ಎಕಾ ತೆಂಪಾಧಿಂ ಕುಲ್ಕಾರಾಂಚಿ, ಶೆತ್ಕಾರಾಂಚಿ ಭಾಸ್ ಮ್ಹಣುನ್ ಲೊಕಾಂನಿ ಸಮ್ಜುನ್ ಘೆತ್‌ಲ್ಲಿ ಕೊಂಕ್ಣಿ ಭಾಸ್, ಆಜ್ ಫಕತ್ತ್ ಕುಲ್ಕಾರಾಂಕ್ ಸೀಮಿತ್ ಜಾವ್ನ್ ಉರೊಂಕ್ ನಾ. ಕೊಂಕ್ಣಿ ಉಲಯ್ತಲೊ ಜಾಯ್ತೊ ಲೋಕ್ ಆಜ್ ಶಿಕ್ಪಿ ವರ್ಗಾಂತ್ ಆಸಾ, ಪುಣ್ ಶಿಕ್ಪಾತೆಕಿದ್ ’ಮತಿಚಿ ಪ್ರಗತಿ’ ಜಾಲ್ಲಿಚ್ಚ್ ನಾ. ಆಜ್‌ಯೀ ಚಡ್ತಾವ್ ಲೋಕ್ ’ವಿಚಾರ್‌ವಂತ್ ಚಿಂತ್ಪಾಚೆ ದಿವಾಳೆಂತ್’ ದೀಸ್ ಕಾಡ್ತಾ. ಅಪುಣ್ ಸಮ್ಜಣ್‌ದಾರ್ ಮ್ಹಳ್ಳೆಂ ಮುಖೊಟೆಂ ನ್ಹೆಸ್ತಾ ತರ್‌ಯೀ ತಕ್ಲೆಂತ್ ಭರ್‌ಲ್ಲೆಂ ಶೆಣ್ ಮಾತ್ ತಾಂಚ್ಯಾ ಕರ್ನೆಂಚೆರ್ ಧರ್ ಧರ್ ಮ್ಹಣುನ್ ಕಳ್ತಾ. ಆನಿ ಚಡ್ತಾವ್ ಬರವ್ಪಿ ಸಯ್ತ್ ಹೆಚ್ಚ್ ವರ್ಗಾಂತ್ ಆಸಾತ್, ತಾಂಚ್ಯಾ ಮತಿಚಿ ಸಯ್ತ್ ಪ್ರಗತಿ ಜಾಲ್ಲಿಚ್ಚ್ ನಾ. ಫಕತ್ತ್ ಅಪುಣ್, ಅಪ್ಲೆಂ ಕುಟಾಮ್, ಅಪ್ಲಿ ಆಸ್ತ್-ಬದಿಕ್, ಆಪ್ಲೆ ಈಶ್ಟ್ ಮಂತ್ರ್ ಮ್ಹಳ್ಳ್ಯಾ ಬಾಂಯ್ತ್ ಜಿಯೆತಾತ್. ಕಾಂಯ್ ಯುಗಾಂ ಥಾವ್ನ್ ಆಸ್ಚೊ ಕೊಂಕ್ಣಿ ಭಾಸೆಚೊ ’ಗಿನ್ಯಾನಾಚೊ ಬೊರ್ಗೊಲ್’ ಕಾಂಯ್ ಪಯ್ಸ್ ಜಾಂವ್ಚಿಂ ಖುಣಾಂ ದಿಸೊನ್ ಯೇನಾಂತ್. ಆನಿ ತ್ಯೇ ದಿಶೆನ್ ವಾವ್ರ್ ಕರ್ತಾಂವ್ ಮ್ಹಣುನ್ ದಾಂಗ್ರೊ ಮಾರ್ಚೆ ಸಯ್ತ್ ಎಕಾಮೆಕಾ ವೀಕ್ ವಾಂಟ್ತಾತ್ ಆನಿ ಆಪ್ಲಿ ದಾಳ್ ಶಿಜಂವ್ಚ್ಯಾಂತ್ ಮೆತೆರ್ ದಿಸ್ತಾತ್. ’ದಿವ್ಟಿ’ ಅಸಲ್ಯಾ ಚಿಂತ್ಪಾಚೆರ್ ಕಾಂಯ್ ಥೊಡಿಂ ಉಜ್ವಾಡಾಚಿಂ ಕಿರ್ಣಾಂ ಫಾಂಕಂವ್ಚ್ಯಾ ಇರಾದ್ಯಾನ್ ಆಸಾ ಕೆಲ್ಲೆಂ ಮಿಸಾಂವ್.

8. ಬಾಪುಯ್ ಜಿವಿತಾಚೊ ದಿವೊ [ಜಿಯೋ ಆಗ್ರಾರ್]

ಹರ್ ವ್ಯಕ್ತಿಚೆಂ ಜಿವಿತ್ ಸುರು ಜಾತಾ ಏಕ್ ಆವಯ್ ಏಕ್ ಬಾಪುಯ್ ಥಾವ್ನ್. ಗರ್ಭ್, ಜಲ್ಮ್, ಭುರ್ಗೆಪಣ್, ವಾಡಾವಳ್, ತರ್ನಾಟ್ಪಣ್. ಕಿತ್ಲೆಂ ಫುಡೆಂ ಗೆಲ್ಯಾರ್‌ಯಿ ತ್ಯಾ ವ್ಯಕ್ತಿಕ್ ತೊಚ್ ಬಾಪುಯ್, ತಿಚ್ ಆವಯ್, ಸಂಸಾರಾಂತ್ ರಚ್ನಾರಾಚೆಂ ಪ್ರತಿರೂಪ್ ಆನಿ ಸ್ಥಾನ್ ಜಲ್ಮ್ ದಾತಾರಾಂಕ್ ದಿಲಾಂ ಮ್ಹಣ್ತಾತ್ ತತ್ವ್ ಶಾಸ್ತ್ರೀ.

