಿ
ಪೆಂಕ್ಟಾಚ್ಯಾ ಹಾಡಾಂ-ಗಾಂಟಿಂನಿ ಝರವ್ಣಿ ಆಡಾಂವ್ಕ್ ಅಸಲೆ
ಭಲಾಯ್ಕೆಚೆ ಸಭಾರ್ ಸಮಸ್ಸೆ ನಿವಾರುಂಕ್ ಕುಮಕ್ ಕರ್ತಾ.
ಕೊಣಾಕ್ ವ್ಯಾಯಮ್ ಗರ್ಜೆಚೆಂ?
ಜೆರಾಲ್ ಥರಾನ್ ಆಜ್
ಕಾಲ್ ಸಾಮಾನ್ಯ್ ಸರ್ವಾಂಕ್ ವ್ಯಾಯಮ್ ಗರ್ಜ್ ಮ್ಹಣ್
ಸಾಂಗ್ಯೆತಾ. ಥೊಡ್ಯಾಂಕ್ ಹೆರಾಂಪ್ರಾಸ್ ವ್ಯಾಯಮ್ ಕರ್ಚಿ
ಗರ್ಜ್ ಚಡ್ ಆಸ್ತಾ.
• ಕುಡಿಕ್ ಭೊರ್
ನಾಸ್ಚೆಂ ಕಾಮ್ ಕರ್ತೆಲ್ಯಾ ಹರ್ ದಾದ್ಲ್ಯಾ ಆನಿ
ಸ್ತ್ರಿಯೆಕ್ ವ್ಯಾಯಮ್ ಗರ್ಜೆಚೆಂ. ದಫ್ತರಾಂತ್ ಬಸುನ್
ವಾವ್ರ್ ಕರ್ಚ್ಯಾಂಕ್, ಹರ್ ಲ್ಹಾನ್-ವ್ಹಡ್ ಪಯ್ಣಾಕ್ ವಾಹನ್
ವರ್ತೆಲ್ಯಾಂಕ್ ವಾ ವಾಹನಾಂ ನಾಸ್ತಾಂ ಹೆವ್ಶಿಂ-ತೆವ್ಶಿಂ
ವಚನಾತ್‍ಲ್ಲ್ಯಾಂಕ್ ಕುಡಿಚ್ಯಾ ಜೆರಾಲ್ ಭಲಾಯ್ಕೆಚ್ಯಾ
ನದ್ರೆನ್ ವ್ಯಾಯಮ್ ಜಾಯ್.
• ಕುಡಿಚೆಂ ವಜನ್
ಸಾಧಾರ್ಣ್ ಮಿತಿಪ್ರಾಸ್ ಚಡ್ ಆಸುನ್ ದಾದ್ಲ್ಯಾಂಕ್ ಪೋಟ್
ವಾಡೊಂಕ್ ಧರ್ಲಾಂ ಆನಿ ಸ್ತ್ರಿಯಾಂಕ್ ಪಾಂಯಾಚ್ಯಾ
ಪೊಟ್ರಾಂನಿ ಆನಿ ಕುಲ್ಯಾಂಚೆರ್ ಚರಬ್ ಜಮುನ್ ಮೊಟಾಯೆಚಿಂ
ಖುಣಾಂ ದಿಸುನ್ ಯೆತಾತ್ ತರ್, ವ್ಯಾಯಮ್ ಖಂಡಿತ್ ಗರ್ಜ್.
