[ಕವಿತಾ] ಶಾಳೆತಲೆ ದೀಸ್ (- ನಾಮ್‌ದೇವ್ ಗ. ಸುರ್ಲಿಕಾರ್)

ಶಾಳೆತಲೆ ದೀಸ್


ಘರಾಂತ್ ಖಾವ್ಪಾಕ್ ಜೆವ್ಪಾಕ್
ಕೆನ್ನಾ ಮೆಳ್ಳೆ ನಾ ಜಾಯ್ತಶೆಂ
ಅನವ್ಳ್ಯಾ ಪಾಯಾನೀಚ್ ಭೊಂವ್ಲೊಂ
ಪಯ್ಶೆಂ ನಾಸ್ಲೆ ಘೆವ್ಪಾಕ್ ಜೊತೆಂ

ಮೊಟ್ವೆಂ ಕಾಲ್ಸಾಂವ್ ಭೆಂಡಾರ್
ದೊನೂಯ್ ಕುಲ್ಯಾಂಚೆರ್ ಪಿಂಜ್ಕೆಂ
ಖೊಮ್ಸಾಕ್ ನಾಸ್ಲೆ ಬುತಾಂವ್
ದಿಸ್ತಾಲೆ ಪೊಟ್ ಉಕ್ತೆಂ

ಭುರ್ಗೆಂ ವರ್ಗಾತ್ ಹಾಂಸ್ತಾಲೆ
ಪಳೊವ್ನ್ ಪಿಂಜ್ಕೆಂ ಮ್ಹಜೆಂ
ಖಾಂದಾರ್ ಘೆವ್ನ್ ಯೆವ್ಪ್ ವಚಪ್
ಪುಸ್ತಕಾಂಚೆಂ ವಜೆಂ

ನಾಸ್ಲೆಂ ಕದೆಲ್ ತಾಮ್ರೆತ್
ಬಸ್ಚೆ ಪಡ್ಟಾಲೆ ಸಾಕಾರ್
ದನ್ಪಾರ್ ಜಾತಾ ಮ್ಹಣ್ಸರ್ ಭುಖೆನ್
ಕಾಳೊಖ್ ಯೆತಾಲೊ ದೊಳ್ಯಾಂ ಮುಖಾರ್

ಬುತ್ಯೊ ಬಾಟ್ಲ್ಯೊ ನಾಸ್ಲ್ಯೊ ತೆನ್ನಾ
ಭೂಖ್ ತಾನ್ ಸೊಸ್ತಾಲೆ
ಘರಾ ಪಾವ್ತಕಚ್ ಘರ್ಚೆಂ ಜೆವ್ಣ್
ಆಸ್ಲ್ಯಾರ್ ಜೆವ್ತಾಲೊ

ಅಭ್ಯಾಸ್ ಕೆಲೊ ನಾ ತರ್
ಪಡ್ಟಾಲೆ ಫಾಟೀರ್ ಲಡೆ
ರಡೂನ್ ರಡೂನ್ ಸುಜೂನ್
ಜಾತಾಲೆ ತಾಂಬ್ಡೆ ದೊಳೆ

ಒಣವ್ ಘಾಲೂನ್ ದವ್ರುನಯ್
ಫಾಟೀಚೆರ್ ಬಡಿ ಪಡ್ಟಾಲಿ
ಘಂಟಿ ವಾಜ್ತಾ ಮ್ಹಣ್ಸರ್
ಚೆಡ್ಡಿ ಲೆಗೀತ್ ಭಿಜ್ತಾಲಿ

ಶೆಂಕ್ರ್ಯಾಂಚೆರ್ ಧೊಂಪ್ರಾಂ ಘಾಲ್ತಕಚ್
ಫಾತರ್ ತೊಪೂನ್ ಜಾತಾಲೊ ಘಾವೊ
ರಾಗಾನ್ ಮಾಗೀರ್ ನಾಕಾ ತಸ್ಲ್ಯೊ
ಮನಾತ್ಲ್ಯಾ ಮನಾತ್
ಭುರ್ಗೆಂ ಬಾಈಕ್ ಘಾಳಿ ಸವೊ