ಎಕ್ಯೆ ವ್ಯಕ್ತಿಚೆ ವಾಡಾವಳಿಂತ್, ಚಿಂತ್ಪಾಂತ್, ವ್ಯಕ್ತಿತ್ವಾಂತ್ ಹ್ಯಾ ದೊಗಾಂಯ್ಚೊ ಪಾತ್ರ್ ಮಹತ್ತರ್. ಲಿಪ್ತೊ ವ ಉಗ್ತೊ, ತಿಂ ಜಿವಂತ್ ಆಸಾತ್ ವ ನಾ ತರಿ ಪ್ರಭಾವ್‌ಯಿ ವೊರ್ತೊ್. ದೆಶಾಂತ್ ತಶೆಂ ಪಾಶ್ಚಾತ್ಯಾಂತ್ ಹ್ಯಾ ದೊಗಾಂ ಮದೆಂ ಕೋಣ್ ಶ್ರೇಷ್ಟ್, ಆವಯ್ಪಣ್ ವ ಬಾಪಯ್ಪಣ್ ವೊರ್ತೆಂ ಮ್ಹಣ್ ವಾದ್ ವಿವಾದ್, ಸಂಸೋದಾಂ-ಸಂವಾದಾಂ, ತರ್ಕ್-ವಿತರ್ಕಾಂ ಶೆಕ್ಡ್ಯಾಂ ಥಾವ್ನ್ ಜಾತೆ ಆಸಾತ್. ಹರ್ ಪಾವ್ಟಿಂ ಆವಯ್ಪಣಾಕ್ ಮಾನ್, ಗೌರವ್, ಶ್ರೇಷ್ಟತಾ, ತೆಂಕೊ ಆನಿ ಅಂಕ್ ಲಾಭ್ತಾತ್, ಬಾಪಾಯ್ಪಣ್ ಆಪ್ಲೆಪಣ್ ಚಿರ್ಮುಟಾಂವ್ಕ್ ಲಾವ್ನ್ ನಪಂಯ್ಚ್ ಜಾತಾ.

ಏಕ್ ಲೇಖಕ್ ಬರಯ್ತಾ: ಆವಯ್ ಮೊಗಾಚೆಂ ಭಂಡಾರ್, ದೆವಾಚೆಂ ಪ್ರತಿರೂಪ್, ತ್ಯಾಗಾಚೆಂ ಪ್ರತೀಕ್, ಸಮ್ಜಣೆಚೆಂ ತುಫೆಂ, ಬದ್ಲುಂಕ್, ಮೊಲಾಂವ್ಕ್, ವಿಕುಂಕ್ ವ ಘೆಂವ್ಕ್ ಅಸಾಧ್ಯ್ ತಸಲೆಂ ವಜ್ರ್, ಆವಯ್ಪಾಣಾ ವಯ್ರ್ ಲೆಖಕಾಚ್ಯಾ ಭೊಗ್ಣಾಂಕ್ ಮಾನ್ ಭಾಗಯ್ತಾಂ.

ತ್ಯಾಚ್ ಆವಯ್ ಸ್ಥಾನಾರ್ ಆಸ್ಚಿ ಸ್ತ್ರೀ ಆಜ್ ಸಗ್ಳಿ ಪ್ರಕೃತಿ ಆಪ್ಣಾಚೆರ್ ದವರ್ನ್ ಆಸ್ಚ್ಯಾ ಭರ್ವಸ್ಯಾಕ್ ಕಿತ್ಲೆಂ ಸಾಂಬಾಳ್ತಾ? ಆವಯ್ಪಣಾಕ್ ಕುರಾಡ್ ಮಾರ್ಚಿಥ, ಆವಯ್ಪಣಾಕ್ ಅವ್ಮರ್ಯಾದ್ ಹಾಡ್ಚಿ, ಆವಯ್ಪಣಾಚ್ಯಾ ಪವಿತ್ರಪಣಾಕ್ ವಿಕ್ರ್ಯಾಕ್ ಘಾಲ್ಚಿಂ ಕಿತ್ಲಿಂ ಘಡಿತಾಂ ವಾಚ್ಪ್ಯಾಂಕ್ ಜಾಯ್? ಹೆಂ ಖಂಡಿತ್ ಜಾವ್ನ್ ಸ್ತ್ರೀಯೆಕ್ ಲಾಬ್ಲ್ಯೆಲ್ಯಾ ಸ್ವತಂತ್ರಾಚೊ ದುರುಪಯೋಗ್, ಸ್ವೇಚ್ಚಾಚಾರ್ ಜಿಣಿ, ಕ್ಷಣಿಕ್ ಸುಖ್. ಆಪ್ಲ್ಯಾ ಸಂಯ್ಬಿಕ್ ಭೊಗ್ಣಾಚೆರ್ ನಿಯಂತ್ರಣ್ ನಾಸ್ತಾಂ ಕೂಡ್ ವಿಕ್ಚೊ ದಂದೊ, ಬಾಡ್ಯಾಕ್ ಆವಯ್ಪಣ್, ಲಗ್ನಾ ಸಾಕ್ರಾಮೆಂತಾ ಭಾಯ್ರ್ ಅನ್ಯ್ ಸಂಬಂಧ್... ಉಪ್ರಾಂತ್? ಕಸಲೆಂ ಜಿವಿತ್? ಗರ್ಜೆಕ್ ಗಳ್ಸಿ, ಮರ್ಜೆಕ್ ಮಸ್ತಿ. ಉಪ್ರಾಂತ್ ಗರ್ಭ್ ಅಪವಿತ್ರ್... ಮೊಗಾ ಉಬೆಂತ್ ಜಲ್ಮೊಂಚ್ಯಾ ಬಾಳ್ಕಾಚಿ ಖುನ್, ಗರ್ಭಪಾತ್... ಅಶೆಂ ಪಟ್ಟಿ ಲಾಂಬ್ತಾ.