• ಪ್ರಾಯ್ ಚಾಳಿಸಾಂಕ್
ಲಾಗ್ಗಿಂ ಜಾಲಿ ಆನಿ ಹ್ಯಾ ಸಾಂಗಾತಾ ಮಧ್ಯಮ್ ಪ್ರಾಯೆಚೆ
ಪಿಡಾ ಜಾವ್ನಾಸ್‍ಲ್ಲೆ ಡಯಾಬೆಟಿಸ್ ಸುರು ಜಾಲಾಂ,
ರಗ್ತಾದಾಬ್ (ಬ್ಲಡ್ ಪ್ರೆಶ್ಶರ್) ಚಡ್ಲಾ, ರಗ್ತಾಂತ್
ಕೊಲೆಸ್ಟ್ರೋಲ್ ಚಡ್ಲಾಂ ತರ್ ಫಕತ್ ಚಿಕಿತ್ಸಾ ಆನಿ ಪೋತ್
ಪಾವಾನಾ. ಹೆ ತೀನ್‍ಯಿ ಸಮಸ್ಸೆ ಸಾಂಗಾತಾ ಆಸ್ಲ್ಯಾರ್
ಮಾತ್ರ್ ವ್ಯಾಯಮ್ ನಾ ತರ್ ನಾಕಾ ಮ್ಹಣ್ ನ್ಹಯ್. ಹರ್
ಪ್ರತ್ಯೇಕ್ ಸಮಸ್ಸೊ ಆಸ್ಲ್ಯಾರ್‍ಯಿ ವ್ಯಾಯಮ್ ಗರ್ಜೆಚೆಂ.
ಆಜ್ ಕಾಲ್ ತೀಸ್-ಪಾಂಚ್ತೀಸ್ ಜಾತಾನಾ ಹೆ ಸಮಸ್ಸೆ ಚಡ್
ಪಳೆಂವ್ಕ್ ಮೆಳ್ತಾತ್.
• ಡಯಾಬೆಟಿಸ್, ಬ್ಲಡ್
ಪ್ರೆಶ್ಶರ್ ಚಡ್ಚೊ, ಕಾಳ್ಜಾಂತ್ ರಗ್ತಾ ಚಲವ್ಣೆಕ್ ಆಡ್ಕಳ್,
ಪೆಂಕಾಟ್ ಆನಿ ಪಾಂಯಾಚ್ಯೊ ಗಾಂಟಿ ಝರುನ್ ವೆಚೆಂ ಅಸಲ್ಯಾ
ಜಾಯಿತ್ತ್ಯಾ ಆತಾಂಚ್ಯಾ ಮಿಜಾಸ್ಕೆಚ್ಯಾ(diseases
of sophistication) ಪಿಡೆಂಕ್ ಪಯ್ಸ್ ದವರುಂಕ್
ನಿಯಮಿತ್ ವ್ಯಾಯಮಾ ತಿತ್ಲಿ ಸಲೀಸಾಯೆಚಿ ವಾಟ್ ದುಸ್ರಿ ನಾ.
• ಮಧ್ಯಮ್ ಪ್ರಾಯೆ
ಉಪ್ರಾಂತ್ ಕುಡಿಂತ್ ಸುಡ್ಸುಡಾಯ್ ಆನಿ ಮತಿಕ್ ಚುರುಕಾಯ್
ರಾಕುನ್ ವ್ಹರುಂಕ್ ವ್ಯಾಯಮ್ ಬರೆಂ. ಮಿತಿನ್ ಖಾಣ್ ಆನಿ
ನಿಯಮಿತ್ ವ್ಯಾಯಮ್ ಕೆಲ್ಲ್ಯಾನ್ ಪ್ರಾಯ್ ಉತ್ರೊನ್
ವೆತನಾಂಯ್ ತರ್ನಾಟ್ಪಣ್ ಸಾಂಬಾಳ್ಯೆತ್.
• ಶೆತಾಂತ್ ವಾ
ಭಾಟಾಂನಿ ಭೊರಾಚೆಂ ಕಾಮ್ ಕರ್ತೆಲ್ಯಾಂಕ್, ಕುಡಿಕ್ ಚಡ್
ಭೊರ್ ಪಡ್ಚೆ ತಸಲೆಂ ಹೆರ್ ಕಾಮ್ ಕರ್ತೆಲ್ಯಾಂಕ್ ಜೆರಾಲ್
ಥರಾನ್ ಹೆರ್ ವ್ಯಾಯಾಮ್ ನಾಕಾ.
