[ಕವಿತಾ] ಭುರ್ಗ್ಯಾಪಣಾತಲಿ ಯಾದ್ (- ನೀತಾ ಕುರ್ಟೀಕರ್)

ಭುರ್ಗ್ಯಾಪಣಾತಲಿ ಯಾದ್ 


ಗಾಂವ್ಗಿರೊ ವಳ್ಣಾಚೊ ವಾಠಾರ್
ಚಲತ್ ವಚಪ್ ಘಾಠಾಚಿ ವಾಟ್
ಪಾಚ್ವೆಚಾರ್, ಹರ್ವೆ ಕಚ್ಚೆ ಕವ್ಳೆ
ರೂಖಾವ್ಳ್, ವನ್ಸ್ಪತ್ ಹರ್ಯಾಳೀಚಿ ರಾಸ್…

ಚಾರೂಯ್ ದಿಕಾನಿ ನಟ್ ನಟಾಂನಿ ನ್ಹೆಸಿಲ್ಲಿ ನೆಪ್ಥ್ಯಶಾಲ್
ಝಾಡಾಂ ಝುಡ್ಪಾಂನಿ ಭರಿಲ್ಲೊ
ತೊ ತಾಂಬ್ಡೊ ರಸ್ತೊ ಶೆಕ್ರ್ಯಾಚೊ
ಆಯ್ಜ್ ತೊ ಜಾಲಾ ನಾಶಾಳ್…

ವಯ್ರ್ ವಯ್ರ್ ಮಳ್ಬಾಕ್ ತೆಕಿಲ್ಲಿ
ತ್ಯೊಂ ದೊಗುಲ್ಯೊಂ ತಿ ಝಾಡಾಂ ವೆಲಿ
ತಿ ಕುಳಾಗಾರಾ ತೆಂ ಮಾಡ್- ಮಾಡ್ಯೊ
ಖಂಯ್ ರೆ ಗೆಲೊ ತೊ ಸೈಮಾಚೊ ಕಾಳ್…

ವ್ಹಾಂವ್ತ್ಯೊ ಖಳ್ಯೊ, ವ್ಹಾಂವ್ತೆ ವ್ಹಾಳ್
ತೆ ಸಾಳ್ಯಾ ನುಸ್ತ್ಯಾಚೊ ಘಮ್ ಘಮ್ ವಾಸ್
ವ್ಹಾಳಾ ದಡೆರ್ ಪಿಪ್ಳಾಚೆ ಝಾಡ್
ತ್ಯಾಚ್ ಝಾಡಾರ್ ಕೊಗುಳಾಚೆ ರಾಜ್…

ಖಂಯ್ ರೆ ಗೆಲೆ ತೆಂ ದೀಸ್ ಆಯ್ಜ್
ತೆಂ ಶಾಳೆಕಡಲೊ ಖೆಳಾಂ ಮೈದಾನ್
ಫಾತ್ರಾಂನಿ ಬಾಂದೂನ್ ಕಾಡಿಲ್ಲೆ ತೆ ದುರೀಗ್
ಸರ್ಭೊಂವತಣಿ ನಿವ್ಲಕಾಟ್ಯಾಂಚಿ ಝಾಡಾಂ…

ದುರ್ಗಾ ಭಿತರ್ ಯೆವಂಕ್ ವಚೂಂಕ್
ಇಲ್ಲೊಸೊ ಗೊಯ್ಡೊ ಕೊಣ್ಯಾಂಚೊ
ತರೀಯ್ ಮಸ್ತಿ ಭುರ್ಗಿ…
ದುರ್ಗಾ ವಯ್ಲ್ಯಾನ್ ಮಾರ್ತಾಲಿ ಉಡಿ…

ಆತಾಂ ತಾಚಿ ಸಗ್ಳೀಚ್ ಲಾಗ್ಲ್ಯಾತ್ ವಾಟ್
ದಿಸಾನ್ ದೀಸ್ ಬದ್ಲತ್ ವತಾ ವಿಚಾರ್
ಇಲ್ಲ್ಯೊ ಇಲ್ಲ್ಯೊ ಶೆಣತ್ ಗೆಲಾ
ಮ್ಹಜ್ಯಾ ಭೂರ್ಗ್ಯಾಪಣಾತಲಿ ಯಾದ್…