ಹ್ಯಾ ಖಠೋರ್ ಘಡಿತಾಂನಿ ಕಾಂಯ್ ಫಕತ್ ಸ್ತ್ರಿಯೊ ಮಾತ್ರ್ ಭಾಗಿದಾರ್ ನ್ಹಯ್. ಖಂಯ್ ಆಸಾತ್ ಆಮ್ಚೆ ದಾದ್ಲೆ ಜೆಂ ಬಾಪಯ್ಪಣ್ ಪ್ರಸ್ತುತ್ ಕರ್ತಾತ್ ತೆ?

ಆಜ್ ಏಕ್ ಗಂಭೀರ್ ಸವಾಲ್ ಸಮಾಜೆಂತ್ ಉಬೆಂ ಆಸಾ. ಕಿತ್ಯಾಕ್ ಆಮ್ಚೆ ದಾದ್ಲೆ ಪಿಗ್ಳಾಲ್ಯಾತ್ ? ಖಂಯ್ ಲಿಪ್ಲಾಂ ಆಮ್ಚ್ಯಾ ದಾದ್ಲ್ಯಾಚೆಂ ಬಾಪಾಯ್ಪಣ್? ಬಾಪಯಾಂಚಿ ಜವಾಬ್ದಾರಿ ಕೊಣೆಂ ವೊಡುನ್ ಘೆತ್ಲ್ಯಾ ? ಕಾಂಯ್ ಆಮ್ಚ್ಯಾ ಸಮಾಜೆಚ್ಯಾ ದಾದ್ಲ್ಯಾಂಕ್ ಕೊಣೆಂ ತರಿ ವಂಚಿತ್ ಕೆಲಾಂ?

ಬಾಪಾಯಾಂನಿ ಜಾಯ್ತೆಂ ಶಿಕೊಂಕ್ ಆಸಾ

ಆಯ್ಚಿ ಸಮಾಜ್ ತಾಂತ್ರಿಕ್ ಯುಗಾಂತ್ಲ್ಯಾನ್ ಪಾಶಾರ್ ಜಾತಾ. ಜೋಡ್ ಆನಿ ಮೊಡ್, ತ್ಯಾಚ್ ಖಾತಿರ್ ಪಯ್ಶಾಂಚಿ ವೋಡ್. ಹ್ಯಾ ಪರಿಗತೆಂತ್ ದಾದ್ಲೊಯಿ ಘೊಳ್ತಾ, ಸ್ತ್ರಿಯಿ ಜೊಡ್ತಾ. ದಾದ್ಲೊ ಸ್ತ್ರಿಯೆ ಪ್ರಾಸ್ ಏಕ್ ಮೇಟ್ ಊಂಚ್ ಆಸೊಂಕ್ ಸರ್ಕಸ್ ಕರ್ತಾಪ. ಪೂಣ್ ಸ್ತ್ರಿಯೆಕ್ ಆಸ್ಚೆ ಆವ್ಕಾಸ್, ಆಧಾರ್, ಜೋಡ್ ದಾದ್ಲ್ಯಾಕ್ ಬೋವ್ ಲ್ಹಾನ್ ಕರ್ತಾ. ಮೆಟ್ರೊ ಶಹರಾಂನಿ ಐಟಿ/ಬಿಟಿ ಕಂಪೆನಿಂತ್ ಜೊಡ್ಚ್ಯಾ ಯುವ ಪಂಗ್ಡಾ ವಿಶಿಂ ಕೆಲ್ಲಿ ಸಮಿಕ್ಷಾ ಸಾಂಗ್ತಾ ದಾದ್ಲೆ 88 ಕಾರಣಾಂ ಖಾತಿರ್ ಸ್ತ್ರಿಯೆಚ್ಯೆ ಮುಟಿ ಭಿತರ್ ಆಸಾತ್ ಖಂಯ್. ತ್ಯಾ ಖಾತಿರ್ ಸವ್ಕಾಸ್ ದಾದ್ಲೆ ಆಪ್ಲೆಂಪಣ್ ಹೊಗ್ಡಾಯ್ತೆ ಆಸಾತ್. ಹೆಂ ಸಾಮಾನ್ಯ್ ಪಂಗ್ಡಾಕ್, ಹೆರ್ ಶಹರ್ ಆನಿ ಗಾಂವಾಕೀ ವಿಸ್ತಾರ್ಲಾಂ. ‌