• ಇಸ್ಕೊಲಾಕ್ ವೆಚ್ಯಾ
ಭುರ್ಗ್ಯಾಂಕ್, ಇಸ್ಕೊಲಾಂನಿ ಖೆಳುಂಕ್ ಆನಿ ಕುಡಿಚ್ಯಾ
ವ್ಯಾಯಮಾಕ್ ಅವ್ಕಾಸ್ ಆಸಾ ತರ್ ತಾಂಕಾಂಯ್ ಚಡಿತ್ ವ್ಯಾಯಮ್
ನಾಕಾ. ಪೂಣ್ ತಾಂಚ್ಯಾಯ್ ಕುಡಿಚಿ ಜಡಾಯ್ ಚಡ್ ಆಸಾ ತರ್
ವ್ಯಾಯಮ್ ಗರ್ಜ್. ಆಜ್‍ಕಾಲ್ ಜಾಯಿತ್ತ್ಯಾ ಘರಾಂನಿ
ಭುರ್ಗ್ಯಾಂಚಿ ಮೊಟಾಯ್ ಮಿತಿಪ್ರಾಸ್ ಚಡ್ ಆಸ್ತಾ. ಅಸಲ್ಯಾ
ಭುರ್ಗ್ಯಾಂಕ್ ವೆಳಾರ್ ವ್ಯಾಯಮ್ ಕರುಂಕ್ ಪ್ರೇರಣ್ ದೀಜೆ.
ತರ್ನೆ ಪ್ರಾಯೆರ್‍ಚ್ ಕುಡಿಚಿ ಮೊಟಾಯ್ ಸಾಂಬಾಳಿನಾ ತರ್
ಉಪ್ರಾಂತ್ ದೊಶಿ ಜಾವ್ಯೆತಾ.
ವ್ಯಾಯಮ್ ಖಂಯ್ಚ್ಯಾ ಥರಾಚೆಂ?
ಚಲ್ಚೆಂ, ಉದ್ಕಾಂತ್
ಉಪೆಂವ್ಚೆಂ, ಸಾಯ್ಕಲ್ ಸವಾರಿ, ಹಳ್ತಾನ್ ಧಾಂವ್ಚೆಂ ವಾ
ಜೊಗ್ಗಿಂಗ್, ಎಕಾಚ್ ಸುವಾತೆರ್ ರಾವುನ್ ಕರ್ಚೆಂ ಎರೋಬಿಕ್
ವ್ಯಾಯಮ್ ಅಸಲಿಂ ಸಭಾರ್ ಥರಾಚಿಂ ವ್ಯಾಯಮಾಂ ಆಸಾತ್. ಹ್ಯಾ
ಪಯ್ಕಿಂ ಚಲ್ಚೆಂ ಚಡ್ ಜಣಾಂಕ್, ಸಲೀಸಾಯೆನ್ ಕರುಂಕ್ ಸಾಧ್ಯ್
ಆಸ್ಚೆಂ ವ್ಯಾಯಮ್. ತರ್ನ್ಯಾ ಆನಿ ಮಧ್ಯಮ್ ಪ್ರಾಯೆಚೆರ್
ಶಟ್ಲ್, ಬ್ಯಾಡ್ಮಿಂಟನ್, ವೊಲಿಬೊಲ್ ತಸಲೆ ಖೆಳ್ ಸದಾಂಯ್
ನಿಯಮಿತ್ ಥರಾನ್ ಖೆಳುಂಕ್ ಸಾಧ್ಯ್ ಜಾಲ್ಯಾರ್ ಬರೆಂ. ಪೂಣ್
ಅಸಲೆ ಖೆಳ್ ಎಕೆಕ್ಲ್ಯಾನ್ ಖೆಳುಂಕ್ ಜಾಯ್ನಾಂತ್ ಆನಿ
ಸಕ್ಡಾಂಕ್ ಹೆ ಖೆಳ್ ಸಾಧ್ಯ್‍ಯಿ ಜಾಯ್ನಾಂತ್.
