[ಕವಿತಾ] ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)

ಕೆನ್ನಾಂ ಪುಣಿ ಉಟ್ತೆಲ್ಯಾತ್...


ತಾಂಚ್ಯಾ ದೊಳ್ಯಾನಿಂ
ತೀಳ್ನ್ ಪಳೆವ್ನ್
ಉಚಾರಿನಾತ್'ಲ್ಲೆಂ ಸಮ್ಜೊಂಚ್ಯಾ ಆಮ್ಕಾಂ
ಆಜ್, ಕಠೀಣ್ ಶಿಕ್ಷಾ.
ತುಮಿ ವಿಡಿಯೊ ಬಂದ್ ಕರ್ನ್ ನಿದ್ಲ್ಯಾರೀ,
ಹಾಂವ್ ಶಿಕಯ್ತೇ ಆಸಾಂ
ಕೆನ್ನಾಂ ಪುಣಿ ಉಟ್ತೆಲ್ಯಾತ್ ಮ್ಹಳ್ಳ್ಯಾ ಭರ್ವಶ್ಯಾನ್.

ಕಾಂಯ್ ಮಾಂ-ಬಾಪ್ ಮ್ಹಾಕಾ
ಚೊಯ್ತಾತ್ ಆಸ್ತೆಲಿಂ
ಮಧೆಂ ಮಧೆಂ.
ಆದ್ಲ್ಯಾ ಗುರುಚೆರ್ ಆಸ್'ಲ್ಲಿ ಪಾತ್ಯೆಣಿ
ಆಮ್ಚೆರ್ ಖಂಯ್ ಆಸಾ?
ಮ್ಹಾಕಾ ಹಾಚಿ ಪರ್ವಾ ನಾ.
ಹಾಂವ್ ಶಿಕಯ್ತೇ ಆಸಾಂ
ಕೆನ್ನಾಂ ತರೀ ಉಟ್ತೆಲ್ಯಾತ್
ಮ್ಹಳ್ಳ್ಯಾ ಭರ್ವಶ್ಯಾನ್.

ತುಮ್ಚೆ ಮಧೆಂ ಥೊಡೆ ಕೀರ್ ಆಸಾತ್
ಸಗ್ಳೆಂ ಜಿಕುನ್ ಧರ್ತಾತ್.
ತಾಳಿಯೊ ಜೊಡುನ್ ಘೆತಾತ್.
ಪುಣ್ ಕೆನ್ನಾಂಯ್ ಘುಡಾ ಥಾವ್ನ್
ಭಾಯ್ರ್ ಯೇಂವ್ಕ್ ಸಕನಾಂತ್.
ಹಾಂವ್ ಶಿಕಯ್ತೇ ವೆತಾಂ,
ಕೆನ್ನಾಂ ತರೀ ಉಟ್ತೆಲ್ಯಾತ್
ಮ್ಹಳ್ಳ್ಯಾ ಭರ್ವಶ್ಯಾನ್.

ತುಮ್ಚೆ ಮಧೆಂ ಥೊಡೆ ಕೊಲೆ ಆಸಾತ್
ಪಾರ್ಪೊಳ್ ತರೀ ಬುದ್ವಂತ್.
ಕೆನ್ನಾಂಚ್ ಸಲ್ವನಾಂತ್.
ತುಮ್ಚಾಯೀ ಬುದ್ವಂತ್ಕಾಯೆಕ್
ಏಕ್ ವಾಟ್ ದಾಕಂವ್ಚಿ ಗರ್ಜ್ ಆಸಾ.
ಹಾಂವ್ ಶಿಕಯ್ತೇ ವೆತಾಂ,
ಕೆನ್ನಾಂ ತರೀ ಉಟ್ತೆಲ್ಯಾತ್
ಮ್ಹಳ್ಳ್ಯಾ ಭರ್ವಶ್ಯಾನ್.

ತುಮ್ಚೆ ಮಧೆಂ ಥೊಡೆ
ಚುಕೊನ್ ಗೆಲ್ಯಾತ್.
ಮಾಂ-ಬಾಪಾ ಥಾವ್ನ್'ಯೀ
ಪಯ್ಸ್ ಪಾವ್ಲ್ಯಾತ್.
ನೊವಾನ್ನೊಯ್ ಬಕ್ರ್ಯಾಂ ವರ್ನಿಂ
ತುಮಿ ಮ್ಹಾಕಾ ಚಡ್ ಧೊಸ್ತಾತ್.
ಹಾಂವ್ ಶಿಕಯ್ತೇ ಆಸಾಂ,
ಗೊವ್ಳ್ಯಾಚ್ಯಾ ತಾಳ್ಯಾಕ್ ಪುಣಿ
ಆಯ್ಕಾಶ್ಯಾತ್ ಮ್ಹಣೊನ್.
ಕೆನ್ನಾಂ ತರೀ ಉಟ್ತೆಲ್ಯಾತ್ ಮ್ಹಣೊನ್.

 ******

- ವಿಲ್ಮಾ ಬಂಟ್ವಾಳ್. [ಒಕ್ಟೊಬ್ರ್, 2020]

[kovita] Ken'nam punni utt'teleat... (- Wilma Bantwal)

Ken'nam punni utt'teleat...