ತೊ ಏಕ್ ಸನ್ವಾರ್. ಆಜ್ ರಜಾ. ಆವಯ್ ಬಾಪುಯ್ ದೊಗಾಂಯ್ ಖೂಬ್ ಜೊಡಿರ್ ಆಸಾತ್. ತರ್‌ಯಿ ತಾಂಚೊ ಏಕ್‌ಚ್ ಬಾಳ್ ಆಶಿಷಾಕ್ ಲಾಗಿಂ ಘೆವ್ನ್, ಒಳ್ಕೊನ್ ಮೋಗ್ ವ್ಯಕ್ತ್ ಕರುಂಕ್ ತಾಂಕಾಂ ವೇಳ್ ನಾ ವ ಆಳ್ಸಾಯ್ ಗಾಯ್ ? ಸಗ್ಳೆಂ ಆಸ್ಲ್ಯಾರ್‌ಯಿ ಸ ವರ್ಸಾಂಚ್ಯಾ ಆಶಿಷಾಕ್ ಸಗ್ಳೆಂ ಶೂನ್ಯ್ ತಶೆಂ ಭೊಗ್ತಾಲೆಂ. ಘರ್ ಕಾಮೆಲ್ಯಾಂಚ್ಯಾ ಉಸ್ಕ್ಯಾರ್ ವಾಡ್‌ಲ್ಲೊ ತೊ ಆವಯ್ ಬಾಪಯ್ಚೆ ಪಾಸ್ಳೆಕ್ ರಾಕೊನ್ ಆಸ್‌ಲ್ಲೊ. ವ್ಹಡಿಲಾಂಕ್ ಸಂಸಾರಿಕ್ ಸಂಗ್ತಿಂಕ್ ವೇಳ್ ಆಸ್ಲೊ, ದೀಸ್ ಪರ್ತಾಲೊ. ರಾತಿಂ ನಿದೊಂಕ್ ವೆಚಾ ಆದಿಂ ಬಾಪಾಯ್ಚೊ ಹಾತ್ ಧರ್ನ್ ಬಾಳ್ ಆಶಿಷ್ ವಿಚಾರಿ: “ಮ್ಹಾಕಾ ತುಜ್ಯಾ ಉತ್ರಾಂನಿ ಏಕ್ ದೋನ್ ಕಾಣಿಯೊ ಸಾಂಗ್ ಡಾಡಾ, ಪ್ಲೀಜ್...” ಬಾಪಾಯ್ಕ್ ಕಿತೆಂ ಭೊಗ್ಲೆಂ ಕೋಣ್ ಜಾಣಾಂ. ಸವ್ಕಾಸ್ ಭುರ್ಗ್ಯಾಚ್ಯಾ ಬೆಡ್ ರುಮಾಕ್ ವಚೊನ್ ಕಾಣಿ ಸುರ್ವಾತಿಲಿ. ಏಕ್, ದೋನ್....ಪಾಂಚ್...ಸ.... ಭುರ್ಗೊ ತದೇಕ್ ಜಾವ್ನ್ ಆಯ್ಕಾತ್ತ್ ರಾವ್ಲೊ. ಬಾಪುಯ್ ಚಿಂತಾಂ ಬುಹಶ ಪುತಾಕ್ ನೀದ್ ಆಯ್ಲಿ. ಸವ್ಕಾಸ್ ಉಟೊನ್ ವೆಚ್ಯಾಕ್ ಘುಂವ್ತಾನಾ ಪುತ್‌ಯಿ ಉಟ್ತಾ ಆಪ್ಲ್ಯಾ ಖಟ್ಲ್ಯಾ ಬಗ್ಲೆನ್ ದಿಂಬಿ ಘಾಲ್ನ್ ಬಾಪಯ್ಕಬಡೆ ಮ್ಹಣ್ತಾ, ’ನಿದೊಂಕ್ ವೆಚ್ಯಾ ಪಯ್ಲೆಂ ಮ್ಹಜೆಂ ಮಾಗ್ಣೆಂ ಜಾಯ್ಜೆ ಡಾಡಾ’ ಅನಿ ಸವ್ಕಾಸ್ ತೊ ದಿಂಬ್ಯೆರ್ ಪಡ್ತಾ.