ಜೊಗ್ಗಿಂಗ್ ಆನಿ ಚಲ್ಚೆಂ
ವ್ಯಾಯಮ್ ಕೊಣಾಯ್ಕ್‍ಯಿ ಕರುಂಕ್ ಸಾಧ್ಯ್ ಆಸಾ. ಹ್ಯಾ ಪಯ್ಕಿಂ
ಹಳ್ತಾನ್ ಧಾಂವ್ಚೆಂ ವಾ ಜೊಗ್ಗಿಂಗ್ ಕರ್ಚೆಪ್ರಾಸ್ ಚಲ್ಚೆಂ
ಬರೆಂ. ಕಾಳ್ಜಾಚೊ ಸಮಸ್ಸೊ ಆಸ್‍ಲ್ಲ್ಯಾಂಕ್, ಜೊಗ್ಗಿಂಗ್
ಕೆಲ್ಲ್ಯಾನ್ ಕಾಳ್ಜಾಘಾತ್ ಜಾಲ್ಲೆ ದಾಕ್ಲೆ ಆಸಾತ್.
ಜೊಗ್ಗಿಂಗ್ ಕೆಲ್ಲ್ಯಾನ್ ದೊಂಪ್ರಾಚೆ ಗಾಂಟಿಚೆರ್ ಚಡ್ ಭೊರ್
ಪಡ್ತಾ ಆನಿ ತ್ಯೊ ವೆಗ್ಗಿಂ ಝರುಂಕ್ ಸಾಧ್ಯ್ ಆಸಾ.
ಮೆಂದ್ವಾ ಆನಿ ಶಿರಾಂಚ್ಯಾ ಭಲಾಯ್ಕೆಕ್:
ಚಲ್ಚೆಂ ವ್ಯಾಯಮ್
ಕೆಲ್ಲೆವರ್ವಿಂ ಮೆಂದ್ವಾ ಥಾವ್ನ್ ಆನಿ ಮೆಂದ್ವಾವಾಲಿ (spinal
cord)ಥಾವ್ನ್
ಎಂಡೋರ್ಫಿನ್ ಮ್ಹಳ್ಳಿ ವಸ್ತ್ ತಯಾರ್ ಜಾತಾ ಆನಿ ಹೆ ವರ್ವಿಂ
ಮೆಂದ್ವಾಕ್ ಸುಶೇಗ್ ಮೆಳ್ತಾ, ಮತಿಚೊಉದ್ವೇಗ್ (anxiety)
ಉಣೊ ಜಾತಾ, ಮತಿಚಿ ಸುಕ್ತಿ ನಿವಾರ್ತಾ. ಸಮಸ್ಸ್ಯಾಂಚ್ಯಾ
ಸಂದ್ರಪಾಂನಿ ಆಶಾವಾದ್ (optimistism)
ಉಬ್ಜುಂಕ್ ಕುಮಕ್ ಜಾತಾ. ಮೆಂದ್ವಾಕ್ ಬರೆಂ ಆಮ್ಲ್‍ಜನಕ್
ಲಾಭ್‍ಲ್ಲ್ಯಾನ್ ಉಡಾಸಾಚಿ ಸಕತ್ ವಾಡ್ತಾ, ಕ್ರಿಯಾತ್ಮಕ್
ಜಾವ್ನ್ ಚಿಂತುಂಕ್ ಆಧಾರ್ ಜಾತಾ. ಧುಮ್ಟಿ, ಸೊರೊ ಆನಿ ಹೆರ್
ಹೊಂದೊವ್ಣಿ ಹಾಡ್ಚ್ಯಾ ವಸ್ತುಂ ಥಾವ್ನ್ ಸುಟ್ಕಾ ಲಾಭೊಂಕ್
ಚಲ್ಚೆಂ ವ್ಯಾಯಮ್ ಸಹಕಾರ್ ಜಾವ್ಯೆತಾ.