 ******

- ನೀತಾ ಕುರ್ಟೀಕರ್. [ಸಪ್ತೆಂಬರ್, 2020]

[kovita] Bhurgeaponnatoli yad (- Neeta Kurtikar)

Bhurgeaponnatoli yad


gamvgiro vollnnacho vatthar
cholot vochop ghatthachi vatt
pachvechar, horve kochche koulle
rukhaull, vonspot horeallichi ras…

charuy dikani nott nottamni nhesil'li nepthyoxal
zhaddam zhuddpamni bhoril'lo
to tambddo rosto xekreacho
aiz to zala naxall…

voir voir mollbak tekil'li
teom doguleom ti zhaddam veli
ti kullagara tem madd- maddeo
khoim re gelo to soimacho kall…

vhamvteo kholleo, vhamvte vhall
te sallea nusteacho ghom' ghom' vas
vhalla dodder pipllache zhadd
teach zhaddar kogullache raz…

khoim re gele tem dis aiz
tem xallekoddolo khellam moidan
fatramni bandun kaddil'le te durig
sorbhomvotonni nivlokatteanchi zhaddam…

durga bhitor yeunk vochunk
il'loso goiddo konneancho
tori-i mosti bhurgi…
durga voilean martali uddi…

atam tachi sogllich lagleat vatt
disan dis bodlot vota vichar
il'leo il'leo xennot gela
mhojea bhurgeaponnatoli yad…

******

- Neeta Kurtikar. [Sep, 2020]

[कविता] भुरग्यापणातली याद (- नीता कुर्टीकर)

दरेकल्याक भुरग्यापणाले दीस पाशार करुंक आसतात आनी दरेकल्याच्या भुरग्यापणाच्या दिसांनी भग‌ल्ल्या संतोसाच्यो यादी आसात. पूण आयच्या काळाच्या भुरग्यापणाचे दीस आनी कांय पंचवीस-पन्नास वरसाधल्या भुरग्यापणाच्या दिसांक कितलो तफावत आसा? भुरग्यापणाल्या दिसाचेर याद करून बरयिल्ली कविता ही..

- सं

[कविता] भुरग्यापणातली याद (- नीता कुर्टीकर)

भुरग्यापणातली याद


गांवगिरो वळणाचो वाठार
चलत वचप घाठाची वाट
पाचवेचार, हरवे कच्चे कवळे
रूखावळ, वनस्पत हरयाळीची रास…

चारूय दिकानी नट नटांनी न्हेसिल्ली नेपथ्यशाल
झाडां झुडपांनी भरिल्लो
तो तांबडो रस्तो शेकऱ्याचो
आयज तो जाला नाशाळ…

वयर वयर मळबाक तेकिल्ली
त्यों दोगुल्यों ती झाडां वेली
ती कुळागारा तें माड- माडयो
खंय रे गेलो तो सैमाचो काळ…

व्हांवत्यो खळयो, व्हांवते व्हाळ
ते साळ्या नुसत्याचो घम घम वास
व्हाळा दडेर पिपळाचे झाड
त्याच झाडार कोगुळाचे राज…

खंय रे गेले तें दीस आयज
तें शाळेकडलो खेळां मैदान
फातरांनी बांदून काडिल्ले ते दुरीग
सरभोंवतणी निवलकाट्यांची झाडां…

दुरगा भितर येवंक वचूंक
इल्लोसो गोयडो कोण्यांचो
तरीय मस्ती भुरगी…
दुरगा वयल्यान मारताली उडी…

आतां ताची सगळीच लागल्यात वाट
दिसान दीस बदलत वता विचार
इल्ल्यो इल्ल्यो शेणत गेला
म्हज्या भूरग्यापणातली याद…

******

-  नीता कुर्टीकर. [सप्तेंबर, २०२०]

ದಾಯ್ಜ್.ಕೊಮ್