ಬಾಪುಯ್ ಬಾಗ್ಲಾ ಲಾಗಿಂ ರಾವೊನ್ ಪುತಾಚೆಂ ಮಾಗ್ಣೆಂ ಆಯ್ಕಾತಾ, “ದೆವಾ ಮ್ಹಾಜ್ಯಾ ಮೊಗಾಳಾ , ಮ್ಹಾಕಾಯ್ ಡ್ಯಾಡಿಬರಿಂ ವ್ಹಡ್ಲೊ ಮನಿಸ್ ಕರ್. ಡ್ಯಾಡಿ ಬರಿಂ ಮೋಗ್ ಕರ್ಚೆಂ್ ಕಾಳಿಜ್ ದಿ. ಅಸಲೊ ಡ್ಯಾಡಿ ದಿಲ್ಲ್ಯಾಕ್ ಥ್ಯಾಂಕ್ಯೂ...” ಬಾಪಾಯ್ಕ್ ಕಿತೆಂ ಬೊಗ್ಲೆಂ ತೆಂ ವರ್ಣುಂಕ್ ಅಸಾದ್ಯ್. ತೊಯ್ ದಿಂಬ್ಯೆರ್ ಪಡ್ಲೊ. “ ದೆವಾ ಮ್ಹಜ್ಯಾ ಪುತಾನ್ ಚಿಂತ್ಚ್ಯಾ ತಿತ್ಲೊ ವ್ಹಡ್ ಮನಿಸ್ ಮ್ಹಾಕಾ ಕರ್ “ ಮ್ಹಣ್ ಮ್ಹಗಾಲಾಗ್ಲೊ.

ಹರ್ ಭುರ್ಗ್ಯಾಂಕ್ ಆಪ್ಲಿ ಆವಯ್ ವ ಬಾಪುಯ್ ವಿಶಿಂ ಉಂಚ್ಲೆಂ ಚಿಂತಪ್ ಆಸ್ತಾ. ಪೂಣ್ ವ್ಹಡಿಲಾಂ ತ್ಯಾ ಮಾಫಾಕ್ ಕೆನ್ನಾ ವಾಡ್ತಾತ್ . ವ್ಹಡಿಲಾಂನಿ ಭುರ್ಗ್ಯಾಂಕ್ ದಿಂವ್ಚಿ ಶ್ರೇಷ್ಟ್ ಆಸ್ತ್ ಜಾವ್ನಾಸಾ ತಾಂಚ್ಯಾ ಸ್ವಂತ್ ಜಿಣ್ಯೆಚೆಂ ನಿದರ್ಶನ್. ತಾಣಿಂ ಭುರ್ಗ್ಯಾಂಕ್ ಏಕ್ ರೋಲ್ ಮೊಡೆಲ್ ಜಾಯ್ಜೆ. ತೆಂ ಕಶೆಂ, ಕೆದ್ನಾಂ ಕಿತ್ಯಾಕ್ ? ಭುರ್ಗೆಂ ಕಿತೆಂ ಜಾವ್ನ್ ವಾಡಾಜೆ ಮ್ಹಣ್ಚ್ಯಾ ಪ್ರಾಸ್ ತಿಂ ಕಸಲ್ಯಾ ಸ್ಥಿತೆಂತ್ ವಾಗ್ತಾತ್ ತೆಂ ಚಿಂತನ್ ಗರ್ಜೆಚೆಂ. ಸಬಾರ್ ವ್ಹಡಿಲಾಂ ಭುರ್ಗ್ಯಾಂಕ್ ವೊರ್ತ್ಯಾ ಮಾಫಾನ್ ದೆಕ್ತಾತ್. ತಾಂಚೆ ಮದ್ಲ್ಯಾ ಮೊಗಾಚೊ ಭಾಂಧ್ ಕಿತ್ಲೆ ಗೂಂಡ್, ಕಿತ್ಲೊ ಪ್ರಭಾವಿತ್ ಆನಿ ಕಿತ್ಲ್ಯಾ ಸ್ಪಂದನಾಚೊ ತೆಂ ಸಮ್ಜೊಂಕ್ ಜಾಲ್ಲೆಂ ಏಕ್ ನೀಜ್ ಘಡಿತ್ ವಾಚ್ಯಾಂ.

ಕಾಜಾರ್ ಜಾವ್ನ್ ಇಕ್ರಾ ವರ್ಸಾರ ಉಪ್ರಾಂತ್ ತ್ಯಾ ಜೊಡ್ಯಾಕ್ ಏಕ್ ಚೆರ್ಕೊ ಭುರ್ಗೊ ಜಾಲೊ. ವಾಡ್ತಾನಾ ತೊ ತಾಂಚ್ಯಾ ಕಾಳ್ಜಾಚೊ ಕುಡ್ಕೊಚ್ ಜಾಲೊ. ಚಲ್ಯಾಕ್ ದೋನ್ ವರ್ಸಾಯ ಜಾಲ್ಲಿಂ. ಏಕ್ ದೀಸ್ ಸಕಾಳಿಂ ಕಾಮಾಕ್ ವೆಚ್ಯೆ ರಾಟಾವಳಿಂತ್ ದಾದ್ಲ್ಯಾಕ್ ಒಕ್ತಾಚ್ಯಾ ಎಕ್ಯೆ ಬಾಟ್ಲೆಕ್ ದಾಂಖ್ಣೆ ಧಾಂಪುಂಕ್ ವಿಸರ್ ಪಡ್ಲಿ. ಅಫಿಸಾಕ್ ಪಾವ್ತಾಚ್ ಉಡಾಸ್ ಜಾಲೊ. ಬಾಯ್ಲೆಕ್ ಫೋನ್ ಕರ್ನ್ ವಿಷಯ್ ಸಾಂಗ್ಲೊ ಆನಿ ಬಾಟ್ಲಿ ಕಬಾಟಾಂತ್ ದವ್ರುಂಕ್ ಸಾಂಗ್ಲೆಂ. ಸ್ತ್ರೀಯೀ ದೊನ್ಪಾರಾಚ್ಯಾ ಜೆವ್ಣಾಚ್ಯಾ ತಯಾರಾಯೆರ್ ಪಡ್‌ಲ್ಲಿ. ವಿಸ್ರಾಲಿ.