ಜೆರಾಲ್ ಭಲಾಯ್ಕೆಚೆರ್ ಪ್ರಭಾವ್:
ವ್ಯಾಯಮಾಂವರ್ವಿಂ
ಪಿಡೆಂ ವಿರೋಧ್ ಝುಜ್ಚಿ ಕುಡಿಚಿ ಸಕತ್ (immune
system)
ಚಡ್ತಾ. ಹ್ಯಾ ವರ್ವಿಂ ಬೆಕ್ಟಿರಿಯಾಂ ವಾ ವೈರಸಾಂ ಥಾವ್ನ್
ಯೆಂವ್ಚ್ಯಾ ಪಿಡೆಂ ವಿರೋಧ್ ನೈಸರ್ಗಿಕ್ ಸಕತ್ ಆಸ್‍ಲ್ಲ್ಯಾನ್
ಜಾಯಿತ್ತ್ಯೊ ಪಿಡಾ ಯೆಂವ್ಚ್ಯೊ ಉಣೆ ಜಾತಾತ್ ಆನಿ ಪಿಡಾ
ಆಯ್ಲ್ಯಾರ್‍ಯಿ ವೆಗ್ಗಿಂ ಗೂಣ್ ಜಾವ್ಯೆತಾ.
ವ್ಯಾಯಮಾಂವರ್ವಿಂ ಹಾತ್,
ಪಾಂಯ್, ಪೆಂಕಾಟ್ ಆನಿ ಕುಟಾಚೆ ಮಾಸಾಳ್ ಭಾಗ್ ಭಲಾಯ್ಕೆವಂತ್
ಜಾವ್ನ್ ಹ್ಯಾ ಮಾಸಾಳ್ ಭಾಗಾಂಚೊ ಮೇಳ್ ಬರೊ ಜಾಲ್ಲ್ಯಾನ್
ಬಸ್ಚ್ಯಾ ಆನಿ ಚಲ್ಚ್ಯಾ ರಿತಿಂತ್ (posture)
ಸುಧ್ರಾತಾ. ಹ್ಯಾ ಸಾಂಗಾತಾ ಪೆಂಕ್ಟಾದುಕಿ ತಸಲೆ ಸಮಸ್ಸೆ
ಯೇನಾಂತ್ ವಾ ಆಸ್‍ಲ್ಲೆಯ್ ವೆಗ್ಗಿಂ ಗೂಣ್ ಜಾತಾತ್.
ವ್ಯಾಯಾಮಾವರ್ವಿಂ ಹಾಡಾಂ
ಭಿತರ್ಲ್ಯಾ ಘಟ್ ಭಾಗಾಚೊ ಪ್ರಮಾಣ್ ಚಡ್ತಾ ಆನಿ ಹಾಡಾಂ ಚಡ್
ಭಲಾಯ್ಕೆಭರಿತ್ ಜಾತಾತ್. ಹಾಡಾಂ ಸುರೆಂವ್ಚೊ ವಾ ಅಸ್ಕತ್ (osteoporosis)
ಜಾಂವ್ಚೊ ಸಮಸ್ಸೊ ಸದಾಂ ವ್ಯಾಯಮ್ ಕೆಲ್ಲ್ಯಾಂಥಂಯ್ ನಾಂಚ್
ಮ್ಹಣ್ಚೆ ತಿತ್ಲೊ ಉಣೊ.
ಕುಡಿಚಿ ಜಡಾಯ್ ಉಣಿ ಕರುಂಕ್:
ಕುಡಿಚಿ ಜಡಾಯ್ ಉಣಿ
ಕರುಂಕ್ ಖಾಣಾಂತ್ ಪೋತ್ ಆನಿ ಚಲ್ಚೆ ತಸಲೆಂ ವ್ಯಾಯಮ್
ವಿಶೇಸ್ ಆಧಾರಾಚೆಂ. ಕುಡಿಚಿ ಮೊಟಾಯ್ ಉಣಿ ಕರುಂಕ್
ಕಿತ್ಲ್ಯಾ ವೆಗಾನ್ ಚಲ್ತಾಯ್ ಮ್ಹಳ್ಳೆಪ್ರಾಸ್ ಕಿತ್ಲೆ
ಪಯ್ಸ್ ಚಲುನ್ ವೆತಾಯ್ ತೆಂ ಗರ್ಜೆಚೆಂ. ಥೊಡಿಂಚ್ ಮಿನುಟಾಂ
ವೆಗಾನ್ ಮಟ್ವಿ ವಾಟ್ ಚಲುನ್ ವೆಚೆಪ್ರಾಸ್, ಹಳ್ತ್ ವೆಗಾನ್
ಲಾಂಭ್ ವಾಟ್ ಚಲ್ಚೆಂ ಬರೆಂ. ಅಶೆಂ ಸದಾಂಯ್ ಚಲ್‍ಲ್ಲ್ಯಾನ್
ಮಾತ್ರ್ ಮೊಟಾಯ್ ಉಣಿ ಜಾತಾ. ಖಂಯ್ ಅಪ್ರೂಪ್ ಧಾ-ಪಂದ್ರಾ
ಮಿನುಟಾಂ ಪುರಾಸಣ್ ಜಾತಾ ಪರ್ಯಾಂತ್ ಚಲ್‍ಲ್ಲ್ಯಾನ್
ಕುಡಿಚ್ಯಾ ವಜನಾಚೆರ್ ಪ್ರಭಾವ್ ಆಸ್ಚೊ ನಾ.