Tanchea dolleanim
tilln polleun
ucharinat l'lem somzonchea amkam
az, kotthinn xikxa.
Tumi viddio bond korn nidleari,
hamv xikoite asam
ken'nam punni utt'teleat mholl'llea bhorvoxean.

Kaim mam-bap mhaka
choitat astelim
modhem modhem.
Adlea gurucher as l'li patyenni
amcher khoim asa?
mhaka hachi porva na.
Hamv xikoite asam
ken'nam tori utt'teleat
mholl'llea bhorvoxean.

Tumche modhem thodde kir asat
sogllem jikun dhortat.
Tallio zoddun ghetat.
Punn ken'nam-i ghudda thaun
bhair yeunko sokonant.
Hamv xikoite vetam,
ken'nam tori utt'teleat
mholl'llea bhorvoxean.

Tumche modhem thodde kole asat
parpoll tori budvont.
Ken'nanch solvonant.
Tumchayi budvontkayek
ek vatt dakomvchi gorz asa.
Hamv xikoite vetam,
ken'nam tori utt'teleat
mholl'llea bhorvoxean.

Tumche modhem thodde
chukon geleat.
Mam-bapa thaun yi
pois pauleat.
Novan'noi bokream vornim
tumi mhaka chodd dhostat.
Hamv xikoite asam,
goulleachea talleak punni
aikaxeat mhonnon.
Ken'nam tori utt'teleat mhonnon.

******

- Wilma Bantwal. [Oct, 2020]

[कविता] केन्नां पुणी उटतेल्यात... (- विल्मा बंटवाळ)

थोड्याच तेंपादीं मनशाकुळान पळेवन आयिल्ल्या बदलावणेंत कितलें सर्व बदल्लां. ही कविता आयच्या डिजिटल काळाच्या शिक्षण वेवसतेच्या पाठ‌भुंय‌चेर विणलली तर‌यी ही कविता सभार शेतांनी लागू जांवचेतसली. एका वाटेन सत, नीत, नयतिकता, शिसत आनी गिन्यान तर अन्येका वाटेन ह्या सर्वांक तुकलावन, ह्या सर्वांच्या असतित्वाचेर सवाल उटवन मिरंवचें असत, अनीत, अनयतिकता, अशिसत तशेंच अग्यान आनी दोळ्यां समोर हें सर्व घडून आसा तर‌यी मोनो जावन जेमेंवचो लोक केदनां तर‌यी उटत‌काय म्हळ्ळें सवाल मतिंत उभजांवची श्याथी ह्या कवितेची. पूण अखेरीक तर‌यी भर्वसो सांडून जियेनाये जाल्ल्यान हें सवाल अधुरेंच उर्ता. (अक्तोबर ४ तारिकेर आसा केल्ल्या अंतर‌राश्ट्रीय डिजिटल कोंकणी कविगोश्टिंत सादर केल्ली कविता ही जावनासा)

- सं

[कविता] केन्नां पुणी उटतेल्यात... (- विल्मा बंटवाळ)

केन्नां पुणी उटतेल्यात...


तांच्या दोळ्यानीं
तीळन पळेवन
उचारिनात ल्लें समजोंच्या आमकां
आज, कठीण शिक्षा.
तुमी विडियो बंद कर्न निदल्यारी,
हांव शिकयते आसां
केन्नां पुणी उटतेल्यात म्हळ्ळ्या भर्वश्यान.

कांय मां-बाप म्हाका
चोयतात आसतेलीं
मधें मधें.
आदल्या गुरुचेर आस ल्ली पात्येणी
आमचेर खंय आसा?
म्हाका हाची पर्वा ना.
हांव शिकयते आसां
केन्नां तरी उटतेल्यात
म्हळ्ळ्या भर्वश्यान.

तुमचे मधें थोडे कीर आसात
सगळें जिकून धर्तात.
ताळियो जोडून घेतात.
पूण केन्नांय घुडा थावन
भायर येवंक सकनांत.
हांव शिकयते वेतां,
केन्नां तरी उटतेल्यात
म्हळ्ळ्या भर्वश्यान.

तुमचे मधें थोडे कोले आसात
पार्पोळ तरी बुद्वंत.
केन्नांच सलवनांत.
तुमचायी बुद्वंत्कायेक
एक वाट दाकंवची गर्ज आसा.
हांव शिकयते वेतां,
केन्नां तरी उटतेल्यात
म्हळ्ळ्या भर्वश्यान.

तुमचे मधें थोडे
चुकोन गेल्यात.
मां-बापा थावन यी
पयस पावल्यात.
नोवान्नोय बकऱ्यां वर्नीं
तुमी म्हाका चड धोसतात.
हांव शिकयते आसां,
गोवळ्याच्या ताळ्याक पुणी
आयकाश्यात म्हणोन.
केन्नां तरी उटतेल्यात म्हणोन.

******

-  विल्मा बंटवाळ. [ओकटोबर, २०२०]

ದಾಯ್ಜ್.ಕೊಮ್