ಭುರ್ಗೊ ಪೊಕ್ರಿಪಣಾಂ ಕರ್ತಿರತ್ ಬಾಟ್ಲೆ ಲಾಗಿಂ ಪಾವ್ಲೊ. ಒಕತ್ ಪಿಯೆಲಾಗ್ಲೊ. ತಾಂತುಂ ಭುರ್ಗ್ಯಾಂಕ್ ಮಾರೆಕಾರ್ ಒಕತ್ ಆಸ್ಲೆಂ. ಘಂಟ್ಯಾ ಉಪ್ರಾಂತ್ ಸ್ತ್ರೀಯೆಕ್ ಇಲ್ಲಿ ಪುರ್ಸತ್ ಜಾಲಿ ಆನಿ ಒಕ್ತಾಚೊ ಉಡಾಸ್ ಆಯ್ಲೊ. ತ್ಯಾ ವಗ್ತಾ ಚಲೊ ಚಡ್ ಸಿರಿಯಸ್ ಜಾಲ್ಲೊ. ಆವಯ್ನ್ ಆಸ್ಪತ್ರೆಕ್ ವೆಲೊ. ಆಸ್ಪತ್ರೆಚ್ಯಾ ವಾಟೆರ್ ಎಕ್ಲೊಚ್ ಭುರ್ಗೊ ಹಾಂಕಾಂ ಸಾಂಡುನ್ ಮರಣ್ ಪಾವ್ಲೊ.

ತ್ಯಾ ದಾದ್ಲ್ಯಾನ್ ಆಪ್ಲ್ಯಾ ಸ್ತ್ರಿಯೆಕ್ ಪೊಟ್ಲುನ್ ಧರ್ನ್ರ ಮ್ಹಳೆಂ “ ಹಾಂವ್ ತುಕಾ ಸಮ್ಜಾತಾಂ, ಡಾರ್ಲಿಂಗ್. “ ಪುತಾಚ್ಯಾ ಮರ್ಣಾಚೆಂ ದೂಖ್ ಮತಿಂತ್ ಆಸೊನ್ ಕಿತೆಂ ಗಾಳಿ, ಶಿರಾಪ್ ಸ್ತ್ರಿಯೆಕ್ ದಿಲೊ ತರ್ ಕಾಂಯ್ ಪೂತ್ ಪಾಟಿಂ ಯೆತ್? ಏಕ್ ಖರ್ಯಾಂ ಬಾಪಾಯ್ಚೆಂ ದೂಖ್ ವ್ಯಕ್ತ್ ಕರುಂಕ್ ಕಿತ್ಲೊಶ್ಯೊ ವಾಟೊ ಅಸ್‌ಲ್ಲ್ಯೊ ತರಿ ಬಾಪಾಯ್ಪಣಾಚೊ ಮಜ್ಬೂತ್ ಗೂಣ್ ಪಳೆಯಾ. ತಾಚೆಂ ಅಚಾನಕ್ ಚಿಂತಿನ್ಯಾಸ್ಲ್ಯಾ ಜಾಪಿಕ್ ಸ್ತ್ರೀಯೆ ಥಂಯ್ ಪುತ್ಯಾಚ್ಯಾ ಮರ್ಣಾಚ್ಯಾ ದುಖಾ ಪ್ರಾಸ್ ಪತಿಚ್ಯಾ ಮೊಗಾ ಥಂಯ್ ಚಡ್ ಪ್ರಭಾವ್ ಪಡ್ಲೊ.

ಆಯ್ಚ್ಯೆ ಸಮಾಜೆಂತ್ಲ್ಯಾ ಬಾಪಯಾಂನಿ ಭುರ್ಗ್ಯಾಂ ಥಾವ್ನ್ ಕಿತ್ಲೆಶೆಂ ಶಿಕೊಂಕ್ ಆಸಾ. ವಿಲಿಯಮ್ ವರ್ದ್ಸ್ ವರ್ತ್ ದೆಕುನ್ ಮ್ಹಣ್ತಾ : “ ಭುರ್ಗೆಂ ಮನ್ಶಾಚೊ ಬಾಪುಯ್ “ ಮ್ಹಣ್. ವ್ಹಡಿಲಾಂಕ್ ಭುರ್ಗ್ಯಾಂನಿ ಜ್ಞಾನಾಚೆ ವಿಷಯ್ ಮಾತ್ರ್ ನ್ಹಯ್ ಆಸ್ತಾಂ ಮನ್ಶಾ ಸಂಬಂದಾಚೆ ವಿಷಯ್ ದಿಜೆ. ವ್ಹಡಿಲಾಂ ಪ್ರಾಸ್ ಭುರ್ಗ್ಯಾಂಕ್ ತಾಂಚೆಂಚ್ ಚಿಂತಪ್, ವಯುಕ್ತಿಕ್ ನಿರ್ಧಾರ್, ತಾಂಚಿಚ್ ಅಭಿರುಚ್ ಆಸ್ತಾ. ಕೆದೊಳ್ ಪರ್ಯಾಂತ್ ವ್ಹಡಿಲಾಂ ಹೆಂ ಸಮ್ಜೊಂಕ್ ಸಕನಾಂತ್, ತೆದೊಳ್ ಪರ್ಯಾಂತ್ ವ್ಹಡಿಲಾಂ ಆಪಾಪ್ಲೆಂ ವ್ಹಡ್ಪಣ್ ಮಾತ್ಯಾರ್ ವಾವಯ್ತಿತ್. ತೆಂ ಸೊಡುನ್ ಭುರ್ಗ್ಯಾಂಚ್ಯಾ ಲೆವೆಲಾಕ್ ಸ್ಪಂದನ್ ಕರಿನಾಂತ್.

