[ಕವಿತಾ] ಸಾಂಗಾತ್ (- ವಿನ್ಸಿ ಕ್ವಾಡ್ರೊಸ್)

ಸಾಂಗಾತ್


ಎಕಾ ಚೆಡ್ಯಾನ್ ವಿಂಸ್ಚೆಂ ಸೊಬಿತ್ ಸಾಂಗಾತಿ
ಗುಣೆಸ್ತ್-ಹುಶಾರ್ ತೆಂ ಚೆಡುಂ ಆಸ್ಲೆಂ
ಎಕ್ ದಿಸ್ ಲಗ್ನಾಚ್ಯಾ ಸಂಸ್ಕಾರಾಂತ್ ಬಾಂದುನ್
ತಾಂಚೆಂ ಖುಶಾಲ್ ಪಯ್ಣ್ ಸುರು ಜಾಲೆಂ

ನವಿ ಯಾತ್ರಾ ಕಾಳ್ಜಾಮನಾಕ್ ಥಾತಾರ್ಪಿ
ತಾಂಚಿಯೆ ಜಿಣೆಂತ್ ಭರಂಕ್ ಲಾಗ್ಲೊ ಅರ್ಥ್
ಚೆಡೊ ಮುಖಾರ್ ಆಪ್ಲೊ ಸಂವ್ಸಾರ್ ಫುಲಯ್ತ್
ಇಲ್ಲೊಸೊ ಮಾನ್-ಸಂಮಾನ್, ನಾಸ್ಲ್ಯಾರ್ ವ್ಯರ್ಥ್

ಚೆಡುಂ ಪಾಟಿಂ ಚಿಂತ್ನಾಂನಿ ಘುಸ್ಪನ್
ಸಂವ್ಸಾರಿ ವಿಚ್ಯಾರಾಂ ಕಡೆಂ ಖೆಳ್ಟಾಲೆಂ
ತ್ಯಾಚ್ ವೆಳಾರ್ ಜಾಲೆಂ ದಿವ್ಯಾ ದರ್ಶನ್
ಚೆಡ್ಯಾನ್ ಆಪ್ಣಾ ಸಾಂಗಾತಾ ತಾಕಾ ಘೆತ್ಲೆಂ

ಬಗ್ಲೆನ್ ಜಾಯ್ತೊ ಲೊಕ್ ಕರಿ ಆಪ್ಲಿ ವಾಟ್ಚಾಲ್
ನಿಸ್ವಾರ್ಥಿ ಮೊಗ್, ಉಮಾಳೆ ಆನಿ ಸಂಸ್ಕಾರ್
ಚೆಡ್ವಾನ್ ಎಕಾ ಜಡ್ಪ್ಯಾಕ್ ಪಳೆಲೆಂ
ಥಂಯ್ ಚೆಡುಂ ಆಸ್ಲೆಂ ಮುಖಾರ್

ತ್ಯಾ ಚೆಡ್ವಾಚ್ಯಾ ಹಾತಾಂತ್ ಆಸ್ಲಿ ಕಮಾನ್
ಚೆಡೊ ಘಾನ್ಟಾಬಯ್ಲಾ ಸಾರ್ಕೊ ವಾಗ್ತಾಲೊ
‘ಹಾಂವೆಂ ಅಶೆಂ ಕಿತ್ಯಾಕ್ ಕರ್ಚೆಂ ನ್ಹಯ್?'
ಎಕ್ ಸಯ್ತಾನ್ ತಾಚೆ ಮುಖಾರ್ ಉಬೊ ರಾವ್ಲೊ

ಚೆಡ್ವಾನ್ ಎಕ್ ಪಾವ್ಲ್ ಮುಖಾರ್ ಘಾಲೆಂ
ಚೆಡ್ಯಾನ್ ಕಾಯಂಚ್ ಮ್ಹುಣ್ಲೆಂ ನಾಂ
ದುಸ್ರೆಂ, ತಿಸ್ರೆಂ ಆನಿ ಚವ್ಥೆಂ ಪಾವ್ಲ್
ತಾಕಾ ರಾವಯ್ಲೆಂ, ತೆಂ ಥಾಂಬ್ಲೆಂ ನಾಂ