ಕಾಳ್ಜಾಚೆ ಭಲಾಯ್ಕೆಕ್:
ಪ್ರಾಯ್ ಉತ್ರೊನ್
ಯೆತನಾ ಕಾಳ್ಜಾಚಿ ಕಾಮ್ ಕರ್ಚಿ ಸಕತ್‍ಯಿ ಅಸ್ಕತ್ ಜಾಯಿತ್ತ್
ಯೆತಾ. ಚಾಳೀಸ್ ವರ್ಸಾಂಚೆ ಪ್ರಾಯೆ ಉಪ್ರಾಂತ್, ಬಸುನ್
ವಾವ್ರ್ ಕರ್ತೆಲ್ಯಾಂಚೆಂ ಕಾಳಿಜ್ ಹರ್ ವರ್ಸಾಕ್ 1-2%
ತಿತ್ಲೆಂ ಅಸ್ಕತ್ ಜಾಯಿತ್ತ್ ಯೆತಾ. ಕಿತೆಂಚ್ ವ್ಯಾಯಮ್
ಕರಿನಾತ್‍ಲ್ಲ್ಯಾ ವ್ಯಕ್ತಿಕ್ 50 ವರ್ಸಾಂ ಜಾತಾನಾ ತಾಚೆಂ
ಕಾಳಿಜ್ 15-20% ಅಸ್ಕತ್ ಜಾಲ್ಲೆಂ ಆಸ್ತಾ. ಚಲ್ಚೆಂ
ವ್ಯಾಯಮ್ ಕೆಲ್ಲ್ಯಾನ್, ಕಾಳ್ಜಾಚ್ಯಾ ಮಾಸಾಂಕ್ ಶಾಬೀತ್
ದವರ್ಚೆ ಎನ್‍ಜಾಯ್ಮ್ ಚಡ್ ತಯಾರ್ ಜಾತಾತ್ ಆನಿ ಕಾಳ್ಜಾಚಿ
ಸಕತ್ ಬರಿ ಉರ್ತಾ. ಹ್ಯಾ ವರ್ವಿಂ ಕಾಳ್ಜಾಚೆರ್ ಪಡ್ಚೊ ಭೊರ್
ಉಣೊ ಜಾತಾ ಆನಿ ಕಾಳ್ಜಾಘಾತ್ ಜಾಂವ್ಚೆ ಸಂದ್ರಾಪ್‍ಯಿ ಉಣೆಂ
ಜಾತಾತ್.