ಎಕಾ ಟಿನೇಜ್ ಚಲ್ಯಾಕ್ ಎಕಾ ಪಾರ್ಟಿಕ್ ವಚೊಂಕ್ ಭಾಯ್ರ್ ಸರ್ ಮ್ಹಣ್ತಾ ಆವಯ್. “ ಖಂಚ್ಯಾ ರಂಗಾಚೆಂ ಶರ್ಟ್ ಘಾಲಿಜೆ ಸಾಂಗ್ ಮಾಂ “ ವಿಚಾರಿ ಪೂತ್. “ಖಟ್ಲ್ಯಾರ್ ತೀನ್ ರಂಗಾಚಿಂ ಶರ್ಟಾಂ ಆಸಾತ್. ಬ್ಲೂ ತುಕಾ ಸೊಬಿತ್ತ್ ದಿಸ್ತಾ ತೆಂಚ್ ಘಾಲ್”.

ಪುತಾಕ್ ಪಸಂದ್ ಆಸ್ಚೆಂ ಎಕೀ ಶರ್ಟ್ ತಾಂತುಂ ನಾತ್‌ಲ್ಲೆಂ.
“ತ್ಯಾ ಉಪ್ರಾಂತ್ ತುಜ್ಯಾ ಪಸಂದೆಚೊ ರಂಗ್ ಖಂಚೊ ಮಾಂ ?” ಪೂತ್ ವಿಚಾರಿ.
“ ಜರ್‌ತರ್ ತುಕಾ ಬ್ಲೂ ನಾಕಾ ತರ್ ಕ್ರೀಮ್ ಶರ್ಟ್ ಘಾಲ್”.

ಚಲೊ ಆಪ್ಲ್ಯಾ ಮರ್ಜೆಚೆಂ ಟೀಶರ್ಟ್ ಕಬಾಟಾಂತ್ಲೆ ಕಾಡುನ್ ನೆಸೊನ್ ತಯಾರ್ ಜಾಲೊ. ಪೂಣ್ ಆವಯ್ ಆಪ್ಲ್ಯಾ ಉತ್ರಾಕ್ ಮಾನ್ ದಿನಾತ್‌ಲ್ಯಾಕ್ ಮತಿಂತ್ ಜಳೊಂಕ್ ಲಾಗ್ಲಿ.

ಟೀನೇಜ್ ಜಾವ್ನಾಸಾ ಭುರ್ಗ್ಯಾಪಣಾರ್ ಥಾವ್ನ್ ಪ್ರಾಪ್ತ್ ಪ್ರಾಯೆಕ್ ವೆಚೊ ಏಕ್ ಪ್ರಮುಕ್ ಹಂತ್/ರಸ್ತೊ. ಹಾಂಗಾಸರ್ ನಿಸ್ರಾಟಿ ವಾಟ್ ಚಡ್. ರೂಚ್ ಚಡ್. ತಾಳ್ನ್ಯೊ ಚಡ್. ಹ್ಯಾ ಆಯಿನ್ನ್ ಸುಂದರ್ ವಾಟೆರ್ ಸಾಂಗಾತ್ ದಿಂವ್ಕ್ ಬೋವ್ ಗರ್ಜೆಚೊ ಸಾಂಗಾತಿ ಜಾವ್ನಾಸಾ ಬಾಪುಯ್. ಬಾಪಾಯ್ನ್ ಹ್ಯೆ ಪ್ರಾಯೆರ್ ಏಕ್ ಈಷ್ಟ್, ಏಕ್ ಸಂಗಾತಿ, ಏಕ್ ಸಮಾಲೋಚಕ್, ಏಕ್ ಧಯ್ರ್ ದಿಂವ್ಚೊ ಮಿತ್ರ್ ತಶೆಂ ಭುರ್ಗ್ಯಾಂಕ್ ಆಧಾರುಂಕ್ ತಯಾರ್ ಆಸಾಜೆ.

ಬಾಪುಯ್ ನಾಸ್ಚೆಂ ಜಿಣೆಂ ಸಬಾರ್ ಭುರ್ಗ್ಯಾಂಕ್ ಜಿವಿತಾಚಿ ಕಾಳ್ಕಿ ವಾಟ್ ದಾಕಯ್ತಾ.