 ******

- ನಾಮ್‌ದೇವ್ ಗ. ಸುರ್ಲಿಕಾರ್. [ನವೆಂಬ್ರ್, 2020]

[kovita] Xalletole dis (- Namdev G Surlikar)

Xalletole dis


ghorant khaupak jeupak
ken'na mell'lle na zaitoxem
onoullea payanich bhomvlom
poixem nasle gheupak zotem

mottvem kalsamv bhenddar
donuy kuleancher pinjkem
khomsak nasle butamv
distale pott uktem

bhurgem vorgat hamstale
polloun pinjkem mhojem
khandar gheun yeup vochop
pustokanchem vojem

naslem kodel tamret
bosche poddttale sakar
donpar zata mhonnsor bhukhen
kallokh yetalo dolleam mukhar

buteo battleo nasleo ten'na
bhukh tan sostale
ghora pautokoch ghorchem jeunn
aslear jeutalo

obheas kelo na tor
poddttale fattir lodde
roddun roddun suzun
zatale tambdde dolle

onnou ghalun dourunoi
fatticher boddi poddttali
ghontti vajta mhonnsor
chedd'ddi legit bhijtali

xenkreancher dhompram ghaltokoch
fator topun zatalo ghavo
ragan magir naka tosleo
monatlea monat
bhurgem baik ghalli sovo

******

- Namdev G. Surlikar. [Nov, 2020]

[कविता] शाळेतले दीस (- नामदेव ग. सुर्लिकार)

एका तेंपादी सोभीत याद हाडून दिवपी कविता ही; तेदनां घरांत वीज नातल्ली, चिमणेच्या तेलाचो उज्वाड घरांत प्रकास भर्तालो. घर‌भर मनशां आसात पूण पोट‌भर जेवंक नातले दीस ते. न्हेसुंक सार्कें वसतूर ना, पांयांनी न्हेसुंक व्हाणो नांत, पूण मयलांनी चलून इसकोलाक वचुंक आसलें. इसकोलाक रजा आसलेदिसांनी शेतांत, गोट्यांत वा तोटांत काम. ते दीस आयच्या काळार कोण‌यी समजतलो आसाकाय? पूण कितेंय नात‍ल्ल्या त्या दिसांनी सयत सक्कड आसलें; कुटमांत मायामोग, गांवांत शांती समधान, आनी कुडिंक बरी भलायकी. शाळेतल्या दिसाची सोभीत याद हाडून आयिल्ली ही कविता यादिंचो व्होर घेवन येता.

- सं

[कविता] शाळेतले दीस (- नामदेव ग. सुर्लिकार)

शाळेतले दीस


घरांत खावपाक जेवपाक
केन्ना मेळ्ळे ना जायतशें
अनवळ्या पायानीच भोंवलों
पयशें नासले घेवपाक जोतें

मोटवें कालसांव भेंडार
दोनूय कुल्यांचेर पिंजकें
खोमसाक नासले बुतांव
दिसताले पोट उकतें

भुरगें वर्गात हांसताले
पळोवन पिंजकें म्हजें
खांदार घेवन येवप वचप
पुस्तकांचें वजें

नासलें कदेल तामरेत
बसचे पडटाले साकार
दनपार जाता म्हणसर भुखेन
काळोख येतालो दोळ्यां मुखार

बुतयो बाटल्यो नासल्यो तेन्ना
भूख तान सोसताले
घरा पावतकच घरचें जेवण
आसल्यार जेवतालो

अभ्यास केलो ना तर
पडटाले फाटीर लडे
रडून रडून सुजून
जाताले तांबडे दोळे

ओणव घालून दवरुनय
फाटीचेर बडी पडटाली
घंटी वाजता म्हणसर
चेड्डी लेगीत भिजताली

शेंकऱ्यांचेर धोंपरां घालतकच
फातर तोपून जातालो घावो
रागान मागीर नाका तसल्यो
मनातल्या मनात
भुरगें बाईक घाळी सवो

******

-  नामदेव ग. सुर्लिकार. [नवेंबर, २०२०]

ದಾಯ್ಜ್.ಕೊಮ್