ವ್ಯಾಯಮ್ ಕೆಲ್ಲ್ಯಾನ್
ರಗ್ತಾನಳಿಯೆಂಚೆ ಮಾಸಾಳ್ ಭಾಗ್ ಭಲಾಯ್ಕೆನ್ ಆಸುನ್ ಕುಡಿಂತ್
ರಗ್ತಾಚಲವ್ಣಿ ಬರ್ಯಾನ್ ಜಾಯಿತ್ತ್ ಆಸ್ತಾ. ಪ್ರತ್ಯೇಕ್
ಜಾವ್ನ್ ಚಲ್ಚೆ ತಸಲೆಂ ವ್ಯಾಯಮ್ ಕೆಲ್ಲ್ಯಾನ್
ಹಾತಾಂ-ಪಾಂಯಾಚೆ ರಗ್ತಾನಳ್ ಅಶೀರ್ ಜಾಂವ್ಚೊ ಸಮಸ್ಸೊ ಉಣೊ
ಜಾತಾ. ಚಲ್ತನಾ ಪಾಂಯಾಚೆ ಮಾಸಾಳ್ ಭಾಗ್ ಪಂಪಾಪರಿಂ ಕಾಮ್
ಕರ್ತಾತ್ ಆನಿ ರಗ್ತಾಚಿ ಚಲವ್ಣಿ ಸುಡ್ಸುಡಾಯೇನ್ ಜಾಂವ್ಕ್
ಆಧಾರ್ ಜಾತಾತ್.
ಮಧ್ಯಮ್ ಪ್ರಾಯೆ
ಉಪ್ರಾಂತ್ ಕಾಳ್ಜಾಚ್ಯಾ ಮಾಸಾಳ್ ಭಾಗಾಂಕ್ ರಗ್ತಾ ಚಲವ್ಣಿ
ಸುಧ್ರೊವ್ನ್, ಕಾಳ್ಜಾಘಾತ್ ಜಾಯ್ನಾಶೆಂ ರಾಕ್ಚ್ಯಾಂತ್,
ಕಾಳ್ಜಾನ್ ಭೊರಾಚ್ಯಾ ಸಂದ್ರಪಾಂನಿ ಚಡ್ ಸಕ್ತೆನ್ ಆಪ್ಲೆಂ
ಕಾಮ್ ಕರಿಶೆಂ ಕಾಳ್ಜಾಚಿ ಸಕತ್ ಚಡಂವ್ಚ್ಯಾಂತ್ ಚಲ್ಚ್ಯೆ
ತಸಲ್ಯಾ ವ್ಯಾಯಮಾಚೊ ಪಾತ್ರ್ ಮಹತ್ವಾಚೊ.
ಚಲ್ಚೆಂ ಸದಾಂಯ್ ಜಾಂವ್:
ಭಲಾಯ್ಕೆಚ್ಯಾ
ಜಾಯಿತ್ತ್ಯಾ ಸಮಸ್ಸ್ಯಾಂಕ್ ಸದಾಂ ವ್ಯಾಯಮ್ ಬರೆಂ
ಮ್ಹಳ್ಳ್ಯಾಂತ್ ಕಸಲೊಚ್ ದುಭಾವ್ ನಾ. ಚಲ್ಚೆಂ ವೆಳಾಚೊ
ವಿಭಾಡ್ ನ್ಹಯ್ ಬಗಾರ್ ಭಲಾಯ್ಕಿ ರಾಕುಂಕ್ ಆನಿ ಆವ್ಕ್
ಚಡೊಂವ್ಕ್ ಭೋವ್ ಗರ್ಜೆಚೆಂ ಸಾಧಾನ್ ಮ್ಹಣ್ ಮಾನುನ್ ಘೆಜೆ.
* ಚಲ್ಚ್ಯಾ ತಶೆಂ ಹೆರ್
ವ್ಯಾಯಮಾಂನಿ ಭೋವ್ ಗರ್ಜೆಚೆಂ ಮ್ಹಳ್ಯಾರ್ ಹರ್ ದಿಸಾ
ಚುಕನಾಸ್ತಾಂ ವ್ಯಾಯಮ್ ಕರ್ಚೆಂ. ಭಲಾಯ್ಕಿ ಬರಿ ಆಸಾ ಆನಿ
ಪ್ರಾಯ್ ತೀಸ್-ಚಾಳಿಸಾಂ ಭಿತರ್ ತರ್ ಸುರ್ವಾತೇರ್‍ಚ್
ಅರ್ಧೆಂ-ಮುಕ್ಕಾಲ್ ವೋರ್ ಚಲ್ಯೆತ್ ಆನಿ ಹಳ್ತಾನ್ ಚಲ್ಚೊ
ವೇಗ್ ತಶೆಂ ಚಲ್ಚ್ಯಾ ವಾಟೆಚಿ ಲಾಂಬಾಯ್ ಚಡೊವ್ನ್ ವಚ್ಯೆತ್.