ಸಬಾರ್ ಭುರ್ಗ್ಯಾಂಕ್ ಘರಾಂ ಆಸಾತ್, ಆಸ್ತ್ ಆಸಾ, ಸಂತೋಸ್ ಆಸಾ ಆವಯ್ ಬಾಪಯ್ ಆಸ್ತಾತ್, ಕಾರಾಂ ಬೊಂಗ್ಲೆ, ಈಷ್ಟ್, ಸಯ್ರಿಂ... ಸಗ್ಳಿಂ ಆಸ್ತಾತ್. ಪೂಣ್ ಸಮಾಧಾನ್ ದಿಂವ್ಚೆಂ ವಾತಾವರಣ್ ಆಸಾನಾ. ಸಬಾರ್ಶ್ಯಾ ಭುರ್ಗ್ಯಾಂಕ್ ಕಾಂಯ್ಚ್ ಆಸಾನಾ, ಪೂಣ್ ಮೋಗ್ ದಿಂವ್ಚಿ ಆವಯ್, ಸಮಾಧಾನ್ ದಿಂವ್ಚೊ ಬಾಪುಯ್ ಆಸಾತ್ ಥಂಯ್ ಉತ್ತೀಮ್ ಭುರ್ಗ್ಯಾಂಚೊ ಫುಡಾರ್ ರುತಾ ಜಾತಾ.

ಯುವಜಣಾಂ ಥಂಯ್ ಅಸಲ್ಯಾ ಬಾಪಾಯ್ಚ್ಯಾ ಜವಾಬ್ದಾರಿಯುತ್ ವ್ಯಕ್ತಿವಿಶಿಂ ಟೀನೆಜಿರ್ ಯೆಂವ್ಚೆಂ ಸಹಜ್ ಚಿಂತಾಪ್ ಬೋವ್ ಅಶೀರ್ ಜಾವ್ನಾಸಾ. ತೊ ಕಿತೆಂ ಜಾಣಾಂ? ತೊ ಆಮ್ಕಾಂ ಸ್ವತಂತ್ರ್ ದಿನಾ, ಜಾಯ್ ತಶೆಂ ಖರ್ಚುಂಕ್ ದಿನಾ? ತಾಚ್ಯೊ ರೆಗ್ರ್ಯೊ ರುಚನಾಂತ್, ತಾಕಾ ಆಮ್ಚೆ ಫಿಲಿಂಗ್ಸ್ ಸಮ್ಜನಾಂತ್. ತಾಕಾ ಆಮ್ಚೆ ಈಷ್ಟ್ ರುಚ್ನಾ ನಾಂತ್ ಅಶೆಂ.

ಬಾಹ್ಯ್ ರಿತಿನ್ ತಶೆಂ ಭೊಗ್ತಾ. ಬಾಪುಯ್ ಆಪ್ಲ್ಯೆ ಟೀನೆಜಿರ್ ಆಸ್ಚ್ಯಾ ಭುರ್ಗ್ಯಾ ವಿಶಿಂ ಚಡ್ ಬಾವುಕ್ ಜಾತಾ. ತಾಕಾ ಚಡ್ ಜವಾಬ್ದಾರಿ ಭೊಗ್ತಾ. ತಾಚೆಂ ಚಿಂತಪ್ ಆನಿ ದೀಷ್ಟ್ ಹ್ಯಾ ವಗ್ತಾ ರೂಂದ್ ಜಾತಾ. ಹ್ಯಾ ದೊನಾಂ ಮಧೆಂ ಜೆದ್ನಾಂ ಏಕ್ ಸಮ್ಜಣೆಚೊ ಭಾಂದ್ ರುತಾ ಜಾತಾ ಥಂಯ್ ಬಾಪಯ್ಪಣ್ ಖರೆಂ ಉರ್ತಾ. ಯುವಜಣಾಂಕ್ ಆಸ್ಚೊ ಏಕ್ಚ್ಂ ದಿವ್ಟೊ ಆನಿ ತೊ ಜಾವ್ನಾಸಾ ಬಾಪುಯ್. ತಾಚ್ಯಾ ಆಧಾರಾರ್ ವಾಡೊಂಕ್ ಪ್ರಯತ್ನ್ ಕರ್ತಾನಾ, ತಾಚ್ಯಾ ಬಾಪಯ್ಪ್ಣಾಚೆಂ ಮೌಲ್ಯ್ ತುಜ್ಯಾ ಜಿವಿತಾಂತ್ ಚಡಿತ್ ಪ್ರಕಾಸ್ತಾ.

(- ಜಿಯೊ ಆಗ್ರಾರ್, ಅಕ್ತೋಬರ್ 2016)

ಜಿಯೋ ಆಗ್ರಾರ್: ಏಕ್ ನಾಟಕಿಸ್ತ್, ಸಮಾಜ್ ಸೆವಕ್, ಕವಿ, ಚಿಂತ್ಪಿ, ಉಲವ್ಪಿ ತಶೆಂಚ್ ಏಕ್ ಸಂಘಟಕ್. ಸಮಾಜೆಂತ್ ಶೋಶಣಾವಿರೋಧ್ ಸರಾಗ್ ರಿತಿನ್ ಆವಾಜ್ ಉಟಂವ್ಚ್ಯಾಂತ್ ನಾಂವ್ ವೆಲ್ಲೊ, ಯುವಜಣಾಂಕ್ ಏಕ್ ಸಲ್ಹಾದಾರ್ ಜಾವ್ನ್ ಪಯ್ಣಾರಿಚೆರ್ ಆಪ್ಲಿಂ ಬರ್ಪಾಂ ವ್ಹಾಳಯ್ತಲೊ.