ಚೆಡುಂ ವೆತಾಲೆಂ ಸಾಂಗತ್ ಕಿತೆಂ ತರಿ
ಚೆಡ್ಯಾಕ್ ಜಾಲೊ ಹೊ ವ್ಹಡ್ಲೊ ಘಾತ್
ಲಕಾ ಗರ್ದಿಯೆಂತ್ ತುಟ್ಲೆಂ ಮೊಗಾ ದರ್
ಸುಟ್ಲೊ ಸದಾಂಕಾಲ್ ವಿಶ್ವಾಸಿ ಸಾಂಗಾತ್

 ******

- ವಿನ್ಸಿ ಕ್ವಾಡ್ರೊಸ್. [ನವೆಂಬ್ರ್, 2020]

[kovita] Sangat (- Vincy Quadros)

Sangat

Eka cheddean vinchem sobit sangati
Gunnest-huxar tem cheddum aslem
Ek dis lognachea sonskarant bandon
Tanchem khuxal poinn suru zalem

Novi yatra kallza-monak thatarpi
Tanchie jinnent bhoronk laglo orth
Cheddo mukhar aplo sonvsar fuloit
Il’lo-so man-somman, naslear veorth

Cheddum fattim chintnamni ghuspon
Sonvsari vichearam koddem khellttalem
Teach vellar zalem div’ya dorxon
Cheddean apnna sangata taka ghetlem

Saiddin zaito lok kori apli vattchal
Nisuvarthi mog, umalle ani sonskar
Cheddvan eka zoddpeak pollelem
Thoim cheddum aslem mukhar

Tea cheddvachea hatant asli koman
Cheddo ghantta-boila sarko vagtalo
‘Hanvem oxem kiteak korchem nhoi?’
Ek soitan tache mukhar ubo ravlo

Cheddvan ek paul mukhar ghalem
Cheddean kainch mhunnlem nam
Dusrem, tisrem ani chouthem paul
Taka ravoilem, tem thamblem nam

Cheddum vetalem sangot kitem tori
Cheddeak zalo ho vhoddlo ghat
Loka gordient tuttlem moga dor
Suttlo sodankal visvaxi sangat

******

- Vincy Quadros. [Nov, 2020]

[कविता] सांगात (- विन्सी क्वाड्रोस)

उभारुंक व्हड भांदपां उभीं करुयेता पूण आसुंक जाय मजबूत मुल्याफातोर. तेच‍परीं एक नातें सयत कितलेंय मजबूत आसुंक सक्ता जेदनां थंयचर आसता विश्वास. हेच चिंत्पाच्या बुन्यादिचेर उभी केल्ली कविता ही.

- सं

[कविता] सांगात (- विन्सी क्वाड्रोस)

सांगात


एका चेड्यान विंसचें सो'बीत सांगाती
गुणेसत-हुशार तें चेडूं आसलें
एक दीस लग्नाच्या संसकारांत बांदून
तांचें खुशाल पयण सुरू जालें

नवी यात्रा काळजामनाक थातार्पी
तांचिये जिणेंत भरंक लागलो अर्थ
चेडो मुखार आपलो संवसार फुलयत
इल्लोसो मान-संमान, नासल्यार व्यर्थ

चेडूं पाटीं चिंत्नांनी घुस्पन
संवसारी विच्यारां कडें खेळटालें
त्याच वेळार जालें दीव'या दर्शन
चेड्यान आपणा सांगाता ताका घेतलें

बगलेन जायतो लो'क करी आपली वाटचाल
निस्वार्थी मो'ग, उमाळे आनी संसकार
चेडवान एका जडप्याक पळेलें
थंय चेडूं आसलें मुखार

त्या चेडवाच्या हातांत आसली कमान
चेडो घानटाबयला सार्को वाग्तालो
‘हांवें अशें कित्याक कर्चें न्हय?'
एक सयतान ताचे मुखार उबो रावलो

चेडवान एक पावल मुखार घालें
चेड्यान कायंच म्हुणलें नां
दुस्रें, तिस्रें आनी चवथें पावल
ताका रावयलें, तें थांबलें नां

चेडूं वेतालें सांगत कितें तरी
चेड्याक जालो हो व्हडलो घात
लका गर्दियेंत तुटलें मो'गा दर
सुटलो सदांकाल विश्वासी सांगात

******

-  विन्सी क्वाड्रोस. [नवेंबर, २०२०]

ದಾಯ್ಜ್.ಕೊಮ್