ದಿಸಾಕ್ ಸುಮಾರ್ ಎಕ್ ವೋರ್ ಭರ್ ವೆಗಾನ್ ಚಲ್ಚೆಂ
ಭಲಾಯ್ಕೆಕ್ ಬರೆಂ.
* ಪ್ರಾಯ್ ಚಡ್ ಜಾಲ್ಯಾ
ಆನಿ ಭಲಾಯ್ಕಿ ವಿಶೇಸ್ ಬರಿ ನಾ ತರ್ ಸುರ್ವಾತ್
ಪಂದ್ರಾ-ವೀಸ್ ಮಿನುಟಾಂ ಚಲ್ಚೆ ಥಾವ್ನ್ ಸುರು ಕರ್ನ್
ಹಳ್ತಾನ್ ಚಲ್ಚಿ ವಾಟ್ ಲಾಂಬಾವ್ನ್ ವಚ್ಯೆತ್. ವೆಗಾನ್
ಚಲುಂಕ್ ಜಾಯ್ನಾಂ ತರ್ ಪರ್ವಾ ನಾ. ಹಳ್ತಾನ್, ಹರ್ ದೀಸ್
ಚಲ್ಚೆಂ ಭಲಾಯ್ಕೆಕ್ ಬರೆಂ.
* ದಿಸಾಚ್ಯಾ
ಖಂಯ್ಚ್ಯಾಯ್ ವೆಳಾಚೆರ್ ಚಲ್ಯೆತಾ. ಪೂಣ್ ಸಕಾಳಿಂ ನಿರಾಳ್
ಪೊಟಾಚೇರ್ ಚಲ್ಲ್ಯಾರ್ ಚರಬ್ ಕರ್ಗೊನ್ ಮೊಟಾಯ್ ಜಿರೊಂವ್ಕ್
ಆಧಾರ್ ಜಾತಾ ಮ್ಹಣ್ ಪಾತ್ಯೆಣಿ ಆಸಾ.
* ಸದಾಂಯ್ ಸಕಾಳಿಂಚ್ಯಾ
ವೆಳಾಚೆರ್ ಚಲ್ಚಿ ಸವಯ್ ಕೆಲ್ಯಾರ್ ತಿ ಏಕ್ ಜಿಣ್ಯೆರೀತ್
ಜಾವ್ನ್ ಉರ್ತಾ. ಸಾಂಜೆರ್ ವಾ ದಿಸಾಚ್ಯಾ ಹೆರ್ ವೆಳಾರ್
ಚಲ್ಯಾಂ ಮ್ಹಣ್ ಯೆವ್ಜನ್ ಕೆಲ್ಯಾರ್, ತೆಂ ಚುಕುನ್ ವೆಚಿ
ಸಾಧ್ಯತಾಯ್ ಚಡ್. ಕಿತೆಂ ನಾ ಕಿತೆಂ ಆಡ್ಕಳ್ ಯೆಂವ್ಚ್ಯೊ
ಸಾಧ್ಯತಾಯ್ ಆಸ್ತಾತ್. ಜಾಯಿತ್ತ್ಯಾ ಜಣಾಂಕ್ ಚಲುಂಕ್
ಪಯ್ಲೆಂಚ್ ವಿಶೇಸ್ ಆಸಕ್ತ್ ಆಸಾನಾ. ತಸಲ್ಯಾಂಕ್ ಚುಕೊವ್ನ್
ಕಾಡುಂಕ್ ದಿಸಾಚ್ಯಾ ಹೆರ್ ವೆಳಾರ್ ಸಭಾರ್ ನಿಬಾಂ
ಮೆಳ್ತಾತ್.
( -
ಡಾ|ಎಡ್ವರ್ಡ್ ಎಲ್. ನಜ್ರೆತ್,
ಮಾರ್ಚ್, 2017)
| 
